Langutelo Ra Bibele

Kreste U Kona!

“MANDELA wa ta! Mandela wa ta!” a ku yimbelela vana va le Soweto, le Afrika Dzonga. Ku humesiwa ka Nelson Mandela ekhotsweni hi February 11, 1990, a ku tekiwa tanihi ku sungula ka ku hundzuka ka swilo le Afrika Dzonga. Hambi swi ri tano, malembe yo tala a nga si huma, vukona byakwe a byi voniwa. Loko a ha ri ekhotsweni, u yime hi milenge a pfuxa “nhlangano wa matimba wo herisa xihlawuhlawu.” Hi laha magazini wun’wana wa tiko hinkwaro wu vuleke ha kona, ku pfaleriwa malembe ya 27 a ku byi “hetanga vukona byakwe—kumbe ku lwa kakwe.” Ku humesiwa kakwe ekhotsweni ku kombisa kahle ku hambana exikarhi ka ku ta ni vukona.

Hi laha ku fanaka, hi ku kombetela eka Yesu Kreste la sungulaka ku fuma, vatsari va Bibele va lembe xidzana ro sungula va komba ku hambana exikarhi ka ku ta ni vukona byakwe. Vukona bya Kreste Yesu ematimbeni ya vuhosi a ku ta twiwa ni ku voniwa malembe yo tala a nga si “ta emapapeni ya le tilweni, hi matimba ni ku kwetsima lokukulu.” (Matewu 24:30) Vukona bya Kreste lebyi nga vonakiki (hi Xigriki, pa·rou·siʹa) a byi ta rhangela ku ta loku (hi Xigriki, erʹkho·mai) a ta avanyisa rixaka leri xandzukaka ni lero biha.

Pa·rou·siʹa—Xana Swi Vula Yini?

Rito ra Xigriki pa·rou·siʹa hi ku kongoma ri vula “ku va etlhelweni” naswona “ri hundzuke rito ra ximfumo leri vulaka ku endza ka munhu wa le henhla, ngopfu-ngopfu tihosi ni valawuri lava endzelaka xifundzha.” Theological Dictionary of the New Testament yi ri: “[Parousia] ngopfu-ngopfu ri vula vukona bya xiviri.” Naswona malunghana ni vukona bya Kreste Yesu, buku leyi nge The Parousia yi ri: “Matsalwa a ma vulavuli hi ‘ku ta ka vumbirhi [Parousia].’ Xivumbeko xa byona, a ku ri xo hlawuleka, lexi nga si tshamaka xi endleka, naswona lexi nga ta ka xi nga ha endleki. A ku ta va vukona lebyi hambanaka ni ku kombisiwa hinkwako ka yena evanhwini, ni loku tlakukeke.”

Loko a hlamusela marito ya Yesu ya vuprofeta loko a hlamula swivutiso leswi hlamuriweke hi vaapostola eNtshaveni ya Mitlhwari, Profesa A. T. Robertson eka Word Pictures in the New Testament u tsala leswaku Yesu a a “tirhisa ku lovisiwa ka tempele ni ka Yerusalema loku humeleleke eka rixaka rero hi A.D. 70, tanihi xikombiso xin’wana xa ku ta kakwe ka vumbirhi ni xa ku hela ka misava . . . kumbe ku hela ka nkarhi.” Swivutiso leswi a ku ri swihi naswona Yesu u hlamurise ku yini?

Xikombiso Xa Vukona Bya Kreste

Hi laha ku rhekhodiweke ha kona eka Matewu 24:3, muapostola u vutisile: “Hi byele, xana timhaka leti ti ta humelela rini xana? Xana xikombiso xa [vukona bya] wena ni xa ku hela ka [minkarhi] xi ta va xihi ke?” Loko a hlamula, Yesu u nyike vadyondzisiwa xikombiso lexi a xi ta va mfungho lowu vonakaka wa vukona byakwe lebyi nga vonakiki ematimbeni ya Mfumo. Xikombiso lexi heleleke a xi katsa tinyimpi leti nga si tshamaka ti va kona, ku pfumaleka lokukulu ka swakudya, ku tsekatseka ka misava loku tsemaka nhlana, mintungu ni ku andza ka vugevenga ni ku chava. Vukona bya Kreste a byi ta va nkarhi wa ku kayakayeka ni ku xaniseka ka misava hinkwayo. Tihulumendhe ta vanhu ni varhangeri va misava a va nga ta swi kota ku humelela eka mafambiselo lama waka.—Matewu 24:7, 12; Luka 21:11.

Loko a tiyisa ku tshembeka ka marito ya Yesu ya vuprofeta, profesa wa tidyondzo ta politiki, John Meisel, u te: “Nkarhi lowukulu wu ya eku heleni, wu ta pfariwa hi lowu xiyimo xa wona xi nga twisisiwiki kahle ni sweswi.” Endzhaku ko hlamusela ku hela ka Vukhomanisi, ku hluleka ka Vusoxalisi, ni ku tsandzeka ka Vukepitalisi, Profesa Meisel u ye emahlweni a ku: “Swiphiqo swo tala swa vanhu a swi koteki ku lulamisiwa hi sayense ya vanhu naswona swi fanele ku tlhantlhiwa hi tindlela tin’wana.” Naswona, xana sweswo swi vula yini? “Mianakanyo ya xisekelo xa misava ya sweswi ya wa naswona yi lava ku pfariwa hi yin’wana.”

Vukona Bya Kreste Hi Xiviri

Ku nga khathariseki swiyimo swo biha swa misava leyi faka, vukona bya Yesu ematimbeni ya vuhosi byi sungule emalembeni yo tlula 75 lama hundzeke naswona byi twiwile hi ndlela leyi nga kanakanisiki, leyinene.a Ku nga khathariseki ku onha loku endliweke hi tinyimpi timbirhi ta misava, Hosi leyi vekiweke, Kreste Yesu, yi hlanganyela eku vumbeni ka tiko lerintshwa ra vanhu—vanhu va vito ra Yehovha “va huma ematikweni hinkwawo, ni le tinxakeni hinkwato, va ri va swivongo hikwaswo ni va tindzimi hinkwato.” Vukona bya Kreste byi tiyise nongonoko wa misava hinkwayo wo chumayela ni ku dyondzisa, lowu khumbeke timbilu ta timiliyoni ta vanhu lava fanelekaka. Va susumeteleke ku yima ni Mfumo wa Yehovha lowu nge mavokweni ya Kreste Yesu.—Nhlavutelo 7:9, 10.

Leswi hi langutaneke ni vumbhoni bya siku na siku lebyi andzaka bya ku hetiseka ka xikombiso xa swiphemu swo tala xa vukona bya Kreste, a swi hoxanga ku byela Vakreste leswaku hi langutane ni ku hela ka nkarhi. Sweswi i nkarhi wo ‘yingiserisisa swinene’ Hosi leyi vekiweke exiluvelweni, Kreste Yesu. (Vaheveru 2:1) Wa hi khongotela: “Hitekani ke, mi khongela minkarhi hinkwayo, leswaku mi kuma matimba ya ku pona eka swilo hinkwaswo leswi swi nga ta humelela, ni ku yima mi tiyile mahlweni ka N’wana-wa-Munhu.”—Luka 21:36.

[Nhlamuselo ya le hansi]