Swiendlakalo-nkulu Swa N’wexemu

EMALEMBENI ya sweswinyana ku ve ni ku andza ka timhangu ta ntumbuluko, naswona eka lembe ra ntirho ra 2005 matiko yo tala ma khumbekile. Timhangu leti ti kayakayisa ni vamakwerhu. Kambe hilaha hi nga ta swi vona hakona, miringo yi endla leswaku rirhandzu ra Vukreste ri vonaka, naswona leswi swi tiyisa vamakwerhu ni ku endla vanhu va timbilu letinene va amukela ntiyiso.—Mal. 3:18; Yoh. 13:35.

Ku andza ka makhombo ku endle ni leswaku vanhu vo tala va anakanya swinene hi vumundzuku bya vona ni hi swilo leswi hakunene swi nga swa nkoka evuton’wini. Hikwalaho, hi ve ni lunghelo lerikulu ro pfuna vanhu vo tano leswaku va vona leswi minkarhi leyi hi nga eka yona yi vulaka swona, hi nkarhi wa tsima ro hlawuleka ro fambisa broxara leyi nge Tshamani Mi Rindzile! Ematikweni yo tala, tsima leri ri sungule hi October 18, 2004, naswona ri ve ni mihandzu leyinene.

Tsima Ro Fambisa Broxara Leyi Nge Tshamani Mi Rindzile!

Argentina: “Loko ko tshuka ku va ni mhangu, i mani la nga ponaka—xana i munhu wo biha, i munhu lonene kumbe hi loyi a yingisaka xilemukiso?” Hi yona ndlela leyi makwerhu un’wana wa xisati a yi fambiseke ha yona broxara leyi nge Tshamani Mi Rindzile! ensin’wini leyi nga ni vanhu lava nga laviki ku twa nchumu hi rungula ra Mfumo.

Makwerhu loyi a vitaniwaka Juan, u fambise broxara leyi eka muntshwa wa malembe ya 16 hi vukhale, loyi a yi hlayeke naswona hi ntsako a byela tata wakwe leswi a swi dyondzeke eka yona. Hi ku lava ku twa leswi engetelekeke, tata wakwe u yi hlayile a tlhela a hlaya ni matsalwa lama kombisiweke. U tsakisiwe hi rungula leri lerova a sungula ku hlaya broxara leyi ni ndyangu wakwe. Loko Juan a tlhelela, u kombele ku dyondza na yena Bibele mahala. Tatana loyi u hlamule a ku: “Hi swona leswi hi swi lavaka—hi lava ku dyondzeriwa Bibele tanihi ndyangu.” Ku va loko dyondzo yi sungurile.

Furwa: Jocelyne u nyike Alicia broxara leyi nge Tshamani Mi Rindzile! naswona nhwanyana loyi u tshame a fambiseriwa dyondzo ya Bibele. U yi tsakerile a tlhela a pfumela leswaku Jocelyne a dyondza na yena. Alicia u tlhele a tiyimisela ku hlaya Bibele nkarhi na nkarhi. Jocelyne u ri: “Endzhaku ka mavhiki mambirhi u ndzi byele leswaku rungula ra Bibele ra vutomi bya Yesu ri n’wi khumbe swinene lerova a xiririka ni mihloti.”

Alicia u byele xigangu xakwe leswaku u navela leswaku va tekana ximfumo leswaku a ta tsakisa Xikwembu ni leswaku u lava ku va Mbhoni ya Yehovha. Lexi n’wi hlamariseke, xigangu xakwe xi te: “Swi lulamile. A ndzi lavi ku ku sivela leswaku u endla ku rhandza ka Xikwembu.” Ku sukela kwalaho, Alicia u ye eka nhlengeletano ya xifundzha ro sungula.

Madagascar: Nana i manana wa swinhwanyetana swimbirhi. Loko a ha ri emalembeni ya kondlo-a-ndzi-dyi, a a ya eminhlanganweni ya Vukreste ni vatswari vakwe kambe a tshiketa loko va tshika ku gandzela Yehovha. Hi nkarhi wa tsima ro hlawuleka, Nana u teke broxara eka makwerhu wa xisati la nga murhumiwa, a tlhela a pfumela ku dyondzeriwa Bibele. Sweswi u va kona eka minhlangano hinkwayo ni swinhwanyetana swa yena ha swimbirhi naswona u tivekele pakani ya ku va muhuweleri la nga khuvuriwangiki. Ku engetela kwalaho, vatswari vakwe na vona va pfumerile ku dyondzeriwa hi broxara leyi. Josia, n’wana wa vona wa jaha la nga ni malembe ya 14 hi vukhale, sweswi se u dyondzela munghana wakwe wa malembe ya kondlo-a-ndzi-dyi, loyi na yena a vaka kona minkarhi hinkwayo eminhlanganweni ya Vukreste.

Nigeria: Makwerhu la nga phayona u ri: “Ku lova ka mana wa mina hi nkarhi wa tsima leri, ku ndzi pfulele ndlela yo chumayela emugangeni wa ka hina. Loko manana a nga si lahliwa, maxaka a ma ri karhi ma rila ma titlatlalata ni le hansi. Ndzi ma vutisile ndzi ku: ‘Ha yini mi endlisa xileswi? Ku lova ka manana ka hi khumba hinkwerhu, kambe u lo etlela. U ta pfuka loko vafi va pfuxiwa.’ Hambileswi na mina a ndzi rila, ndzi pfule broxara leyi nge Tshamani Mi Rindzile! eka tluka 8 kutani ndzi hlamusela mhaka ya ku pfuxiwa ka vafi. Leswi swi endle leswaku ndzi fambisa 195 wa tibroxara, ku katsa ni tibroxara ta 45 leti nge Tshamani Mi Rindzile! Le xilahlweni, mina ni vamakwerhu van’wana hi fambise tikopi ta 100 ta Xihondzo xo Rindza xa May 1, 2005 lexi nga ni xihloko lexi nge ‘Xana Lava Feke Va Ta Tlhela Va Hanya?’”

Rhaxiya: Irina la nga phayona ro hlawuleka le Zelenogradsk, u ri: “Mina ni makwerhu un’wana wa xisati hi fambise broxara leyi nge Tshamani Mi Rindzile! eka wansati la vitaniwaka Alla, loyi a hi rhambeke leswaku hi nghena endlwini yakwe. Alla a a nga ha tiphini hi vutomi hileswi vanhu va vonakaka se va fe mapfalo. Hi kombele ku tlhela hi vuya. Endzhaku ka masiku ma nga ri mangani, mina ni makwerhu loyi wa xisati a hi ri karhi hi famba swin’we loko hi twa munhu wa xisati a hi vitana. A ku ri Alla. U nkhense broxara leyi hi n’wi siyeleke yona, a yi humesa enkwameni wakwe kutani a hi komba tinhla leti a ti khwatihateke. Sweswi u tiphina hi dyondzo ya nkarhi na nkarhi leyi sekeriweke eka broxara leyi nge Leswi Xi Swi Languteleke.”

Kun’wana etikweni ra Rhaxiya, Vera ni nuna wakwe Vitaliy, va yime exitolo xa le tlhelweni ka pato, laha Lyuda, munghana wa Vera, a a tirha kona. Lyuda u tshame a vula leswaku a nga lavi ku vulavula ni Timbhoni hi Bibele, leswi swi endle leswaku Vera a kanakana ku n’wi nyika broxara. Kambe endzhaku ko khutaziwa hi Vitaliy, u swi kotile ku fambisela munghana wakwe broxara. Endzhaku ka masiku mambirhi Lyuda u be riqingho. U te: “Loko ndzi kote ku dyondza swo tala eka broxara yin’we, swi le rivaleni leswaku ndzi ta dyondza swo tala loko ndzo va ni dyondzo ya Bibele ya nkarhi na nkarhi!” Hambileswi maxaka a ma n’wi kaneta, Lyuda u sungule ku dyondza hi ku hatlisa a tlhela a sungula ku va kona eminhlanganweni. N’wana wakwe wa jaha ni wa nhwanyana na vona va dyondzeriwa. Vera u ri: “Swa hlamarisa leswaku malembenyana ma nga ri mangani lama hundzeke, Lyuda u nyikiwe buku leyi nge Vutivi kambe a a nga yi lavi. Kambe, broxara leyi nge Tshamani Mi Rindzile! yi n’wi koke rinoko.”

Venezuela: Nsati wa mulanguteri wa xifundzha u vulavule ni wanuna swin’we ni nsati wakwe ni vana va vona va mune va lo yima kunene. Makwerhu wa xisati u va kombe xifaniso lexi vulavulaka hi Paradeyisi eka tluka 16 na 17 eka broxara leyi nge Tshamani Mi Rindzile! kutani a kandziyisa xilaveko xa leswaku ndyangu hinkwawo wu dyondza hi Xikwembu. Hiloko a va rhamba hi tsevu ka vona leswaku va ta eka nhlangano wa Ravumune nimadyambu, a hlela leswaku va ta hlangana exitichini xa bazi lexi nga ekusuhi ni laha va tshamaka kona. Makwerhu wa xisati ni nuna wa yena va ye exitichini xa bazi, kambe a ku tanga ni un’we endyangwini lowu. Kasi ndyangu lowu se a wu khandziye bazi rin’wana naswona se a wu ri eHolweni ya Mfumo! Swirho swa ntlhanu swa ndyangu lowu swi ye emahlweni ni dyondzo ya Bibele ya nkarhi na nkarhi naswona swi va kona eminhlanganweni, hambileswi ku nga mpfhuka wo leha naswona swi durhaka ku famba hi bazi.

Makwerhu un’wana wa xisati la nga phayona u gongondze endlwini kambe ku nga hlamuli munhu. Hiloko a tlhelela kutani a kuma wanuna la dyuhaleke, loyi a a ri karhi a humela ehandle. U vule leswaku a nga ha twi kahle kutani a nga swi koti ku twa vanhu loko va gongondza naswona minkarhi yin’wana loko a fika enyangweni, lava va gongondzaka va va se va fambile. Makwerhu wa xisati u n’wi nyike broxara leyi nge Tshamani Mi Rindzile! kutani a n’wi rhamba leswaku a ta enhlanganweni wa vandlha.

Hi nkarhi wa nhlangano, makwerhu wa xisati u vulavule hi ntokoto lowu, a nga swi xiyi leswaku mukhalabye loyi u kona exikarhi ka vayingiseri! Sweswi u hlayeriwa Bibele hi makwerhu wa xinuna naswona u va kona eminhlanganweni hinkwayo nakambe u vule leswaku wa swi navela ku chumayela mahungu lamanene. Loko a vutisiwe leswaku ha yini a sungule ku ta eminhlanganweni, u tlakuse broxara leyi nge Tshamani Mi Rindzile! kutani a ku, “Ndzi pfuniwe hi broxara leyi!”

Ku Hundzuluxeriwa Ka Bibele

Ku sukela eku heleni ka va-1800, nhlengeletano ya Yehovha a yi xava Tibibele to tala kutani yi ti nyika vanhu lava tsakelaka hi mali ya le hansi swinene, minkarhi yin’wana a yi va ehansi hi 35 wa tiphesente eka leyi vanhu va xavaka ha yona exitolo. Ku sukela hi 1926, vamakwerhu va sungule ku kandziyisa Tibibele emichinini ya vona vini, ku katsa ni vuhundzuluxeri bya Emphatic Diaglott, King James ni bya American Standard. Hiloko hi 1961 ku humesiwa Vuhundzuluxeri Bya Misava Leyintshwa Bya Matsalwa Yo Kwetsima.

Ku vuriwa yini hi tindzimi tin’wana? Eku sunguleni ka lembe-xidzana ra vu-20, marhavi ma sungule ku xava Tibibele eka tindhawu to hambana-hambana to gandlisa kutani ma ti nyika vanhu hi mali leyi ma ti xaveke ha yona. Tin’wana ta Tibibele leti a ti hundzuluxeriwe hi vahundzuluxeri lava tshembekeke lava va ngheniseke ni vito ra Xikwembu—Yehovha—eka tindzimi ta vaaki. Kambe, hi ku famba ka nkarhi, vahundzuluxeri vo tala va ri susile vito ra Xikwembu eka vuhundzuluxeri bya vona. Sweswi, van’wana va swi hundzeletile, va siva vito ra Xikwembu hi vito ra xikwembu xa ndhawu ya ka vona! Hi xikombiso, Bibele ya Xichewa leyi nge Buku Loyera, leyi tirhisiwaka eMalawi, eMozambhiki ni le Zambia, yi siva tinhlanga ta mune leti yimelaka vito ra Yehovha hi Xiheveru hi “Chauta,” ku nga vito ra xikwembu xa vanhu va kwalaho, leri vulaka “Mukhomi Wa Vurha La Chavisekaka.”

Swi tele swilo swin’wana leswi nghenisiweke, leswi hoxeke. Hi xikombiso, vuhundzuluxeri byin’wana bya le Afrika byi vula leswaku Luka i n’anga ya xintima. Bibele ya Xituvalu yi hundzeleta timhaka hi ku hundzuluxela Yuda 23 hi ndlela leyi: “Rhandza vasodoma hi mbilu ya wena hinkwayo; ntsena tivonele leswaku vusodoma bya vona byi nga ku ngheni.” Kambe, lomu tsalwa leri ri hundzuluxeriweke ri huma kona a ku vulavuriwi hi vasodoma kumbe hi vusodoma!

Khale, mavandla ya Bibele hi wona a ma famba emahlweni entirhweni wo kandziyisa ni wa ku hangalasa Tibibele. Kambe sweswi, mavandla man’wana ma teke ntirho lowu wo gandlisa ni ku hangalasa Bibele ma wu nyika tikereke ta Vujagana. Tikereke ta le matikweni man’wana ti durisa Tibibele ta tona ti tlhela ti ala ku xavisela Timbhoni ta Yehovha. Hi xikombiso, le Kyrgyzstan, vukhongeri bya Protestente hi byona byi nga ni mfanelo yo kandziyisa vuhundzuluxeri bya manguva lawa bya Xikirghiz, bya Matsalwa ya Vukreste ya Xigriki. Loko vamakwerhu va lava ku yi xava, hakanyingi va hlangana ni xivutiso lexi, “Xana u Mbhoni ya Yehovha?” kumbe, “Xana wa ri tiva vito ra Xikwembu?” Loko nhlamulo yo va ina, a va xaviseriwi.

Hikwalaho ka swivangelo leswi ni swin’wana, Huvo leyi Fumaka yi lava leswaku vuhundzuluxeri bya Bibele byi rhangisiwa emahlweni. Sweswi, Vuhundzuluxeri Bya Misava Leyintshwa bya kumeka byi helerile hi tindzimi ta 35, naswona Vuhundzuluxeri Bya Misava Leyintshwa Bya Matsalwa Ya Vukreste Ya Xigriki bya kumeka hi tindzimi ta 20. Eka mintlawa ya 33 leyi sweswi yi hundzuluxelaka Bibele emisaveni hinkwayo, mintlawa ya 19 yi hundzuluxela Matsalwa ya Xiheveru, ya 11 yi hundzuluxela Matsalwa ya Vukreste ya Xigriki naswona yinharhu yi hundzuluxela Reference Bible. Hi ntolovelo, ntlawa lowu hundzuluxelaka Bibele wu ni vanhu vanharhu ku ya eka tsevu. Hi ku pfuniwa hi khompyuta ni matirhelo lama antswisiweke, mintlawa yin’wana yi hete Matsalwa Ya Vukreste Ya Xigriki ku nga si hela malembe mambirhi.

Xana vamakwerhu va titwa njhani loko va amukela Vuhundzuluxeri Bya Misava Leyintshwa hi ririmi ra ka vona? Phayona ra le Albania ri yi katsakanye kahle ndlela leyi vo tala va titwaka ha yona. Ri te: “Ndzi ririle. A ndzi si tshama ndzi titwa hi ndlela leyi loko ndzi hlaya Rito ra Xikwembu. Ndzi lava ku twisisa ndzimana yin’wana ni yin’wana!”

Timhaka Ta Nawu

Armenia: Endzhaku ko endla swikombelo swa 15, Timbhoni ta Yehovha ti hetelele ti tsarisiwile hi October 8, 2004. Hambiswiritano, vamakwerhu lava ha riki majaha va ha khotsiwa hikwalaho ko ala ku joyina vusocha. (Esa. 2:4) Hi navela onge ku tsarisiwa loku ku nga endla leswaku vamakwerhu va kuma ntshunxeko wa vukhongeri, lowu nga ta va endla va kota ku amukela tibuku ni ku va ni mintsombano. Lexi tsakisaka, hi June 2005, a ku ri ro sungula mfumo wu pfumela leswaku tibuku ti nghena ximfumo eArmenia ivi ti nyikiwa vamakwerhu.

Austria: Se ku hundze malembe yo tlula 30 Timbhoni ta Yehovha ti ri karhi ti kombela ku tsarisiwa ximfumo tanihi vukhongeri lebyi tiyimeleke. Sweswi se ku ni swikombelo swa ntlhanu leswi yisiweke eka Huvo ya le Yuropa ya Timfanelo ta Vanhu. Hi February 1, 2005, Huvo yi sungule ku kambisisa swirilo swimbirhi leswi katsaka vamakwerhu lava va aleriweke loko va kombela ku nga joyini vusocha hikwalaho ka leswi Timbhoni ta Yehovha ti nga tsarisiwangiki ximfumo tanihi vukhongeri. Hi July 5, Huvo yi pfumerile ku kambisisa xirilo xa vona kambe a yi swi vekanga erivaleni leswaku yi ta fikelela xiboho xihi.

Eritrea: Hi January 24, 2004, mfumo wo khome vavanuna, vavasati ni vana va 38 lava hlanganyelaka eVandlheni ra Saba le Asmara. Malembe ya vona ma le xikarhi ka 6 na 94. Van’wana a va nga khuvuriwanga. Endzhaku ko etlela vusiku byinharhu ekhotsweni, lavatsongo va ntshunxiwile. Lava saleke va 28 va rhurhiseriwe ekhotsweni leri nga ehandle ka doroba ra Asmara kutani va pfaleriwa emabokisini ya nsimbi yo rhwala nhundzu, laha ninhlikanhi va vavuriwaka hi dyambu kasi nivusiku va biwaka hi xirhami. Hi September 2, 2004, endzhaku ka tin’hweti ta nkombo, vakhalabye vambirhi, wa malembe ya 94 ni wa malembe ya 87, va ntshunxiwile. Van’wana na vona va ntshunxiwile hi ku famba ka nkarhi. Kambe, ka ha ri na van’wana va tsevu lava va ha pfaleriweke swin’we ni vamakwerhu van’wana va 16, naswona vanharhu eka vona va gweviwe malembe ya 11 ekhotsweni. Hi kombela mi va khongelela vamakwerhu lava lava rhandzekaka.—Mint. 12:5.

Furwa: Hilaha swi vikiweke hakona eka Buku Ya Lembe Ya 2001, mfumo wu veke xibalo lexintshwa eka mali leyi nyikeriwaka hi vamakwerhu, naswona wu lava va hakela ni xibalo xa malembe ya mune (1993-96) loko nawu lowu wu nga si vekiwa—xibalo xa kona i tiphesente ta 60 naswona ku laveka ni mali yo riha leswi va hlweleke! Vamakwerhu va endle xikombelo kambe va dyiwe hi nandzu ehubyeni ya le hansi ku ya fikela ni ka leyi tlakukeke. Hi February 25, 2005, va endle xikombelo xin’wana eHubyeni ya le Yuropa ya Timfanelo ta Vanhu, hikwalaho ka leswi swi tikombeke ku ri xihlawuhlawu xa vukhongeri.

Republic of Georgia: Nhlaselo wa tihanyi se wu hungutekile swinene. Tibuku ta hina se ta swi kota ku nghena naswona minhlangano ya Vukreste a ya ha kavanyetiwi. Kambe milandzu yo tala ya ku khomiwa ka vamakwerhu hi ndlela yo biha enkarhini lowu hundzeke, a yi si tengiwa ni sweswi. Vamakwerhu va hehle mfumo wa Georgia hi swihehlo swa mune leswi swa ha yimeleke ku tengiwa hi Huvo ya le Yuropa ya Timfanelo ta Vanhu. Swirilo leswi swi katsa ku xanisiwa ka vamakwerhu hi tihanyi, ku herisiwa ka mavandla ya hina ya le nawini ni leswi tihuvo ti nga hi pfuniki ku lulamisa timhaka leti. Hi July 6, 2004, Huvo yi pfumerile ku kambela nandzu wa Gldani Congregation of Jehovah’s Witnesses v. Georgia.

Jarimani: Loko tiko leri ri tlhele ri hlanganisiwa, vamakwerhu va lave ku tiyiseka leswaku Vandla ra Vukhongeri ra Timbhoni ta Yehovha ra ha tsarisiwe ximfumo. Sweswo swi sungule njhekanjhekisano lowu heteke malembe ya 12. Xiboho lexinene lexi endliweke hi Huvo ya Nawu hi lembe ra 2000 xi lwisane ni nawu wa leswaku Mfumo wu ni mfanelo yo koxa leswaku Timbhoni ta Yehovha ti endla nchumu lowu lwisanaka ni ripfalo ra tona ra Vukreste. Hi ku famba ka nkarhi xiphiqo lexi xi lulamisiwile. Hi March 24, 2005, Huvo leyi Tlakukeke ya le Berlin yi vule leswaku Mfumo wa Berlin wu fanele wu nyika Timbhoni ta Yehovha mfanelo ya ku va ni vandla ra le nawini. Mfumo wu vule leswaku wu ta teka goza ro endla xivilelo eka xiboho lexi.

Rhaxiya: Hilaha swi vikiweke hakona eka Buku Ya Lembe Ya 2005, Huvo ya Majistarata ya le Mugangeni wa Golovinsky yi endle xiboho xo yirisa ntirho wa hina hinkwawo le Moscow hi March 26, 2004. Ku sukela hi nkarhi wolowo swa tika ku kuma tindhawu to khomela minhlangano ya vandlha ni tinhlengeletano. Kambe, vamakwerhu va ni muako lowu nga ni Tiholo ta Mfumo ta ntlhanu, leti ti tirhisiwaka hi mavandlha ya 44 ni mintlawa yimbirhi. Mavandlha ya 17 ya le Moscow ma boheka ku khomela minhlangano ya wona ehandle ka doroba, leswi a swi olovi naswona swa durha, kasi man’wana ya 31 ma khoma minhlangano ya wona hi mintlawa leyitsongo, emitini ya vamakwerhu. Maphorisa ma pfa ma va karhata kambe a ku si khomiwa munhu. Ku endliwe xikombelo malunghana ni xiboho xa March 26.

Hi September 9, 2004, ku yingisiwe nandzu wa Kuznetsov and Others v. Russian Federation eHubyeni ya le Yuropa ya Timfanelo ta Vanhu. Hi October 4, Huvo yi nyike mpfumelelo wa leswaku nandzu lowu wu tengiwa. Ku hehliwa mutirhela-mfumo la leriseke maphorisa leswaku ma yimisa nhlangano wa vandlha ra lava vulavulaka hi mavoko le Chelyabinsk, hi April 2000. Ku tengiwa ka nandzu lowu ku tikisiwa hi leswi milandzu ya nkarhi lowu yi nga tengiwangiki hi mfanelo hikwalaho ka xihlawuhlawu. Ha ha rindzele ku twa xiboho xa kona.

Turkmenistan: Vamakwerhu vanharhu—Mansur Masharipov, Atamurat Suvkhanov na Vepa Tuvakov—va gweviwe malembe ya 18 ha un’we hileswi mapfalo ya vona ma nga va pfumeleriki ku joyina vusocha. Wa vumune—Begench Shakhmuradov—yena u gweviwe lembe. Hi February 16, 2005, hofisi ya ta nawu ya Timbhoni ta Yehovha yi rhumele papila eka Hofisi ya ta Ndzayo ya tiko ra Turkmenistan leyi nga eWashington, D.C., yi kombela leswaku vamakwerhu lava va mune va ntshunxiwa xikan’we-kan’we. Hi April 16, hinkwavo va ntshunxiwile hi mpfumelelo wo hlawuleka wo huma eka muungameri wa tiko ra Turkmenistan. Exikarhi ka lembe, maphorisa ma khome ma tlhela ma xanisa vamakwerhu vo tala va xinuna ni va xisati, va ringeta ku va sindzisa ku landzula ripfumelo ra vona, kambe ma tsandzekile.

Lembe Ra Timhangu Ta Ntumbuluko

Ematikweni man’wana, lembe ra 2004 ri ve ni timhangu to tala ta ntumbuluko ku tlula rini na rini. Xana va kona vamakwerhu lava hlaseriweke hi timhangu leti?

Carriacou, Grenada na Petite Martinique: Hi September 7, 2004, Xidzedze lexi vitaniwaka Ivan, xi hlasele swihlala leswi, xi onha xi tlhela xi lovisa kwalomu ka makaya hinkwawo ya xihlala. Lexi vavisaka, vaaki va lahlekeriwe hi nhundzu yo tala ngopfu ku tlula leyi onhiweke hi xidzedze lexi! Vamakwerhu va lahlekeriwe hi nhundzu ya vona yo tala hikwalaho ka khombo leri naswona Tiholo ta Mfumo timbirhi eka leta tsevu le Grenada, ti onhake swinene. A nga kona eka vamakwerhu la vavisekeke ngopfu.

Rhavi ra le Barbados leri khathalelaka swihlala leswi, ri tsundzuxe mavandlha ku nga si fika mhangu leyi leswaku ma va ni nkulumo eka Nhlangano wa Ntirho leyi vulavulaka hi ku lunghekela xidzedze, hambileswi xidzedze xi heteleleke ku va kona hi 1955 eswihlaleni leswi. Makwerhu un’wana wa xisati wa le Grenada u vutisile a ku: “Ha yini hi dya nkarhi hi vulavula hi swidzedze kasi ku ni timhaka ta nkoka to bula ha tona?” Endzhaku ka xidzedze xa Ivan, u endle xiboho xa leswaku a nge he pfuki a gungurile loko a kuma nkongomiso lowu humaka eka nhlengeletano! Hi ku hatlisa rhavi ri vumbe komiti yo phalala, naswona rhavi ra le Guyana ni ra le Trinidad na wona ma pfunile. Madzana-dzana ya vamakwerhu vo huma eKharibiya ni le United States va pfunetile entirhweni wo pfuxeta miako.

Jamaica na Cayman Island: Xidzedze lexi vitaniwaka Ivan a xi va vavisanga vamakwerhu, va lo lahlekeriwa hi nhundzu ya vona ntsena. Loko xidzedze xi hungutekile, hi ku hatlisa vakulu va mavandlha ya 199 lama nga kona exihlaleni, va sungule ku endzela vahuweleri. Vahlaleri va te: “N’wina ma khathalelana hakunene.”

Haiti: Exikarhi ka n’hweti ya September, Xidzedze xa Jeanne xi khukhule tlhelo ra n’walungu wa tiko ra Haiti, xi onha doroba ra Gonaïves leri nga eribuweni swin’we ni tindhawu leti nga ekusuhi. Hambi ku ri vanhu lava va balekeleke ehenhla ka tiyindlu na vona va hetelele va yime ematini lama fikaka hi le matsolweni! Makwerhu un’wana u ri: “Vusiku hinkwabyo a hi twa tindlu ti ri karhi ti mbindzimuka ni vanhu va ri karhi va kalakala.” Ndhambhi leyi yi dlaye vanhu va 2 900 ku katsa ni makwerhu wa xisati la nga ni malembe ya 83 hi vukhale.

Makwerhu un’wana u ri: “Ndzi nkhensa Yehovha leswi ndyangu wa ka hina wu balekeke wu siya nhundzu kutani wu pona.” Endzhaku ka masikunyana, Timbhoni to huma emadorobeni ya le kusuhi ti te ni swakudya swin’we ni mati yo tenga, naswona rhavi ri te ni lori leyi taleke hi swilo swo phalala. Hambileswi hi bohekeke ku basisa, ku te ku hela vhiki hinkwerhu se a hi ya eminhlanganweni ni le nsin’wini. Makwerhu un’wana wa xisati u ri: “Vatirhi va ku tirhandzela va 40 va tirhe ekaya ra mina masiku ya mune hinkwawo. Va tlhele va penda ni yindlu ya mina! Leswi hinkwaswo swi tsakise swirho swa ndyangu wa ka hina leswi nga riki Timbhoni. Un’wana u sungule ku hlayeriwa endzhaku ka leswi.”

United States: Hi August na September 2004, xifundzha xa Florida xi hlaseriwe hi swidzedze swa mune: lexi vuriwaka Charley, Frances, Ivan ni lexi vuriwaka Jeanne.a Ku onhake makaya yo tlula 4 300 ya vamakwerhu ni Tiholo ta Mfumo ta khume. Hi nkarhi wa khombo leri, mukongomisi wa nhlengeletano leyi vitaniwaka Florida’s Emergency Operations Committee (EOC), u kambisisile ku vona leswaku swilo swo phalala leswi humaka eka nhlengeletano leyi swi tirhisiwa kahle. U vule leswaku a wu kona ntlawa lowu hlelekeke kahle ku fana ni Timbhoni ta Yehovha. U byele komiti yo phalala leswaku yi nga titekela nhundzu yihi na yihi leyi yi yi lavaka.

Vandlha rin’wana a ri tirhisa muako lowu a ri wu hirha hi R340 nhlangano wun’wana ni wun’wana, swa xinkarhana. Kambe muako lowu wu onhakile loko xidzedze xo sungula xi hlasela. Ku thoriwe vanhu leswaku va pfuxeta muako lowu kambe a va hetanga ku lunghisa. Vamakwerhu lava va kombele ku pfuneta leswaku muako lowu wu pfuxetiwa, vini va wona va pfumerile naswona ntirho wu hele hi ku hatlisa. Hikwalaho ka sweswo, vini va muako lowu va tshike vamakwerhu va wu tirhisa mahala ku kondza ku hela tin’hweti tinharhu.

Japani: Xiviko xa mahungu xi te: “Swihuhuri leswi hlaseleke Japani [hi 2004] a swi tele ku tlula malembe hinkwawo ku sukela loko tiko ra Japani ri sungula ku hlayisa tirhekhodo ta swihuhuri hi 1551.” Edorobeni ra Niigata ni ra Fukui, maxelo yo biha ya July ma onhe makaya yo tlula 34 000 ni miako yin’wana, ku katsa ni Holo ya Mfumo ni makaya man’wana ya 60 ya vamakwerhu. Madzana-dzana ya Timbhoni to huma emavandlheni ya le kusuhi ti tsutsumile ti ya hoxa xandla. Kute ku nga si hela ni vhiki ra vumbirhi, Holo ya Mfumo se a yi pfuxetiwile hi ku helela.

Vamakwerhu va tlhele va basisa ni ku fafazela mirhi yo dlaya switsongwatsongwana emakaya ya vanhu lava nga riki Timbhoni lava tshamaka ekusuhi ni holo. Wanuna loyi a a nga lavi ku twa nchumu hi rungula ra Mfumo a a nga tikoti hi ku tsaka. Masipala wa ndhawu leyi u tlhele a rhumela ni papila ra ku tlangela eka komiti yo phalala, hikwalaho ka ku tinyiketela ka vamakwerhu.

Loko swihuhuri swimbirhi swi hlasele Japani hi September na hi October, ndhambhi ni ku mbindzimuka ka misava swi dlaye makwerhu wa xinuna ni wa xisati, swi tlhela swi kayakayisa Timbhoni tin’wana ta kwalomu ka 100. Doroba ra Toyooka le xifundzheni xa Hyogo Prefecture a ri funengetiwe hi mati. Hambileswi kaya ra mulanguteri wa xifundzha na rona a ri ri endzeni ka mati, u hoxe xandla eku pfuneteni ko hlela ntirho wo phalala.

Leswi se mati a ma vohlile ekamareni leri hirhiweke hi phayona ra xisati, vahuweleri va kwalaho va suse ndzhope lowu a wu tlakuke ku tlula mitara ekamareni rero kutani ri sala ri lo paa! N’wini wa muti la nga riki Mbhoni u hlamarile swinene. Phayona leri ri te: “Ndzi tshame ndzi twa hi ntirho wa nhlengeletano ya Yehovha wo phalala, kambe sweswi ndzi tivonele hi ya mina. Ndza tinyungubyisa hi Yehovha Xikwembu xa hina, ni nhlengeletano yakwe.”

Nakambe, hi October ku ve ni ku tsekatseka lokukulu ka misava en’walungwini wa tiko ra Japani, loku dlayeke vanhu va 40 naswona vanhu va 100 000 va boheke ku siya makaya ya vona. A nga kona makwerhu la vavisekeke kumbe la feke, hambileswi ku khumbekeke mindyangu yo tlula 200 naswona Holo ya Mfumo yi onhake lerova a yi nga ha ta tirhiseka. Ku ninginika loku ku sungule loko vakulu va xifundzha va hlengeletanile va ri karhi va lunghiselela nhlengeletano ya xifundzha. Xana va endle yini? Hi ku pfumelelana ni nkongomiso wa le rhavini ni wa Komiti yo Aka Tiholo ya kwalaho, va sungule ku hlela ntirho wo phalala. Nkulu un’wana u ri: “Hi tsundzuxiwe leswaku hi tirhisa langutelo ra hina ra ku wupfa emoyeni hi swiendlakalo leswi.” Nhlengeletano ya xifundzha yi ve kona, naswona vamakwerhu lava khumbiweke hi ku tsekatseka loku ka misava na vona a va ri kona.

Makwerhu wa xisati loyi nuna wa yena a nga riki Mbhoni naswona muti wa vona wu onhakeke, u te: “Ku tsekatseka loku ku cince mbilu ya nuna wa mina.” Hikwalaho ka rirhandzu ra Vukreste leri a ri voneke hi nkarhi wo phalala, nuna wakwe u ve kona ro sungula enhlanganweni wa vandlha. U te: “Ndzi yi tshemba hi ku helela nhlengeletano ya n’wina. A yi nge hi khomisi tingana.”

Swihlala Swa Philippine: Loko swihuhuri swi hlasele xifundzha xa Quezon ni xa Aurora eku heleni ka lembe ra 2004, ndyangu wun’wana wa Timbhoni, ku katsa ni vana va mune va file loko kaya ra vona ri dyiwa hi mati ni ndzhope. Felimon Maristela, mulanguteri wa xifundzha a a ri le Quezon loko ndhambhi yi hlasela. U tsale a ku: “Holo ya Mfumo yi sungule ku tala mati hi ku hatlisa naswona movha wa mina wa jipi wu khuluke ni mati. Mina ni nsati wa mina swin’we ni vamakwerhu van’wana vambirhi, hi hete vusiku hinkwabyo hi ri ehenhla ka lwangu ra holo, naswona mati a ma fika laha lwangu ri sungulaka kona. Hi awara ya nharhu nindzhenga hi xa mundzuku wa kona, ndzi xikile. Mati a ma ha fika exifuveni loko ndzi yimile.”

Hambileswi vutomi byakwe a byi ri ekhombyeni, Makwerhu Maristela u sungule ku hlota vahuweleri ku vona loko va hlayisekile. Le Dingalan, eAurora, nkulu u ve ni njombo ya ku tlakuriwa hi xihaha-mpfhuka-phatsa, kambe u hlawule ku ka a nga tlakuriwi leswaku a ta pfuna vamakwavo lava nga Vakreste.

Titsunami To Biha Ku Tlula Hinkwato Leti Nga Tshama Ti Va Kona

Hi December 26, 2004, ku ve ni ku tsekatseka ka misava ka mpimo wa 9,0 eribuweni ra le vupela-dyambu bya Sumatra, eIndonesia, kutani ku endle leswaku ku va ni titsunami leti nga ni khombo ku tlula hinkwato leti nga tshama ti va kona. Swiringanyeto swi komba leswaku vanhu lava feke swin’we ni lava va nyamalaleke va tlula 280 000! Hambi ku ri eSomalia, laha Afrika, magandlati ya lwandle ma dlaye vanhu va kwalomu ka 290.

Indonesia: Hambileswi etikweni leri ku feke vanhu vo tala, a nga kona eka vamakwerhu ni vanhu lava tsakelaka la feke. Hikwalaho ka madzolonga lama tshameke ma va kona exifundzheni xa Aceh—ku nga xona lexi hlaseriweke ngopfu—Timbhoni to tala a ti sukile eribuweni ra lwandle ti nghena endzeni ka tiko. Xihlala xa Nias na xona xi onhake ngopfu, kambe vamakwerhu va swi kotile ku baleka va ya tumbela.

Indiya: Vamakwerhu a va fanga, hambileswi vo tala va vona va lahlekeriweke hi makaya ni nhundzu yin’wana. Edorobeni ra Pondicherry, Lakshmi a a ri ensin’wini loko a twa hi ta tsunami. U ye ekaya ra yena, ku nga yindlu leyi phamiweke hi misava, leyi nga le kule ni ribuwa hi tikhilomitara tinharhu, kutani a kuma leswaku yi onhakile swinene. Vamakwerhu va n’wi lunghisele yona va tlhela va yi basisa.

Le Madras, Naveen wa malembe ya 13 hi vukhale, a a ri karhi a tlanga khrikete loko a vona magandlati lamakulu. U lemukise mhani na sesi wakwe hi khombo leri kutani va baleka va ya tumbela. Hambiswiritano, a va famba endzeni ka mati lama rhwaleke mixaka hinkwayo ya tinhundzu swin’we ni mintsumbu yo tala ya vanhu.

Lini wa malembe ya nkombo hi vukhale a a ri na makwavo wa tata wakwe ni muzala wakwe eribuweni ra lwandle ekusuhi ni le Kanniyākumāri loko magandlati ma n’wi rhwala ma n’wi khukhulela ekule a kala a khomiwa hi rihlampfu ra timhandzi. Mati a ma ri karhi ma hundza ehenhla ka yena. Makwavo wa tata wakwe ni muzala wa yena wa nhwanyana va ponile kambe makwavo wa tata wakwe u lahlekeriwe hi tinghilazi ta mahlo naswona a a nga ha voni kahle. Kambe u ye emahlweni a lava-lavana na Lini. Ku nga ri khale u n’wi twe a ri karhi a huwelela Yehovha exikarhi ka mati lama yaka ma tlakuka kutani u kote ku n’wi ponisa. Sweswi Lini u byela mani na mani leswaku Yehovha u swi twile swikhongelo swa yena.

Andaman Island Na Nicobar Island: Mary na Alwyn xifanyetana xakwe xa malembe ya nhungu, a va endzele maxaka loko ku tsekatseka ka misava ku ninginisa yindlu. Hinkwavo va tsutsumele ehandle. Mary u vone gandlati lerikulu ra mati ri ta eribuweni ra lwandle. Hi nkarhi wolowo ku fike bazi. Hiloko yena ni xifanyetana xakwe va tilongela endzeni va famba. Kambe, van’wana va tsutsumele emakaya ya vona va ya teka nhundzu ya vona kutani mati ma va kukula ma famba na vona. Endzhaku ko famba mpfhukanyana, hinkwavo lava a va ri ebazini va twe ku tsekatseka kun’wana ka misava. Va hume ebazini va tsutsumela endhawini leyi tlakukeke leyi ana se a ku ri ni vanhu va kwalomu ka 500 eka yona. Loko va ha langutile, gandlati lerikulu ri fike ri khukhula bazi naswona mati ma fike ma yima hafu ya mitara ekusuhi ni laha vanhu a va yime kona.

Loko mati ma vohlile, Mary u tlhelele ekaya rakwe. U fike a teka Bibele yakwe ni xibukwana lexi nge Ku Kambisisa Matsalwa Siku Ni Siku, ku nga tibuku leti va tiyiseke swinene eka masiku lama landzeleke. Loko ku fika mahungu ya leswaku swikepe swi ta ta swi ta teka vanhu va suka eka xihlala lexi, madzana-dzana ya vanhu va tsutsumele eribuweni va nghena ni le ndzeni ka lwandle hi ntshembo wa leswaku va ta khandziya xikepe. Siku ni siku, Mary ni xifanyetana xa yena va hete tiawara va rindzile endzeni ka mati lama fikaka emasengeni, va rhendzeriwe hi mintsumbu ya vanhu leyi papameke ematini. Xikepe xi fike se ku hundze tsevu wa masiku ku sukela loko tsunami yi hlasela. Leswi vanhu vo tala a va sola Xikwembu hi khombo leri, Mary u swi kotile ku va chumayela. Lexi tsakisaka, muhariva wakwe sweswi u dyondzeriwa Bibele naswona u va kona eminhlanganweni ya Vukreste.

Prasanthi na Jehoash, xifanyetana xakwe xa malembe ya ntlhanu, a va ye eHut Bay va endzela tata wakwe la dyuhaleke, Makwerhu Prasad Rao. Loko va ri kwalaho, va twe ku tsekatseka ka misava, va vona ni magandlati, hiloko va tsutsumela endhawini leyi tlakukeke. Mati ma tlakuke hi timitara ta ntlhanu ehenhla ka pato kutani ma funengeta kaya ra Prasad. Mubedo wakwe, xigwitsirisi ni thelevhixini swin’we ni tibuku ta vandlha leti nge Nghwazi, hinkwaswo a swi papama ehenhla ka mati. Endzhakunyana lava va poneke va kume tibuku leti kutani va sungula ku ti hlaya. Prasad, Prasanthi na Jehoash va hete masiku ya ntlhanu va ha dya swakudya leswi va koteke ku baleka na swona naswona a va ri karhi va lumiwa hi tinsuna ta ntsandza-vahlayi ni ku karhatiwa hi tinhongana. Loko swikepe swi fika, Prasanthi na Jehoash swin’we ni van’wana vo tala va nghene ematini va fika hi le xifuveni leswaku va ya swi khandziya, hambileswi tingwenya a ti ri kwala kusuhi! Loko ku ri Prasanthi, a a ri ni tin’hweti ta tsevu a tikile. Tata wakwe u va landzerile hi ku famba ka nkarhi.

Tindlu hinkwato ta le Teressa Island ti khukhuriwile. Vamakwerhu va xinuna ni va xisati va le xihlaleni va 13, va hete tsevu wa masiku enhoveni, va dlayiwa hi ndlala ni ku lumiwa hi switsotswana va nga si tekiwa va yisiwa eCamorta Island. Kwalaho va fike va tshama na Mark Paul, makwerhu la tshamaka endhawini leyi tlakukeke, loyi kaya ra yena ri tirhisiwaka tanihi Holo ya Mfumo. Hi siku leri tsunami yi hlaseleke ha rona, a ku ri ni vanhu va 300 eminhlanganweni ya vandlha, kasi hi ntolovelo ku va ni vanhu va 10 ku ya eka 12 ntsena! Ku sukela hi siku rero, se a ku ri ni vanhu va 18 lava sunguleke ku dyondza Bibele lava vaka kona nkarhi hinkwawo eminhlanganweni, hileswi va tivoneleke hi ya vona ndlela leyi vanhu va Yehovha va pfunanaka ha yona.

Sri Lanka: Magandlati ma be xiyenge lexikulu xa ribuwa ra xihlala lexi, naswona ma onhe ngopfu. Tsunami leyi yi hlasele hi Sonto nimixo loko vamakwerhu vo tala va ri eminhlanganweni ya vandlha ekulenyana ni ndhawu leyi weriweke hi khombo. Ku khumbeke mavandlha ya khume naswona makwerhu un’wana wa xisati u file loko yindlu yakwe yi khukhuleriwe elwandle. Vamakwerhu va twe ku vava swinene hi ku fa ka makwerhu loyi lonene. Vanhu lava tsakelaka vo hlayanyana na vona va file naswona vamakwerhu vo tala va feriwe hi maxaka. Nkulu un’wana u feriwe hi swirho swa ndyangu swa 27! Hambiswiritano, rhavi ri tsale ri ku: “Vamakwerhu va ponile eka khombo leri va ri hava ‘xivati’ ni xin’we hi tlhelo ra moya.”

Kaya ra Bethele a ri lo mphaa, hi nhundzu yo phalala, naswona vo tala endyangwini wa Bethele a va khomeke hi ntirho wo phalala. Vamakwerhu va le kusuhi lava nga ni mimovha va tleketle nhundzu va yi yisa etindhawini leti weriweke hi khombo. Hi masiku ya mune ntsena, vamakwerhu hinkwavo se a va kumiwile ni ku nyikiwa swakudya ni swiambalo. Loko va vutisiwa leswaku i yini swin’wana leswi va swi lavaka, va te: “Hi kombela Tibibele ni tibuku! Ta hina ti khukhuriwe hi mati.” Va tiseriwe tona hi ku hatlisa.

Gerrad Cooke, la nga mulanguteri wa xifundzha, a a ri eColombo loko tsunami yi hlasela. U fambe tiawara ta nkombo hi movha, endhawini leyi nivusiku yi nga ni khombo hikwalaho ka tindlopfu. Loko a fika hi 10:30 nivusiku, yena ni makwerhu wa kwalaho—loyi na yena yindlu yakwe a yi ri endzeni ka mati—va hatle va sungula ku endzela mindyangu va yi yisela swakudya ni swilo swin’wana, va tirhe vusiku hinkwabyo.

Thailand: Vamakwerhu a va vavisekanga naswona a nga kona loyi a nga fa kumbe ku lahlekeriwa hi nhundzu yakwe. Kambe, ku ni vaendzi vo huma eka matiko man’wana lava lahlekeke naswona ku anakanyiwaka leswaku va file. I makwerhu un’we wa le Finland, mpatswa wun’we wa le Sweden, makwerhu wa le Austria, ni nuna wa makwerhu, la nga riki mupfumeri. Mimpatswa yimbirhi ya le Sweden yi fambe ni ntlawa wa kwalaho va ya chumayela ekule ni ribuwa ra lwandle. Loko yi vuyela ehotela, yi kume leswaku vanhu va file ni miako yi onhakile.

Hi Musumbhunuku nimixo endzhaku ka ku tsekatseka ka misava, mulanguteri la ungamelaka wa Vandlha ra Phuket u kume riqingho ro huma erhavini ra le Thailand, ri n’wi byela leswaku Kristina, ku nga makwerhu wa xisati wa le Finland u le xibedlhele, laha ku ya kona a swi teka awara ni hafu. Yena ni makwerhu un’wana va nambe va tsutsumela exibedlhele. Mulanguteri la ungamelaka u ri: “A ndzi si tshama ndzi vona vanhu va ri enhlomulweni wo fana ni lowu—vanhu va lahlekeriwe hi vanghana va vona va vukati, vatswari va lahlekeriwe hi vana va vona, vana va lahlekeriwe hi vatswari va vona. Van’wana a va rila va lava mpfuno; van’wana a va langute ehenhla loko van’wana va langute ehansi. Xiyimo lexi a xi twisa ku vava lerova a hi pfa hi humela ehandle leswaku hi ya wisa ku vona maxangu lawa ni ku khongelela matimba yo tiyisela.”

Vamakwerhu va kume Kristina a ri karhi a lunghisiwa leswaku a ta kuma vuhandzuri tanihi leswi a a tshoveke nenge. A a lahlekeriwe hi maphepha ya yena hinkwawo. Loko se a hetiwe ku endliwa vuhandzuri, vamakwerhu lava vambirhi va khongele na yena kutani va tshama na yena ku fikela exikarhi ka vusiku. Endzhaku ka masiku ma nga ri mangani, u khandziye xihaha-mpfhuka a tlhelela eFinland. Vamakwerhu va vula leswaku hambileswi a langutaneke ni xiyimo xo chavisa, “Kristina a a ri ni xivindzi naswona a a tiyile.” Khombo ra kona, nuna wa yena u dlayiwe hi tsunami.

Ku Nyiketeriwa Ka Marhavi

Angola, January 8, 2005: Siku leri ro hlawuleka a ku ri siku leri nga taka ri nga rivaleki entirhweni wo chumayela eAngola, tiko leri ri langutaneke ni nyimpi ya xin’wana-manana ku ringana 40 wa malembe. Makwerhu Stephen Lett u ve ni lunghelo leri nga kambirhi, ra ku nyikela nkulumo yo nyiketela kaya ra Bethele eAngola ni ku va xirho xo sungula xa Huvo leyi Fumaka ku endzela tiko leri. A ku ri ni vapfhumba va kwalomu ka 730 vo huma ematikweni ya 11 eka nongonoko lowu. Ha yini a ku laveka rhavi lerintshwa? Hi 1975 rhavi leri a ri ri ni vahuweleri va 3 055. Kambe loko lembe ra 2004 ri hela, se a va andze ka 18, va tlula 54 000!

Bulgaria, October 9, 2004: Hi nkarhi wo ringana malembe manharhu, vamakwerhu va 150 vo huma eka matiko man’wana swin’we ni vamakwerhu va kwalomu ka 300 lava tshamaka etikweni leri, va hoxe xandla eku akiweni ka rhavi lerintshwa le Sofia. Gerrit Lösch wa Huvo leyi Fumaka u nyikele nkulumo yo nyiketela muako emahlweni ka vayingiseri va 364 vo huma eka matiko ya 24.

Etiyopiya, November 20, 2004: Eku sunguleni ka lembe ra 2004, swirho swa 60 swa ndyangu wa Bethele a swi tshama etindhawini to hambana-hambana ta kaye—ku nga xiyimo lexi a xi tikisa swilo! Muti lowuntshwa wa Bethele wu le ndhawini leyi tlakukeke evuxeni bya ntsindza wa tiko leri, ku nga Addis Ababa, naswona rhavi leri ri le henhla ka vuandlalo bya lwandle hi 2 400 wa timitara. Hi ntolovelo nivusiku ku lo tititi, u ngo pfa u twa pongo ra ku hleka ka timhisi ntsena. Nkulumo ya Makwerhu Gerrit Lösch, yi yingisiwe hi vanhu va 2 230, ku katsa ni vapfhumba va 200 vo huma ematikweni ya 29. Vamakwerhu van’wana lava ku burisaniweke na vona hi lava va tshameke va khotsiwa ni ku xanisiwa hikwalaho ka ripfumelo ra vona. N’wana wa makwerhu la nga dlayiwa u te: “Eku pfukeni ka vafi, Tatana u ta tsaka ku kuma leswaku ndzi tekelele xikombiso xa yena xa ku tinyiketela eka Xikwembu nileswaku ndzi tirhile eBethele.”

Ghana, March 5, 2005: Makwerhu J. Vigo wa rhavi ra le Nigeria, u nyikele nkulumo yo nyiketela leyi yingisiweke hi vanhu va 3 243. Muako lowa ha ku engeteriwaka erhavini leri, wu ni miako yinharhu yo tshama eka yona, tihofisi ta 50, muako wo lunghisela swilo eka wona, Holo ya Mfumo ni yindlu yo dyela, xitanga ni vuhlantswelo.

Guam, June 25, 2005: Loku i ku nyiketeriwa ka muako ka vunharhu ku sukela hi 1980 loko Guam ra ha ri ni vandlha rin’we ntsena. Sweswi ku ni mavandlha ya khume. Ku pfuxetiwe miako leyi a yi ri kona ku tlhela ku engeteriwa Holo ya Mfumo leyintshwa ni muako wo tshama eka wona lowu nga ni swithezi swimbirhi. Vatirhi va ku tirhandzela va 100 a va huma eAustralia ni le United States naswona va te hi mali ya vona. Rhavi ri vika leswaku loko mukamberi wa miako wa tiko leri a twa hi ntirho lowu ni ku vona leswaku wu endliwe kahle swinene, “u ninginise nhloko hi ku hlamala.” Nkulumo yo nyiketela yi nyikeriwe hi Makwerhu Lorence Shepp wa rhavi ra le Peru.

Mauritius, November 6, 2004: Gerrit Lösch u ve ni lunghelo ro nyikela nkulumo loko ku nyiketeriwa miako leyi engeteriweke ya rhavi leri. Miako leyi engeteriweke a yi katsa ni tihofisi letintshwa ta 12 ta Ndzawulo ya Vuhundzuluxeri ni muako lowuntshwa wa mintirho yo khathalela kaya leri. Vapfhumba a va huma hi le Yuropa, Madgascar, Mayotte, Réunion, Seychelles na Afrika Dzonga.

Nicaragua, December 4, 2004: Vatirhi va ku tirhandzela vo huma ematikweni mambe vo tlula 330 swin’we ni madzana-dzana ya vamakwerhu va tiko leri, va ake tihofisi letintshwa ta rhavi ni miako yo tshama eka yona swin’we ni Holo ya Tinhlengeletano leyi nga ni lwangu ntsena, leyi nga rhurhelaka vanhu va 2 400. Makwerhu Samuel Herd, la nga xirho xa Huvo leyi Fumaka u nyikele nkulumo yo nyiketela miako leyi. Exikarhi ka vapfhumba a ku ri ni varhumiwa lava va tshameke va tirha laha Nicaragua. A va nga tikoti hi ku tsaka loko va vona khale ka swichudeni swa vona swa Bibele swin’we ni vana va swona, ku katsa ni vatukulu va swona!

Panama, March 19, 2005: Makwerhu Samuel Herd u nyikele nkulumo leyi yingiseriweke hi vanhu va 2 967, lava vo tala va vona se va nga ni malembe yo tlula 20 va ri karhi va tirhela Yehovha. Loko ntirho wa ha sungula, vamakwerhu va hirhe muchini wo tlakula nhundzu ni muchayeri wa wona leswaku va ta susa mabokisi lamakulu yo hlayisa nhundzu. Loko muchayeri a fika endhawini leyi, u arile ku endla ntirho lowu, a vula leswaku ndhawu leyi a yi lunghisiwanga kahle. Vamakwerhu va n’wi komberile kambe ko fana ni kwala. Loko se a ku wa famba, u vutisile a ku, “Kahle-kahle, vito ra kereke ya n’wina i mani?”

Vamakwerhu va hlamurile va ku hi “Timbhoni ta Yehovha.”

Hiloko a yimanyana kutani a ku, “Swi lulamile, ndzi ta wu endla ntirho lowu.” I yini lexi endleke a cinca hi xitshuketa? Vamakwerhu vambirhi va xisati a va dyondza Bibele ni vana vakwe naswona a a swi tsakela leswi vamakwerhu lava va swi endlaka.

Slovakia, April 16, 2005: Makwerhu Theodore Jaracz wa Huvo leyi Fumaka u nyikele nkulumo ya ku nyiketela leyi yingiseriweke hi vaendzi va 448 vo huma ematikweni ya 21. Hi siku leri tlhandlamaka ku ve ni nhlengeletano yo hlawuleka erivaleni ra mintlango naswona ku te vanhu vo tala hi mabazi. Muchayeri un’wana u te: “Mi vanhu va kahle, lava tshamaka va tsakile naswona hinkwavo va ndzi xeweta! Ndza swi tiva leswaku swi endliwa hi yini. Swi vangiwa hi ripfumelo ra n’wina. Ndzi tala ku tleketla vana va xikolo ni vadyondzisi. Hi mina ndzi bohekaka ku xeweta vana; naswona vadyondzisi a va tikarhati hi ku ndzi xeweta!”

Wallkill, New York, U.S.A., May 16, 2005: Xirho xa Huvo leyi Fumaka, ku nga Makwerhu John Barr u swi vekise xileswi loko a nyikela nkulumo yo nyiketela: “Hinkwerhu ka hina hi endla xiboho xo nyiketela vugandliselo lebyintshwa swin’we ni miako yo tshama eka yona ya A, C na D eka Xikwembu xi ri xin’we xa ntiyiso, ku nga Yehovha.” Ntirho wo aka vugandliselo lebyintshwa wu sungule hi May 1, 2003, naswona endzhaku ka tin’hweti ta nhungu ntsena, muchini wo sungula eka leyi a yi tirhisiwa wu rhurhiseriwe eka muako lowuntshwa.

Tikomiti to Aka ta Xifundzha ta tiko hinkwaro ra United States, ngopfu-ngopfu leti nga eka swifundzha leswi nga ekusuhi, ti rhumele vanhu lava nga ni vuswikoti byo aka. Ntirho wun’wana wu endliwe hi tikontraka. N’wini un’wana wa kontraka u te: “A ndzi nge swi koti ku hakela vanhu va mina leswaku va kota ku tirha ku fana na n’wina. Mi tirha hi mbilu ya n’wina hinkwayo.” Murhangeri un’wana wa vatirhi u te: “Ndzi kote ku twisisa ni ku dyondza swo tala hi ta ntirho wa mina eka tin’hweti ti nga ri tingani leti ndzi ti heteke ndzi ri laha Watchtower ku tlula leswi ndzi swi dyondzeke eka malembe ya ntlhanu lawa ndzi ma heteke exikolweni!” Muyimeri wa khampani leyi yi hi xaviseleke muchini wo rhendzelekisa mabokisi u te: “Mpfuno wa n’wina wu endle leswaku hi hatla hi heta ku hlanganisa muchini lowu, a hi si tshama hi hatlisa hi ndlela leyi. Un’wana ni un’wana u tshama a tsakile laha, lerova swi endla na mina ndzi tshama ndzi tsakile! Ndhawu leyi yi sasekile.”

Eka malembe ma nga ri mangani lama hundzeke, rhavi ra United States a ri ri ni michini ya 15 yo gandlisa ya web-offset—ya 11 a yi ri eBrooklyn kasi ya mune yi ri eWallkill. Sweswi ku sele ntlhanu ntsena, leswi swi vangiwa hi nhluvuko wa thekinoloji ni ku yisiwa ka mintirho yin’wana eka marhavi man’wana lamakulu, lama byarhisiweke ntirho wo gandlisa. Muako lowuntshwa wo gandlisela eka wona wu ni fambiselo ro hlengeleta maphepha, ri teka lama chatuleriwaka hi michini yo gandlisa ni lama humaka laha ku hlanganisiwaka kona tibuku, ma famba hi tiphayiphi leti fambaka hi le lwangwini ra muako, ma ya laha ma fikaka ma bohiwa ma va swiputsa. Swiputsa swa maphepha lawa swi yisiwa eka khampani ya le handle naswona rhavi ri londzovota mali yo ringana R1 300 000 hi lembe!

Zambia, December 25, 2004: Eka vanhu va kwalomu ka 700 lava a va ri kona loko ku nyiketeriwa miako leyi engeteriweke, va 374 se va ni malembe yo tlula 40 va ri karhi va tirhela Yehovha! Loko a nyikela nkulumo ya yena yo nyiketela, Makwerhu Stephen Lett u byele lava va veke ni xandla entirhweni lowu wo aka leswaku vona ku fana ni malandza ya le ka xin’wana xa swifaniso swa Yesu, va faneriwa hi ku nkhensiwa hi marito lawa: “[Mi] endle kahle!”—Mat. 25:23.

Vamakwerhu va endle leswaku vito ra Xikwembu ri dzunisiwa loko ku ri karhi ku akiwa. N’wini wa kontraka yin’wana u te: “N’wina mi tshama eparadeyisini.”

Vamakwerhu va n’wi vutisile va ku: “U vula ya nyama kumbe ya moya?”

U hlamule a ku: “Haswimbirhi!”

[Nhlamuselo ya le hansi]

[Bokisi/Swifaniso leswi nga eka tluka 29]

Mintsombano Leyi Nge “Ku Yingisa Xikwembu”

Hilaha swi hlamuseriweke hakona eka Mintsombano ya Muganga leyi nge “Ku Yingisa Xikwembu,” i vanhu lava ‘tivaka Xikwembu’ ni lava ‘yingisaka mahungu lamanene’ ntsena lava nga ta pona loko siku ra Yehovha ro rihisela ri fika. (2 Tes. 1:6-9) Xisweswo, hi fanele hi va pfuna hilaha swi kotekaka hakona hinkwavo lava va byeriweke vunwa malunghana ni Xikwembu kumbe lava va xi hlundzukeleke hi ku vona maxangu lama nga kona emisaveni. Malunghiselelo lamantshwa yo hi pfuna i xiphephana lexi nge Maxangu Hinkwawo Ma Ta Hela Ku Nga Ri Khale! ni buku leyi nge Xana Bibele Yi Dyondzisa Yini Hakunene?

Handle ko kanakana, xiphephana lexi lexintshwa xi ta va chavelela vanhu vo tala lava kayakayisiwaka hi nyimpi, vusweti, makhombo, ku pfumaleka ka vululami ni mavabyi, hi ku va pfuna va vona leswaku swilo leswi a swi vangiwi hi Xikwembu. Nakambe, buku leyi leyintshwa yi ta va pfuna lava va nga ni torha ra ntiyiso hi tlhelo ra moya. Yi tsariwe hi ndlela leyi rhandzekaka, yo olova ni leyi twisisekaka naswona tinhla-nkulu ti hlamuseriwe kahle hi swifaniso ni hi ndlela leyi ti vekiweke ha yona. Tiyiseka leswaku u hlaya tinhloko-mhaka ta 14 leti nga eka xiengetelo u nga si fambisa tidyondzo ha yona.

[Chati/Swifaniso leswi nga eka tluka 12, 13]

SWIN’WANA SWA SWIENDLAKALO SWA LEMBE RA NTIRHO RA 2005

September 1, 2004

October 8: Timbhoni ta Yehovha ti tsarisiwa ximfumo le Armenia.

October 9: Ku nyiketeriwa rhavi ra le Bulgaria.

October 18: Ku sungula tsima ra broxara leyi nge Tshamani Mi Rindzile!

November 6: Ku nyiketeriwa rhavi ra le Mauritius.

November 20: Ku nyike-teriwa rhavi ra le Etiyopiya.

December 4: Ku nyiketeriwa rhavi ra le Nicaragua.

December 25: Ku nyiketeriwa rhavi ra le Zambia.

December 26: Ku tsekatseka ka misava ka mpimo wa 9,0 ekusuhi na Sumatra, le Indonesia, ku vange titsunami leti onheke ku tlula hinkwato leti nga tshama ti va kona.

January 1, 2005

January 8, 2005: Ku nyiketeriwa rhavi ra le Angola.

March 5: Ku nyiketeriwa rhavi ra le Ghana.

March 19: Ku nyiketeriwa rhavi ra le Panama.

March 24: Huvo leyi Tlakukeke ya le Berlin yi lerisa leswaku Timbhoni ta Yehovha ta le Berlin ti fanele ti nyikiwa mpfumelelo wa ku tsarisiwa tanihi vandla leri nga enawini.

April 16: Ku nyiketeriwa rhavi ra le Slovakia.

May 1, 2005

May 16: Ku nyiketeriwa muako wo gandlisela ni yo tshama eka yona le Wallkill, eNew York.

June 25: Ku nyiketeriwa rhavi ra le Guam.

August 31, 2005

[Xifaniso lexi nga eka tluka 20]

Vamakwerhu va karhi va basisa Holo ya Mfumo leyi hlaseriweke hi ndhambi eNiigata Prefecture, le Japani

[Xifaniso lexi nga eka tluka 24]

Vamakwerhu va ri karhi va phakela nhundzu yo phalala eSri Lanka