Xiviko Xa Vahuweleri Va Mfumo
Yehova U Hakela Muntshwa La Tshembekaka
VANTSHWA vo tshembeka i va nkoka swinene emahlweni ya Yehova. Ntokoto lowu landzelaka wa jaha leri tshembekaka wu fanele wu khutaza vantshwa van’wana ku hlayisa vutshembeki bya vona loko va tirhela Yehova.
Le Argentina, mufana wa malembe ya 11 hi vukhale ni makwavo wa yena lontsongo va dyondze buku leyi nge Ntiyiso Lowu Yisaka eVuton’wini Lebyi Nga Heriki ni kokwa wa vona wa xisati. Hi ku hatlisa, vatswari va vafana lava va sungule ku kaneta, naswona va sivele vafana lava ku ya eminhlanganweni eHolweni ya Mfumo. Ku ringana nkarhi wo leha, vafana lava a va huma hi fasitere ra kamara ro hlambela, va tlulela exitupini, kutani ku suka kwalaho va tlula khumbi va ya exitupini xa muakelani kutani va ya eHolweni ya Mfumo. Kutani un’wana u byele mana wa vona leswaku a va va kona eminhlanganweni ya Timbhoni ta Yehova. Mana wa vona u va chavisile a vula leswaku u ta va ba, kutani leswi swi chavise mufana lontsongo, loyi a tshikeke ku dyondza. Kambe lonkulu u phikelerile. Ku ringana malembe ya ntlhanu u swi kotile ku va kona eminhlanganweni vatswari va yena va nga swi tivi.
Loko a ri ni malembe ya 16 hi vukhale, u lave ku ya endla khoso exikolweni xa le henhla leyi a yi nga ri kona emutini wa ka vona. Hi ku va a ri kule ni le kaya a swi ta n’wi nyika ntshunxeko lowu engetelekeke wo hambeta ni ntiyiso. Vatswari va yena va n’wi pfumelerile leswaku a famba, naswona hinkwaswo swi fambe kahle ku ringana tin’hweti tinharhu. Kutani nhloko ya xikolo yi byele vatswari va yena leswaku n’wana wa vona a nga wu losi mujeko kumbe ku yimbelela risimu ra tiko. Jaha leri ri swi kotile ku nyikela vumbhoni lebyinene bya leswaku ha yini ripfalo ra rona ri nga ri pfumeleli ku endla swilo leswi, ri yingisiwe hi nhloko ya xikolo, vatswari va rona, matsalani, gqweta ni tiprofesa ta khume. (Eksoda 20:4, 5) Vatswari a va hlundzukile. Mana wa kona u kume xibamu, a lava ku ya duvula kokwana loyi wa xisati ha xona, loyi a a n’wi vona a ri ni vutihlamuleri. Kambe a nga kalanga a n’wi kuma a ri yexe.
Endzhakunyana, hi xiringanyeto xa munghana wa ndyangu ni hi ku pfumeleriwa hi nhloko ya xikolo, vatswari va anakanye ku yisa muntshwa loyi eka tliniki ya lava vabyaka emaianakanyweni, va ehleketa leswaku ku tshunguriwa ka miehleketo ku ta n’wi endla a tshika ripfumelo ra yena. Vatirhi va le tliniki va fambe ni mufana loyi tikhilomitara to ringana 100 hi movha kutani va n’wi tlhava hi mimpimo leyikulu ya insulin ni swidzidzirisi swin’wana ku kondza a titivala. Loko a pfuka a a lahlekeriwe hi miehleketo hi laha ku heleleke, a nga tivi munhu naswona u khomiwe hi ku rivala swa xinkarhana. Endzhaku ka minkambisiso yo tala ya vukheta, madokodela a ma kumanga nchumu lexi kombisaka ku vabya ka mianakanyo eka yena. Kambe tliniki yi ye emahlweni ni ku n’wi tshungula. Loko a pfukile, mufana loyi u khongerile eka Yehova leswaku a nga n’wi tshiki ni ku n’wi kombela leswaku a n’wi nyika matimba yo tiyisela. Yehova u n’wi hlayisile, naswona eku heteleleni u humesiwile etliniki.
Eka nkarhi wun’wana nhloko ya xikolo u vutise jaha leri loko ri tiyimiserile ku tisola. Loko ri arile, nhloko ya xikolo u byele vatswari leswaku va n’wi tlherisela etliniki hikuva sweswi a a penga ku tlula leswi a a ri xiswona. Vatswari va n’wi yise endlwini yo hirhisa kutani va byela n’wini wa yindlu wa xisati leswaku a tiyisekisa leswaku a nga yi eminhlanganweni ya Timbhoni ta Yehova. Endzhaku ka loko vatswari va fambile, vona xihlamariso lexi mufana a xi kumeke! Vini va yindlu yo hirhisa a ku ri Timbhoni ta Yehova! Eku heteleleni vatswari va n’wi tshikise ku tshunguriwa miehleketo, va tiyisekile leswaku madokodela a ma va byele vunwa. Hi nkarhi lowu fanaka Huvo-nkulu ya Argentina yi veke nawu wa leswaku vana va Timbhoni ta Yehova a va nga fanelanga ku hlongoriwa exikolweni hi ku va va nga losi mujeko.
Xana miringo leyi yi n’wi pfunile muntshwa loyi wo tshembeka? Ina. U ri: “Ndzi swi kotile ku nyikela vumbhoni lebyikulu eka madokodela, tiprofesa, vadyondzi-kulorhi exikolweni, vatswari ni maxaka, entiyisweni, emutini hinkwawo. Vatswari va mina a va nga ha kaneti ngopfu naswona va ve ni langutelo lerinene hi Timbhoni. Sweswi, loko ndzi tsundzuka vuhlangi bya mina, ndzi vona ndlela leyi Xikwembu xa hina xi hlamarisaka ni ku va ni musa ha yona eku hlayiseni ka munhu loyi a tshamaka a tshembekile eka xona. Hakunene swi hi laha mupisalema a vuleke ha kona eka Psalma 27:10: ‘Hambi loko tatana na manana v̌a nga nḍi ṭhika, Yehova o ta nḍi rola.’
Jaha leri sweswi ri ni malembe ya 23 hi vukhale, ri tekile naswona ra chivirika entirhweni wa Yehova. Hakunene, matimba ya Yehova lama tiyisaka a ma heli.—Psalma 55:22.