Swiendlakalo-nkulu Swa N’wexemu
LOKO nkitsikitsi wu ri karhi wu cinisa misava gija, vanhu va Xikwembu va le ku tiphineni hi vutomi etikweni ra moya leri ri yaka ri xonga hakatsongo-tsongo ni ku va ni ndzalo ya swakudya swa moya. (Mal. 3:12, 18) Nhluvuko lowu wu hi tsundzuxa xitshembiso lexi Yesu a xi tshembiseke vadyondzisiwa va yena a nga si tlhandlukela etilweni, u te: “Maswivo, ndzi na n’wina masiku hinkwawo ku fikela emakumu ka mafambiselo ya swilo.”—Mat. 28:20.
Swiendlakalo swa n’wexemu swi nyika vumbhoni byin’wana bya leswaku xitshembiso xa Yesu lexi tiyisaka nhlana xi karhi xa hetiseka enkarhini wa hina. A hi rhangeni hi minkhuvo ya swakudya swa moya leyi malandza ya Yehovha ma tiphineke ha yona eka Mintsombano ya Muganga ya ku “Famba Ni Xikwembu.”
Mintsombano Ya Ku “Famba Ni Xikwembu”
Muprofeta Mikiya u kombise ku hambana exikarhi ka lavo lulama ni lava nga lulamangiki hi ku profeta a ku: “Loko ku ri vanhu hinkwavo, un’wana ni un’wana u ta famba hi vito ra xikwembu xakwe; kambe loko ku ri hina, hi ta famba hi vito ra Yehovha Xikwembu xa hina hilaha ku nga riki na makumu, hi masiku.” (Mik. 4:5) Loko xivulavuri xi ri karhi xi hlamusela nkulumo-nkulu, marito wolawo ma ri kombise kahle langutelo ra vavanuna vo tshembeka va khale, vo kota Enoko na Nowa, lava fambeke ni Xikwembu enkarhini wa mangava. (Gen. 5:22-24; 6:9, 22) Hakunene i lunghelo eka hina ku va hi landzela minkondzo ya vona!
Xana ntsombano wa muganga wu ku tiyisile leswaku u hambeta u “famba hi vito ra Yehovha”? Swi ta va swinene leswaku u pfuxeta tinhla leti u ti tsaleke entsombanweni! Sweswo swi ta endla leswaku u ti tsundzuka kutani u vuyeriwa ngopfu hi leswi u swi tweke entsombanweni.
Minkandziyiso Leyi Humesiweke eNtsombanweni
Xana nsimu ya vandlha ra ka n’wina yi tirhisa tindzimi to tala? Loko swi ri tano, u fanele se u xi tirhisile xibukwana lexintshwa lexi nge Good News for People of All Nations. Xibukwana lexi xi kumeka hi mimpimo yinharhu leyi nga ringaniki, xin’wana xi ni matluka ya 32, xin’wana ya 64 kasi xin’wana xi ni matluka ya 96 naswona xi endleriwe leswaku xi kota ku pfumelelana ni swilaveko swa tiko rin’wana ni rin’wana. Kutani tshama u ri na xona loko u ri ensin’wini. Loko u hlangana ni munhu la vulavulaka ririmi rimbe, tirhisa magoza manharhu lama longoloxiweke eka tluka 2 exibukwanini lexi. Sweswo swi ta ponisa vanhu vo tala!
Hi ku pfumelelana ni ndzimana ya lembe ya 2004 leyi a yi ku—“Tshamani mi rindzile . . . Tshamani mi lunghekile,” xivulavuri lexi gimeteke nongonoko wa siku ra vumbirhi ra ntsombano, xi humese broxara leyi nge Tshamani Mi Rindzile! (Mat. 24:42, 44) Onge broxara leyi yi nga pfuna van’wana lava engetelekeke leswaku va vona nkoka wa ku hatla va teka goza eminkarhini leyi hi hanyaka eka yona ni ku anakanyisisa hi vumundzuku ni hi swiendlakalo leswi hlamarisaka, leswi nga ta humelela. Nakambe, hilaha xivulavuri xi vuleke hakona, onge broxara leyi yi nga hi pfuna leswaku hi kota ku langutana ni mintshikilelo ya vutomi ni swilo leswi hi vilerisaka, leswaku hi nga pfilunganyeki loko hi langutane ni miringo.
Xikolo Xa Valanguteri Va Swifundzha Ni Va Miganga
Emalembeni ya tsevu lama hundzeke, etitlasini ta 13 ta Xikolo xa Valanguteri lava Famba-fambaka, a ku ri ni valanguteri va swifundzha ni va miganga lava tlulaka 600, lava humaka eCanada ni le United States, ku katsa ni va le Alaska ni le Hawaii, xona a xi khomeriwe eWatchtower Educational Center le Patterson, eNew York, le U.S.A. Hi lembe ra ntirho ra 2004, xikolo lexi xi khomiwe ni le marhavini man’wana ya 87. Etitlasini ta 23, a ku ri ni valanguteri lava famba-fambaka, lava humaka ematikweni man’wana. Hi xikombiso, rhavi ra le Jarimani ri rhambe valanguteri lava humaka eAustria, Israyele, Macedonia, Switzerland ni le Turkey. Ra le Portugal ri letele valanguteri lava humaka eLuxembourg ni le swihlaleni swo hlayanyana, xa Azores, Cape Verde, Madeira, São Tomé ni xa Príncipe. Rhavi ra le Kenya ri letele valanguteri lava famba-fambaka va le Etiyopiya, Rwanda, Tanzania, Uganda ni le matikweni man’wana ya la Afrika.
Khoso ya kona yi dyondzisa mintirho hinkwayo leyi endliwaka hi valanguteri va swifundzha ni va miganga. Xikongomelo xa xikolo lexi i ku pfuna vamakwerhu lava, lava tirhaka hi matimba leswaku va va mpfuno lowukulu loko va ri karhi va endla mintirho ya vona yo tala leyi va byarhisiweke yona, leyi katsaka ku dyondzisa emavandlheni ni le tinhlengeletanweni ni ku rhangela entirhweni wo chumayela. (2 Tim. 2:2; 4:5; 1 Pet. 5:2, 3) Khoso leyi yi tlhela yi va khutaza leswaku va tiwundla emoyeni ni ku tirhisa matsalwa hi vuxiyaxiya ni hi vutlhari loko va pfuna van’wana.
Leswi swikolo swo tala swi khomeriwaka erhavini, valanguteri lava famba-fambaka ni vasati va vona va nantswa vutomi bya le Bethele. Ntlawa wun’wana wu tsale wu ku: “Hi vuyeriwile swinene eka ndlela leyi swilo swi endliwaka ha yona eBethele. Hi tiphinile swinene hi lunghiselelo ra ndzimana ya siku mixo wun’wana ni wun’wana, leri katsaka ku hlaya Bibele ni Buku Ya Lembe. Hambileswi a hi ri ni ntirho wo tala wa xikolo, hi swi kotile ni ku hlanganyela eka Dyondzo ya Xihondzo xo Rindza ya ndyangu wa Bethele hi Musumbhunuku nimadyambu naswona hi tiphinile hi vunakulobye lebyinene.”
Siku rin’wana ni rin’wana nindzhenga, vamakwerhu lava va cincana hi ku tirha awara eka Ndzawulo ya Ntirho. Va dyondzisiwa ku khomisana swinene ni rhavi, ku wu landzela hi vukheta nkongomiso lowu va nyikiwaka wona ni ku vika swiviko swa vona hi ndlela leyi kongomeke ni leyi twisisekaka.
Ravuntlhanu wun’wana ni wun’wana, ku ni nkulumo leyi valanguteri va nyikeriwaka yona swin’we ni vasati va vona. Nkulumo leyi yi katsa ku khutaziwa hi tlhelo ra moya, ngopfu-ngopfu yi lunghiseriwe ku tiyisa vamakwerhu lava va xisati lava tshembekeke. Hi xikombiso, va tsundzuxiwa ku hambeta va veka xikombiso lexinene tanihi vavasati lava titsongahataka, naswona va pfuniwa ku seketela vanuna va vona hi ku tirha ni vamakwerhu va xisati emavandlheni lawa va ma endzeleke. Mulanguteri un’wana la famba-fambaka u fanise tinkulumo leti va nyikeriwaka tona vhiki ni vhiki, tanihi “xirhelerisi xo tsokombela xa moya.”
Xikolo lexi xi dzike ngopfu emhakeni yo tirhisa Bibele—ngopfu-ngopfu New World Translation of the Holy Scriptures—With References. Mulanguteri un’wana la famba-fambaka wa le Jarimani u te: “Ndzi tiyimisele ku tirhisa Reference Bible loko ndzi endla dyondzo ya mina n’wini ni le minhlanganweni ya vandlha. Hi kona ndzi swi vonaka leswaku i ya risima.” Makwerhu un’wana loyi a heteke malembe yo tala a ri karhi a endzela mavandlha eBritain u vule leswaku khoso leyi yi sekeriwe eRitweni ra Xikwembu naswona yi antswise vumoya ni madyondziselo ya yena. U tsale a ku: “Ndzi dyondze leswaku hambileswi swi nga swinene ku tirhisa xifaniso lexi fanelekaka loko u nyikela nkulumo, kambe xa nkoka eka hinkwaswo i ku hlaya ni ku hlamusela matsalwa.”
Vamakwerhu vo tala lava veke kona exikolweni lexi, va tsarile va nkhensa leswi va swi dyondzeke exikolweni lexi. Makwerhu wa le United States u te: “Hi ba mandla hi vuyelela eka Yehovha ni nhlengeletano ya yena, hi ku hi khutaza ni ku hi hlomisela swiavelo swa hina. Onge loko hi ri karhi hi tirhela Yehovha, hi nga hambeta hi tlangela tindlela ta yena, hi ti rhandza hi mbilu hinkwayo tinyimpfu ta yena ta risima.” Makwerhu wa le Furwa u tsale a ku: “Khoso leyi yi ndzi pfune leswaku ndzi tirhisana ni vamakwerhu hi rirhandzu ni leswaku hi endla hinkwaswo leswi hi nga swi kotaka leswaku hi tirhela Yehovha hi mbilu yo basa.” Loko makwerhu wa le Portugal a katsakanya ndlela leyi valanguteri vo tala lava famba-fambaka va titwaka ha yona, u te: “Xikolo lexi xi ve ntokoto lowu ndzi vuyeriseke swinene eka pakani ya mina yo tirhela Xikwembu.”
Un’wana la bumabumeleke khoso leyi i muleteri exikolweni lexi. U te: “I lunghelo tlhelo vutihlamuleri lebyikulu ku letela vavanuna lava, lava va nga ta nyika nkongomiso lowu khumbaka vutomi bya vamakwerhu va magidi. Hi tshemba leswaku Yehovha u ta hi katekisa leswaku leswi swi dyondziweke exikolweni lexi swi tshama nkarhi wo leha.”—Yak. 3:1.
Loko lembe ra ntirho ra 2004 ri hela, se a ku leteriwe valanguteri lava famba-fambaka vo tlula 1 700 exikolweni lexi, lexi khomiweke hi tindzimi ta 14. Xikolo lexi xi ta ya emahlweni emarhavini lamakulu hi lembe ra ntirho ra 2005.
Timhaka Ta Swa Le Nawini
Hi May 19, 2004, Huvo leyi Tlakukeke ya Timfanelo ta Vanhu (European Court of Human Rights [ECHR]) ya le Strasbourg eFurwa, yi kandziyise xiboho lexi yi xi endleke eka nandzu lowu a wu khumba va ka Lotter le Bulgaria. Va ka Lotter ku nga Timbhoni ta Yehovha leti a ti ri varhumiwa, va mangalele hulumendhe ehubyeni hileswi yi nga tshama yi ringeta ku va hlongola eBulgaria hikwalaho ka vukhongeri bya vona. Valawuri va le Bulgaria va pfumerile ku riha va ka Lotter hikwalaho ka leswi va va endleke swona nakambe va cince xiboho lexi a va xi endlile xo ala ku va nyika mpfumelelo wo tshama etikweni. Valawuri va tlhele va pfumela ku kandziyisa xihloko lexi xi xi vekaka erivaleni xiyimo xa Timbhoni ta Yehovha ta le Bulgaria, leti hi 1998 ti tsarisiweke tanihi vukhongeri lebyi nga enawini.
Huvo leyi Tlakukeke ya Timfanelo ta Vanhu yi yime na Séraphine Palau-Martínez hi December 16, 2003. Loko ku endliwa xiboho xa kona, vanhu va tsevu handle ka un’we, va pfumerile leswaku tiko ra Furwa ri honise timfanelo ta ndyangu wa makwerhu wa xisati Palau-Martínez. U yise xivilelo xa yena eka Huvo leyi Tlakukeke ya Timfanelo ta Vanhu endzhaku ka loko tihuvo ta swivilelo ta le Furwa ti n’wi tekele lunghelo ra ku kurisa vana va yena, ti vula leswaku i swinene loko “[vana] va nga kurisiwi hi ndlela ya tihanyi ni leyi nga anakanyeliki, leyi vana va Timbhoni ta Yehovha . . . va kurisiwaka ha yona.” Loko Huvo leyi Tlakukeke ya Timfanelo ta Vanhu yi endla xiboho xa yona, yi vule leswaku loko tihuvo ta swivilelo ti endla swiboho swa tona, a ti nga swi kambisisanga hi ku helela swiyimo leswi vana lava va hanyaka eka swona naswona a ti nga ri na mhaka ni ndlela leyi va titwaka ha yona, nakambe xiboho xa tona xi swi veke erivaleni leswaku a ti venga vukhongeri bya makwerhu loyi wa xisati.
Endzhaku ko tiyiselela ku hlaseriwa hi mintshungu leyi kariheke leyi hlohloteriwaka hi vanhu va vukhongeri lava hisekelaka etlhelo, lava van’wana va vona va nga le khotsweni sweswi hi vulavulaka, Timbhoni ta Yehovha etikweni ra Georgia ti kote ku khoma Ntsombano wa Muganga wa ku “Famba Ni Xikwembu,” ti nga kavanyetiwi hi munhu. Nchumu lowu vamakwerhu a va nga wu langutelanga a ku ri ku humesiwa ka Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi ririmi ra le Georgia. Nakambe, hi November 28, 2003, Ndzawulo ya ta Vululami ya le Georgia yi ri tsarise ximfumo rhavi ra kwalaho ra Watch Tower Bible and Tract Society of Pennsylvania. Kutani, hambileswi hi 1998 Huvo leyi Tlakukeke ya le Georgia yi endleke xiboho xo sula vito ra nhlengeletano leyi a yi tirhisiwa hi Timbhoni ta Yehovha hi nkarhi wolowo, sweswi ku ni nhlengeletano leyintshwa leyi tsarisiweke ximfumo naswona sweswo swi tsakise vamakwerhu.
Hambiswiritano, ka ha ri ni milandzu yo hlayanyana eGeorgia, leyi Huvo leyi Tlakukeke ya Timfanelo ta Vanhu yi nga si yi tengaka. Nilokoswiritano, swa tsakisa ku vona leswaku xiyimo lexi vamakwerhu a va ri eka xona xi ya xi antswa.
Ku sukela hi 1990, matshalatshala ya vamakwerhu va le Jarimani yo tsarisa nhlengeletano ya hina ya vukhongeri ehansi ka nawu wa tinhlengeletano ta tiko, ya hundzuke nyuku wa mbyana. Loko Huvo ya Vukongomisi bya Tiko yi vekele Timbhoni ta Yehovha xiyimo xa le henhla swinene eka lexi a xi laveka loko swi ta emhakeni ya ku tshembeka eka “Khezari,” Huvo ya Milawu ya Tiko yi bakanye xiboho xexo, yi vula leswaku a xi le nawini kutani yi lerisa leswaku nandzu lowu wu tlhela wu tshameriwa ehansi. (Mar. 12:17) Hi March 25, 2004, Huvo ya Vukongomisi bya Tiko yi sungule ku tenga nandzu lowu nakambe. Huvo yi kombele leswaku yi nyikiwa rungula leri engetelekeke hi langutelo ra hina mayelana ni ngati, ku kurisa vana, ku susa eku hlanganyeleni ni ku ka hi nga hlanganyeli etimhakeni ta tipolitiki. Muavanyisi la ungameleke nandzu lowu u vule leswaku xihehlo xa hulumendhe xi fanele xi sekeriwa eka vumbhoni lebyi tshembekaka—ku nga rungula leri nga ntiyiso ni matsalwa ya le nawini—ku nga ri eka marito lama nga tshembekiki lama tshahiweke eka Internet ni le ka mapapila lama humaka eka vanhu lava swivangelo swa vona swi kombisaka rivengo.
Eka fomo leyi tirhisiwaka loko vanhu va tsarisela vusocha le Greece ku tirhisiwe vito ro monya loko ku kombeteriwa eka Timbhoni ta Yehovha, eka nxaxamelo wa mavito ya mintlawa ya vukhongeri. Hi ku vona leswaku vito rero ri tirhisiwe hi xikongomelo xo poyila, rhavi ra le Greece ri yise xivilelo eka Ndzawulo ya ta Nyimpi. Hi March 24, 2004, ndzawulo leyi yi tsalele Timbhoni ta Yehovha yi vula leswaku xikongomelo xa yona a ku nga ri ku poyila nileswaku “ana se yi teke goza ro sula vito rero, yi tsala leri faneleke.” Eka tifomo letintshwa ku tsariwe leswaku “Timbhoni ta Yehovha leti nga Vakreste.”
I khale Timbhoni ta Yehovha ti tekiwa tanihi vukhongeri le Peru. Hambiswiritano, hi November 1997, Ndzawulo ya ta Dyondzo yi sungule ku ala swikombelo swa hina swa leswaku minkandziyiso ya hina yi nga hakerisiwi xibalo, yi tlhela yi lava leswaku hi hakela mali yo tala leswaku ku ta ntshunxiwa minkandziyiso leyi a yi pfaleriwe hi va ndzawulo ya mindzilakana. Mhaka leyi yi yisiwe ehubyeni. Hi December 11, 2003, muavanyisi u endle xiboho lexi yimaka ni Timbhoni ta Yehovha. U vule leswaku leswi ndzawulo leyi yi swi endleke “i xihoxo lexikulu, lexi humeke ndleleni ni lexi nga twisisekiki.” U vule leswaku ndlela leyi vatirhela-mfumo va endleke swilo ha yona a yi ri ni “xihlawuhlawu [naswona] a yi ri ni vuntswaka.” Hiloko swiphiqo leswi khumbaka ku rhumeriwa ka tibuku swi tlhantlhiwa hi ku hatlisa.
Tiko leri tifumaka ra Puerto Rico, leri khomisaneke ni ra United States, ri ni nawu lowu pfumelelaka vanhu leswaku makaya ya vona ma sirheleriwa hi tigede, marhangu ni hi varindzi. Swisirhelelo leswi swi kavanyeta ntirho wa hina wo chumayela. Maphorisa ma kale ma sivela vahuweleri eka tin’wana ta tindhawu leti. Ku endliwe matshalatshala yo tlhantlha xiphiqo lexi ehubyeni kambe a ku va nga ni nhlanga leyi balekaka ngati. Sweswi Huvo ya Muganga wa Puerto Rico yi mangaleriwile eHubyeni ya Tiko ra Puerto Rico, leswaku nawu lowu wu suriwa hikuva wu kavanyeta timfanelo to gandzela ni ntshunxeko wo vulavula. Huvo a yi si endla xiboho hi mhaka leyi.
Hi October 28, 2003, Huvo ya Swivilelo ya le Bucharest yi endle Xiboho xa No.1756, lexi sindzisaka mfumo wa le Romania leswaku wu tsarisa Timbhoni ta Yehovha eka nxaxamelo wa vukhongeri lebyi nga fanelangiki byi hakerisiwa xibalo, tanihi leswi ti nga vukhongeri lebyi tivekaka. Hi February 6, 2004, Papila ra le Nawini ra No.112 ri kandziyise nxaxamelo wa “mintlawa ya vukhongeri leyi tivekaka ximfumo eRomania.” Vito ra Timbhoni ta Yehovha na rona ri hoxiwile eka nxaxamelo wolowo.
Hi March 21, 2004, Huvo ya Tiko ya le Seoul eRiphabliki ra Korea yi ntshunxe vamakwerhu vanharhu lava a va hehliwe hi ku ala ku va masocha hikwalaho ka swivangelo swa vukhongeri. I ro sungula etikweni rero leswaku huvo yi ku teka ku ri nawu wa tiko ku ala ku ya enyimpini hikwalaho ka swivangelo swa vukhongeri. Madzana ya vamakwerhu eKorea va le khotsweni hikwalaho ka leswi va tiyimiseleke ku “fula mabanga ya vona ma va swikomu.” (Esa. 2:4) Khombo ra kona, Huvo leyi Tlakukeke ni Huvo leyi Endlaka Milawu a ti swi lavi ku tirhisa Nawu wa le Korea wa ntshunxeko wa vukhongeri, lowu nga ta sirhelela vamakwerhu. Hambiswiritano, ku nga ri khale, vasimeki va milawu va le Korea va ha ku yisa nawu lowu nga ta pfumelela vanhu lava nga laviki ku ya enyimpini leswaku va tirhela mfumo ku ri ni ku ya enyimpini.—Swiv. 21:1.
Xiboho xa Huvo leyi Tlakukeke ya le United States, eka nandzu lowu khumbaka Watchtower . . . ni Ximutana xa Stratton, xa ha pfuna Timbhoni ta Yehovha nisweswi loko ti ri karhi ti endla ntirho wa tona wo chumayela hi yindlu ni yindlu. Hi xikombiso, emugangeni wun’wana wa doroba ra New York, eU.S.A., maphorisa ma hambete ma sindzisa Timbhoni leswaku ti rhanga hi ku humesa maphepha ya mpfumelelo wo chumayela hi yindlu ni yindlu, ti nga si sungula ntirho wa tona. Hambiswiritano, endzhaku ka loko mhaka leyi yi fike etindleveni ta ndhuna ya maphorisa, yi tsale yi ku: “Xiendlo lexi xa maphorisa xi ndzi khomise tingana naswona ndzi kombela ku rivaleriwa leswi mi kavanyetiweke entirhweni wa n’wina.”
Vaaki va doroba ra Illinois va byele xitichi xa maphorisa leswaku xi tivisa varindzi hinkwavo va doroba rero ni vatirhela-mfumo van’wana leswaku hikwalaho ka xiboho lexi endliweke hi Huvo leyi Tlakukeke ya le United States, “a xi kona xilaveko xa leswaku Timbhoni ta Yehovha ti kuma phepha ra mpfumelelo wo famba ti chumayela hi yindlu ni yindlu.” Xileriso lexi xi ye emahlweni xi ku: “A swi kali swi lava leswaku ti hi tivisa loko ti endla ntirho wa tona emugangeni wa hina.”
Hi October 8, 2003, Huvo leyi Tlakukeke ya le Iowa yi pfumelelane na Lester Campbell leswi a aleke ku pomperiwa ngati. Makwerhu Campbell u sindzise leswaku a hakeriwa hileswi a pomperiweke ngati yakwe endzhaku ko endliwa vuhandzuri, hambileswi a a tsarile leswaku a nga lavi ku pomperiwa ngati. Huvo leyitsongo yi yime ni dokodela la n’wi pompeleke ngati yi tlhela yi yima ni xibedlhele. Hambiswiritano, Huvo leyi Tlakukeke ya le Iowa a yi pfumelelananga na xona xiboho xexo kutani yi vula leswaku a swi nga kali swi lava munhu la nga ni vutshila hi ta vutshunguri leswaku a byela Lester Campbell leswaku ku va a pomperiwe ngati hi nkani a ku ri ku honisa ndlela leyi a lavaka ku tshunguriwa ha yona. Huvo yi tlhele yi vula leswaku u fanele a rihiwa.
Ku Yirisiwa Ka Ntirho eMoscow Ni Vuyelo Bya Kona
Hi March 26, 2004, Huvo ya Muganga wa le Golovinsky le Rhaxiya yi endle xiboho xa leswaku ku yirisiwa mintirho hinkwayo ya Timbhoni ta Yehovha eMoscow nileswaku ku suriwa vito ra nhlengeletano ya tona ya le nawini. Ku endliwe xivilelo xa xiboho lexi. Hi June 16, 2004, Huvo ya Doroba ra Moscow yi yime ni xiboho lexi endliweke hi huvo leyi ya muganga, hiloko ntirho wa Timbhoni wu yirisiwa naswona vito ra tona ri suriwa etibukwini ta le nawini. Vamakwerhu va yise xivilelo eka Huvo leyi Tlakukeke ya Timfanelo ta Vanhu, va ri ni ntshembo wa leswaku nandzu wa vona wu ta hatla wu tengiwa hikwalaho ka swiyimo swo tala swo tika leswi va langutanaka na swona hileswi ntirho wa vona wu yirisiweke.
Hambiswiritano, ku yirisiwa loku a ku va hetanga matimba vamakwerhu. Entiyisweni ku endle leswaku vo tala va hiseka ngopfu entirhweni wa Yehovha. Ku hiseka ka vona ku hi tsundzuxa marito ya muapostola Pawulo loko a ri ekhotsweni le Rhoma. U tsale a ku: “Timhaka ta mina a ti endlanga swin’wana handle ka leswaku mahungu lamanene ma ya emahlweni.”—Filp. 1:12.
Hi xikombiso, ku ve ni nhlohlori leyintshwa ya vahuweleri va 136 034 hi March 2004, naswona ku fambisiwe tidyondzo ta Bibele ta 136 903. A ku ri ro sungula endzhaku ka malembe ya nkombo leswaku nhlayo ya tidyondzo ta Bibele yi tlula ya vahuweleri! Nakambe, ku sukela hi March ku ya fika hi June, rhavi ri amukele swikombelo leswi tlulaka 1 000, swa vamakwerhu lava lavaka ku va maphayona ya nkarhi hinkwawo, kutani hi April, ku ve ni nhlohlori leyintshwa ya maphayona ya nkarhi hinkwawo ya 15 489. Rhavi ri ri: “Hilaha ku fanaka, xiboho lexi huvo yi xi endleke hi June 16, xi nyike vamakwerhu matimba yo endla ntirho lowu engetelekeke.” Xi tlhele xi susumeta van’wana—ku katsa ni vavasati lava vanuna va vona va nga riki Timbhoni—leswaku va sungula ku ya eminhlanganweni ya Vukreste.
Ku ni xichudeni xin’wana xa le yunivhesiti, lexi humaka eUnited States, lexi a xi ri eRhaxiya loko ku endliwa xiboho lexi hi June. Rhavi ri ri: “Xi teke riendzo ro hlawuleka ro ya eBethele le makumu ya doroba ra St. Petersburg, leswaku xi ta dyondza leswi engetelekeke hi ta xiyimo lexi. Xi tsake ngopfu leswi xi amukeriweke hi malwandla xi tlhela xi tsakisiwa ni hi ku basa ka miako ya kona.” Mhaka leyi ya leswaku ku ni vanhu lava lavaka ku yirisa Timbhoni ta Yehovha yi xi hlamarisile, kutani xi kombele minkandziyiso ni tivhidiyo leswaku xi ta muka na swona eCalifornia, xi ya komba valeteri va xona lava dyondzisaka tidyondzo ta vukhongeri.
Mintsombano Ya Le Moscow Yi Khomiwa Handle Ko Kavanyetiwa
Ku sukela hi June 11 ku ya ka 13, loko ku sale masiku ma nga ri mangani ntsena leswaku huvo ya swikombelo yi endla xiboho xa yona lexi yimaka ni xa huvo leyitsongo, ku khomiwe Mintsombano yimbirhi ya ku “Famba Ni Xikwembu” eMoscow, wun’wana a wu ri wa Ririmi ra Mavoko ra le Rhaxiya. Eku sunguleni, mintsombano leyi a yi fanele yi khomiwa endzhaku ka loko nandzu wu tengiwile, kambe Komiti ya Rhavi yi swi kotile ku endla leswaku nandzu lowu wu nga tengiwi hi siku leri a wu fanele wu tengiwa ha rona. Vamakwerhu va vule leswaku mintsombano leyi yi fambe kahle nileswaku valawuri va doroba va khomisane na vona. Kahle-kahle, valawuri va maphorisa lama a ma tirha etinyangweni ta xitediyamu va te eka wona: “Loko mi pfulela vanhu leswaku va nghena exitediyamu, mi nga dzahi naswona mi nga rhukani.”
Loko ntlawa wa vamakwerhu va xisati wu huma exitimeleni lexi fambaka hi le hansi ka misava le Moscow, wanuna un’wana u va hehle hi leswaku va yive mali ya yena. U sindzise leswaku va famba na yena exitichini xa maphorisa. Loko a fika kona, u hehle Timbhoni letin’wana hinkwato leswaku ti vanga ntlimbano wa mimovha hi vomu leswaku ti ta tekela vanhu swilo swa vona. Loko phorisa ri angula ri hundzulukele eka vamakwerhu lava va xisati ri ku, “Hi n’wina vamani?”
Va kombetele eka tibeji ta vona ivi va ku, “Hi Timbhoni ta Yehovha, hi ya entsombanweni.”
Hiloko phorisa ri xondzolota wanuna loyi, ivi ri ku: “Timbhoni ta Yehovha a hi makhamba. U fanele u kombela ku rivaleriwa hikuva u ti rhukanile.” Kutani phorisa ri hundzulukela eka vamakwerhu lava, ivi ri ku, “Hatlisani mi ya entsombanweni wa n’wina.” Kambe ri byela wanuna loyi ri ku: “Wena sala laha. Mina na wena a hi si heta.”
Vanhu lava veke kona entsombanweni wolowo lowu a wu khomeriwe exitediyamu, a va ri 21 291, naswona ku khuvuriwe vanhu va 497. Entsombanweni wa ririmi ra mavoko, lowu a wu khomeriwe eHolweni ya Mfumo, a ku ri ni vanhu va 929 kutani ku khuvuriwa vanhu va 19!
Ku Tiyiselela Miringo eHaiti
Hi 2004, vaaki va xihlala xa Haiti va hlaseriwe hi mpfilumpfilu wa tipolitiki, madzolonga, ku kayivela ka swilo swo tihanyisa ni ku tlakuka ka nxavo wa swilo. Makhombo lawa ma nyanyile hi May loko ndhambhi yi dlaye vanhu vo tlula 1 500 kutani yi siya vo tala va nga ri na makaya. A ku na Mbhoni ni yin’we leyi feke kambe to tala ti lahlekeriwe hi nhundzu ya tona ku katsa ni makaya ya tona.
Hambiswiritano, vamakwerhu va tiyisiwe hi vumbhoni lebyi nga lo dlaa, erivaleni bya leswaku Yehovha wa va pfuna hi nkongomiso wa yena swin’we ni hi nkhathalelo wa Huvo leyi Fumaka ni rirhandzu ra vamakwerhu emisaveni hinkwayo. Rirhandzu rero ra xiviri ri kombisiwe hi ku hanana hi swilo leswi vonakaka leswi nyikiweke lava weriweke hi makhombo. Swi le rivaleni leswaku vamakwerhu va kwalaho va phemelane nhloko ya njiya.
Rhavi ra le Haiti a ri tshama ri pfule mahlo leswaku ri ta byela mavandlha leswi ma faneleke ma swi endla. Hi xikombiso, loko madzolonga ma ya ma nyanya le ntsindza wa Port-au-Prince, Komiti ya Rhavi yi lume vakulu ndleve leswaku minhlangano leyi a va ta yi khoma hi Sonto, February 29, va yi khoma hi Mugqivela. Kunene xolexo xi ve xiboho xa vutlhari hikuva Sonto yoleyo, presidente wa Haiti loyi a a khome xo tika, u boheke ku balekela etikweni rin’wana. Xiviko xa phepha-hungu xi ri: “Hi nkarhi wolowo wa nkitsikitsi, a ku twala swibamu ntsindza hinkwawo.” Rhavi ri ri: “A nga kona ni un’we loyi a a anakanya leswaku ku ta kala ku endleka nchumu wo fana ni lowu. A swi nga ta koteka nikatsongo ku ya eminhlanganweni Sonto yoleyo. Hi nkhensa Yehovha leswi a sirheleleke vamakwerhu.”
Hi nkarhi wolowo wo tika, maphorisa ni mavuthu ya vaxandzuki swin’we ni vaphangi, hinkwavo va pfale mapatu, hiloko mfumo wu lerisa leswaku loko ri kala ri pela, ku nga ha famba-fambi munhu eswitarateni. Kambe, hambiloko ku nga si siveriwa vanhu ku famba-fambaka loko dyambu ri perile, mavandlha ana se a ma cince minkarhi ya minhlangano ya wona leswaku hinkwavo lava teke eminhlanganweni va kota ku muka ka ha vona. Mavandlha yo tala ma vike leswaku ku ve ni ku andza ka nhlayo ya lava vaka kona eminhlanganweni!
Vamakwerhu na vona a va tshama va khomekile hi nsimu, sweswo swi tsakise vaakelani va vona. Van’wana va te: “N’wina Timbhoni loko hi mi vona mi ri karhi mi chumayela tanihi ntolovelo swi hi tiyisa nhlana.” A swi kanakanisi leswaku vahuweleri a va ri ni vuxiyaxiya naswona a va byelana loko ku ri ni tindhawu leti nga riki na khombo ku chumayela eka tona.
Ku Tiveka Ka Hina Tanihi Vakreste Ka Hi Sirhelela
Rhavi ra le Haiti ri tsale ri ku: “Vamakwerhu vo tala va pone ku biwa ni ku tekeriwa swilo swa vona hikwalaho ka leswi va tivekaka emigangeni leyi va tshamaka eka yona ni leswi va nga hlanganyeliki etimhakeni ta tipolitiki.” Hi xikombiso, mpatswa wun’wana wa varhumiwa wu yimisiwe kanharhu epatwini hi swigevenga leswi hlomeke. Mpatswa lowu wu endle swilo swimbirhi: Wu vule leswaku i Timbhoni ta Yehovha, naswona wu khongele hi mbilu wu tlhela wu khongela swi twala. Eka swiendlakalo sweswo swinharhu loko wu yimisiwa epatwini, a ku va ni loyi a wu vulavulelaka, a vula leswaku Timbhoni ta Yehovha i vanhu lavanene lava nga hlanganyeliki eka swa tipolitiki. Mpatswa lowu wu fike ekaya wu hlayisekile.
Swirho swa ndyangu wa Bethele loko swi yimisiwe hi mintlawa leyi hlomeke, na swona swi vule leswaku i Timbhoni swi tlhela swi khongela kutani swi pona ku fana ni varhumiwa. Eka xiendlakalo xin’wana, xigevenga xi te: “Fambani hi ku rhula, mi hi khongerisa!” Makwerhu un’wana wa le Bethele u yimisiwe hi maphorisa ma lava ku secha swibamu emovheni wa yena. Makwerhu loyi u byele maphorisa a ku: “Swibamu leswi ndzi nga na swona i Bibele ni timagazini ta Xihondzo xo Rindza na Xalamuka! ntsena.” Hiloko phorisa ri n’wayitela ri n’wi koweta hi voko leswaku a famba. Siku rin’wana maphorisa ma vone movha wa yena wa ha ta hi le kule kutani ma n’wi nyizela a hundza.
Rhavi ri vike leswaku etin’hwetini leti landzeleke, swilo swi tshamisekilenyana. Kambe a swi si tshamiseka hi ku helela. Hikwalaho, vamakwerhu va tshama va pfule mahlo.
Ku Antswisiwa Ka Vugandliselo Bya Le United States
Huvo leyi Fumaka yi lerise leswaku ku sukela hi 2002, ntirho wo gandlisa wu endliwa ematikweni-nkulu ya ntlhanu—ku nga Afrika, Amerika Dzonga, Amerika N’walungu, Asia ni le Yuropa. Leswi swi endle leswaku miako ya marhavi yi tirhisiwa hi xitalo, ku katsa ni ya le United States, leyi sweswi yi nga ha riki na ntirho wo tala.
Hi 2004, ntirho hinkwawo lowu a wu endliwa eUnited States wa ku gandlisa, ku endla tibuku ni ku ti rhumela, wu sungurile eWallkill, le New York. Pulani leyi tolovelekeke ni xivangelo xo aka, swi yisiwe eka ndzawulo ya tipulani ta doroba hi August 6, 2002. Hiloko hi September 3 vaaki va tivisiwa hi kungu leri, ivi endzhaku ka sweswo va nyikiwa mpfumelelo wo hetelela. Eka nhlangano wa lembe ni lembe wa Watch Tower Bible and Tract Society of Pennsylvania hi October 5, 2002, ku endliwe xitiviso xa leswaku Huvo leyi Fumaka yi va nyike mpfumelelo wo endla ntirho lowu faneleke wu endliwa eWallkill. Ku odiwe michini yimbirhi leyintshwa yo gandlisa ya MAN Roland Lithoman ivi ku hleriwa leswaku ku akiwa muako lowu yi nga ta nghenisiwa eka wona, naswona a ku languteriwe leswaku wu va wu herile hi February 2004.
Xana a swi ta kotekisa ku yini ku heta ntirho lowukulu swonghasi hi tin’hweti ta 14 ntsena? Vamakwerhu va veke hinkwaswo emavokweni ya Yehovha. Kunene a nga va khomisanga tingana. Ntirho wu sunguriwe hi February 2003, kutani loko ku fika September se a wu herile muako wa vugandliselo lowu a wu engeteriwa. Michini yinharhu yo sungula yo gandlisa leyi a yi ri eWallkill yi tlhantlhiwile kutani yi rhurhiseriwa emuakweni lowuntshwa hi December. Eka michini yimbirhi leyintshwa yo gandlisa, wo sungula wu fike hi April 2004 kutani lowun’wana wu fika hi May, kasi wun’wana wu sungule ku tirha hi June ivi lowun’wana wu sungula hi July. Hi September michini hinkwayo se a yi tirha kahle.
Enkarhini lowu hundzeke, muchini wo hlanganisa tibuku a wu teka swithezi swa 11 emiakweni yinharhu ya le Adams Street le Brooklyn. Kambe sweswi wu vekiwe eka xithezi xin’we le Wallkill naswona wu teke ndhawu leyi tlulakanyana hafu ya ndhawu leyo sungula. Hi July 2004 vamakwerhu va sungule ku endla tibuku ta xifunengeto xo olova. Loko n’hweti yoleyo yi ya eku heleni, muchini lowuntshwa, lowu leheke timitara ta 400 naswona wu nga ni swiyenge swa 33 leswi nga ni mabandhi ya 70 yo fambisa tibuku, wu sungule ku humesa tibuku ta swifunengeto swo tsindziyela. Matluka ya tibuku ma hoxiwa emasungulweni ya muchini lowu ivi wona wu tiendlela ntirho hinkwawo. Muchini lowu namarhetaka swifunengeto swo tsindziyela wu kota ku endla tibuku ta 120 hi minete naswona wu tirhisiwa ntsena hi vanhu va 25—sweswo swi endle leswaku ku hunguteka vatirhi vo tala. Muchini lowu hinkwawo wo rhunga tibuku wu sungule ku tirha kahle hi October 2004.
Ku sukela hi November 2004, Ndzawulo yo Rhumela Tibuku ya le Wallkill yi sungule ku tirhisa endlelo lerintshwa ro tirhana ni swikombelo swa mavandlha, leri tirhisaka fambiselo lerintshwa ra khompyuta, leri nga laviki ndhawu leyikulu loko yi pimanisiwa ni leyi a yi tirhisiwa eBrooklyn. Khompyuta yi pima swilo leswi komberiweke hi vandlha ivi yi hlawula bokisi leri ringaneke ndzhwalo wolowo. Ku ni bandhi leri leheke timitara ta 800, leri fambisaka bokisi ha rin’we ri ya endhawini yo hlawuleka, laha ri nga ta fika ri lunghiseleriwa ku rhumeriwa. Ku ni ndhawu leyi lava landzaka tibuku ta le mavandlheni va fikaka va yimisa movha ivi va teka tibuku va famba.
Va nkhensiwa hi mbilu hinkwayo vamakwerhu lava hoxeke xandla entirhweni lowu. Vona va katsa swirho swa Bethele ni vatirhi va ku tirhandzela va nkarhinyana, mintlawa ya vamakwerhu lava kongomisiwaka hi Tikomiti to Aka ta Swifundzha swa madoroba-nkulu ya ntlhanu ya le Amerika, vamakwerhu lava nyikeleke hi switirho swa vona ni nhundzu leyi humaka emabindzwini ya vona, hi ku tirhandzela. Hi ta va hi endla xihoxo loko ho rivala vanhu vo tala lava nyikeleke hi timali ta vona ‘va tsakile.’—2 Kor. 9:7, 11.
Ku Cinca Ka Swilo eBrooklyn
Ku rhurhisiwa ka michini yo gandlisa, yo rhunga tibuku ni ndzawulo yo rhumela tibuku swi yisiwa eWallkill, ku endle leswaku swilo swi cinca eBethele ya le Brooklyn. Xiendlakalo lexi nga rivalekiki ni lexi ririseke van’wana xi endleke hi April 29, 2004. Madyambu wolawo, Max Larson loyi a heteke malembe yo tlula 60 a ri mulanguteri wa vugandliselo, u time muchini wo hetelela eBrooklyn ku ri karhi ku tsakiwile kasi van’wana va ri karhi va xiririka mihloti, koloko ku ve ku hela ka vugandliselo lebyi tekeke malembe ya 84 eBrooklyn. Muchini wo rhunga tibuku wu sale wu tirhanyana swa mavhiki ma nga ri mangani.
Huvo leyi Fumaka yi swi xiyile leswaku ku ta sala ndhawu leyikulu leyi nga tirhiki nchumu eBrooklyn, hiloko hi June 2003, yi tivisa leswaku swi nga endleka ku xavisiwa muako wa le 360 Furman Street. Maphepha hinkwawo yo wu xavisa ma sayiniwe hi Ravuntlhanu, June 18, 2004. Ndhawu yo hlantswela, tihofisi, tindhawu to lunghisela swilo eka tona, leti a ti ri emuakweni lowu nga swikwere-mitara swa 93 000, swi karhi swi rhurhiseriwa endhawini leyi nga sala le muakweni wa 117 Adams Street.
Ku engetela kwalaho, muako lowu nga le 107 Columbia Heights wu le ku pfuxetiweni. Ku hleriwe leswaku makamara yo tshama eka wona ma va ma herile loko lembe ra 2005 ri ya eku heleni, kasi muako hinkwawo wu fanele wu va wu herile hi September 2006. Muako lowu pfuxetiweke wu ta rhurhela swirho swo tlula 300 swa ndyangu wa Bethele naswona wu ta va ni xitolo, Holo ya Mfumo, layiburari, ndhawu yo amukela vaendzi, tihofisi, ndhawu yo hlantswela ni xivava lexintshwa lexi nga ni ntanga.
Ku Tilunghiselela Ku Andza eMisaveni Hinkwayo
Rhavi ra le Afrika Dzonga, Brazil, Britain, Japani ni ra le Mexico ma kume michini leyintshwa yo gandlisa ya MAN Roland Lithoman. Rhavi ra le Britain ri ve ro sungula ku hlanganisa muchini lowu lowuntshwa lowu fikeke hi July 2003 kutani wu sungula ku tirha hi October. Wu kandziyisa timagazini ta 750 000 hi siku—loko ku tirhiwa tixifi ku kandziyisiwa timagazini ta 1,5 wa timiliyoni—leswi vulaka leswaku wu lave ku yi tlula kanharhu nhlayo ya leti a ti kandziyisiwa hi muchini lowa khale.
Muchini lowu lowuntshwa wu nga swi kota ku kandziyisa Bibele ni tibuku tin’wana. Hi xikombiso, rhavi ra la Afrika Dzonga se ri kandziyise swiyenge swa Bibele ya Vuhundzuluxeri Bya Misava Leyintshwa hi Xisuthu, ku nga ririmi ra la Afrika Dzonga, ku lo sala ntsena leswaku swi rhungiwa. Rhavi ra le Japani ri vula leswaku enkarhini lowu hundzeke loko ri rhange hi ku kandziyisa tibuku letitsongo, a swi ri teka siku hinkwaro leswaku ri lunghiselela ku kandziyisa tibuku letikulu. Sweswi se swi teka awara ntsena. Nakambe, se swi teka tiawara ta ntlhanu ntsena ku kandziyisa swiphephana swa miliyoni leswi eku sunguleni a swi teka masiku ya khume ku swi kandziyisa. Eka tin’hweti to sungula loko muchini wa le Japani wu sungule ku tirha, wu kandziyise swiphephana swa 12 wa timiliyoni; timagazini ni tibroxara ta 12 wa timiliyoni; tibuku ta 240 000; ni Tibibele ta 48 000.
Ku ni michini yin’wana leyintshwa ya othomethiki, leyi tsemaka matlhelo manharhu ya minkandziyiso, yi yi hlayela, yi yi paka, yi yi hoxa mimfungho ya lomu yi yaka kona yi tlhela yi yi phutsela. Mazenge lama tsariweke leswi nga ta kandziyisiwa hi muchini, se ma tirhisiwa kahle hileswi se ku tirhisiwaka fambiselo ra khompyuta leri kandziyisaka marito hi ku kongoma emazengeni lama nghenisiwaka emuchinini. Hikwalaho, fambiselo leri ri endla leswaku swi nga ha laveki leswaku ku rhanga ku endliwa swifaniso swa leswi swi nga ta kandziyisiwa. Rhavi ra le Britain ri vula leswaku ku antswisiwa loku hinkwako ku endle leswaku ku kandziyisiwa minkandziyiso yo tala naswona ku hungutiwa nhlayo ya vatirhi.
Ku Ya Leteriwa eJarimani
Vamakwerhu lava humaka emarhavini ya tsevu va ye ekhampanini ya ka MAN Roland le Jarimani va ya leteriwa. Leswi valeteri va tshameke va letela vanhu lava kandziyisaka, lava nga riki Timbhoni, a va ehleketa leswaku vamakwerhu a va nge wu teki wu ri wa nkoka ndzetelo wa kona. Hambiswiritano, va hlamarile va tlhela va tsaka loko va vona langutelo lerinene leri vamakwerhu a va ri na rona. Entiyisweni, Timbhoni ti kombele ku sungula ka ha ri mixo swinene naswona ti tirha nkarhi wo leha leswaku ti ta vuyeriwa swinene hi khoso ya tona.
Nchumu wun’wana lowu a wu ri ntlhontlho i ririmi hikuva lava teke eku leteriweni a va ta dyondzisiwa hi Xinghezi naswona tibuku leti hlamuselaka matirhelo ya muchini a ti tsariwe hi Xinghezi. Hi ku tiva leswaku swi nga va tikela, vamakwerhu va le Japani va sungule ku antswisa Xinghezi xa vona va nga si ya eJarimani. Van’wana va kale va ya hlanganyela swa xinkarhana ni mavandlha lama tirhisaka Xinghezi.
Swirho Swa Bethele Swi Chumayela Hi Rixaladza
Loko michini leyi yo kandziyisa yi fika emarhavini, vanjhiniyara va ka MAN va yile va ya yi hlanganisa, va ri karhi va pfuniwa hi swirho swa ndyangu wa Bethele. Emarhavini hinkwawo ya tsevu, mahanyelo lamanene ya le Bethele ni vunakulobye lebyinene, swi ve ni vuyelo lebyinene eka vatirhi lava nga riki Timbhoni. Munjhiniyara loyi a a tirha ku hlanganisa muchini wa le London u byele vamakwerhu a ku: “Tolo loko ndzi fika ekaya, ndzi vone muakelani wa mina a ri entangeni wakwe. A ndzi nga n’wi rhandzi kambe tolo hi hete timinete ta 20 hi ri karhi hi dya mabulo kutani ndzi kuma leswaku u na vumunhu.” Munjhiniyara loyi u tlhele a vula leswaku nsati wa yena u swi xiyile leswaku mahanyelo ya yena ma cincile. Nsati wa yena u te eka yena: “U na vunghana naswona se wa n’wayitela, u pfuxela ni vanhu.”
U hlamule nsati a ku: “Ndzi hete mavhiki ya tsevu ndzi tirha ni Timbhoni. Naswona emavhikini mambirhi lama hundzeke, a ku si huma rito ni rin’we ra nhlambha enon’wini wa mina. Entiyisweni, ndzi tshemba leswaku a ndzi nge he pfuki ndzi rhukanile.”
Loko muchini wa rhavi ra le London se wu hlanganisiwile, mulanguteri wa va ka MAN u bele rhavi riqingho a nkhensa vamakwerhu hi ndlela leyi va khomeke vatirhi va vona ha yona. U vule leswaku swilo hinkwaswo swi fambe kahle.
Marhavi man’wana ma hlele leswaku ku va ni ndhawu yo dyela ekusuhi ni laha muchini wu hlanganisiwaka kona. Vo tala lava hirhiweke loko muchini wu ri karhi wu hlanganisiwa, a ku ri ro sungula va phameriwa hi vanhu lava ambaleke kahle, ngopfu-ngopfu eka lava va nga riki Timbhoni. Munjhiniyara wa le Japani a a nga si tshama a vona ndhawu ya vugandliselo leyi baseke ni ku hleleka ku fana ni le rhavini. U te: “Emisaveni hinkwayo, a yi kona ndhawu yo tirhela eka yona yo fana ni leyi.” U tlhele a tlangela ku tshembeka ka vamakwerhu. A ku kona laha a nga tshama a siya mathulusi ya yena ma ri woxe loko a ri entirhweni, a ri ni ntshembo wa leswaku ma nge yiviwi hi munhu. Leswi a a lava ku dyondza swo tala hi Timbhoni ta Yehovha, u amukele minkandziyiso yo hlayanyana a tlhela a valanga miako ya rhavi.
Vamakwerhu va le Mexico va rhambe vanjhiniyara va ka MAN eXitsundzuxweni. Mune wa vona va pfumerile. Hambiswiritano, a va nga ri na swiambalo leswi faneleke. Leswi vanjhiniyara lava a va lava ku xava tisudu, makwerhu wa le Bethele u va helekete exitolo va ya ti xava. Vamakwerhu va va nyike Tibibele va tlhela va va pfuna ku pfula matsalwa loko nkulumo ya Xitsundzuxo yi ri karhi yi ya emahlweni. Loko Xitsundzuxo xi hela, vanjhiniyara lava va teke swifaniso naswona ndlela leyi a va hleka ha yona, yi siye vo tala evandlheni va anakanya leswaku na vona i swirho swa ndyangu wa Bethele ya le Jarimani.
Emarhavini hinkwawo, vanhu lava a va hirhiwile ni lava a ku xaviwa swilo eka vona, va chumayeriwe hi rixaladza. Un’wana wa lava a va hirhiwe erhavini ra le United States u tsale a ku: “Lexi ndzi tsakiseke ngopfu i ndlela leyi nhlengeletano ya n’wina yi hlelekeke ha yona, ngopfu-ngopfu vanhu va n’wina. A ndzi si tshama ndzi tiphina hi ku tirha emuakweni wo karhi ku fana ni loko ndzi tirha emuakweni wa n’wina. Nhlengeletano ya n’wina yi ndzi endla ndzi va ni ntshembo eka leswi nga ta endleka eka vanhu enkarhini lowu taka. Loko ku hiseka ni ku khathalela a swi xavisiwa, ndzi tshemba leswaku vanhu hinkwavo a va ta swi xava eka n’wina.”
Wanuna loyi ku xaviweke tiphayiphi to fambisa moya ta muchini lowuntshwa le Mexico, u hlamarisiwe hi ndlela leyi ku rhuleke ha yona erhavini. U vutise swivutiso swo tala kutani sweswi yena ni ndyangu wa yena va dyondza Bibele naswona va endla nhluvuko lowunene. Foromani ya vatirhi van’wana va kwalaho yi endle xikombelo lexi nga tolovelekangiki. Yi te: “Hi ntolovelo vanhu va hi nkhensa hi swo karhi hikwalaho ka ntirho lowu hi va endleleke wona. Hi kombela mi nyika un’wana ni un’wana wa hina Bibele! Hi ku ya hi leswi ndzi swi voneke laha, ndzi vona onge vutivi bya Bibele i bya risima swinene ku tlula mali.”
Ku Nyiketeriwa Ka Rhavi Ra Le Indiya
Rhavi ra le Indiya ri tsale ri ku: “Siku leri ku nga khale ri yimeriwile ri kale ri fika hi December 7, 2003. I siku leri rhavi ra hina lerintshwa, leri akiweke eBangalore le dzonga-xikarhi wa Indiya ri nyiketeriweke ha rona.”
Muako lowu wa tihekitara ta 17, lowu nga swikwere-mitara swa 30 000 wu fana ni xidorobana. I rhavi ro sungula lerikulu emisaveni, leri akiweke hi kontraka ya vanhu lava nga riki Timbhoni, naswona yi ni ndhawu yo basisa mati yo nwa, muchini wo basisa mati lama tirhisiweke ni janareta. Wu ni tihofisi ta 122, leti 80 wa tona ti nga ta vahundzuluxeri; nakambe wu ni Holo ya Mfumo leyi kokaka mahlo; naswona wu ni vugandliselo lebyikulu. Wu ni miako yinharhu yo tshama eka yona leyi nga ni makamara ya kahle, ndhawu yo hlantswela, ndhawu yo dyela ni khixi leri nga ni xin’wana ni xin’wana lexi lavekaka. Muako hinkwawo, lowu vunyingi bya nhundzu yo aka yi xaviweke etikweni rero, wu teke malembe mambirhi ku wu heta.
Ntirho wa Mfumo wu sungule hi 1905 eIndiya. Sweswi ku hundzuluxeriwa ku tlhela ku kandziyisiwa hi tindzimi ta 26 ta le Indiya. Loko rhavi leri ri nyiketeriwa, varhumiwa lava tshameke va tirha eIndiya va rungule mintokoto leyi tiyisaka nhlana, naswona nkulumo yi nyikeriwe hi Stephen Lett, wa Huvo leyi Fumaka. Ku ve ni vanhu va 2 933 ku katsa ni vaendzi va 150 lava humaka ematikweni mambe ya 25.
Ku Nyiketeriwa Ka Rhavi Ra Le Philippine
“Hi lava ku aka miako leyi fanaka ni ya Watch Tower!” Wolawo i marito lama vuriweke hi vaaki va le Manila, lava nga riki Timbhoni, loko va vona miako yo saseka ya rhavi ra le Philippine. Entiyisweni, loko vahaxi va mahungu ya thelevhixini va ri karhi va hlengeleta rungula ra milawu ya miako, va endzele munjhiniyara wa doroba, kutani a ku eka vona: “Loko mi lava ku vona ndhawu leyi ku landzeriwaka milawu hinkwayo yo aka, fambani emuakweni wa Watch Tower.”
Vamakwerhu va ake muako lowuntshwa wo tshama eka wona, wa swithezi swa khume ni miako yin’wana ya le tlhelo kutani va pfuxeta muako lowu akiweke hi 1991 wa swithezi swa khume. Ha yini a ku laveka muako wun’wana? Ku sukela hi 1991 ku ya fika hi 2003, nhlayo ya vahuweleri yi andze hi vahuweleri va 34 000, kutani sweswo swi endla leswaku ku va ni nhlohlorhi leyintshwa ya vahuweleri va Mfumo vo tlula 144 000!
Muako lowuntshwa wu nyiketeriwe hi November 1, 2003. Lava a va ri kona Mugqivela wolowo nimixo laha dyambu a ri xe kahle, a ku ri swirho swa ndyangu wa Bethele, khale ka varhumiwa ni vaendzi van’wana lava humaka ematikweni ya 13 ya le ntsungeni wa malwandle, swin’we ni vamakwerhu va le Philippine vo tlula 2 000, hinkwavo loko va helerile a va ri 2 540. Stephen Lett u nyikele nkulumo leyi nga ni nhloko-mhaka leyi nge “Ku Tlangela Miako Ya Yehovha Ya Vugandzeri Ya Nkarhi Lowu Hundzeke Ni Ya Sweswi.” Hi siku leri tlhandlamaka, nongonoko wo hlawuleka eHolweni ya Tinhlengeletano ya le Metro Manila wu yingiseriwe hi ntshungu wa maphayona ya kwalaho swin’we ni vakulu ni vasati va vona, hinkwavo loko va helerile a va ri 8 151.
Emisaveni hinkwayo vatirheli lava hlawuriweke lava ringanaka 20 092 va tirha emarhavini lawa. Hinkwavo i swirho leswi nga ehansi ka Xiboho xa Malandza yo Hlawuleka ya Nkarhi Hinkwawo ya Timbhoni ta Yehovha eMisaveni Hinkwayo.
[Bokisi leri nga eka tluka 21, 22]
Ku Tlhakisiwa Dyambu Ri Lo Hosi!
Hi Ravuntlhanu ninhlikanhi, March 19, 2004, Carl, Mbhoni leyi nga ni malembe ya 20 hi vukhale, a a ri karhi a famba exitarateni lexi nga ni vanhu vo tala ePétionville, le Haiti. Hiloko hi xitshuketa, vavanuna lava hlomeke lava a va ambale swiambalo swa ntima va n’wi sindzisa ku khandziya endzeni ka vhene, ivi va n’wi funengeta nhloko kutani va chayela hi rivilo leri tsuvulaka ni misisi. Carl u ri:
Endzhaku ka loko hi chike evheneni, ndzi yisiwe ekamareni leri a ku ri ni van’wana lava khomiweke, lava swi tikombaka onge a ku ri swichudeni swa le yunivhesiti leswi a swi hehliwa hi ku famba exitarateni swi kombisa ku vilela hi timhaka ta tipolitiki. Lava va hi khomeke va hlundzuke ngopfu lerova va sungula ku duvula kutani va dlaya un’wana loyi a hi khomiwe na yena. Ndzi twe milenge ya mina yi khumba nhloko ya yena. Hiloko va sungula ku ndzi tlhava hi swivutiso va ri karhi va ndzi xungeta. Hikwalaho ko pfilunganyeka, va ndzi bile kutani va ndzi lahlela ehenhla ka ntsumbu lowu a wu ri emilengeni ya mina.
Murhangeri wa vona u te: “Hlamula swivutiso swa hina!”
Ndzi angule ndzi ku: “A ndzi tivi nchumu hi swa tipolitiki.”
Hiloko a tlatlarhuka a ku: “Kutani ndzi ta ku dlaya!”
Hiloko ndzi n’wi kombela ndzi ku: “U nga si ndzi dlaya, ndzi kombela u ndzi pfumelela ndzi khongela Yehovha, Xikwembu xa mina, ndzi kombela leswaku a pfuna vatswari va mina ni tindzisana ta mina hikuva a va nge he ndzi voni.”
Hiloko a ndzi nghena enon’wini a ku: “Swi endle hi ku hatlisa! A ndzi na nkarhi wa wena.”
Loko ndzi ri karhi ndzi khongela hi rito leri tlakukeke, wanuna loyi u humile ekamareni rero. Loko a vuya, ndzi tibyele leswi, ‘Carl, swi herile ha wena. Lunghekela ku fa.’ Hambiswiritano ndzi hlamarile swinene.
Wanuna loyi u ndzi vutise a ku: “Xana hi wena Carl wa ka . . . ?”
Hiloko ndzi ku: “Ina,” ndzi ri karhi ndzi hlamarile leswaku u ri tive njhani vito ra mina.
U ye emahlweni a ndzi hlamusela leswaku ndzi tshame ndzi n’wi khandziyisa ko hlayanyana emovheni wa mina, kutani u ta ndzi tshika hileswi a ndzi tivaka. Swi tikomba onge u ndzi lemuke hikwalaho ka swilo leswi ndzi swi vuleke exikhongelweni, hambileswi xikandza xa mina a xi funengetiwile. U tlhele a humela ehandle laha a veke ni bulo ro hisa ni vanghana vakwe. Eku heteleleni, un’wana u ndzi layiche evhenini, ivi a chayela laha a heteleleke hi ku ndzi susumeta ndzi ya ku puu, le patwini. A ku ri maxangu lama tsemaka nhlana lama ri tiyiseke swinene ripfumelo ra mina eka Yehovha ni le ka matimba ya xikhongelo.
[Chati/Swifaniso leswi nga eka tluka 12, 13]
SWIN’WANA SWA SWIENDLAKALO SWA LEMBE RA NTIRHO RA 2004
September 1, 2003
September: Hi lembe ra ntirho ra 2004, ku khomiwa Xikolo xa Valanguteri va Swifundzha ni va Miganga emarhavini ya 88.
October: Rhavi ra le Britain ri sungula ku kandziyisa hi muchini lowu vitaniwaka MAN Roland Lithoman.
October 28: Huvo ya le Romania yi endla xiboho xo katsa Timbhoni ta Yehovha eka nxaxamelo wa vukhongeri lebyi amukelekaka, lebyi nga fanelangiki byi hakerisiwa swibalo.
November 1: Ku nyiketeriwa rhavi ra le swihlaleni swa Philippine.
November 28: Ndzawulo ya Vululami ya le Georgia yi tsarisa rhavi ra kwalaho ra Timbhoni ta Yehovha.
December 7: Ku nyiketeriwa rhavi ra le Indiya.
January 1, 2004
March 26: Huvo ya le Golovinsky yi endla xiboho xo yirisa Timbhoni ta Yehovha eMoscow. Ku endliwa xivilelo leswaku nandzu lowu wu tlhela wu tshameriwa ehansi.
April: Tiko ra Rhaxiya ri va ni nhlohlorhi leyintshwa ya maphayona ya nkarhi hinkwawo ya 15 489.
April 29: Ku pfariwa vugandliselo bya le Brooklyn endzhaku ka loko ku hele malembe ya 84 ku ri karhi ku kandziyisiwa. Vugandliselo lebyintshwa byi le Wallkill.
May 1, 2004
May: Hi nkarhi wa ku himpfilitana ka swa tipolitiki, tindhambhi leti nga ni khombo ti hlasele tiko ra Haiti. Ku hava vamakwerhu lava dlayiweke.
June 16: Huvo ya Doroba ya le Moscow yi seketela xiboho lexi endliweke hi March 26. Timbhoni ti yirisiwa ximfumo naswona ku suriwa vito ra nhlengeletano ya tona. Ku endliwa xivilelo xa leswaku nandzu lowu wu tlhela wu tshameriwa ehansi eka ECHR (European Court of Human Rights [Huvo ya le Yuropa ya Timfanelo ta Vanhu]).
August 31, 2004
[Xifaniso lexi nga eka tluka 11]
Ku humesiwa ka “Vuhundzuluxeri Bya Misava Leyintshwa Bya Matsalwa Ya Vukreste Ya Xigriki” hi ririmi ra le Georgia
[Swifaniso leswi nga eka tluka 27]
Vamakwerhu va le ku tirheni eka wun’wana wa michini leyintshwa yo gandlisa ya MAN eWallkill, le New York eU.S.A.
[Xifaniso lexi nga eka tluka 29]
Rhavi lera ha ku nyiketeriwaka eBangalore, le Indiya
[Xifaniso lexi nga eka tluka 30]
Rhavi ra le Philippine leri kurisiweke