Tibibele Leti Hundzuluxeriweke Ta Le Afrika

Ku hundzuluxela ko sungula ka Bibele hinkwayo yi ya eka ririmi ra le Afrika ku endliwe le Egipta. Ku hundzuluxela loku tiviwaka ku ri ka Xikopt, ku vuriwa leswaku ku ve kona hi malembe xidzana yo sukela eka ra vunharhu kumbe ra vumune C.E. Endzhaku ka malembe xidzana manharhu lama landzeleke, Bibele yi hundzuluxeriwe hi tindzimi ta le Etiyopiya.

Madzana ya tindzimi leti a ti nga tsariwi leti vulavuriwaka le dzongeni wa Etiyopiya ni le Sahara a ti fanele ku rindzela ku fika ka varhumiwa hi lembe xidzana ra vu-19. Hi 1857 nhluvuko lowukulu wu endliwile loko Robert Moffat a hete ku hundzuluxela Bibele yi ya eka Xitswana, ririmi ra le dzongeni wa Afrika. Nakambe u yi gandlise hi swiphemu hi muchini wa mavoko. Leyi a ku ri Bibele yo sungula leyi heleleke leyi kandziyisiweke eAfrika naswona i yo sungula ku hundzuluxeriwa hi laha ku heleleke yi ya eka ririmi ra Xiafrika leri khale a ri nga tsariwi. Lexi tsakisaka, Moffat u tirhise vito ra Xikwembu Yehova eka ku hundzuluxela ka yena. Eka ku hundzuluxela ka 1872 loku humesiweke hi Sosayiti ya Bibele ya le Britain ni le Matikweni Mambe, vito leri nge Yehova ri tirhisiwa eka swiga-nkulu leswi vuriweke hi Yesu hi laha swi rhekhodiweke ha kona eka Matewu 4:10 na Marka 12:29, 30.

Hi 1990 Bibele hinkwayo a yi hundzuluxeriwe hi tindzimi ta 119 ta le Afrika, laha swiphemu swa yona swi kumekaka hi tindzimi tin’wana ta 434.