Pawulo A Hambana Na Plato Malunghana Ni Ku Pfuxiwa Ka Vafi

MUAPOSTOLA Pawulo u tsale hi ta ku pfuxiwa ka vafi eka 1 Vakorinto 15:35-58 ni le ka 2 Vakorinto 5:1-10. Hi ku endla tano, xana u landzele mianakanyo ya ku nga fi ka moya-xiviri wa munhu ya Plato ni ya vativi va filosofi va Magriki, kumbe xana a a pfumelelana ni dyondzo ya Yesu ni Matsalwa laman’wana hinkwawo?

Xibukwana lexi nge Immortality of the Soul or Resurrection of the Individual: St. Paul’s View with Special Reference to Plato, lexi tsariweke hi 1974 naswona xi seketeriwa hi bixopo lonkulu wa Kereke ya Orthodox ya Magriki ya le N’walungwini ni le Dzongeni wa Amerika, xi nyikela nhlamulo leyi nga erivaleni. Endzhaku ko vulavula hi muxaka wa ku pfuxiwa ka vafi ematsalweni lama boxiweke laha henhla ni nkucetelo wa Magriki enkarhini wolowo, mutsari u fikelela mahetelelo lama landzelaka:

“Plato u dyondzisa leswaku moya-xiviri wu ya emahlweni wu hanya wu hambane na miri. Hi ku ya hi Plato, moya-xiviri a wu fi hi ndzhaka . . . St. Paul a nga yi dyondzisi mianakanyo yo tano kumbe ku tivulela marito yo karhi leswaku a hlamusela sweswo . . .

“Muapostola Pawulo a nga dyondzisi hi ta ku nga fi ka psyche kumbe moya, tanihi lowu nga ni swiphemu leswi hambaneke, kambe u dyondzisa hi ta ku pfuxiwa ka vafi ka miri hinkwawo wa munhu lowu vumbiweke hi moya-xiviri ni moya hikwalaho ka ku pfuxiwa ka Kriste. Mianakanyo ya Pawulo ya ku pfuxiwa ka miri a yi fambelani ni ku pfuxetiwa ka mimiri leyi feke emasirheni.

“Mianakanyo ya yena hi ta ku pfuxiwa ka miri yi nga hlamuseriwa ku antswa tanihi ku hundzuriwa, ku tumbuluxiwa nakambe ni ku vumbiwa nakambe ka munhu yoleyo a fanaka hi ku helela, ka vumunhu, ka xivumbiwa lexi nga ni vuswikoti byo anakanya, ka munhu wa xiviri la anakanyaka kahle, hi matimba ya Xikwembu. Ku pfuxiwa ka hina ka nkarhi lowu taka ku ta humelela, ku nga ri tanihi nchumu lowu hi nga na wona wa ntumbuluko, kambe tanihi nyiko ya vuhosi ya Xikwembu.”

Ina, ku nga fi a hi nchumu lowu hi tswariwaka na wona hi ndzhaka. Ematshan’wini ya sweswo, i nyiko leyi xiximekaka ni ya tintswalo, leyi humaka eka Yehova hi ku tirhisa Hosi ya hina Yesu Kriste eka lava va vumbaka bandlha leri totiweke ra Vukriste.—1 Vakorinto 15:20, 57; Vafilipiya 3:14.

[Xifaniso lexi nga eka tluka 9]

Plato Mutivi wa filosofi wa Mugriki

[Xihlovo Xa Kona]

Vatican Museum photograph