Ndzima 13
“Hosana Ya Ku Rhula” Yi Hundzulukela Eka Lava Nge Handle Ka Ntwanano Lowuntshwa
1. Hikwalaho ka yini Vayuda va namuntlha va nga swi koti ku landzula leswaku ntwanano wa Muxe lowu endliweke ni vakokwa wa vona a wu ta hela?
VAYUDA va ntumbuluko namuntlha, lava va nga vatukulu-xinghuwe va nyama va mupatriarka Abrahama, va nga ka va nga landzuli leswaku ntwanano wa khale wa Nawu wa Muxe a wu fanele ku bakanyeriwa etlhelo hi ntwanano lowuntshwa ni wo antswa. Va nga ka va nga ma suli eka maphepha ya vona ya Matsalwa ya Xiheveru marito ya Xikwembu eka Yeremia 31:31: “Vonani, ku vula Yehova, ma ta ta masiku lawa ndzi nga ta endla ha wona ntwanano lowuntshwa ni yindlu ya Israyele ni yindlu ya Yuda.”
2. Xana xivutiso xa leswaku i mani loyi a a ta va Muhlanganisi wa ntwanano lowuntshwa eku heteleleni xi hlamuriwe njhani?
2 Loyi a a ta va muyimeri yoloye wa ntwanano lowuntshwa a nga vhumbiwanga hi Yeremiya. Kambe hi vusiku bya Nisan 14, 33 C.E., loko Yesu Kriste a nyike vadyondzisiwa va yena xinwelo xa vhinyo hi Paseka, u kombe leswaku a a ta va Muhlanganisi yoloye. (Luka 22:20) Eka Vaheveru 7:22 hi byeriwile leswaku i “xitshembiso,” kumbe xitiyisekiso xa ‘ntwanano wo tano lowuntshwa ni wo antswa.’
3. Hi wihi ntirho wun’wana lowu Yesu a nga na wona eka Xikwembu, naswona xana u wu kume hikwalaho ka ku siyerisana ka rixaka?
3 Hi gandzelo rakwe hikwalaho ka ntwanano lowuntshwa, Yesu u ve Muprista Lonkulu wa Yehova. A nga vanga tano hi ntukulu wa ntumbuluko eka Aroni, muprista lonkulu wo sungula wa Israyele. U vekiwile entirhweni lowu wa Muprista Lonkulu hi ku hlambanya ka Yehova Xikwembu lexi Tlakukeke, Muendli wa Vaprista. Marito ya Psalma 110:4 ya tirha eka Yesu: “Yehova u hlambanyile: (A nga ka a nga hundzuki): ‘U muprista hi laha ku nga heriki, hi mukhuva wa Melkisedek.’”—Vaheveru 7:20, 21.
4. (a) I muxaka wihi wa “Israyele” loyi Yehova a endleke xitshembiso xa ntwanano lowuntshwa na yena, naswona ha yini? (b) Lava tekeriweke eka ntwanano lowuntshwa va vile vana va mutswari wihi?
4 Handle ka masalela lamantsongo, rixaka ra Israyele wa ntumbuluko ri arile ku teka Yesu Kriste tanihi Muhlanganisi wa ntwanano lowuntshwa. Xisweswo “yindlu ya Israyele” leyi Xikwembu xi endleke ntwanano lowuntshwa na yona yi tikombe yi ri Israyele wa moya, “Israyele wa Xikwembu.” (Vagalatiya 6:16) Israyele yoloye wa moya u velekiwe hi siku ra Pentekosta ya 33 C.E. Hi ku va wa moya, a a ta amukela Vayuda lava nga pfumeriki kumbe Vamatiko tanihi vaaki-ndhawu. (Mintirho 15:14) Petro u vulavule hi rona tanihi “rixaka leri hlawuriweke, ni vaprista va Hosi, tiko leri hlawulekeke.” (1 Petro 2:9) ‘Rixaka leri ro hlawuleka’ ri endliwe hi vana va moya va Abrahama Lonkulu, Yehova, Muendli ni Muhetisisi wa ntwanano wa Abrahama. Kutani, hi nkarhi wun’we i “vana” va nhlengeletano ya Yehova ya le tilweni leyi fanaka ni wansati, leyi faniseriweke hi Sara, nkata Abrahama. Hi laha ku nga papalatekiki, ntwanano lowuntshwa wa Abrahama Lonkulu wu languta nhlengeletano yoleyo ya le tilweni tanihi mana wa “rixaka” leri tshembisiweke, leri faniseriweke hi Isaka.
“Tinyimpfu Tin’wana” Ti Katsiwile Eka Ntlhambi Wun’we
5. Xana ntwanano lowuntshwa a wu lava yini laha misaveni?
5 Ntwanano wolowo lowuntshwa a wu lava vatirheli lava chivirikaka laha misaveni, naswona swirho swa masalela lama totiweke swi tirhe tanihi swirhangana leswi fanelekaka swinene swa “vatirheli va ntwanano lowuntshwa” lowu siveke ntwanano wa khale wa Nawu wa Muxe. (2 Vakorinto 3:6) A hi vafundhisi endzeni ka madzana ya mintlawa ya vukhongeri ya Vujagana, xiphemu lexi xiyekaka xa Babilona Lonkulu wa manguva lawa. Va hlayisile xileriso xa Nhlavutelo 18:4 naswona va humile eka mfumo wolowo wa misava wa vukhongeri bya mavunwa.
6. (a) Nhlayo ya vatirheli va ntwanano lowuntshwa yi hikeriwe eka vangani? (b) Xana hi swi tivisa ku yini leswaku Murisi Lonene a a ta hundzuluxela nyingiso wakwe eka lava nge handle ka ntwanano lowuntshwa?
6 Nhlayo ya vatirheli va ntwanano wolowo lowuntshwa a yi fanele ku va 144 000 ntsena. (Nhlavutelo 7:1-8; 14:1-5) Kutani nkarhi a wu fanela ku ta laha Murisi Lonene a a ta kokela nyingiso wakwe eka vatirheli va ntwanano lowuntshwa. Mutirheli-nkulu wa Yehova u vone leswi naswona a a vulavula hi leswi loko a vurile eka Yohane 10:16, leswaku u na “tinyimpfu tin’wana” leti a ti nga ri ta “ntlhambi wun’we” wa 144 000.—Luka 12:32.
7. (a) Hikwalaho ka yini swirho swa ntlawa wa “tinyimpfu tin’wana” swi nga ri vatirheli va ntwanano lowuntshwa? (b) Xana masalela ya lava va nga le ka ntwanano lowuntshwa ana se ya ve nkateko eka mindyangu ni matiko ya misava hi ndlela yihi?
7 Hambi leswi “tinyimpfu tin’wana” a ti nga ta va ta “ntlhambinyana,” na tona a ti ta va vatirheli va Xikwembu, kambe hayi vatirheli va ntwanano lowuntshwa. Naswona mhaka ya leswaku ‘tinyimpfu teto tin’wana’ a ti ta va “ntlhambi wun’we” ni masalela ya ‘vatirheli volavo va ntwanano lowuntshwa’ a swi ta komba swin’wana leswinene. Yini? Leswi: Loko ya nga si dzunisiwa eMfun’weni wa le matilweni, masalela hi woxe a ma fanele ku tihlanganisa ni “tinyimpfu tin’wana” emisaveni. Hi ndlela leyi masalela ya rixaka ra moya ra Abrahama a ya ta sungula ku va nkateko eka mindyangu ni matiko hinkwawo emahlweni ka “nyimpi ya siku lerikulu ra Xikwembu xa Matimba Hinkwawo” eArmagedoni ni le mahlweni ka ku sungula ka Gidi ra Malembe.—Vagalatiya 3:29; Nhlavutelo 16:14, 16.
8. Xana Murisi Lonene u hundzuluxele nyingiso wakwe eka lava va nga ehandle ka ntwanano lowuntshwa rini, naswona i goza rihi ro sungula leri “tinyimpfu tin’wana” ti ri tekeke?
8 Hakunene leswi swi tikombe swi ri tano, ngopfu-ngopfu ku sukela hi 1935. Ku sukela kwalaho, timiliyoni ta ‘tinyimpfu teto tin’wana’ ti tihlanganisile ni makume ya madzana ya mabandlha ya Timbhoni ta Yehova emisaveni hinkwayo naswona ti tinyiketerile hi toxe eka Murisi la Tlakukeke, Yehova Xikwembu. Xisweswo va amukeriwile eka “ntlhambinyana” wa Murisi Lonene, Yesu Kriste.
9. Xana ku anamisiwa ka nyingiso wa Muhlanganisi wa ntwanano lowuntshwa a ku vula leswaku vutirheli bya ntwanano lowuntshwa a byi herile emisaveni?
9 Xana mhaka ya leswaku Muhlanganisi wa ntwanano lowuntshwa, ku sukela kwalaho, a a anamise nyingiso wakwe wu katsa ni “tinyimpfu tin’wana” swi vula leswaku vutirheli bya ntwanano lowuntshwa byi hele hi 1935? Doo, hikuva ku na masalela ya vatirheli va ntwanano lowuntshwa lava va ha riki kona emisaveni, naswona va ha fanela ku hetisisa vutirheli byolebyo.
10. I vamani lava namuntlha va vuyeriwaka hi vutirheli bya ntwanano lowuntshwa lebyi nyikeriweke hi vatsari va nhungu va Matsalwa ya Xigriki ya Vukriste?
10 Namuntlha, masalela ya “ntlhambinyana” kun’we ni “ntshungu lowukulu” lowu andzaka wa “tinyimpfu tin’wana” ta Murisi Lonene ya vuyeriwa hi vutirheli bya van’wana lava buleke ndlela, vo tani hi muapostola Pawulo. Eku endleni ka vutirheli byakwe bya ntwanano lowuntshwa hi ku tshembeka ku fikela eku feni kakwe eRhoma emahlweni ka ku va Yerusalema a lovisiwa hi 70 C.E., Pawulo u huhuteriwe ku tsala tibuku ta 14 ta 27 wa Matsalwa ya Vukriste ya Xigriki. I ku tlangela muni konghasi loku masalela lama totiweke ni “ntshungu lowukulu” wa “tinyimpfu tin’wana” va nga vaka na kona leswi vavanuna volavo vo tshembeka va lembe xidzana ro sungula, vo tani hi muapostola Pawulo ni vatsari van’wana va nkombo va Matsalwa ya Vukriste ya Xigriki, va endleke vutirheli bya vona bya ntwanano lowuntshwa ku ya fika emakumu ka vutomi bya vona bya laha misaveni! Kutani enkarhini wa hina, timiliyoni ta “tinyimpfu tin’wana” se ti vuyeriwile eka vutirheli bya ntwanano lowuntshwa, tanihi leswi byi nyikeriwaka hi masalela lama totiweke ehansi ka Muhlanganisi, Yesu Kriste. “Hosana ya ku Rhula,” sweswi se yi kokele nyingiso wa yona eka ‘tinyimpfu leti tin’wana,’ leti rhandzekaka, leti nhlayo ya tona yi kuleke hi ku hatlisa.
11. (a) Xana ntwanano lowuntshwa wu ve lowu tirhaka hi nkarhi wo tani hi kwihi, naswona leswi swi komba yini? (b) Masalela ya vatirheli va ntwanano lowuntshwa ya tirha eka xiyimo xihi namuntlha?
11 Hambi swi ri tano, nkarhi wu fanele sweswi wu hela! Ntwanano lowuntshwa se wu ve lowu tirhaka hi malembe ya 1953, malembe ya 407 hi ku leha ku tlula ntwanano wa Nawu wa Muxe lowu wu wu siveke, naswona nhlayo ya vatirheli va ntwanano lowuntshwa ya hunguteka loko swirho swi hundza emisaveni hi ku fa. Kambe masalela ya namuntlha ya vatirheli volavo ya hambeta ya tirha tanihi “nandza lowo tshembeka, lowa vutlhari” loyi N’wini, Yesu Kriste, a n’wi hlawuleleke “hinkwaswo leswi a swi fuweke.”—Matewu 24:45-47.
Ku Kurisa Xirhambo: “Tana!”
12. Ku ya hi Nhlavutelo 22:17, i xirhambo xihi lexi ntlawa wa “mutekiwa” wu xi twarisaka, naswona eka vamani?
12 I ntirho wa rirhandzu swonghasi lowu endliwaka hi vatirheli volavo va ntwanano lowuntshwa! Hi xikombiso, eka Nhlavutelo 22:17 ha hlaya: “Moya ni Mutekiwa va ri: ‘Tana!’ Ni loyi a swi twaka a a vule a ku: ‘Tana!’ Loyi a nga ni torha a a te; ni loyi a swi navelaka a a teke mati ya vutomi a nga hakeli.” Ntlawa wa “mutekiwa,” kun’we ni matimba lama tirhaka ya Yehova, kumbe moya, wu anamisela xirhambo xolexo eka lava nga ehandle ka ntwanano lowuntshwa. Xirhambo xi kurisiwile, hayi eka lava sweswi va feke emasirheni lava va nga ta katekisiwa hi ku pfuxiwa eku feni, kambe eka vanhu lava sweswi va hanyaka, lava nga ekhombyeni ra ndzoviso eArmagedoni kambe lava nga ni tindleve leti twaka.
13. (a) Xana xirhambo lexi twarisiweke hi ntlawa wa “mutekiwa” xi vile xa hava? Hlamusela. (b) Lava se va amukeleke xirhambo xa kona va endla yini ku yingisa Nhlavutelo 22:17? (c) Ku fanele ku va njhani mayelana ni nkarhi lowu saleke wo twarisa xirhambo?
13 Xirhambo lexi xa rirhandzu a xi anamiseriwanga mahala emisaveni hinkwayo ngopfu-ngopfu ku sukela hi 1935. Ku tlula timiliyoni tinharhu se ti amukerile xirhambo lexi hlamarisaka xo ta ta nwa. Tanihi lava hi ku tlangela va tweke, hi ku yingisa va byela vanhu van’wana vo tala va timiliyoni lava nga ni torha ra vutomi lebyi nga heriki eparadeyisini emisaveni va ku, “Tana!” Kambe nkarhi wa ku anamisela xirhambo lexi xo hlamarisa eka “tinyimpfu tin’wana” wu hikiwile. Endzhaku ka hafu ya lembe xidzana ya ku va xi karhi xi anamisiwa, nkarhi lowu seleke sweswi wu fanele wu ri wuntsongo swinene, leswi nyimpi ya Xikwembu eArmagedoni yi taka hi ku hatlisa eka “rixaka leri” ra vanhu.—Matewu 24:34.
14. Hi fanele ku nyika Yehova minkhenso ni ku dzuneka hi mhaka ya yini?
14 Kutani, sweswi, hi nkhensa Yehova leswi a hi lunghiseleleke Muhlanganisi loyi a fanelekaka loyi hi ndlela leyi humelelaka a hetisisaka xikongomelo xa ntwanano lowuntshwa eku humeseni ka vanhu, va vito ra yena, 144 000 leyi tiyeke! Ku dzuneka na kona ku ya eka Yehova leswi Muhlanganisi wakwe tanihi Murisi Lonene ana se a tisaka timiliyoni leti engetelekaka ta “tinyimpfu tin’wana” eka “ntlhambi wun’we,” laha se wu ngheneke eka mikateko yo sungula leyi khulukelaka eka vanhu yi huma eka ntwanano lowuntshwa!
[Xifaniso lexi nga eka tluka 111]
Timiliyoni ta “tinyimpfu tin’wana” ti tile enhlengeletanweni leyi vonekaka ya Yehova emasikwini lawa ya makumu