“Yehovha, Xikwembu Xa Tintswalo Ni Nsovo”

“Yehovha, Yehovha, Xikwembu xa tintswalo ni nsovo, la hlwelaka ku hlundzuka, la teleke musa wa rirhandzu ni ntiyiso.”—EKSODA 34:6, NW.

1. (a) Bibele yi nyikela nchavelelo wihi eka lava va voneke varhandziwa va vona va hambuka evugandzerini lebyi tengeke? (b) Yehovha u va languta njhani vanhu lava hambukaka?

“N’WANA wa mina wa xisati u ndzi byele leswaku a nga ha swi lavi ku va xirho xa vandlha ra Vukreste,” ku vula tatana un’wana loyi a nga Mukreste. “Ku hele masiku, mavhiki ni tin’hweti ndzi ri karhi ndzi twa ku vava swinene. A swi vavisa ku tlula ni rifu.” Hakunene swa vavisa ku vona munhu loyi u n’wi rhandzaka a hambuka endleleni ya vugandzeri lebyi tengeke. Xana u tshama u humeleriwa hi mhaka yo tano? Loko swi ri tano, swi ta ku chavelela ku tiva leswaku Yehovha wa ku twela. (Eksoda 3:7; Esaya 63:9) Kambe xana u va languta njhani vanhu vo tano lava tekeke ndlela leyi hoxeke? Bibele yi kombisa leswaku Yehovha wa va khutaza hi tintswalo leswaku va tlhela va va lava amukelekaka eka yena. U khongotele Vayuda lava xandzukeke va le nkarhini wa Malakiya a ku: “Tlhelelani ka mina, kutani nḍi ta tlhelela ka ṅ’wina.”—Malakiya 3:7.

2. Bibele yi swi kombisa njhani leswaku tintswalo i mfanelo ya risima eka vumunhu bya Yehovha?

² Tintswalo ta Xikwembu ti kombisiwe Muxe eNtshaveni ya Sinayi. Kwalaho, Yehovha u tikombise a ri “Xikwembu xa tintswalo ni nsovo, la hlwelaka ku hlundzuka, la teleke musa wa rirhandzu ni ntiyiso.” (Eksoda 34:6) Marito lawa ma kandziyisa leswaku tintswalo i mfanelo ya risima eka vumunhu bya Yehovha. U “navela leswaku hinkwenu mi hundzuka,” ku tsala Petro, muapostola la nga Mukreste. (2 Petro 3:9) Ina, tintswalo ta Xikwembu ti hikiwile. Muxe u byeriwe leswi: “A nga ka a nga tshiki ku xupula la faneriwaka hi ku xupuriwa.” (Eksoda 34:7, NW; 2 Petro 2:9) Hambiswiritano, “Xikwembu i rirhandzu,” naswona tintswalo i nchumu wa risima eka mfanelo yoleyo. (1 Yohane 4:8; Yakobo 3:17) Yehovha a nga ka a nga “hlayisi ku kariha ka [yena] hi masiku,” naswona u “ṭakela ku ṭeṭelela.”—Mikiya 7:18, 19.

3. Langutelo ra Yesu malunghana ni tintswalo a ri hambana njhani ni ra vatsari ni Vafarisi?

³ Yesu a a ri xikombiso lexi hetisekeke xa leswi Tata wakwe wa le tilweni a nga xiswona. (Yohane 5:19) Loko a kombisa tintswalo eka vadyohi a a nga seketeli swidyoho swa vona, kambe a a kombisa musa lowu a a ri na wona ni le ka lava vabyaka emirini. (Ringanisa Marka 1:40, 41.) Ina, Yesu u katse tintswalo exikarhi ka “timhaka ta ntikelo lowukulu” ta Nawu wa Xikwembu. (Matewu 23:23) Ku hambana na sweswo, xiya vatsari ni Vafarisi, lava milawu ya vona ya vululami hakanyingi a yi nga kombisi tintswalo nikatsongo. Loko va vona Yesu a ri ni vadyohi, va vilerile va ku: “Munhu loyi u amukela vadyohi a tlhela a dya na vona.” (Luka 15:1, 2) Yesu u hlamule vahehli vakwe hi swikombiso swinharhu, laha xin’wana ni xin’wana eka swona xi kombisaka tintswalo ta Xikwembu.

4. I swikombiso swihi swimbirhi leswi Yesu a swi hlamuseleke, naswona yinhla ya xin’wana ni xin’wana eka swona a yi ri yihi?

⁴ Xo sungula, Yesu u vulavule hi wanuna loyi a siyeke tinyimpfu ta 99 a ya lava yin’we leyi a yi lahlekile. Yinhla yakwe a yi ri yihi ke? “Ku ta va ni ntsako lowukulu swinene etilweni loko mudyohi un’we a hundzuka ku tlula lava lulameke va makumekaye-kaye lava swi nga lavekiki leswaku va hundzuka.” Endzhaku, Yesu u vulavule hi wansati loyi a laveke mali ya nsimbi ya drakma leyi lahlekeke ivi a tsaka loko a yi kuma. A a fanekisela yini ke? “Tintsumi ta Xikwembu ta tsaka loko mudyohi un’we a hundzuka.” Yesu u nyikele xikombiso xa yena xa vunharhu hi ku fanekisela.a Vo tala va xi teke xi ri xirungulwana lexinene ngopfu eka hinkwaswo leswi tshameke swi hlamuseriwa. Ku kambisisa xifaniso lexi swi ta hi pfuna ku tlangela tintswalo ta Xikwembu ni ku ti tekelela.—Luka 15:3-10.

N’wana La Xandzukeke A Suka eKaya

5, 6. N’wana lontsongo exikombisweni xa vunharhu xa Yesu u ri kombise njhani langutelo leri hlamarisaka ra ku pfumala ku tlangela?

⁵ “Munhu un’wana a a ri ni vana vambirhi va majaha. Kutani lontsongo eka vona a ku eka tata wakwe, ‘Tatana, ndzi nyike rifuwo leri nga xiavelo lexi nga xa mina.’ Kutani a va avela rifuwo rakwe ro tihanyisa. Endzhaku ka masiku ma nga ri mangani, mufana a hlengeleta swilo hinkwaswo ivi a endzela etikweni ra le kule, a fika a tlanga hi rifuwo rakwe hi ku hanya vutomi bya vusopfa.”—Luka 15:11-13.b

⁶ Laha n’wana lonkulu u kombise langutelo leri hlamarisaka ra ku pfumala ku tlangela. Xo sungula, u koxe ndzhaka yakwe, ivi endzhaku a tlanga hi yona hi ku “hanya vutomi bya vusopfa.” Xiga lexi nge “vutomi bya vusopfa” xi hundzuluxeriwe xi suka eritweni ra Xigriki leri vulaka “vutomi bya manyala.” Xidyondzi xin’wana xi vula leswaku xiga lexi xi “kombisa ku fularhela mahanyelo lamanene hi ndlela leyi tsemaka nhlana.” Swi fanerile leswi jaha ra le xifanisweni xa Yesu hi ntolovelo ri vuriwaka n’wana wa vusopfa, ku nga xiga lexi hlamuselaka munhu wa futa swinene ni loyi a tlangaka hi swilo.

7. I vamani namuntlha lava fanaka ni n’wana wa vusopfa, naswona ha yini vo tala eka vona va lava ku ya tilawula “etikweni ra le kule”?

⁷ Xana namuntlha va kona vanhu lava fanaka ni n’wana wa vusopfa? Ina, va kona. Lexi vavisaka, va nga ri vangani va siye “kaya” leri hlayisekeke ra Tata wa hina wa le tilweni, Yehovha. (1 Timotiya 3:15) Van’wana eka vona va vona onge milawu ya yindlu ya Xikwembu yi tika ngopfu, leswaku mahlo ya Yehovha lama xalamukeke ma va kavanyeta ku ri ni ku va sirhelela. (Ringanisa Pisalema 32:8.) Xiya wansati un’wana wa Mukreste loyi a kurisiweke hi misinya ya milawu ya Bibele kambe endzhaku a sungula ku nwa ku tlula mpimo ni ku tirhisa swidzidzirisi hi ndlela yo biha. Loko a anakanya hi nkarhi wolowo wa gome evuton’wini bya yena, u ri: “A ndzi lava ku kombisa leswaku ndzi nga hanya ku antswa hi ndlela ya mina. A ndzi lava ku endla leswi ndzi swi rhandzaka, naswona a ndzi nga lavi munhu leswaku a ndzi byela swin’wana.” Ku fana ni n’wana wa vusopfa, wansati loyi a ha riki lontshwa a a lava ku tilawula. Khombo ra kona, u boheke ku hlongoriwa evandlheni ra Vukreste hikwalaho ka mikhuva yakwe leyi lwisanaka ni Matsalwa.—1 Vakorinto 5:11-13.

8. (a) I mpfuno wihi lowu lava va navelaka ku hanya vutomi lebyi lwisanaka ni misinya ya milawu ya Xikwembu va nga nyikiwaka wona? (b) Ha yini munhu a fanele a anakanyisisa kahle hi ku hlawula ka yena emhakeni ya vugandzeri?

⁸ Swi heta matimba hakunene loko mupfumeri-kulobye a kombisa ku navela ku hanya hi ndlela leyi hambaneke ni misinya ya milawu ya Xikwembu. (Vafilipiya 3:18) Loko ku humelela leswi, vakulu ni van’wana lava nga ni timfanelo ta moya va tikarhatela ku lulamisa munhu la hambukaka. (Vagalatiya 6:1) Hambiswiritano, a ku sindzisiwi munhu leswaku a amukela joko ra ku va mudyondzisiwa wa Vukreste. (Matewu 11:28-30; 16:24) Hambi va ri vantshwa va fanele va tihlawulela emhakeni ya vugandzeri loko va kurile. Kahle-kahle, un’wana ni un’wana wa hina u ni mfanelo yo tihlawulela, naswona u ta tihlamulela swa yena eka Xikwembu. (Varhoma 14:12) I ntiyiso, hi ta tlhela hi ‘tshovela leswi hi swi byalaka’—ku nga dyondzo leyi n’wana wa vusopfa exifanisweni xa Yesu a a ta yi dyondza ku nga ri khale.—Vagalatiya 6:7, 8.

Gome eTikweni Ra Le Kule

9, 10. (a) I ku cinca kwihi ka xiyimo loku n’wana wa vusopfa a langutaneke na kona, naswona u angurise ku yini? (b) Kombisa ndlela leyi ha yona van’wana namuntlha lava fularhelaka vugandzeri lebyi tengeke va vonaka maxangu yo fana ni ya n’wana wa vusopfa.

⁹ “Loko a tirhise hinkwaswo, ku va ni ndlala leyikulu etikweni rero hinkwaro, kutani a sungula ku pfumala. U kale a ya namarhela un’wana wa vaaki va tiko rero, kutani yena a n’wi rhuma emasin’wini yakwe a ya risa tinguluve. Naswona a a tshama a navela ku dya swiphambati swa makherobu leswi a swi dyiwa hi tinguluve, kambe a ku nga ri na munhu loyi a a n’wi nyika xanchumu.”—Luka 15:14-16.

¹⁰ Hambileswi a ri evuswetini, n’wana wa vusopfa a a nga si anakanya hi ku tlhelela ekaya. Ku ri na sweswo, u ye eka muaka-tiko un’wana loyi a n’wi nyikeke ntirho wo risa tinguluve. Tanihi leswi Nawu wa Muxe a wu vula leswaku tinguluve a swi ri swiharhi leswi nga tengangiki, ntirho wo tano handle ko kanakana a wu nga amukeleki eka Muyuda. (Levhitika 11:7, 8) Kambe loko n’wana wa vusopfa a karhatiwa hi ripfalo, a a boheka ku ri fukamela. Phela, a a nga ta langutela muthori wakwe, ku nga muaka-tiko ntsena, leswaku a khathala hi mintlhaveko ya muhlapfa la sweleke. Xiyimo xa n’wana wa vusopfa xa fana ni xa vo tala namuntlha lava tshikaka ndlela leyi lulameke ya vugandzeri lebyi tengeke. Hakanyingi vanhu vo tano va endla swilo leswi eku sunguleni a va swi languta swi ri manyala. Hi xikombiso, loko jaha rin’wana ri ri ni malembe ya 17, ri fularhele ndlela ya Vukreste leyi a ri kurisiwa hi yona. Ri ri: “Ku tikhoma ko biha ni ku tirhisa swidzidzirisi hi ndlela yo biha swi sule tidyondzo leti sekeriweke eBibeleni leti ndzi ti tswongeke hi malembe yo tala.” Endzhakunyana, jaha leri ri tikume ri ri ekhotsweni hikwalaho ka ku yiva ri hlomile ni ku tlhela ri dlaya. Hambileswi endzhaku ri hlakarheleke emoyeni, ri tshovele hi ndlela yo vava swinene hikwalaho ka “ku tiphina hi xidyoho swa nkarhinyana”!—Ringanisa Vaheveru 11:24-26.

11. Xana maxangu ya n’wana wa vusopfa ma nyanyise ku yini, naswona van’wana namuntlha va kume leswaku swikoka-mahlo swa misava i “vuxisi bya hava” hi ndlela yihi?

¹¹ Maxangu ya n’wana wa vusopfa ma nyanyisiwe hileswi a “ku nga ri na munhu loyi a a n’wi nyika xanchumu.” Xana vanghana vakwe lava a ha ku va kuma a va helele kwihi ke? Tanihi leswi se a a nga ha ri na mali, a a fana ni ‘nchumu lowu vengiwaka’ eka vona. (Swivuriso 14:20) Hi ku fanana, vo tala namuntlha lava hambukaka eripfumelweni va kuma leswaku swikoka-mahlo ni malangutelo ya misava leyi i “vuxisi bya hava.” (Vakolosa 2:8) Wansati un’wana la ha riki lontshwa loyi a siyeke nhlengeletano ya Xikwembu nkarhinyana u te: “Ndzi vone maxangu lamakulu hi ku pfumala vukongomisi bya Yehovha. Ndzi ringete ku titwananisa ni misava, kambe tanihi leswi a ndzi nga fani ni van’wana, va ndzi fularherile. A ndzi titwa ku fana ni n’wana la lahlekeke, loyi a lavaka tatana leswaku a n’wi kongomisa. Ndzi swi xiye hi nkarhi wolowo leswaku a ndzi lava Yehovha. A ndzi nga ha swi lavi ku hanya ndzi nga titsheganga hi yena.” Ni n’wana wa vusopfa wa le xifanisweni xa Yesu u titwe hi ndlela yoleyo.

N’wana Wa Vusopfa A Tianakanya

12, 13. I yini leswi pfuneke van’wana namuntlha leswaku va tianakanya? (Vona bokisi.)

¹² “Loko a anakanyisise kahle, a ku, ‘Ku ni vanhu vo tala lava thoriweke hi tatana, va ni swakudya swo tala, kambe mina ndza fa laha hi ndlala! Ndzi ta pfuka ndzi ya eka tatana ivi ndzi ku eka yena: “Tatana, ndzi dyohele tilo swin’we na wena. A ndza ha faneli ku vuriwa n’wana wa wena. Ndzi endle un’wana wa vanhu va wena lava u va tholeke.”’ Kutani a pfuka a ya eka tata wa yena.”—Luka 15:17-20.

¹³ N’wana wa vusopfa u “anakanyisise kahle.” Ku ringana nkarhi wo karhi, a a tinyiketele eku hlongoriseni ka ntsako, onge hi loko a hanya emisaveni ya milorho. Kambe u sungule ku xi lemuka swinene xiyimo xakwe xa ntiyiso xa moya. Ina, hambiloko jaha leri ri wile, a ka ha ri ni ntshembo ha rona. A ri ri ni timfanelo to karhi letinene. (Swivuriso 24:16; ringanisa 2 Tikronika 19:2, 3.) Ku vuriwa yini hi lava va siyaka ntlhambi wa Xikwembu namuntlha? Xana swi ta va swi twala ku gimeta hileswaku hinkwavo a ka ha ri na ntshembo ha vona, leswaku emhakeni yin’wana ni yin’wana ndlela ya vona ya ku xandzuka yi kombisa leswaku va dyohele moya lowo kwetsima wa Xikwembu? (Matewu 12:31, 32) A swi tano. Van’wana va vona va karhateka hi ku hambuka ka vona, naswona hi ku famba ka nkarhi vo tala va vona va sungula ku tianakanya. “A ku na siku na rin’we leri ndzi rivaleke ha Yehovha,” ku vula makwerhu un’wana wa xisati, loko a anakanya hi nkarhi lowu a wu heteke a ri ehandle ka nhlengeletano ya Xikwembu. “Minkarhi hinkwayo a ndzi khongela leswaku siku rin’wana a tlhela a ndzi amukela hi ndlela yo karhi leswaku ndzi vuyela entiyisweni.”—Pisalema 119:176.

14. N’wana wa vusopfa u tiyimisele ku endla yini, naswona u ku kombise njhani ku titsongahata loko a endla tano?

¹⁴ Kambe, xana lava va hambukeke va nga endla yini hi xiyimo xa vona? Exifanisweni xa Yesu, n’wana wa vusopfa u bohe ku tlhelela ekaya a ya kombela ku rivaleriwa hi tata wakwe. N’wana wa vusopfa a tiyimisele ku fika a ku: “Ndzi endle un’wana wa vanhu va wena lava u va tholeke.” Nandza la thoriweke a ku ri mutirhi la thoriweke ku tirha siku rin’we loyi a swi koteka ku n’wi hlongola hi siku rero. Xiyimo xa yena a xi ri xa le hansi ni le ka xiyimo xa hlonga leri hi ndlela yo karhi a ri fana ni xirho xa ndyangu. Kutani n’wana wa vusopfa a a nga anakanyi hi ku kombela leswaku a tlheriseriwa exiyin’weni xo sungula tanihi n’wana. A a tiyimisele hi mbilu hinkwayo ku va exiyin’weni xa le hansi swinene leswaku a ta ku kombisa hi vuntshwa ku tshembeka kakwe eka tata wa yena siku na siku. Hambiswiritano, n’wana wa vusopfa a a ta sala a hlamele.

Ku Amukeriwa Hi Mandla Mambirhi

15-17. (a) Tatana u angurise ku yini loko a vona n’wana wakwe? (b) Hi wihi ntikelo wa nguvu yo leha, xingwavila ni maphaxani leswi tatana a swi nyikeke n’wana wa yena? (c) Ku endla ka tatana nkhuvo swi kombisa yini?

¹⁵ “Loko a ha ri ekulenyana, tata wakwe a n’wi vona, a va ni ntwela-vusiwana, hiloko a tsutsuma a wela enhan’wini yakwe ivi a n’wi ntswontswa hi rirhandzu. Kutani n’wana a ku eka yena, ‘Tatana, ndzi dyohele tilo swin’we na wena. A ndza ha faneli ku vuriwa n’wana wa wena. Ndzi endle un’wana wa vanhu va wena lava u va tholeke.’ Kambe tata wakwe a byela mahlonga ya yena a ku, ‘Hatlisani, humesani nguvu yo leha, leyinene eka hinkwato, mi n’wi ambexa yona, kutani mi vehela xingwavila evokweni rakwe ni maphaxani emilengeni yakwe. Mi tisa nkunzi leyitsongo leyi noneke, mi yi tlhava, hi dya hi tiphina, hikuva n’wana loyi wa mina a a file kutani u tlhele a hanya; a a lahlekile ivi a kumeka.’ Hiloko va sungula ku tiphina.”—Luka 15:20-24.

¹⁶ Mutswari un’wana ni un’wana loyi a nga ni rirhandzu wa swi tsakela leswaku n’wana wakwe a hlakarhela hi tlhelo ra moya. Hikwalaho, hi mahlo ya mianakanyo hi nga swi kota ku vona tata wa n’wana wa vusopfa a hoxa mahlo siku na siku endleleni leyi nga emahlweni ka yindlu yakwe, a langutele ku vuya ka n’wana wakwe hi mahlo-ngati. Kutani u vona n’wana wakwe a ri karhi a ta hi ndlela leyi! Handle ko kanakana jaha leri a ri nga ha languteki. Kambe tata wakwe a n’wi lemuka loko a ha ri “ekulenyana.” A nga na mhaka ni switlakati ni moya lowu nga ni gome; u vona n’wana wakwe, kutani a tsutsuma a ya n’wi hlanganisa!

¹⁷ Loko tatana a fika eka n’wana wakwe, u wela enhan’wini ya n’wana wakwe kutani a n’wi ntswontswa hi rirhandzu. Endzhaku u lerise mahlonga yakwe leswaku ma nyika n’wana wakwe nguvu yo leha, xingwavila ni maphaxani. Nguvu leyi a yi nga ri xiambalo lexi tolovelekeke, kambe a yi ri “leyinene eka hinkwato”—kumbexana nguvu leyi khavisiweke swinene yo tanihi leyi nyikiwaka muendzi loyi a xiximekaka. Tanihi leswi xingwavila ni maphaxani a swi nga tali ku veheriwa hi mahlonga, tatana a a swi veka erivaleni leswaku n’wana wa yena a a amukeriwa tanihi xirho xa ndyangu lexi heleleke. Kambe tatana u endle leswi engetelekeke. U endle nkhuvo wo tlangela ku vuya ka n’wana wakwe. Handle ko kanakana, wanuna loyi a a nga rivaleli n’wana wa yena hi ku n’unun’uta, kumbe hileswi ku vuya ka n’wana wakwe ku endleke leswaku a boheka ku n’wi amukela; a a swi lava hi mbilu yo basa ku n’wi rivalela. Leswi swi n’wi tsakisile.

18, 19. (a) Xana xifaniso xa n’wana wa vusopfa xi ku dyondzisa yini malunghana na Yehovha? (b) Hilaha swi kombisiweke hakona hi ndlela leyi a khomeke Yuda na Yerusalema ha yona, Yehovha u “tshama a langutele” ku vuya ka mudyohi hi ndlela yihi?

¹⁸ Ku ta fikela sweswi, xana xifaniso xa n’wana wa vusopfa xi hi dyondzisa yini malunghana ni Xikwembu lexi hi nga ni lunghelo ro xi gandzela? Xo sungula, xi hi dyondzisa leswaku Yehovha u ni “tintswalo ni nsovo, [hi] la hlwelaka ku hlundzuka, la teleke musa wa rirhandzu ni ntiyiso.” (Eksoda 34:6) Ina, tintswalo i mfanelo leyikulu ya Xikwembu. Xi kombisa tintswalo eka lava swi va fanelaka. Nakambe, xifaniso xa Yesu xi hi dyondzisa leswaku Yehovha u ‘lunghekele ku rivalela.’ (Pisalema 86:5) U tshama a xalamukele ku vona ku cinca ko karhi etimbilwini ta vanhu lava dyohaka loku nga n’wi nyikaka xivangelo xo va kombisa tintswalo.— 2 Tikronika 12:12; 16:9.

¹⁹ Hi xikombiso, anakanya hi ndlela leyi Xikwembu xi khomeke Israyele ha yona. Muprofeta Esaya u huhuteriwe hi Yehovha leswaku a hlamusela Yuda na Yerusalema tanihi ‘tindhawu leti vabyaka ku sukela enhlokweni ku ya emilengeni.’ Kambe u tlhele a ku: “Yehovha u ta tshama a langutele ku mi komba musa, kutani u ta suka a yima a mi komba tintswalo.” (Esaya 1:5, 6; 30:18, NW; 55:7; Ezekiyele 33:11) Ku fana ni tatana wa le xifanisweni xa Yesu, Yehovha u ‘hoxa mahlo endleleni’ hi mukhuva wo fanekisela. U tshama a langutele ku vuya ka mani na mani loyi a siyeke yindlu yakwe. Xana a hi swona leswi a hi ta swi langutela eka tatana wa rirhandzu?—Pisalema 103:13.

20, 21. (a) Vo tala namuntlha va kokiwa njhani hi tintswalo ta Xikwembu? (b) Ku ta vulavuriwa hi yini eka xihloko lexi landzelaka?

²⁰ Lembe na lembe, tintswalo ta Yehovha ti vangela vo tala ku tianakanya kutani va tlhelela evugandzerini bya ntiyiso. Leswi swi tisa ntsako lowukulu eka varhandziwa va vona! Hi xikombiso, xiya tatana la nga Mukreste loyi a boxiweke eku sunguleni. Lexi tsakisaka, n’wana wakwe wa xisati u hlakarherile hi tlhelo ra moya naswona sweswi i mutirheli wa nkarhi hinkwawo. Tatana loyi u ri: “Ndzi tsake swinene masiku lawa. Mihloti ya mina ya nhlomulo yi hundzuke mihloti ya ntsako.” Ina, na Yehovha wa tsaka!—Swivuriso 27:11.

²¹ Kambe xifaniso xa n’wana wa vusopfa xi vula swo tala. Yesu u ye emahlweni ni mhaka yakwe leswaku a kombisa ku hambana exikarhi ka tintswalo ta Yehovha ni langutelo ro sihalala, ra ku sola-sola van’wana, leri a ri tolovelekile exikarhi ka vatsari ni Vafarisi. Leswaku sweswo u swi endlise ku yini—ni leswaku swi vula yini eka hina—swi ta hlamuseriwa exihlokweni lexi landzelaka.

[Tinhlamuselo ta le hansi]

Mpfuxeto

◻ Langutelo ra Yesu hi tintswalo a ri hambana njhani ni ra Vafarisi?

◻ I vamani namuntlha lava fanaka ni n’wana wa vusopfa, naswona njhani?

◻ I swiyimo swihi leswi endleke leswaku n’wana wa vusopfa a sungula ku tianakanya?

◻ Tatana u ti kombise njhani tintswalo eka n’wana wakwe la hundzukeke?