Tirhisani Ntshunxeko Wa N’wina Wa Vukriste Hi Vutlhari

“Hanyani tanihi vanhu lava ntshunxekeke . . . tanihi malandza ya Xikwembu.”—1 PETRO 2:16.

1. I ntshunxeko wihi lowu Adamu a lahlekeriweke ha wona, naswona i ntshunxeko wihi lowu Yehova a nga ta vuyetela vanhu eka wona?

LOKO vatswari va hina vo sungula va dyoha entangeni wa Edeni, va endle leswaku vana va vona va lahlekeriwa hi ndzhaka leyi vangamaka—ku ntshunxeka eka xidyoho ni vubihi. Hikwalaho, hinkwerhu ka hina hi velekiwe hi ri mahlonga ya vubihi ni rifu. Kambe, lexi tsakisaka, Yehova u ni xikongomelo xo vuyetela vanhu lava tshembekaka eka ntshunxeko lowunene. Namuntlha, vanhu va timbilu letinene hi ku chivirika va yimele “leswaku Xikwembu xi kombisa erivaleni vana va xona,” leswi nga ta endla leswaku va “ntshunxiwa . . . evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.”—Varhoma 8:19-21.

‘Va Toteriwe Ku Chumayela’

2, 3. (a) I vamani “vana va Xikwembu”? (b) I xiyimo xihi lexi tsakisaka lexi va xi tsakelaka, leswi tisaka vutihlamuleri byihi?

² I vamani ‘vana lava va Xikwembu’? I vamakwerhu lava totiweke va moya va Yesu lava nga ta fuma na yena eMfun’weni wa le tilweni. Vo sungula va vona va humelele eka lembe xidzana ro sungula C.E. Va amukele ntiyiso lowu ntshunxaka lowu Yesu a wu dyondziseke, naswona ku sukela hi Pentekosta ya 33 C.E., va hlanganyele eka malunghelo lama vangamaka lawa Petro a vulavuleke ha wona loko a va tsalerile a ku: “Kambe n’wina, mi rixaka leri hlawuriweke, mi vaprista va Hosi, mi tiko leri hlawulekeke, vanhu lava nga va Xikwembu hi xiviri.”—1 Petro 2:9a; Yohane 8:32.

³ Ku va vanhu va Xikwembu lava hlawulekeke—mawaku nkateko wonghasi! Naswona masalela ya manguva lawa ya vana lava va Xikwembu lava totiweke ya tsakela xiyimo lexi fanaka lexi katekisiweke hi Xikwembu. Kambe lunghelo ro tano lerikulu ri na vutihlamuleri. Petro u yisa nyingiso eka byin’wana bya byona loko a ya emahlweni a ku: “Leswaku mi ta kota ku twarisa mintirho leyo saseka ya loyi a mi vitaneke ku huma emunyameni, mi ta nghena eku vonakaleni ka yena loku hlamarisaka.”—1 Petro 2:9b.

4. Vakriste lava totiweke va byi hetisise njhani vutihlamuleri lebyi teke ni ntshunxeko wa vona wa Vukriste?

⁴ Xana Vakriste lava totiweke va byi hetisisile vutihlamuleri lebyi byo twarisa mintirho ya Xikwembu hinkwako-nkwako? Ina. Loko a profeta hi vatotiwa ku sukela hi l919, Esaya u te: “Moya wa Hosi, Yehova, wu le ka mina, hikuv̌a o nḍi totile ku byela ŝisiwana e mahungu ya ku saseka; o nḍi rumile ku horisa la’va nga ni timbilu le’ti v̌av̌isekaka, ku tiv̌isa la’v̌a bohiweke leŝaku va ta nṭhunšiwa, ni la’va khoṭiweke leŝaku v̌a ta humesiwa; ni ku v̌ula lembe le’rinene ra Yehova, ni siku ra ku tirihisela ka Šikwembu ŝa hina.” (Esaya 61:1, 2) Namuntlha, masalela lama totiweke, lama landzelaka xikombiso xa Yesu, loyi tsalwa leri ri tirheke swinene eka yena, hi ku chivirika va twarisa mahungu lamanene ya ntshunxeko eka van’wana.—Matewu 4:23-25; Luka 4:14-21.

5, 6. (a) Ku humelele yini hikwalaho ka ku chumayela hi ku chivirika ka Vakriste lava totiweke? (b) I malunghelo ni vutihlamuleri byihi lebyi lava va ntshungu lowukulu va byi tsakelaka?

⁵ Hikwalaho ka ku chivirika ka vona eku chumayeleni, ku humelele ntshungu lowukulu wa tinyimpfu tin’wana wu humelerile emasikwini lawa ya namuntlha. Va hume eka matiko hinkwawo ku joyina vatotiwa eku tirheleni ka Yehova, naswona ntiyiso wu va ntshunxile na vona. (Zakaria 8:23; Yohane 10:16) Tanihi Abrahama, va vuriwe lava lulameke exisekelweni xa ripfumelo naswona va sungule ku va ni vuxaka lebyikulu na Yehova Xikwembu. Naswona tanihi Rahava, ku vuriwa ka vona lava lulameke ku va yisa eku ponisiweni—ku nga ku ponisiwa eArmagedoni. (Yakobo 2:23-25; Nhlavutelo 16:14, 16) Kambe malunghelo yo tano lama tlakukeke na wona ma ni vutihlamuleri byo byela van’wana hi ku kwetsima ka Xikwembu. Hi yona mhaka leyi Yohane a va voneke va dzunisa Yehova erivaleni, “va huwelela hi rito leri tlakukeke va ku: ‘Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!’”—Nhlavutelo 7:9, 10, 14.

⁶ N’wexemu, ntshungu lowukulu, lowu sweswi wu tlulaka mune wa timiliyoni, kun’we ni ntlawa lowutsongo wa Vakriste lava totiweke lava saleke, va hete tiawara to lava ku va biliyoni eku twariseni ka mintirho ya Yehova ekule ni le kusuhi. Loku a ku ri ku tirhisiwa ka ntshunxeko wa vona wa moya hi ndlela yo antswa hi laha va nga kotaka ha kona.

“Xiximani Hosi”

7, 8. I vutihlamuleri byihi lebyi ntshunxeko wa Vukriste wu byi lavaka eka vafumi va misava, naswona emhakeni leyi, i langutelo rihi leri hoxeke leri faneleke ku papalatiwa?

⁷ Ntshunxeko wa hina wa Vukriste wu tisa vutihlamuleri byin’wana. Petro u tshahe byin’wana loko a tsale a ku: “Xiximani vanhu hinkwavo. Rhandzani nhlengeletano ya vamakwenu. Chavani Xikwembu. Xiximani hosi.” (1 Petro 2:17) Xana ku hlamuseriwa yini hi xiga lexi nge “xiximani hosi”?

⁸ “Hosi” yi yimela vafumi va misava. Namuntlha, moya wa ku nga xiximi vuhosi wu kurile emisaveni, naswona leswi swi nga ha khumba Vakriste hi ku olova. Mukriste a nga ha tlhela a tivutisa leswaku ha yini a fanele ku “xixima hosi,” kasi ‘misava hikwayo yi le hansi ka matimba ya lowo biha.’ (1 Yohane 5:19) Hikwalaho ka marito lawa, va nga tlula milawu leyi nga va oloveliki ku yi hlayisa ni ku nga hakeli swibalo loko swi balekeka. Kambe leswi swi ta va swi lwisana ni xileriso xa Yesu xo ‘nyika Khezari leswi nga swa Khezari.’ Entiyisweni ku ta va ku ‘tirhisa ntshunxeko wa vona tanihi xisirhelelo xo endla leswo biha.’—Matewu 22:21; 1 Petro 2:16.

9. Hi swihi swivangelo swimbirhi leswinene swo yingisa vafumi?

⁹ Vakriste va boheka ku xixima mfumo ni ku titsongahatela wona—hambi loko wu nga lulamanga. (Mintirho 5:29) Ha yini? Eka 1 Petro 2:14, 15, Petro u kombetela eka swivangelo swinharhu loko a vula leswaku vafumi va ‘rhumiwe hi Xikwembu ku xupula lava endlaka leswo biha ni ku dzunisa lava endlaka leswo lulama.’ Ku chava ku xupuriwa i xivangelo lexi ringaneke xo yingisa vuhosi. Vona ndlela leyi swi xumbadzaka ha yona loko un’wana wa Timbhoni ta Yehova a khotsiwa hikwalaho ka ku pfinya, vukhamba kumbe milandzu yin’wana! Anakanya ndlela leyi van’wana a va ta tsakela ku hangalasa nchumu wo tano ha yona! Hi tlhelo rin’wana, loko hi tiendlela ndhuma leyinene hi ku yingisa mfumo, hi kuma ku bumabumeriwa loku humaka eka vafumi lava nga yiki hi nghohe. Hi nga ha nyikiwa ntshunxeko lowu engetelekeke wo hambeta ni ntirho wa hina wo chumayela mahungu lamanene. Nakambe ‘hi ku endla leswinene hi pfala milomu leyi humesaka marito yo pfumala vutivi ya vanhu lava nga lulamangiki.’ (1 Petro 2:15b) Lexi i xivangelo xa vumbirhi xo yingisa vuhosi.—Varhoma 13:3.

10. Hi xihi xivangelo-nkulu xo yingisa vafumi?

¹⁰ Kambe ku ni xivangelo lexikulu. Mimfumo yi va kona hi ku pfumeleriwa hi Yehova. Hi laha Petro a vulaka ha kona, vafumi va politiki va ‘rhumiwe hi’ Yehova naswona i “ku rhandza ka Xikwembu” leswaku Vakriste va fumiwa hi vona. (1 Petro 2:15a) Hi laha ku fanaka, muapostola Pawulo u ri: “Tihosi leti nga kona, ti vekiwile hi Xikwembu.” Kutani ke, ripfalo ra hina leri leteriweke hi Bibele ri hi susumetela ku yingisa vafumi. Loko hi ala ku titsongahata eka vona, hi ta va hi “sola ku lerisa ka Xikwembu.” (Varhoma 13:1, 2, 5) I mani exikarhi ka hina la nga lwisanaka ni lunghiselelo ra Xikwembu hi vomu? Sweswo a swi ta va ku tirhisa ntshunxeko wa Vukriste hi ndlela yo biha swinene!

‘Rhandza Vamakwenu’

11, 12. (a) I vutihlamuleri byihi eka vapfumeri-kulorhi lebyi taka ni ntshunxeko wa hina wa Vukriste? (b) I vamani lava ngopfu-ngopfu va faneriwaka hi nkhathalelo wa hina wa rirhandzu, naswona hikwalaho ka yini?

¹¹ Petro na yena u vule leswaku Vakriste va fanele ku ‘rhandza nhlengeletano ya vamakwavo.’ (1 Petro 2:17) Lebyi i vutihlamuleri byin’wana lebyi taka ni ntshunxeko wa Vukriste. Vo tala va hina hi swirho swa bandlha. Hakunene, hinkwerhu ka hina hi xiphemu xa nhlengeletano hinkwayo ya vamakwerhu. Ku kombisa rirhandzu eka vona i ndlela ya vutlhari yo tirhisa ntshunxeko wa hina.—Yohane 15:12, 13.

¹² Muapostola Pawulo u kombise ntlawa wa Vakriste lava ngopfu-ngopfu va faneriwaka hi rirhandzu ra hina. U te: “Yingisani vafambisi va n’wina, mi titsongahata eka vona, hikuva va hitekela mimoya ya n’wina, tanihi vanhu lava nga ta vutisiwa ehenhla ka yona. Mi vona leswaku va tirha ntirho wa vona hi ku tsaka, va nga wu endli hi ku vilela, hikuva loko va vilela, a swi nga mi pfuni nchumu n’wina.” (Vaheveru 13:17) Lava va rhangelaka ebandlheni i vakulu. Ina, vanhu lava a va hetisekanga. Hambi swi ri tano, va vekiwa ehansi ka vurhangeri bya Huvo leyi Fumaka. Va rhangela hi ku va xikombiso lexinene ni ku ehleketelela, naswona va averiwe ku langutela mimoya-xiviri ya hina. Vona ndlela leyi xiavelo lexi xi tikaka ha yona! (Vaheveru 13:7) Lexi tsakisaka, mabandlha yo tala ya ni moya lowunene, wa ntirhisano naswona vakulu va tsaka ku tirhisana na wona. Swi tika ngopfu loko vanhu va nga lavi ku tirhisana. Nkulu a nga ha endla ntirho wa yena, kambe hi laha Pawulo a vuleke ha kona, u wu endla hi “ku vilela.” Ina, a hi lavi ku endla leswaku vakulu va vilela! Hi lava leswaku va tsaka entirhweni wa vona leswaku va ta hi aka.

13. Hi tihi tindlela tin’wana leti hi nga tirhisanaka ni vakulu ha tona?

¹³ I tindlela tihi leti hi nga tirhisanaka ni vakulu ha tona? Yin’wana i ku pfuna hi ku hlayisa ni ku basisa Holo ya Mfumo. Yin’wana i ntirhisano eka ntirho wo endzela vavabyi ni ku pfuna lava lamaleke. Ku engetela kwalaho, hi nga lwela ku tshama hi tiyile emoyeni, leswaku hi nga hundzuki ndzhwalo. Ndhawu ya nkoka yo tirhisana eka yona i ku hlayisa ku tenga ka mahanyelo ni vumoya bya bandlha, hi mahanyelo ya hina ni ku vika timhaka ta swidyoho leswikulu leswi tisiwaka enyingisweni wa hina.

14. Xana hi fanele ku ri amukela njhani goza ra vakulu ro laya?

¹⁴ Minkarhi yin’wana, leswaku va ta hlayisa bandlha ri basile, vakulu va boheka ku tsema mudyohi la nga hundzukiki. (1 Vakorinto 5:1-5) Leswi swi sirhelela bandlha. Nakambe swi nga pfuna mudyohi. Hakanyingi, ndzayo yo tano yi pfunile ku endla leswaku mudyohi a hundzuka. Kutani ke, ku vuriwa yini hi loko loyi a tsemiweke ku ri munghana lonkulu kumbe xaka? A hi nge munhu wa kona i tatana kumbe manana wa hina kumbe n’wana wa hina wa xinuna kumbe wa xisati. Xana ha ri xixima goza leri tekiweke hi vakulu? I ntiyiso, swi nga ha nonon’hwa. Kambe a ku ta va ku tirhisiwa loko biha swonghasi ka ntshunxeko wa hina, loko hi kanakana xiboho xa vakulu, kutani hi hambeta hi hlanganyela eka swilo swa moya ni munhu loyi a tikombeke a ri nhlohlotelo lowo biha ebandlheni! (2 Yohane 10, 11) Hinkwavo vanhu va Yehova va fanele ku bumabumeriwa hikwalaho ka ntirhisano wa vona etimhakeni to tano. Hikwalaho, nhlengeletano ya Yehova yi tshama yi basile eka misava leyi yi thyakeke.—Yakobo 1:27.

15. Loko munhu a endla xidyoho lexikulu, i yini lexi a faneleke ku hatlisa a xi endla?

¹⁵ Ku vuriwa yini hi loko hi endla xidyoho lexikulu? Hosi Davhida a a hlamusela lava Yehova a va rhandzaka loko a te: “I mani l’a nga ta tlhandlukela e nṭhav̌eni ya Yehova? Kambe i mani l’a nga ta ṭhama e v̌ukwetsimelweni bya yena? Hi loyi a nga ni ŝandla le’ŝi nga riki na nanḍu, ni mbilu le’yi tengeke. Loyi a nga nyiketiki moya wa yena eku hembela v̌unwa, l’a nga hlambanyiki hi ku šisa.” (Psalma 24:3, 4) Loko hikwalaho ka xivangelo xin’wana hi nga ha ri ‘lava pfumalaka nandzu eswandleni swa hina ni lava nga tengangiki etimbilwini,’ a hi tekeni goza ra xihatla. Vutomi bya hina lebyi nga heriki byi le khombyeni.

16, 17. Ha yini munhu loyi a nga ni nandzu wa xidyoho lexikulu a nga fanelanga ku ringeta ku lunghisa mhaka hi yexe?

¹⁶ Van’wana va phasiwe hi ndzingo wo tumbeta swidyoho swa vona leswikulu, kumbexana va ku: ‘Ndzi kombele ku rivaleriwa eka Yehova naswona ndzi hundzukile. Kutani ha yini ndzi fanele ndzi katsa vakulu?’ Mudyohi a nga ha xumbadzeka kumbe ku chava leswi vakulu va nga ta swi endla. Hambi swi ri tano, u fanele ku tsundzuka leswaku hambi leswi ku nga Yehova a ri yexe loyi a nga hi basisaka eka xidyoho, U endle leswaku vakulu va va ni vutihlamuleri lebyikulu bya ku tenga ka bandlha. (Psalma 51:2) Va kwalaho leswaku va hanyisa, va “pfuna vahlawuriwa va Xikwembu.” (Vaefesa 4:12) Ku nga yi eka vona loko hi lava mpfuno wa moya swi fana ni loko hi nga yi eka dokodela loko hi vabya.

¹⁷ Van’wana lava ringetaka ku tamela timhaka hi voxe va kuma leswaku endzhaku ka tin’hweti kumbe malembe, mapfalo ya vona ya ha va karhata swinene. Lexi khomisaka gome, van’wana lava fihlaka swidyoho leswikulu va tlhela va wela exidyohweni ra vumbirhi kumbe ra vunharhu. Loko eku heteleleni mhaka yi tisiwa eka nyingiso wa vakulu, i mhaka ya vudyoho lebyi phindha-phindhiweke. I swa nkoka swonghasi ku landzela xitsundzuxo xa Yakobo! U tsarile: “Xana ku ni loyi a vabyaka exikarhi ka n’wina? A a vitane vakulukumba va kereke leswaku va n’wi khongelela, va n’wi tota mafurha hi vito ra [Yehova, NW].” (Yakobo 5:14) Yana eka vakulu loko ka ha ri ni nkarhi wo hanyisa. Loko hi tshama nkarhi wo leha, hi ta tlanyala eku endleni ka xidyoho.—Eklesiasta 3:3; Esaya 32:1, 2.

Ku Languteka Ni Ku Tihungasa

18, 19. Ha yini muprista a vulavule kahle hi Timbhoni ta Yehova?

¹⁸ Malembe ya ntlhanu lama hundzeke, eka magazini wa kereke, muprista wa Khatoliki wa le Italy u vulavule kahle hi Timbhoni ta Yehova.a U te: “Mina hi ndzexe, ndza ti rhandza Timbhoni ta Yehova; ndzi vula ndzi tiyisile. . . . Lava ndzi va tivaka va ni mahanyelo lamanene, va vulavula hi musa . . . [naswona] va khorwisa swinene. Xana hi ta swi twisisa rini leswaku ntiyiso wu lava maandlalelo lama amukelekaka ya rungula? Leswaku lava va twarisaka ntiyiso a va fanelanga ku va ni timbilu leti nga helelangiki, ku va ni risema, ku ambala hi ndlela leyi nga hlelekangiki, ku va ni vusopfa?”

¹⁹ Hi ku ya hi marito lawa, muprista a a nyanyuriwile, xin’wana xa swona, hi ndlela leyi Timbhoni a ti ambala ni ku titivisa ha yona. Kavula, leti a hlanganeke na tona ti yingisele xitsundzuxo lexi “nandza la tshembekaka, wo tlhariha” a xi nyikeleke hi malembe yo tala. (Matewu 24:45) Bibele yi vula leswaku maambalelo ya vavasati ma fanele ma ‘lunghiseleriwa kahle ni ku ringaniseriwa.’ (1 Timotiya 2:9) Eminkarhini leyi yi nyanyaka ku biha, xitsundzuxo xexo i xinene ni le ka vavanuna. Xana a swi twisiseki leswaku vayimeri va Mfumo wa Xikwembu va fanele ku titivisa hi ndlela leyinene eka vanhu va le handle?

20. Ha yini Mukriste a fanele ku khathalela maambalelo ya yena minkarhi hinkwayo?

²⁰ Van’wana va nga pfumela leswaku eminhlanganweni ni le ntirhweni wa nsimu, va fanele ku va ni vukheta ehenhleni ka ndlela leyi va ambalaka ha yona, kambe va nga ha tlhela va vona onge misinya ya milawu ya Bibele minkarhi yin’wana a yi tirhi. Kambe ke, xana hi fanele hi pfa hi tshika ku va vayimeri va Mfumo wa Xikwembu? I ntiyiso, swiyimo swa hambana. Loko hi pfuna eku akiweni ka Holo ya Mfumo, hi ta ambala hi ndlela leyi hambaneke ni loko hi ya enhlanganweni eka Holo leyi fanaka ya Mfumo. Loko hi ri eku tiphyuphyiseni, kumbexana hi ta ambala hi ndlela leyi phyuphyisaka. Kambe maambalelo ya hina ma fanele ku lunghiseleriwa kahle ni ku ringaniseriwa hi minkarhi hinkwayo leyi hi xiyiwaka hi vanhu van’wana.

21, 22. Hi sirheleriwe njhani eka ku tihungasa loku onhaka, naswona hi fanele hi xi tekisa ku yini xitsundzuxo xa timhaka to tano?

²¹ Xivandla xin’wana lexi kumeke nyingiso lowukulu i ku tihungasa. Vanhu—ngopfu-ngopfu vantshwa—va lava ku tihungasa. A hi xidyoho kumbe ku tlanga hi nkarhi loko u endla xiyimiso xa ku tihungasa ka ndyangu. Hambi a ri Yesu u rhambe vadyondzisiwa wa yena ku ya “wisanyana.” (Marka 6:31) Kambe tivonele leswaku ku tihungasa a ku pfuli ndlela ya ku ya eku thyakisiweni ka moya. Hi hanya emisaveni leyi ku tihungasa ku dzunisaka vunghwavava, vukari lebyikulu, swilo swo chavisa ni leswi nga rhandzekiki ni vungoma. (2 Timotiya 3:3; Nhlavutelo 22:15) Nandza wo tshembeka ni wa vutlhari a a ri karhi a xalamukela khombo ra swihambukisi swo tano, kutani a hi tsundzuxa nkarhi na nkarhi ku lwisana na swona. Xana u vona onge switsundzuxo swo tano i swikavanyeti swa ntshunxeko wa hina? Kumbe, xana wa tlangela leswi nhlengeletano ya Yehova yi byi khathalelaka swinene vuhlayiseki bya wena bya hi laha ku nga heriki hi ku tisa makhombo yo tano enyingisweni wa wena?—Psalma 19:7; 119:95.

²² Hi nga tshuki hi rivala leswaku hambi leswi ntshunxeko wa hina wu humaka eka Yehova, hi ni vutihlamuleri eka ndlela leyi hi wu tirhisaka ha yona. Loko hi honisa xitsundzuxo lexinene kutani hi endla swiboho leswi hoxeke, a hi nga voni munhu un’wana nandzu. Muapostola Pawulo u ri: “Un’wana ni un’wana wa hina ú ta tihlamulela hi yexe emahlweni ka Xikwembu.”—Varhoma 14:12; Vaheveru 4:13.

Rindzela Ntshunxeko Wa Vana Va Xikwembu

23. (a) I mikateko yihi mayelana ni ntshunxeko leyi hi yi tsakelaka sweswi? (b) I mikateko yihi leyi hi yi languteleke hi mahlo-ngati?

²³ Hakunene hi vanhu lava katekisiweke. Hi ntshunxekile eka vukhongeri bya mavunwa ni vukholwa-hava. Hi khensa gandzelo ra nkutsulo naswona hi nga tshinelela Yehova hi ripfalo leri tengeke, hi ntshunxekile hi tlhelo ra moya eka vuhlonga bya xidyoho ni rifu. Naswona ku nga ri khale ku ta endleka “leswaku Xikwembu xi kombisa erivaleni vana va xona.” Le Armagedoni, vamakwavo va Yesu eku kwetsimeni ka vona ka le tilweni va ta tikombisa eka vanhu tanihi vaherisi va valala va Yehova. (Varhoma 8:19; 2 Vatesalonika 1:6-8; Nhlavutelo 2:26, 27) Endzhaku, vana lava va Xikwembu va ta kombisiwa tanihi lava tisaka mikateko leyi khulukaka yi huma exiluvelweni xa Xikwembu yi ya eka vanhu. (Nhlavutelo 22:1-5) Eku heteleleni, ku kombisiwa loku ka vana va Xikwembu ku ta endla leswaku vanhu lava tshembekaka va katekisiwa ni ku tisa ntshunxeko lowu vangamaka wa vana va Xikwembu. Xana wa wu navela nkarhi wolowo? Kutani tirhisa ntshunxeko wa wena wa Vukriste hi vutlhari. Tirhela Xikwembu sweswi, kutani u ta tsakela ntshunxeko wolowo lowu vangamaka hi laha ku nga heriki!

[Nhlamuselo ya le hansi]

Bokisi Ra Mpfuxeto

◻ Vatotiwa ni tinyimpfu tin’wana va dzunise Yehova hi ndlela yihi?

◻ Ha yini Vakriste va fanele ku xixima vafumi va misava?

◻ Mukriste a nga tirhisana ni vakulu hi tindlela tihi?

◻ Mayelana ni maambalelo, ha yini Timbhoni ta Yehova ti vonaka ti hambanile ni vo tala emisaveni?

◻ I yini lexi hi faneleke ku xi papalata loko swi ta eku tihungaseni?

[Xifaniso lexi nga eka tluka 17]

Hi ku hlawuleka, vakulu hi fanele hi va kombisa rirhandzu ni ku tirhisana na vona

[Swifaniso leswi nga eka tluka 18]

Swiambalo swa Mukriste swi fanele swi hleleka, swi ringaniseriwa ni ku fanela xiendlakalo