Swivutiso Swa Vahlayi

Vaheveru 9:16 yi vula leswaku muendli wa ntwanano u fanele ku fa leswaku ntwanano wu va wa ntikelo. Kambe Xikwembu xi endle ntwanano lowuntshwa naswona a xi fanga. Kutani hi nga yi twisisa njhani ndzimana leyi?

Eka Vaheveru 9:15-17, (NW) ha hlaya: “Kutani hi yona mhaka leyi [Kriste] a nga muhlanganisi wa ntwanano lowuntshwa, leswaku, hikwalaho ka leswi ku humeleleke rifu leswaku va kutsuriwa hi nkutsulo emilandzwini ehansi ka ntwanano lowo rhanga, lava vitaniweke va ta amukela xitshembiso xa ndzhaka leyi nga heriki. Hikuva laha ku nga ni ntwanano, ku fanele ku va ni rifu ra muendli wa ntwanano [loyi a nga munhu wa nyama]. Hikuva ntwanano wu va ni ntikelo loko ku ri ni vahlaseriwa lava feke, tanihi leswi wu nga tirhiki nikatsongo loko muendli wa ntwanano [loyi a nga munhu wa nyama] a ha hanya.”a

Yehova hi yena Muendli wa xiviri wa ntwanano lowuntshwa. Eka Yeremia 31:31-34, Xikwembu xi vhumbe hi ku kongoma leswaku a xi ta endla ntwanano lowuntshwa ni vanhu va xona. Muapostola Pawulo u tshaha tsalwa leri eka Vaheveru 8:8-13, leswi kombisaka leswaku Pawulo u swi twisisile leswaku Xikwembu hi lexi sunguleke ntwanano lowu lowu tlakukeke.

Hambi swi ri tano, eka Vaheveru ndzima 9, Pawulo u vulavule hi swiphemu swo tala leswi Yesu a swi endleke malunghana ni ntwanano lowuntshwa. Kriste u te tanihi Muprista Lonkulu wa ntwanano lowu. Hi tlhelo rin’wana, Yesu a a ri gandzelo ra ntwanano lowuntshwa; i “ngati ya Kriste” ntsena leyi nga “basisa[ka] mapfalo ya hina emintirhweni leyi nga pfuniki nchumu.” Nakambe Kriste a a ri Muhlanganisi wa ntwanano lowu, tanihi leswi Muxe a a ri muhlanganisi wa ntwanano wa Nawu.—Vaheveru 9:11-15.

Pawulo u boxe leswaku rifu a ri laveka leswaku ku tiyisiwa mintwanano exikarhi ka Xikwembu ni vanhu. Ntwanano wa Nawu i xikombiso. Muxe a a ri muhlanganisi wa wona, loyi a a ta tisa ku twanana loku exikarhi ka Xikwembu na Israyele wa nyama. Xisweswo Muxe u tirhe ntirho wa nkoka naswona a a ri yena munhu loyi a tirhisaneke ni Vaisrayele loko va nghena eka ntwanano. Xisweswo Muxe a nga langutiwa tanihi munhu la nga muendli wa ntwanano wa Nawu lowu sunguriweke hi Yehova. Kambe xana Muxe u boheke ku halata ngati ya yena ya vutomi leswaku ntwanano wa Nawu wu va wa nkoka? E-e. Ematshan’wini ya sweswo ku nyikeriwe swifuwo, laha ngati ya swona a yi siva ngati ya Muxe.—Vaheveru 9:18-22.

Ku vuriwa yini hi ntwanano lowuntshwa exikarhi ka Yehova ni tiko ra Israyele wa moya? Yesu Kriste u ve ni xiphemu lexi hlawulekeke xo va muyimeri, Muhlanganisi exikarhi ka Yehova na Israyele wa moya. Hambi leswi Yehova a sunguleke ntwanano lowu, a wu khumba ngopfu Yesu Kriste. Handle ko va Muhlanganisi wa wona, Yesu u tirhisane hi xiviri enyameni ni lava a va ta rhanga va yisiwa eka ntwanano lowu. (Luka 22:20, 28, 29) Ku tlula kwalaho, a a fanele ku nyikela gandzelo leri lavekaka leswaku a tiyisa ntwanano. Gandzelo a a ku nga ri ra swifuwo kambe a ri ri ra vutomi lebyi hetisekeke bya munhu. Kutani ke, Pawulo a nga vula leswaku Kriste i munhu la nga muendli wa ntwanano lowuntshwa. Endzhaku ka loko ‘Kriste a nghene etilweni hi koxe, a humelela emahlweni ka Xikwembu leswaku a hi yimela,’ ntwanano lowuntshwa wu ve ni ntikelo.—Vaheveru 9:12-14, 24.

Loko a vulavula hi Muxe na Yesu tanihi lava endlaka ntwanano, Pawulo a a nga ringanyeti swona leswaku un’wana wa vona u sungule mintwanano ya yena, leyi kahle-kahle a yi endliwile hi Xikwembu. Ematshan’wini ya sweswo, vanhu volavo havambirhi va katsekile swinene tanihi vahlanganisi eku tiseni ka mintwanano hi vumbirhi bya vona. Naswona eka yona hinkwayo, rifu a a ri laveka—swifuwo swi yimela Muxe, naswona Yesu a nyikela ngati ya yena hikwalaho ka lava nga eka ntwanano lowuntshwa.

[Nhlamuselo ya le hansi]