Papila Leri Humaka Eka Huvo Leyi Fumaka

Eka Timbhoni-kulorhi Ta Yehovha:

Muapostola Pawulo a a tirhisa nkarhi wun’wana ni wun’wana ku byela vapfumeri-kulobye leswaku wa va rhandza nileswaku u va teka va ri va nkoka. Loko a tsalela Vakreste va le Rhoma u te: “Ndzi nkhensa Xikwembu xa mina ha Yesu Kreste hikwalaho ka n’wina hinkwenu, hikuva ku vulavuriwa hi ripfumelo ra n’wina emisaveni hinkwayo.” (Rhom. 1:8) Ina, eMfun’weni hinkwawo wa Rhoma, Vakreste volavo va lembe-xidzana ro sungula a va tiveka hi ripfumelo ra vona leri tiyeke ni ndlela leyi a va wu hisekela ha yona ntirho wo chumayela. (1 Tes. 1:8) Hi yona mhaka leyi Pawulo a a va rhandza!

Ku fana na Pawulo, minkarhi hinkwayo loko hi anakanya ha n’wina, hi nkhensa Yehovha. Hi rhandza un’wana ni un’wana wa n’wina hi mbilu hinkwayo! Naswona swi tiveni leswaku Yehovha wa mi rhandza hinkwenu. Van’wana va n’wina mi kanetiwa ngopfu kambe mi ya emahlweni mi chumayela. Yehovha wa tsaka swinene hi xivindzi xa n’wina!—Swiv. 27:11.

Loko mi ri karhi mi ri hlaya hi vukheta rungula leri tsakisaka ni leri tiyisaka ripfumelo, leri kumekaka eka “Mintirho Ya Timbhoni Ta Yehovha Ta Manguva Lawa,” leyi kumekaka eka Buku Ya Lembe ya nan’waka, mi ta vona vumbhoni byo tala bya leswaku Hosi Yesu Kreste u hambeta a “hlula ni ku hetisa ku hlula ka yena,” nileswaku tlhari rin’wana ni rin’wana leri endleriweke ku hlasela valandzeri va Kreste, a ri nge humeleli.—Nhlav. 6:2; Esa. 54:17.

Loko Pawulo a tsalela Vakreste va le Filipiya, u te: “Ndzi nkhensa Xikwembu xa mina . . . hikwalaho ka munyikelo lowu mi wu endleke eka mahungu lamanene.” (Filp. 1:3-5) Na hina tanihi swirho swa Huvo leyi Fumaka hi titwa hi ndlela leyi fanaka. Eka lembe ra ntirho ra 2007, vahuweleri va 6 691 790 va hete tiawara ta 1 431 761 554 va chumayela mahungu lamanene ematikweni ya 236 emisaveni hinkwayo. Matshalatshala ya n’wina ma endla leswaku mahungu lamanene ma hambeta ma chumayeriwa! Ntirho lowu mi wu endlaka wu ponisa magidi ya vanhu kutani sweswo swi tisa ku dzuneka eka Yehovha!

Nkarhi wun’wana Pawulo u twele vamakwavo vusiwana. Loko a tsalela lava tshamaka eTesalonika, u te: “Minkarhi hinkwayo hi tsundzuka . . . ku tiyisela ka n’wina hikwalaho ka ntshembo lowu mi nga na wona eHosini ya hina Yesu Kreste emahlweni ka Xikwembu tlhelo Tata wa hina.” (1 Tes. 1:2, 3) I ntiyiso leswaku hi langutana ni swiphiqo swo tala evuton’wini. Kambe i swa nkoka leswaku hi tiyisela. Hi swihi swiphiqo leswi u langutanaka na swona? Xana u hele matimba hileswi vuvabyi byi ku sivelaka ku endla swo tala entirhweni wa Yehovha? Xana nala wa hina lonkulu, ku nga Sheol u ku tekele murhandziwa wa wena loyi mi heteke malembe mi hanya swin’we? (Swiv. 30:15, 16) Xana wa ha ri eku laveni ka munghana wa vukati la rhandzaka Yehovha naswona u tiyimisele ku yingisa ndzayo ya Matsalwa ya leswaku u teka kumbe u tekiwa ntsena eHosini, kambe nisweswi a wu si n’wi kuma? (1 Kor. 7:39) Xana u ringeta hi matimba ku wundla vana va wena hambiloko u langutane ni swiphiqo swa timali? Ku nga khathariseki leswaku u langutane ni xiyimo xihi, loko u rhangisa Mfumo, tiyiseka leswaku Yehovha ‘a nge wu rivali ntirho wa wena ni rirhandzu leri u ri kombiseke hikwalaho ka vito ra yena.’ Ha mi kombela vamakwerhu leswaku mi nga tshuki mi ‘tshika ku endla leswinene’!—Hev. 6:10; Gal. 6:9.

I yini lexi nga ta mi pfuna leswaku mi tiyisela? Hilaha swi veke hakona eka Vatesalonika, mi ta pfuniwa hi “ntshembo lowu mi nga na wona eHosini ya hina Yesu Kreste.” Hi yona mhaka leyi hi ku famba ka nkarhi, Pawulo a faniseke “ntshembo wa ku ponisiwa” ni xihuku lexi tiyeke lexi kotaka ku sirhelela Mukreste leswaku a nga anakanyi swilo swo biha kumbe a tshamela ku kanakana.—1 Tes. 5:8.

Loko mi tiyisela mi tsakile, mi seketela Yehovha eka ntlhontlho lowu Sathana a wu pfuxeke wa vuhosi bya vuako hinkwabyo. Sathana u vula leswaku malandza ya Xikwembu ma velekiwe ma ri ni vutianakanyi kutani hambiloko ma lava ku xi tirhela, swi ta va swa xinkarhana kutani ma ta lan’wa loko ma ringiwa kumbe loko mafambiselo lawa ya swilo ma teka nkarhi wo leha. Mi ni lunghelo ro kombisa leswaku Diyavulosi i muhembi lonkulu! Loko masiku ma ri karhi ma hundza, mi ya mi tshinela eka siku leri mi nga ta vona ku hetiseka ka ntshembo wa n’wina.

Tanihi leswi Pawulo a tirhiseke nkarhi wun’wana ni wun’wana ku bumabumela vamakwavo hikwalaho ka ripfumelo ra vona leri tiyeke, ku hiseka ka vona entirhweni wo chumayela ni ku tiyisela ka vona, na hina hi tirhisa nkarhi lowu ku mi bumabumela ni ku mi byela leswaku ha mi rhandza. Hambetani ni ntirho wa n’wina lowunene!

Onge Xikwembu xi nga mi katekisa hilaha ku fuweke nan’waka. Hi mi navelela leswinene

Vamakwenu,

Huvo Leyi Fumaka Ya Timbhoni Ta Yehovha