“Tlhelelani Ka Mina, Kutani Ndzi Ta Tlhelela Ka N’wina”

NDYANGU a a wu ri karhi wu tiphina wu tiwisele enhoveni. Kutani Peter lontsongo swinene u sukile a ya hlongorisa maxindyani exintshabyanini. Hi ku hatlisa, tilo ri funengetiwe hi mapapa, mpfula yi sungula ku na. Yi sungule hi ku swama, kambe hakatsongo-tsongo yi na hi matimba. Ndyangu wu hatlise wu hlengeleta nhundzu ya wona wu tsutsumela emovheni. Kutani un’wana ni un’wana a a tivutisa leswaku Peter u le kwihi.

Hi nkarhi wolowo, Peter a a ringeta ku vuya laha ndyangu a wu ri kona. A swi n’wi nonon’hwela ku vona ndlela naswona ndlela leyi a yi ri exintshabyanini a yi rheta hi mpfula. A nga swi langutelanga, misava yi vonake onge a yi nyamalala emilengeni ya yena loko a wela egojini ro enta, leri nga vonakiki. U ringete ku khandziya, kambe matlhelo hinkwawo a ma rheta.

Mati ya mpfula a ma rhelela hi xintshabyana, naswona a ma tata goji hi ndzope. Peter a a ri ekhombyeni lerikulu ra ku dyiwa hi mati. Kambe tata wa yena u n’wi kumile ivi a n’wi koka hi ntambhu. Endzhakunyana, Peter u holoveriwile hikwalaho ko tsendzeleka. Kambe hi mhaka ya leswi a a funengetiwe hi minkumba a tlakuriwe hi mana wa yena, a swi olova ku amukela ku holoveriwa koloko.

Ntokoto lowu wu swi kombisa kahle leswi humelelaka eka van’wana lava a a va ri exikarhi ka vanhu va Xikwembu. Va wele egojini ro enta swinene ra mafambiselo lawa ya swilo naswona va ringeta hi matimba hinkwawo ku huma va tlhelela enhlengeletanweni ya Yehova leyi sirhelelaka. Mawaku ndlela leyi swi tsakisaka ha yona ku tiva leswaku Yehova u ni tintswalo naswona u lunghekele ku ‘hoxa ntambu’ a va pfuna leswaku va tlhela va hlayiseka!

Mintirho Ya Yehova Ya Tintswalo

Emasikwini ya Israyele, eku heleni ka ku akiwa ka tempele, Solomoni u endle xikhongelo xo nkhensa lexi a a kombela Yehova leswaku a yingisela swikombelo leswi kongomisiwaka etempeleni. Kutani u te: “Kutaku loko [Vaisrayele] v̌a ku dyohela, (hikuva a ku na munhu l’a nga dyohiki,) loko u v̌a hlunḍukela, u v̌a nyiketa v̌alala . . . loko v̌a tiyingisa e tikweni leri v̌a nga ta v̌a makhumbi e ka rona, loko v̌a tlhela e ka wena v̌a ku khongela e tikweni ra lav̌a v̌a v̌a khomeke, . . . yingisa, u ri matilweni, laha u akeke kona, e ku khongela ni ku kombela ka v̌ona.”—1 Tihosi 8:46-49.

Xikombelo xa Solomoni xi hetiseke eka swiendlakalo swo tala enkarhini wa matimu ya Israyele. Nkarhi na nkarhi vanhu va Xikwembu a va hambuka va xi lahla. Endzhaku a va xiya xihoxo xa vona ivi va tlhelela endzhaku va xi lava. Kutani Yehova a a va rivalela. (Deuteronoma 4:31; Esaya 44:21, 22; 2 Vakorinto 1:3; Yakobo 5:11) Hi ku tirhisa Malakiya, Yehova u hlanganise gidi ra malembe ra ku tirhisana ni vanhu va Yena loko A te: “Loko ka ha ri mikarini ya v̌atata wa ṅwina, mi sukele milawu ya mina, kutani a mi yi hlayisanga; tlhelelani ka mina, kutani nḍi ta tlhelela ka ṅwina.”—Malakia 3:7.

Swivangelo Swa Ku Khunguvanyeka

Ku fana ni Vaisrayele, vunyingi bya vanhu va Xikwembu namuntlha bya hambuka naswona byi tihambanisa ni nhlengeletano ya Yehova. Ha yini? Van’wana va hlongorisa swilo leswi vonakaka swi ri swinene eku sunguleni, ku fana na Peter loyi a a hlongorisa maxindyana. Leswi hi leswi swi humeleleke eka Ada. Wa vika: “A a ku ri ntolovelo wa hina hinkwerhu vatirhi-kulorhi leswaku ni nhlikanhi hi ya dya swin’we ekhefini ya le kusuhi. Kutani loko va ndzi rhamba leswaku ndzi ya nwa kofi ni madyambu, a swi ndzi nonon’hwelanga ku swi amukela. Ndzi ehlekete leswaku a ndzi nga tirhisi nkarhi lowu a wu fanele wu tirhiseriwa minhlangano ni ku chumayela. A ndzi swi xiyanga leswaku leswi swi nga ha va ku tsandzeka ku landza nsinya wa nawu lowu nga eka 1 Vakorinto 15:33.

“Ku nga ri khale, a hi khandziya swin’we tihanci hi Migqivela. Kutani a ndzi famba na vona ku ya vona tibayiskopo ni le holweni ya mintlangu. Leswi swi endle leswaku ndzi nga vi kona eminhlanganweni yin’wana. Eku heteleleni, a ndzi nga ha yi eminhlanganweni yihi na yihi kumbe ku hlanganyela entirhweni wo chumayela. Loko ndzi lemuke leswi a swi humelela, a ndzi nga ha hlanganyeli ni nhlengeletano.”

Etimhakeni tin’wana xivangelo xi nga ha va xi ri xidyoho lexikulu lexi fihliweke lexi endlaka leswaku munhu a titwa a nga fanelekanga ku tirhela Xikwembu. (Psalma 32:3-5) Kumbe munhu a nga ha khunguvanyisiwa hi xilo xin’wana lexi vuriweke kumbe lexi endliweke hi vanakulobye va Vakriste, a nga swi twisisi, hi laha Solomoni a vuleke ha kona, leswaku “a ku na munhu la nga dyohiki.”—1 Tihosi 8:46; Yakobo 3:2.

Hambi swi ri tano, van’wana va hela matimba loko va layiwa. (Vaheveru 12:7, 11) Ku kokiwa mahlo hi swilo leswi vonakaka swa vutomi ku endle leswaku vo tala va tshika ku tirhela Xikwembu. Hakanyingi, hi ku lava ku humelela emisaveni, va tipete entirhweni wo tihanyisa lerova va pfumala nkarhi wo tirhela Xikwembu evuton’wini bya vona. (Matewu 13:4-9; 1 Timotiya 6:9, 10) Xana xiyimo xa vanhu vo tano a xi tshembisi?

Xana U Ta Xi Amukela Xirhambo Xa Yehova?

Nkarhi wun’wana Yesu u vule nchumu wun’wana lowu a wu nonon’hwa ku wu twisisa, naswona van’wana va khunguvanyisiwile. Rhekhodo yi ri: “Vadyondzisiwa va yena lavo tala va tlhelela ndzhaku, va nga ha famba-fambi na yena.” Kambe a hi hinkwavo lava a va khunguvanyekile. Rungula ra Bibele ri ya emahlweni: “Yesu a ku ka lava khume na vambirhi: ‘Xana na n’wina mi lava ku famba xana?’ Simoni Petro a hlamula, a ku ka yena: ‘Hosi, hi nga ya ka mani xana? U ni marito ya vutomi lebyi nga heriki.’” (Yohane 6:66-68) Vadyondzisiwa va Yesu va swi xiye hi vutlhari leswaku a swi ta va khombo ku tshika Yesu.

Van’wana lava hambukaka eku heteleleni va vula leswi fanaka. Va swi xiya leswaku ku tshika nhlengeletano ya Xikwembu i goza leri nga ni khombo ni leswaku hi le ka Yehova na Kriste ntsena laha va nga kumaka marito lama yisaka evuton’wini. Loko va xiya sweswo, va fanele va swi vona ni leswaku nkarhi wa ku hundzuka wa ha ri kona, va kombela ku rivaleriwa eka Yehova kutani va tlhelela eka yena. I Yehova hi yexe la nyikeke xirhambo lexi: “Tlhelelani ka mina, kutani nḍi ta tlhelela ka ṅwina.”—Malakia 3:7.

Hakunene, Mukriste wo tshembeka a nga wu kuma kwihi ntsako handle ko tirhela Yehova? Loko munhu a hambuka endzhaku ka loko a ve xiphemu xa nhlengeletano ya Xikwembu nkarhinyana, u ta kuma yini emisaveni? U ta swi xiya hi xihatla leswaku se i xiphemu xa misava leyi yi yaka yi biha ngopfu. U ta tikuma a katsekile eka mafambiselo ya swilo lama taleke hi vukanganyisi, mavunwa, vuxisi ni mahanyelo yo biha, eka misava leyi nga ni khombo leyi nga tsakisiki ku kota goji ra ndzope leri xungeteke vutomi bya Peter lontsongo. Loko a anakanya kahle naswona a vona leswaku vutomi bya yena lebyi nga heriki byi le khombyeni, a nga fanelanga a hlwela ku kombela mpfuno wo huma eka xiyimo xexo. Kambe ku tlhelela endzhaku swi nga ha tika.

Xana u tshame u ringeta ku tlhelela eka Yehova kambe u swi kuma swi nonon’hwa? Kutani ke, tiva leswaku u lava mpfuno. Naswona swi tive leswaku vamakwenu va xinuna ni va xisati lava nga enhlengeletanweni ya Xikwembu va swi rhandza ku ku pfuna. Kambe u fanele u endla matshalatshala yo karhi yo kombisa Yehova ku navela ka wena. I nkarhi wo ‘tikamba’ ivi u ‘tlhelela eka Yehova.’—1 Tihosi 8:47.

Ku Pfuniwa Leswaku U Vuya

Ada u hlamusela leswi n’wi pfuneke ku tlhelela eka Yehova: “Hi nkarhi lowu faneleke, makwerhu loyi a a ndzi fambisela dyondzo u ndzi rhambele ku ya enhlengeletanweni ya xifundza na yena. A a ri ni musa swinene! Naswona a nga ndzi solanga! U ndzi kombe rirhandzu lerikulu. Se a ku hundze lembe ku sukela loko ndzi ye enhlanganweni wa mina wo hetelela, kambe a ndzi anakanyisisa hi vuhava bya misava ni leswaku eka swilo leswi kokaka mahlo leswi nga endzeni ka yona, a ku ri ni gome, ku karhateka ni mahanyelo layo biha ntsena. Kutani ndzi ehlekete ku ya enhlengeletanweni. Loko ndzi fika eholweni leyi nhlengeletano yi nga khomeriwa eka yona, ndzi ye ndzi ya tshama eswitulwini swa layini yo hetelela naswona ndzi tumbela ekhonweni ya munyama. A ndzi nga lavi leswaku vamakwerhu va ndzi vona ivi va ndzi vutisa swivutiso.

“Hambi swi ri tano, nongonoko wu nyikele xitsundzuxo lexi a ndzi xi lava swinene. Loko wu hela, a a ndzi nga tiyimiselanga ku tlhelela eka vanhu va Yehova ntsena, kambe ni ku tinyiketela eka yena hi mbilu ya mina hinkwayo. Vamakwerhu va ndzi amukele hi malwandla naswona ‘munhu wa vusopfa’ u tlhelerile.” (Luka 15:11-24) Hinkwaswo sweswo swi humelele enkarhini lowu hundzeke, naswona sweswi Ada u tirhe ntirho wa nkarhi hinkwawo ku ringana malembe yo tlula 25.

Mhaka ya munhu un’wana la nga lahleka yi ve ni vuyelo lebyi fanaka lebyi tsakisaka. Vakulu van’wana va nyike José ndzayo leyi a yi kombisa swinene mianakanyo ya yena ku tlula misinya ya milawu ya Bibele. José, hi ku hela matimba ni ku hlundzuka, eku heteleleni u tsanile. U tshame malembe ya nhungu a a hambanisiwile ni vanhu va Xikwembu, naswona enkarhini wolowo u teke munhu la nga pfumeriki ivi a va ni vana, laha un’wana wa vona a nga n’wi pfumelela ku khuvuriwa eKerekeni ya Khatoliki.

Eku heteleleni, u pfuniwe loko mulanguteri wa xifundza a endla maendzo ya vurisi eka yena ivi a khutaza vakulu leswaku va endla tano. U vuyile naswona a a tsakile hi ku vona nsati wa yena a tsakela ntiyiso. José sweswi u tirha tanihi nkulu ebandlheni. Hi laha mintokoto leyi mimbirhi yi kombaka ha kona, Yehova a nga va tsoni mikateko lava amukelaka xirhambo xa yena xa rirhandzu xa leswaku va vuya.

Kambe, leswaku hi kuma mikateko yo tano, hi fanele hi tlangela mpfuno lowu nyikeriwaka ni ku wu amukela. Emabandlheni yo tala vamakwerhu va tsundzuka lava va tsaneke ivi va va endzela nkarhi na nkarhi, va ringeta ku va pfuna. Ku amukela mpfuno wo tano swi komba ku tlangela tintswalo ta Yehova.—Yakobo 5:19, 20.

Entiyisweni, lowu i nkarhi wo amukela xirhambo xa Yehova, lexi nge: “Tlhelelani ka mina.” (Malakia 3:7; Esaya 1:18) U nga dyi nkarhi. Swiendlakalo swa misava swi tsutsuma hi rivilo lerikulu. Ndhawu yo antswa yo tumbela eka yona eminkarhini ya xidzedze leyi yi taka, hi le ndzeni ka nhlengeletano ya Yehova, hi hlayiseka ehansi ka nsirhelelo wa yena. Hi lava chavelaka eka Yehova ntsena lava nga ni ntshembo lowu tiyeke wa ku fihliwa eka vukari bya yena eka siku lerikulu ra ku kariha ka yena.—Sofonia 2:2, 3.

[Xifaniso lexi nga eka tluka 30]

Xana u ta xi amukela xirhambo xa Yehova lexi nge, “Tlhelelani ka mina”?