Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri ya nkoka lowunene eka wena? Kutani kambela mianakanyo ya wena hi leswi landzelaka:

▫ A a xi ri xihi xikongomelo-nkulu xa ku hanyisa ka Yesu?

A ku ri ku khutaza ntshungu lowukulu wa vanhu lava fanaka ni tinyimpfu namuntlha, a a ku fanekisela leswaku vaponi va Armagedoni va ta hanyisiwa endzhakunyana ka Armagedoni. (Esaya 33:24; 35:5, 6)—12/15, tluka 12.

▫ Ha yini hi lava xitsundzuxo xa nkarhi na nkarhi, lexi nge: “Mi chivirika eku khongeleni”? (Varhoma 12:12)

Mintshikilelo ya vutomi ni vutihlamuleri minkarhi yin’wana swi nga hi tikela swinene lerova hi rivala ku khongela. Kumbe swiphiqo swi nga hi talela ivi swi hi endla leswaku hi tshika ku tsaka eku languteleni ka Mfumo, hambi ku ri ku tshika ku khongela. Xisweswo, hi lava switsundzuxo leswi nga hi khutazaka ku khongela naswona hi ndlela leyi hi tshinela ekusuhi swinene na Yehova.—12/15, tluka 14.

▫ I yini lexi kombisaka leswaku Ndhambi ya siku ra Nowa yi siye ntlhaveko lowu nga rivalekiki erixakeni ra vanhu?

Ku pimanyetiwe leswaku mintsheketo ya Ndhambi yo tlula 500 ya tsheketiwa hi tinxaka ni vanhu vo tlula 250. Ku nga kumiwa swilo swo karhi leswi fanaka eka mintsheketo leyi hinkwayo.—1/15, tluka 5.

▫ Xana vaprofeta va mavunwa namuntlha va fana njhani ni va siku ra Yeremiya?

Vaprofeta va mavunwa va namuntlha va vula leswaku va yimela Xikwembu, kambe va yiva marito ya Xikwembu hi ku chumayela swilo leswi hambukisaka vanhu eka leswi Bibele yi vulaka swona hakunene. Leswi swi tano ngopfu-ngopfu malunghana ni ku dyondzisa hi Mfumo. (Yeremia 23:30)—2/1, tluka 4.

▫ Swi vula yini loko munhu a khuvuriwa hi vito ra moya lowo kwetsima?

Leswi swi vula leswaku loyi a khuvuriwaka u tiyimisele ku tirhisana ni moya, a nga endli nchumu lexi sivelaka ku tirha ka wona eka vanhu va Yehova. Xisweswo, munhu yoloye u fanele a tirhisana ni nandza lowo tshembeka ni wa vutlhari ni lunghiselelo ra vakulu ebandlheni. (Vaheveru 13:7, 17; 1 Petro 5:1-4)—2/1, tluka 18.

▫ Ha yini ku gandzela swifaniso ku onha lava swi gandzelaka?

Bibele yi kombisa leswaku swifaniso swa n’wi nyenyetsa Yehova Xikwembu naswona lava tinyiketeke eka swona a swi va pfuni ku tshinela eka Xikwembu. (Deuteronoma 7:25; Psalma 115:4-8) Sathana Diyavulosi u “pfarile miehleketo” ya vanhu leswaku ntiyiso wu nga ‘vangami.’ (2 Vakorinto 4:4) Kutani loko munhu a gandzela xifaniso, u le ku tsakiseni ka mademona. (1 Vakorinto 10:19, 20)—2/15, matluka 6-7.

▫ Ha yini tinyimpfu a a ti tekiwa tanihi rifuwo ra ntikelo emikarhini ya Bibele?

Voya a byi ri nchumu wo pfuxeta swilo ha wona naswona a byi tirhisiwa ku endla swiambalo swa ndyangu kumbe byi xavisiwa. Timhondzo ta makhuna a ti tirhisiwa ku tivisa Yubili kumbe ku ba hungwe kumbe ku kongomisa mavuthu ya tinyimpi. Tanihi leswi tinyimpfu a ti ri exikarhi ka swifuwo leswi tengeke leswi Vaisrayele va nga swi dyaka, ntlhambi wa tinyimpfu a wu nyikela mphakelo wa swakudya naswona nkarhi na nkarhi wu nyikele mphakelo wa masi yo nwa kumbe yo endla botere.—3/1, matluka 24-5.

▫ Xana lava rhandzaka Xikwembu va kombela yini loko va khongelela ku ta ka Mfumo wa Xikwembu? (Matewu 6:10)

Va kombela leswaku Mfumo wa Xikwembu wa le matilweni wu teka goza leri tiyeke ro herisa mafambiselo ya tihulumendhe leti endliweke hi vanhu, leti nga tsandzeka ku hetisisa xitshembiso xa tona xo tisa ku rhula ni nsirhelelo. (Daniel 2:44)—3/15, tluka 6.

▫ A va ri va mani Valweri va Ripfumelo, naswona xana va byi dyondzisile Vunharhu-un’we?

Valweri va Ripfumelo a va ri vavanuna lava hanyeke eku heleni ka xiphemu xa lembe xidzana ra vumbirhi. Va tsale va sirhelela Vukriste lebyi va byi tivaka, eka tifilosofi leti kanetaka leti a ti ri kona emisaveni ya Rhoma. Ku hava na un’we wa vona la dyondziseke Vunharhu-un’we.—4/1, matluka 24-9.

▫ Xana Zakariya, tata wa Yohane Mukhuvuri, u endliwe mafandleve kun’we ni mbheveve, hi laha Luka 1:62 yi vonakaka yi kombisa ha kona?

Gabriyele u vule leswaku ku ta khumbeka ririmi ra Zakariya ku nga ri ku twa ka yena. (Luka 1:18-20) Luka 1:64 yi ri: “Kan’we-kan’we nomo wa yena [Zakariya] ni ririmi ra yena swi ntshunxeka; kutani a vulavula.” Xiya leswaku, a ku boxiwanga leswaku ku twa ka yena ku khumbekile hi ndlela yo karhi. Leswi ku boxiwaka ku “kombetela-kombetela” eka Luka 1:62 ku nga vula leswaku ku tirhisiwe ku tshukatshukisa miri leswaku Zakariya a kombisa xiboho xa yena.—4/1, tluka 31.