Ku Rhandza Yehova Swi Kurisa Vugandzeri Bya Ntiyiso
“Hikuva ku rhandza Xikwembu, swi vula ku hlayisa milawu ya xona.”—1 YOHANE 5:3.
1, 2. Xana hi fanele hi tirhela Yehova hi nsusumeto wihi?
NTLAWA wa vaendzi va-80 lava humaka eJapani a va valanga Holo ya Nhlengeletano ya Timbhoni ta Yehova eCalifornia, U.S.A. Rivala ro saseka, ku katsa ni ntanga lowu taleke hi minkorhonyarhi, matuva ni tinyenga, swi va endle va titwa va ri kusuhi swinene ni Muvumbi wa vona Lonkulu, Yehova Xikwembu. Mufambisi wa vona hi ku hatlisa u xiye leswaku vo tala entlaweni lowu a va tirha tanihi maphayona ya nkarhi hinkwawo. Kutani, endzhaku, ntlawa wu vutisiwe xivutiso lexi, lexi hakanyingi a xi vutisiwa: “Ha yini ku ri na maphayona yo tala eJapani?” A a ku lo whiii! nkarhinyana. Kutani wansati un’wana lontsongo a hlamula a ku: “Hikuva hi rhandza Yehova.”
2 Ku rhandza Yehova—mawaku ndlela leyi swi hi susumetelaka ha yona leswaku hi chivirika entirhweni wakwe! I ntiyiso, a hi hinkwavo lava nga phayonaka. Hakunene, vo tala va vahuweleri va hina va Mfumo vo tlula timiliyoni ta mune a va swi kotanga ku kuma lunghelo leri. Kambe vo tala lava swiyimo swa vona swi va pfumelelaka va byi nghenela. Na hina van’wana, hi nga “ṭhemba Yehova, [hi] endla le’ŝo lulama,” hi kombisa rirhandzu ra hina hi ku va ni xiphemu xo karhi entirhweni wo endla vadyondzisiwa. (Psalma 37:3, 4) Vagandzeri hinkwavo lava tinyiketeleke va Yehova va nga hlanganyela eku khutazeni ka moya wa vuphayona, va nyika nseketelo wa rirhandzu eka lava va phayonaka.—Matewu 24:14; 28:19.
3. I ku hambana kwihi loku faneleke ku xiyiwa exikarhi ka lava tivulaka Vakriste ni Timbhoni ta Yehova?
3 Ku hambana ni vo tala lava tivulaka Vakriste, lava hi ku olova va tekaka vukhongeri tanihi lebyi nga riki bya nkoka ngopfu evuton’wini bya vona, Timbhoni ta Yehova ti kombisa rirhandzu lerikulu eka Xikwembu leri ri ti susumetelaka ku hambeta ti ‘lava mfumo ku sungula ni ku lulama ka xona.’ Leswi swi lave ku tinyiketela, kambe ku tinyiketela koloko ku ve ka nkoka swinene! (Matewu 6:33; 16:24) Ku fambisane ni nawu lowukulu wo sungula, lowu vuriweke ro sungula hi Muxe ivi wu phindhiwa hi Yesu Kriste: “Yehova Xikwembu xa hina i Yehova a ri yexe, naswona u fanele u rhandza Yehova Xikwembu xa wena hi mbilu ya wena hinkwayo ni moya-xiviri wa wena hinkwawo ni mianakanyo ya wena hinkwayo ni matimba ya wena hinkwawo.”—Marka 12:29, 30, NW; Deuteronoma 6:4, 5.
4, 5. I vamani lava nga ta tekiwa tanihi lava tshembekeke, naswona ku tshembeka ku nga kombisiwa hi ndlela yihi?
4 Ntlawa wun’wana wa yindlu-nkulu ya Timbhoni ta Yehova ku nga ri khale wu byele F. W. Franz, muungameri wa Sosayiti ya Watch Tower wa malembe ya 98 hi vukhale loyi a heteke malembe yo tlula 70 entirhweni wa nkarhi hinkwawo: Makwerhu Franz, “u ve xikombiso lexinene xa ku tshembeka eka hina.” Kutani Makwerhu Franz a hlamula a ku: “Ina! Mi fanele mi tshembeka.” Sweswo swi be nhloko ya mhaka. Eka xivumbeko xihi na xihi xa Mfumo laha hi tirhaka kona, hi nga tshembeka.—1 Vakorinto 4:2; Vagalatiya 3:9.
5 I ntiyiso, vo tala va nga lava ku endla swo tala entirhweni wa Yehova, kambe timfanelo ta Matsalwa kumbe swiphiqo swa rihanyo swi nga ha va sivela hi ndlela yo karhi. Hambi swi ri tano, lava tsandzekaka ku phayona a va nge tekiwi tanihi lava nga tshembekangiki ngopfu. Van’wana va tshame va tshembekile ehansi ka swiyimo swo tika naswona hakanyingi hi malembe yo tala swinene. Ina, va tshembekile! Va kombise ku rhandza Yehova ni ku tirha hi ku gingiriteka, va seketela malunghiselelo yakwe ya le tilweni hi mbilu hinkwayo. Va tsakele ntirho wa vuphayona swinene naswona va khutaze maphayona lama nga kona, hakanyingi, vana va vona, leswaku va tirhela ku phayona tanihi ntirho-vutomi lowu tlulaka hinkwayo evuton’wini.—Ringanisa Deuteronoma 30:19, 20.
6, 7. Xikombiso lexi vekiweke eka 1 Samuel 30:16-25 xi nga tirha njhani namuntlha?
6 Ntirho wa vun’we, wa rirhandzu wa vanhu hinkwavo va Xikwembu, namuntlha wu nga hlamuseriwa hi mhaka leyi nga eka 1 Samuel 30:16-25. Loko a lwa ni Vaameleke, “Davida a v̌a hlasela, a sungula ni mišo ku fika ni madyambu” ivi a teka swilo swo tala. Loko va tlhelela emixaxeni, vavanuna van’wana lava a va lwa swin’we na Davhida va kombele leswaku xuma xi nga nyikiwi lava va nga fambangiki na vona enyimpini. Kambe Davhida a hlamula a ku: “Kutani i mani l’a nga ta mi yingisa e mhakeni leyi? Hikuv̌a ku av̌eriwa ka loyi a fambeke ku lweni o ta fana ni ku av̌eriwa ka loyi a tshameke nhunḍwini, v̌a ta av̌elana ŝiṅwe.”
7 Nsinya wa nawu lowu fanaka wa tirha namuntlha. Maphayona ma le mahlweni enyimpini ya hina ya moya. Kambe hinkwavo ebandlheni va nyika nseketelo wa mbilu hinkwayo, wo tshembeka. Naswona vuyelo lebyi tsakisaka bya ntirho wa vona lowu hlanganeke wa 1991 bya kombisiwa eka chati leyi landzelaka sweswi.
Xiviko Lexi Xiyekaka
8. (a) Xiviko xa misava hinkwayo xi paluxa yini mayelana ni ntsengo wa vahuweleri ni tiawara leti va ti hetaka entirhweni wa Yehova? (b) I tinhla tihi leti tsakisaka leti u ti xiyaka hi matiko lama ha ku humelelaka eka xiviko?
8 Ina, matluka ya mune lama hundzeke ya magazini lowu ma kombisa ndlela leyi matshalatshala ya vagandzeri va Yehova hinkwavo lava chivirikaka ma hoxeke ha yona xandla eka ku andza ka misava hinkwayo ka 1991. Nhlohlorhi leyintshwa yo saseka ya vahuweleri va 4 278 820 yi vikiwile—yi engeteleke hi tiphesente ta 6,5. Lava va nyiketele tiawara ta 951 870 021 (kwalomu ka biliyoni yin’we!) entirhweni. Naswona xiya matshalatshala lamakulu lama endliweke hi vamakwerhu ematikweni lawa enkarhini lowu hundzeke a ma siveriwile kambe sweswi ma humelelaka ro sungula eka xiviko xa misava hinkwayo—Bulgaria, Cameroon, Czechoslovakia, Ethiopia, Mozambique, Nicaragua, Rwanda na U.S.S.R.
9, 10. (a) Maphayona ma hlamule njhani eka ntlhontlho wa minkarhi yo nonon’hwa? (b) I xikhutazo xihi lexi nyikeriwaka xo nghenela ntirho wa vuphayona?
9 Emalembeni ya sweswinyana moya wa vuphayona wu hangalake emisaveni hinkwayo. Hambi ematikweni lawa ntshunxeko wa vugandzeri wa ha ku nyikeriwaka, mintlawa ya maphayona ya andza, swiyimo swa ikhonomi leswo biha a swi ti siveli Timbhoni leti to tiya ku nyikela hinkwaswo leswi ti nga na swona evugandzerini bya Yehova. (Ringanisa 2 Vakorinto 11:23, 27.) Hi avhareji ya n’hweti, tiphesente ta 14 ta vahuweleri hinkwavo va Mfumo a a va phayona. Nhlohlorhi ya maphayona i 780 202, ku nga tiphesente letinene ngopfu ta 18 ta vahuweleri hinkwavo.
10 Hi ku vona ntsako lowu voniwaka hi maphayona, van’wana na vona va khutazeka leswaku va nghenela ntirho lowu. Loko u nga si phayona sweswi, xana ku rhandza ka wena Yehova ku nga ku endla u vula, hi laha hi hlayaka ha kona eka Esaya 6:8, “Hi mina loyi, ndzi rume”? Kumbe hi dyondzo ya wena ya Bibele ya vukheta, xana Rito ra Xikwembu ri nga pfuxa ku tsakela loku hisaka embilwini ya wena, lerova u lava ku teka goza leri engetelekeke ro nghenela ntirho wa vuphayona? Hambi ku ri hi nkarhi wa ndzingo, rito ra Yehova ri tiyise Yeremiya, leswaku a nga tlhentlheli endzhaku.—Yeremia 20:9.
Ntirho Wa Rirhandzu eVanhwini
11. Ntirho wa dyondzo ya le kaya ya Bibele wu ye emahlweni hi ndlela yihi?
11 Xivumbeko xin’wana lexi xiyekaka xa xiviko xa lembe i ku andza ka nhlayo ya tidyondzo ta le kaya ta Bibele ta mahala, ta 3 947- 261, leti fambisiweke hi n’hweti yin’wana ni yin’wana emisaveni hinkwayo. Leri i lunghiselelo ra rirhandzu leri ha rona Timbhoni ta Yehova ti landzelelaka ku tsakela loku ti ku kumaka entirhweni wa tona wa yindlu na yindlu. Ha swi tsakela ku fambisa tidyondzo ta Bibele ni vanhu va matiko ni mindhavuko hinkwayo, hi tirha hi ku hiseka loku fanaka ni loku muapostola Pawulo a ku kombiseke. Handle ko kanakana ‘ku nyikela ka yena vumbhoni eka Vayuda ni Magriki’ ku lave leswaku a dyondzisa ntiyiso hi tiawara to tala. (Mintirho 20:20, 21) Swa fana ni namuntlha. Timbhoni ta Yehova ti pfuna “vanhu hinkwavo [leswaku] va ponisiwa ni ku kuma vutivi lebyi kongomeke bya ntiyiso.”—1 Timotiya 2:4, NW.
12-14. I swiviko swihi leswi tsakisaka leswi humaka eYuropa?
12 Mawaku ndlela leyi swiviko swa ntirho lowu engetelekeke wa tidyondzo ta Bibele swi nyanyulaka ha yona eYuropa Vuxa! Hi makume ya malembe yo tala vamakwerhu kwalaho a va hlangana hi mintlawa leyitsongo, kumbexana entlaweni hinkwawo va ri na kopi yin’we ntsena leyi hlakaleke, leyi kopiweke, ya Xihondzo xo Rindza xa khale. Kambe sweswi Tibibele ni tibuku to tala ta Bibele ti khulukela ematikweni wolawo. Ti tsundzuxa munhu Risimu ra tinsimu 2:4, King James Version: “[Kriste Yesu] a ndzi yisa endlwini ya nkhuvo [wa moya], mujeko wa yena ehenhla ka mina i rirhandzu.” Leswi va nga ni tikopi ta vona vini ta timagazini, vo tala va ya va hlomela ku tamela “rito ra ntiyiso hi ndlela leyinene.”—2 Timotiya 2:15, NW.
13 Bandlha ra vahuweleri va 103 eSt. Petersburg, Russia, sweswinyana ri vike tidyondzo ta le kaya ta Bibele to tlula 300. Timbhoni letintshwa ta 53 ti khuvuriwile endzhaku ka tin’hweti ta nhungu ntsena tanihi mihandzu ya matshalatshala lawa ya dyondzo ya Bibele. Ku tlula hafu ya bandlha va ve entiyisweni ku ringana tin’hweti ta nhungu kumbe ehansi ka tona! Naswona a va na vakulu—ko va ni nandza wa vutirheli un’we ntsena la khathalelaka nhluvuko wa vona wa moya.
14 Muhuweleri wa Mfumo le Estonia u komberiwe hi xichudeni xa Bibele loko swi pfumeleriwile leswaku xi rhamba vanghana va xona ku ta edyondzweni. Loko Mbhoni yi fika ekaya rero vhiki leri landzeleke, yi kume vanhu vo tlula 50 va hlengeletanile! Kavula, malunghiselelo yo hlawuleka a ma laveka leswaku ku khathaleriwa ku tsakela koloko hinkwako nkarhi na nkarhi.
15. I yini leswi nga vuriwaka hi nhlayo ya lava veke kona eXitsundzuxweni ni minkhuvulo?
15 Vo tala lava dyondzaka va tokota vunghana bya Vukriste ro sungula hi ku va kona eXitsundzuxweni xa rifu ra Yesu. N’wexemu, lava veke kona a ku ri ro sungula va tlula 10 000 000, 10 650 158 va hlengeletanile emisaveni hinkwayo emabandlheni ya 66 207 hikwalaho ka xiendlakalo lexi xo tsakisa. Ematikweni yo tala ya le Latin-America, Afrika, ni ya le Yuropa Vuxa, lava veke kona a va tlula nhlayo ya vahuweleri va Mfumo kanharhu kumbe ka mune. Sweswi hi fanele hi sungula ku lunghiselela Xitsundzuxo lexi nga ta khomiwa lembe leri hi Ravuntlhanu, April 17. Ku ni ntshembo wa leswaku nhlayo leyikulu ya tidyondzo letintshwa ta Bibele leti vaka kona eXitsundzuxweni ti ta ya emahlweni ti endla nhluvuko ku kondza ti khuvuriwa. Mayelana ni minkhuvulo, hi 1991 hi tlhele hi vona vo tlula 300 000 va kombisa ku tinyiketela ka vona eka Yehova Xikwembu hi nkhuvulo wa mati.
Varhandzi Va Ntshunxeko Wa Xikwembu
16. I swiviko swihi leswi nyanyulaka leswi humaka eMintsombanweni ya Muganga ya “Varhandzi Va Ntshunxeko”?
16 Xivumbeko lexi xiyekaka xa lembe ra ntirho ra 1991, xi ve nongonoko wa Mintsombano ya Muganga ya “Varhandzi Va Ntshunxeko,” sweswi yi hetisiwile eka Hafu ya Misava N’walungu kambe wu ya emahlweni hi 1992 eka Hafu ya Misava Dzonga. Ro sungula, nongonoko wa ntsombano lowu heleleke wu nyikeriwile ematikweni yo tala ya Yuropa Vuxa, laha vamakwerhu va tsakelaka ku tirhisa ntshunxeko wa vona lowu va ha ku wu kumaka leswaku va dzunisa Yehova. Hi October 1991, ntsengo lowu vikiweke wa lava veke kona emintsombanweni yo sungula ya 705 ematikweni ya 54 a wu ri 4 774 937.
17, 18. (a) I ntshunxeko wihi lowu vagandzeri va Yehova va tiphinaka ha wona ni ku wu langutela? (b) Ntshunxeko wa Xikwembu wu hambana njhani ni ntshunxeko wa misava?
17 Yesu u byele vadyondzisiwa vakwe: “Ntiyiso wu ta mi ntshunxa.” (Yohane 8:32) Namuntlha, ntiyiso wa Bibele wu ntshunxe timiliyoni eka tidyondzo ta mavunwa ta Vujagana. Timiliyoni leti ti dyondze leswaku lunghiselelo ra Yehova ra gandzelo ra nkutsulo ra Yesu ri ta swi endla swi koteka leswaku vanhu va “ntshunxiwa . . . evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.” (Varhoma 8:19-22) Mawaku ntshunxeko lowunene swonghasi lowu wolowo wu nga ta va wona—ku hanya hi laha ku nga heriki eparadeyisini emisaveni exikarhi ka mindzilakana leyi faneleke leyi Yehova a yi lunghiselelaka hi rirhandzu!—Esaya 25:6-8; ringanisa Mintirho 17:24-26.
18 Ntshunxeko lowu Timbhoni ta Yehova ti wu tsakelaka sweswi, ni lowu ti langutelaka ku wu tsakela hi xitalo emafambiselweni lamantshwa ya swilo ya Xikwembu wu huma eka Xikwembu xa hina, Yehova. (2 Vakorinto 3:17) A ti titshegi hi nhlangano wihi na wihi wa politiki kumbe wa ndzhundzunuko. (Yakobo 1:17) Ku sivela ku nga twisisi kwihi na kwihi eyinhleni leyi, tibeji ta ntsombano wa 1991 leti a a ti bohiwe hi Timbhoni ta Yehova ematikweni man’wana ya le Yuropa Vuxa a ti ri na marito lawa “Varhandzi Va Ntshunxeko Wa Xikwembu” ku ri na ku “Varhandzi Va Ntshunxeko” ntsena.
Ku Rhandza Yehova Swinene
19. Vunghana bya xikhongelo na Yehova byi nga hi tiyisa hi ndlela yihi?
19 Ku rhandza ka hina Yehova ni ku tshembela eka yena swi ta hi endla hi tshama ekusuhi na yena hi xikhongelo. I vunghana lebyi na Yehova, lebyi pfuneke vamakwerhu leswaku va tiyiselela ku nonon’hwa ni ku xaniseka ko tala. (Psalma 25:14, 15) Enkarhini wa ku ringiwa ka yena lokukulu, Yesu u hlayise vunghana ni Tata wakwe hi xikhongelo. (Luka 22:39-46) Vunghana byo tano swin’we na Yehova byi tiyise Stefano eka gome ra ku fela ripfumelo. Loko a languta etilweni tanihi leswi a a ri ekusuhi ni ku khandliwa hi maribye a fa, u te: “Langutani! Ndzi vona tilo ri pfulekile, ni N’wana-wa-Munhu [Yesu] a yimile evokweni ra xinene ra Xikwembu.”—Mintirho 7:56.
20-22. Ntokoto wu swi kombisa njhani leswaku Xikwembu xa swi twa swikhongelo?
20 Tanihi leswi vagandzeri va Yehova hakanyingi va swi voneke, Yehova u hlamula swikhongelo leswi pfumelelanaka ni ku rhandza kakwe. Hi xikombiso, etikweni ra le Afrika laha ntirho wa Timbhoni wu yirisiweke kona, phayona ro hlawuleka leri fambaka ri ya en’walungwini hi bazi a ri ri na saka lerikulu ra tibuku ta Mfumo ni tivhilopho ri ti yisa kun’wana. Mulanguteri loyi a a layichela bazi u vutise makwerhu a ku: “Saka leri ri na yini?” Makwerhu u vule nchumu wo sungula lowu wu teke emiehleketweni: “Poso.”
21 Endleleni, bazi ri tsutsume ri hundza epatwini laha ku sechiwaka kona, phorisa ra le mapatweni ri yi tsutsumisile ivi ri yi yimisa, ri ehleketa leswaku yi rhwale nhundzu leyi yirisiweke. Va vule leswaku vakhandziyi hinkwavo va xika ebazini ni leswaku ndzhwalo hinkwawo wu kamberiwa. Leri a ku ri khombo! Makwerhu u fambe mpfhukanyana ku suka entlaweni lowu n’unun’utaka, a nkhinsama, a khongela eka Yehova. Loko a tlhelele entlaweni, ndzhwalo wa mufambi un’wana ni un’wana a wu ri karhi wu pfuriwa ivi wu kambiwa hi vukheta swinene. Loko saka ra makwerhu loyi ri ri kusuhi ni ku pfuriwa, hi mbilu u kombele leswaku Yehova a n’wi pfuna.
22 Phorisa ri huwelerile, “I saka ra mani leri, naswona ri na yini?” Makwerhu a nga si wu pfula nomu wa yena, mulanguteri wa bazi u hlamurile, a ku: “I poso—— leyi humaka ehofisini ya poso—— yi ya eka hofisi yin’wana ya poso” Mutirhela-mfumo u te, “swi lulamile.” A tlakula saka ivi a ri nyika mulanguteri. U n’wi lerisile a ku, “tiyiseka leswaku u ri veka endhawini leyi hlayisekeke.” Phayona leri hlawulekeke ri tlhele ri nkhinsama ri nkhensa mutwi wa swikhongelo.—Psalma 65:2; Swivuriso 15:29.
23. I yini leswi Yehova a swi kombiseke, naswona ha yini minkarhi yin’wana a tshika nxaniso wu va kona hi ku helela?
23 Hambi swi ri tano, leswi a swi vuli swona leswaku vagandzeri va Yehova va ntshunxekile hi ku helela emakhombyeni. Eka swiyimo swin’wana, eminkarhini ya Bibele ni ya namuntlha, Yehova u kombise leswaku a nga kutsula vanhu va yena. Kambe mayelana ni ku tlhantlha mphikamakaneta ya vutshembeki, minkarhi yin’wana u vonaka onge u tshika nxaniso wu va kona. (Ringanisa Matewu 26:39) Ku tlula kwalaho, Yehova a nga va sirheleli vanhu vakwe eka makhombo, minkwetlembetano ya vanhu, kumbe eka vugevenga, hi singita, hambi leswi ku tirhisa vutlhari lebyi tirhaka lebyi sekeriweke eBibeleni swi nga pfunaka. (Swivuriso 22:3; Eklesiasta 9:11) Kambe, hi nga tiyiseka leswaku hambi ha kutsuriwa eswiyin’weni swa ndzingo kumbe e-e, ku tshembeka ka hina, ku ta hakeriwa, hambi ku ri hi ku pfuxiwa loko swi laveka.—Matewu 10:21, 22; 24:13.
24. I tinyiko tihi ta rirhandzu leti Yehova a ti nyikeleke, naswona hi nga ri amukela njhani rirhandzu rakwe?
24 Mawaku ku vangama ka tinyiko ta Yehova ta rirhandzu! Ku nyika ka yena vanhu misava leyi ni xin’wana ni xin’wana lexi nga eka yona i xikombiso lexi xiyekaka xa rirhandzu ra yena. (Psalma 104:1, 13-16; 115:16) Naswona nyiko ya ntwela-vusiwana ya Xikwembu ya N’wana wakwe, Yesu Kriste, leswaku a kutsula vanhu exidyohweni ni rifu i nyiko ya rirhandzu swinene leyi tshameke yi endliwa. “Rirhandzu ra Xikwembu ri tikombile eka hina hi ndlela leyi: Hileswaku Xikwembu xi rhumile N’wana la nga un’we wa xona ku ta laha misaveni, leswaku hi ta kota ku hanya hikwalaho ka yena. Rirhandzu ra kona i rikulu, hikuva a hi hina hi rhandzeke Xikwembu, kambe hi xona xi hi rhandzeke, kutani xi rhumele N’wana wa xona ku va mhamba ya swidyoho swa hina.” (1 Yohane 4:9, 10) Hi ku amukela rirhandzu rero, onge hi nga khorwiseka leswaku “hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.”—Varhoma 8:38, 39.
Ku Pfuxeta Xihloko Lexi
◻ Ku tshembeka swi vula yini?
◻ Hi le swivandleni swihi swa ntirho laha hi nga kombisaka ku rhandza Yehova?
◻ I swivumbeko swihi swa xiviko xa lembe ra ntirho leswi ku tsakisaka ngopfu?
◻ Hi nga ku kombisisa ku yini ku tlangela tinyiko ta Yehova ta rirhandzu?
[Bokisi leri nga eka tluka 15]
HA YINI KU RI NA MAPHAYONA YO TALA SWINENE?
Hi ku ya hi xiviko, ku ringana malembe ya 2 600 Majapani a ma ri vagandzeri lavakulu va vafumi va wona. Etinyimpini ta lembe xidzana leri ra vu-20 ntsena, vavanuna lava lwaka va Majapani vo tlula timiliyoni tinharhu va nyikele vutomi bya vona, hikuva va anakanye leswaku a a ku ri hava ku dzuneka lokukulu ko tlula ku fela xikwembu xa vona lexi fumaka. Kambe mavuthu ya Mabudha ni Mashinto ma tsandzekile eka Nyimpi ya Vumbirhi ya Misava, ivi endzhaku ka sweswo mufumi a tshika vukwembu bya yena. I yini lexi a xi ta pfala ndhawu ya vukhongeri? Lexi tsakisaka, tidyondzo ta le kaya ta Bibele leti fambisiweke hi varhumiwa va Timbhoni ta Yehova ivi endzhakunyana hi Timbhoni ta kwalaho, ti pfune vo tala leswaku va kuma Xikwembu xa ntiyiso, Yehova, ni ku nyiketela vutomi bya vona eka yena. Ku tinyiketela loku ku vula swo tala eka Timbhoni teto ta Majapani. Loko enkarhini lowu hundzeke va swi kotile ku nyikela vutomi bya vona hikwalaho ka xikwembu lexi fumaka, sweswi va nga kombisa ku chivirika lokukulu hi ku nyikela matimba ya vona tanihi maphayona eku gandzeleni ka Xikwembu lexi hanyaka ni Muvumbi wa vuako—Yehova Hosi Leyikulu!
[Chati leyi nga eka tluka 10-13]
XIVIKO XA NTIRHO WA LEMBE RA 1991 WA TIMBHONI TA YEHOVA EMISAVENI HINKWAYO
(See bound volume)
[Xifaniso lexi nga eka tluka 16]
Varhandzi va ntshunxeko wa Xikwembu—vagandzeri va Yehova entsombanweni ePrague, August 9-11, 1991