Xana Bibele I Nyiko Leyi Humaka Eka Xikwembu Hakunene?
“NDZI anakanya leswaku Bibele i nyiko leyinene ngopfu eka leti Xikwembu xi nga tshama xi ti nyika vanhu.” Nhlamuselo yoleyo yi nyikeriwe hi Abraham Lincoln, muungameri wa vu-16 wa United States.a A a nga ri yena ntsena loyi a tlangeleke buku leyi ya khale.
Holobye wa Britain wa lembe xidzana ra vu-19 William E. Gladstone u te: “Bibele yi funghiwa hi Masungulo lama Hlawulekeke, naswona yi hambanile swinene ni tibuku tin’wana.” Hi ndlela leyi fanaka, holobye wa Amerika wa lembe xidzana ra vu-18, Patrick Henry, u te: “Bibele i ya nkoka ku tlula tibuku hinkwato leti nga tshama ti kandziyisiwa.” Loko handle ko kanakana a khumbiwe hi Matsalwa, mufumi wa le Furwa Napoléon Bonaparte u hlamuserile: “Bibele a yo va buku ntsena, kambe i Nchumu lowu Hanyaka, lowu nga ni matimba lama hlulaka hinkwaswo leswi yi kanetaka.”
Eka van’wana, Bibele yi ve xihlovo xa mpfuno ni nchavelelo. Jenerala wa Huvo ya Tiko ya Amerika, Robert E. Lee u te: “Bibele a yi tsandzekanga ku ndzi nyika vutivi ni matimba, eka ku nonon’hweriwa ni maxangu ya mina hinkwawo.” Kutani hikwalaho ka ku tlangela ka yena buku leyi, muungameri wa le U.S. John Quincy Adams u te: “Malembe yo tala ndzi endle leswaku swi va ntolovelo wa mina ku hlaya Bibele kan’we hi lembe.”
Loko Loyi a nge Henhla-henhla a nyike vanhu Bibele, ku fanele ku va ni vumbhoni bya leswaku yi huhuteriwe hi Xikwembu. Yi fanele yi va leyikulu ku tlula buku yihi na yihi. Nakambe, leswaku Bibele yi va xihlovo xa ntiyiso xa matimba ni xitsundzuxo, yi fanele yi tshembeka hi ku helela. Kutani ke, ku tlakuka xivutiso lexi nge, Xana Bibele i nyiko leyi humaka eka Xikwembu hakunene? A hi laveni nhlamulo ya xivutiso xexo emhakeni leyi landzelaka.
[Nhlamuselo ya le hansi]
a Kavula, ku na nyiko leyikulu—Yesu Kriste.—Yohane 3:16.
[Swifaniso leswi nga eka tluka 3]
William E. Gladstone
[Xihlovo Xa Kona]
U.S. National Archives photo
Abraham Lincoln
[Xihlovo Xa Kona]
U.S. National Archives photo
Patrick Henry
[Xihlovo Xa Kona]
Harper’s U.S. History
Napoléon Bonaparte
[Xihlovo Xa Kona]
Drawn by E. Ronjat
John Quincy Adams
[Xihlovo Xa Kona]
Harper’s U.S. History
Robert E. Lee
[Xihlovo Xa Kona]
U.S. National Archives photo