Ku Hlamusela Vukona Bya Kreste

“Siku N’wana-wa-Munhu a taka hi ku kwetsima ka yena, . . . u ta hlawula van’wana a siya van’wana.”—MATEWU 25:31, 32.

1. Xana vafundhisi va Vujagana va hlamusele marito lama nga eka Matewu 24:3 hi ndlela yihi?

MASIKU manharhu emahlweni ka rifu ra Yesu, mune wa vadyondzisiwa vakwe va te eka yena ivi va vutisisa: “Hi byele, xana timhaka leti ti ta humelela rini xana? Xana xikombiso xa ku vuya [hi Xigriki, pa·rou·siʹa], ka wena ni xa ku hela ka [minkarhi] xi ta va xihi ke?” Hi malembe xidzana, vafundhisi va Vujagana ni vatsari va hlamusele marito lawa ya vadyondzisiwa va Yesu eka Matewu 24:3 (King James Version) ya ri lama vulaka leswaku u ta vonaka nakambe enyameni a voniwa hi vanhu hinkwavo. Hikwalaho, va dyondzise leswaku ku vuya ka Kreste ku ta va nkombiso lowukulu ni lowu vonakaka. Va ku vula ku vuya ka Kreste ka vumbirhi. Kambe xana swiringanyeto leswi swi lulamile?

2, 3. (a) Xana Vholumo 2 ya Studies in the Scriptures yi veke ku hambana exikarhi ka marito lama nge “ku ta” na “vukona” hi ndlela yihi? (b) Xana vanhu va Yehovha va twisise yini mayelana ni leswi vuriwaka hi pa·rou·siʹa ya Kreste?

² Hi 1889, tanihi vabyarhi va ku vonakala va lembe xidzana ra vu-19, vatotiwa va Yehovha ana se a va amukele ndzulamiso emhakeni ya ku vuya ka Kreste. Eka Vholumo 2 ya Studies in the Scriptures, matluka 158 ku ya ka 161, Charles T. Russell, muungameri wo sungula wa Watch Tower Bible and Tract Society, u tsarile: “Parousia . . . ri kombisa vukona, naswona a ri fanelanga ri hundzuluxeriwa ri vula ku ta, tanihi le Bibeleni ya Xinghezi leyi tolovelekeke . . . ‘Emphatic Diaglott,’ ku hundzuluxela ka ntikelo swinene ka Testamente Leyintshwa, ku hundzuluxela parousia hi laha ku faneleke, vukona . . . , ku nga ri ku ta, tanihi loko a ha ri endleleni, kambe vukona, tanihi loko a fikile [Yesu] u ri, ‘Kukotisa emasikwini ya Nowa, parousia [vukona] bya N’wana wa munhu byi ta va tano.’ Xiya, leswaku a ku fananisiwi ku ta ka Nowa ni ku ta ka Hosi ya hina . . . Kutani lexi fananisiwaka i nkarhi wa vukona bya Nowa exikarhi ka vanhu ‘emahlweni ka ndhambi,’ ni nkarhi wa vukona bya Kreste emisaveni, eku teni ka yena ka vumbirhi, ‘emahlweni ka ndzilo’—maxangu lamakulu ya Siku ra Hosi [Yehovha] leri nguva leyi yi nga ta hela ha rona.”—Matewu 24:37.

³ Kutani vanhu va Yehovha va lembe xidzana ra vu-19 va swi twisise kahle leswaku pa·rou·siʹa (vukona) bya Kreste byi ta va lebyi nga vonakiki. Nakambe va twisise leswaku makumu ya Minkarhi ya Vamatiko a ma ta humelela hi xixikana xa 1914. Loko rivoni ra moya ri ya ri engeteleka, endzhakunyana va swi twisisile leswaku Yesu Kreste u vekiwe exiluvelweni etilweni tanihi Hosi ya Mfumo hi lembe rero ra 1914.—Swivuriso 4:18; Daniyele 7:13, 14; Luka 21:24; Nhlavutelo 11:15.

“Vukona Bya Hosi Ya Hina”

4. “Vukona bya Hosi ya hina Yesu Kriste” swi vula yini?

⁴ Kutani esikwini ra hina, marito ya Bibele lama nge “vukona bya Hosi ya hina Yesu Kreste” ma vula yini? (1 Vatesalonika 5:23, NW) Buku yin’wana yi hlamusela leswaku rito leri nge “vukona,” pa·rou·siʹa, “ri hundzuke rito ra ximfumo leri vulaka ku endza ka munhu wa le henhla, ngopfu[-ngopfu] tihosi ni valawuri lava endzelaka xifundzha.” Kutani rito leri ri vula vukona bya ximfumo bya Hosi Yesu Kreste tanihi Mufumi, ku sukela hi 1914 ni le ndzhaku, endzhaku ka ku vekiwa ka yena exiluvelweni etilweni. U kona hi ndlela leyi nga vonakiki leswaku ‘a fuma exikarhi ka valala vakwe,’ a fuma tanihi Hosi ni ku hetisisa xileriso lexi xa vuprofeta. (Pisalema 110:2) Kwalomu ka malembe ya 79 vanhu emisaveni a va ri karhi va vona leswi endlekaka hikwalaho ka vukona bya Kreste lebyi nga vonakiki a ri emfun’weni.

5. I swilo swihi leswi nga ta humelela hi nkarhi wa pa·rou·siʹa leswi nga ta hlamuseriwa eka swihloko leswinharhu swa magazini lowu?

⁵ Eka nxaxamelo lowu wa swihloko swinharhu, hi ta kambisisa vumbhoni lebyikulu bya swilo leswi endliwaka hi Mfumo wa Kreste enkarhini lowu. Xo sungula, hi ta kombisa vuprofeta bya Bibele byo hlayanyana lebyi vhumbhaka swiendlakalo leswi ana swi humeleleke kumbe leswi nga eku humeleleni sweswi. Xa vumbirhi, hi ta hlamusela ntirho lowukulu lowu endliwaka hi ntlawa wa nandza lowo tshembeka, wa vutlharhi, lowu Yesu a wu tirhisaka enkarhini lowu hinkwawo wa vukona bya yena bya mfumo. (Matewu 24:45-47) Xihloko xa vunharhu xi ta hi hlamusela makumu lamakulu, nkarhi wa “nhlomulo lowukulu.” Wolowo i nkarhi lowu Yesu a taka tanihi Muavanyisi wa Yehovha a ta lovisa lavo biha ni ku ponisa lavo lulama. (Matewu 24:21, 29-31) Nkarhi wolowo wa ndzoviso wu hlamuseriwa hi muapostola Pawulo tanihi lowu nga ta “mi nyika ku wisa swin’we na hina n’wina mi xanisiwaka; xi ta endla sweswo siku Hosi Yesu a humelelaka hi le tilweni, swin’we ni tintsumi ta yena ta matimba, emalangavini ya ndzilo. Xi ta ba lava nga xi tiviki, va nga lava nga yingisiki Evhangeli ya Hosi ya hina Yesu.”—2 Vatesalonika 1:7, 8.

Xikombiso

6. I xikombiso xihi lexi hlanganeke lexi hlamuseriwaka eka Matewu tindzima 24 na 25?

⁶ Malembe ya khume-kaye wa madzana lama hundzeke vadyondziswa va Yesu lava byarhaka ku vonakala va n’wi vutise xikombiso kumbe vumbhoni, bya vukona bya yena bya nkarhi lowu taka ematimbeni ya Mfumo. Nhlamulo yakwe, leyi rhekhodiweke eka tindzimana 24 na 25 ta Matewu, yi nyikele xikombiso lexi hlanganeke, ku nga swiendlakalo hinkwaswo leswi swi hetisekaka sweswi ematikweni hinkwawo. Ku hetiseka ka xikombiso xexo ku fungha nkarhi wa maxangu ni ku ringiwa lokukulu. Yesu u tsundzuxile: “Tivoneleni leswaku mi nga tshuki mi xisiwa hi munhu. Hikuva lavo tala va ta ta hi vito ra mina, un’wana ni un’wana a ku: ‘Hi mina Mesiya’, kutani va ta xisa lavo tala Mi ta twa huwa ya tinyimpi ni mahungundlela ya tinyimpi; tivoneleni leswaku mi nga tshukisiwi, hikuva sweswo swi fanele ku humelela, kambe a hi wona makumu.”—Matewu 24:4-6.

7. I swivumbeko swihi swa xikombiso lexi leswi hi swi voneke swi hetiseka ku sukela hi 1914?

⁷ Yesu u ye emahlweni a profeta leswaku ku ta va ni tinyimpi to tala swinene. Ku hetiseka ka swona, timbirhi ta tona ti vitaniwe tinyimpi ta misava, yin’wana ku sukela hi 1914 ku ya ka 1918 naswona leya vumbirhi ku sukela eka 1939 ku ya ka 1945. Ku ya emahlweni, u vule leswaku ku ta va ni tindlala ni ku tsekatseka ka misava etindhawini hi ku landzelelana. Vakreste va ntiyiso a va ta xanisiwa swinene. Hi laha vuprofeta byi vuleke ha kona, Timbhoni ta Yehovha, vabyarhi va ku vonakala va manguva lawa, va xanisiwile eka malembe ya makume nhungu lama hundzeke, loko va chumayela mahungu lamanene ya Mfumo wa Xikwembu leswaku ma “va vumbhoni eka vanhu va matiko hinkwawo.” (Matewu 24:7-14) Yearbook of Jehovah’s Witnesses yin’wana ni yin’wana yi engetela eka vumbhoni bya leswaku swiphemu leswi swa xikombiso swa karhi swa hetiseka.

8, 9. (a) Xana vukona bya Yesu bya vuhosi byi katsa yini? (b) Xana vuprofeta bya Yesu mayelana na Vakreste va mavunwa byi vula yini emhakeni ya ndhawu ni ndlela ya vukona bya yena?

⁸ Tanihi leswi vuhosi bya Yesu byi hlanganisaka misava hinkwayo, vugandzeri bya ntiyiso byi nave eka matiko-nkulu hinkwawo. Vukona (pa·rou·siʹa) bya yena, bya vuhosi, i nkarhi wa ku kamberiwa ka misava hinkwayo. (1 Petro 2:12) Kambe xana wu kona ntsindza kumbe xivandla lexi Yesu a nga kumiwaka eka xona? Yesu u hlamule leswi hi ku vhumbha leswaku loko vanhu va ha n’wi languterile ku ta va ni lava tivulaka vaKreste, va mavunwa. U tsundzuxile: “Hikwalaho loko va ku ka n’wina; ‘Vonani, ú le mananga le!’ mi nga yi kona; kumbe loko va ku: ‘Vonani, ú tumbela laha ndlwini!’ mi nga swi pfumeli sweswo. Hikuva kukotisa rihati loko ri hatima ku sukela evuxeni ku ya fika evupeladyambu, N’wana-wa-Munhu ú ta endlisa sweswo [loko a fikile, pa·rou·siʹa].”—Matewu 24:24, 26, 27.

⁹ Ku tlula mani na mani emisaveni, Yesu, “N’wana-wa-Munhu,” a a swi tiva leswaku u ta kumiwa kwihi naswona njhani enkarhini wa vukona byakwe. A a nga ta tshama laha kumbe lahaya kumbe eka ndhawu yihi na yihi emisaveni. A a nga ta tshama endhawini leyi tumbeleke, “emananga,” leswaku lava lavaka Mesiya va n’wi kuma kona, va nga voniwi hi valawuri va hulumendhe va ndhawu yoleyo, laha a nga ta letela valandzeri vakwe kona, va lunghiselela ku ba mhalamhala ya tipolitiki ivi va nwi veka tanihi Mufumi wa Vumesiya wa misava. Naswona a nge tifihli “etindlwini,” leswaku ndhawu leyi a nga eka yona yi tiviwa hi vanhu vatsongo ntsena lava nga kwalaho, a nga voniwi naswona a nga kumeki, leswaku a endla rhengu ivi a endla makungu ni vapfukeri van’wana leswaku va lwa ni tihulumendhe ta misava ivi a totiwa tanihi Mesiya la tshembisiweke. Swi nge vi tano!

10. Xana rihati ra ntiyiso wa Bibele ri hatimise ku yini emisaveni hinkwayo?

¹⁰ Ku hambana ni sweswo, a ku nge vi na nchumu lexi nga ta tumbeta ku va kona ka Yesu tanihi Hosi, loko a sungula vukona bya yena bya vuhosi. Hi laha Yesu a vhumbheke ha kona, emisaveni hinkwayo, ku hatima ka ntiyiso wa Bibele ku ya emahlweni ku voninga etindhawini letikulu ku sukela evupela-dyambu ku ya evuxeni. Entiyisweni, tanihi vabyarhi va ku vonakala va manguva lawa, Timbhoni ta Yehovha ti vonaka ti ri “ku v̌onalaka ka matiko, e ku fikisa ku pona ka [Yehovha] emakuṅwini ya misav̌a.”—Esaya 49:6.

Ntirho Wa Tintsumi

11. (a) Xana tintsumi ti tirhisiwa hi ndlela yihi leswaku ti hangalasa ku vonakala ka Mfumo? (b) Swirho swa ntlawa wa koroni swi hlengeletiwe rini naswona swi hlengeletiwa ku va ntlawa wihi?

¹¹ Tinhlamuselo tin’wana leti vulavulaka hi vukona bya Yesu ti n’wi hlamusela tanihi loyi a taka ni vaheleketi va tintsumi, kumbe la ‘tirhumaka.’ (Matewu 16:27; 24:31) Eka xikombiso xa koroni ni mfava, Yesu u vule leswaku “nsimu, i misava” kasi “ku tshovela, i makumu ya minkarhi leyi; vatshoveri, vona, i tintsumi.” Hambi swi ri tano, leswi a swi vuli leswaku eka vukona bya yena ematimbeni ni le ku kwetsimeni ka yena ka Mfumo, u tirhisa varhumiwa lava nga tintsumi hi ku kongoma emintirhweni ya le misaveni. Ku sukela hi 1919, tintsumi leti nga ehansi ka nkongomiso wa Yesu ti hambanise ntlawa wa lava totiweke hi moya emisaveni, lava a va hangalasiwe hi swiendlakalo swa Nyimpi yo Sungula ya Misava, naswona a ti leteleriwa ntirho lowu endliwaka evitweni ra Hosi. (Matewu 13:38-43) Hi va-1920 magidi man’wana ma yimele Mfumo wa Xikwembu lowu simekiweke naswona va totiwe hi moya wa Xikwembu. Vatotiwa lava va engeteriwe eka mintlawa ya masalela yo sungula. Loko va ri hinkwavo, va vumba ntlawa wa nandza lowo tshembeka wa vutlharhi ku ta fikela namuntlha.

12. Tintsumi ti hlanganyele eku basiseni kwihi, naswona vuyelo bya kona emisaveni byi ve byihi?

¹² Xikombiso xin’wana xa ku hlanganyela ka tintsumi eka vukona bya Yesu endzhaku ka ku vekiwa ka yena exiluvelweni hi 1914 xi rhekhodiwe eka Nhlavutelo 12:7-9: “Mikayele [Yesu Kreste] ni tintsumi ta yena loko va lwa ni dragona; na yona dragona yi lwa yi ri ni tintsumi ta yona. Kambe dragona yi hluriwa, yi nga pfumeleriwi ku tshama etilweni, yona ni tintsumi ta yona. Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona.” Xisweswo, le henhla matilo se a ma basisiwile, ku sala xivandla xa le misaveni laha Mfumo a wa ha ta xi basisa leswaku ku kwetsimisiwa vito ra Yehovha. Eka lembe leri ra 1993, xitsundzuxo xa Xikwembu xi ya emahlweni xi tirha: “Mi ni khombo, n’wina misava . . . hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.”—Nhlavutelo 12:12.

Ku Pfuxeriwa eTilweni

13, 14. (a) Matsalwa ma komba leswaku i yini lexi hambeteke xi humelela ku sukela hi 1918 ku ya emahlweni? (b) Pawulo na Yohane va hlavutela yini mayelana ni masalela ya vatotiwa namuntlha?

¹³ Xiendlakalo xin’wana lexi hlamarisaka enkarhini wa vukona bya Kreste i ku sungula ka ku pfuxeriwa etilweni. Muapostola Pawulo u kombise leswaku vatotiwa va Vakreste lava etleleke khale emasirheni ya vona hi vona lava nga ta rhanga ku pfuxiwa ivi va hanya na Kreste Yesu exivandleni xa moya. Vumbhoni byi kombisa leswaku leswi swi vonaka swi humelele ku sukela hi 1918 ku ya emahlweni. Pawulo wa tsala: “Hinkwavo va ta tlhela va pfuxiwa hikwalaho ka Kriste. Kambe un’wana ni un’wana u ta pfuxiwa hi nkarhi wa yena: Wo rhanga i Kriste xi nga xo xitshembiso; kutani [hi vukona bya] Kriste . . . [pa·rou·siʹa], lava nga va yena va ta landza.” (1 Vakorinto 15:22, 23) Ku pfuxiwa ka lava totiweke hi nkarhi wa vukona bya Kreste ku tiyisiwa eka 1 Vatesalonika 4:15-17: “Lexi hi mi byelaka xona hi vito ra Hosi, hi lexi: Hina hi nga ta va ha ha hanya loko Hosi yi vuya [pa·rou·siʹa], hi nga ka hi nga rhangeli lava tietleleleke . . . Lava feleke ka Kriste, va ta rhanga va pfuka eku feni; kutani hina lava hi nga ta va ha ha hanya, hi ta tlakuriwa hi ya ehenhla emapapeni swin’we na vona hi ya hlangana na Hosi empfhukeni.” Hi lava 144 000 lava va nga va ka Kreste lava totiweke lava eku heteleleni va nga ta kuma hakelo leyi leyinene swonghasi.—Nhlavutelo 14:1.

¹⁴ Hi laha Pawulo a kombisaka ha kona, masalela lama totiweke lama ha hanyaka namuntlha a ma va rhangeli vadlawela-ripfumelo va khale ni vadyondzisiwa, ku nghena eMfun’weni. Ku ya emahlweni muapostola Yohane u hlamusela lava va totiweke, lava faka namuntlha hi ndlela leyi: “‘Ku katekile vafi lava ku sukela sweswi va felaka eHosini!’ Moya na wona wu ri: ‘Ina, va katekile, hikuva va phyuphya emikarhalweni ya vona, kutani mintirho ya vona yi ta va landzela,’” sweswo swi endleka eka xiyimo xa vona loko va pfuxiwile. (Nhlavutelo 14:13) Kutani Pawulo u ri: “Yingisani, ndzi mi byela xihundla: A hi nga fi hinkwerhu, kambe hinkwerhu hi ta hundzuriwa, hi nkarhinyana, hi ku copeta ka tihlo, eku beni ka mhalamhala ya makumu; mhalamhala yi ta twala kutani vafi va ta pfuxiwa va hambaniseriwa makumu ni ku onhaka, kutani hina hi ta hundzuriwa.” (1 Vakorinto 15:51, 52) Mawaku hlori ro tano leri hlamarisaka!

15, 16. (a) I xifaniso xihi lexi Yesu a xi nyikeleke eka Luka 19:11-15, naswona hikwalaho ka yini? (b) Xana vuprofeta lebyi byi hetiseka hi ndlela yihi?

¹⁵ Eka khamba rin’wana loko Yesu a ri karhi a chumayela ntlawa wa valandzeri vakwe hi ta Mfumo wa Xikwembu, u tirhise xikombiso leswaku a va pfuna va lunghisa mianakanyo ya vona leyi hoxeke. Mhaka ya kona yi hlayekisa xileswi: “Vona a va ehleketa leswaku Mfumo wa Xikwembu wu ta hatla wu humelela. A ku: ‘Nkulukumba un’wana a tilunghisela ku ya etikweni ra le kule, a ya vekiwa ku va hosi, a ta tlhela a vuya kutani a vitana malandza ya yena ya khume, a nyika un’wana ni un’wana epondho, a ku ka vona: “Bindzulani ha yona ndzi ko ndzi vuya.” . . . “Siku nkulukumba a vuyaka, a vekiwe ku va hosi, a lerisa leswaku malandza lawa a nga ma nyika mali, ma vitaniwa, leswaku a ta tiva leswi un’wana ni un’wana a bindzuleke swona.”’”—Luka 19:11-15.

¹⁶ Yesu a a ri yena “nkulukumba” yoloye loyi a yeke etilweni, ku nga “etikweni ra le kule” laha a ta kuma mfumo kona. Mfumo wolowo u wu kume hi 1914. Endzhakunyana ka sweswo, Kreste tanihi Hosi u kambisise ni lava tivulaka valandzeri va yena ku vona leswaku va endle yini eku khathaleleni swilaveko swa Mfumo leswi a va byarhiseke swona. Va nga ri vangani lava tshembekeke va hlawuriwile leswaku va kuma xibumabumelo xa n’wini wa vona xa leswaku: “Hiswona, nandza lonene; leswi u tshembekeke emhakeni leyitsongo ngopfu, u ta fuma miti ya khume.” (Luka 19:17) Nkarhi lowu wa vukona bya Kreste wu katse ntirho lowu tiyisiweke lowu yaka emahlweni wa ku chumayela hi Mfumo, ku katsa ni ku twarisa ku avanyisa ka Xikwembu ehenhla ka lavo biha, naswona ku langutela ntirho lowu swi katsiwe eka vulanguteri lebyi nyikiweke “nandza lowo tshembeka.”

Ku Chumayela eMisaveni Hinkwayo

17. I mintsako yihi leyi funghaka pa·rou·siʹa?

¹⁷ Xana i yini swin’wana leswi nga ta humelela hi nkarhi wa pa·rou·siʹa? Ku ta va nkarhi wa ntsako entirhweni wo chumayela ni le ku pfuneni ka vanhu lavantshwa leswaku va lunghiselela ku pona nhlomulo lowukulu lowu taka. Lava va “ntshungu lowukulu,” lava va pfunaka masalela, va hundzuka ‘mapapila ya vutitivisi.’ (Nhlavutelo 7:9; 2 Vakorinto 3:1-3) Pawulo u boxa ntsako wa ntirho lowu wa ku tshovela loko a ku: “Xana hi kwihi ku langutela ka hina ni ku tsakela ka hina, hi yihi harhi ya ku hlula leyi hi nga ta tidzunisa ha yona emahlweni ka Hosi ya hina Yesu, siku [ra vukona] [pa·rou·siʹa] ke? Xana a hi n’wina xana?”—1 Vatesalonika 2:19.

Tshamani Mi Basile Mi Nga Ri Na Xivati

18. (a) I xikhongelo xihi xa Pawulo lexi kombetelaka eka pa·rou·siʹa? (b) I moya wihi lowu hinkwerhu ka hina hi faneleke hi wu kombisa enkarhini lowu, naswona hi tindlela tihi?

¹⁸ Nakambe Pawulo u khongelele ku kwetsimisiwa ka lava a va hanya enkarhini lowu wa vukona bya Kreste: “Ingi Xikwembu xa ku rhula xona ha xoxe, xi nga mi endla lava hlawulekeke hi matlhelo hinkwawo. Ingi mimoya ya n’wina, ni timbilu ta n’wina, ni miri wa n’wina, swi nga hlayiseka swi basile, swi nga ri na nandzu siku Hosi ya hina Yesu Kriste a [nga kona] [pa·rou·siʹa].” (1 Vatesalonika 5:23) Ina, namuntlha, hambi hi masalela ya lava totiweke kumbe tinyimpfu tin’wana leto tala, moya wa ku tirhisana wa hi hlanganisa hi ku tshembeka leswaku hi nga hambeta hi ya emahlweni hi basile naswona hi nga ri na xivati enkarhini lowu wo hlawuleka. Hi ku fanana, hi lava ku kombisa tintswalo. Yakobo u tsarile: “Loko swi ri tano, vamakwerhu, lehisani timbilu, Hosi yi kondza yi [va kona] [pa·rou·siʹa]. . . . Lehisani timbilu mi tiyisela, hikuva [pa·rou·siʹa] [vukona bya] Hosi [byi] kusuhi.”—Yakobo 5:7, 8.

19. Petro u tsundzuxe hi yini mayelana ni pa·rou·siʹa, naswona xana hi fanele hi endla yihi?

¹⁹ Muapostola Petro na yena a ri na xokarhi xo xi vula eka hina lava hanyaka ekarhini lowu. U hi tsundzuxe hi vasandzi, lava teleke eswiphen’wini hinkwaswo swa misava. Petro u te: “Xo sungula mi fanele ku twisisa leswaku, emasikwini yo hetelela vasandzi lava fambisiwaka hi ku navela ka vona loko biha; va ta mi sandza, va ku: ‘Swi helele kwihi, swa [vukona, pa·rou·siʹa, bya] loyi [a] nga tshembisiwa . . . xana? Hi mpfhuka vatatana va nga tietlelela, swilo hinkwaswo swa ha ya emahlweni hilaha a swi famba hakona, ku sukela loko misava yi tumbuluka.’” (2 Petro 3:3, 4) Ku nga khathariseki ku tala ka vasandzi enkarhini wa vukona bya Kreste, vanhu va Yehovha va ya emahlweni va voninga tanihi rivoningo ra misava, leswaku ku ta ponisiwa lavo tala.

Swivutiso Swa Ku Pfuxeta

◻ Vanhu va Yehovha va hambete njhani va voningeriwa mayelana na pa·rou·siʹa?

◻ Matewu 24:4-8 yi hetiseka hi ndlela yihi?

◻ Xana tintsumi ti tirhisana njhani na Kreste la nge xiluvelweni?

◻ I hlori rihi leri hlamarisaka leri vonakaka ri fambisana ni pa·rou·siʹa?

◻ I ntsako wihi lowu nga kona enkarhini lowu, naswona i vamani lava tiphinaka ha wona?