Swiendlakalo-nkulu Swa N’wexemu

Hi ni swivangelo swo tala swo tsaka tanihi leswi ha ha ku hetaka lembe rin’wana ra ntirho nileswi hi endleke ntirho wo kwetsima. Loko hi kambisisa ntirho wun’wana lowu Xikwembu xi nga wu endla hi ku tirhisa malandza ya xona, hi nga vula marito lama nge: “U tlhandleke harhi ya vunene bya wena elembeni”!—Ps. 65:11.

“MAHUNGU LAMANENE” EKA INTERNET

Tanihi Timbhoni ta Yehovha hi wu teka wu ri wa nkoka ntirho wo ‘chumayela mahungu lamanene ya mfumo emisaveni hinkwayo leyi akiweke leswaku byi va vumbhoni ematikweni hinkwawo’ loko makumu ma nga si fika. (Mat. 24:14) Eka malembe lama hundzeke, swilo swa thekinoloji swi pfune ngopfu leswaku “rito ra mfumo” ri haxiwa hi xihatla. (Mat. 13:18-23) Eka malembe ya 11 lama hundzeke, a hi ri karhi hi tirhisa Web site ya hina leyi nge www.watchtower.org, leswaku mani na mani a kota ku hlaya minkandziyiso ya hina eka Internet. Vanhu va nga nghena eka Web site leyi kutani va dyondza ntiyiso wa Bibele hi tindzimi ta 314 leti nga kona, naswona va nga ha languta swihloko swo fana ni leswi nge “Beliefs and Activities,” “Current Topics,” “God and Your Future,” “Medical Care and Blood,” ni lexi nge “Publications Available.”

Minkarhi yo tala vanhu va nghena eka Web site leyi nge www.watchtower.org leswaku va hlaya Bibele. Siku rin’wana ni rin’wana vanhu lava tlulaka 6 300 va hlaya Vuhundzuluxeri Bya Misava Leyintshwa Bya Matsalwa Yo Kwetsima hi rin’wana ra tindzimi ta khume leti kumekaka eka Internet. Tibuku ta Bibele leti rhandziwaka eka Web site leyi i Tipisalema, Swivuriso ni Tievhangeli leti vulavulaka hi vutomi bya Yesu.

Vhiki rin’wana ni rin’wana ku hoxiwa swihloko swo karhi swa Xihondzo xo Rindza kumbe swa Xalamuka! eka Web site leyi hi tindzimi ta 12—ngopfu-ngopfu swihloko leswi kandziyisiweke, leswi nga ta khumba ngopfu vanhu lava hi va chumayelaka. Vanhu vo tala va tivutisa leswaku hi pfumela yini, leswaku minhlangano ya hina yi fambisiwa njhani nileswaku ntirho wa hina wo chumayela wu hakeleriwa njhani. Swivutiso swa vona swa hlamuriwa eka Web site leyi, loko va nghena eka yona va hlaya broxara leyi nge Timbhoni Ta Yehovha—I Vamani Xana? Ti Pfumela Yini Ke? Xiphephana lexi nge Vukhongeri Bya Mavunwa Byi Ta Lovisiwa Ku Nga Ri Khale! xa kumeka eka www.watchtower.org hi tindzimi ta 252 naswona xi tlhela xi kumeka hi tindzimi ta ntlhanu ta ririmi ra mavoko.

KU DYONDZA NTIYISO EKA INTERNET

Hi byihi vuyelo lebyi vaka kona leswi ku hoxiweke minkandziyiso leyi eka Internet? Siku rin’wana ni rin’wana, avhareji ya vanhu lava tlulaka 60 000 va nghena eka Web site ya www.watchtower.org! Vo tala eka vona va tshama laha ku nga riki na Timbhoni to tala kumbe ematikweni lawa ntirho wa hina wu yirisiweke. Hambiswiritano, lava nga ni torha ro twa ntiyiso wa Bibele, va nga ri timula hi ku hlaya minkandziyiso leyi kumekaka eka Web site ya hina.

Bryon u ri: “I khale ndzi swi rhandza ku dyondza Bibele kambe minkarhi hinkwayo loko mina ni vanghana va mina hi ya ekerekeni, a ku fika ku yimbeleriwa kumbe ku tlangiwa mintlangu.” Bryon u ye emahlweni ni xikolo ni ku khomeka hi mintlangu. U dyondze tindzimi ta ntlhanu a tlhela a kuma basari ya le kholichi kambe a xi kona ni xin’we lexi nga hlamula swivutiso leswi a a ri na swona hi Bibele. Hiloko a khongela leswaku a dyondza ntiyiso.

Bryon u ri: “A ndzi swi lava hi mahlo-ngati ku kuma tinhlamulo. Hiloko ndzi hlawula ku languta Timbhoni ta Yehovha eka Internet hikuva a ndzi nghena xikolo ni swichudeni swin’wana leswi nga Timbhoni naswona a swi ndzi byele leswaku vito ra Xikwembu i Yehovha. Ndzi nghene eka Web site ya nhlengeletano leyi kutani ndzi sungula ku hlaya broxara leyi nge I Yini Leswi Xikwembu Xi Swi Languteleke Eka Hina? Eku heteleleni, ndzi kume tinhlamulo ta swivutiso swa mina.” Bryon u kombele ku fambiseriwa dyondzo ya Bibele naswona u dyondze a kala a tinyiketela eka Yehovha hi 2004. Sweswi i phayona ra nkarhi hinkwawo naswona u lava ku tirhisa tindzimi leti a ti dyondzeke leswaku a va murhumiwa la leteriweke hi Bibele.

“XIKWEMBU XI NA N’WINA”

Swa tsakisa ku tiva leswaku magidi-gidi ya vanhu lava humaka “eka tindzimi hinkwato ta matiko” va nghena eka Web site leyi nge www.watchtower.org siku ha rin’we! Hi xiringaniso, vanhu va 94 siku ni siku va kombela ku endzeriwa eka xiyenge lexi nge “Would You Welcome a Visit? (Xana U Nga Rhandza Ku Endzeriwa?)”—Zak. 8:23.

Denise a a ri ni swivutiso hi leswi Timbhoni ta Yehovha ti swi pfumelaka kambe a a kanakana ku ya eHolweni ya Mfumo leyi nga le kusuhi ni laha a tshamaka kona. Hiloko a ya eka Internet kutani a kuma Web site leyi nge www.watchtower.org. Leswi a swi hlayeke swi endle a tiyiseka leswaku u kume ntiyiso kambe a a nga swi lavi ku kombela ku dyondzeriwa Bibele hikuva a a swi tiva leswaku swi ta lava a cinca mahanyelo yakwe leswaku ma pfumelelana ni leswi a a swi dyondza eBibeleni. U tsale ka mune eka xiyenge lexi nge “Would You Welcome a Visit? (Xana U Nga Rhandza Ku Endzeriwa?)” eka Internet a kombela ku endzeriwa, kambe a nga ri na xona xivindzi xa ku rhumela xikombelo xexo.

Hi March 2007, Denise u tsale xikombelo xa yena ra vuntlhanu, hiloko a xi rhumela. Xikombelo xa yena xi rhumeriwe eka vandlha leri nga le kusuhi ni laha a tshamaka kona naswona vakulu va vandlha rero va kombele makwerhu wa xisati Vonnie leswaku a n’wi endzela. Ku nga si hela vhiki endzhaku ka loko Vonnie a n’wi endzerile, Denise u sungule ku ya eminhlanganweni ya vandlha eHolweni ya Mfumo.

Loko ximumu xi hela, Denise se a a lahle nhundzu yakwe ya vukhongeri, a kombele nileswaku vito rakwe ri suriwa ekerekeni naswona se a a ri muhuweleri la nga khuvuriwangiki. Yena ni vana vakwe vambirhi va vafana va fambiseriwe dyondzo ya Bibele naswona xifanyetana xakwe lexi nga ni malembe ya nhungu xi tsarise eXikolweni Xa Vutirheli Bya Le Tilweni. Hi January 2008, Denise u khuvuriwile naswona endzhaku ka tin’hweti timbirhi—ku nga lembe endzhaku ka loko a kombele ku endzeriwa eka Web site ya Timbhoni—u sungule ku va phayona ra nkarhinyana. Denise u ri: “Loko a ndzi nga nghenanga eka Web site leyi, a ndzi ta va ndza ha gugurhuteka emunyameni.”

Hi January 2008, ku endliwe Web site yin’wana leyintshwa leyi nge www.pr418.com, leyi nga ni minkandziyiso leyi yingiseriwaka kunene leyi nga kopiwaka hi tindzimi ta 17. Vanhu va ri tsakela lunghiselelo leri naswona n’hweti ni n’hweti ku kopiwa minkandziyiso leyi tlulaka miliyoni swin’we ni swihloko swin’wana leswi vanhu va swi tsakelaka. Vahuweleri vo tala va yingisela swihloko swa timagazini loko va ya entirhweni kumbe exikolweni.

VUHUNDZULUXERI LEBYI KHUMBAKA MBILU

Mawaku ntsako lowu hi nga na wona tanihi leswi tintsumi ti hi pfunaka leswaku hi khutaza vanhu va “matiko hinkwawo ni tinyimba hinkwato ni tindzimi hinkwato” leswaku va dzunisa Xikwembu! (Nhlav. 14:6, 7) Leswaku Timbhoni ta Yehovha ti pfuna vanhu va dyondza rungula ra le Bibeleni hi ririmi leri va nga ta ri twisisa, ti hundzuluxela minkandziyiso hi tindzimi ta kwalomu ka 450.

Buku leyi nge Xana Bibele Yi Dyondzisa Yini Hakunene? ya ha ku humesiwa hi Xitetum, ku nga ririmi ra le East Timor, kambe a ku kandziyisiwanga tibuku to tala. Maria loyi a a ha ku sungula ku dyondzeriwa a a tirhisa buku ya ririmi ra le Indonesia leyi nge Leswi Bibele Yi Swi Dyondzisaka hikuva a nga ri na yona ya Xitetum. U kombele makwerhu wa xisati loyi a a dyondza na yena Bibele leswaku a n’wi lomba leyi ya Xitetum swa masiku mambirhi. Eka masiku lama nga landzela u swi hlamusele hi ku phindha-phindha swilo leswi a swi dyondzeke ebukwini yoleyo. Kutani sweswi, leswi se a a hlaya hi ririmi ra rikwavo, se a a twisisa tidyondzo to tala ku tlula ndlela leyi a a titwisisa ha yona loko a hlaya buku yoleyo hi ririmi ra le Indonesia. Makwerhu loyi a dyondzaka na yena a nga ha n’wi kombelanga leswaku a tlherisa buku liya ya Xitetum. Maria wa ha dyondzeriwa naswona u va kona eminhlanganweni.

Xinghezi na Xiswahili i tindzimi leti tirhisiwaka ngopfu hi mfumo ni hi van’wamabindzu va le Kenya. Hambiswiritano, vanhu va timiliyoni va le Kenya va titwa va ntshunxekile loko va vulavula Xikikuyu, Xikikamba, Xiluo ni tindzimi tin’wana ta le tikweni. Kutani ku hundzuluxela minkandziyiso hi tindzimi teto swi endla leswaku vanhu va tsakela ku gandzela Yehovha. Endzhaku ka loko Vandlha ra le Siaya ri sungule ku tirhisa minkandziyiso ni ku fambisa minhlangano hi Xiluo, vakulu van’wana va tsale va ku: “Vamakwerhu va swi twisisa ku antswa leswi dyondzisiwaka naswona vana va tshama va rhiye tindleve. Hi mpfhuka hi sungule ku nyikela tinkulumo hi tirhisa maphepha ya tinkulumo hi Xiluo, nhlayo ya lava vaka kona eminhlanganweni ya vandlha yi andze hi tiphesente ta 60.”

Le Nicaragua, vanhu vo tala va vulavula Ximiskito ematshan’weni ya Xipaniya naswona vanhu lava tlulaka 200 va ve kona entsombanweni wa muganga lowu tinkulumo ta wona ti nyikeriweke hi Ximiskito. Van’wana va endle matshalatshala lamakulu leswaku va ya entsombanweni wolowo. Hi xikombiso, vamakwerhu va 13 lava humaka exidorobanini lexi vuriwaka Asang lexi nga le ribuweni ra Nambu wa Coco, va tiakele xikwekwetsu kutani va famba hi xona masiku mambirhi enambyeni va ya edorobeni leri vuriwaka Waspam. Hiloko va famba tiawara ta ntlhanu hi lori kukondza va fika laha ntsombano a wu ta khomeriwa kona. Eka vo tala ntsombano wolowo a wu ri wo sungula eka vona. Va swi tsakerile ku yingisela tinkulumo hi ririmi ra rikwavo. Tanihi leswi a va tirhise mali ya vona hinkwayo leswaku va ta entsombanweni wolowo, vamakwerhu van’wana va va nyike mali leswaku va ta kota ku tlhelela emakaya.

Vayingiseri lava vulavulaka Ximiskito entsombanweni wolowo a va tsakile loko buku leyi nge Xana Bibele Yi Dyondzisa Yini Hakunene? yi humesiwa hi ririmi ra rikwavo. Kambe lava a va tsake ngopfu i maphayona. Loko buku yoleyo yi nga si humesiwa, a va tirhisa buku ya Xipaniya loko va fambisa tidyondzo ta Bibele kutani va hundzuluxela tindzimana ni swivutiso hi Ximiskito. Sweswi va khomeka hi ku dyondzisa leswi Bibele yi swi dyondzisaka ematshan’weni yo hundzuluxela leswi nga tsariwa.

Xiquechua i ririmi ra Maindiya ya le Amerika, leri vulavuriwaka eAmerika Dzonga. Vahuweleri van’wana lava vulavulaka Xiquechua lava tshamaka ePeru va tsale va ku: “Loko hi heta ku bula ni n’wini wa muti, hi n’wi byela leswaku hi khome nkandziyiso wa Xiquechua. Van’wana va swi tsakela ku kuma minkandziyiso hi ririmi ra rikwavo lerova loko hi va nyika, va rila va tlhela va ntswontswa nkandziyiso wolowo.” Rhavi ra le Peru ri tsale leswi landzelaka: “Vamakwerhu van’wana lava tshamaka laha Xiquechua xi vulavuriwaka kona va yi tlangela minkandziyiso leyi. Endzhaku ka loko makwerhu un’wana a hlaye buku leyi nge Xana Bibele Yi Dyondzisa Yini Hakunene? u vule leswaku se wa swi twisisa leswaku nkutsulo wa Kreste i yini nileswaku ha yini wu ri wa nkoka. Vahlayi va nkhense rhavi hi ku ri rhumela mazambhana, tiphayi, mihandzu ni swilo swin’wana.”

Nakambe nhlengeletano yi ringeta hi matimba ku hundzuluxela minkandziyiso hi tindzimi leti vulavuriwaka eswihlaleni leswi ngo va swoxe exikarhi ka lwandle ra Pacific. Makwerhu un’wana wa xisati u byele murhumiwa le Micronesia exihlaleni xa le Pohnpei a ku: “Ndzi nkhensa Yehovha leswi a hi tsundzukeke. Eku sunguleni a hi kuma Xihondzo xo Rindza xa Xiponapea endzhaku ka tin’hweti to hlayanyana xa Xinghezi se xi humile.” U tlhele a vula a tsakile a ku: “A hi anakanya leswaku swi nga endleka Armagedoni yi hlwela ku fika hala ka hina. Kambe sweswi hi hlaya Xihondzo xo Rindza lexi fanaka hi nkarhi wun’we ni vamakwerhu emisaveni hinkwayo naswona xi saseke ku fana ni xa Xinghezi. Ha nkhensa leswi Huvo leyi Fumaka yi hi khathalelaka hi ndlela leyi.”

Vamakwerhu va le Marshall Islands le n’walungu wa lwandle ra Pacific a va tsakile loko va kuma nkandziyiso lowuntshwa wa mani na mani wa Xihondzo xo Rindza hi ririmi ra le swihlaleni leswi. Vamakwerhu lava va swi rhandza ku hlaya swihloko swa timhaka ta vutomi ta vamakwerhu kambe minkandziyiso yo sungula ya Xihondzo xo Rindza a yi nga ri na matluka lama eneleke yo swi hoxa, kutani a swi boha leswaku ku va ni un’wana la hundzuluxelaka swihloko sweswo. Hikwalaho a va tsakile loko xihloko xa mhaka ya vutomi xi humelela ro sungula eka magazini wa mani na mani hi ririmi ra rikwavo. Muhlayi un’wana la nga ni malembe ya 16 hi vukhale u te: “Eka malembe lama nga hundza a ndzi languta magazini wa Xinghezi kutani ndzi vona swifaniso leswi nga eka mhaka ya vutomi ivi ndzi navela onge ndzi nga kota ku hlaya xihloko xexo. Kambe sweswi se ndza swi kota ku xi hlaya.”

I ntiyiso leswaku loko vanhu va hlaya nkandziyiso hi ririmi ra rikwavo, hambiloko wu ri wun’we ntsena, wu nga cinca vutomi bya vona. Etikweni rin’wana le Asia Xikarhi laha ntirho wa hina wu nga yirisiwa, broxara leyi nge I Yini Leswi Xikwembu Xi Swi Languteleke Eka Hina? yi fambisiwe hi ndlela leyi hlamarisaka swinene. Jaha rin’wana ri kume broxara leyi hiloko ri tihlayela yona kutani ri tsakisiwa hi leswi ri nga swi hlaya lerova ri ya enambyeni lowu nga kwalaho ri fika ri tikhuvula. Endzhaku ka nkarhi ri twe leswaku ri fanele ri dyondzeriwa Bibele hiloko ri pfumela ivi endzhakunyana ka sweswo ri khuvuriwa hi ndlela leyi amukelekaka eka Xikwembu. Sweswi ri heta nkarhi wa rona wo tala ri ri karhi ri chumayela mahungu lamanene.

KU HUNDZULUXERIWA KA BIBELE KU YA EMAHLWENI

Timbhoni ta Yehovha ti teka Rito ra Xikwembu ku nga Bibele ri ri ra nkoka naswona ti lava vuhundzuluxeri lebyi pakanisaka ni lebyi twisisekaka. Hikwalaho ka sweswo, vanhu va Xikwembu va tsaka leswi Bibele ya Vuhundzuluxeri Bya Misava Leyintshwa yi kumekaka hi tindzimi leti tlulaka 70 yi helerile kumbe ku ri Matsalwa Ya Xigriki. Swa tsakisa loko Bibele yi humesiwa ro sungula hi ririmi ro karhi kambe lexi tsakisaka ngopfu i ku yi tirhisa siku ni siku eka dyondzo ya munhu hi yexe, eminhlanganweni ni le ntirhweni wo chumayela tanihi leswi yi khumbaka timbilu ta vanhu ni ku cinca miehleketo ya vona.

Rhavi ra le Rhaxiya ri tshamela ku kuma mapapila yo nkhensa Bibele leyi heleleke ya Vuhundzuluxeri Bya Misava Leyintshwa hi Xirhaxiya. Wansati un’wana u te: “Hambileswi ndzi yi hlayeke ko tala Bibele, kambe loko ndzi hlaya leyi ya Vuhundzuluxeri Bya Misava Leyintshwa swi fana niloko ndzi hlaya Bibele ro sungula! Minkarhi yin’wana ndzi pfa ndzi xiririka mihloti ndzi tlhela ndzi tsaka tanihi leswi rungula ra Bibele ri ndzi khumbaka mbilu.”

Ndlela leyi vuhundzuluxeri lebyi byi twisisekaka ha yona byi endle leswaku muhlayi un’wana a tsala a ku: “Ndzi boheke ku tsala papila leri endzhaku ka loko ndzi hlaye Genesa ndzima 18. Bulo leri Abrahama a nga va na rona na Yehovha, hilaha swi hlamuseriweke hakona eka tindzimana 23-32 ri ndzi khumbile swinene. Hambileswi ndzi hlayaka Bibele ra vuntlhanu, a ndzi sungula ku ri tekela enhlokweni. Ndzi twelane na Abrahama ndzi tlhela ndzi anakanyisisa hi leswi yena na Yehovha va buleke ha swona. Ndzi xiririke mihloti loko ndzi vona leswaku Yehovha wa khathala hakunene. Vuhundzuluxeri lebyi byi endle leswaku ndzi yi twisisa kahle mhaka leyi. A ndzi hlayanga hi timfanelo ta Yehovha ntsena kambe ndzi tlhele ndzi ti twisisa ku antswa.”

Svetlana wa le Moscow u te: “Ndza nkhensa leswi hi nga ni Bibele leyi heleleke leyi nge Vuhundzuluxeri Bya Misava Leyintshwa! Sweswi a ha ha pfilunganyeki hi ku hlaya ‘Testamente ya Khale’ leyi nga twisisekiki! Leyi ya olova!”

Muhlayi un’wana u te: “Laha ndzi tirhaka kona a ndzi chumayela Irina. Eku sunguleni a ndzi ma tshaha kunene matsalwa. Kambe loko ndzi pfula Bibele ya mina ndzi n’wi komba xikhongelo xa xikombiso xa Yesu, u ndzi vutise a ku, ‘Xana lexi hi xona xikhongelo xa Hosi?’ Endzhaku ko hlaya marito ya Yesu, u vule a tsakile a ku: ‘Hakunene ma tsakisa hikuva ma twisiseka! A ndzi tshamela ku xi twa xikhongelo lexi kambe ndzi nga xi twisisi. Eka Bibele leyi xa twisiseka naswona xa olova! Ndzi lava u ndzi kumela Bibele yo fana ni leyi!’ Hiloko ndzi ku, ‘Hi nyika Bibele ntsena eka vanhu lava swi lavaka hi timbilu ta vona hinkwato ku yi hlaya.’ Kutani a ku eka mina: ‘A ndzi ri ni Tibibele to hlayanyana naswona ndzi ti nyike vanhu van’wana hikuva a ndzi nga swi lavi ku yi hlaya. Kambe sweswi ndzi swi lava hi mbilu hinkwayo ku yi hlaya!’”

Endzhaku ka loko makwerhu un’wana a kume Bibele leyi nge Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xiukraine, u te: “Ndzi lava ku nkhensa Yehovha ni nhlengeletano ya yena hikwalaho ka nyiko leyi yo hlamarisa. Ndza swi tsakela ku yi hlaya naswona ndzi famba na yona kun’wana ni kun’wana. Ririmi leri yi nga tsariwa ha rona ra olova naswona ra twisiseka. Marito ya yona ma fikelela mbilu naswona ndzi kota ku twisisa tidyondzo ta yona hi ku olova.”

Tibibele ta Xiserbia ni Xicroatia na tona ti tsakeriwe hi ndlela leyi fanaka. Makwerhu un’wana wa xisati wa le Croatia u te: “Yi tlula Bibele leyi a hi yi tirhisa eka malembe lama nga hundza hikuva swa olova ku yi hlaya ni ku yi twisisa. Ndzayo ya Matsalwa yi fikelela mbilu ya mina hi ku olova naswona ndza swi vona leswaku ndzi ya ndzi n’wi tiva ku antswa Yehovha.”

Hi November 2, 2007, Makwerhu Geoffrey Jackson la nga xirho xa Huvo leyi Fumaka u humese Bibele leyi nge Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xisamoa. Swa tika ku kuma Bibele ya Xisamoa naswona swa durha kutani vamakwerhu a va tsake ngopfu leswi va veke ni Bibele leyi swi olovaka ku yi kuma. Endzhaku ka loko muhuweleri un’wana a hete tin’hweti to hlayanyana a ri karhi a tirhisa Bibele yoleyo u te: “Bibele leya khale a yi tumbeta tinhla kambe leyi leyintshwa yi endla leswaku hi ti twisisa.”

Loko makwerhu un’wana wa xisati a dyondzela munhu un’wana Bibele, va boheke ku hlaya Yakobo 4:8. U ri: “Ndzi ringanyete leswaku hi hlaya ndzimana yoleyo eka Vuhundzuluxeri Bya Misava Leyintshwa hambileswi hi yi tivaka. Eku sunguleni a hi ehleketa leswaku hi hlaya tsalwa leri nga riki rona kukondza loko hi kuma leswaku hi rona leri faneleke. Makwerhu wa xisati loyi a ndzi famba na yena u te eka mina: ‘Tsalwa leri ri cincile.’ A hi nga swi twisisi leswaku ku ‘tshinela’ swi vula leswaku hi fanele hi va ni vuxaka lebyi tiyeke na Yehovha hikuva Bibele leya khale a yi nga swi veki kahle. Sweswo swi hi khumbile naswona swi endle leswaku hi lava ku tiyisa vuxaka bya hina na Yehovha.”

Endzhaku ka loko Bibele ya Xichayina ya Vuhundzuluxeri Bya Misava Leyintshwa yi humesiwile, varhumiwa va le Taiwan va te: “Hi nyike gqweta rin’wana leri rhandzaka ku hlaya timagazini ta hina Bibele leyi. Ri lave ku tiva leswaku ha yini ku ve ni xilaveko xa ku va ni vuhundzuluxeri lebyintshwa. Endzhaku ka loko hi ri kombe matsalwa ma nga ri mangani, a ri tsakile naswona ri tlhele ri vula leswaku vuhundzuluxeri lebyi lebyintshwa byi twisiseka ku tlula Bibele leyi nge Union Version, leyi a ri tolovele ku yi hlaya.” Va tlhele va nyika xirho xin’wana xa palamendhe Bibele leyi hiloko xi yi siya ehofisini ya xona. Muhaxi un’wana wa mahungu eka xiya-ni-moya loyi a a rhandza ku sola-sola Timbhoni ta Yehovha u vone Bibele leyi ehofisini ya xirho lexi hiloko a yi teka ivi a yi hlaya. Yi n’wi tsakise swinene lerova a bela varhumiwa riqingho a kombela leswaku va n’wi nyika ya yena.

Makwerhu un’wana wa xisati la vulavulaka Xikirghiz a a nga swi koti ku hlaya hikuva a a karhatiwa hi mahlo kutani ku hlaya Bibele a ku ri ntirho eka yena. Hambiswiritano, Bibele leyi nge Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xikirghiz yi endle leswaku a cinca ndlela leyi a a titwa ha yona. Sweswi wa swi tsakela ku hlaya Bibele hikuva ya olova naswona ya twisiseka.

Makwerhu un’wana wa xisati u te: “A byi kona vuhundzuluxeri lebyi fanaka na byona! Ndza khuluka loko ndzi ri karhi ndzi hlayela ehenhla. Ndzi tshamela ku byi hlaya minkarhi hinkwayo. Onge ndzi dyondza ntiyiso vuntshwa.”

Makwerhu un’wana wa xisati la tirhisaka ririmi ra mavoko u tsalele Huvo leyi Fumaka a ku: “Ndza yi rhandza Evhangeli ya Matewu hi Ririmi Ra Mavoko Ra Le Amerika (ASL). Rungula ra Bibele ra twisiseka naswona ri khumba mbilu ya mina. Ndzi kota ku twisisa leswi Yesu a nga xiswona, ndlela leyi a langutekaka ha yona exikandzeni, musa wa yena ni ndlela leyi a va rhandzaka ha yona vanhu. Ndza yi rhandza kopi ya mina ya buku ya Matewu hi ririmi leri ra mavoko. Kambe . . . ndzi kombela leswaku mi hatlisa mi hundzuluxela tibuku tin’wana ta Bibele hi Ririmi Ra Mavoko Ra Le Amerika!”

A swi kanakanisi leswaku Bibele leyi hundzuluxeriweke kahle yi endla leswaku Rito ra Xikwembu ri twisiseka naswona yi endla leswaku rungula ra yona ri kongomisa muhlayi. Hikwalaho ka sweswo, lava navelaka ku tshinela eka Tata wa vona wa le tilweni va tsaka loko Vuhundzuluxeri Bya Misava Leyintshwa byi kumeka hi ririmi ra rikwavo—ku nga ririmi leri va khumbaka.

VATIRHI VO TALA VA RHUMERIWA ENTIRHWENI WO TSHOVELA

Tanihi leswi ku olovisiweke matirhelo ya le rhavini ra le United States, swirho swo hlayanyana swa ndyangu wa Bethele swi averiwe ku ya tirha eka swiavelo swin’wana. Hambileswi swin’wana swi averiweke ku ya tirha eka marhavi man’wana, madzana-dzana ya swona swi averiwe ku va maphayona yo hlawuleka ni ya nkarhi hinkwawo eswifundzheni swo hambana-hambana swa tiko ra United States. Xana swi titwe njhani loko swi averiwa eka swiavelo swin’wana? Xana swi swi hlule njhani swihinga leswi swi nga langutana na swona eka swiavelo swa swona leswintshwa? Xana mavandlha ma vuyeriwe njhani?

Todd na Leslie va ri: “I khale hi ri karhi hi kombela ‘N’wini wa ntshovelo leswaku a rhumela vatirhi entshovelweni wakwe.’ Kambe a hi nga swi xiyi leswaku Yehovha u ta tirhisa hina! Sweswi ha swi vona leswaku Yehovha u kongomisa timhaka naswona hi swi teka ku ri lunghelo leswi Kreste a hi ‘tekeke hi tshembekile hi ku hi avela [ensin’wini].’”—Mat. 9:37, 38; 1 Tim. 1:12.

Loko Franco a anakanyisisa hi tin’hweti to sungula eka xiavelo xa yena lexintshwa ni nsati wa yena, u ri: “Mina ni nsati wa mina a hi nga swi xiyi leswaku ka ha ri ni xilaveko lexikulu swonghasi ensin’wini ya laha United States. Loko hi sungula xiavelo xa hina, hi kume leswaku va tele vanhu lava a va lava ku dyondzeriwa Bibele.” Loko Curtis na Karolynne va phofula ndlela leyi maphayona lawa yo tala ma titwaka ha yona, va ri: “Hi swi tsakerile ku amukela xiavelo xa hina xo ya ensin’wini! Hi lava ku komba Yehovha leswaku a hi tiyisile loko hi vula leswaku hi ta titsona swo tala loko hi nyikela hi vutomi bya hina eka yena.”

KU TSHEMBA “N’WINI WA NTSHOVELO”

I ntiyiso leswaku ku cinceriwa eka xiavelo xin’wana endzhaku ko tshama malembe eBethele swi endla leswaku van’wana va karhateka. Vatekani van’wana va te: “Xana hi ta swi kota ku kuma ndhawu yo tshama leyi nga durhiki? Xana hi ta swi kota ku heta tiawara ta 120 kumbe ta 130 hi n’hweti hi ri karhi hi chumayela hi tlhela hi khutaza mavandlha?” Xana vona ni van’wana va langutane njhani ni swiyimo leswi leswintshwa?

Van’wana va kume ndhawu yo tshama hi siku leri a va fanele va rhurhela eka swiavelo swa vona. Hi xikombiso, Jessica ku nga makwerhu la nga tekiwangiki, u ye eka xiavelo xa yena lexintshwa kutani a tshama kona mavhiki mambirhi a ri karhi a lava ndhawu yo tshama kambe a swi fana ni ku hala ribye u lava mati. Hi siku leri a a fanele a tlhelela ha rona eBethele leswaku a ya landza nhundzu ya yena, a a tsake ngopfu loko nkulu un’wana a n’wi nyika yindlu a tlhela a n’wi hakerisa mali yitsongo.

Jeff na Cynthia va byele n’wini wa ndhawu leyi a va lava ku hirha eka yona leswaku i Timbhoni ta Yehovha. U te: “Ndza ti tiva Timbhoni ta Yehovha naswona ndza swi tiva leswaku a mi nge ndzi karhati. Yehovha u ta mi pfuna mi kuma mali yo hakela rhente ya n’wina!”

Eric na Melonie va ri: “Ntokoto lowu hi nga va na wona wu hi tsundzuxa leswaku minkarhi hinkwayo hi fanele hi tshembela eka Yehovha. Hi swi vone hi ya hina leswaku Yehovha wa hi seketela masiku hinkwawo. Leswi swi hi tiyise ripfumelo hakunene.”

MAVANDLHA LAMA PFUNAKA VAMAKWERHU

Ndlela leyi mavandlha ma rhandzeke maphayona wolawo ha yona yi ma pfunile leswaku ma swi kota ku tolovelana ni swiavelo swa wona leswintshwa. Mulanguteri un’wana wa xifundzha u vula leswaku mavandlha yo tala ma vulavula kahle hi “maphayona ya hina yo hlawuleka.” Nakambe u ri: “Xifundzha hinkwaxo xi ma amukele hi mandla mambirhi naswona ma rhandziwa swinene.” Makwerhu un’wana u te: “Ndzi lava ku ri nkhensa swinene rhavi. Hinkwerhu ha vuyeriwa eka maphayona lawa!”

Vandlha rin’wana ra le Kansas a ri ri ni masimu ya dzana lawa se a ku ri ni tin’hweti to tala ma nga tirhiwi. Kambe sweswi se ma tirhiwa ko tala hileswi ku nga ni vatekani lava nga maphayona yo hlawuleka. Vakulu van’wana va te: “A hi nga swi tivi leswaku lunghiselelo leri ri ta hi pfuna hi ndlela leyi.”

Tanihi leswi mavandlha ma nga “mpfuno lowu tiyisaka” eka maphayona, vahuweleri na vona va vuyeriwa. (Kol. 4:11) Mulanguteri un’wana wa xifundzha u ri: “Ku hiseka ka maphayona ku khutaza vamakwerhu.” Kasi un’wana u te: “Rirhandzu ni ntsako i timfanelo leti xiyekaka ngopfu eka maphayona lawa yo hlawuleka naswona se ta vonaka eka vahuweleri van’wana.”

Vatekani van’wana va tsakele ku pfuna vanhu va khume lava a va horile leswaku va tlhela va hisekela ku tirhela Yehovha. Nakambe vakulu va pfuna swinene na vona. Nkulu un’wana u te: “Swa tsakisa ku va ni makwerhu la ringaniselaka ni la leteriweke kahle evandlheni. I mpfuno lowukulu evandlheni ni le ka huvo ya vakulu.”

“VATIRHI-KULOBYE NI XIKWEMBU”

Yehovha u katekisa vachumayeri va Mfumo hi mintokoto yo tala leyi tsakisaka. Hi xikombiso, Steve na Gaye a va chumayela hi yindlu ni yindlu siku rin’wana exirhamini lexi a xi vuyisa n’wana evukatini. Eka yindlu yo sungula, va sungule ku dyondza Bibele ni mukhalabye loyi a a ri ni gome. Ku te ku nga si hela mavhiki mambirhi, u ye eminhlanganweni ya vandlha hiloko Steve na Gaye va n’wi nkhensa leswi a va amukeleke hi musa loko va n’wi endzela ro sungula. U te: “A ndzi mi amukelanga hileswi ndzi nga ni musa. Ndzi mi amukele hileswi a ndzi swi tiva leswaku mi ta fika. Kwalomu ka masiku manharhu a ndzi ri karhi ndzi khongela ndzi kombela ku pfuniwa.” Sweswi a nga xwi eminhlanganweni naswona ku nga ri khale u ta khuvuriwa.

Ray na Jill a va famba hi movha mixo wun’wana hiloko va hlangana ni wanuna loyi a a famba etlhelo ka gondzo ivi va sungula ku bula na yena. Va n’wi nyike magazini va tlhela va kombela ku dyondza na yena Bibele. U wu tekile a tlhela a vula leswaku u tshame a dyondza Bibele ni Timbhoni ta Yehovha. A a ha ku fika endhawini yoleyo naswona u pfumele ku ya emahlweni a dyondzeriwa Bibele.

Hinkwavo lava titsonaka swo karhi leswaku va tirhela Yehovha va swi tiva leswaku ‘Xikwembu a xi pfumali ku lulama lerova xi nga rivala ntirho wa vona ni rirhandzu leri va ri kombiseke hikwalaho ka vito ra xona.’ (Hev. 6:10) Tanihi leswi miri wu nga ni swirho swo tala leswi tirhisanaka, xirho xin’wana ni xin’wana xa vandlha xi nga hoxa xandla leswaku vandlha ri tshama ri tiyile eripfumelweni. “Xikwembu xi veke swirho [evandlheni], xin’wana ni xin’wana xa swona hilaha xi swi rhandzeke hakona” naswona matshalatshala lama endliwaka hi xirho xin’wana ni xin’wana ma endla leswaku “swirho leswin’wana hinkwaswo swi tsaka.” (1 Kor. 12:18, 26) Ku khomisana loku ka “vatirhi-kulobye ni Xikwembu” ku dzunisa Yehovha, loyi a tshamelaka ku “kurisa” ntirho wa yena.—1 Kor. 3:6, 9.

KU SIMEKA MAHUNGU LAMANENE HI NAWU

Yesu u byele vaapostola va yena a ku: “Mi ta vengiwa hi vanhu hinkwavo hikwalaho ka vito ra mina.” (Mat. 10:22) Vadyondzisiwa va Yesu a va ta langutela leswaku vakaneti va vona va va ‘hembela hi swilo hinkwaswo swo homboloka hikwalaho ka yena.’ (Mat. 5:11) Xana vadyondzisiwa va Kreste va manguva lawa va ma ‘simeka njhani mahungu lamanene hi nawu’?—Filp. 1:7.

Armenia

Ku sukela hi April 2007 ku ya eka April 2008, lava tirhaka eka ndzawulo ya ku rhumela ni ku amukela swilo eArmenia va ale ku nyika vamakwerhu Tibibele ni minkandziyiso leyi sekeriweke eBibeleni leyi tlulaka tithani ta nkombo, va vule leswaku va fanele va rhanga va hakela mali yo tala swinene ya xibalo. Eku heteleleni, hi April 2008, vamakwerhu va kume minkandziyiso ya vona yo sungula endzhaku ka loko va sindzisiwe ku hakela swibalo kasi minkandziyiso yin’wana a va si yi kuma. Vamakwerhu va karhi va ringeta ku lulamisa xiphiqo lexi ehubyeni.

Kazakhstan

Vamakwerhu vambirhi lava humaka eyindlu-nkulu ya misava hinkwayo ya Timbhoni ta Yehovha, lava a va endzele eKazakhstan leswaku va ya khutaza vamakwerhu, va khomiwile endzhaku ka nhlangano wo hlawuleka lowu a wu khomeriwe eAlmaty. Va yisiwe exitichini xa maphorisa laha va nga konanisiwa kona naswona va yisiwe eka muavanyisi loyi a nga va vona nandzu wa ku “endla mintirho ya vurhumiwa.” Hambileswi hi ku famba ka nkarhi va ntshunxiweke, ku ni matshalatshala lama endliwaka yo pfuna vamakwerhu lavambirhi leswaku ku suriwa milandzu ya vona. Masiku lawa, valawuri va secha tindlu ta vamakwerhu leswaku va kavanyeta minhlangano ni tidyondzo ta Bibele. Tihuvo ti sule mpfumelelo wa mavandlha manharhu lama tsarisiweke ximfumo naswona maphorisa ma hambeta ma kavanyeta ntirho wo chumayela ni minhlangano exifundzheni xa n’walungu wa Lwandle ra Khaspi.

Tajikistan

Vukhongeri Bya Timbhoni ta Yehovha eTajikistan byi tsarisiwe ximfumo hi 1994 naswona sweswo swi endle leswaku ti kota ku gandzela ti ntshunxekile. Hambiswiritano, hi October 11, 2007, ndzawulo ya ta ndhavuko ni vukhongeri yi endle xiboho xo yirisa Timbhoni ta Yehovha. Vamakwerhu va karhi va endla matshalatshala ya ku komba valawuri leswaku Timbhoni ta Yehovha i vanhu lava rhandzaka ku rhula nileswaku a va xungeti munhu.

Uzbekistan

Swilo swa ha ti fambela ximatsi Timbhoni ta Yehovha ta le Uzbekistan. Eku sunguleni ka 2008, Mbhoni yin’wana ya Yehovha yi gweviwe ku ya tirha malembe ya mune ekampeni ya vatirhi hikwalaho ko endla mintirho leyi khumbaka vukhongeri bya yona. Tin’wana ti khomiwile, ti pfaleriwa, ti gweviwa ti tlhela ti rihisiwa hikwalaho ko tlula milawu ya tinhlengeletano ta vukhongeri ni ku dyondzisa hi vukhongeri bya tona. Minhlangano ya kavanyetiwa, makaya ya Timbhoni ma sechiwa, ti tekeriwa minkandziyiso naswona vahuweleri va pfaleriwa. Vamakwerhu vo tala va rhukaniwa ni ku biwa hi maphorisa.

Valawuri vo hlayanyana va xifundzha lexi va pfumela leswaku mikhuva leyi yo biha yi hlohloteriwa hi vafundhisi. Hi hambeta hi khongelela leswaku valawuri lava va hatla va swi vona leswaku leswi va swi endlaka a swi lulamanga, nileswaku va pfumelela vamakwerhu leswaku va ‘hanya vutomi byo rhula ni byo hola hi ku tinyiketela loku heleleke eka Xikwembu ni ku tiyimisela.’—1 Tim. 2:1, 2.

Greece

Huvo ya le Greece yi humese swiboho swimbirhi leswi khumbaka ku xixima mfanelo ya vanhu ya ku ala ku endla swilo leswi mapfalo ya vona ma nga va pfumeleliki ku swi endla hikwalaho ka vukhongeri bya vona. Loko Konstantinos Kotidis a nga si rhurhela eGreece u tshame a va socha ra Soviet Union kambe sweswi se i Mbhoni ya Yehovha. Loko valawuri va vita Makwerhu Kotidis leswaku a ta va socha, a va pfumelanga leswaku a endla mintirho yin’wana ya tiko. Va vule leswaku tanihi leswi a nga tshama a va socha, mhaka ya leswaku ripfalo ra yena a ri n’wi pfumeleli ku tlhela a endla ntirho wolowo a va yi twisisi. Hambiswiritano, Huvo leyi Tlakukeke yi vule leswaku loko munhu a tshame a va socha kambe hi ku famba ka nkarhi a va xirho xa vukhongeri byo karhi kutani ripfalo ra yena ri nga ha n’wi pfumeleli ku va socha, wa pfumeleriwa ku endla mintirho yin’wana ya tiko.

Eka nandzu wun’wana, mfumo wu ale ku thola Stylianos Ioannidis hileswi a nga tshama a ala ku va socha hileswi ripfalo ra yena ri nga n’wi pfumeleriki. Kambe Huvo leyi Tlakukeke yi vule leswaku loko munhu a hete xigwevo xa yena a swi nga ha fanelanga leswaku a va socha. Huvo yi tlhele yi vula leswaku a nge he vitaniwi evusocheni naswona mfumo wu fanele wu n’wi thola eka ndzawulo yin’wana ni yin’wana. Eka xiendlakalo lexi, i ro sungula leswaku Huvo leyi Tlakukeke yi endla xiboho eka nandzu lowu fanaka ni lowu nga tshama wu tengiwa hi Huvo Ya Le Yuropa Ya Timfanelo ta Vanhu, laha yi nga pfumelela leswaku Mbhoni ya Yehovha yi nyikiwa ntirho hambileswi yi nga tshama yi khotsiwa hikwalaho ka leswi ripfalo ra yona a ri nga yi pfumeleli ku va socha.

Eritrea

Vamakwerhu va le Eritrea va ha khomiwa hi ndlela yo biha. Valawuri va ha pfalele Timbhoni ta Yehovha to hlayanyana emakhotsweni lama nga tikampa naswona yo tala ma le ka xiyimo lexi nga tsakisiki nikatsongo. Hi July 2008 ku khomiwe vamakwerhu van’wana va tsevu ku katsa ni vakulu lava rhangelaka ntirho etikweni rero. Hambileswi ku endliwaka matshalatshala naswona ku komberiwaka mpfuno wa matiko man’wana, mfumo wa kwalaho wu tiyimisele ku lwisana ni vugandzeri bya Xikwembu xa ntiyiso, Yehovha.

Korea Dzonga

EKorea Dzonga ku karhi ku endliwa matshalatshala yo pfuna vamakwerhu hikuva mfumo a wu ti xiximi timfanelo ta vanhu lava alaka ku ya evusocheni hikwalaho ka leswi mapfalo ya vona ma nga va pfumeleliki. Eka malembe ya 50 lama hundzeke vamakwerhu va xinuna lava tlulaka 13 000 va tshame va pfaleriwa ekhotsweni naswona va kwalomu ka 500 va ha ri ekhotsweni. Ku tiyimisela ka vona ni ku tikhoma ka vona tanihi Vakreste swi endla leswaku vabohiwa ni vatirhela-mfumo va tiva hi Yehovha Xikwembu xa hina, va tlhela va dzunisa vito rakwe. (1 Pet. 2:20) Sweswi Timbhoni ta 488 se ti yise swivilelo swa tona eka Komiti ya Timfanelo ta Vanhu ya Nhlangano wa Matiko naswona swa timbirhi se swi yingisiwile hi 2006. Sweswi vamakwerhu va tshemba leswaku mfumo wu ta endla hilaha wu nga tshembisa hakona leswaku lava nga laviki ku va masocha va nga endla mintirho yin’wana yo pfuna vaaki.

Rwanda

Hi April 2008 mathicara hinkwawo ya le Rwanda ku katsa ni lama nga Timbhoni ta Yehovha a ma fanele ma ya eka seminara yo karhi. A ku humesiwe xileriso xa leswaku hinkwawo ma fanele ma va kona hambiloko leswi ku nga ta buriwa hi swona swi lwisana ni mapfalo ya wona lama leteriweke hi Bibele. Hikwalaho ka sweswo Timbhoni ta 215 leti aleke ku va kona ti hlongoriwile entirhweni naswona vamakwerhu vambirhi va xisati va hete mavhiki yo hlayanyana va pfaleriwe ekhotsweni. Leswi a ku buriwa hi swona a swi katsa timhaka ta tipolitiki ni ta vusocha naswona lava veke kona va lerisiwe ku hlanganyela eka minkhuvo ya tiko ni ya tipolitiki. Hinkwavo lava a va ringeta ku baleka a va siveriwa hi masocha. Ku sukela hi nkarhi wolowo, vana va 90 va Timbhoni ta Yehovha va hlongoriwile exikolweni hikwalaho ko ala ku yimbelela risimu ra tiko kumbe ku losa mujeko. Ha tiyiseka leswaku Yehovha u ta tiyisa vamakwerhu swin’we ni vana va vona leswaku va tshama va tshembekile hambiloko va xanisiwa.

Spain

Mfumo wa le Spain wu lerise leswaku Timbhoni hinkwato ta Yehovha leti tirhaka eBethele ni valanguteri va swifundzha ni va miganga, va tekiwa tanihi “malandza lama endleke xiboho . . . lama tinyiketeleke entirhweni wa vurhumiwa kumbe wa vurisi, wo dyondzisa hi ta vukhongeri kumbe ku endla mintirho yin’wana leyi fambisanaka ni ku tinyiketela evukhongerini bya vona.” Xiboho lexi xi endliwa hi nkarhi lowu valawuri va matiko man’wana va kanakanaka loko Timbhoni ta Yehovha ti ri malandza lama faneleke ma kuma timfanelo leti kumiwaka hi vanhu va vukhongeri lebyin’wana.

HUVO YA LE YUROPA YA TIMFANELO TA VANHU

Timbhoni ta Yehovha ta le Armenia, Austria, Azerbaijan, Furwa, Georgia, Rhaxiya, Turkey ni le Ukraine ti rhumele swivilelo swa 24 leswi swa ha faneleke swi kambisisiwa hi Huvo Ya Le Yuropa Ya Timfanelo Ta Vanhu le Strasbourg eFurwa. Swivilelo sweswo swi khumba timfanelo ta vaaki lava tshamaka ematikweni lawa milandzu ya wona yi faneleke yi tengiwa hi Huvo ya le Yuropa ya Timfanelo ta Vanhu, to fana ni mfanelo yo ala ku va socha hileswi ripfalo ra munhu ri nga n’wi pfumeleliki. Kasi swin’wana swi katsa ku xanisiwa ni ku nyenyiwa ka vukhongeri bya tona, ku suriwa ximfumo ka vandla leri Timbhoni ta Yehovha ti tsarisiweke ximfumo ha rona, ku kavanyetiwa ka tona hi mfumo loko ti hlengeletane hi ku rhula ni timfanelo ta vatswari lava nga Timbhoni leswaku va kurisa vana va vona tanihi Timbhoni ta Yehovha.

Austria

Hi July 31, 2008, Huvo Ya Le Yuropa Ya Timfanelo Ta Vanhu yi endle xiboho lexi yimaka ni Timbhoni eka nandzu lowu tisiweke ehubyeni hi tiko ra Austria. Huvo yi vule leswaku milawu ya tiko ra Austria leyi khumbaka vukhongeri yi kandziyela timfanelo ta Timbhoni ta Yehovha ta leswaku ti gandzela ti ntshunxekile hikuva yi teka vukhongeri bya tona byi wela eka vukhongeri lebyi languteriwaka ehansi etikweni. Xiboho lexi xi endliwe endzhaku ka loko ku hundze malembe ya 30 vamakwerhu va ri karhi va ringeta leswaku vukhongeri bya vona byi tsarisiwa ximfumo eAustria. Huvo yoleyo yi te: “[Xiboho lexi a xi nga fanelanga xi teke nkarhi wo leha] hikuva ku ni vukhongeri lebyi ku nga khale byi ri kona ematikweni yo hambana-hambana naswona se ku nga khale byi simekiwile ematikweni wolawo naswona byi xiximiwaka hi vafumi va wona, ku katsa Timbhoni ta Yehovha.” Sweswi mfumo wa Austria wu fanele wu cinca milawu ya wona leyi nga ta endla leswaku vamakwerhu va kuma timfanelo leti fanaka ni ta vukhongeri lebyin’wana lebyikulu le Austria.

Azerbaijan

Hi November 2007, vamakwerhu va yise swivilelo swa vona eka Huvo Ya Le Yuropa Ya Timfanelo Ta Vanhu, leswi khumbaka maphorisa lama kavanyetaka ku gandzela ka vona va ntshunxekile. Hambileswi Timbhoni ta Yehovha ti tsarisiweke ximfumo eAzerbaijan, nhlayo ya vamakwerhu lava pfaleriweke ekhotsweni ni lava biweke ya andza. Mintlawa leyikulu ya maphorisa yi kavanyeta minhlangano ya Timbhoni ta Yehovha, yi teka tibuku ni nhundzu ya tona, yi pfalela lava teke eminhlanganweni yi tlhela yi rhukana ni ku ba vamakwerhu. Leswi maphorisa ma hambetaka ma cinisa vamakwerhu hi nenge wun’we, huvo ya xi tiva xiyimo lexi Timbhoni ti langutaneke na xona naswona yi tiyimisele ku kambisisa mhaka leyi. Hi tshemba leswaku ku nga ri khale vamakwerhu va ta kota ku khoma minhlangano ya vona hi ku rhula va nga chavi ku kavanyetiwa hi maphorisa.

Furwa

Hi February 2005, vamakwerhu va yise swivilelo swa vona eka Huvo Ya Le Yuropa Ya Timfanelo Ta Vanhu leswi khumbaka mfumo wa le Furwa hikwalaho ka leswi wu hakerisaka Nhlengeletano ya Timbhoni ta Yehovha ta le Furwa swibalo leswi nga riki enawini. Ha ha yimele ku twa loko huvo yoleyo yi ta pfumela ku kambisisa swivilelo sweswo. Swa sweswi, vakaneti va byela vanhu mavunwa hi vukhongeri bya hina lerova n’wexemu ku onhiwe Tiholo ta Mfumo ta kwalomu ka 70. Nilokoswiritano, vamakwerhu va le Furwa va tshemba leswaku huvo yi ta hatla yi vula leswaku mfumo wa le Furwa a wu ri ni xihlawuhlawu eka vamakwerhu kutani sweswo swi ta endla leswaku Timbhoni ta Yehovha etikweni rero ti ntshunxeka.

Rhaxiya

Hi December 2001, Timbhoni ta Yehovha ti yise swivilelo swa tona eka Huvo Ya Le Yuropa Ya Timfanelo Ta Vanhu, ti vilela hileswaku ti tshamela ku hehliwa hi vugevenga ni ku tlula nawu. Hi June 2004 Huvo ya Doroba ra Moscow yi pfumelelane ni xiboho lexi endliweke hi huvo leyitsongo xo yirisa ntirho wa Timbhoni ta Yehovha nileswaku ku herisiwa vandla ra tona ra le nawini. Nilokoswiritano, vamakwerhu va le Moscow va ha swi kota ku hlangana leswaku va gandzela naswona va ha chumayela mahungu lamanene ya Mfumo. Hambiswiritano, le Moscow ni le tindhawini tin’wana eRhaxiya, valawuri vo tala va ha kavanyeta minhlangano ni tinhlengeletano ta vamakwerhu naswona vamakwerhu va ha khomiwa hi ndlela yo biha. Hi xikombiso, hi July le dorobeni ra Chekhov, leri nga mpfhuka wa tikhilomitara ta kwalomu ka 60 le dzonga wa Moscow, vanhu vo karhi va hise Holo ya Mfumo hi vomu. Hambileswi vanhu lava timelaka ndzilo va vitaniweke hi nkarhi wolowo, lava nga tivonela hi ya vona va vula leswaku a va nga swi lavi ku wu timela, vanhu volavo va vule nileswaku maphorisa a ma si kambisisa leswaku i vamani lava hiseke holo yoleyo. Hambileswi vamakwerhu va le Rhaxiya va xanisiwaka naswona va kanetiwaka, va tshama va tshembekile naswona va langutele leswaku Yehovha a va seketela.

Yehovha u tshembise leswaku tlhari rihi ni rihi leri nga ta hlasela malandza ya yena a ri nge humeleli. (Esa. 54:17) Hambi ku ri swiyimo leswi tikaka swinene swi nga pfuna leswaku “mahungu lamanene ma ya emahlweni.” Kutani malandza ya Xikwembu ma tiyimisele ku hambeta ma ‘yima ma tiyile hi moya wun’we, ma pfunana hi moya-xiviri wun’we ku lwela ripfumelo eka mahungu lamanene, naswona hambi hi ndlela yihi ma nga tshukisiwi hi vakaneti va wona.’ (Filp. 1:12, 16, 18, 27, 28) Hi kombela leswaku mi ‘hambeta mi khongelela’ vamakwerhu emisaveni hinkwayo tanihi leswi va tshembeleke eka Yehovha, loyi a nga ‘khokholo ni Muponisi’ wa vona.—2 Tes. 3:1; Ps. 18:2.

KU NYIKETERIWA KA MARHAVI

Hi Mugqivela November 10, 2007, vamakwerhu va kwalomu ka 4 000 erhavini ra laha Afrika Dzonga a va tsakile loko ku nyiketeriwa miako leyi engeteleriweke ya vugandliselo, kamara ro dyela ni muako wo tshama eka wona.

Vaendzi a va tsakile loko va vona muako wo gandlisela lowu engeteleriweke ni muchini wa MAN Roland Lithoman wu ri karhi wu endla magidi-gidi ya Tibibele ni minkandziyiso ya Bibele. Muchini lowuntshwa wo hlanganisa tibuku se wu hlanganise Tibibele leti tlulaka miliyoni ta Vuhundzuluxeri Bya Misava Leyintshwa hi tindzimi ta 16 ta laha Afrika. Vaendzi va kombiwe muako lowu kurisiweke wa rhavi laha ku hlayisiwaka minkandziyiso ya Bibele leyi tirhisiwaka hi mavandlha ya kwalomu ka 8 000 ematikweni ya khume ya laha dzongeni wa Afrika.

Hi June 7, 2008, ku nyiketeriwe miako leyi engeteleriweke ya rhavi ra le Nigeria le Lagos leri nga eka mpfhuka wa tikhilomitara ta 360 edzonga-vupela-dyambu bya Bethele leyi nga le Igieduma. Rhavi leri nga le Lagos ri ni muako wo tshama eka wona lowu nga ni makamara ya 24, muako wo hlayisa nhundzu ni tihofisi. Swilo swo tala swa rhavi swi endliwa eLagos, ku nga ntsindza wa mabindzu ya tiko. Miako leyi leyintshwa yi rhurhela vatirhi va le Bethele lava landzaka nhundzu leyi teke hi swikepe, va tlhela va xavela rhavi swilo leswi ri swi lavaka ku katsa ni ku landza ni ku fambisa vanhu erivaleni ra swihaha-mpfhuka. Nakambe Rhavi ra le Lagos ri ta tirhisiwa ku khomela Xikolo xa Ndzetelo wa Vutirheli kukondza rhavi ra le Igieduma ri hela ku engeteleriwa. I ntiyiso leswaku Yehovha wa wu katekisa ntirho wo chumayela laha Afrika hilaha a endlaka hakona emisaveni hinkwayo.

KU HLOMISERIWA KU ENDLA NTIRHO WA XIKWEMBU

Hakunene hi nkhensa Yehovha leswi a nga hi hlomisa hi ‘xilo xin’wana ni xin’wana lexinene leswaku hi endla ku rhandza ka yena, a endla eka hina leswi tsakisaka swinene emahlweni ka yena ha Yesu Kreste.’ (Hev. 13:21) Hikwalaho ka leswi Yehovha a nga “endla swo tala swinene ku tlula leswi hi swi kombelaka kumbe leswi hi swi ehleketaka,” hi vula hi timbilu ta hina hinkwato hi ku: “Eka yena a ku ve ku vangama hikwalaho ka vandlha ni hikwalaho ka Kreste Yesu eka switukulwana hinkwaswo hi masiku ni masiku.”—Efe. 3:20, 21.

[Bokisi leri nga eka tluka 25]

Ha Yini Vukhongeri Byi Tsarisiwa Ximfumo Naswona Byi Tsarisiwa Njhani?

Ndlela leyi vukhongeri byi tsarisiwaka ha yona ximfumo ya hambana hi ku ya hi matiko. Matiko man’wana yo fana ni Armenia na Azerbaijan, ma ni milawu yo karhi leyi vukhongeri byi yi tirhisaka loko byi lava ku tsarisiwa ximfumo. Loko mfumo wu pfumela ku byi tsarisa, vukhongeri byolebyo byi ta tekiwa byi ri enawini etikweni rolero. Ematikweni man’wana, vukhongeri byi nga wela eka mintlawa yimbirhi. Eka wo sungula ku tsarisiwa vukhongeri lebyikulu etikweni. Ntlawa lowo sungula wu endla leswaku vukhongeri byi vuyeriwa hi swilo swo tala swo fana ni ku nga hakeli swibalo. Kasi eka ntlawa lowa vumbirhi ku tsarisiwa vukhongeri lebyitsongo ni lebya ha ku simekiwaka etikweni.

Matiko man’wana yo fana ni Georgia na United States of America, a ma na milawu leyi vekiweke leyi vukhongeri byi yi landzelaka loko byi lava ku tsarisiwa ximfumo. Eka swiyimo swoleswo, tihuvo ti nyika vukhongeri hinkwabyo ntshunxeko lowu byi wu lavaka. Hambileswi vukhongeri byi nga tsarisiwiki ximfumo, byi nga endla xikombelo xo va ni vandla ra byona leri nga ta yimela timhaka ta nawu. Loko xikombelo xa byona xo amukeriwa, byi nga ha tirhisa vandla rolero leswaku ri hlela mintirho yin’wana yo fana ni ku kandziyisa tibuku swin’we ni ku xava miako ya byona.

[Mepe lowu nga eka tluka 21]

(Leswaku u vona rungula leri hleriweke hi ku helela, vona nkandziyiso wa kona)

AUSTRIA

FURWA

SPAIN

GREECE

ERITREA

RWANDA

ARMENIA

AZERBAIJAN

RHAXIYA

KAZAKHSTAN

UZBEKISTAN

TAJIKISTAN

KOREA DZONGA

[Xifaniso lexi nga eka tluka 11]

Vandlha ra le Siaya leri tirhisaka Xiluo

[Xifaniso lexi nga eka tluka 13]

“Vuhundzuluxeri Bya Misava Leyintshwa” byi humesiwe hi tindzimi leti tlulaka 70 byi helerile kumbe byi ri “Matsalwa Ya Xigriki”

[Xifaniso lexi nga eka tluka 22]

Konstantinos Kotidis

[Xifaniso lexi nga eka tluka 22]

Stylianos Ioannidis

[Xifaniso lexi nga eka tluka 29]

Miako leyintshwa le Lagos eNigeria

[Xifaniso lexi nga eka tluka 29]

Ndhawu yo gandlisela erhavini ra laha Afrika Dzonga