Moya Wa Yehovha Wu Kongomisa Vanhu Va Yena

“Moya wa wena lo’wa v̌unene a wu nḍi fambise ndleleni ya ku lulama!”—PISALEMA 143:10.

1, 2. I yini leswi nga ha vangaka gome eka malandza yo tshembeka ya Yehovha?

‘NDZI titwa ndzi ri ni gome! Xana nchavelelo ndzi nga wu kuma kwihi? Xana Xikwembu xi lo ndzi fularhela?’ Xana u tshuka u titwa tano? Loko swi ri tano, a wo va wexe. Hambi leswi malandza yo tshembeka ya Yehovha ma tshamaka eparadeyisini leyi ndlandlamukaka ya moya, nkarhi wun’wana ma hlangana ni swiphiqo, maxangu ni miringo leyi hetaka matimba ni leyi tolovelekeke evanhwini.—1 Vakorinto 10:13.

² Kumbexana u karhatiwa hi miringo leyi nga heriki kumbe ku tshikileriwa ngopfu. U nga ha va u ri ni gome ra ku loveriwa hi la rhandzekaka naswona u khomiwa ngopfu hi xivundza. Kumbe mbilu ya wena yi nga ha karhatiwa hi ku vabya ka munghana la rhandzekaka. Swiyimo swo tano swi nga ku pfumata ntsako ni ku rhula, naswona swi nga tsekatsekisa ripfumelo ra wena. Xana u fanele ku endla yini?

Kombela Xikwembu Xi Ku Ha Moya Wa Xona

3. Loko xin’wana xi ku tekela timfanelo to fana ni ku rhula ni ntsako, hi swihi leswi nga vaka vutlharhi ku swi endla?

³ Loko nchumu wo karhi wu nga ku nyiki ku rhula, ntsako kumbe timfanelo tin’wana ta Xikwembu, ku ta va vutlharhi ku khongela u kombela moya wo kwetsima wa Xikwembu, kumbe matimba lama tirhaka. Hikwalaho ka yini? Hikuva moya wa Yehovha wu veka mihandzu leyinene, leyi pfunaka Mukreste ku langutana ni swiphiqo, maxangu ni miringo. Endzhaku ko tsundzuxa hi ‘mintirho ya nyama,’ muapostola u tsarile a ku: “Kasi mihandzu ya Moya i rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka, ni musa, ni ku tikhoma. Ku hava nawu lowu lwaka ni leswo tano.”—Vagalatiya 5:19-23.

4. Loko u hlangana ni maxangu kumbe miringo yo karhi, ha yini swi fanela leswaku u khongela hi ku kongoma?

⁴ Hikwalaho ka muxaka wa ndzingo lowu u langutanaka na wona, u nga ha kuma leswaku u le khombyeni ro lahlekeriwa hi xiyimo xa wena xo va ni vunene, kumbe xo fumiwa hi vunene. Kutani khongela hi ku kongoma eka Yehovha Xikwembu u kombela vunene, mbhandzu wa moya wo kwetsima. Loko u langutane ni ndzingo wo karhi, ngopfu-ngopfu u lava mbhandzu wa ku tikhoma. Kavula, nakambe swa fanela leswaku u khongelela ku pfuniwa hi Xikwembu leswaku u lwisana ni ndzingo wolowo, ni leswaku u kutsuriwa eka Sathana, ni ku kuma vutlharhi lebyi u byi lavaka leswaku u tiyiselela ndzingo wolowo.—Matewu 6:13; Yakobo 1:5, 6.

5. Loko swiyimo swi ku tshikilela ngopfu lerova u nga tivi leswaku hi wihi mbhandzu wa moya lowu u nga wu khongelelaka, xana u fanele ku endla yini?

⁵ Hambi swi ri tano, nkarhi wun’wana swiyimo swi nga ha ku karhata ngopfu kumbe ku ku hlanganisa nhloko, u nga tivi leswaku hi wihi mbhandzu wa moya lowu u wu pfumalaka. Kahle-kahle, ntsako, ku rhula, vunene ni timfanelo tin’wana ta Xikwembu, swi nga ha va swi ri ekhombyeni. Xana i yini leswi faneleke ku endliwa? Ha yini u nga kombeli Xikwembu xi ku ha moya wo kwetsima hi woxe, xi wu endla wu veka mihandzu leyi lavekaka eka wena? Mihandzu leyi lavekaka ku nga ha va ku ri rirhandzu, ntsako, ku rhula, kumbe mihandzu ya moya yi hlanganile. Nakambe khongela leswaku Xikwembu xi ku pfuna u pfumelela ku kongomisiwa hi moya wa xona, hikuva xi tirhisa wona ku kongomisa vanhu va xona.

Yehovha Wa Swi Rhandza Ku Pfuna

6. Xana Yesu u va khutaze njhani valandzeri vakwe hi xilaveko xo khongela va nga tshiki?

⁶ Loko vadyondzisiwa va Yesu Kreste va kombele ndzetelo hi xikhongelo, hi ku komisa u va khutaze ku khongelela moya wa Xikwembu. Yesu u rhange hi ku tirhisa xikombiso lexi kunguhateriweke ku va susumetela ku khongela va nga tshiki. U te: “Un’wana wa n’wina a nga va ni nakulobye, kutani a ya eka yena exikarhi ka vusiku, a ku ka yena: ‘Nakulorhi, ndzi lombe swinkwa swinharhu hikuva nakulorhi un’wana la nge riendzweni ú fikile kwala ka mina, kutani ndzi pfumala leswi ndzi nga n’wi fihlutaka ha swona.’ Kambe yena a n’wi hlamula a ri ndlwini a ku: ‘U nga ndzi karhati, nyangwa yi pfariwile; mina ni vana hi etlele, a ndzi swi koti ku pfuka, ndzi ku nyika.’ Mina ndzi ri: Hambiloko a nga lavi ku pfuka a n’wi nyika, hi mhaka ya vunakulobye bya vona ú ta kala a pfuka, a n’wi nyika hinkwaswo leswi a swi lavaka hikuva [u phikelela hi matimba, NW].”—Luka 11:5-8.

7. Hi wihi mongo wa marito ya Yesu eka Luka 11:11-13, naswona ma hi tiyisekisa hi yini mayelana ni Xikwembu ni moya wa xona?

⁷ Yehovha wa swi rhandza ku pfuna un’wana ni un’wana wa malandza ya yena yo tshembeka lama tinyiketeleke, naswona wa swi yingisa swikombelo swa wona. Kambe loko munhu wo tano a ‘hambeta a kombela,’ hi laha Yesu a khutazeke ha kona, leswi swi kombisa ku navela loku humaka embilwini naswona swi kombisa ripfumelo. (Luka 11:9, 10) Yesu u engeterile: “Xana i tatana wihi exikarhi ka n’wina, loyi a nga nyikaka n’wana wa yena enyoka, loko a kombela nhlampfi ke? Ni loko a kombela tandza, ú ta n’wi nyika xipame xana? Kutani ke, leswi n’wina mi nga vanhu va tihanyi, mi tivaka ku nyika vana va n’wina swilo leswinene, xana Tatana wa le tilweni a nge tlurisi ngopfu ku nyika Moya lowo Kwetsima eka lava kombelaka ka yena xana?” (Luka 11:11-13) Loko mutswari wa laha misaveni, hambi leswi a hombolokeke ngopfu kumbe katsongo hikwalaho ka vudyoho lebyi a byi kumeke hi ndzhaka, a nyika vana vakwe swilo leswinene, kunene Tata wa hina la nge matilweni u ta ya emahlweni a hanana hi moya wakwe wo kwetsima eka un’wana ni un’wana wa malandza yakwe yo tshembeka, loyi a wu kombelaka hi ku titsongahata.

8. Xana Pisalema 143:10 yi tirha njhani eka Davhida, Yesu, ni malandza ya Xikwembu ya manguva lawa?

⁸ Leswaku hi pfuneka hi moya wa Xikwembu, hi fanele hi tsakela ku landzela nkongomiso wa wona tanihi Davhida. U khongerile a ku: “Nḍi letele ku endla le’ŝi ranḍiwaka hi wena! Hikuv̌a u Šikwembu ša mina. Moya wa wena lo’wa v̌unene a wu nḍi fambise ndleleni ya ku lulama!” (Pisalema 143:10) Davhida, loyi a a avanyisiwe hi Sawulo hosi ya Israyele, u lave moya wa Xikwembu leswaku wu n’wi kongomisa, a ta tiyiseka leswaku ndlela yakwe yi lulamile. Endzhaku ka nkarhi Abiyatara u te ni efodi ya muprista, leyi tirhisiwaka ku tiyisekisa ku rhandza ka Xikwembu. Tanihi muyimeri wa vaprista va Xikwembu, Abiyatara u letele Davhida mayelana ni ndlela yo famba ha yona leswaku a tsakisa Yehovha. (1 Samuwele 22:17–23:12; 30:6-8) Ku fana na Davhida, Yesu na yena u kongomisiwe hi moya wa Yehovha, naswona leswi swi ve tano ni le ka valandzeri va Kreste lava totiweke tanihi ntlawa. Hi 1918-19, a va langutiwa va ri lava nga fanelangiki emahlweni ka vanhu naswona valala va vona va vukhongeri a va ehleketa leswaku va nga va herisa. Vatotiwa va khongelele ndlela ya ku huma exiyin’weni xa vona xa ku nga endli nchumu, naswona hi 1919, Xikwembu xi hlamule swikhongelo swa vona, xi va kutsula, xi tlhela xi va nyika matimba yo tirha ntirho wa xona. (Pisalema 143:7-9) Hakunene, moya wa Yehovha a a wu pfuna hi nkarhi wolowo, wu kongomisa vanhu vakwe, ku fana ni leswi wu endlisaka swona ku ta fikela namuntlha.

Ndlela Leyi Moya Wu Pfunaka Ha Yona

9. (a) Xana moya wo kwetsima wu tirha njhani tanihi ‘mupfuni’? (b) Hi swi tivisa ku yini leswaku moya lowo kwetsima a hi munhu? (Vona nhlamuselo ya le hansi.)

⁹ Yesu Kreste u vule moya lowo kwetsima ‘mupfuni.’ Hi xikombiso, u byele vadyondzisiwa vakwe a ku: ‘Ndzi ta kombela Tatana, kutani yena u ta mi nyika mupfuni un’wana, loyi a nga ta va na n’wina hi laha ku nga heriki, ku nga moya wa ntiyiso. Misava yi nga ka yi nga wu amukeli, hikuva a yi wu voni, naswona a yi wu tivi. N’wina ma wu tiva, hikuva wu tshama na n’wina, naswona wu le ndzeni ka n’wina.’ Nakambe, ‘mupfuni’ yoloye a a ta va mudyondzisi, hikuva Kreste u tshembise a ku: ‘Mupfuni, ku nga moya wo kwetsima lowu Tatana a nga ta wu rhuma hi vito ra mina, wu ta mi dyondzisa hinkwaswo, ni ku mi tsundzuxa hinkwaswo leswi ndzi mi byeleke swona.’ Moya lowu a wu ta tlhela wu veka vumbhoni mayelana na Kreste, naswona u tshembise vadyondzisiwa vakwe a ku: ‘Swi ta va swinene eka n’wina loko ndzi famba. Hikuva loko ndzi nga fambi, mupfuni a nga ka a nga ti eka n’wina; kambe loko ndzi famba, ndzi ta n’wi rhumela a ta eka n’wina.’—Yohane 14:16, 17, 26; 15:26; 16:7.a

10. Hi tihi tindlela leti moya wo kwetsima wu vonakeke wu ri mupfuni ha tona?

¹⁰ A ri etilweni, Yesu u chululele moya wo kwetsima lowu a wu tshembisile ehenhla ka valandzeri vakwe hi siku ra Pentekosta hi 33 C.E. (Mintirho 1:4, 5; 2:1-11) Tanihi mupfuni, moya wu va nyike ku twisisa loku engetelekeke ka ku rhandza ka Xikwembu ni xikongomelo xa xona, naswona wu pfulele Rito ra xona ra vuprofeta. (1 Vakorinto 2:10-16; Vakolosa 1:9, 10; Vaheveru 9:8-10) Mupfuni yoloye u tlhele a nyika vadyondzisiwa va Yesu matimba yo va timbhoni emisaveni hinkwayo. (Luka 24:49; Mintirho 1:8; Vaefesa 3:5, 6) Namuntlha, moya wo kwetsima wu nga pfuna Mukreste la tinyiketeleke leswaku a kula hi vutivi loko a tiwundla hi swakudya swa moya leswi phameriwaka hi Xikwembu hi ku tirhisa “nandza la tshembekaka, wo tlhariha.” (Matewu 24:45-47) Moya wa Xikwembu wu kota ku pfuneta hi ku ku tiyisa nhlana ni ku ku nyika matimba lama lavekaka leswaku u nyikela vumbhoni tanihi un’wana wa malandza ya Yehovha. (Matewu 10:19, 20; Mintirho 4:29-31) Hambi swi ri tano, moya wo kwetsima wu tlhela wu pfuna vanhu va Xikwembu hi tindlela tin’wana.

‘Loko U Nga Koti Ku Phofula Swivilelo’

11. Loko ndzingo wu vonaka wu ri ni matimba, xana Mukreste u fanele a endla yini?

¹¹ Loko Mukreste a karhatiwa hi ndzingo lowu vonakaka wu ri ni matimba, xana u fanele ku endla yini? A a khongelele moya wo kwetsima, a wu pfumelela wu tirha! Pawulo u te: “Moya na wona wa hi pfuna eku tsaneni ka hina; hikuva a hi tivi ndlela leyi hi fanelaka ku khongela ha yona, kambe Moya, wona ha woxe, wu hi [kombelela eka Xikwembu, NW], loko hina hi konya kunene hi nga humesi marito. Kutani Xikwembu lexi kambaka swa timbilu, xi tiva leswi Moya wu swi anakanyaka; xi tiva leswaku Moya wu [kombelela, NW] vahlawuriwa va xona hi ku ya hi ku rhandza ka xona.”—Varhoma 8:26, 27.

12, 13. (a) Xana Varhoma 8:26, 27 yi tirha njhani eka swikhongelo leswi ngopfu-ngopfu swi endliwaka eswiyin’weni leswi ringaka? (b) Xana Pawulo ni vanakulobye va endle yini loko va ri emaxangwini lamakulu exifundzheni xa Asia?

¹² Vahlawuriwa lava, lava moya wa Xikwembu wu va kombelelaka, i valandzeri va Yesu lava totiweke, lava nga ni ntshembo wa le tilweni. Kambe ku nga khathariseki leswaku u vitaneriwe ematilweni kumbe u ni ntshembo wa laha misaveni, tanihi Mukreste u nga pfuniwa hi moya wo kwetsima wa Xikwembu. Nkarhi wun’wana Yehovha u nyika nhlamulo leyi kongomeke eka xivutiso xo karhi. Hambi swi ri tano, nkarhi wun’wana u nga ha tshikileleka ngopfu lerova u tsandzeka ni ku phofula mintlhaveko ya wena hi marito naswona u nga ha kota ntsena ku kombela Yehovha hi swivilelo leswi u nga swi humesiki hi nomu. Entiyisweni, swi nga ha endleka u nga swi tivi leswi u faneleke ku swi kombela naswona u nga ha tikuma u kombele lexi nga riki xona loko u nga kombelanga moya wo kwetsima. Xikwembu xa swi tiva leswaku u lava ku rhandza ka xona ku endliwa, naswona xa swi tiva leswi u swi pfumalaka hakunene. Ku tlhandlekela kwalaho, hi moya wa xona wo kwetsima, xi endle leswaku swikhongelo swo tala swi tsariwa eRitweni ra xona, naswona swikhongelo leswi swi hlangavetana ni swiyimo leswi ringaka. (2 Timotiya 3:16, 17; 2 Petro 1:21) Hikwalaho, Yehovha a nga languta mianakanyo yo karhi leyi phofuriwaka eswikhongelweni swo tano leswi huhuteriweke tanihi marito lawa a a wu ta ma vula tanihi un’wana wa malandza ya yena, naswona a nga ku hlamulela swona.

¹³ Pawulo ni vanakulobye va nga ha va va nga swi tivanga leswi a va fanele ku swi khongelela loko va tokote nhlomulo le xifundzheni xa Asia. Hi ku va ‘va ri emaxangwini lamakulu, va titwe va ri lava avanyiseriweke rifu.’ Kambe va kombele swikhongelo swa van’wana, va tshembela eka Xikwembu, lexi kotaka ku pfuxa vafi, kutani xi va ponisile. (2 Vakorinto 1:8-11) Mayana nchavelelo wonghasi wa leswaku Yehovha Xikwembu u twa swikhongelo swa malandza ya yena yo tshembeka a tlhela a swi hlamula!

14. I swilo swihi leswinene leswi nga humelelaka loko Yehovha a pfumelela ndzingo wu hambeta nkarhi wo karhi?

¹⁴ Tanihi nhlengeletano, vanhu va Xikwembu va tala ku karhatiwa hi miringo. Hi laha swi tivisiweke ha kona emahlweni, a a va xanisiwa enkarhini wa Nyimpi yo Sungula ya Misava. Hambi leswi ku twisisa xiyimo xa vona a ku nga si va erivaleni hi nkarhi wolowo naswona hikwalaho ka sweswo va nga swi tivangiki hi ku hetiseka leswi a a va fanele ku swi khongelela, Rito ra Yehovha ri ni swikhongelo swa vuprofeta leswi a va hlamuleleke swona. (Pisalema 69, 102, 126; Esaya ndzima 12) Kambe ku vuriwa yini loko Yehovha a pfumelela ndzingo nkarhi wo karhi? Leswi swi nga ha tisa vumbhoni, swi nga vangela van’wana ku amukela ntiyiso, ni ku nyika Vakreste nkarhi wa ku kombisa rirhandzu hi ku khongelela vapfumeri-kulobye lava xanisekaka kumbe ku va pfuna. (Yohane 13:34, 35; 2 Vakorinto 1:11) Tsundzuka leswaku Yehova u kongomisa vanhu va yena hi moya wa yena wo kwetsima, a va endlela leswo saseka, naswona u tshamela ku endla swilo hi ndlela leyi nga xiximaka ni ku hlawulekisa vito ra yena lero kwetsima.—Eksoda 9:16; Matewu 6:9.

Mi Nga Tshuki Mi Hlunamisa Moya

15. Xana Vakreste va nga tshembela eka moya wa Yehovha leswaku wu va endlela yini?

¹⁵ Hikwalaho, loko u ri nandza wa Yehovha, hi nkarhi wa miringo ni minkarhi yin’wana, khongelela moya wo kwetsima. Kutani tiyiseka ku landzela nkongomiso wa wona, hikuva Pawulo u tsale a ku: “Mi nga [hlunamisi, NW] Moya lowo Kwetsima wa Xikwembu . . . hikuva i mfungho wa Xikwembu wo komba leswaku mi vanhu va xona, ni leswaku siku ra ta, leri xi nga ta mi kutsula ha rona.” (Vaefesa 4:30) Moya wa Xikwembu a a wu ri mfungho naswona wa ha ri wona, kumbe ‘xikombiso xa leswi a swi ta ta’ eka Vakreste vo tshembeka lava totiweke—ku nga xa vutomi bya ku nga fi ematilweni. (2 Vakorinto 1:22; Varhoma 8:15; 1 Vakorinto 15:50-57; Nhlavutelo 2:10) Vakreste lava totiweke swin’we ni lava nga ni ntshembo wa le misaveni va nga tshembela eka moya wa Yehovha leswaku wu va endlela swo tala. Wu nga va kongomisa ku hanya vutomi byo tshembeka ni ku va pfuna ku papalata mintirho ya vudyoho leyi nga va hambanisaka ni Xikwembu, kumbe ku lahlekeriwa hi moya wa xona wo kwetsima, ni ku tsandzeka ku kuma vutomi lebyi nga heriki.—Vagalatiya 5:19-21.

16, 17. Xana Mukreste a nga wu hlunamisa njhani moya?

¹⁶ Xana Mukreste a nga wu hlunamisa njhani moya hi vomu kumbe handle ko swi xiya? Phela, Yehovha u tirhisa moya wakwe ku kurisa vun’we ni ku veka vavanuna lava nga ni vutihlamuleri evandlheni. Hikwalaho, loko xirho xa vandlha a xo sola vakulu lava vekiweke, xi famba xi hleva, ni swin’wana, a xi ta va xi nga landzeli nkongomiso wa moya wa Xikwembu mayelana ni ku rhula ni vun’we. Hi ndlela leyi tolovelekeke, a a xi ta va xi hlundzukisa moya.—1 Vakorinto 1:10; 3:1-4, 16, 17; 1 Vatesalonika 5:12, 13; Yuda 16.

¹⁷ Loko a tsalela Vakreste va le Efesa, Pawulo u va tsundzuxe ehenhleni ka mikhuva ya ku hemba, ku va ni xikhomela, ku yiva, mavulavulelo lama nga fanelangiki, ku tinyiketela vuoswi, mahanyelo lama khomisaka tingana ni mafenya lama thyakeke. Loko Mukreste a tipfumelela ku voyamela eswilweni swo tano, u ta va a lwisana ni ndzayo ya Bibele leyi huhuteriweke hi moya. (Vaefesa 4:17-29; 5:1-5) Ina, naswona entiyisweni u ta va a hlunamisa moya wa Xikwembu.

18. Ku nga humelela yini eka Mukreste wihi ni wihi la sungulaka ku honisa ndzayo ya Rito leri huhuteriweke hi moya wa Xikwembu?

¹⁸ Kahle-kahle, Mukreste wihi ni wihi la sungulaka ku honisa ndzayo ya Rito ra Yehovha leri huhuteriweke hi moya wa yena a nga ha sungula ku va ni malangutelo kumbe marhengu lama nga n’wi vangelaka ku dyoha hi vomu ni ku nga ha amukeleki eka Xikwembu. Hambi leswi sweswi a nga ha vaka a nga tshameli ku endla xidyoho, u ta va a ri endleleni ya ku xi endla. Mukreste wo tano la alaka ku kongomisiwa hi moya lowo kwetsima u ta va a wu hlunamisa. Xisweswo, nakambe u ta va a kaneta Yehovha, Xihlovo xa moya wo kwetsima, ni ku n’wi hlunamisa. Loyi a rhandzaka Xikwembu a nga tshuki a lava ku endla sweswo!

Hambeta U Khongelela Moya Wo Kwetsima

19. Ha yini vanhu va Yehovha ngopfu-ngopfu va lava moya wa yena wo kwetsima?

¹⁹ Loko u ri nandza wa Yehovha, hambeta u khongelela moya wa yena wo kwetsima. Ngopfu-ngopfu ‘emasikwini lawa ya makumu,’ ni minkarhi ya wona yo nonon’hwa ni leyi tikaka ku langutana na yona, Vakreste va wu lava mpfuno wa moya wa Xikwembu. (2 Timotiya 3:1-5) Diyavulosi ni mademona yakwe, lava susiweke etilweni ni lava sweswi va nga emisaveni, va lwisana ni nhlengeletano ya Yehovha. Hikwalaho, ku tlula rini ni rini, sweswi vanhu va Xikwembu va lava moya wa xona wo kwetsima leswaku wu va rhangela kumbe ku va kongomisa, wu va endla va kota ku tiyiselela maxangu ni nxaniso.—Nhlavutelo 12:7-12.

20, 21. Ha yini u landzela nkongomiso wa Rito ra Yehovha, moya swin’we ni nhlengeletano yakwe?

²⁰ Nkarhi hinkwawo kombisa ku tlangela mpfuno lowu tisiwaka hi Yehovha hi moya wakwe wo kwetsima. Landzela nkongomiso wa Rito rakwe leri huhuteriweke, Bibele. Tirhisana hi ku helela ni nhlengeletano ya le misaveni leyi kongomisiwaka hi moya wa Xikwembu. U nga tshuki u hambuka endleleni ya matsalwa leswi nga ta hlunamisa moya wo kwetsima, hikuva leswi swi nga ha hetelela hi ku wu tlherisa kutani u fa emoyeni.—Pisalema 51:11.

²¹ Ku va la kongomisiwaka hi moya wa Yehovha, hi yona ntsena ndlela ya ku n’wi tsakisa ni ya ku va ni vutomi byo tsakisa bya ku rhula. Nakambe, tsundzuka leswaku Yesu u vule moya wo kwetsima a ku i “mupfuni,” kumbe “muchaveleri.” (Yohane 14:16, NW, nhlamuselo ya le hansi) Ha wona, Xikwembu xi chavelela Vakreste ni ku va tiyisa leswaku va langutana ni miringo ya vona. (2 Vakorinto 1:3, 4) Moya wu nyika vanhu va Yehovha matimba yo chumayela mahungu lamanene naswona wu va pfuna ku tsundzuka tinhla ta Matsalwa leti lavekaka leswaku va nyikela vumbhoni lebyinene. (Luka 12:11, 12; Yohane 14:25, 26; Mintirho 1:4-8; 5:32) Hi ku khongela ni hi ku kongomisiwa hi moya, Vakreste va nga swi kota ku langutana ni miringo ya ripfumelo hi vutlharhi bya le tilweni. Hambi swi ri tano, eswiyin’weni hinkwaswo swa vutomi, va hambeta va khongelela moya wo kwetsima wa Xikwembu. Hikwalaho, moya wa Yehovha wu kongomisa vanhu va yena.

[Nhlamuselo ya le hansi]

Tinhlamulo Ta Wena Hi Tihi?

◻ Ha yini u khongelela moya lowo kwetsima eka Yehovha?

◻ Xana moya wo kwetsima i mupfuni hi ndlela yihi?

◻ Xana ku hlunamisa moya swi vula yini, naswona hi nga swi papalatisa ku yini?

◻ Ha yini hi tshamela ku kombela moya wo kwetsima ni ku landzela nkongomiso wa wona?

[Xifaniso lexi nga eka tluka 15]

Ku fana ni tatana wa rirhandzu loko a nyika n’wana wakwe swilo swo saseka, kutani Yehovha u nyika moya wo kwetsima eka malandza yakwe lama wu khongelelaka

[Xifaniso lexi nga eka tluka 17]

Xana wa swi tiva leswaku moya wa Xikwembu wu va kombelela njhani Vakreste lava khongelaka?