Swiendlakalo-nkulu Swa N’wexemu

SWIENDLAKALO swa n’wexemu swi ya swi swi veka erivaleni leswaku ‘masiku yo hetelela,’ lawa Rito ra Xikwembu ri ma hlamuselaka tanihi “minkarhi ya mangava leyi swi nonon’hwaka ku langutana na yona,” ma le kusuhi swinene ni ku hela. (2 Tim. 3:1) Hambiswiritano, loko swi ya swi tika ku hanya emasikwini lawa ya makumu, Yehovha u hambeta a ma katekisa swinene malandza ya yena yo tshembeka emisaveni hinkwayo. Ku nga khathariseki leswaku Timbhoni ta Yehovha ti langutana ni makhombo ya ntumbuluko, vugevenga ni madzolonga, vuvabyi, gome, ku dyuhala ni ku kanetiwa, Yehovha wa ti pfuna leswaku ti hambeta ti ‘tsutsuma hi ku tiyisela eka mphikizano lowu vekiweke emahlweni ka tona.’—Hev. 12:1.

“VUKHONGERI BYA MAVUNWA BYI TA LOVISIWA KU NGA RI KHALE!”

Hi October na hi November 2006, Timbhoni ta Yehovha ti hlanganyele eka tsima ro hlawuleka emisaveni hinkwayo, ro fambisa Kingdom News No. 37, leyi nge “Vukhongeri Bya Mavunwa Byi Ta Lovisiwa Ku Nga Ri Khale!” Xana vanhu va angurise ku yini loko va twa rungula leri khutazaka swonghasi?

Wanuna un’wana wa le Sweden loyi a karhaleke hi vuxisi bya vukhongeri bya mavunwa u te: “Rungula leri a ri nga bi mariri!” Hiloko a sungula ku dyondza Bibele hikwalaho ka Kingdom News leyi, naswona swi ve tano ni le ka vanhu vo tala.

Nepal

Le Kathmandu, Dil u nyike wanuna un’wana la nghenaka kereke xiphephana xa Kingdom News, loyi a a ha ku siyiwa hi nsati etin’hwetini timbirhi leti hundzeke hikwalaho ka vundzendzele. Loko Dil na Buddha nuna wakwe, va tlhelela eka wanuna loyi leswaku va ya bula hi xiphephana lexi, u vule leswaku a nga yi rhandzi ndlela leyi vangheni van’wana va kereke va tikhomaka ha yona nileswaku leswi a swi twaka eka Timbhoni ta Yehovha swi hambanile ni leswi a swi dyondzeke ekerekeni. Buddha u n’wi hlayele Nhlavutelo 18:2-4 kutani a kandziyisa nkoka wa ku huma eka “Babilona Lonkulu.” Eka riendzo ra vunharhu, va sungule ku dyondza na yena, va tirhisa dyondzo 13 eka broxara leyi nge Leswi Xi Swi Languteleke. Eka riendzo ra vuntlhanu va kume nsati se a vuyile ekaya. A a ti tiva Timbhoni ta Yehovha naswona a a swi rhandza leswi ti swi dyondzisaka. Eka riendzo ra vunkombo, nsati na yena u ve kona loko ku dyondziwa kutani a ku: “Nuna wa mina u tshikile ku nwa.”

Brazil

Muchayeri wa thekisi leri nga xithuthuthu, u nyikiwe xiphephana xa Kingdom News kutani a endla leswaku xi voniwa hi mani na mani hi ku heta masiku yo hlayanyana a xi nameke enhlaneni wa baji ra yena. Vakhandziyi a va nga ri na ndlela yo xi balekela hikuva a va boheka ku xi hlaya kukondza va fika laha va yaka kona.

Vamakwerhu vambirhi va xisati le Brazil va fike endlwini yin’wana kutani va hlamarisiwa hi ku vona mfungho lowu nge, “Loko u swi lava nghena kambe u ta huma u ri ntsumbu.” Leswi a va chava, va vutise vamakwerhu vambirhi va xinuna leswaku va nga endla yini. Hiloko vamakwerhu lava va xinuna va ya endlwini yoleyo. Endzhaku ko khongela va kombela nkongomiso wa Yehovha, va gongondzile. N’wini wa muti loyi a nga phorisa, u xi amukele hi mandla mambirhi xiphephana xa Kingdom News. U vule leswaku u karhi u lunghisa yindlu ya yena naswona u veke nhundzu yo tala yo aka ejarateni ra yena. Hi yona mhaka leyi a vekeke mfungho wolowo leswaku makhamba ma nga ngheni. Loko vahuweleri va n’wi endzela nakambe, u pfumele ku dyondzeriwa Bibele.

Mongolia

Tsetsegmaa u ringete ko tala ku chumayela sesi wakwe. Hambileswi sesi wa yena a teke ko hlayanyana eminhlanganweni nileswi a veke kona eXitsundzuxweni eka malembe mambirhi lama landzelanaka, a a nga ri na mhaka ni ntiyiso naswona u ale ku dyondzeriwa Bibele. Kambe loko a vona xiphephana xa Kingdom News No. 37 ekaya ra Tsetsegmaa, u sungule ku tsakela. Va bule kwalomu ka tiawara timbirhi naswona u vutise swivutiso swo tala kutani Tsetsegmaa a swi hlamula hi ku tirhisa Bibele. Leswi a swi tweke swi n’wi hlamarisile kutani u lave ku dyondza leswi engetelekeke naswona sweswi u dyondzeriwa Bibele.

Georgia

Timbhoni ti nyike wansati un’wana xiphephana xa Kingdom News kutani a vutisa loko xi vulavula hi timhaka ta vukhongeri. Loko ti n’wi byele leswaku xi vulavula hi vukhongeri, u xi tekile kutani a tshembisa ku xi hlaya. Loko Timbhoni ti vuya, se a a kanakana leswi Kereke ya Orthodox yi n’wi dyondziseke swona. A a karhatekile hi swiyimo swa misava ni ku hohloka ka mahanyelo ya vantshwa. U vule leswaku va tshama va ri eku holoveni ni vana va yena. Hiloko Timbhoni ti n’wi hlayela 2 Timotiya 3:1-5, kutani a amukela buku leyi nge Leswi Bibele Yi Swi Dyondzisaka. Loko Timbhoni ti famba, u te: “Ndza tiyiseka leswaku vukhongeri bya n’wina i bya ntiyiso. Ndzi bumabumela vantshwa va n’wina hi ndlela leyi va ambalaka ha yona ni ku tshembeka ka vona swin’we ni mahanyelo ya vona lamanene.” Sweswi u tiphina hi ku hlaya timagazini ta hina.

Bangladesh

Richel wa malembe ya 19 hi vukhale u fambise xiphephana xa Kingdom News No. 37, eka nsimu leyi a yi nga si tshama yi tirhiwa. Hambileswi a yi ri kule ni laha a tshamaka kona, u titwe a boheka ku ya hileswi a ku ri tsima ro hlawuleka. Loko a nghena eka yindlu ya vumbirhi, u kume vanhwanyana vambirhi lava tivulaka Vakreste, lava tata wa vona a a ha ku lova etin’hwetini timbirhi leti hundzeke. Va n’wi vutise va ku: “Ha yini Xikwembu xi pfumelele leswaku leswi swi endleka eka hina?” Richel u va hlamule hi ku tirhisa Bibele kutani vanhwanyana lava va amukela xiphephana xa Kingdom News hi mandla mambirhi, ivi va ku eka Richel: “U rhumeriwe hi Xikwembu.” Loko a xiya leswaku va lava ku dyondza hi Xikwembu, u kombele ku va fambisela dyondzo ya Bibele kutani va pfumela. I swichudeni leswinene ngopfu, leswi nga ni swivutiso swo tala. Richel u boheka ku endla ndzavisiso wo tala kambe u tsakisiwa hi ku dyondzisa ntiyiso eka vanhu lava nga ni ndlala ya ntiyiso.

Armenia

Eliza la nga phayona ra nkarhi hinkwawo u kume riqingho ri huma eka Lilit, loyi a a dyondza na yena Bibele. U te: “Namba u tshika hinkwaswo leswi a wu ta swi endla mundzuku, ndzi lava u ta leswaku hi ta sungula ku dyondza.” Xana ku lo endleka yini? Loko Lilit a ha ku sungula ku dyondza Bibele ni Timbhoni ta Yehovha, nuna wa yena u te, “Hlawula loyi u n’wi rhandzaka eka mina na Yehovha.” Hiloko a tshika ku dyondza. Endzhaku ka malembe mambirhi, u kume xiphephana lexi nge Kingdom News No. 37 loko a ri karhi a tlanga ni vana va yena ephakeni. Leswi a swi hlayeke eka xona swi n’wi tsakise lerova a va ni xivindzi xo byela nuna wa yena a ku, “U vonaka u enerisekile loko u ta hanya bya le ka byandlana ku ringana malembe ya 50 ivi u fa, kambe mina a hi byona vutomi lebyi ndzi lavaka ku byi hanya!” Kutani u tshembise nuna leswaku dyondzo ya Bibele yi ta n’wi pfuna leswaku a tshika mahanyelo yo biha, hiloko nuna a n’wi pfumelela ku ya emahlweni a dyondza. Sweswi loko a ri karhi a dyondza, nuna u khathalela vana.

Cambodia

Hi nkarhi wa tsima ro hlawuleka ro fambisa xiphephana xa Kingdom News, murhumiwa la vuriwaka Hugues u nghene ekaya ra wanuna la nga Mumoslem. Loko wanuna loyi a ri karhi a xi hlaya, u pfumerile leswaku vukhongeri a byi fanelanga byi hlanganyela enyimpini. Yena hi byakwe a a hele matimba hikwalaho ka leswi vukhongeri bya yena byi swi endlaka, u vule leswaku byi tionhela vito hi ku hisekela etlhelo. Hugues u n’wi hlayele Pisalema 46:9, leyi vulavulaka hi xitshembiso xa Xikwembu xa misava ya vanhu lava hanyaka hi ku rhula. Evhikini leri landzelaka, Hugues u n’wi nyike buku leyi nge Leswi Bibele Yi Swi Dyondzisaka. Sweswi u yi xixima ngopfu Bibele naswona u fambiseriwa dyondzo ya Bibele.

Rhaxiya

Vamakwerhu vambirhi va xisati va nyike mufundhisi wa kereke ya Orthodox xiphephana xa Kingdom News, kutani a ku eka vona: “Ndza swi tiva leswaku mi vulavula ntiyiso nileswaku Yehovha, Xikwembu xa n’wina, u ta lovisa vukhongeri hinkwabyo bya mavunwa a siya bya n’wina ntsena.” Hiloko a va byela leswaku wa swi tiva leswaku ku ni lava nga ta hanya etilweni ni la misaveni loko se yi ri paradeyisi. Vamakwerhu va n’wi vutisile leswaku ha yini a nga tshiki vukhongeri bya yena loko a tiva leswaku byi ta lovisiwa. U hlamule a ku: “Loko ndzo byi tshika ndzi ta dya yini? Ndzi ni tindlu tinharhu ni timovha ta mune. A ndzi nge swi koti ku hambana na swona!”

TSIMA RO HLAWULEKA RO TIVISA HI TA XITSUNDZUXO

Hi Musumbhunuku, April 2, 2007, Timbhoni ta Yehovha emisaveni hinkwayo ti ve kona eXilalelweni xa Hosi leswaku ti nkhensa Xikwembu hikwalaho ka musa wa xona lowu nga faneriwiki ni rirhandzu ra xona. Leswaku ti lunghiselela xiendlakalo lexi xa nkoka, ti fambise xirhambo xo hlawuleka emisaveni hinkwayo ku sukela hi March 17 ku ya fika hi April 2. Swichudeni swo tala swa Bibele ni vana, va tirhise nkarhi lowu ku andzisa ntirho wa vona, hi ku sungula ku va vahuweleri va mahungu lamanene.

United States

Hi nkarhi wa Xitsundzuxo, makwerhu la tirhaka eyindlu-nkulu ya Timbhoni ta Yehovha eBrooklyn, le New York, u hete kwalomu ka tiawara timbirhi a ri karhi a hlamula tinqingho ta vanhu lava a va lava ku tiva leswaku Xitsundzuxo xi ta khomiwa kwihi. Vo tala lava beke riqingho hi lava a va nyikiwe xirhambo. Wansati un’wana u te: “Ndza ha ku fika ekaya kutani ndzi kume xirhambo xa xiendlakalo xa n’wina xo hlawuleka madyambu lawa. Ndzi lava ku ya kambe a ndzi tivi leswaku xi ta khomiwa hi nkarhi muni.”

Jacquelin la nga ni malembe ya 16 hi vukhale u nyike thicara wa yena xirhambo xa Xitsundzuxo kutani a n’wi hlamusela ndlela leyi xiendlakalo lexi xi nga xa nkoka ha yona. U tsakile loko a n’wi vona eXitsundzuxweni. Tanihi leswi Xitsundzuxo xi khomeriweke eka yin’wana ya Tiholo ta Tinhlengeletano ta Timbhoni ta Yehovha, Jacquelin u valangise thicara wa yena emuakweni wolowo loko Xitsundzuxo xi hela. Thicara loyi u hlamarisiwe hi ndlela leyi muako a wu base ha yona ni ndlela leyi swilo swi hlelekeke ha yona, ngopfu-ngopfu loko a twa leswaku vanhu lava wu akeke ni ku wu khathalela a va hakeriwi. Endzhaku ka sweswo u vule leswaku u yi tsakerile nkulumo kutani a ku, “Xana ndzi nga yi kuma njhani dyondzo ya Bibele leyi xivulavuri xi nga vulavula ha yona?” Jacquelin u te, “Ndzi nga ku dyondzela!” Jacquelin u sungule ku n’wi dyondzela Bibele hi Musumbhunuku wun’wana ni wun’wana loko va huma exikolweni.

Afrika Dzonga

Vamakwerhu evandlheni leri nga ni vahuweleri va kaye leri nga endhawini ya le kule, va hlamarile loko va kuma xirhambo xin’we xa Xitsundzuxo kasi a va kombele leswaku rhavi ri va rhumelela swirhambo swa 500. Va swi kume endzhaku leswaku vatirhi va le posweni a va nga swi koti ku tiva leswaku bokisi ra swirhambo swa vona ri ya kwihi hikuva vito ra adirese ya vandlha ra vona a ri sukile. Vatirhi va le posweni va ri pfurile leswaku va ta tiva leswaku ri ya eka mani kumbe leswaku ri huma kwihi. Loko va vona leswaku ri tamele swirhambo swa Xitsundzuxo, va gimete hileswaku swi fanele swi nyikiwa vanhu, hiloko va nghenisa xirhambo ebokisini ha rin’we ra poso, hi ndlela yoleyo va swi ava hinkwaswo. Vamakwerhu va vone leswaku swirhambo swa vona swi fanele swi fambisiwile loko va kuma xin’we ebokisini ra vona ra poso. Vahuweleri lava va kaye va tsakile loko ku ta vanhu va 42 eXitsundzuxweni, vo tala va vona va tamele swirhambo leswi va swi kumeke emabokisini ya vona ya poso!

Italy

Patrizia u nyike Gabriella xichudeni xa yena xa Bibele xirhambo xa Xitsundzuxo kutani a n’wi hlamusela leswaku ha yini swi ri swa nkoka ku va kona. Mattia, n’wana wa Gabriella, la nga ni malembe ya ntlhanu hi vukhale a a rhiye ndleve loko va ri karhi va vulavula kutani a vutisa loko a nga nyika thicara wa yena xirhambo. Hi xamundzuku xa kona, Mattia u nyike thicara wa yena xirhambo kutani a n’wi hlamusela leswaku i swa nkoka ku va kona eXitsundzuxweni nileswaku u ta tsaka ngopfu loko o va kona. Endzhaku ka masiku ma nga ri mangani loko ku khomiwe nhlangano ni vatswari, thicara wa Mattia u byele Gabriella leswaku u tsakisiwe hi xivindzi xa Mattia lerova u endle xiboho xa leswaku u ta va kona eXitsundzuxweni. U fambe na Gabriella na Mattia loko va ya eXitsundzuxweni. Thicara loyi u rhiye ndleve loko nkulumo yi ri karhi yi nyikeriwa naswona u tsakisiwe hi ndlela leyinene leyi vana hinkwavo a va tikhome ha yona. Loko Xitsundzuxo xi hela, u vule leswaku se wa swi twisisa leswaku i xa nkoka hilaha Mattia a vuleke hakona. Endzhaku ka sweswo, Mattia u n’wi nyike buku leyi nge Buku Yanga Ya Timhaka Ta Bibele leswaku a ta yi nyika n’wana wa yena naswona Gabriella na Patrizia va ya emahlweni va bula na yena.

Mexico

Nkulu un’wana u chumayele mufundhisi wa kereke ya Presbeteriya kutani a n’wi rhambela eXitsundzuxweni. Mufundhisi u xi amukele hi mandla mambirhi naswona nkulu u hlamarile loko a kombela swin’wana leswaku a ta swi nyika vangheni va kereke ya yena. Vamakwerhu va tsakile loko va vona mufundhisi a ta eXitsundzuxweni ni vanhu va 40 va kereke ya yena, ha un’we a khome xirhambo xa yena lexi a xi humeseke loko a nghena enyangweni. Mufundhisi u vule leswaku vo tala a va lava ku ta kambe va anakanye leswaku va nge pfumeleriwi ku nghena loko va nga khomanga swirhambo. Vahuweleri va 11 va vandlha leri va tsake ngopfu hileswi a ku ri ni vanhu va 191 eXitsundzuxweni!

Australia

Jaha rin’wana leri dyondzaka Bibele ni Timbhoni ta Yehovha naswona ri tirhaka laha vanhu va jimelaka kona, ri sungule ku byela van’wana hi ta dyondzo ya Bibele. Un’wana wa vona a ku ri wansati loyi ri n’wi rhambeleke eXitsundzuxweni kutani a pfumela. Loko wansati loyi a ha ri muntshwa, u tshama a twa Timbhoni ti ri karhi ti yimbelela eHolweni ya Mfumo ya le kusuhi ni le kaya ka vona kutani a kombela vatswari va yena loko a nga ya kambe a va nga swi lavi leswaku a tolovelana ni Timbhoni ta Yehovha. Hambiswiritano, u yile eka minhlangano yo karhi kambe u lahlekelane ni Timbhoni loko ndyangu wa ka vona wu rhurha. Loko a fika eXitsundzuxweni, u hlanganisiwe ni makwerhu un’wana wa xisati loyi a sunguleke ku dyondza Bibele na yena. U sungule ku va kona eminhlanganweni ya vandlha naswona nuna wa yena wa tsakela na yena. Jaha leriya ri tirhaka laha ku jimeriwaka kona ri kale ri va muhuweleri la nga khuvuriwangiki naswona ri tiyimisele ku khuvuriwa.

Kazakhstan

Wansati un’wana la tsakelaka u vule leswaku a nge swi koti ku ta eXitsundzuxweni hileswi a nga ni vana lavatsongo. Kambe, hi siku ra Xitsundzuxo, xinhwanyetana xa yena xa malembe ya ntlhanu hi vukhale, xi tiambexile kutani xi ya eHolweni ya Mfumo xi ri xoxe. Loko a vona leswaku a xi kona u hatle a sungula ku xi lava. Hiloko swi ta emianakanyweni ya yena leswaku swi nga ha endleka xi ye eXitsundzuxweni, hakunene loko a fika eHolweni ya Mfumo u xi kume xi ri kona. Leswi xi titeleke xi ri xoxe eXitsundzuxweni, mana wa xona u nambe a tshama ekusuhi na xona a rhiya ndleve.

KU SIMEKA MAHUNGU LAMANENE HI NAWU

Furwa

Ku sukela hi 1996, valawuri van’wana eFurwa va sindzise leswaku rhavi ri fanele ri hakerisiwa xibalo eka mali leyi swirho swa Bethele ya le Louviers swi nyikiwaka yona. Hambiswiritano, hi March 28, 2007, Huvo ya Vukongomisi ya le Paris yi endle xiboho xa leswaku swirho swa Bethele a swi fanelanga swi hakela xibalo hikuva a swi hiriwanga. Huvo yi vule leswaku “Timbhoni ta Yehovha leti tirhaka eBethele ya le Louviers, ti endla ntirho lowu hikwalaho ka swivangelo leswi khumbaka vukhongeri bya tona.” Xiboho lexi xi pfumelelana ni mintirho leyi endliwaka eBethele xi tlhela xi pfumelelana ni xiboho lexi humesiweke hi huvo leyi tlakukeke ya vukongomisi ya le Brazil.

Eka nandzu wun’wana, doroba ra le Lyon ri ale ku hirisa holo ya doroba eka Timbhoni ta Yehovha leswaku ti ta khoma Xitsundzuxo eka yona. Hambiswiritano, hi March 15, 2007, muavanyisi wa huvo ya vukongomisi u lerise valawuri va doroba leswaku va pfumelela Timbhoni ta Yehovha ti tirhisa holo yoleyo. Valawuri va doroba va endle xivilelo eka Huvo ya Doroba, kambe Huvo ya Doroba yi yime ni xiboho lexi endliweke hi huvo ya vukongomisi, lexi vuleke leswaku leswi valawuri va swi endleke “a swi le nawini nikatsongo naswona i ku kavanyeta ntshunxeko wo hlangana lowu munhu un’wana ni un’wana a nga na wona.” Huvo ya Doroba yi tlhele yi lerisa valawuri va doroba leswaku va hakela mali leyi nhlangano wa Timbhoni ta Yehovha wa kwalaho wu yi tirhiseke ku hakela magqweta.

Hambileswi huvo yi endleke xiboho lexi le Lyon, Timbhoni ta Yehovha eFurwa ta ha khome xo tika hikwalaho ka vakaneti, vaviki va mahungu hambi ku ri valawuri. Hi xikombiso, hi 2005 loko ku vulavuriwa ni wansati loyi a nga tshama a va muyimeri wa Nhlengeletano ya Tiko ya le Furwa, u hehle Timbhoni ta Yehovha leswaku “ti tihlele ku fana ni vandlha ra tinsula-voya.” Timbhoni ta Yehovha ti endle xivilelo hikwalaho ka xihehlo xexo kutani hi July 2007, Huvo ya Swivilelo ya le Rouen yi endle xiboho lexi yimaka ni Timbhoni, yi vula leswaku leswi wansati loyi a swi vuleke i ku “hundzeleta swilo nileswaku leswi a nga swi vula a swi amukeleki.” Mfumo wa Furwa wa ha lava tindlela to hakerisa Nhlangano wa Timbhoni ta Yehovha xibalo hambileswi swi nga riki enawini. Mhaka leyi yi le mavokweni ya Huvo ya le Yuropa ya Timfanelo ta Vanhu naswona vamakwerhu va tshemba leswaku Yehovha u ta va seketela.

Uzbekistan

Ku vikiwe swiendlakalo swo tlula gidi swa ku khomiwa, ku pfaleriwa kumbe ku hlaseriwa ka vamakwerhu. Vamakwerhu vo tala lava khomiweke va khomiwe hi nkarhi wa Xitsundzuxo xa 2005 ni xa 2006. Kambe ha tsaka ku vika leswaku hi 2007 a ku vanga ni swiphiqo hi nkarhi wa Xitsundzuxo. Hambiswiritano, sweswo a swo va swa xinkarhana. Endzhakunyana ka Xitsundzuxo, makwerhu wa xinuna ni wa xisati va khomiwile, va hehliwa hi ku dyondzisa timhaka ta vukhongeri. Makwerhu loyi, la nga ni nsati ni vana vambirhi, u gweviwe malembe mambirhi kutani a namba a pfaleriwa hi wona nkarhi wolowo. Makwerhu lowa xisati a nga pfaleriwanga kambe u gweviwe malembe mambirhi a tirha tanihi mubohiwa naswona mfumo wu teka mali yo karhi ya muholo wa yena tanihi ndlela yo n’wi xupula.

Georgia

Hi May 3, 2007, Huvo ya le Yuropa ya Timfanelo ta Vanhu yi pfumelelane hi rito rin’we leswaku leswi mfumo wa Georgia wu swi endleke hi ku tshika Timbhoni ta Yehovha ti hlaseriwa kambe wu nga ti sirheleli a swi le nawini, kutani yi lerise leswaku lava hlaseriweke va hakeriwa. Ku sukela hi October 1999 ku ya fika hi November 2002, ku vikiwe milandzu ya 138 ya ku hlaseriwa ka Timbhoni ta Yehovha hi tihanyi. Minkarhi yin’wana maphorisa a ma ri kona kambe a ma ti sirhelelanga. Huvo yi bohe leswaku hikwalaho ko tsandzeka ku sirhelela vamakwerhu eku hlaseriweni hi vanhu lava hisekelaka vukhongeri etlhelo, mfumo wa khale wa le Georgia wu tlule xiboho lexi wu xi endleke eka Nhlengeletano ya le Yuropa ya Timfanelo ta Vanhu, wu tlhele wu honisa ntshunxeko wa vamakwerhu wo gandzela va ntshunxekile. Xiboho lexi, lexi nga lo dlaa, erivaleni xi komba leswaku ntshunxeko wa vukhongeri a wu nge honisiwi nileswaku Timbhoni ta Yehovha ti fanele ti sirheleriwa hambiloko ti kanetiwa hi vanhu hinkwavo.

Eritrea

Endzhaku ka malembe ya ntlhanu loko mfumo wu lerise leswaku vukhongeri hinkwabyo lebyi tiyimeleke byi fanele byi kongomisiwa hi vukhongeri bya mune lebyi lawuriwaka hi mfumo, Timbhoni ta Yehovha ti hambete ti kanetiwa ngopfu. Vamakwerhu va khomiwa, va xanisiwa ni ku tshikileriwa leswaku va landzula ripfumelo ra vona hambiloko va hlangane emakaya ya vona. Hi April 2007, a ku ri ni Timbhoni ta Yehovha ta 24 leti a ti pfaleriwile hikwalaho ko ya eminhlanganweni, ku chumayela kumbe ku ala ku ya enyimpini hileswi mapfalo ya tona ma nga ti pfumeleriki. Eka Timbhoni leti pfaleriweke, tinharhu ti ni malembe ya 60 hi vukhale kumbe ku tlula, ta khume ti pfaleriwe emakhotsweni lawa swiyimo swa kona swi nga dyisiki byi rhelela, kasi tinharhu hi mpfhuka ti pfaleriwa hi 1994. Hambileswi ku nga si vaka ni nhlanga leyi balekaka ngati eka matshalatshala yo pfuna Timbhoni leti, ha tshemba leswaku ku nga ri khale ti ta kuma ntshunxeko naswona hi tshembele eka Yehovha loyi a ponisaka malandza ya yena “eku tshikileriweni ni le madzolongeni.”—Ps. 72:14.

Andorra

Timbhoni ta Yehovha ti sungule ku endla xikombelo xa tsarisiwa ximfumo ku sukela hi 1973, kambe ti kale ti tsarisiwa hi December 14, 2006. Ku ni vahuweleri va Mfumo vo tlula 150 eAndorra.

Korea

Se ku hundze malembe yo tlula 50 vamakwerhu eKorea Dzonga va ri karhi va pfaleriwa ekhotsweni hikwalaho ko ala ku ya enyimpini. Ntlhanu wa vona va file hikwalaho ko ala ku va masocha. Endzhaku ko ringeta tindlela hinkwato leti nga enawini eKorea Dzonga, Makwerhu Yoon na Choi, va endle xivilelo eka Komiti ya Timfanelo ta Vanhu ya Nhlangano wa Matiko. Hi November 3, 2006, komiti leyi yi vule leswaku tiko ra Korea Dzonga ri ni nandzu wa ku honisa timfanelo ta vamakwerhu kutani yi lerise leswaku va hakeriwa. Komiti leyi yi tlhele yi tsundzuxa tiko ra Korea Dzonga leswaku ri simeka milawu leyi nga ta endla leswaku vanhu van’wana lava alaka ku va masocha hikwalaho ka leswi mapfalo ya vona ma nga va pfumeleriki, va nga boheki ku tlula milawu leyi va hanyaka ha yona hikwalaho ko chava ku pfaleriwa ekhotsweni. Ku pfaleriwa vamakwerhu va kwalomu ka 70 hi n’hweti ekhotsweni.

Enkarhini lowu hundzeke, vamakwerhu vo tala lava aleke ku va masocha a vo pfumelelana ni xiboho lexi endliwaka hi huvo leyi tengaka nandzu wa vona, lexi a xi lava leswaku va tirhela xigwevo xa lembe ni hafu ekhotsweni. Hambiswiritano, sweswi vamakwerhu va endla xivilelo eka xiboho xa huvo yoleyo kutani sweswo swi endle leswaku ku va ni swivilelo swo tala leswi kambisisiwaka. Hikwalaho, mfumo wa le Korea wu tivise leswaku wu tiyimisele ku endla lunghiselelo ra leswaku lava alaka ku va masocha, va endla mintirho yin’wana yo pfuna vaaki. Leswaku sweswo swi ta pfuka swi endlekile, swi ta vonaka hi ku famba ka nkarhi, niloko mintirho leyi nga ta endliwa yi ta pfumelelana ni mapfalo ya lava va faneleke va yi endla.

Argentina

Hi July 2007, holobye wa vululami ni timfanelo ta vanhu u sayine xiboho lexi endliweke hi vaholobye, xa leswaku Daniel Victor Guagliardo, u pfaleriwe hi xihoxo ekhotsweni hileswi a aleke ku va socha, hikwalaho ka leswi ripfalo ra yena leri leteriweke hi Bibele ri nga n’wi pfumeleriki. Xiboho lexi xi ta pfuna van’wana lava pfaleriweke swi nga fanelanga, hileswi mapfalo ya vona ma nga va pfumeleriki ku va masocha.

Armenia

Vamakwerhu va 19 va voniwe nandzu loko va ale ku endla mintirho leyi a yi ta endla leswaku va hlanganyela eka swa tipolitiki. Hiloko hi September 2006, va kuma papila leri humaka eka gqweta, ri va tivisa leswaku milandzu ya vona yi suriwile. Kambe, mfumo wa ha fanele wu endla lunghiselelo ra leswaku ku va ni mintirho yin’wana leyi nga ta pfumelelana ni swiyimo swa Vakreste. Hikwalaho, exikarhi ka lembe ra 2007, a ku ri ni vamakwerhu va 71 lava ha riki vantshwa, lava a va gweviwe malembe manharhu.

Vahan Bayatyan i wun’wana wa vantshwa lava nga Timbhoni, lava voniweke nandzu va tlhela va pfaleriwa eArmenia. Endzhaku ko gweviwa lembe ni hafu, muchuchisi u kombele leswaku ku engeteleriwa malembe ya xigwevo xa Makwerhu Bayatyan, a vula leswaku ku ala ka yena ku va socha hikwalaho ka leswi ripfalo ra yena ri nga n’wi pfumeleriki, “a ku nga sekeriwanga helo naswona a ku ri ni khombo.” Huvo ya swirilo yi pfumerile kutani xigwevo xa yena xi engeteleriwa hi lembe ivi xi tiyisekisiwa hi huvo leyi tlakukeke. Hiloko Makwerhu Bayatyan a endla xivilelo eka Huvo ya le Yuropa ya Timfanelo ta Vanhu. Huvo leyi yi xi amukerile xivilelo xa yena, yi vula leswaku yi ta yi kambisisa kahle mhaka leyi. Hi ni ntshembo wa leswaku xiboho lexi nga ta endliwa xi ta pfuna Makwerhu Bayatyan ni van’wana lava langutaneke ni xiyimo lexi fanaka.

Azerbaijan

Hambileswi Timbhoni ta Yehovha ti tsarisiweke ximfumo eAzerbaijan, vamakwerhu va ha xanisiwa. Hi xikombiso, hi December 24, 2006, vamakwerhu lava tlulaka 200 ni vanhu lava tsakelaka a va hlangane eBaku leswaku va ta bula hi Bibele, hiloko ku ta maphorisa lama hlomeke ni vaviki va mahungu ya le ka thelevhixini swin’we ni vatirhela-mfumo, va fika va herisa nhlangano lowu. Maphorisa lawa, lawa a ma nga ri na wona maphepha yo secha, ma fike ma tshova nyangwa wa muako lowu vamakwerhu a va wu hirile kutani ma khoma hinkwavo lava a va ri kona. Vamakwerhu vambirhi va biwile. Maphorisa ma teke minkandziyiso yo tala ya Bibele, bokisi ra munyikelo leri a ri ri ni mali, maphepha lama kombisaka leswaku va tsarisiwe ximfumo, swin’we ni tikhompyuta to hlayanyana leti a va ti tirhisa ku hundzuluxela Bibele ni minkandziyiso leyi sekeriweke eBibeleni. Vo tala va lava a va pfaleriwile va ntshunxiwe hi rona siku rero. Hambiswiritano, eka lava khomiweke a ku ri ni vamakwerhu va tsevu lava humaka ematikweni mambe, lava hlongoriweke etikweni hileswi va hehliweke hi ku “dyondzisa vukhongeri bya mavunwa.” Vamakwerhu va pfaleriwa etikweni leri hileswi va alaka ku va masocha. Nakambe swa tika ku rhumela minkandziyiso ya Bibele.

Israel

Hi February 5, 2007, Huvo ya Muganga ya le Haifa yi vule leswaku valawuri va doroba ra Haifa va ve ni xihlawuhlawu eka Timbhoni ta Yehovha, hi ku ala leswaku ti tirhisa holo ya ndhawu leswaku ti khoma ntsombano. Huvo yi va lerise leswaku va riha Timbhoni hi ku hakela yin’wana ya mali leyi ti yi humeseke leswaku ti hakela magqweta. Gqweta-nkulu ra mfumo ri vule leswaku valawuri va doroba va “tlule nawu hikuva a va fanelanga va hlawula ndluwa va siya hove loko va tirhisana ni vanhu.” Xiboho lexi endliweke hi huvo ya le Haifa xi ta endla leswaku vamakwerhu va kota ku khoma minhlangano va tele.

Tajikistan

Vatirhela-mfumo lava lawulaka ku rhumeriwa ni ku amukeriwa ka swilo etikweni va teke minkandziyiso leyi a yi rhumeriwe etikweni leri kambirhi naswona va kombele holobye wa ta ndhavuko leswaku a yirisa minkandziyiso ya hina ni nhlengeletano ya hina. Leswi a ti bihile, mpatswa lowu nga varhumiwa wu sindzisiwe ku huma etikweni. Hiloko hi October 11, 2007, valawuri va yirisa ntirho wa Timbhoni ta Yehovha. Ku endliwe xivilelo eka swiendlo leswi hinkwaswo swa ku tlula nawu naswona hi khongelela leswaku Yehovha a pfula ndlela ya leswaku ntirho wo chumayela wu ya emahlweni etikweni leri nga ni vanhu lava nga ni ndlala ya ntiyiso, leri veke ni ku andza hi tiphesente ta 14 hi lembe ra ntirho ra 2007.

Ukraine

Loko ku lo sala siku rin’we leswaku ku nyikeriwa nkulumo yo hlawuleka eXitediyamu xa le L’viv, hi May 12, 2007, vakongomisi va xitediyamu va alele vamakwerhu ku tirhisa xitediyamu hileswi vakaneti va va sindziseke ku endla tano. Valawuri va le Ukraine ni va le United States va hatle va tivisiwa hi mhaka leyi, leswaku va ta tiyisekisa vakongomisi va xitediyamu leswaku Timbhoni ta Yehovha a ti nga ta vanga hasahasa edorobeni. Loko vakongomisi va xitediyamu va ri karhi va vulavula ni valawuri hi siku ra nkulumo leyi, Timbhoni ta Yehovha a ti ri karhi ti fiketela hi timovha, mabazi ni switimela eL’viv, ti huma etindhawini to hambana-hambana ta Ukraine. Vamakwerhu va fike va yima ehandle ka xitediyamu lexi lotleriweke va ri karhi va tibulela ni ku yimbelela tinsimu ta Mfumo. Loko ku lo sala timinete ta 20 leswaku nongonoko wu sungula, vatirhi va le xitediyamu va pfumerile ku xi pfula kutani vamakwerhu va nghena. Ku nghene vamakwerhu lava tlulaka 27 000 leswaku va ta yingisela nkulumo leyi khutazaka ya mufamberi wa marhavi.

Turkmenistan

imbhoni ta Yehovha a ti tsarisiwanga ximfumo eTurkmenistan. Hikwalaho valawuri a va nga va kavanyeti vamakwerhu entirhweni wa vona kambe se va sungule ku va xanisa. Hambiswiritano, vamakwerhu va kanya mbilu va hlangana ni ku chumayela mahungu lamanene hi vutlhari. (Mat. 10:16) Vamakwerhu vanharhu lava ha riki vantshwa va khomiwile hileswi mapfalo ya vona ma nga va pfumeleriki ku ya evusocheni. Hinkwavo va voniwe nandzu; vambirhi va gweviwile kambe a va pfaleriwanga kasi lowun’wana u pfaleriwile kutani a gweviwa lembe ni hafu ekhotsweni. Tanihi leswi swiyimo swa le khotsweni swi nga dyisiki byi rhelela, vamakwerhu va le matikweni man’wana va ringeta ku n’wi pfuna. Kambe magqweta lama nga vamakwerhu, lama humaka ematikweni mambe a ma pfumeleriwi ku nghena etikweni leswaku ma ta yimelela vamakwerhu va le tikweni leri ehubyeni. Hambiswiritano, a wu kona mfumo wa vanhu lowu nga siveleka La nge Henhla-henhla leswaku a twa swikhongelo swa hina swo kombela mpfuno.—1 Tim. 2:1, 2.

Kazakhstan

Vatirhela-mfumo va tsevu lava tirhaka ehofisini ya magqweta, va kavanyete nhlangano wa vamakwerhu lowu a wu khomeriwe endlwini ya makwerhu un’wana wa xisati, exifundzheni lexi Timbhoni ta Yehovha ti nga si tsarisiwaka ximfumo. Makwerhu un’wana wa xinuna, loyi a a nga ri kona enhlanganweni lowu ni van’wana va ntlhanu va xisati va gweviwe mali yo tala. Hinkwavo va endle xivilelo eka milandzu leyi va hehliwaka ha yona.

Turkey

Hi July 31, 2007, rhavi ra le Turkey ri tsakile loko ri kuma papila leri tiyisekisaka leswaku ri tsarisiwe ximfumo hi vito leri nge Nhlangano Lowu Seketelaka Ntirho Wa Timbhoni Ta Yehovha. Ku hele malembe lama tlulaka mambirhi rhavi ri ri karhi ri ringeta ku tsarisiwa hikuva mfumo a wu vula leswaku ku tsarisiwa ka rona a ku le nawini. Endzhaku ka loko huvo leyitsongo ya le Istanbul yi tiyisekise leswaku ku tsarisiwa ka rhavi ku le nawini, mfumo wu endle xivilelo eka huvo leyi tlakukeke. Hambiswiritano, huvo leyi tlakukeke yi pfumelelane ni huvo leyitsongo kutani rhavi ri tsarisiwa ximfumo. Nhlangano lowu lowuntshwa wu nyika rhavi mpfumelelo wa le nawini wa vukhongeri, wo xava ni ku va ni ndhawu ya wona, wo hira tindhawu to khomela tinhlengeletano eka tona, wo amukela minyikelo ni wa ku lwela malunghelo ya Timbhoni ta Yehovha ehubyeni.

Timbhoni timbirhi ta Yehovha leti hehliweke hi ku “kavanyeta vanhu” loko ti ri karhi ti fambisa Kingdom News No. 37, ti gweviwe ku hakela mali. Hambiswiritano, Huvo ya ku Rhula ya le Istanbul Sisli yi sule xigwevo xolexo, yi vula leswaku “loko Timbhoni ta Yehovha ti fambisa minkandziyiso ya tona . . . ti va ti endla hi ku pfumelelana ni ntshunxeko wo vula leswi munhu a swi anakanyaka ni leswi a swi pfumelaka” ni leswaku vaaka-tiko va le Turkey “va ntshunxekile ku vulavula hi vukhongeri bya vona.” Hambiswiritano, vamakwerhu eTurkey va ha langutane ni swiphiqo swin’wana, swo fana ni ku sindzisiwa ku hlanganyela eka swa tipolitiki, laha loko vamakwerhu va fika emalembeni yo tsarisela vusocha kambe va nga tsarisi, va xungetiwaka hi ku pfaleriwa kumbe ku hakerisiwa mali.

Tanihi leswi hi vonaka hakona eka swiviko leswi, minkarhi yo tala Timbhoni ta Yehovha ti endla swivilelo eka Huvo ya le Yuropa ya Timfanelo ta Vanhu loko matiko ya le Yuropa ma lwisana ni mfanelo ya hina yo gandzela Xikwembu. Exikarhi ka lembe ra 2007, a ku endliwe swivilelo swa 22 leswi huvo leyi a ya ha fanele yi swi kambisisa, leswi katsaka ku nga hlanganyeli ka Timbhoni etimhakeni ta tipolitiki, ku tsarisiwa ximfumo ni ku xanisiwa. A swi kanakanisi leswaku hi fanele hi khongelela vamakwerhu lava langutaneke ni swiyimo leswi eYuropa ni le matikweni man’wana, leswaku va tiyisela.—2 Kor. 1:10, 11.

KU TIYISELA NI KU TSHEMBEKA

Eka Buku Ya Lembe ya nan’waka, u ta dyondza hi ndlela leyi vamakwerhu va le Rhaxiya va tshameke va tshembekile ha yona hi nkarhi wa mfumo wa Soviet Union loko ntirho wa Timbhoni ta Yehovha wu yirisiwile. Vamakwerhu va khomiwe hi tihanyi leti hundzeletiweke. Hambiswiritano, ni le matikweni lawa hi tirhelaka Yehovha hi ntshunxekile, Sathana ni malandza ya yena va ringeta hi matimba ku hi tshikisa vutshembeki bya hina hi tindlela leti hi nga ti xiyiki nikatsongo. Kambe, Yehovha wa tsaka loko malandza ya yena ma tshama ma tshembekile! (Swiv. 27:11) Hi leyi mintokoto yin’wana leyi kombisaka ndlela leyi vanhu va Xikwembu emisaveni hinkwayo, va tiyiselaka ni ku tshama va tshembekile ha yona eka swiyimo leswi va langutanaka na swona siku ni siku.

Sweden

Makwerhu un’wana wa xisati la nga phayona naswona a tirhaka exibedlhele, u tshamela ku gangisiwa hi vatirhi-kulobye. Hambiswiritano, u endle rhengu leri n’wi pfunaka leswaku a kota ku hlula ndzingo lowu. Xo sungula, u byela vatirhi va xinuna lava ha ku hiriwaka leswaku i Mbhoni ya Yehovha naswona ko tala u vula leswaku u tekiwile. U tirhisa nkarhi wun’wana ni wun’wana lowu a wu kumaka ku byela vatirhi-kulobye hi ndlela leyi yena ni nuna wa yena va rhandzanaka ha yona naswona u kandziyisa mhaka ya leswaku vukati bya vona byi tiyile. Loko swi lava leswaku yena ni dokodela un’wana va bula hi xiyimo xa muvabyi, u hlela leswaku va hlangana eholweni yo dyela, laha ku vaka ku ri ni vanhu van’wana. Loko swo tshuka swi endleka leswaku munhu wa xinuna a nghena laha makwerhu loyi a tirhelaka kona a nga swi langutelanga, kutani a pfala nyangwa, makwerhu loyi u khongela Yehovha a kombela xivindzi xo kota ku vulavula a ntshunxekile kambe a vulavula ntsena hi timhaka leti khumbaka ntirho.

Jarimani

Marian se u ni malembe ya 13 a tirha ekhampanini yin’we le n’walungu wa Jarimani. Tanihi leswi a pfaka a tirha ni vusiku, swa tika leswaku a va kona eminhlanganweni hinkwayo ya le xikarhi ka vhiki. U ri: “Sweswo swi ndzi tisela gome hikuva minhlangano ya hina i ya nkoka swinene eka mina. Ndzi khongele Yehovha ko tala ndzi kombela leswaku a ndzi pfuna ndzi kuma ndlela yo va kona eka minhlangano hinkwayo.” U khongerile a kombela xivindzi xo kombela mpfumelelo eka ndhuna ya yena hiloko yi n’wi pfumelela ku chayisa ka ha ri ni nkarhi hi siku ra nhlangano, kambe yi vula leswaku u ta famba ntsena loko a hete ntirho wa yena. Lunghiselelo leri ri tirhile kukondza loko ndhuna ya yena yi siviwa hi yin’wana, leyi a aleke loko Marian a lava ku chayisa ka ha ri ni nkarhi. Xana Marian a a ta xi tlhantlha njhani xiphiqo lexi? U ri: “Ndzi yi byele hi ku titsongahata leswaku ndzi kombela ku vulavula ni n’wini wa khamphani.” Eka bulo leri Marian a veke na rona ni n’wini wa khamphani, u n’wi chumayerile a tlhela a n’wi hlamusela leswaku ha yini a lava ku ya eminhlanganweni. N’wini wa khamphani u pfumerile leswaku Marian a chayisa ka ha ri ni nkarhi hi siku ra nhlangano, ntsena loko vatirhi-kulobye va pfumela. Hiloko Marian a vita vatirhi-kulobye a va hlamusela mhaka leyi a tlhela a tirhisa nkarhi wolowo ku va chumayela. Sweswi u kota ku va kona eminhlanganweni hinkwayo ya le xikarhi ka vhiki. U ri: “Ndzi boheke ku lwa hi matimba leswaku ndzi kota ku va kona eminhlanganweni kambe ku khongela Yehovha hi ku phikelela ku ndzi nyike matimba lama tlulaka lama tolovelekeke.”

Britain

Sophie la nga ni malembe ya 16 hi vukhale u vula leswaku ku tshamela ku rhambiwa eswinkhubyaneni swa le xikolweni swi ringa ripfumelo ra yena. U ri: “Hambileswi swinkhubyana swin’wana swi vonakaka swi tsakisa, ndza swi tiva leswaku loko ndzo ya, ndzi ta tisola hikuva swilo swin’wana leswi endliwaka eka swona swi ni khombo. Nhwanyana un’wana wa ha ku ndzi rhambela exinkhubyanini xin’wana, a vula leswaku a ku ri xinkhubyana xa ku titsakisa. Ndzi swi kume endzhaku leswaku hi mahelo-vhiki wolawo a ku ri siku ra yena ra ku velekiwa. Ndza tsaka leswi ndzi nga yangiki hikuva ndzi twe leswaku vanghana va yena vo tala va le xikolweni va nwe va kala va dakwa tanihi leswi vatswari va yena a va nga ri kona vusiku byebyo. Hi yona mhaka leyi ndzi vonaka swi ri vutlhari ku hungasa ni vamakwerhu lavakulu ni lava ha riki vantshwa, lava nga ta ndzi pfuna leswaku ndzi tiyisa vuxaka bya mina na Yehovha. Mina ni ndzisana ya mina hi rhamba vanhu lavakulu ni vantshwa, leswaku hi ta tiphina hi vuyimbeleri nimadyambu, hi oxa nyama kumbe hi valanga tiko. Sweswi loko vanhu va ndzi rhamba exinkhubyanini xo karhi, ndza tivutisa leswaku xi ta byi khumba njhani vuxaka bya mina na Yehovha. Ndzi dyondze leswaku minkarhi hinkwayo swa vuyerisa ku endla leswinene.”

Italy

Giovanni la nga ni malembe ya 17 hi vukhale, a a tshamela ku gangisiwa hi vanhwanyana lava a nghenaka na vona xikolo, kambe ku ni loyi a a phikelela ku tlula lavan’wana. Loko a vona leswaku Giovanni a nga na mhaka na yena, u n’wi tsalele papila a ku: “Ndzi vona onge mina na wena hi ta va ririmi ni marha. Ndza tifela hi wena. Ndzi rhandza ndlela leyi u tikhomaka hi yona naswona swi tele leswi ndzi swi rhandzaka eka wena. Ndzi tshemba leswaku u ta yi dyela marhambu ya nhloko mhaka leyi. Hi mina xiluva xa mbilu ya wena.” U gimete hi ku tsala vito ra yena a tlhela a tswontswa mvhilopho ya kona hi nomu lowu pendiweke. Giovanni u ri: “Entiyisweni emasikwini ma nga ri mangani lama landzeleke, a ndzi khome nyarhi hi timhondzo. A ndzi tivutisa loko ndzi ta tlhela ndzi kuma nhwanyana wo saseka ku fana na yena. Loko vadyondzi-kulorhi va twa hi mhaka leyi, va ndzi byele leswaku ndzi pfumela. Va te, ‘Loko wo ala u ta va u pfalekile.’ Hambiswiritano, a ndzi swi vona leswaku ndzi ta va ndzi xenga Yehovha. Hiloko ndzi n’wi khongela ndzi tlhela ndzi vulavula ni vatswari va mina, lava rhangeke hi ku hlamala, hikuva a va nga ehleketi leswaku ndzi langutane ni xiyimo lexi. Hi ve ni dyondzo leyi dzikeke ya Bibele, hi tirhisa ngopfu buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka. Ndzi tlhele ndzi vulavula ni vamakwerhu lava wupfeke evandlheni. Eku heteleleni, ndzi endle xiboho lexi faneleke kutani ndzi ala ku rhandzana ni nhwanyana loyi. Sweswi vadyondzi-kulorhi va ndzi xixima hileswi ndzi aleke ku endla swo biha.”

Mexico

Antonio la nga ni malembe ya 59 hi vukhale naswona se a nga ni malembe ya 37 a khuvuriwile, u ri: “Loko ndza ha ri ni malembe ya 19, ku kumeke leswaku ndzi ni vuvabyi bya mahlangano ya marhambu. Swi ndzi heta matimba ku hanya ni vuvabyi lebyi endlaka leswaku ndzi nga koti ku endla nchumu ni ku famba hi xitulu xa lava lamaleke ku ringana malembe ya 35. Minkarhi yin’wana a ndzi va ni gome. Kambe lexi ndzi tiyiseke i ku tshama ndzi khomekile hi mintirho ya le vandlheni hilaha ndzi nga kotaka hakona.” Emalembeni ya nkombo lama hundzeke, xiyimo xa Antonio xi nyanyile loko mana wa yena loyi a a n’wi khathalela a lova. Xana a a ta langutana njhani ni xiyimo lexi? U ri: “Ku sukela hi nkarhi wolowo, ndzi swi vonile leswaku Yehovha a nga ma siyi malandza ya yena kambe wa ma khathalela. Vandlha ri hlele leswaku ku va ni makwerhu la nga ta ndzi khathalela naswona vamakwerhu van’wana va ndzi pfuna hi ku ndzi hakelela leswi ndzi swi pfumalaka.” Antonio u langutele nkarhi lowu switshembiso hinkwaswo swa Mfumo swi nga ta hetiseka ha wona.

“PFULA NDHAWU YA NTSONGA WA WENA YI ANAMA”

“Pfula ndhawu ya ntsonga wa wena yi anama. Naswona a va tshambulute tinguvu ta ntsonga wa tabernakela ya wena leyikulu.” (Esa. 54:2) Ku hetiseka loku hlamarisaka ka marito ya vuprofeta lebyi ku vonaka eka xilaveko lexi tshamaka xi ri kona xa tindhawu leti engetelekeke to gandzela eka tona ni ku kurisiwa ka miako ya marhavi. Hambileswi n’wexemu ku endliweke mintirho yo tala yo aka emisaveni hinkwayo, Timbhoni ta Yehovha ti tsake ngopfu loko ku nyiketeriwa marhavi lama landzelaka ya tsevu.

Puerto Rico

Hambileswi rhavi leri ri nga ni malembe ya 13 ri nyiketeriwile, ku ve ni xilaveko xa leswaku miako yi engeteriwa hikuva ntirho wu ye wu andza eka tindzawulo tin’wana. Nkulumo yo nyiketela yi nyikeriwe hi Mugqivela, September 16, 2006, hi David Splane, la nga xirho xa Huvo leyi Fumaka.

Colombia

Vamakwerhu lava humaka ematikweni ya 30 a va hlanganile hi November 11, 2006, erhavini ra le Colombia, le dorobeni ra Facatativá, leri nga mpfhuka wa tikhilomitara ta 42 ku ya en’walungu-vupela-dyambu bya Bogotá, loko ku nyiketeriwa miako leyi engeteriweke. A ku ri ni vanhu va 3 605. Vo tala lava ku hundzeke malembe ya 30 kumbe ya 40 va nga si vonana, va vukarhane va tsakile naswona va tiphinile hi nkulumo yo nyiketela leyi nyikeriweke hi Gerrit Lösch, la nga xirho xa Huvo leyi Fumaka.

Fiji

Ku suka eSuva, ku nga ntsindza wa Fiji, munhu u famba ntsena timinete ta ntlhanu ku ya erhavini ro saseka, leri nga le kusuhi ni hlaluko. Hi Mugqivela November 11, 2006, Geoffrey Jackson, la nga xirho xa Huvo leyi Fumaka u nyikele nkulumo yo nyiketela rhavi leri, eka vayingiseri va 410.

Burundi

Siku ra November 25, 2006, a ri nge pfuki ri rivalekile eka Timbhoni ta Yehovha ta tiko leri ro xonga ra le xikarhi ka Afrika. Vanhu va 1 141, lava humaka ematikweni ya 11 a va tsakile loko Guy Pierce, la nga xirho xa Huvo leyi Fumaka a nyikela nkulumo yo nyiketela rhavi leri lerintshwa ro xonga. Swi le rivaleni leswaku Yehovha wa wu katekisa ntirho lowu endliwaka etikweni leri hikuva va ha tele vanhu lava lavaka ku hlanganyela na hina evugandzerini bya Yehovha.

Rwanda

Endzhaku ka malembe ya 30 ku ri ni mpfilumpfilu etikweni, lowu katsaka ku yirisiwa ka ntirho ni tinyimpi ta xin’wana-manana, vamakwerhu va le Rwanda a va tsakile loko va endzeriwa hi Guy Pierce, leswaku a ta nyiketela rhavi ra vona ro xonga, leri rhendzeriweke hi mintanga yo saseka.

Hambileswi ku veke ni nhlaselo wa tihanyi lowu xikongomelo xa wona a ku ri ku yayarhela rixaka ro karhi naswona ku feke vamakwerhu vo tala, ntirho wa Yehovha wu ya emahlweni etikweni leri vuriwaka Tiko ra Swintshabyana swa Gidi. Eka vanhu va 553 lava veke kona loko ku nyiketeriwa rhavi hi December 2, 2006, va 112 eka vona a va huma ematikweni ya 15.

Uganda

Rhavi lerintshwa leri akiweke edzongeni wa ntsindza, ku nga Kampala, ri nyiketeriwe hi Mugqivela January 20, 2007. Eka vanhu va 665 lava a va ri kona, va 170 a va huma emarhavini ya kwalomu ka 20, naswona a ku ri na Anthony Morris, la nga xirho xa Huvo leyi Fumaka, loyi a nyikeleke nkulumo yo nyiketela rhavi.

“YEHOVHA U ENDLE NCHUMU LOWUKULU”

A swi kanakanisi leswaku ha tsaka loko hi anakanyisisa hi mintirho yo hlamarisa leyi Yehovha a yi endleke n’wexemu. Hinkwerhu hi pfumelelana ni marito yo nkhensa lama vuriweke hi mupisalema loko a ku: “Yehovha u endle nchumu lowukulu hi leswi a hi endleke swona. Hi tsakile.”—Ps. 126:3.

[Bokisi/Xifaniso lexi nga eka tluka 9]

Tsima Leri Hakunene Ri Endliweke eMisaveni Hinkwayo

Vanhu van’wana va tivutisa loko hakunene xiphephana xa Kingdom News xi fambisiwile emisaveni hinkwayo. Hi xikombiso, wansati un’wana wa le Brazil, loyi a a kanakana, u byele muhuweleri leswaku a yimanyana loko a ha bela munghana wa yena riqingho le United States, a n’wi vutisa loko a xi kumile xiphephana lexi. Munghana wa yena u hlamule a ku: “Se ndzi ni timinete ta khume ndzi xi kumile.” U tsakile kutani a xi amukela a tlhela a tshembisa leswaku u ta tinyika nkarhi a xi hlaya.

[Xifaniso lexi nga eka tluka 12]

A ku nghenisiwe xirhambo xin’we ntsena ebokisini ra poso ya vandlha

[Xifaniso lexi nga eka tluka 25]

Antonio a lunghekele ku ya ensin’wini

[Swifaniso leswi nga eka tluka 28, 29]

Ku Nyiketeriwa Ka Marhavi

Puerto Rico

Rwanda

Colombia

Burundi

Fiji

Uganda