Ha Yini Xikwembu Xi Lehise Mbilu Swonghasi?
LANGUTA xikandza lexi tsaneke xa n’wana la sikaka. Vona miri wa yena wo ondza na khwi- ri lerikulu. Anakanya ndlela leyi a lavaka swakudya ha yona, ivi u xiya xibya lexi nga riki na nchumu lexi a xi khomeke. Kumbexana mana wa yena u n’wi langute hi mahlo lama ngheneke endzeni, xikandza xa yena n’wini xi kombisa ku pfumala ntshembo. Kutani ringeta ku tumbeta gome ra wena—ina, ivi u ringeta ku tlherisa mihloti ya wena.
Xivono lexi xi phindhiwa minkarhi ya timiliyoni eka ndhawu leyi nga hlaseriwa hi dyandza ya 6 wa timiliyoni ta xikwere khilomitara leyi tiviwaka tanihi Sahel. Yi lehe ku tlula 4 800 wa tikhilomitara ku tsemakanya dzonga wa Afrika wa Sahara Desert, ku suka le Senegal eRibuweni ra Atilantiki ku ya le Etiyopiya eLwandle ro Tshwuka. Kavula, dyandza ri xungeta mintshungu ni le matikweni man’wana. World Health Organization yi vika leswaku kwalomu ka 1.1 ya magidi ya timiliyoni ta vanhu emisaveni hinkwayo va vabya ngopfu kumbe va sika.
Kavula, ndlala ko va xivumbeko xin’we ntsena xa ku xaniseka ka munhu. Munhu u thyakisa misava, naswona hinkwerhu ka hina ha khumbeka. Mafambiselo ya politiki ma pfumelela vuhomboloki na nyimpi leswi tisaka nhlomulo na rifu eka vanhu vo tala. Ha yini Xikwembu xi pfumelela swilo swo tano? Xana xa khathala hi hina?
Xikwembu Xa Khathalela!
Muvumbi wa hina wa khathala hi hina. Ku na vumbhoni byo tala bya leswi ni bya vuswikoti bya yena byo endla swilo swi tirhisana ku hi pfuna, ni ku tisa vun’we eka ntumbuluko wa yena hinkwawo. Hi xikombiso, languta xifaniso lexi xa nyoxi leyi endzelaka xiluva emurhini wa muhandzu. Nyoxi yi kuma vulombe lebyi yi byi lavaka ku tiwundla eka xiluva. Kasi, murhi lowu wu titshege hi nsindza lowu miri wa nyoxi wu wu rhwalaka eka murhi lowu fanaka. Hi ndlela leyi, xiluva xa sindzahatiwa leswaku muhandzu wu humelela. A hi mirhi hinkwayo ya mihandzu leyi sindzahatiwaka hi ndlela leyi, kambe Xikwembu entiyisweni hi xona xi lunghiseleleke ntirhisano lowu lowu nga tolovelekangiki emhakeni leyi. Naswona vunene bya xona byi tisa muhandzu lowu hi nga wu dyaka hi ntsako ivi hi kuma swo karhi eka wona.
Nyoxi hi yoxe i xirho xa ntlhambi lowu hlelekeke kahle wa tinyoxi to tlula 30 000. Tin’wana ti rindza xisaka, loko tin’wana ti ri karhi ti xi basisa kumbe ti nghenisa moya eka xona. Hambi swi ri tano tin’wana ti hlengeleta vulombe na nsindza, ti phamela vana kumbe ti lava swihlovo leswintshwa swa vulombe. Xikwembu hi xoxe xi hlele swilo tano leswaku hi kuma swo karhi loko tinyoxi to tano ti humesa vulombe byo nyanganya ni lebyi akaka lebyi tsakisaka nantswo wa hina.
Singita ra ntirhisano exikarhi ka tinyoxi na swimilana ni le xikarhi ka switsotswana hi swoxe ro va byin’wana bya vumbhoni byo tala bya leswaku Muvumbi hi laha ku hetisekeke wa swi kota ku endla swilo leswi hanyaka swi tirhisana. Hikwalaho ka mhaka yoleyo, “Xikwembu a hi Xikwembu xa mpfilumpfilu, kambe i xa ku rhula.” (1 Vakorinto 14:33) Kutani ke, ha yini xi pfumelele vanhu va hanya hi ku nga twanani ko tano, loku xanisaka vo tala swinene? Loko Xikwembu xi khathala hi hina, ha yini xi yime nkarhi wo lehisa xileswi xi nga si ololoxa xiyimo lexi? Entiyisweni, ha yini Xikwembu xi lehise mbilu swonghasi?
Rito ra Xikwembu, Bibele, ri hlamula swivutiso swo tano. Buku leyi leyi xiyekaka yi hi byela leswaku Yehova Xikwembu u lehise mbilu hi xivangelo lexinene. Xivangelo xexo hi xihi? Naswona, xana ku lehisa mbilu ka Xikwembu ku ta hambeta ku fikela kwihi?
[Laha Xifaniso Xi Humaka Kona eka tluka 2]
Cover photo: Frilet/Sipa