Xana U Tshama U Hlanganyela Ni Nhlengeletano Ya Yehova?

JAHA a ri khomiwe hi tingana naswona ri khunguvanyekile swinene. Tinguvu ta rona, a ti hlakarile no handzuka, leti kombisaka leswaku ti tshame ti va swiambalo swa fexeni. Sweswi a ti siyi ku kanakana leswaku u biwe hi misava. Loko a tsundzuka tiko-xikaya ra ka vona leri nga kule, u sungule ku venga vutomi bya vunjanganja lebyi a a byi hanya ni ndlela leyi a tlangiseke ndzhaka leyi a sindziseke ku va na yona nkarhi wu nga si fika. Khwiri ra yena leri nga riki na nchumu ri engetele maxangu ya yena, kutani a twa a navela ekaya. Hikuva hambi ku ri malandza ya tata wakwe ekaya a ma antswa swinene ku ri na leswi a a ri xiswona! A a ta tsaka swonghasi ku va exikhundleni xa vona!

Kambe i ku amukeriwa ka njhani loku a nga ku langutelaka eka tata wakwe loko a tlhelela ekaya sweswi? A nge languteli ku xewetiwa hi malwandla kumbe hambi ku ri ku nghenisiwa endlwini endzhaku ka ndlela leyi nyumisaka leyi a tlangeke hi tintswalo ta tata wakwe ha yona. Hambi swi ri tano, mintlhaveko yo enta yi fume miehleketo ni mbilu ya yena: U fanele ku ya ekaya.

Jaha leri a ri yi twisise swintsongo swonghasi mintlhaveko leyi tata wa rona a a ri na yona eka rona! I ku hlamarisiwa muni konghasi ku n’wi yimeleke loko a vandzamela kaya ra yena ra khale! Entiyisweni, “loko a ha ri kule, tata wa yena a n’wi vona, a n’wi twela vusiwana; kutani a tsutsuma, a ya wela enhan’wini ya yena, a n’wi ntswontswa.”—Luka 15:20.

Ku fana ni n’wana wa vusopfa, xana u sukele kaya ra wena? Xana u sukele Tata wa wena Yehova ni nhlengeletano ya yena? Xana na wena sweswi u navela ku ‘tlhelela ekaya’?

Hakanyingi, lava sukeleke nhlengeletano ya Yehova a va vanga lava fanaka ni n’wana wa vusopfa hi ku pakanisa. Eka vo tala, a ku ri endlelo ro nonoka, leri nga vonakiki, ra ku suka—ku fana ni byatso byintsongo lebyi tifambelaka naswona hakantsongo-ntsongo ri sukela misava. Van’wana va tshikileriwe swinene hi ku nonon’hwa ka swa timali kumbe swiphiqo swa ndyangu, mavabyi kumbe hambi ku ri “ku ya emahlweni” emisaveni, lerova timhaka ta moya ti phimpheriwa. Van’wana va tipfumelele ku khunguvanyisiwa hi vanhu lava hlanganyelaka ebandlheni ra Vukriste kumbe va sukile hikwalaho ka ku va va nga pfumelelani ni ku twisisa loku nhlengeletano ya Yehova a yi ri na kona eka yinhla yo karhi ya Matsalwa. Nakambe van’wana va tipfumelele ku hetiwa matimba kutani va tshika loko ku hela ka mafambiselo lawa ya swilo ya sweswi ku nga helanga hi nkarhi lowu a va wu languterile.

Loko u ri un’wana la nga ha hlanganyeriki na nhlengeletano ya Yehova, kumbexana xivangelo xin’we, kumbe swo tala swa leswi swi ta fanela swiyimo swa wena. Kambe hambi xivangelo xi nga va xihi, a hi nkarhi wo ehleketa ku tlhelela sweswi xana?—Matewu 18:12-14.

U Khunguvanyisiwile Xana?

Hi ku xiya ndlela leyi vanhu va nga lahlekeriwa hi ku hetiseka ha yona, munhu a nga ha langutela leswaku timholovo ta vumunhu ti ta humelela nkarhi na nkarhi. Leswi swi vange leswaku van’wana va khunguvanyeka. Van’wana va khunguvanyekile loko munhu loyi a va n’wi xixima swinene hi xitshuketa a teke goza hi matlotlo kumbe hi ndlela leyi nga riki ya Vukriste kumbe a katseke eka xidyoho.

Xana leswi swi ku humelerile? Hambi ku ri xihi lexi ku khunguvanyiseke, entiyisweni a ku nga ri yena Yehova loyi a vangeleke xikhunguvanyiso. (Ringanisa Vagalatiya 5:7, 8.) Kutani, xana hakunene swa twala ku tsema vuxaka bya hina na yena hikwalaho ka leswi munhu un’wana a swi endleke? Kambe, xana a hi fanelanga ku ya emahlweni hi n’wi tirhela hi ku tshembeka, hi tiyiseka leswaku Yehova wa swi twa leswi humelelaka naswona u ta hi endlela hi rirhandzu ke?—Vakolosa 3:23-25.

Hi ku famba ka nkarhi, van’wana va kume leswaku lexi xi va khunguvanyiseke eku sunguleni a xa ha vonaki xi ri xa nkoka sweswi kumbe xi nga ha va xi nga ha ri kona. Kumbe hi ku xiyisisa mhaka leyi hi ku rhula sweswi va nga ha endla makumu ya leswaku hi vona va hoxeke entiyisweni. Leswi hakanyingi i ntiyiso laha munhu a aleke naswona a khunguvanyeka hikwalaho ka xitsundzuxo xo karhi kumbe ndzayo leyi a yi nyikiweke. Loko a languta endzhaku, a nga ha swi vona leswaku ndzayo yo tano a yi nyikeriwa hi rirhandzu ra ntiyiso naswona ku n’wi pfuna. (Vaheveru 12:5-11) Kutani ke, swa fanela swonghasi, ku landzela xitsundzuxo xa muapostola Pawulo! U tsarile: “Hikokwalaho, tiyisani mavoko ya n’wina lama debyaka, ni matsolo ya n’wina lama gudlaka. Mi fanele ku lulamisela milenge ya n’wina tindlela leto lulama, leswaku xirho lexi lamaleke xi nga suleki, kambe xi hanyisiwa.”—Vaheveru 12:12, 13.

Xana A Wu Pfumelelananga Ni Dyondzo?

Ku nga ha va ku ri leswaku u sukele nhlengeletano ya Yehova hikuva a wu ri na ku twisisa loku hambaneke ka mhaka yin’wana ya Matsalwa. Tanihi leswi Vaisrayele lava kutsuriweke aEgipta va hatliseke va “riv̌ala mitiro [ya Xikwembu]” leyi xi va endleleke yona naswona ‘va nga yimelangiki ndzayo ya xona,’ u nga ha va hi ku anghwetla u tiendlele makumu ya leswaku leswi nhlengeletano yi nga yi amukelangiki miehleketo leyi u yi voneke yi lulamile, a wu nge he hlanganyeli na yona. (Psalma 106:13) Kumbexana yinhla leyi ku sukela kwalaho yi hlamuseriwile, kumbe ya ha cinciwa kumbe ya ha tiyisiwa hi nkambisiso lowu yaka emahlweni wa Matsalwa ehansi ka nkongomiso wa moya wa Xikwembu. A swi nga ta va swi antswile loko a wu lo tshama ni nhlengeletano, u yimela Yehova?

I swinene ku tsundzuka leswaku Yehova hi minkarhi hinkwayo u tirhe hi nhlengeletano yin’we ntsena. Esikwini ra hina, “nandza lowo tshembeka, lowa vutlhari” u avela swakudya swa moya “hi nkarhi wa kona.” Xiya leswaku nandza loyi a a fanele a ‘kumiwa a endle tano loko N’wini a fika.’ (Matewu 24:45-47) Kahle-kahle, i vamani namuntlha va swi vonaka leswaku N’wini se u fikile? Naswona i vamani lava gingiritekaka entirhweni lowu kombisiweke? Hi lava hlanganyelaka ni nhlengeletano ya Yehova ya timbhoni ta Vakriste ntsena!

Loko van’wana va fularhele Yesu, muapostola Petro u te: “Hosi, hi nga ya ka mani xana? U ni marito ya vutomi lebyi nga heriki.” Handle ka ku kanakana hinkwako Petro a a swi tiva leswaku Yesu a a ri Mesiya. Loko vadyondzisiwa vo tala va kuma marito man’wana ya Yesu ya chavisa, Petro u swi vonile leswaku a ku ta va vuphukuphuku ku sukela xihlovo xa “marito ya vutomi lebyi nga heriki.” Hi ku famba ka nkarhi ku kanakana kwihi na kwihi kumbe xidoledole swi ta hlamuseriwa. (Yohane 6:51-68; ringanisa Luka 24:27, 32.) Leswi swa ha ri tano ni namuntlha, tanihi leswi Yehova a yaka emahlweni a kongomisa malandza ya yena endleleni ya ntiyiso.—Swivuriso 4:18.

Tlhelela Sweswi

“A hi lav̌isiseni tindlela ta hina, hi v̌a hi tianakanya, kutani hi tlhelela e ka Yehova,” ku kombela muprofeta Yeremiya. (Swirilo swa Yeremia 3:40) Hambi swi ri tano, van’wana va nga ha kokela endzhaku, kumbexana va chava ku amukeriwa loku nga tsakisiki hi lava va nga ebandlheni. Kambe endlelo ri ve rihi loko n’wana wa vusopfa a tlhelele ekaya xana? “Hi fanele ku tsaka” ku hlamusela tatana, “hikuva makwenu loyi a a file, kutani sweswi ú hanyile, a a lahlekile, kutani sweswi ú kumiwile.” (Luka 15:32) Ku amukeriwa loku fanaka ka malwandla ku yimele lava ‘tlhelelaka eka Yehova’ hi ku navela ka xiviri ka ku endla ku rhandza ka yena.—Ringanisa Luka 15:7.

Kambe bandlha ra Vukriste a ri tshamanga kutani ri rindzela ku amukela lavo tano hi nkarhi lowu va nga ta ehleketa ku ‘tlhelela hi wona ekaya.’ Exifanisweni xa Yesu, tatana u tsutsumile ku ya hlanganisa n’wana wa yena loko “a ha ri kule.” Hi ku fanana, Timbhoni ta Yehova ti swi teka ku ri vutihlamuleri bya vona hi voxe ku lava lava tshameke va hlanganyela ni ku va pfuna va tlhelela enhlengeletanweni ya Yehova.

Kambe ku vuriwa yini hi loko munhu a endla nandzu lowukulu wa ku tikhoma loko biha loko a ha hambanile ni nhlengeletano ya Yehova xana? Kumbe ku vuriwa yini hi loko un’wana a fanele ku susiwa eku hlanganyeleni na vanhu va Xikwembu hikwalaho ka ku endla xidyoho lexikulu kambe ku sukela kwalaho a tshikeke ku hlanganyela eku tikhomeni loku nga riki ka Vukriste? Vakulu va yi tiva ndlela leyi va nga ta n’wi pfuna ha yona ya tintswalo ni rirhandzu leswaku ku ololoxiwa timhaka na Yehova. Kutani wihi na wihi loyi a navelaka ku tlhelela kutani a hanya hi ku pfumelelana ni ku rhandza ka Xikwembu u fanele a tivisa ku navela ka yena eka vakulu. “Tanani hi tenga timhaka! ku v̌ula Yehova. Loko ŝidyoho ŝa ṅwina ingi ŝi tŝhukile, ŝi kotisa šiv̌unguv̌ungu, šana ŝi ta basa tani hi gamboko?”—Esaya 1:18.

I wa tintswalo, malwandla ni rirhandzu swonghasi Tata wa hina wa le matilweni! Naswona i wo lehisa mbilu, naswona u tsakela swonghasi un’wana ni un’wana wa hina ha un’we-un’we! Entiyisweni, a nga lavi leswaku hi herisiwa ni mafambiselo lawa yo biha ya swilo. (2 Petro 3:9) A ku ri Yehova la kombeleke vanhu va yena va khale: “Tlhelelani ka mina, kutani nḍi ta tlhelela ka ṅwina.” Xirhambo xexo lexi fanaka xi kona namuntlha.—Malakia 3:7.

Nkarhi wa hela, u nga hlweli. Tlhela u tsakela ‘ku rhula lokukulu loku nga ka lava rhandzaka nawu wa Xikwembu,’ na vanhu va Yehova. “A ku na ku khunguv̌anyisa e ka v̌ona,” ku vula mupisalema. (Psalma 119:165) Eka vuento bya mbilu ya wena, wa wu rhandza nawu wa Yehova xana? Loko u ri nandza la tinyiketeke wa Xikwembu, lexi hi xona xivangelo lexi xi ku endleke leswaku u tinyiketa eka yena. Ku hava—ee, ku hava hi ku helela—lexi nga vaka xa nkoka ku tlula ku kondletela vuxaka bya wena na Yehova. U nga n’wi fularheli. Ehleketa hi mhaka leyi hi vukheta na hi xikhongelo. Loko a wu kayela vun’we ni malwandla ya vanhu va Yehova, a wu siyiwanga hi nkarhi wo tlhelela enhlengeletanweni ya Yehova. Endla tano handle ko ba mariri.