Kriste A A Venga Vuhomboloki—Xana Wena Wa Byi Venga?
“U rhandzile ku lulama, u vengile ku homboloka. Hikokwalaho, Xikwembu, Xikwembu xa wena, xi ku cherile mafurha ya ntsako lowukulu ku tlula vanakuloni.”—VAHEVERU 1:9.
1. Handle ko rhandza vululami, i yini xin’wana lexi laviwaka hi Yehova Xikwembu eka malandza ya yena hinkwawo ya ntiyiso?
MALANDZA ya ntiyiso ya Yehova ma n’wi rhandza hi mbilu, moya-xiviri, mianakanyo ni matimba ya wona hinkwawo. (Marka 12:30) Va lava ku tsakisa mbilu ya Yehova hi ku hlayisa vutshembeki. (Swivuriso 27:11) Leswaku va endla sweswo, a va fanelanga ku rhandza vululami ntsena, kambe va fanele ku tlhela va venga vuhomboloki. Xikombiso xa vona, Yesu Kriste, u swi endlile hakunene. Ha yena ku vuriwe leswi: “U rhandzile ku lulama, u vengile ku homboloka.”—Vaheveru 1:9.
2. I yini lexi katsiwaka eka vuhomboloki?
2 Xana vuhomboloki i yini ke? I vudyoho, hi laha muapostola Yohane a kombiseke ha kona loko a tsarile a ku: “Un’wana ni un’wana loyi a endlaka xidyoho nakambe u endla vuhomboloki, kutani xidyoho i vuhomboloki.” (1 Yohane 3:4, NW) Munhu wo homboloka a nga “siveriwi kumbe ku lawuriwa hi nawu.” (Webster’s Ninth New Collegiate Dictionary) Vuhomboloki byi katsa hinkwaswo leswo biha, leswi humeke endleleni, mahanyelo yo biha, ku onhaka ni ku pfumala ku tshembeka. Loko u languta misava u ta kuma leswaku vuhomboloki byi tele namuntlha ku tlula rini na rini. A swi kanakanisi leswaku hi hanya ‘eminkarhini yo nonon’hwa’ leyi muapostola Pawulo a yi vhumbeke eka 2 Timotiya 3:1-5. Hikwalaho ka vuhomboloki lebyi hinkwabyo, i swinene swonghasi leswi hi lerisiwaka ku venga vubihi hinkwabyo! Hi xikombiso, hi byeriwa leswi: “Ṅwina la’mi ranḍaka Yehova, v̌engani le’ŝo biha.” (Psalma 97:10) Nakambe, ha hlaya: “V̌engani le’ŝo biha, mi ranḍa le’ŝinene.”—Amos 5:15.
Tinxaka Tinharhu Ta Rivengo
3-5. Rito leri nge “venga” ri tirhisiwa hi tindlela tihi tinharhu eRitweni ra Xikwembu?
3 Xana ku venga swi vula yini? Eka Rito ra Xikwembu, “venga” ri tirhisiwa hi tindlela tinharhu leti hambaneke. Ku ni rivengo leri susumetiwaka hi mona ni leri lavaka ku vavisa loyi a vengiwaka. Vakriste va fanele ku papalata rivengo ra muxaka lowu. Hi rona leri susumeteleke Kayini ku dlaya makwavo Avele la lulameke. (1 Yohane 3:12) Nakambe leri i rivengo leri varhangeri va vukhongeri a va ri na rona eka Yesu Kriste.—Matewu 26:3, 4.
4 Nakambe, rito “venga” ri tirhisiwa eMatsalweni hi mongo wo rhandza katsongo. Hi xikombiso, Yesu u te: “Loko un’wana a ta ka mina, kambe a nga ndzi rhandzi ku tlula tata wa yena, ni mana wa yena, ni nsati, ni vana, ni makwavo, hambi byi ri vutomi bya yena, a nga ka a nga vi mudyondzisiwa wa mina.” (Luka 14:26) Handle ko kanakana, Yesu a a vula ku rhandza yena ku tlula vona. Yakobo ‘a a venga Leya,’ kambe kahle-kahle a a rhandza Rahele swinene ku tlula yena.—Genesa 29:30, 31.
5 Kutani ku na nhlamuselo ya rito leri nge “venga” leri laha hi yisaka nyingiso eka rona hi ku hlawuleka. Ri ni mianakanyo ya ku nga tsakeli hi ku helela kumbe ku nyenya munhu kumbe nchumu wo karhi swinene lerova hi papalata ku va ni vuxaka ni munhu kumbe nchumu wo tano. Eka Psalma 139, leswi ku vulavuriwa ha swona tanihi ‘rivengo leri heleleke.’ Kwalaho Davhida u te: “Yehova, a nḍi v̌a v̌enganga la’v̌a ku v̌engaka šana? A nḍi karihelanga la’v̌a ku pfukelaka šana? Nḍi v̌a v̌engile ha kunene; ka mina i v̌alala.”—Psalma 139:21, 22.
Mhaka Leyi Hi Faneleke Ku Venga Vuhomboloki Ha Yona
6, 7. (a) Ngopfu-ngopfu ha yini hi fanele ku venga vuhomboloki? (b) Hi xihi xivangelo lexikulu xa vumbirhi xo venga vuhomboloki?
6 Ha yini hi fanele ku venga vuhomboloki? Xivangelo xin’wana hi leswaku hi ta kota ku tixixima ni ku va ni ripfalo lerinene. Hi nga va ni vuxaka lebyinene na Yehova, Tata wa hina wa le tilweni la lulameke, wa rirhandzu, hi ndlela leyi ntsena. Davhida u veke xikombiso lexinene emhakeni leyi, hi laha swi nga voniwaka ha kona hi ku hlaya Psalma 26. Hi xikombiso, u te: “Nḍi v̌engile nhlengeletano ya la’v̌o homboloka, a nḍi ṭhamisi ni v̌anhu la’v̌o biha.” (Psalma 26:5) Ku rhandza ka hina Xikwembu ni vululami swi fanele swi hi susumetela ku hlundzuka loku faneleke—ina, rivengo—eka hinkwaswo leswi hombolokeke emahlweni ka xona, ku katsa ni mintirho yo homboloka ya lava va nga yingisiki ni ku venga Yehova. Ku tlula kwalaho, hi fanele ku venga vuhomboloki hikwalaho ka ndzhukano lowu byi wu tisaka ehenhla ka vito ra Xikwembu.
7 Xivangelo xin’wana xa ku va vanhu va Yehova va fanele ku venga vuhomboloki hi leswi byi nga ni khombo swinene ni ku va lebyi vavisaka. Xana ku byala enyameni, leswi vulaka ku byala vuhomboloki swi ta va ni vuyelo byihi ke? Pawulo u tsundzuxile: “Mi nga tshuki mi tixisa: Xikwembu a xi vungunyiwi; xin’wana ni xin’wana lexi munhu a xi byalaka, ú ta tshovela xona; loyi a byalaka swo tsakisa ntumbuluko wa yena wa nyama, ú ta tshovela leswo bola leswi humaka eka ntumbuluko wa yena wolowo; kambe loyi a byalaka swo tsakisa Moya, ú ta tshovela leswi humaka eka Moya, byi nga vutomi lebyi nga heriki.” (Vagalatiya 6:7, 8) Kutani hi fanele ku ka hi nga fambisani nikatsongo ni vuhomboloki. Hakunene, hi fanele ku venga vuhomboloki leswaku hi ta va ni vuhlayiseki lebyinene ni ku rhula ka mianakanyo.
Lava Va Vengaka Vuhomboloki
8. I mani loyi a vekeke xikombiso lexikulu eku vengeni ka vuhomboloki, hi laha swi kombisiweke ha kona hi matsalwa wahi?
8 Malunghana ni ku venga vuhomboloki, Xikwembu xi veka xikombiso lexi xiyekaka eka swivumbiwa hinkwaswo leswi tlhariheke. Xi hlundzukela vuhomboloki hi laha ku faneleke, naswona Rito ra xona ri ri: “Ku ni ŝilo ŝa ntlhanu na šiṅwe le’ŝi v̌engiwaka i Yehova, nḍi ri ntlhanu na ŝimbiri la’ma nga manyala e ka yena: I mahlo yo tikukumuša, ni ririmi ra v̌unwa, ni mav̌oko la’ma halataka ngati le’yi nga riki na nanḍu; i mbilu le’yi kanelaka ŝo biha, ni milenge ya maṭambu le’yi ṭuṭumelaka ku biheni. I mboni ya v̌unwa le’yi v̌ulaka mav̌unwa, ni l’a pfušaka timholov̌o e šikari ka v̌amakwav̌o.” Nakambe ha hlaya: “Ku tšhav̌a [Yehova, NW] i ku v̌enga ŝo biha; nḍi v̌enga manyunyu, ni ku tiḍunisa, ni ku famba lo’ko biha, ni nomu wo homboloka.” (Swivuriso 6:16-19; 8:13) Ku tlula kwalaho, hi byeriwa leswi: “Mina, Yehova, nḍi ranḍa ku lulama, nḍi v̌enga ku phanga lo’ku endliwaka hi ku šisa.”—Esaya 61:8.
9, 10. Yesu u swi kombise njhani leswaku a a venga vuhomboloki?
9 Yesu Kriste u tekelele Tata wa yena eku vengeni ka leswo homboloka. Xisweswo, ha hlaya: “U rhandzile ku lulama, u vengile ku homboloka. Hikokwalaho, Xikwembu, Xikwembu xa wena, xi ku cherile mafurha ya ntsako lowukulu ku tlula vanakuloni.” (Vaheveru 1:9) Yesu u hi vekele xikombiso eka rivengo ra muxaka lowu. U kombise rivengo ra yena eka vuhomboloki hi ku paluxa lava a va byi endla ha vomu—varhangeri va vukhongeri bya mavunwa. Hi ku phindha-phindha, u va avanyise tanihi vakanganyisi. (Matewu, ndzima 23) Siku rin’wana Yesu u va byele a ku: “N’wina mi huma eka tata wa n’wina, a nga Diyavulosi, kutani mi tsakela ku endla ku navela ka tata wa n’wina.” (Yohane 8:44) Yesu u kombise rivengo rakwe eka vuhomboloki lerova a tirhisa matimba, hi makhamba mambirhi a basisa tempele hi ku hlongola vakanganyisi va makwanga va vukhongeri.—Matewu 21:12, 13; Yohane 2:13-17.
10 Yesu nakambe u kombise ku venga ka yena vuhomboloki ni vudyoho hi ku tihambanisa na swona hi ku helela. Hikwalaho, u swi kote kahle ku vutisa vakaneti va yena a ku: “I mani eka n’wina la nga kombaka xidyoho xa mina xana?” (Yohane 8:46) Yesu a a ‘tshembeka, a pfumala nandzu, a ri hava xivati, a tihambanisa ni vadyohi.’ (Vaheveru 7:26) Loko a tiyisa leswi, Petro u tsale leswaku Yesu “a nga dyohanga nchumu, a nga vulanga swo kanganyisa van’wana.”—1 Petro 2:22.
11. I swikombiso swihi swa Matsalwa leswi hi nga na swona swa vanhu lava nga hetisekangiki lava a va venga vuhomboloki?
11 Kambe Yesu a a ri munhu la hetisekeke. Xana hi na swona swikombiso swa le Matsalweni swa vanhu lava nga hetisekangiki lava a va venga vuhomboloki hakunene? Hakunene hi na swona! Hi xikombiso, Muxe ni Valevhi-kulobye va kombise rivengo lerikulu eku gandzeleni ka swikwembu swa hava hi ku dlaya vagandzeri va swona va kwalomu ka 3 000 hi ku lerisiwa hi Yehova. (Eksoda 32:27, 28) Finiyasi u kombise rivengo lerikulu eka vuhomboloki loko a dlaya vaoswi vambirhi hi tlhari.—Tinhlayo 25:7, 8.
Ku Kombisa Rivengo Eka Vuhomboloki
12. (a) Hi nga ri kombisa njhani rivengo ra hina eka vuhomboloki? (b) Hi tihi tindlela tin’wana leti xiyekaka to papalata mianakanyo leyo homboloka?
12 Enkarhini wa hina, xana hi nga ri kombisa njhani rivengo eka vuhomboloki? Hi ku lawula mianakanyo, marito ni swiendlo swa hina. Hi fanele ku hlakulela mukhuva wo anakanya hi swilo leswi akaka loko mianakanyo ya hina yi nga khomekanga hi ntirho wo karhi. Loko hi phaphama ni vusiku, ku nga va ni mboyamelo wo anakanya swilo swo biha, tanihi ku hambeta hi anakanya hi ku vilela kumbe ku tipeta emiehleketweni ya rimbewu. U nga tshuki u pfumelela swilo swo tano, kambe titolovete ku anakanya hi swilo leswi akaka. Hi xikombiso, ringeta ku nhlokohata matsalwa, swivumbeko swa kaye swa ntsako ni mihandzu ya moya ya kaye. (Matewu 5:3-12; Vagalatiya 5:22, 23) Xana u nga ma nyikela mavito ya vaapostola va 12? Xana wa yi tiva Milawu ya Khume? I mabandlha wahi ya nkombo lama a ku vulavuriwa na wona eka Nhlavutelo? Ku nhlokohata tinsimu ta Mfumo na swona swi pfuna ku endla leswaku mianakanyo ya hina yi tshama yi ri karhi yi anakanya hi swilo leswi nga ntiyiso, leswi lavaka ku khathaleriwa, leswi lulameke, leswinene, leswi rhandzekaka, leswi ku vulavuriwaka kahle ha swona, leswi baseke ni leswi dzunekaka.—Vafilipiya 4:8.
13. Ku venga vuhomboloki swi ta hi vangela ku venga mavulavulelo ya muxaka muni?
13 Nakambe, hi kombisa leswaku hi venga vuhomboloki hi ku papalata mavulavulelo hinkwawo lama nga tengangiki. Vanhu vo tala va misava va tsakela ku hlamusela ni ku yingisela timhaka ta mafenya leti thyakeke, kambe Vakriste a va fanelanga ni ku rhiya ndleve leswaku va ti yingisela. Ku ri na sweswo, hi fanele ku hambana na swona kutani hi papalata ku hlanganyela ebulwini rihi na rihi leri yisaka etimhakeni to tano leti solekaka. Loko hi nga swi koti ku hambana na swona, hi nga swi kombisa hi ku languteka ka nghohe ya hina leswaku hi venga bulo ro tano. Hi fanele ku hlayisa xitsundzuxo lexi xinene: “Eku vulavuleni ka n’wina mi nga tshuki mi tirhisa marito ya tingana, kambe tirhisani ntsena marito lama pfunaka, lama akisaka ni ku hlamula leswi lavekaka, kutani ku vulavula ka n’wina ku ta tisa nkateko eka lava va mi yingisaka.” (Vaefesa 4:29) A hi fanelanga hi tithyakisa hi ku vulavula leswi nga tengangiki kumbe ku swi yingisela.
14. I nsirhelelo wihi lowu ku venga vuhomboloki ku nga ta wu nyikela etimhakeni ta bindzu ni ntirho?
14 Rivengo ra hina eka vuhomboloki nakambe ri fanele ri kongomisiwa eka mikhuva hinkwayo ya vudyoho. Ku venga vuhomboloki swi ta hi pfuna ku papalata xirimbana xa ku landzula hi pfumelelana na byona. Vakriste va ntiyiso a va tinyiketeli ku endla xidyoho. (Ringanisa 1 Yohane 5:18.) Hi xikombiso, hi fanele ku venga mikhuva hinkwayo leyi nga tshembekangiki ya bindzu. Namuntlha, vo tala va Timbhoni ta Yehova va sindzisiwile leswaku va endlela vathori va vona swilo leswi nga tshembekangiki, kambe va arile ku endla tano. Vakriste nakambe va ve lava tiyimiselaka ku lahlekeriwa hi mintirho ya vona ematshan’wini yo endla swo karhi leswi lwisanaka ni ripfalo ra vona leri leteriweke hi Bibele. Ku tlula kwalaho, nakambe hi lava ku kombisa rivengo ra hina eka vuhomboloki hi ku ka hi nga tluli milawu ya le mapatwini ni ku ka hi nga kanganyisi loko hi fanele ku hakela swibalo kumbe mithelo.—Mintirho 23:1; Vaheveru 13:18.
Ku Venga Rimbewu Leri Thyakeke
15. Ku vumbiwa ka vanhu va ri ni ku navela lokukulu ko va ni munghana wa vukati hi ntumbuluko ku hetisise swikongomelo swihi leswinene?
15 Tanihi Vakriste, ngopfu-ngopfu hi fanele ku venga thyaka leri katsaka timhaka ta rimbewu. Hi ku vumba vanhu va ri ni ku navela lokukulu ka munghana wa vukati hi ntumbuluko, Xikwembu xi hetisise swikongomelo swimbirhi. Xi swi endlele leswaku rixaka ra vanhu ri nga fi ri hela, naswona xi tlhele xi nyikela ntsako wa rirhandzu. Hambi va ri vanhu lava nga swisiwana, lava nga dyondzangiki kumbe lava tsandzekaka hi ndlela yo karhi va nga kuma ntsako lowukulu hi vuxaka bya vukati. Hambi swi ri tano, Yehova u veke milawu leyi vuxaka lebyi byi nga endliwaka hi ku landzelela yona. Mindzilikana leyi yi vuriweke hi Xikwembu yi fanele ku xiximiwa.—Genesa 2:24; Vaheveru 13:4.
16. Langutelo ra hina ri fanele ku va rihi eka mikhuva ni ku tihungasa hi rimbewu leri nga tengangiki?
16 Loko hi venga vuhomboloki, hi ta papalata mikhuva hinkwayo leyi nga tengangiki ya rimbewu hi ku helela ni ku tihungasa hi swilo leswi fambelanaka na rimbewu leri nga tengangiki. Hikwalaho hi ta papalata tibuku, timagazini ni maphepha-hungu hinkwawo lama kanakanisaka hi tlhelo ra mahanyelo. Hi ku fanana, loko hi venga vuhomboloki, hi nge languti swifaniso swihi na swihi leswi nga tengangiki, hambi swi ri eka thelevhixini, etibayiskopeni kumbe exitejini xa mintlango. Loko hi kuma leswaku nongonoko wo karhi wu vulavula hi vunghwavava, hi fanele hi susumeteleka ku tima sete ya thelevhixini handle ko ba mariri kumbe hi fanele hi va ni xivindzi xo huma eholweni ya mintlango. Hi laha ku fanaka, ku venga vuhomboloki swi ta endla leswaku hi tivonela eka vuyimbeleri hinkwabyo lebyi pfuxaka ku navela ka rimbewu hi machayelo ya byona. A hi nge lavi vutivi bya timhaka ta vunghwavava kambe hi ta ‘fana ni vana loko swi ta eka vubihi, kambe hi vupfe swinene ematimbeni ya ku twisisa.’—1 Vakorinto 14:20.
17. I xitsundzuxo xihi lexi Vakolosa 3:5 yi xi nyikelaka lexi nga hi pfunaka ku tshama hi tengile emahanyelweni?
17 Hi laha ku faneleke, ha tsundzuxiwa: “Dlayani leswi swi nga swa misava eka n’wina, hileswaku vuoswi, ni swa thyaka, ni ku hisekela swa tingana, ni ku navela loko biha.” (Vakolosa 3:5) A swi kanakanisi leswaku ku laveka matshalatshala lamakulu eka hina loko hi ta tiyimisela ku tshama hi tengile emahanyelweni. Malunghana ni riendli ra Xigriki leri hundzuluxeriweke ri ku “dlayani” eka Vakolosa 3:5, The Expositor’s Bible Commentary yi ri: “Ri ringanyeta leswaku a hi fanelanga ku herisa kumbe ku lawula swiendlo ni malangutelo layo biha ntsena. Hi fanele ku swi susela makumu, hi herisa mahanyelo ya khale hi ku helela. Xiga lexi nge ‘dlayani hi ku helela’ xi nga hlamusela matimba ya kona. . . . Nhlamuselo ya riendli ni matimba ya nkarhi ha swimbirhi swi ringanyeta xiendlo xa ku gingiriteka, lexi lavaka matimba xa ku tiyimisela ka munhu hi xiyexe.” Hikwalaho hi fanele ku papalata swifaniso leswi nga ambalangiki onge hi loko swi ri vuvabyi lebyi nga ni khombo, lebyi tlulelaka, lebyi dlayaka, hikuva swi tano hi tlhelo ra mahanyelo ni moya. Kriste u phofule mianakanyo leyi fanaka loko a vulavule hi ku susa voko, nkondzo kumbe hambi ku ri tihlo loko ri hi khunguvanyisa.—Marka 9:43-48.
Ku Venga Vukhongeri Bya Mavunwa Ni Vugwinehi
18. Hi nga ri kombisa njhani rivengo ra hina eka vuhomboloki bya vukhongeri?
18 Kutani ke, hi laha Yesu a kombiseke ha kona rivengo ra yena eka vuhomboloki hi ku paluxa vakhongeri lava kanganyisaka, namuntlha hi laha ku fanaka Timbhoni ta Yehova ti kombisa rivengo ra tona eka vuhomboloki hinkwabyo bya vukhongeri lebyi kanganyisaka. Hi ndlela yihi ke? Hi ku hangalasa tibuku ta Bibele leti paluxaka Babilona Lonkulu malunghana ni leswi a nga swona hakunene, muoswi wa vukhongeri. Loko hi venga vukanganyisi bya vukhongeri byo homboloka, hi nge jikajiki eku paluxeni ka Babilona Lonkulu, mfumo wa misava wa vukhongeri bya mavunwa. Hi ta endla tano leswaku ku ponisiwa vanhu va timbilu letinene lava a va pfaleke mahlo ni ku va endla mahlonga hi tlhelo ra moya. Loko hi venga vuhomboloki bya Babilona Lonkulu hakunene, hi ta hiseka hi ndlela leyi fanaka eku hlanganyeleni eka swivumbeko hinkwaswo swa vutirheli bya Mfumo.—Matewu 15:1-3, 7-9; Tito 2:13, 14; Nhlavutelo 18:1-5.
19. Hi fanele ku va languta hi ndlela yihi vagwinehi, naswona ha yini?
19 Xiboho xo venga vuhomboloki nakambe xi tirha ni le ka ntirho hinkwawo wa vagwinehi. Langutelo ra hina eka vagwinehi ri fanele ri va leriya ra Davhida, loyi a nga te: “Yehova, a nḍi v̌a v̌enganga la’v̌a ku v̌engaka šana? A nḍi karihelanga la’v̌a ku pfukelaka šana? Nḍi v̌a v̌engile ha kunene; ka mina i v̌alala.” (Psalma 139:21, 22) Vagwinehi va manguva lawa va fambisana swin’we na “munhu lowo homboloka,” ku nga vafundhisi va Vujagana. (2 Vatesalonika 2:3) Tanihi Timbhoni leti tshembekaka ta Yehova, ku hava na xin’we lexi hi pfumelelanaka na vona eka xona. Leswi hi nga hetisekangiki, timbilu ta hina ti nga ha va ni mboyamelo wo va lava xopaxopaka vamakwerhu. Lava va “nandza la tshembekaka, wo tlhariha,” i vanhu lava nga hetisekangiki. (Matewu 24:45-47) Kambe ntlawa lowu wu tshembekile ni ku va ni vutlhari. Vagwinehi va lwela ku tlakusa swihoxo kumbe leswi swi vonakaka swi ri swihoxo leswi endliwaka hi vamakwerhu lava rhangelaka. Vuhlayiseki bya hina byi titshege hi ku papalata vunwa bya vagwinehi onge hi loko byi ri vuxungu, naswona entiyisweni hi byona.—Varhoma 16:17, 18.
20, 21. Swivangelo swo venga vuhomboloki swi nga katsakanyiwa njhani?
20 Hi swi vonile leswaku misava yi tele hi vuhomboloki, lebyi byi fanaka ni vudyoho. A swi anelanga leswaku hi rhandza vululami; hi fanele ku tlhela hi venga vuhomboloki. Van’wana lava susiweke ebandlheni ra Vukriste kumbexana a va anakanya leswaku a va byi rhandza vululami, kambe a va nga byi vengi swinene vuhomboloki. Nakambe hi swi vonile leswaku ha yini hi fanele ku venga vuhomboloki. Hi nga ka hi nga vi na ripfalo lerinene ni ku tixixima handle ka loko hi endla tano. Ku tlula kwalaho, vuhomboloki byi vula ku va loyi a nga tshembekiki eka Yehova Xikwembu. Naswona vuhomboloki byi hi vangela ku tshovela mihandzu yo bava swinene—maxangu, vubihi ni rifu.
21 Nakambe hi yi xiyile ndlela leyi hi kombisaka leswaku hi venga vuhomboloki ha yona. Hi endla tano hi ku ka hi nga fambisani nikatsongo ni muxaka wihi na wihi wa ku nga tshembeki, vunghwavava kumbe vugwinehi. Tanihi leswi hi lavaka ku hlanganyela eku lweriweni ka Yehova ni ku navela ku tsakisa mbilu ya yena, a hi fanelanga hi rhandza vululami ni ku tshama hi khomekile entirhweni wa yena ntsena, kambe hi fanele ku tlhela hi venga vuhomboloki, hi laha Yesu Kriste, Murhangeri ni Mulerisi wa hina a endleke ha kona.
A Wu Ta Hlamurisa Ku Yini Xana?
◻ Matsalwa ma ri tirhisa njhani rito leri nge “venga”?
◻ Hi swihi swivangelo swin’wana leswinene swa leswaku hi venga vuhomboloki?
◻ Hi swihi swikombiso leswinene leswi hi nga na swona swa lava va vengeke vuhomboloki?
◻ Hi nga ri kombisa njhani rivengo ra hina eka vuhomboloki?
[Xifaniso lexi nga eka tluka 8]
Yesu u basise tempele hi leswi a a venga vuhomboloki
[Xifaniso lexi nga eka tluka 10]
Loko hi venga vuhomboloki, hi ta papalata ku tihungasa hi vunghwavava