Tivoneleni Vaprofeta Va Mavunwa!

MPATSWA wa le Brazil a wu etlele ni vusiku kutani wu twa makhamba ma tshova ma nghena endlwini ya wona. Mpantswa lowu chaveke wu swi kotile ku baleka hi fasitere ra yindlu ya byetlelo wu ya vitana maphorisa. Kambe endzhaku wansati a a chavisiwile swinene hi ntokoto lowu lerova a a nga ha swi koti ku etlela endlwini leyi kutani u boheke ku ya eka ya mana wakwe.

Un’wana ni un’wana loyi yindlu ya yena yi nga tshama yi fayiwa kumbe loyi a nga tshama a tekeriwa swilo hi ndlela yo karhi a a ta titshandza vusiwana na yena. Ntokoto wo tano wa chavisa swinene, naswona lexi nga tsakisiki, vanhu vo tala swinene va xaniseka hi ndlela leyi. Hambi swi ri tano, ku ni vukhamba lebyi nga ni nkucetelo lowukulu swinene ku tlula lebyi.

Xana hi byihi vukhamba lebyi lebyikulu swinene naswona makhamba ya kona i vamani? Yesu Kriste u hi byerile mayelana na byona, loko a vulavula hi siku ra hina u te: “Ku ta humelela vaprofeta va mavunwa lavo tala, va ta xisa vanhu lavo tala.” (Matewu 24:11) Vaprofeta va mavunwa i makhamba. Hi ndlela yihi? Va yiva yini? Ku yiva ka vona ku fambisana ni ku profeta ka vona. Kutani leswaku hi ta twisisa mhaka leyi hi ku helela, hi fanela hi sungula hi tiva leswaku ku profeta loku fambisanaka ni Bibele hi kwihi.

Leswi Ku Profeta Swi Vulaka Swona

Loko u ehleketa hi ku profeta, kumbexana lexi taka emiehleketweni ya wena ku sungula, i ku vhumba vumundzuku. Lexi hakunene a a ku ri xiphemu xa ntirho wa vaprofeta va Xikwembu va khale, kambe a a ku nga ri ntirho wa vona lowukulu. Hi xikombiso, loko a ri exivonweni, muprofeta Ezekiyele u byeriwe ku “profetela moya,” swa yena a ku ri ku hetisisa xileriso xa Xikwembu ntsena. (Ezekiel 37:9, 10) Loko Yesu a tengisiwa emahlweni ka vaprista, u tshwuteriwe hi marha ni ku makariwa, kutani lava n’wi xanisaka va hleka va ku: “[Profeta, NW], loyi a ku beke, wena Mesiya!” A va nga vuli leswaku Yesu a vhumba vumundzuku. A va n’wi ntlhontlha leswaku a va komba lava nga n’wi ba hi ku tirhisa matimba ya Xikwembu.—Matewu 26:67, 68.

Entiyisweni, mhaka leyikulu leyi vuriwaka hi marito ya ririmi ro sungula ra Bibele, lama hundzuluxeriweke va ku “ku profeta” kumbe “vuprofeta” kahle-kahle i ku vula mianakanyo ya Xikwembu ehenhleni ka mhaka yo karhi kumbe hi laha buku ya Mintirho yi swi vekaka ha kona, ku vula “mintirho leyikulu ya Xikwembu.” (Mintirho 2:11) Hi yona ndlela leyi vanhu lavo tala va dyeleriwaka ha yona hi vaprofeta va mavunwa.

Hambi swi ri tano, i vamani vaprofeta va mavunwa naswona va yiva yini? Leswaku hi hlamula xivutiso lexi, a hi languteni matimu ya tiko ra Israyele ku fikela enkarhini wa Yeremiya.