Swiendlakalo-nkulu Swa N’wexemu

SWIVIKO leswi humaka emisaveni hinkwayo swi tiyisekisa leswaku Timbhoni ta Yehovha ti khomekile swinene hi ntirho wo chumayela mahungu lamanene ya Mfumo “emisaveni hinkwayo leyi akiweke leswaku byi va vumbhoni ematikweni hinkwawo.” (Mat. 24:14) Hikwalaho ka ku tiyisela ni vun’we bya tona, swin’we ni ku tirha ka tona hi rirhandzu leri nga riki na vukanganyisi, ‘rito ra Yehovha ri twarisiwile, naswona ripfumelo ra tona ri hangalake hinkwako-nkwako etindhawini ta le kule.’—1 Tes. 1:8.

DYONDZO YA NDYANGU LEYI AKAKA YI TLHELA YI TSAKISA

Hi January 1, 2009, Timbhoni ta Yehovha ti endle ku cinca lokukulu eka xiyimiso xa minhlangano ya tona ya vhiki ni vhiki. Dyondzo ya Buku ya Vandlha yi cinciwile yi va Dyondzo ya Bibele ya Vandlha naswona yi sungule ku khomiwa hi nkarhi wun’we ni Xikolo xa Vutirheli bya le Tilweni swin’we ni Nhlangano wa Ntirho. Timbhoni hinkwato ti khutaziwe leswaku ti tirhisa siku leri a ti khoma Dyondzo ya Bibele ya Vandlha ha rona leswaku ti ri tirhisela ku khoma Dyondzo ya Ndyangu ha rona.

Xana malandza ya Yehovha ma angule njhani eka ku cinca loku ka rirhandzu? Yo tala ya wona ma titwa hi ndlela leyi nuna un’wana a titweke ha yona loyi a nga te: “Ndzi ba mandla ndzi vuyelela. Mina ni nsati wa mina a hi na wona marito lama nga yi hlamuselaka kahle ndlela leyi hi vuyeriwaka ha yona hi siku leri ra Dyondzo ya Ndyangu. Dyondzo leyi yi endle leswaku hi n’wi rhandza swinene Yehovha naswona yi tlhele yi endla leswaku hi ya hi rhandzana swinene tanihi mpatswa. Hakunene lunghiselelo leri, leri humaka eka Tata wa hina la nge matilweni, i rinene naswona i ra vutlhari.”

I yini leswi mindyangu yi swi endlaka leswaku yi kota ku tirhisa nkarhi lowu yi nga na wona wa nkoka hi vutlhari? Manana un’wana u te: “Madyambu man’wana hi kambisisa tluka 31 ra Xalamuka! hinkwerhu naswona madyambu man’wana hi hlalela vhidiyo yin’wana ya nhlengeletano. Vana va hina va swi tsakela ku endla ndzavisiso nakambe swa va tsakisa ku dyondza va tlhela va tiphina hi nkarhi wa Dyondzo ya Ndyangu. Eka n’hweti yo karhi hi va avela ku endla ndzavisiso hi munhu wo karhi loyi ku vulavuriwaka ha yena eBibeleni ivi eka leyi landzelaka va nyikela nkulumo hi yena. Mina ni nuna wa mina hi endla leswi fanaka. N’wana wa hina wa mufana la nga ni malembe ya khume u yi nyikele kahle nkulumo ya yena yo sungula leyi a yi vulavula hi Nowa! U tlhele a hi byela leswaku rungula rero hi nga ri tirhisa njhani namuntlha. Hiloko a hi komba ngalava ya Nowa leyi yena a nga tiendlela yona. Evhikini leri landzeleke, n’wana wa hina wa nhwanyana a a ri ni nkulumo leyi a yi vulavula hi maendzo ya vurhumiwa ya muapostola Pawulo. Loko a hetile hi phokotele mavoko ivi endzhaku ka sweswo a hi vutisa swivutiso leswi yena a swi thyeke nhloko-mhaka leyi nge, Wa Tsundzuka Xana? A swi tsakisa hakunene!” Ndyangu lowu wu swi xiyile leswaku lunghiselelo leri ra Dyondzo ya Ndyangu i nkateko lowu humaka eka Yehovha. Manana loyi u ri: “Mina ni nuna wa mina hi langutane ni swiyimo swo tala swo tika naswona lunghiselelo leri ra hi pfuna leswaku hi ya emahlweni hi swi tiyisela.”

Makwerhu un’wana wa xisati u te: “Ndza ri nkhensa lunghiselelo leri, leri ndzi pfuneke leswaku ndzi tlhela ndzi pfuka hi tlhelo ra moya! Endzhaku ka loko vana va hina va kurile naswona va nga ha tshami laha kaya, mina ni nuna wa mina hi tshike ku va ni dyondzo ya ndyangu. Kambe sweswi se hi na yona. Minkarhi yo tala hi dyondza tiawara timbirhi naswona nkarhi wu hatla wu famba!”

Tanihi leswi nhlomulo lowukulu wu yaka wu tshinela swinene, onge nkarhi lowu u wu vekeleke Dyondzo ya Ndyangu wu nga ku pfuna leswaku u hisekela ku dyondza Rito ra Xikwembu wu tlhela wu ku pfuna leswaku u tiya hi tlhelo ra moya leswaku u lwa na Diyavulosi. Wu tirhise kahle nkarhi lowu wa nkoka leswaku u ‘tshinela eka Xikwembu, kutani xi ta tshinela eka wena.’—Yak. 4:7, 8.

KU ENDLA LESWI ENGETELEKEKE LESWAKU HI SUNGULA TIDYONDZO TA BIBELE

Ku sukela hi January 2009, mavandlha ma khutaziwe ku tirhisa Mugqivela wun’we kumbe Sonto yin’we n’hweti yin’wana ni yin’wana leswaku ma ta sungula tidyondzo ta Bibele. Xana vuyelo byi ve byihi? Vahuweleri vo tala va hlamarile va tlhela va tsaka swinene—a va hlamarisiwa hileswi ku sungula tidyondzo swi olovaka ku tlula ndlela leyi a va yi ehleketa naswona a va tsaka hileswi vanhu vo hambana-hambana a va pfumela ku dyondzeriwa hi ku tirhisa buku leyi nge Xana Bibele Yi Dyondzisa Yini Hakunene? Valanguteri va miganga ni va swifundzha va vika leswaku mavandlha ma ri hisekela lunghiselelo leri nileswaku vuyelo lebyi kumiweke loko ra ha ku sungula a byi komba leswaku swilo swi ta famba kahle. Hi xikombiso, eka tin’hweti ta ntlhanu to sungula, eItaly ku sunguriwe tidyondzo letintshwa ta Bibele leti tlulaka 8 000.

Vahuweleri lava a va nga ri na tona tidyondzo, sweswi se va endla maendzo yo vuyela naswona va sungule ku fambisa tidyondzo. Carolina wa le Peru u ri: “Loko lunghiselelo leri ri nga si sungula a ndzi nga ri na dyondzo ya Bibele leyi a ndzi yi fambisa kambe xiringanyeto xo vekela etlhelo siku rin’we en’hwetini xi ndzi pfunile ku vona leswaku i swa nkoka ku sungula dyondzo ya Bibele. Ndza swi kota ku komba vini va miti leswaku dyondzo ya Bibele ya olova nileswaku a yi dyi nkarhi. Ndzi nkhensa Yehovha hikuva hi ku tirhisa swiringanyeto leswi hi nyikiweke swona, ndzi ve ni vuyelo lebyinene; sweswi ndzi dyondzela vanhu vambirhi Bibele.”

Satya, makwerhu wa xisati la nga phayona eBritain, a a chava ku kombela vanhu ku dyondza na vona Bibele eka riendzo ro sungula. Kambe hi siku leri a va ri vekele ku sungula tidyondzo ta Bibele, a a tiyimisele ku nga tlheleli ekaya a nga kalanga a xi tirhisile xiringanyeto lexi. A a tsakile loko wansati un’wana a pfumela ku dyondza na yena. Satya u kume leswaku a swi olova swinene ku tlula ndlela leyi a a ehleketa yona!

Minkarhi hinkwayo, Luca, makwerhu la ha riki muntshwa wa le Palermo, eSicily, a a siyela noni yin’wana timagazini leyi a yi chava ku amukela vanhu endlwini ya yona. Siku rin’wana hi Mugqivela nindzhenga, hi siku ro sungula tidyondzo ta Bibele, Luca u ye eka noni leyi ni buku leyi nge, Leswi Bibele Yi Swi Dyondzisaka leyi a a yi pfurile ivi a hlaya xiyenge xo karhi eka yona. Noni leyi yi tsakisiwe hi buku yoleyo hiloko yi heta nkarhi ya ha vulavula na Luca. Luca u yi byele leswaku u yi khomele tinhlamulo ta swivutiso swa yona—ku katsa ni nhlamulo ya loko yi ta tlhela yi vona nuna wa yona. Luca u pfule eka tluka 72, laha ku vulavuriwaka kona hi ku pfuxiwa ka vafi. Noni leyi yi khumbiwe hi ntshembo lowu wa Bibele hiloko yi pfumela ku dyondzeriwa Bibele. Kutani sweswi yi dyondzeriwa Bibele minkarhi hinkwayo naswona handle ko chava ya ti amukela Timbhoni ekaya ra yona.

Mulanguteri un’wana wa xifundzha wa le Peru u ri: “Ku sukela loko lunghiselelo leri ri sungurile, ri pfune mavandlha yo tala leswaku ma andzisa nhlayo ya tidyondzo ta Bibele leti ma ti fambisaka. Vandlha rin’wana ra le Chiclayo ri vike tidyondzo letintshwa ta 25 hi n’hweti yin’we naswona ra le Chepén ri sungule tidyondzo ta 24.”

Nakambe vahuweleri lava ha riki vantshwa va swi kotile ku sungula tidyondzo ta Bibele. Giovanna la nga ni malembe ya 11 wa le São Paulo, eBrazil u ri: “Siku rin’wana nindzhenga hi Mugqivela a ndzi ri karhi ndzi chumayela hi yindlu ni yindlu ni mana wa mina, hi ri karhi hi sungula tidyondzo ta Bibele hi ku tirhisa buku leyi nge, Leswi Bibele Yi Swi Dyondzisaka. Endlwini yo sungula, ndzi vutise n’wini wa muti, la nga n’wamabindzu la dumeke, loko a kholwa leswaku Bibele yi huhuteriwe hi Xikwembu. U vule leswaku wa swi kholwa. Hiloko ndzi n’wi komba buku ya 2 Timotiya 3:16. U vule leswaku swa n’wi tsakisa ku vona xinhwanyetana xi n’wi byela swilo leswi tsakisaka ivi a teka buku yoleyo.

“Loko ndzi tlhelela eka yena ndzi fambe ni kokwana wa mina wa xinuna hikuva a a tolovelane na yena. Wanuna yoloye u hi kombele leswaku hi nghena endlwini, hiloko ndzi n’wi kombela leswaku a languta tinhloko-mhaka ta buku leyi nge, Leswi Bibele Yi Swi Dyondzisaka ivi a hlawula leyi n’wi tsakisaka. U hlawule ndzima 11 leyi nge, ‘Ha Yini Xikwembu Xi Pfumelela Leswaku Ku Va Ni Ku Xaniseka?’ Endzhaku ka loko hi hlaye tindzimana timbirhi to sungula, yena ni nsati wa yena va vutise swivutiso swo tala. A va tsake ngopfu loko va kuma leswaku Bibele yi va hlamulela swivutiso swa vona hinkwaswo naswona va pfumerile ku dyondzeriwa Bibele minkarhi hinkwayo. Ndzi tsake swinene leswi ndzi koteke ku sungula dyondzo ya Bibele emutini wo sungula lowu hi ngheneke eka wona!”

I ntiyiso leswaku a hi vanhu hinkwavo lava nga ta pfumela ku dyondzeriwa Bibele naswona van’wana lava sunguleke ku dyondzeriwa va ta tshika. Kambe, tanihi leswi hi nga vatirhi-kulobye ni Xikwembu, hi ta hambeta hi kombela ku dyondza ni vanhu vo tala hilaha hi nga swi kotaka hakona, hi ri karhi hi swi tiva leswaku loko mafambiselo ya swilo ya Sathana ma nga si lovisiwa, Yehovha u va kokela enhlengeletanweni ya yena vanhu lava fanaka ni tinyimpfu.—Yoh. 6:44; 1 Kor. 3:9.

THEKINOLOJI YI PFUNA KU “SWI HATLISISA”

Vanhu va Yehovha va tsaka loko va vona ku hetiseka ka vuprofeta lebyi, lebyi tsakisaka, lebyi nge: “Lontsongo u ta va gidi, kasi lontsongo ngopfu u ta va tiko ra matimba. Mina Yehovha, ndzi ta swi hatlisisa hi nkarhi wa swona.” (Esa. 60:22) A swi kanakanisi leswaku Yehovha u hambeta a tirhisa thekinoloji leswaku a hatlisisa ku kula ka tlhelo ra moya enkarhini lowu, lowu tsakisaka. Hikwalaho ka sweswo, Huvo leyi Fumaka yi nyike mpfumelelo wa leswaku ku endliwa progreme ya khompyuta leyi nga ta tirhisiwa hi marhavi hinkwawo emisaveni hinkwayo.

Vamakwerhu lava sunguleke progreme leyi, lava sukaka erhavini ra laha Afrika Dzonga, va rhurhele eYindlu-nkulu ya Misava Hinkwayo eBrooklyn, le New York, laha va hambetaka va endla progreme leyi ni ku yi hlayisa. Marhavi ya kwalomu ka 20 ma tirha ku lulamisa swiphiqo leswi marhavi lama nga ekusuhi na wona ma vaka na swona swa progreme leyi pfunaka swinene ya khompyuta.

Xana yi vuyerisa hi ndlela yihi? Tanihi leswi marhavi hinkwawo ma tirhisaka progreme leyi fanaka, ma nga ha byelana rungula ro karhi. Hi xikombiso, marhavi hinkwawo lama gandlisaka emisaveni hinkwayo ma nga ha tiva minkandziyiso leyi marhavi man’wana ma nga na yona exitokweni. Loko ku ri leswaku rhavi ro karhi ri taleriwe hi nkandziyiso wo karhi, rhavi rin’wana ri nga ha wu kombela erhavini rero ematshan’weni yo wu kandziyisa. Progreme leyi, ku katsa ni swin’wana leswi kotaka ku vona leswaku ku laveka minkandziyiso yingani hi ku ya hileswi yi nga komberiwa emavandlheni, yi endle leswaku marhavi hinkwawo ma nga taleriwi hi minkandziyiso.

Progreme leyi yi pfuna vatirhi va le Bethele leswaku va tirha kahle eka mintirho yo fana ni ku lunghiselela tioda ta minkandziyiso ni timagazini, ku hlanganisa swiviko swa lembe swa ntirho wa nsimu, ku hlela mintsombano ni tinhlengeletano swin’we ni ku avela valanguteri va miganga ni va swifundzha swin’we ni maphayona yo hlawuleka swiavelo swa wona. Nakambe progreme leyi ya pfuna emhakeni ya ku xava swilo, ku hlayela timali swin’we ni ku hlayisa swilo leswi tsariwaka ehansi, leswi endlaka leswaku ku nga tirhisiwi tiprogreme ta misava leti durhaka swinene.

VANHU VA DYONDZA NTIYISO EKA INTERNET

Tanihi leswi rivoningo ra xiviri ri voningaka endhawini leyi nga munyama, vanhu va Xikwembu va pfumelela ‘ku voninga ka vona ku vonakala’ etindhawini hinkwato ta misava. (Mat. 5:16) Xitirhisiwa xin’wana lexi pfunaka swinene lexi voningelaka ngopfu etindhawini ta le kule i Web site ya hina leyi nge www.watchtower.org. Web site leyi yi ni swihloko swa timagazini, swiphephana swin’we ni tibroxara hi tindzimi ta kwalomu ka 383 swin’we ni Bibele ya Vuhundzuluxeri Bya Misava Leyintshwa Bya Matsalwa Yo Kwetsima hi tindzimi ta 11. Ku ni swihloko leswi tlulaka 700 swa minkandziyiso yo hambana-hambana eka Web site leyi. Tluka ra le ku sunguleni, ri pfuxetiwa vhiki rin’wana ni rin’wana naswona ri va ni swihloko leswa ha ku humaka leswi rhandziwaka. Xana hi byihi vuyelo lebyi vaka kona hi ku va ni minkandziyiso leyi gandlisiwaka hi tindzimi to tala hi ndlela leyi eka Internet?

Pat, loyi a tshamaka eFlorida, le U.S.A., u kume leswaku u kuma minkandziyiso ya tindzimi timbe hi xihatla eka Web site leyi. U ri: “Endzhaku ka loko hi hete ku fambisa xiphephana lexi nge, Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? ndzi sungule ku gandlisa xiphephana lexi hi tindzimi timbe leswaku ndzi ta xi nyika van’wana lava xi amukeleke hi Xinghezi kambe va vulavulaka ririmi rimbe.” Xana vuyelo byi ve byihi?

Pat u gandlise xiphephana lexi hi Xithai ivi a xi nyika wansati un’wana la nga ni makete. Wansati yoloye a a tsakile naswona a a nga swi tshembi leswaku Pat u hatle a kuma nkandziyiso wa Xithai. Wansati loyi swin’we ni vaxavi van’wana emakete va lave ku tiva vito ra Web site ya hina leswaku va ta tinghenela eka yona. Wansati un’wana u rhambe Pat leswaku a n’wi endzela ekaya ra yena leswaku va ta yisa bulo ra vona emahlweni. Ku fana na Pat, vahuweleri vo tala va vone swi vuyerisa ku gandlisa matluka ma nga ri mangani hi tindzimi timbe eka Web site ya hina leswaku va ta ma nyika vanhu vambe lava tsakelaka.

N’wexemu, vanhu lava tlulaka timiliyoni ta 24 eka matiko-nkulu hinkwawo va nghene eka Web site ya hina. Ku sukela hi 2007 nhlayo ya vanhu lava nghenaka eka yona yi andze hi tiphesente ta 33. Vanhu lava humaka emisaveni hinkwayo, ku katsa ni le swihlaleni leswi nga swoxe, va kombela ku endzeriwa kumbe ku dyondzeriwa Bibele emakaya ya vona. Ku sukela hi 2007 nhlayo ya swikombelo leswi rhumeriwaka hi khompyuta swo kombela ku dyondzeriwa Bibele, swi andze hi tiphesente ta kwalomu ka 55. Ina, rivoningo ra moya ri voninga ni le tindhawini leti ngo va toxe ta laha misaveni, leswi endlaka leswaku Tata wa hina wa le tilweni a dzunisiwa ni ku xiximiwa.—Mat. 5:16.

Ku engetela eka Web site ya www.watchtower.org, ku endliwe yin’wana ya www.jw.org leyi nga ni minkandziyiso yo karhi leyi yingiseriwaka kunene. Xana hi wihi nkoka wa Web site leyi yo hlawuleka?

Trisha, wa le Missouri, eU.S.A., u vule ndlela leyi vo tala va titwaka ha yona loko a ku: “Siku ra Ravumune ndzi ri langutela hi mahlo-ngati.” Ha yini? Hikuva hi Ravumune i siku leri a kopaka minkandziyiso leyintshwa leyi yingiseriwaka kunene ya Xihondzo xo Rindza ni Xalamuka! eka Web site leyi nge, www.jw.org. Trisha i un’wana wa vamakwerhu va magidi va xisati ni va xinuna emisaveni hinkwayo lava minkarhi hinkwayo va nghenaka eka Web site leyi, leyi fuweke hi tlhelo ra moya. Va kopa timagazini, Bibele, tidrama, tibuku, tibroxara ni swiphephana hi tindzimi ta 27 naswona minkandziyiso leyi hinkwayo yo yingiseriwa kunene. Nakambe minkandziyiso ya Ririmi ra Mavoko ra le Amerika yi kumeka hi swiyenge swimbirhi swa vhidiyo leswi rhandziwaka ngopfu.

Kambe, i vamani lava tirhisaka Web site leyi leswaku va kopa minkandziyiso ya hina? Vamakwerhu va xinuna ni va xisati hi vona lava ngopfu-ngopfu va yi tirhisaka kambe ni vanhu van’wana va le matikweni lama tlulaka 200, ku katsa ni matiko lama ntirho wa hina wu yirisiweke eka wona. Vanhu lava tshamaka ePapua New Guinea, eSt. Helena, hambi ku ri eAntarctica, va swi rhandza ku nghena eka Web site leyi. Xana minkandziyiso leyi yingiseriwaka kunene yi va vuyerise njhani vamakwerhu va xinuna ni va xisati? Hi xikombiso, exihlaleni xa French Polynesia, laha swilo leswi rhumeriwaka swi hlwelaka ku fika, swi endla leswaku timagazini ta hina ti fika nkarhi lowu ti faneleke ku dyondziwa ha wona se wu hundzile. Tanihi leswi vahuweleri lava tshamaka eswihlaleni leswi ngo va swoxe va swi kotaka ku nghena eka Internet, va nga swi kota ku yingisela minkandziyiso leyi hoxiweke eka Internet hi siku leri yi hoxiweke ha rona.

Deborah, wa le Illinois, eU.S.A., u ni swiphiqo swo hambana-hambana swa rihanyo leswi endlaka leswaku a nga swi koti ku ya eminhlanganweni ya vandlha nileswaku swi n’wi tikela ku tsundzuka leswi a swi dyondzaka. Sweswi wa swi kota ku kopa ni ku yingisela minkandziyiso naswona u ri, “Se ndza swi tsundzuka leswi ndzi swi yingiselaka naswona ndzi ni xivindzi xo bula ni van’wana ha swona.”

Mpatswa lowu tekaneke wa le xidorobanini xa Texas, le U.S.A., wu dyondzela wansati un’wana la humaka eSiberia naswona wa tsaka hileswi wu kotaka ku n’wi kopela timagazini leti yingiseriwaka kunene hi Xirhaxiya. Makwerhu un’wana wa le California, eU.S.A., u rhandza ku pfuka nimixo a tsutsuma a ri karhi a yingisela timagazini ta hina eka muchini wo tlanga vuyimbeleri swin’we ni swipikara leswitsongo a swi tlhome etindleveni.

Vhiki rin’wana ni rin’wana, mpatswa lowu tshamaka exidorobanini lexi nga le n’walungu wa New Zealand, wu kopa minkandziyiso leyi tirhisiwaka eminhlanganweni—ku nga xihloko lexi dyondziwaka xa Xihondzo xo Rindza, tindzima ta buku leyi nge, “Tihlayiseni eRirhandzwini Ra Xikwembu” ni leyi nge, Dyondza Eka Mudyondzisi Lonkulu wu tlhela wu kopa ni xiyimiso xa ku hlaya ka Bibele ka vhiki rero. Wu heta vhiki hinkwaro wu ri karhi wu yingisela minkandziyiso leyi wu yi kopeke. Nuna wa kona u ri, “Sweswi hi vona leswaku havumbirhi bya hina hi vulavula ngopfu hi swilo swa moya ematshan’weni ya leswaku hi vulavula hi mintshikilelo ya le ntirhweni.” Mindyangu yo tala emisaveni hinkwayo yi endla hilaha ku fanaka.

Vhiki rin’wana ni rin’wana, tindzima ta Bibele leti hlayiwaka hi vhiki rero ta kopiwa minkarhi yo tala swinene—ngopfu-ngopfu hi Ravumbirhi. Nkandziyiso wa Xihondzo xo Rindza lowu dyondziwaka evandlheni hi wona lowu talaka ku kopiwa hi Mugqivela ni hi Sonto wun’wana ni wun’wana. Ku engetela kwalaho, vakulu va le mavandlheni va nga gandlisa tifomo ta nhlengeletano swin’we ni maphepha ya tinkulumo eka yona Web site leyi. Web site leyi yi pfuna nhlengeletano leswaku yi hlayisa nkarhi, mali nileswaku yi hunguta ntirho.

‘SWI TA NYIKELA VUMBHONI’

Loko Timbhoni ta Yehovha ti ri karhi ti lava ku “hanya vutomi byo rhula ni byo hola hi ku tinyiketela loku heleleke [eka Xikwembu]” a ti hlamali loko ti xanisiwa. (1 Tim. 2:1, 2) Yesu Kreste u lemukise vadyondzisiwa va yena leswaku va ta vengiwa loko a ku: “Vanhu va ta mi khoma, va mi xanisa, va mi nyiketa emasinagogeni ni le makhotsweni, mi ta huduleriwa emahlweni ka tihosi ni le ka tindhuna-nkulu hikwalaho ka vito ra mina.” Hambiswiritano, Yesu u vule leswaku muhloti wa tinyarhi ti ta vuya hi yena eka valala volavo va vukhongeri lebyi tengeke. U profete a ku: “Swi ta endla leswaku mi nyikela vumbhoni.”—Luka 21:12, 13, 17.

Leswaku vuprofeta lebya Yesu byi hetiseka, Timbhoni ta Yehovha ti lwisana ni ku nga khomiwi kahle ka tona etindhawini to hlayanyana. Ku hlula ka tona etihubyeni ematikweni yo tala swi ti pfunile leswaku tisirhelela mfanelo ya tona yo va ni ntshunxeko, ku katsa ni mfanelo ya tona yo chumayela hi yindlu ni yindlu ni ku hlangana ti ntshunxekile leswaku ti ta gandzela. Hambileswi ha ha langutanaka ni swiphiqo, hi tsakele ku hlula hi ku ya hi nawu lembe leri, leswi tiyisekisaka muxaka wa ntirho wa vukhongeri lowu hi wu endlaka.

Austria

Tanihi leswi vamakwerhu va nga ni malembe ya 30 va ri karhi va lava ku tsarisiwa ximfumo, hi May 2009 Ndzawulo ya Dyondzo, Vutshila ni Ndhavuko ya le Austria yi nyike Timbhoni ta Yehovha mpfumelelo wa xiyimo xa le henhla swinene wa leswaku ti tiviwa tanihi vukhongeri lebyi nga le nawini. Sweswi Timbhoni i vukhongeri bya vu-14 eAustria lebyi kumeke lunghelo leri. Huvo leyi yi landzele xiboho lexi endliweke hi July 2008 hi Huvo ya le Yuropa ya Timfanelo ta Vanhu, leyi yimeke na hina, hiloko yi endla swiboho swin’wana swinharhu leswi yimeke ni vamakwerhu eAustria, ivi yi swi veka erivaleni leswaku Timbhoni ta Yehovha ti tiviwa ximfumo kwalaho.

Afrika Dzonga

Vayimeri va Watch Tower Bible and Tract Society of South Africa swin’we ni va swirho swa Malandza yo Hlawuleka ya Nkarhi Hinkwawo ya Timbhoni ta Yehovha eMisaveni Hinkwayo lama tirhaka eBethele ya laha Afrika Dzonga, swi yise Ndzawulo ya Vatirhi va Afrika Dzonga eHubyeni ya Vatirhi va Afrika Dzonga. Nandzu wolowo a wu fanele wu swi veka erivaleni leswaku vamakwerhu lava tirhaka eBethele a va fanelanga va fanisiwa ni vatirhi hilaha swi hlamuseriwaka hakona eka milawu ya vatirhi va Afrika Dzonga. Hi March 2009 Huvo ya Vatirhi yi endle xiboho lexinene lexi tiyisekisaka mhaka leyi xi tlhela xi seketela ntirho wa vukhongeri lowu endliwaka eBethele.

Uganda

Hi 2007 Valawuri va Xibalo va le Uganda (URA) va endle xiboho lexi vulaka leswaku swirho swa Malandza yo Hlawuleka ya Nkarhi Hinkwawo ya Timbhoni ta Yehovha eMisaveni Hinkwayo lama tirhaka eBethele ya le Uganda i va tirhi hilaha swi hlamuseriweke hakona eka Milawu ya Xibalo ya le Uganda. Vayimeri va Swichudeni swa Bibele swa Nhlengeletano ya Misava Hinkwayo (IBSA) va yise URA eHubyeni Leyi Tlakukeke ya le Uganda leyi nga le Kampala. Hi June 2009 Huvo leyi Tlakukeke yi endle xiboho lexi pfumelelanaka ni IBSA, yi vula leswaku vatirhi va le Bethele ya le Uganda a hi vatirhi. Huvo yoleyo yi tlhele yi xiya yinhla ya leswaku vatirhi va le Bethele “va pfuniwa hi ndlela leyi fanaka ku nga khathariseki leswaku va endla ntirho wa njhani.” Huvo yoleyo yi gimete hi ku vula leswaku vatirhi va le Bethele i swirho swa vukhongeri naswona swi kuma swakudya, ndhawu yo tshama swin’we ni swimalana leswaku swi khathalela swilaveko swa swona vini loko swi ri karhi swi endla mintirho ya swona leyi fambisanaka ni vukhongeri eUganda.

Armenia

Valawuri va hambeta va khoma ni ku pfalele vamakwerhu lava nga ni malembe lama ha wona va faneleke va nghenela vusocha hileswi mapfalo ya vona ma nga va pfumeleliki leswaku va nghenela ntirho wa vusocha. Ku sukela hi August 2009, vamakwerhu va 74 va pfaleriwe ekhotsweni. Tanihi leswi tihuvo hinkwato ta le tikweni leri ti endleke swiboho leswi nga tsakisiki, vamakwerhu va rhumele swikombelo swa mune swo hambana eka Huvo ya le Yuropa ya Timfanelo ta Vanhu, va kombela ku pfuniwa. Nakambe hulumendhe ya tiko leri ya ha hambeta yi lava mali yo tala swinene ya xibalo xa minkandziyiso ya vukhongeri leyi vamakwerhu va yi kumaka ematikweni man’wana. Ku nga khathariseki leswaku ndzhwalo lowu wo tika wa timali wu ta susiwa kumbe wu nge susiwi, ha tiyiseka leswaku vamakwerhu va ta hambeta va wundliwa hi tlhelo ra moya.—Esa. 65:13.

Azerbaijan

Vamakwerhu etikweni leri va ha lwisana ni ku lahlekeriwa ka ntshunxeko wa vona wa vukhongeri. Swa va tikela swinene ku kuma minkandziyiso ni ku hlangana leswaku va gandzela. Hambileswi eBaku, ku nga ntsindza wa tiko va tiviwaka ximfumo, ku nga tiviwi ka vona ximfumo emadorobeni man’wana swi endle leswaku maphorisa ma tshamela ku secha minhlangano ya vona swi nga fanelanga leyi va yi khomelaka emakaya ya vamakwerhu, va tlhela va pfaleriwa nkarhi wo leha swinene eswitichini swa maphorisa. Leswi swa endleka hambileswi nawu wu nga vuliki leswaku vanhu lava gandzelaka va fanele va tsarisiwa leswaku va ta hlangana emitini ya vona. Hi April 9, 2009, vamakwerhu va rhumele xikombelo xo tsarisiwa ximfumo etikweni hinkwaro ra Azerbaijan. Hi ni ntshembo wa leswaku ku tsarisiwa loku ku ta hunguta maxangu lawa, lawa vamakwerhu va langutanaka na wona.

Egipta

Eka malembe manharhu lama hundzeke, vamakwerhu lava humaka aEgipta swin’we ni lava humaka eBelgium, eItaly ni le United States va hlangane ni valawuri va le Egipta leswaku va vulavula hi ku tsarisa ntirho wa hina ximfumo. Hikwalaho ka sweswo, valawuri volavo va pfumelele vamakwerhu va le Egipta leswaku va nga gandzela hi ku rhula emakaya ya vamakwerhu hi mintlawa ya 30. Hambiswiritano, swiyenge swin’wana swa hulumendhe yoleyo swi hambeta swi va khoma hi ndlela yo biha vamakwerhu. Ndzawulo ya Vuhlayiseki bya Tiko ya ha hambeta yi veka vamakwerhu tihlo naswona minkarhi yin’wana yi konanisa swirho swa vandlha yi tlhela yi swi xungeta. Ku engetela eka ku hlangana hi ku kongoma ni valawuri, vamakwerhu va karhi va endla matshalatshala ya leswaku hi tsarisiwa ximfumo etihubyeni hinkwato.

Eritrea

Tanihi leswi timfanelo ta vanhu ta xisekelo ti nga xiximiwiki etikweni leri, valawuri va pfalele swirho swa 23 swa vandlha rin’we ekhotsweni hi June 28, 2009 naswona a swi katsa vamakwerhu va xisati lava dyuhaleke ni vana vanharhu lava nga ni malembe yo sukela eka mambirhi ku ya eka ya mune. Hambileswi vamakwerhu volavo va xisati lava dyuhaleke va ntshunxiweke, vana volavo va ha ri ekhotsweni ni vamana wa vona; vatata wa vona va pfaleriwe khale ekhotsweni. Xisweswo, mindyangu hinkwayo yi le khotsweni. Leswi swi endla leswaku nhlayo ya vamakwerhu va xinuna ni va xisati lava nga ekhotsweni yi va 64, ku katsa ni vamakwerhu va xinuna vanharhu lava pfaleriweke ekhotsweni ku sukela hi 1994 hileswi va aleke ku nghenela vusocha hambileswi va nga byeriwangiki leswaku hi yihi milawu leyi va yi tluleke.

Indiya

Eka malembe lama ha ku hundzuka, Timbhoni ta Yehovha eIndiya ti hlaseriwe hi mintshungu loko ti ri karhi ti chumayela. Nakambe ti tiyisele ku rhukaniwa ni ku khomiwa hi ndlela yo biha, ku xungetiwa hi ku pfaleriwa ekhotsweni ni ku hiseriwa minkandziyiso ya tona. Minkarhi yo tala, endzhaku ka loko vamakwerhu va xinuna va biwile, va khomiwa ni ku pfaleriwa naswona va tengisiwa ku fana ni swigevenga. Mintshungu leyi hlundzukeke yi kucetela valawuri leswaku va lwisana ni vamakwerhu hi ku va hehla hi mavunwa yi vula leswaku va tshova milawu ya ndhawu yoleyo.

Hi xikombiso, hi December 2008, Timbhoni ta Yehovha tinharhu (manana, n’wana wa yena wa nhwanyana swin’we ni ntukulu wa yena wa nhwanyana la nga ni malembe ya khume) ta le Kundapura, eKarnataka, ti tlhelele eka wansati un’wana loyi a kombiseke leswaku wa swi tsakela ku dyondza Bibele loyi a tshamaka eXimutanini xa le Koni. Hi ku famba ka nkarhi, vavanuna va ntlhanu kumbe va tsevu va sindzise Timbhoni letinharhu leswaku ti famba na vona exitichini xa maphorisa. Ntshungu wu hlengeletanile naswona maphorisa ma hehle vamakwerhu volavo va xisati hileswaku va nghene endhawini leyi a va nga fanelanga va nghena eka yona, hileswaku va vanga vulala exikarhi ka mintlawa yimbirhi nileswaku va byi tekela ehansi vukhongeri byin’wana. Eku heteleleni Timbhoni teto ti pfumeleriwe ku tlhelela ekaya. Vamakwerhu va xinuna ni va xisati lava langutaneke ni swiyimo leswi va karhi va pfuniwa etimhakeni ta nawu.

Moldova

Vamakwerhu eTransnistria, ku nga xifundzha lexi matiko yo tala ma ha xi tekaka xi lawuriwa hi tiko ra Moldova, va hambeta va hisekela Mfumo hambileswi ntirho wa vona a wu xungetiwa hi ku yirisiwa kumbe ku pfariwa ku ringana malembe ya kwalomu ka 12. Hambileswi vamakwerhu va langutanaka ni swiphiqo swo tala, va ha swi vona leswaku Yehovha wa va katekisa ni ku va pfuna leswaku va hlula loko va ri karhi va lwela swilaveko swa Mfumo etihubyeni. Hi leswi swikombiso swinharhu: Mufundhisi wa kereke ya Orthodox loyi a rhuketeleke a tlhela a ba vamakwerhu vambirhi va xisati lava a va ri karhi va chumayela eximutanini xa Ordăşei, u voniwe nandzu a tlhela a rihisiwa, huvo ya le dorobeni ra Tiraspol yi endle xiboho lexinene lexi fambisanaka ni matshalatshala ya vamakwerhu yo tsarisa ntirho wa hina ximfumo endhawini yoleyo, nakambe ku humesiwe xiboho lexi kombisaka leswaku Vakamberi va Xibalo xa Doroba ra Rîbniţa va voniwe nandzu hileswi va tekeke xibalo swi nga ri enawini eka swakudya leswi a swi nyikiwa vatirhi va ku tirhandzela loko va ri karhi va aka Holo ya Mfumo.

Kazakhstan

Hofisi ya Muchuchisi wa Riphabliki ra Kazakhstan yi endle swivilelo leswi endleke leswaku vamakwerhu va hlula ehubyeni. Eku sunguleni, tihuvo ta le Kyzylorda, Shymkent ni le Saryagash a ti humese xileriso lexi a xi sindzisa leswaku ntirho wa hina wa vukhongeri wu yimisiwa ku ringana tin’hweti ta tsevu. Hambiswiritano, hikwalaho ka swiboho leswi endliweke hi November 2008, ntshunxeko wa hina wa vukhongeri wu tlheriseriwile eXifundzheni xa Kyzylorda ni le Shymkent swin’we ni le xifundzheni hinkwaxo xa le dzongeni wa Kazakhstan. Ku tlula kwalaho, hi December 2008, endzhaku ka loko ku hundze malembe ya nkombo hulumendhe ya kwalaho yi ale ku tsarisa Timbhoni ta Yehovha ximfumo, huvo ya le dorobeni ra le Atyraū yi vule leswaku ti ni mfanelo yo tsarisiwa ximfumo.

Rhaxiya

Eka lembe ra ntirho leri hundzeke, Timbhoni ta Yehovha ta le tikweni leri a ti tshamela ku kambisisiwa hi muchuchisi swin’we ni hi valawuri van’wana vo hlayanyana va Hulumendhe naswona xikongomelo xa vona a ku ri ku herisa ntirho wa hina wa vukhongeri swi nga ri enawini. Vamakwerhu va xinuna ni va xisati va xanisiwa naswona minkarhi yo tala va konanisiwa ku nga ri na swivangelo. Eka xiendlakalo xin’wana, makwerhu wa xisati loyi a a tikile, u onhakeriwe hi khwiri endzhaku ka loko maphorisa ma seche minhlangano ya vona ya vukhongeri swi nga ri enawini. Mufana un’wana la nga ni malembe ya 15, loyi a a ri kona eminhlanganweni yoleyo, u pfaleriwe swi nga ri enawini. Valawuri lava va tirhisa Nawu wa ku Lwisana ni Mintirho ya Lava Hisekelaka eTlhelo tanihi xisekelo xa vona xo herisa mavandlha ya hina ma nga ri mangani ni ku yirisa minkandziyiso ya hina ya vukhongeri. Swihehlo leswi, leswi nga riki enawini swa ku hisekela etlhelo, swi endle leswaku valawuri va wu tirhisa hi ndlela yo biha ntshunxeko wa vukhongeri, ku katsa ni ku khomiwa swi nga ri enawini, ku hlongoriwa ka vamakwerhu swin’we ni ku alela ku nghena ka vayimeri va mune va Timbhoni ta Yehovha lava humaka ematikweni mambe lava a va fanele va lwisana ni swihehlo leswi swa mavunwa. Un’wana wa vamakwerhu lava u pfaleriwe ekhotsweni ra le Moscow ku ringana tiawara ta 23.

Swirho swa Ndzawulo ya ta Vuhlayiseki swi nghenelela minkarhi yo tala eka mintwanano leyi vamakwerhu va yi endlaka loko va hirha tindhawu leswaku va ta khomela minhlangano ni mintsombano naswona swi lava leswaku mintwanano yoleyo yi herisiwa. Nakambe valawuri va kavanyete ku akiwa ka Tiholo letintshwa ta Mfumo. Kasi vugevenga byin’wana lebyi Timbhoni ti langutanaka na byona byi katsa ku xanisiwa loko ti khomiwe hi maphorisa ti ri karhi ti hehliwa hi vugevenga lebyi ti nga byi endlangiki.

Korea Dzonga

Hi June 16, 2008, hulumendhe ya le Korea Dzonga yi tlhentlhile eka xitiviso lexi yi xi endleke hi May 7, 2008, xa leswaku yi ta nyika vanhu lava mapfalo ya vona ma nga va pfumeleliki ku ya tirha evusocheni mintirho yin’wana leyi va nga yi endlaka etikweni. Hulumendhe leyi yi vule leswaku “mhaka yo ala ku ya tirha evusocheni hileswi munhu ripfalo ri nga n’wi pfumeleliki yi lava ku kambisisiwa swinene nileswaku ku fikeleriwa ntwanano lowu nga ta tirhisiwa etikweni hinkwaro.” Ku fikela namuntlha, Nhlengeletano ya Tiko ya le Korea a yi si anakanyisisa hi ku endla mintirho yin’wana leyi nga fambisaniki ni vusocha. Vamakwerhu va ha rindzele swiboho leswi humaka eka Komiti ya Timfanelo ta Vanhu ya Nhlangano wa Matiko, leyi endleke swiboho swimbirhi leswi tsakisaka eka leswi a swi rhumeriwile. Hi January 2009, Huvo ya Tiko ra le Korea leyi Kambisisaka Timhaka ta ku Dlaya eVusocheni yi pfumerile leswaku hulumendhe ya le Korea ya katseka eka ku dlayiwa hi tihanyi ka Timbhoni ta Yehovha ta ntlhanu leti sindzisiweke leswaku ti ya tirha evusocheni ku sukela hi va-1970 ku ya exikarhi ka va-1980. Lexi a ku ri xiboho xo sungula xa nkoka lexi eka xona Hulumendhe yi pfumeleke leswaku i nandzu wa yona leswi ku dlayiweke vanhu hi tihanyi evusocheni.

Tajikistan

Nhlangano wa Vukhongeri wa Timbhoni ta Yehovha eTajikistan wu yirisiwile hi 2007 naswona minkandziyiso ya hina leyi humaka eJarimani yi tekiwe hi vatirhela-mfumo lava tirhaka eka ndzawulo yo amukela ni ku rhumela swilo. Ku yisiwe xivilelo ehubyeni ya vusocha naswona hi September 2008, xivilelo xolexo a xi amukeriwanga. Ku tlhele ku rhumeriwa xivilelo xin’wana eHubyeni leyi Tlakukeke ya Vusocha ya Collegium, leyi na yona yi nga xi amukelangiki xivilelo xexo. Swiboho leswi swi seketela ku yirisiwa ni ku tekiwa ka minkandziyiso ya hina. Ku karhi ku endliwa matshalatshala ya leswaku vamakwerhu va pfuniwa.

Turkey

Vamakwerhu va le tikweni leri va langutane ni swiphiqo leswi fambisanaka ni ntirho wa vusocha. Makwerhu un’wana wa xinuna se u ni malembe mambirhi a ri ekhotsweni hikwalaho ka xiboho lexi a nga tiyimiselangiki ku xi cinca. Vamakwerhu vo tala lava malembe ya vona ma va pfumelelaka leswaku va ya evusocheni, va xungetiwa hi ku rihisiwa ni ku pfaleriwa ekhotsweni swin’we ni hi ku lahlekeriwa hi mintirho ya vona. Hi March 2009, vamakwerhu va tivisiwe leswaku Komiti ya Timfanelo ta Vanhu ya Nhlangano wa Matiko yi sungule ku kambisisa swivilelo swimbirhi leswi rhumeriweke leswi khumbaka Timbhoni.

Ku engetela kwalaho, hi May 2009, Huvo ya le Yuropa ya Timfanelo ta Vanhu yi hlanganise swivilelo swinharhu leswi a swa ha kambisisiwa leswaku yi ta sungula ku kambisisa loko timfanelo leti vamakwerhu va tsevu va nga na tona ti khomiwe hi ndlela ya kahle—kasi vamakwerhu va mune eka lava tsevu va tshame va pfaleriwa ekhotsweni. Malandza ya Yehovha ma tsaka leswi tihuvo letimbirhi ti tiyimiseleke ku ma pfuna naswona ma tshemba leswaku swi nga ha endleka ma ntshunxeka.

Uzbekistan

Ku tiviwa ximfumo ka vagandzeri va Yehovha eUzbekistan ku ya ku nga ha tekeriwi enhlokweni, hikuva vamakwerhu va tshamela ku xanisiwa hi mintlawa leyi seketeriwaka hi Hulumendhe. Tatana un’wana la tekeke, loyi a nga ni vana vambirhi va majaha, u ntshunxiwile ekhotsweni hi May 14, 2009, endzhaku ka loko a tshame malembe mambirhi ekhotsweni hileswi a a dyondzisa hi ta vukhongeri. Hi xa mundzuku wa kona, u rhurhiseriwe eTajikistan, ku nga tiko leri a velekeriweke eka rona. Vamakwerhu van’wana va xinuna vanharhu va ha pfaleriwe ekhotsweni hileswi ku vuriwaka leswaku va hlele “mintirho leyi nga riki enawini ya vukhongeri.” Vayimeri va vamakwerhu lava, va karhi va lunghiselela ku rhumela swivilelo swin’wana eHubyeni leyi Tlakukeke ya Vuavanyisi ya le Uzbekistan. Vamakwerhu va le tikweni leri swin’we ni vamakwerhu lava humaka ematikweni mambe va ve ni minhlangano yo hlayanyana ni Komiti ya Vukhongeri ya le Tikweni ra Uzbekistan swin’we ni vayimeri va yona leswaku va ta lulamisa timhaka leti.

HUVO YA LE YUROPA YA TIMFANELO TA VANHU

Timbhoni ta Yehovha ta le Armenia, Austria, Azerbaijan, Cyprus, Furwa, Georgia, Rhaxiya, Serbia ni le Turkey ti rhumele swivilelo swa 22 leswi swa ha faneleke swi kambisisiwa hi Huvo ya le Yuropa ya Timfanelo ta Vanhu (ECHR) le Strasbourg, eFurwa. Swivilelo leswi swi khumba timfanelo ta vaaki hinkwavo lava tshamaka ematikweni lawa milandzu ya wona yi faneleke yi tengiwa hi Nhlengeletano ya Timfanelo ta Vanhu ya le Yuropa. Swivilelo swa kaye swi katsa mfanelo yo ala ku ya tirha evusocheni, swa nkombo swi katsa ku xanisiwa ni xihlawuhlawu hikwalaho ka vukhongeri, swa mune swi katsa ku nga ha tsarisiwi ximfumo kumbe ku yirisiwa ka vandla ra swa nawu leri tirhisiwaka hi Timbhoni ta Yehovha leswaku ti hlela ntirho wa tona naswona swimbirhi swi katsa tihulumendhe leti nghenelelaka loko vamakwerhu va hlangana swin’we leswaku va gandzela hi ku rhula.

Hi June 17, 2008, ECHR yi kambisise xivilelo lexi tisiweke hi Association Les Témoins de Jéhovah (ATJ) lexi lwisanaka ni hulumendhe ya le Furwa. Xivilelo xexo i xa xibalo xa xihlawuhlawu xa tiphesente ta 60 lexi laviwaka eka minyikelo hinkwayo ya vukhongeri leyi ATJ yi yi kumeke ku sukela hi 1993 ku ya hi 1996. Huvo yi tlakuse swivutiso swin’wana malunghana ni loko ku tluriwe milawu leyi khumbaka ntshunxeko wa vukhongeri leyi xaxametiweke eka Ndzima 9 ya milawu ya Nhlengeletano ya le Yuropa. Timbhoni ta Yehovha eFurwa swin’we ni ta le matikweni man’wana lama welaka eka Nhlengeletano ya le Yuropa, ta ha yimele ku vona loko Huvo yi ta wu amukela nandzu lowu.

Loko Sathana a ri karhi a ringeta ku kavanyeta vugandzeri bya ntiyiso hi ku “kunguhata khombo hi xileriso xa nawu,” malandza ya Yehovha ma tshama ma “[tiyile] eripfumelweni, hi ku tiva leswaku ku xaniseka loku fanaka ku karhi ka endleka enhlengeletanweni hinkwayo ya vamakwenu emisaveni.” Onge malandza hinkwawo ya ntiyiso ma nga yima ma tiya loko ma lwisana na Sathana naswona onge ma nga lahlela ku karhateka ka wona hinkwako eka Xikwembu xa musa hinkwawo lowu nga faneriwiki ma ri karhi ma swi tiva leswaku xa khathala hi wona nileswaku xi ta ma tiyisa.—Ps. 94:20; 1 Pet. 5:7-11.

“FANELEKA KAHLE KU SWI DYONDZISA VAN’WANA”

Ku leteriwa i xiyenge xin’wana xa vandlha ra Vukreste ku sukela loko ra ha ku simekiwa. Muapostola Pawulo u byele Timotiya a ku: “Swilo leswi swi nyike vanhu vo tshembeka, lava, na vona, va nga ta faneleka kahle ku swi dyondzisa van’wana.” (2 Tim. 2:2) Namuntlha, nhlengeletano ya Yehovha yi ni minongonoko yo hambana-hambana yo dyondzisa. Hi xikombiso, ku sukela hi 2008, vakulu va 6 528 lava humaka ensin’wini leyi khathaleriwaka hi rhavi ra le United States—ku katsa ni le Alaska, Bermuda swin’we ni swihlala swa Turks ni swa Caicos—va ye eka titlilasi ta 70 ta Xikolo xa Vakulu va Mavandlha lexi a xi ri eWatchtower Educational Center ePatterson le New York.

Dyondzo yoleyo leyi dzikeke leyi tekaka vhiki hinkwaro yi hlanganisa swiyenge swo hambana-hambana swa vutomi bya vakulu, yi va pfuna leswaku va rhangela entirhweni wo chumayela nileswaku va va vadyondzisi lava nga ni vuswikoti evandlheni. (2 Tim. 4:5; 1 Pet. 5:2, 3) Nakambe dyondzo yoleyo yi va khutaza leswaku va tshama va tiyile hi tlhelo ra moya nileswaku va tiyisa mindyangu ya vona hi tlhelo ra moya, yi tlhela yi va pfuna leswaku ‘va ri tamela khwatsi rito ra ntiyiso’ loko va pfuna van’wana. (2 Tim. 2:15) Marito lama landzelaka ya ku nkhensa ma vuriwe hi vakulu lava yeke exikolweni lexi.

“Ku titsongahata ka vadyondzisi a ku ri xikombiso xa ndlela leyi hi faneleke hi va khoma ha yona vamakwerhu evandlheni. Mbilu ya mina yi khapa-khapa ntsako hikwalaho ka leswi endliweke hi Huvo leyi Fumaka. Hi mpfhuka ndzi dyondza ntiyiso, leri i lunghelo lerikulu swinene ra dyondzo leyi tlakukeke leyi ndzi tshameke ndzi yi kuma.”

“Yehovha Xikwembu xa hina wa swi tiva leswi hi swi lavaka ni nkarhi lowu a faneleke a hi nyika swona ha wona. Ripfumelo ra mina ri tlhele ri tiyisiwa naswona ndzi pfuxetiwile hi tlhelo ra moya. Ntokoto lowu ndzi wu kumeke wu ndzi pfunile leswaku ndzi swi twisisa hi ku helela leswi Yehovha a swi endlaka hi ku tirhisa nhlengeletano ya yena leyi vonakaka ni ku tlhela ndzi vona ndlela leyi a va khathalelaka ha yona vanhu va yena hinkwavo.”

“Lowu i ntokoto wa nkoka swinene. Loko ndzi ri karhi ndzi dyondza exikolweni lexi, a ndzi ya ndzi swi xiya leswaku a ndzi na vutivi bya swilo swo tala. Nakambe ndza wu vona nkoka wa ku va ni dyondzo ya munhu hi yexe nileswaku ha yini ndzi fanele ndzi tirhisa swilo hinkwaswo leswi ndzi swi dyondzaka.”

“Dyondzo leyi ndzi yi kumeke yi endle leswaku ndzi swi fanelekela ku antswa ku khathalela ndyangu wa mina ni vandlha ndzi ri ni mianakanyo ya Kreste. (1 Kor. 2:16) Yi ndzi pfunile leswaku ndzi vona leswaku ndzi ni vumunhu bya njhani.”

“A ndzi nge pfumeli ku cincisa dyondzo ya vhiki leyi ndzi yi kumeke eka Yehovha swin’we ni dyondzo ya le yunivhesiti.”

“Hakunene ntokoto lowu a wu aka naswona a wu vuyerisa! Wu ndzi nyike matimba ya leswaku ndzi hambeta ndzi tirhela Yehovha, ndzi titsona swo karhi nileswaku ndzi phyuphyisa vamakwerhu va xinuna ni va xisati. (Esa. 32:2) Ndzi ba mandla ndzi vuyelela eka Yehovha!”

“Dyondzo leyi yi hi pfune leswaku hi vona rirhandzu ra Yehovha. Swi fana ni loko Yehovha a endla riendzo ra vurisi eka hina.”

“Ndzi nkhensa Yehovha hikwalaho ka lunghelo leri ro ndzi dyondzisa ndlela leyi ntirho wa mina ndzi nga wu endlaka ha yona leswaku ndzi ta n’wi vangamisa ni ku n’wi dzunisa.”

Hi ku famba ka nkarhi Huvo leyi Fumaka yi ta tivisa malunghiselelo ya leswaku vakulu va le tindhawini tin’wana va kuma dyondzo leyi, leyi vuyerisaka leyi fikaka hi nkarhi.

KU NYIKETERIWA KA MARHAVI SWI TISA NTSAKO

Hi January 24, 2009, Samuel Herd wa Huvo leyi Fumaka a a ri xivulavuri lexi endzeke loko ku nyiketeriwa rhavi lerintshwa eTanzania, le Vuxeni bya Afrika. Emalembeni ya 25 lama hundzeke, rhavi leri ri sungule ri ri yindlu leyi endliweke hi malahla leyi nga ni makamara manharhu naswona Timbhoni hinkwato ta le Tanzania a ti yi vula House Number 46, Magomeni Quarters. Vaendzi vo tala lava tsakeke eka lava 779 lava humaka ematikweni ya 22 a va xiririka mihloti loko va anakanya ndlela leyi ntirho endhawini yoleyo wu hambeteke wu ya emahlweni ha yona hi mpfhuka ku yirisiwa ka wona ku hele hi 1987. Munhu un’wana la dyuhaleke u te: “I Yehovha ntsena la nga endlaka nchumu wo fana ni lowu leswaku wu endleka etikweni leri.” Sweswi ntirho wo chumayela wu famba kahle naswona vahuweleri lava tlulaka 14 000, va tsaka va tlhela va nkhensa Yehovha naswona va yimbelelela vito ra yena.—Ps. 92:1, 4.

Hi Mugqivela May 2, 2009, erhavini ra le Netherlands, vamakwerhu va xinuna ni va xisati va kwalomu ka 600 lava humaka ematikweni ya 31 va ve kona loko Theodore Jaracz wa Huvo leyi Fumaka a nyikela nkulumo yo nyiketela rhavi. Ku engeteleriwe makamara yo tshama eka wona eka muako lowu akiweke hi 1983 naswona tindhawu leti khale a ti tirhiseriwa ku gandlisa timagazini ti cinciwile ivi ti endliwa tihofisi swin’we ni ndhawu yo endlela eka yona tivhidiyo, ya Regional Audio Video Center (RAVC). Vamakwerhu lava tirhaka eka RAVC va pfuneta hi ku endla ti-CD ni ti-DVD hi tindzimi ta 24, leti to tala ta tona ti vulavuriwaka eYuropa. Ku engetela kwalaho, RAVC yi pfuna hi ku endla tivhidiyo hi tindzimi ta mavoko ta kwalomu ka 20. Ntirho wolowo wu katsa ku hlanganisa ku endliwa ka ti-CD eYuropa, Afrika ni le Oceania swin’we ni ku endliwa ka ti-DVD ta misava hinkwayo. Nakambe rhavi ra le Netherlands ri xava ri tlhela ri rhumela swilo leswi laviwaka hi marhavi man’wana ya le tindhawini tin’wana ta misava naswona miako leyi lunghisiweke yi yi fanelekela kahle mintirho leyi.

“TIHLAYISENI ERIRHANDZWINI RA XIKWEMBU”

I ntiyiso leswaku hi ni swivangelo swo tala swo tsaka. Hakunene hi katekile leswi hi hanyaka eminkarhini leyi yo tsakisa! I ntiyiso leswaku hilaha ku profetiweke hakona, ‘masiku yo hetelela’ i “minkarhi ya mangava leyi swi nonon’hwaka ku langutana na yona.” (2 Tim. 3:1) Kambe tanihi leswi nkutsulo se wu nga kwala nyongeni, i swa nkoka leswaku un’wana ni un’wana wa hina a tiyimisela ku yingisa xikhutazo xa Yudha lexi nga ni matimba lexi nge: “N’wina, varhandziwa, hi ku tiaka eripfumelweni ra n’wina ro kwetsima swinene, mi khongela hi moya wo kwetsima, tihlayiseni erirhandzwini ra Xikwembu, mi ri karhi mi rindzela tintswalo ta Hosi ya hina Yesu Kreste mi ri ni xikongomelo xa vutomi lebyi nga heriki.”—Yudha 20, 21.

[Grafu leyi nga eka tluka 13]

(Leswaku u vona rungula leri hleriweke hi ku helela, vona nkandziyiso wa kona)

VANHU LAVA SIKU NI SIKU VA ENDZELAKA WEB SITE LEYI NGE, www.watchtower.org

70,000

50,000

30,000

10,000

1999 2001 2003 2005 2007 2009

[Mepe lowu nga eka tluka 21]

(Leswaku u vona rungula leri hleriweke hi ku helela, vona nkandziyiso wa kona)

Matiko Lama Hluleke Milandzu Ya Nkoka Sweswinyana

AUSTRIA

EGYPT

ERITREA

UGANDA

SOUTH AFRICA

ARMENIA

MOLDOVA

TURKEY

AZERBAIJAN

RUSSIA

KAZAKHSTAN

UZBEKISTAN

TAJIKISTAN

INDIA

SOUTH KOREA

[Xifaniso lexi nga eka tluka 11]

Hambi ku ri vahuweleri lava ha riki vantshwa va swi tsakela ku sungula tidyondzo ta Bibele

[Swifaniso leswi nga eka tluka 27]

Xikolo xa Vakulu va Mavandlha xi va pfuna leswaku va hetisisa ntirho wa vona lowu va nyikiweke wona hi Xikwembu

[Swifaniso leswi nga eka tluka 28]

Makwerhu Jaracz a ri karhi a nyikela nkulumo yo nyiketele rhavi ra le Netherlands

[Swifaniso leswi nga eka tluka 29]

Makwerhu Herd a ri karhi a nyikela nkulumo loko ku nyiketeriwa rhavi ra le Tanzania