Xiviko Xa Vahuweleri Va Mfumo

Ku Tirha Nsimu Leyi Nga Yoxe eParaguay Ku Tswala Mihandzu

RHAVI ra Sosayiti ya Watch Tower ra le Paraguay ra xi xiya swinene xilaveko xo chumayela mahungu lamanene ya Mfumo ensin’wini ya rona hinkwayo. (Mintirho 1:8) Lowu i nkarhi wa leswaku hinkwavo va dyondza hi ta Mfumo ni ku tirhela Yehova a nga si herisa mafambiselo lawa ya swilo lama hombolokeke eka ‘nhlomulo lowukulu’ lowu taka. (Matewu 24:21, 22) Mintokoto leyi landzelaka yi kombisa leswi endliwaka leswaku ku pfuniwa vanhu etinsin’wini leti nga aviwangiki. Rhavi ra vika:

Ku endliwe malunghiselelo yo tirha nsimu hinkwayo leyi nga aviwangiki hi ku tirhisa maphayona yo hlawuleka ya nkarhinyana. Hi tin’hweti ta November ku ya eka January ta lembe ra ntirho ra 1990, vamakwerhu va 39 va hlanganise dzana ra madoroba-nkulu ni madoroba-ntsongo laha ku nga si vaka ni vahuweleri va Mfumo. Va swi kotile ku hangalasa tibuku ta 6 119, swibukwana swa 4 262 na timagazini ta 5 144. Hikwalaho ka ntirho lowu ku vumbiwa mintlawa leyintshwa ya vahuweleri.

◻ Wansati un’wana u amukele buku leyi nge U Nga Hanya Hi Masiku aParadeyisini eMisaveni eka makwerhu wa xisati la nga phayona loyi a tirha ensin’wini leyi nga aviwangiki. Phayona rero ri tinyiketele ku fambisa dyondzo ya Bibele na yena, kutani u pfumele hi ntsako. Loko phayona ri tlhelela a ri nga ha rindzeriwanga hi wansati yoloye ntsena kambe na hi nuna wa yena kun’we ni vana va vona va khume. Eka riendzo leri landzeleke, ndyangu wolowo kun’we ni vanghana ni vaakelani a va tilulamisele dyondzo ya Bibele! A va rhambiwile hi wansati yoloye, a va byela leswaku dyondzo a a yi ri kahle swinene naswona ntshembo ni mikateko leyi Yehova a yi nyikelaka i yinene. Lowu a ku ri nchumu lowu a a nga si tshama a wu twa eka munhu wo karhi, kutani u vone leswaku vaakelani ni vanghana va yena a va fanele va twa mahungu lawa lamanenene.

Nkarhi hinkwawo loko phayona ri fambisa dyondzo, a ku va ni vanhu vo tala lerova swi vonaka onge i bandlha leritsongo. Vanhu lava, lava tsakelaka va vutise swivutiso swo tala naswona a va hlanganyela edyondzweni. Loko phayona ri hlamusele leswaku ri ta boheka ku famba ni vanakulobye va rona ri ya eka nsimu leyintshwa loko va hetile ku tirha nsimu yoleyo, wansati yoloye u vutisile hi ku vilela leswaku ku ta endliwa yini hi vanhu lava tsakelaka. Ku endliwile malunghiselelo ni vamakwerhu va bandlha leri nga ekusuhi swinene leswaku va ya emahlweni na dyondzo. Sweswi ku averiwe maphayona yo hlawuleka ku pfuna vanhu valavo lava tsakelaka, lava fanaka ni tinyimpfu.

◻ Loko a ri karhi a famba hi yindlu ni yindlu ensin’wini yin’wana leyi nga aviwangiki, makwerhu wa xisati la nga phayona u kume wanuna loyi a kumeke buku leyi nge Ntiyiso Lowu Yisaka eVuton’wini Lebyi Nga Heriki malembe ya khume lama hundzeke. Hi mpfhuka enkarhini wolowo a nga ha hlangananga ni Timbhoni ta Yehova. Hambi swi ri tano, a a swi tiva leswaku Yehova, loyi a a n’wi vitana Yehova wa tinyimpi, hi yena ntsena Xikwembu xa ntiyiso ni leswaku hi Yena ntsena loyi a faneleke ku gandzeriwa. Hi ku tikarhata ka yena n’wini a a vulavula hi Yehova eka un’wana ni un’wana loyi a n’wi tivaka. Entiyisweni, vhiki na vhiki a a famba tikhilomitara tinharhu a endzela mpatswa lowu tsakelaka leswaku a ya vulavula na wona hi ta Xikwembu hikuva, hi ku vula ka yena, ‘Loko ndzo tshika ku va endzela, va ta rivala hi ta Yehova.’ Ku engetela eka mpatswa lowu wu tekaneke, a a ku ri ni van’wana va khume lava a va lava dyondzo ya Bibele—hinkwaswo leswi swi vangiwe hi leswi munhu loyi a tsakelaka a va chumayeleke.

Lexi xiyekaka, masiku ma nga ri mangani loko phayona ri nga si n’wi endzela, wanuna loyi u alele muprista wa kwalaho ni valandzeri vakwe ku nghena ekaya ra yena ni xifaniso xa wanhwana, a hlamusela leswaku a a nga pfumeli eka swifaniso. Muprista a a hlandzukile. Vusiku byebyo wanuna loyi u khongerile eka Yehova a kombela mpfuno. Kutani anakanya ndlela leyi a a nyanyukile ni ku tsaka ha yona loko phayona ri n’wi endzela! Malunghiselelo ma endliwile hi xihatla leswaku ku va ni dyondzo ya Bibele ya nkarhi hinkwawo, naswona wanuna loyi u ya emahlweni ni ku endla nhluvuko eku hlanganyeleni ni nhlengeletano ya le tilweni.

Entiyisweni, Yehova wa wu katekisa ntirho wo hlengeleta eParaguay tanihi leswi vamakwerhu va chivirikelaka ku nyikela vumbhoni bya rixaladza etinsin’wini leti ti nga aviwangiki.—Matewu 24:14.