Swikhongelo Leswi Nga Ta Hlamuriwa Hakunene

KU NA swikhongelo leswi handle ko kanakana swi nga ta hlamuriwa. Mongo wa swona wu vumbiwa hi xikombiso lexi Yesu Kriste a xi nyikeke vadyondzisiwa vakwe loko a te: “N’wina ke, khongelani hi mukhuva lowu, mi ku: ‘Tata wa hina la nge matilweni, vito ra wena a ri hlawuleke; a ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.’”—Matewu 6:9-13.

Marito wolawo ya xikhongelo xa Yesu xa xikombiso ma phindha-phindhiwe hi minkarhi ya timiliyoni to tala swinene. Kambe Kriste a a nga langutelanga leswaku valandzeri vakwe va nhlokohata kunene xikhongelo xo tano, swikombelo swa vona leswi phofulaka marito yo fana na wona swa hlamuriwa hakunene. (Matewu 6:7, 8) Kutani ke, swi vula yini ku hlawulekisa vito ra Xikwembu? Hikwalaho ka yini hi khongelela leswaku Mfumo wa xona wu ta? Naswona ha yini hi kombela leswaku ku endliwa ku rhandza ka Xikwembu?

“Vito Ra Wena A Ri Hlawuleke”

Yehova, ‘la Tlakukeke Swinene ehenhla ka misava hinkwayo,’ hi Yena loyi Yesu a n’wi vitanaka “Tata wa hina la nge matilweni.” (Psalma 83:18) Xikwembu xi “veleke” Vaisrayele hi ku va ntshunxa evuhlongeni bya Vaegipta ni ku endla vuxaka bya ntwanano na vona. (Deuteronoma 32:6, 18; Eksoda 4:22; Esaya 63:16) Namuntlha, Vakriste lava totiweke va rhandza Yehova tanihi Tata wa vona. (Varhoma 8:15) Ni vanghana va vona, lava nga ni ntshembo wa laha misaveni, va khongela Yehova Xikwembu tanihi Tata wa vona.—Yohane 10:16; Nhlavutelo 7:1-9.

Kambe hikwalaho ka yini hi khongelela leswaku vito ra Xikwembu ri hlawulekisiwa? Phela, ku sukela eku xandzukeni ka mpatswa wo sungula wa vanhu entangeni wa Edeni, ku tisiwe xisandzu evitweni ra Xikwembu. Loko a hlamula xikhongelo xo tano, Yehova u ta susa xisandzu hinkwaxo lexi tshameke xi vekiwa ehenhla ka vito ra yena leri tsundzukiwaka. (Psalma 135:13) U ta endla leswi hi ku susa vubihi emisaveni. Malunghana ni nkarhi wolowo, hi ku tirhisa muprofeta Ezekiyele, Xikwembu xi te: “Kutani nḍi ta titwarisa ni ku tikwetsimisa, nḍi ta titiv̌isa e mahlweni ka matiko la’manyingi, ma ta tiv̌a leŝaku hi mina Yehova.”—Ezekiel 38:23.

Yehova Xikwembu wa kwetsima naswona u tengile. Xisweswo vito ra yena ri fanele ri hlawulekisiwa, kumbe ri hlawuriwa tanihi leri kwetsimaka. U ta kombisa ku kwetsima ka yena hi ku teka goza ro tihlawulekisa emahlweni ka swivumbiwa hinkwaswo. (Ezekiel 36:23) Lava va lavaka ku amukeriwa hi yena ni vutomi lebyi nga heriki va fanele va nyika Yehova xichavo ni ku hlawulekisa vito ra yena hi ku ri hlawula ni ku ri tlakusa eka man’wana hinkwawo. (Levitika 22:32; Esaya 8:13; 29:23) Hi ku fanana, Yesu u byele valandzeri vakwe leswaku va khongela va ku: “Vito ra wena a ri hlawuleke” kumbe, “ri tekiwa ri ri leri vangamaka; ri khomiwa tanihi leri kwetsimaka.” Hi nga tiyiseka leswaku Xikwembu xi ta xi hlamula xiyenge lexi xa xikhongelo xa Yesu xa xikombiso.

“A Ku Te Ku Fuma Ka Wena”

Yesu nakambe u byele valandzeri vakwe ku khongela va ku: “A ku te ku fuma ka wena.” Swikhongelo swa ku ta ka Mfumo wa Xikwembu handle ko kanakana swi ta hlamuriwa. Mfumo i vuhosi lebyikulu bya Yehova lebyi kombisiwaka hi hulumendhe ya le tilweni ya Vumesiya emavokweni ya N’wana wa yena, Yesu Kriste, ni “vahlawuriwa” lava hlanganisiweke. (Daniel 7:13, 14, 18, 22, 27; Esaya 9:6, 7) Timbhoni ta Yehova ti swi kombise khale hi Matsalwa leswaku Yesu u vekiwe exiluvelweni tanihi Hosi ya le tilweni hi lembe ra 1914. Kutani ke, ha yini hi fanele hi khongelela Mfumo leswaku wu “ta”?

Ku khongelela ku ta ka Mfumo entiyisweni swi vula ku kombela leswaku wu ta ehenhla ka hinkwavo lava kanetaka vuhosi bya Xikwembu emisaveni. Ku nga ri khale “ku fuma [ka Xikwembu] . . . ku ta seletela ni ku herisa ku fuma kuloku [ka misava] hikwako, kambe kona ku ta v̌a kona hi laha ku nga riki na makumu.” (Daniel 2:44) Xiendlakalo lexi xi ta endla leswaku vito ra Yehova leri kwetsimaka ri hlawulekisiwa.

“Ku Rhandza Ka Wena A Ku Endliwe”

Yesu u ye emahlweni a letela vadyondzisiwa va yena ku khongela va ku: “Ku rhandza ka wena a ku endliwe misaveni, tanihi loko ku endliwa tilweni.” Lexi i xikombelo xa leswaku Yehova a endla hi ku ya hi ku rhandza ka yena hi misava. Xa fana ni marito ya mupisalema: “Hikwaŝo leŝi Yehova a ŝi ranḍaka, o ŝi endla e matilweni ni le misav̌eni, e malwandle ni le ŝidziv̌eni hikwaŝo. Hi yena l’a tlakusaka mapapa e makumo ka misav̌a, l’a hatimisaka tilo, a nisaka mpfula, a humesaka mimoya e v̌uhlayiselweni bya kwe. Hi yena l’a beke mativ̌ula ya Egipta, ku sungula ka v̌anhu e ku ya fika ka ŝifuwo. O humesile šikari ka wena, e Egipta, e ŝikombiso ni masingita, e ku ba Faro ni malanḍa ya yena hikwawo. Hi yena l’a lov̌iseke matiko la’yo tala, kutani a dlaya tihosi ta matimba.”—Psalma 135:6-10.

Ku khongelela leswaku ku rhandza ka Yehova ku endliwa emisaveni i xikombelo xa leswaku a hetisisa swikongomelo swa yena hi xirhendzevutana lexi. Leswi swi katsa ku susiwa ka vakaneti vakwe hi ku helela, hi laha a va heriseke ha kona hi mpimo lowutsongo eminkarhini ya khale. (Psalma 83:9-18; Nhlavutelo 19:19-21) Swikhongelo swa leswaku ku rhandza ka Yehova ku endliwa emisaveni ni le vuakweni hinkwabyo swi ta hlamuriwa hakunene.

Loko Mfumo Wu Fuma

Ematshan’weni ya vuhomboloki lebyi nga kona evanhwini namuntlha, i yini lexi nga languteriwaka loko Mfumo wa Xikwembu wu fuma ni loko ku rhandza ka Xikwembu ku endliwa emisaveni tanihi le tilweni? Hi ku ya hi muapostola Petro, “hi ku ya hi ku tshembisa ka [Xikwembu], hi langutele matilo lamantshwa ni misava leyintshwa, laha ku nga ta va ni ku lulama.” (2 Petro 3:13) “Matilo lamantshwa” i vafumi vo lulama va moya—Yesu Kriste ni vafumi-kulobye va 144 000 va Mfumo wa le tilweni. (Varhoma 8:16, 17; Nhlavutelo 14:1-5; 20:4-6) “Misava leyintshwa” a hi xirhendzevutana xin’wana xa misava. Kambe, i vanhu vo lulama lava tshamaka emisaveni.—Ringanisa Psalma 96:1.

Ehansi ka ku fuma ka Mfumo, misava yi ta cinciwa yi va paradeyisi ya xirhendzevutana hinkwaxo. (Luka 23:43) Ku rhula ka ntiyiso ni ku humelela swi ta kumiwa hi vanhu hinkwavo lava yingisaka. (Psalma 72:1-15; Nhlavutelo 21:1-5) U nga ha va exikarhi ka mintshungu yoleyo leyi tsakeke loko u ri museketeri la tshembekaka wa vulawuri bya Vumesiya ehenhla ka vafumiwa lava yingisaka va laha misaveni. Vaseketeri va ku fuma koloko va khongelela ku hlawulekisiwa ka vito ra Yehova hi ku hiteka, leswaku Mfumo wa yena wu ta, ni leswaku ku rhandza ka yena ku endliwa. Swikhongelo swa vona leswi humaka embilwini handle ko kanakana swi ta hlamuriwa.