Vukona Bya Mesiya Ni Ku Fuma Ka Yena

“Yesu loyi a susiweke exikarhi ka n’wina ni ku tlakuleriwa etilweni, ú ta tlhela a vuya hi mukhuva lowu mi n’wi voneke a ya etilweni ha wona.”—MINTIRHO 1:11.

1, 2. (a) Tintsumi timbirhi ti va chavelerise ku yini vaapostola va Yesu loko a tlhandlukela etilweni? (b) I swivutiso swihi leswi tlakusiwaka hi ku languteriwa ka ku vuya ka Kreste?

VAVANUNA va khume-n’we a va yime exitsungeni xa le vuxeni xa Ntshava ya Mitlhwari, va langute ehenhla. Yesu Kreste wa ha ku tlhandlukela ehenhla a suka exikarhi ka vona, xivumbeko xa yena xi nyamalala hakatsongo-tsongo ku kondza a siviwa hi papa. Emalembeni lawa va veke na yena ha wona, vavanuna lava va vone Yesu a nyikela vumbhoni lebyo tala bya leswaku a a ri Mesiya; naswona va vone ni rifu ra yena leri tshovaka timbilu ni ku tsaka swinene loko a pfuxiwa. Sweswi a a fambile.

² Swi nga languteriwanga ku humelele tintsumi timbirhi kutani ti vula marito lawa ma chavelelaka: “Vavanuna va Galeliya, mi yimele yini mi langutile etilweni ke? Yesu loyi a susiweke exikarhi ka n’wina ni ku tlakuleriwa etilweni, ú ta tlhela a vuya hi mukhuva lowu mi n’wi voneke a ya etilweni ha wona.” (Mintirho 1:11) Vona xitiyisekiso xonghasi—ku tlhandlukela ka Yesu etilweni a swi nga vuli leswaku a a lahla misava ni vanhu! Ku hambana ni sweswo, Yesu a a ta vuya. A swi kanakanisi leswaku marito lawa ma nyike vaapostola ntshembo. Timiliyoni ta vanhu namuntlha na tona ti teka xitshembiso xa ku vuya ka Kreste xi ri xa nkoka swinene. Van’wana va vulavula ha swona tanihi “Ku Ta Ra Vumbirhi” kumbe “Ku Vuya.” Kambe vo tala va vonaka va pfilunganyiwa hi leswi ku vuya ka Kreste swi vulaka swona hakunene. Xana Kreste u vuya hi ndlela yihi? Rini ke? Naswona leswi swi byi khumbisa ku yini vutomi bya hina namuntlha?

Ndlela Leyi Kreste A Vuyaka Ha Yona

3. Vanhu vo tala va pfumela yini ehenhleni ka ku vuya ka Kreste?

³ Hi ku ya hi buku leyi nge An Evangelical Christology, “ku ta ka vumbirhi kumbe ku vuya ka Kreste (parousia) ku simeka mfumo wa Xikwembu hi laha ku hetisekeke, hi laha ku xiyekaka ni hi laha ku nga riki na makumu.” Swi pfumeriwa swinene leswaku ku vuya ka Kreste ku ta vonaka kahle, ku voniwa hi mahlo ya nyama hi munhu un’wana ni un’wana loyi a nga eplaneteni leyi. Leswaku va seketela mianakanyo leyi, vo tala va kombetela eka Nhlavutelo 1:7, leyi nge: “Vonani, wa ta hi mapapa! Un’wana ni un’wana ú ta n’wi vona, ku katsa ni lava va n’wi dlayeke.” Kambe xana ndzimana leyi yi fanele ku tekiwa hi ndlela leyi kongomeke?

4, 5. (a) Hi swi tivisa ku yini leswaku mhaka ya Nhlavutelo 1:7 a hi leyi kongomeke? (b) Marito ya Yesu ma tiyisa ku twisisa loku hi ndlela yihi?

⁴ Tsundzuka, buku ya Nhlavutelo yi nyikeriwa hi ‘swikombiso.’ (Nhlavutelo 1:1) Kutani ndzimana leyi yi fanele yi ri yo fanekisela; hikuva a swi ta endlekisa ku yini leswaku “lava va n’wi dlayeke” va vona ku vuya ka Kreste? Va file kwalomu ka malembe xidzana ya 20! Ku tlula kwalaho, tintsumi ti vule leswaku Kreste a a ta vuya “hi mukhuva lowu” a sukeke ha wona. Kutani u sukise ku yini ke? Xana a a langutiwe hi timiliyoni ta vanhu? E-e, i vanhu va nga ri vangani ntsena lava tshembekaka lava hlaleleke xiendlakalo lexi. Naswona loko tintsumi ti vulavule ni vaapostola, xana a va hlalele ku famba ka Kreste hi mahlo ya nyama ku kondza a ya fika etilweni? E-e, xifunengeto xa papa xi endle leswaku Yesu a nga vonaki. Endzhaku ka kwalaho, u fanele a nghene ematilweni ya moya tanihi xivumbiwa xa moya, lexi nga voniwiki hi mahlo ya vanhu va nyama. (1 Vakorinto 15:50) Kutani entiyisweni vaapostola va vone masungulo ya riendzo ra Yesu ntsena; a va vonanga makumu ya rona, ku nga ku tlhelela ka yena laha ku nga na Tata wa yena wa le tilweni, Yehovha. Leswi a va ta swi twisisa ntsena hi mahlo ya vona ya ku pfumela.—Yohane 20:17.

⁵ Bibele yi dyondzisa leswaku Yesu u vuya hi ndlela leyi fanaka swinene. Emahlweninyana ka rifu ra yena, Yesu u te: “Endzhaku ka nkarhinyana, misava a yi nga ha ndzi voni.” (Yohane 14:19) Nakambe u vule leswaku “Mfumo wa Xikwembu a wu humeleli wu ri karhi wu voniwa hi mahlo.” (Luka 17:20) Kutani ke, xana ‘tihlo rin’wana ni rin’wana ri ta n’wi vona’ hi ndlela yihi? Leswaku hi kuma nhlamulo, xo sungula hi fanele hi ri twisisa kahle rito leri Yesu ni valandzeri va yena va ri tirhiseke malunghana ni ku vuya ka yena.

6. (a) Ha yini marito yo tanihi lama nge “ku vuya,” “ku fika,” “ku humelela” ni “ku ta” ku nga ri ku hundzuluxela loku eneleke ka rito ra Xigriki leri nge pa·rou·siʹa? (b) I yini lexi kombisaka leswaku pa·rou·siʹa kumbe “vukona” byi teka nkarhi wo leha ku tlula xiendlakalo xo karhi xa nkarhinyana ntsena?

⁶ Mhaka hi leswaku Kreste u endla leswi tlulaka ku “vuya” ntsena. Rito rero, tanihi “ku ta,” “ku fika” kumbe “ku humelela” ri kombisa xiendlakalo xin’we hi nkarhi wo koma swinene. Kambe rito ra Xigriki leri Yesu ni valandzeri va yena va ri tirhiseke ri vula leswi engetelekeke swinene. Rito ra kona i pa·rou·siʹa, leri hi ku kongoma ri vulaka “ku va kona” kumbe “vukona.” Vadyondzi vo tala va pfumela leswaku rito leri a ri vuli ku fika ntsena, kambe ni vukona—tanihi riendzo ra Ximfumo ra munhu wa vuhosi. Vukona lebyi a hi xiendlakalo xa nkarhinyana; i nguva leyi hlawulekeke, nkarhi lowu xiyekaka. Eka Matewu 24:37-39, Yesu u vule leswaku ‘vukona [pa·rou·siʹa] bya N’wana wa munhu’ a byi ta fana ni ‘masiku ya Nowa’ lawa ma chaputeke hi Ndhambi. Nowa a a aka ngalava ni ku tsundzuxa vanhu lavo homboloka hi makume ya malembe Ndhambi yi nga si fika, ku ta herisa mafambiselo wolawo ya misava lama hombolokeke. Kutani hi laha ku fanaka, vukona bya Kreste lebyi nga vonakiki na byona byi teka nkarhi wa makume ma nga ri mangani ya malembe byi nga si chaputa hi ndzoviso lowukulu.

7. (a) I yini lexi kombisaka leswaku vukona bya pa·rou·siʹa a byi vonaki emahlweni ya vanhu va nyama? (b) Matsalwa lama hlamuselaka ku vuya ka Kreste tanihi loku vonakaka ‘emahlweni hinkwawo’ ma ta hetiseka hi ndlela yihi, naswona rini?

⁷ Handle ko kanakana, vukona bya pa·rou·siʹa a byi voniwi hi ku kongoma hi mahlo ya vanhu va nyama. Loko a byi voniwa hi mahlo, ha yini Yesu a hete nkarhi wo leha, hi laha hi nga ta vona ha kona, a ri karhi a nyika valandzeri va yena xikombiso xo va pfuna ku twisisa vukona lebyi?a Hambi swi ri tano, loko Kreste a ta herisa mafambiselo ya misava ya Sathana, ntiyiso wa leswaku u kona wu ta va wu vonaka swinene eka vanhu hinkwavo. Hi kona ‘mahlo hinkwawo ma nga ta n’wi vona.’ Hambi va ri valala va Yesu va ta swi vona leswaku ku fuma ka Kreste i ka xiviri, kambe sweswo swi ta va heta matimba.—Vona Matewu 24:30; 2 Vatesalonika 2:8; Nhlavutelo 1:5, 6.

Xana Byi Sungula Rini Ke?

8. I xiendlakalo xihi lexi funghaka ku sungula ka vukona bya Kreste, naswona leswi swi sungule kwihi?

⁸ Vukona bya Mesiya byi sungula hi xiendlakalo lexi hetisisaka nhloko-mhaka leyi phindha-phindhiwaka ya vuprofeta bya Mesiya. U rhwexiwa harhi tanihi Hosi etilweni. (2 Samuwele 7:12-16; Esaya 9:6, 7; Ezekiyele 21:26, 27) Yesu hi byakwe u kombise leswaku vukona bya yena a byi ta hlangana ni vuhosi bya yena. Eka swikombiso swi nga ri swingani, u tifanise ni n’wini loyi a siyaka ndyangu wa yena ni malandza, a famba nkarhi wo leha a ya “etikweni ra le kule” laha a kumaka ‘matimba ya vuhosi.’ Xin’wana xa swikombiso swo tano u xi nyike tanihi xiphemu xa nhlamulo ya yena eka xivutiso xa vaapostola vakwe hi malunghana ni nkarhi lowu vukona bya yena bya pa·rou·siʹa a byi ta sungula ha wona; xin’wana u xi nyikele hikwalaho ka leswi “a va ehleketa leswaku Mfumo wa Xikwembu wu ta hatla wu humelela.” (Luka 19:11, 12, 15; Matewu 24:3; 25:14, 19) Kutani loko a ha ri emisaveni tanihi munhu wa nyama, ku vekiwa ka yena vuhosi a ka ha ri ekule swinene, hikuva a ku ta humelela “etikweni ra le kule” ra le tilweni. Xana a ku ta humelela rini ke?

9, 10. Hi byihi vumbhoni lebyi nga kona bya leswaku Kreste wa fuma etilweni sweswi, naswona u sungule rini ku fuma ka yena?

⁹ Loko vadyondzisiwa va Yesu va n’wi vutise xivutiso lexi nge: ‘Xi ta va xihi xikombiso xa vukona bya wena ni xa ku hela ka mafambiselo ya swilo?’ Yesu u hlamule hi ku va nyika nhlamuselo ya nkarhi wolowo wu taka hi vuxokoxoko. (Matewu, ndzima 24; Marka, ndzima 13; Luka, ndzima 21; nakambe vona 2 Timotiya 3:1-5; Nhlavutelo, ndzima 6.) Xikombiso lexi xi nyikela xivumbeko xa nguva ya maxangu hi vuxokoxoko. I nkarhi lowu funghiwaka hi tinyimpi ta matiko hinkwawo, vugevenga lebyi engetelekaka, vutomi bya ndyangu lebyi nyanyaka ku biha, mintungu ya vuvabyi, tindlala ni ku tsekatseka ka misava—hayi tanihi swiphiqo leswi nga etindhawini to karhi ntsena kambe tanihi leswi hlanganiseke misava hinkwayo. Xana leswi swi twala swi tolovelekile ke? Siku rin’wana ni rin’wana leri hundzaka ri tiyisa leswaku lembe xidzana ra vu-20 ri yi fanela kahle nhlamuselo ya Yesu.

¹⁰ Van’wamatimu va pfumela leswaku 1914 a ku ri yinhla ya ku hundzuluka ka swilo ematin’wini ya vanhu, lembe leri nga cinca swilo laha endzhaku ka rona swo tala swa swiphiqo leswi swi sunguleke ku ka swi nga ha lawuleki, swi hangalaka emisaveni hinkwayo. Ina, swiendlakalo leswi vonakaka swa misava leswi hetisisaka vuprofeta bya Bibele hinkwaswo ka swona swi kombetela eka 1914 tanihi lembe leri Yesu a sunguleke ku fuma tanihi Hosi etilweni. Ku tlula kwalaho, vuprofeta lebyi nga eka Daniyele ndzima 4 byi nyikela vumbhoni bya swiendlakalo leswi humelelaka hi ku ya hi nkarhi wa swona lebyi hi kongomisaka eka lembe leri fanaka—1914—tanihi nkarhi lowu Hosi leyi vekiweke ya Yehovha a yi ta sungula ku fuma ka yona ha wona.b

Ha Yini Ku Ri Nkarhi Wa Maxangu?

11, 12. (a) Ha yini swi nonon’hwa eka van’wana ku kholwa leswaku Kreste wa fuma etilweni sweswi? (b) Hi nga swi fanisa na yini leswi humeleleke endzhaku ka loko Yesu a rhwexiwe harhi tanihi Hosi?

¹¹ Kambe van’wana va tivutisa, ‘Ha yini misava yi ri ni maxangu swonghasi loko Mesiya a fuma a ri etilweni? Xana ku fuma ka yena ka hluleka ke?’ Xifaniso xi nga pfuna. Tiko ri fumiwa hi muungameri wo biha. U simeke fambiselo lero homboloka leri nga ni nhlohlotelo wo biha etikweni hinkwaro. Kambe ku endliwa nhlawulo; ivi ku wina munhu lonene. Kutani ku ta humelela yini ke? Hi laha swi nga ha kona ematikweni man’wana ya xidemokrati, ku landzela nkarhi wa ku cinciwa ka swilo hi tin’hweti to karhi ku nga si nghena muungameri lontshwa. Xana vanhu lava vambirhi va ta endlisa ku yini hi nkarhi wo tano? Xana munhu lonene u ta teka goza eka vubihi hinkwabyo lebyi vangiweke etikweni hinkwaro hi loyi a a fuma emahlweni ka yena ivi a byi herisa hi ku copeta ka tihlo? Ematshan’wini ya sweswo, xana a nge yisi nyingiso entsindza ku sungula, a vumba khabinete leyintshwa ni ku susa vanghana ni vaseketeri lavo homboloka va muungameri loyi a fumeke emahlweni ka yena? Hi ndlela yoleyo, loko a fuma hi laha ku heleleke, a nga fuma hi ndlela leyi tengeke, leyi humelelaka. Kambe xana muungameri la hombolokeke a a nga ta tirhisa nkarhi lowo koma lowu n’wi saleleke leswaku a phanga swilo hinkwaswo etikweni leswi kumiweke hi ndlela yo biha hi laha a nga swi kotaka ha kona a nga si suka exitulwini hi ku helela?

¹² Kahle-kahle swa fana ni vukona bya Kreste bya pa·rou·siʹa. Nhlavutelo 12:7-12 yi kombisa leswaku loko Kreste a endliwe Hosi etilweni, u sungule hi ku cukumeta Sathana ni mademona va suka etilweni, xisweswo a basisa ndhawu ya hulumendhe ya Yena. Leswi a tokoteke ku hluriwa loku a ku languteriwile hi nkarhi wo leha, xana Sathana u endlisa ku yini ‘hi nkarhi wa yena lowu komeke’ emahlweni ka ku va Kreste a fuma misava leyi hi xitalo? Ku fana ni muungameri luya wo homboloka, u ringeta ku kuma hinkwaswo leswi a nga kotaka ku swi kuma emafambiselweni lawa ya khale. A nga lavi mali; u lava vutomi bya vanhu. U lava ku hambukisa vanhu vo tala hi laha a nga swi kotaka ha kona eka Yehovha ni Hosi ya Yena leyi fumaka.

13. Matsalwa ma swi kombisa njhani leswaku ku sungula ka ku fuma ka Kreste a ku ta va nkarhi wa maxangu laha misaveni?

¹³ Kutani a swi hlamarisi leswi ku sungula ka ku fuma ka Mesiya ku vulaka nkarhi wa ‘khombo emisaveni.’ (Nhlavutelo 12:12) Hi laha ku fanaka, Pisalema 110:1, 2, 6 yi kombisa leswaku Mesiya u sungula ku fuma ka yena ‘exikarhi ka valala va yena.’ Endzhaku u herisa “matiko” ni xiphemu xihi ni xihi xa mafambiselo ya Sathana layo homboloka hi laha ku heleleke, swi nga ha tsundzukiwi!

Loko Mesiya A Fuma Misava

14. I yini leswi Mesiya a nga ta kota ku swi endla endzhaku ka loko a lovise mafambiselo ya swilo yo homboloka ya Sathana?

¹⁴ Endzhaku ko herisa mafambiselo ya Sathana ni hinkwavo lava n’wi seketelaka, Hosi ya Vumesiya, Yesu Kreste, eku heteleleni u ta va exiyin’weni xo hetisisa vuprofeta lebyi hlamarisaka bya Bibele lebyi hlamuselaka ku Fuma ka yena ka Gidi ra Malembe. Esaya 11:1-10 yi hi pfuna ku vona leswaku Mesiya u ta va mufumi wa muxaka muni. Ndzimana 2 yi hi byela leswaku u ta va ni ‘moya wa Yehovha, moya wa vutlharhi ni wa ku twisisa, moya wa xitsundzuxo ni wa matimba.’

15. ‘Moya wa matimba’ wu ta vula yini eku fumeni ka Vumesiya?

¹⁵ Xiya leswi ‘moya wa matimba’ wu nga ta vula swona eku fumeni ka Yesu. Loko a ri emisaveni, a a ri ni matimba lamakulu lama humaka eka Yehovha, lama n’wi pfuneke ku endla masingita. Naswona u kombise ku navela ku pfuna vanhu hi mbilu ya yena hinkwayo, a ku, “Ndza swi rhandza.” (Matewu 8:3) Kambe masingita ya yena ya masiku wolawo a ko va xikombiso ntsena xa leswi a a ta swi endla loko a fuma a ri etilweni. Yesu u ta endla masingita emisaveni hinkwayo! Vavabyi, mabofu, lava feke tindleve, timbheveve ni lava lamaleke va ta horiseriwa makumu. (Esaya 35:5, 6) Ndzalo ya swakudya leswi hangalakeke hinkwako swi ta herisa ndlala hi laha ku heleleke. (Pisalema 72:16) Ku vuriwa yini hi timiliyoni letiya ta ntsandza-vahlayi leti nga emasirheni leti Xikwembu xi tsakelaka ku ti tsundzuka? “Matimba” ya Yesu ma ta katsa ntamu wo va pfuxa, a nyika un’wana ni un’wana wa vona nkarhi wo hanya hi laha ku nga heriki eParadeyisini! (Yohane 5:28, 29) Kambe hambi yi ri ni matimba lawa hinkwawo, Hosi ya Vumesiya yi ta titsongahata swinene minkarhi hinkwayo. Yi “ṭakela šitšhav̌o ša Yehova.”—Esaya 11:3.

16. Hosi ya Vumesiya yi ta va Muavanyisi wa muxaka muni, naswona sweswo swi ta hambana njhani ni timhaka ta vaavanyisi va misava?

¹⁶ Hosi leyi nakambe yi ta va Muavanyisi loyi a hetisekeke. A “nga ka a nga av̌anyisi hi ngohe, hambi ku ri ku av̌anyisa hi ku twa mhaka ya širi.” Hi wihi muavanyisi wa vanhu wa nkarhi lowu hundzeke kumbe wa namuntlha loyi a nga hlamuseriwaka hi ndlela yoleyo? Hambi ku ri munhu loyi a avanyisaka kahle swinene a nga avanyisa ntsena hi ku ya hi leswi a swi vonaka ni ku swi twa, a tirhisa vutlharhi kumbe ku twisisa kwihi na kwihi loku a nga na kona. Xisweswo, vaavanyisi ni tikomiti ta vulavisisi ta misava leyi ya khale va nga hambukisiwa kumbe ku pfilunganyiwa hi mianakanyo ya vutlharhi leyi kanganyisaka, vanhu va misava ehubyeni kumbe vumbhoni lebyi kanetanaka. Hakanyingi i vanhu lava fumeke ni lava matimba ntsena lava nga kotaka ku tisirhelela hi laha ku humelelaka, hi ku xava vululami. A swi tano ehansi ka Muavanyisi wa Vumesiya! U twisisa timbilu. A ku na lexi a nga ta ka a nga xi xiyi. Vululami lebyi lawuriwaka hi rirhandzu ni ku tsetselela a byi nga xavisiwi kunene. Byi ta va kona minkarhi hinkwayo.—Esaya 11:3-5.

Ndlela Leyi Ku Fuma Ka Yena Ku Ku Khumbaka Ha Yona

17, 18. (a) I xifaniso xihi xa vumundzuku bya vanhu lexi nyikeriwaka eka Esaya 11:6-9? (b) Vuprofeta lebyi ngopfu-ngopfu byi tirha eka vamani, naswona ha yini swi ri tano? (c) Vuprofeta lebyi byi ta va ni ku hetiseka ka xiviri hi ndlela yihi?

¹⁷ Hi laha ku twisisekaka, ku fuma ka Mesiya ku ni nsusumeto lowukulu eka vafumiwa va kona. Ku hundzula vanhu. Esaya 11:6-9 yi kombisa leswaku ku hundzuka koloko ku kule ku fikela kwihi? Vuprofeta lebyi byi nyikela xifaniso lexi tsakisaka xa swiharhi swa khombo, leswi bvanyangetaka—tiberhe, mahlolwa, tiyingwe, tinghala, tinyoka ta swivatla-nkombe—swi ri ni swifuwo leswi nga riki na khombo kun’we ni vana. Kambe swiharhi leswi bvanyangetaka a swi vangi khombo! Ha yini ke? Ndzimana 9 ya hlamula yi ku: “Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle.”

¹⁸ Kavula, ‘ku tiva Yehovha’ ku nga ka ku nga khumbi swiharhi hi laha ku kongomeke; xisweswo tindzimana leti ngopfu-ngopfu ti fanele ti tirha eka vanhu. Ku fuma ka Mesiya ku nyikela nongonoko wa misava hinkwayo wa dyondzo, ku dyondzisa vanhu malunghana na Yehovha ni tindlela ta yena, ku dyondzisa vanhu hinkwavo ku hanyisana ni vanhu-kulobye hi rirhandzu ni xichavo. EParadeyisini leyi taka, Mesiya u ta tirhisa singita ku endla leswaku vanhu va va lava hetisekeke emirini ni le mahanyelweni. Mikhuva ya ku bvanyangeta, ya vuharhi leyi onhaka vanhu lava nga hetisekangiki yi ta va yi nga ha ri kona. Nakambe—eku heteleleni vanhu va ta va ni ku rhula ka xiviri ni swiharhi!—Ringanisa Genesa 1:28.

19. Ku fuma ka Mesiya ku byi khumbisa ku yini vutomi bya vanhu emasikwini lawa ya makumu?

¹⁹ Kambe tsundzuka leswaku Mesiya wa fuma sweswi. Hambi ku ri sweswi, lava fumiwaka hi Mfumo wa yena va dyondza ku hanyisana hi ku rhula, va hetisisa Esaya 11:6-9 hi ndlela leyi fanaka. Ku tlula kwalaho, hi malembe ya kwalomu ka 80, Yesu a a ri karhi a hetisisa Esaya 11:10 leyi nge: “E nkarini wolowo rimiṭu ra Isai ri ta yimiseriwa matiko tani hi mfungo, matiko ma ta ri lav̌a, kutani v̌uako bya rona byi ta v̌a ku v̌onakala ntsena.” Vanhu va matiko hinkwawo va hundzulukela eka Mesiya. Ha yini ke? Hikuva ku sukela loko a sungule ku fuma, a a ‘yime tanihi mfungho.’ A a ri karhi a tivisa vukona bya yena emisaveni hinkwayo hi ku tirhisa nongonoko lowukulu wa dyondzo lowu hlamuseriweke laha henhla. Kahle-kahle, Yesu u vhumbhe leswaku ntirho wo chumayela wa misava hinkwayo a ku ta va mfungho lowu xiyekaka wa vukona bya yena emahlweni ka makumu ya mafambiselo lawa ya khale.—Matewu 24:14.

20. Vanhu hinkwavo lava nga ehansi ka vulawuri bya Mesiya va fanele ku papalata langutelo rihi, naswona hikwalaho ka yini?

²⁰ Kutani vukona bya Kreste ematimbeni ya Vuhosi a hi mhaka leyi nga ekule, leyi anakanyiwaka kunene, mhaka ya vutlharhi leyi vatshila va ntivo-vukwembu va kanetanaka ha yona ntsena. Ku fuma ka yena ku khumba ni ku hundzula vutomi laha misaveni, hi laha Esaya a vhumbheke ha kona. Yesu u humese timiliyoni ta vafumiwa va Mfumo wa yena emafambiselweni lawa ma onhakeke ya misava. Xana u mufumiwa wo tano ke? Kutani tirha hi ku chivirika ni ku tsaka lokukulu loku Mufumi wa hina a faneriwaka ha kona! Hambi swi ri tano, swa olova swinene ku karhala, ku hlanganyela eku huweleleni ka misava leyi kholwaka hi ku vona loko yi ku: “Swi helele kwihi, swa loyi ku nga tshembisiwa leswaku ú ta ta, xana?” (2 Petro 3:4) Kambe hi laha Yesu hi byakwe a vuleke ha kona, “loyi a tiyiselaka ku fika makumu, hi yena loyi a nga ta ponisiwa.”—Matewu 24:13.

21. Hinkwerhu ka hina hi nga kurisa ku tlangela ka hina ka ntshembo wa Vumesiya hi ndlela yihi?

²¹ Siku rin’wana ni rin’wana leri hundzaka ri hi tshineta ekusuhi ni siku lerikulu leri Yehovha a nga ta kongomisa N’wana wa yena ku endla leswaku vukona bya yena byi vonaka emisaveni hinkwayo. U nga pfumeleli leswaku ku langutela ka wena ka siku rero ku tsana. Anakanyisisa hi Vumesiya bya Yesu na hi timfanelo ta yena tanihi Hosi leyi fumaka. Nakambe, anakanyisisa swinene hi Yehovha Xikwembu, munyiki ni mukongomisi wa ntshembo lowukulu wa Vumesiya lowu andlariweke eBibeleni. Loko u endla tano, handle ko kanakana u ta titwa hi laha ku engetelekeke ku fana na muapostola Pawulo loko a tsala a ku: “Vukosi bya Xikwembu, ni vutlhari bya xona, ni vutivi bya xona, a hi ku enta ka swona!”—Varhoma 11:33.

[Tinhlamuselo ta le hansi]

A Wu Ta Hlamurisa Ku Yini Ke?

◻ Kreste u vuya hi mukhuva wihi?

◻ Hi swi tivisa ku yini leswaku vukona bya Kreste bya pa·rou·siʹa a byi vonaki naswona byi teka nkarhi wo leha?

◻ Vukona bya Kreste byi sungula rini, naswona hi swi tivisa ku yini leswi?

◻ Mesiya i Mufumi wa le tilweni wa muxaka muni?

◻ Vulawuri bya Kreste byi khumba vutomi bya vanhu lava nga ehansi ka byona hi tindlela tihi?

[Xifaniso lexi nga eka tluka 15]

Ntshembo wa leswaku Yesu a a ta vuya a wu vula swo tala eka vaapostola va yena lava tshembekaka

[Xifaniso lexi nga eka tluka 17]

Loko a fuma a ri etilweni, Yesu u ta endla masingita emisaveni hinkwayo

[Xihlovo Xa Kona]

Earth: Based on NASA photo