Ku Risa Swin’we Ni Muvumbi Wa Hina La Hlamarisaka

“Yehova i murisi wa mina: nḍi nga ka nḍi nga pfumari ntšhumu. O nḍi fambisa e tindleleni le’to lulama, hikwalaho ka v̌ito ra yena.”—PISALEMA 23:1, 3.

1. Xana i ku phyuphyisa kwihi ka rirhandzu loku Yehovha a ku tisaka?

PISALEMA ya vu-23, “risimu ra Davida,” yi phyuphyise mimoya-xiviri yo tala leyi karhaleke. Yi va endle leswaku va va ni ntshembo lowu vuriwaka eka ndzimana 6, leyi nge: “Kunene, ku kateka ni tintŝalo ŝi ta nḍi lanḍela hi masiku hikwawo ya ku hanya ka mina, kutani nḍi ta ṭhama e ndlwini ya Yehova hi masiku hikwawo.” Xana sweswo hi leswi u navelaka swona, leswaku u tshama endlwini ya vugandzeri bya Yehovha nkarhi hinkwawo, u hlangana ni vanhu va yena lava sweswi va hlengeletiwaka ematikweni hinkwawo ya misava? “Murisi ni mulanguteri wa mimoya ya n’wina,” Muvumbi wa hina la Hlamarisaka, Yehovha Xikwembu, u ta ku pfuna leswaku u fikelela pakani yoleyo.—1 Petro 2:25.

2, 3. (a) Yehovha u va risa njhani vanhu vakwe hi rirhandzu? (b) “Ntlhambi” wa Yehovha wu andze njhani hi ndlela leyi hlamarisaka?

² Muvumbi wa “matilo lamantshwa ni misava leyintshwa” u tlhela a va Mukondleteri ni Mulanguteri la Tlakukeke wa vandlha ra Vukreste, ‘yindlu ya Xikwembu.’ (2 Petro 3:13; 1 Timotiya 3:15) U tikarhatela ngopfu ku risa vanhu va yena, hi laha Esaya 40:10, 11 yi swi andlalaka ha kona yi ku: “V̌onani, Hosi, Yehova wa ta hi matimba; wa fuma hi v̌oko ra yena; v̌onani, wa ta a ri ni ku nkhensa ka yena, ku hakela ka yena ku ṅwi rangele. Tani hi murisi, o ta risa ntlhambi wa yena; o ta rola ŝinyimpfana hi mav̌oko, o ta ŝi v̌ukara e rumbini ra yena, o ta fambisa khwaṭi le’ti aṅwisaka.”

³ Hi mongo lowu anameke, “ntlhambi” lowu wu katsa ni lava ku nga khale va famba endleleni ya ntiyiso, ni “ŝinyimpfana” leswa ha ku hlengeletiwaka eminkarhini ya sweswinyana—tanihi tinhlayo letikulu leti sweswi ti khuvuriwaka eAfrika ni le Yuropa Vuxa. Voko ra Yehovha ra matimba, ri va vukarhela exifuveni xa yena. Hambi leswi a va fana ni tinyimpfu leti lahlekeke, sweswi va ni vuxaka lebyikulu ni Xikwembu, Murisi wa vona la rhandzekaka.

Murisi-kulobye Wa Yehovha

4, 5. (a) I mani “murisi lonene,” naswona vuprofeta byi kombeterise ku yini eka yena? (b) I ntirho wihi wo hambanisa, lowu Yesu a wu ungamelaka, naswona wu ni vuyelo byihi lebyikulu?

⁴ Loko a tirha evokweni ra Tata wa yena etilweni, “murisi lonene,” Yesu Kreste, u tlhela a khathalela “tinyimpfu” hi ntwela-vusiwana. U nyikele hi vutomi byakwe leswaku a rhanga hi ku kuma “ntlhambinyana” wa vatotiwa, ivi namuntlha, ku landzela ntshungu lowukulu wa “tinyimpfu tin’wana ta yena.” (Luka 12:32; Yohane 10:14, 16) Murisi Lonkulu, Yehovha Xikwembu, u vulavula ni tinyimpfu leti hinkwato, a ku: “V̌onani, mina nḍi ta av̌anyisa . . . hi le šikari ka nyimpfu ni nyimpfu yin’wana. Nḍi ta yimisa murisi uṅwe e henhla ka tona, yena o ta ti risa; o ta v̌a nanḍa wa mina, Davida; hi yena l’a nga ta ti risa, loyi a nga ta v̌a murisi wa tona. Mina, Yehova, nḍi ta v̌a Šikwembu e ka tona, kutani nanḍa wa mina, Davida, o ta v̌a hosi e šikari ka tona. Hi mina Yehova nḍi v̌uleke ŝeŝo.”—Ezekiyele 34:20-24.

⁵ Xithopo lexi nge “nanḍa wa mina, Davida” xi kombetela hi ndlela yo profeta eka Kreste Yesu, ‘mbewu’ leyi dyaka ndzhaka ya xiluvelo xa Davhida. (Pisalema 89:35, 36) Esikwini leri ra ku avanyisiwa ka matiko, Murisi, tlhelo Hosi-kulobye ya Yehovha, Kreste Yesu, N’wana Davhida, u hambeta a hambanisa “tinyimpfu” leti nga vanhu eka lava va nga ha tivulaka “tinyimpfu” kambe entiyisweni va ri “timbuti.” (Matewu 25:31-33) “Murisi uṅwe” loyi, u tlhela a vekeriwa ku wundla tinyimpfu. Mayana ku hetiseka loku hlamarisaka ka vuprofeta lebyi, loku hi ku vonaka namuntlha! Loko van’watipolitiki va vulavula hi ku hlanganisa vanhu hi fambiselo lerintshwa ra misava, kahle-kahle Murisi loyi un’we u hlanganisa tinyimpfu ta matiko hinkwawo hi ku tirhisa tsima ra ku nyikela vumbhoni hi tindzimi to hambana-hambana, leri ku nga nhlengeletano ya Xikwembu ntsena leyi nga ri endlaka.

6, 7. Xana “nandza la tshembekaka, wo tlhariha,” u tiyisekisisa ku yini leswaku tinyimpfu ti kuma “swakudya hi nkarhi wa kona”?

⁶ Loko rungula ra Mfumo ri ri karhi ri hangalasiwa etindhawini letintshwa nkarhi ni nkarhi, “nandza la tshembekaka, wo tlhariha” wa Vakreste lava totiweke, u rhumiwa hi Murisi loyi un’we, a tiyiseka leswaku malunghiselelo hinkwawo ma endliwa leswaku ku rhumeriwa “swakudya hi nkarhi wa kona.” (Matewu 24:45) Yo tala eka 33 wa marhavi yo kandziyisa ya Sosayiti ya Watch Tower emisaveni hinkwayo, ma andzisa mphakelo wa wona leswaku ma fikelela xilaveko lexi kulaka hi rivilo xa tibuku-mpfuno ta Bibele ni timagazini leti engetelekeke, letinene.

⁷ Huvo leyi Fumaka ya Timbhoni ta Yehovha yi endla matshalatshala hinkwawo leswaku yi hluvukisa risima ra vuhundzuluxeri hi tindzimi ta kwalomu ka 200, ni ku sungula ku hundzuluxela hi tindzimi leti engetelekeke hi laha swi lavekaka ha kona leswaku ku enetiwa nsimu ya misava hinkwayo. Leswi swi seketela ntirho lowu Yesu a wu nyikeke vadyondzisiwa va yena eka Mintirho 1:8, leyi nge: “Mi ta nyikiwa matimba, siku Moya lowo Kwetsima wu taka ehenhla ka n’wina; kutani mi ta va timbhoni ta mina . . . ku ya fikela emakun’wini ya misava.” Tlhandla-kambirhi, New World Translation of the Holy Scriptures, leyi se yi kandziyisiweke hinkwayo ka yona kumbe xiphemu xa yona hi tindzimi ta 14, sweswi ya karhi ya hundzuluxeriwa hi tindzimi tin’wana ta 16, ta le Yuropa, Afrika, ni le Vuxeni.

Ku Tsakela ‘Ku Rhula Ka Xikwembu’

8. Tinyimpfu ti katekisiwe njhani hi laha ku fuweke hi ntwanano wa ku rhula lowu Yehovha a wu endleke na tona?

⁸ Hi ku tirhisa Murisi wa yena un’we, Kreste Yesu, Yehovha u endla ‘ntwanano wa ku rhula’ ni tinyimpfu ta Yena leti wundliwaka kahle. (Esaya 54:10) Hi ku kombisa ripfumelo engatini ya Yesu leyi halakeke, tinyimpfu leti ti kota ku famba eku vonakaleni. (1 Yohane 1:7) Ti kuma ‘ku rhula ka Xikwembu loku tlulaka makungu hinkwawo, loku kongomisaka timbilu ni matimba ya vona ya ku anakanya ha Kreste Yesu.’ (Vafilipiya 4:7) Hi laha Ezekiyele 34:25-28 yi yaka emahlweni yi hlamusela ha kona, Yehovha u risa tinyimpfu ta yena a ti yisa eparadeyisini ya moya, xiyimo lexi tsakisaka xa nsirhelelo, ndzalo leyi phyuphyisaka ni lexi nga ni mihandzu. Murisi loyi wa rirhandzu u vula leswi hi tinyimpfu takwe: “V̌a ta tiv̌a leŝaku hi mina Yehova, e siku nḍi ṭhov̌aka ŝiboho ŝa džoko ya v̌ona, nḍi v̌a lamulela emav̌okweni ya la’v̌a v̌a fambisaka. A v̌a nga ha v̌i timbhari e ka matiko; . . . kambe v̌a ta aka hi ku tikhorisa; a ku nga ha v̌i na l’a va tšhav̌isaka.”

9. I malunghelo wahi lama pfuleriweke vanhu va Xikwembu hi ‘ku tshoviwa ka swiboho’?

⁹ Ana se emalembeni lama ha ku hundzaka, ematikweni yo tala Timbhoni ta Yehovha ti vone ku tshoviwa ka ‘swiboho swa joko ra tona.’ Ti ntshunxekile leswaku ti chumayela ku tlula rini na rini. Naswona onge hinkwerhu, etikweni rin’wana ni rin’wana, hi nga wu tirhisa kahle nsirhelelo lowu Yehovha a hi nyikaka wona loko hi ri karhi hi lwela ku hetisa ntirho. Mayana xitiyisekiso xonghasi lexi Yehovha a hi nyikaka xona loko hi ri karhi hi tshinela enkarhini wa nhlomulo lowukulu lowu munhu a nga ta wu vona!—Daniyele 12:1; Matewu 24:21, 22.

10. I vamani lava Yehovha a va humeseke leswaku va pfuneta Murisi Lonene, Kreste Yesu, naswona van’wana va lava va tivisiwe njhani hi muapostola Pawulo?

¹⁰ Eku lunghiseleleni ka siku rero ra ndzihiso wakwe eka lavo biha, Yehovha u humese varisi-ntsongo leswaku va pfuna Murisi Lonene, Kreste Yesu, eku khathaleleni ka ntlhambi. Lava va hlamuseriwaka eka Nhlavutelo 1:16 tanihi nhlayo leyi heleleke ya “tinyeleti ta 7” evokweni ra xinene ra Yesu. Hi lembe xidzana ro sungula, muapostola Pawulo u vulavule ni huvo leyi yimelaka varisi-ntsongo lava, a ku: ‘Tilanguteleni, mi langutela ni ntlhambi hinkwawo, lowu moya wo kwetsima wu nga mi veka ku va valanguteri va wona, leswaku mi risa vandlha ra Xikwembu, leri xi ri xaveke hi ngati ya N’wana wa xona.’ (Mintirho 20:28) Namuntlha, ku ni varisi-ntsongo va kwalomu ka makume ya magidi ya lava tirhaka emavandlheni ya 69 558 emisaveni hinkwayo.

Varisi-ntsongo Va Rhangela!

11. Xana varisi van’wana va rhangerise ku yini hi ndlela leyi humelelaka emasin’wini lama hlanganisiwaka hi ku phindha-phindha?

¹¹ Etindhawini to tala varisi lava va fanela va rhangela emasin’wini lama hlanganisiweke hi ku phindha-phindha emasikwini lawa ya makumu. Xana va nga ku hlayisisa ku yini ku chivirika ka ntlhambi ku tshama ku ri exiyin’weni xa le henhla? Varisi lava va endle leswi bumabumeriwaka ngopfu, naswona ndlela yin’wana leyi a va endla kahle ha yona i ku seketela ntirho wa vuphayona bya nkarhi hinkwawo ni bya nkarhinyana. Varisi vo tala va hlanganyerile hi xiviri entirhweni lowu, naswona ni vahuweleri lava a va nga swi koti ku endla tano, va kombise moya wa vuphayona, va tirha hi ku tsaka loku pfuneke ku hlula moya wa ku nga tsakeli ensin’wini. (Pisalema 100:2; 104:33, 34; Vafilipiya 4:4, 5) Xisweswo, leswi vuhomboloki ni mpfilumpfilu swi hlanganisaka misava, vanhu vo tala lava fanaka ni tinyimpfu va karhi va xalamukiseriwa eka ntshembo wa Mfumo.—Matewu 12:18, 21; Varhoma 15:12.

12. I swiphiqo swihi leswi nga kona emasin’wini lama kulaka hi ku hatlisa, naswona swi tameriwa njhani nkarhi wun’wana?

¹² Xiphiqo xin’wana hi leswaku nkarhi ni nkarhi a ku vi na varisi lava eneleke, lava fanelekaka leswaku va khathalela ntlhambi. Laha ku nga ni ku kula ka xihatla, tanihi le Vuxeni bya Yuropa, ku ni mavandlha yo tala lamantshwa lama nga riki na nkulu ni un’we la vekiweke. Tinyimpfu leti ti swi rhandzaka ti rhwala ndzhwalo wolowo, kambe a ti na ntokoto, naswona ku laveka mpfuno leswaku ku leteriwa tinyimpfu leti khitikanelaka emavandlheni. Ematikweni yo kota Brazil, Mexico, na Zaire, laha ku kula ku hatlisaka swinene, Timbhoni letitsongo ti boheka ku tirhisiwa eku hleleni ka ntirho ni ku letela van’wana lavantshwa. Maphayona ma pfuneta ngopfu, naswona laha i nsimu leyi vamakwerhu va xisati va kotaka ku letela vamakwerhu lavantshwa va xisati. Yehovha u katekisa vuyelo bya kona hi moya wa yena. Ku andza ku tama ku ya emahlweni.—Esaya 54:2, 3.

13. (a) Leswi ntshovelo wu nga wukulu, xana Timbhoni hinkwato ti fanele ti khongelela yini? (b) Xana swikhongelo swa vanhu va Xikwembu swi hlamuriwe njhani emahlweni ka nyimpi yo sungula ya misava ni hi nkarhi wa yona?

¹³ Ematikweni lawa ntirho wo chumayela wu pfumeleriweke ximfumo, ematikweni lawa minsivelo ya ha ku herisiwaka, ni le masin’wini lamantshwa lama ha ku pfuriwaka, marito ya Yesu lama nga eka Matewu 9:37, 38 ma tirha ni le ka wona: “Ntshovelo i wukulu, kambe vatirhi a va talanga. Hikokwalaho, khongelani N’wini wa ntshovelo, leswaku a rhuma vatirhi eku tshoveleni ka yena.” Nakambe hi fanele hi khongelela leswaku Yehovha a veka varisi van’wana lava engetelekeke. U swi kombisile leswaku leswi a nga swi endla. Emahlweni ka Nyimpi ya Vumbirhi ya Misava ni hi nkarhi wa yona, vafumi va tihanyi vo fana ni va le Asiriya va ringete ku herisa Timbhoni ta Yehovha. Kambe loko a hlamula swikhongelo swa tona, Yehovha u basise nhlengeletano ya yena, a yi endla yi va ya le tilweni hi ku helela, ivi a humesa “varisi” lava lavekaka.a Leswi a swi fambisana ni vuprofeta lebyi nge: ‘Kutaku loko Muasiriya a nghena etikweni ra hina, a kandziya eswihondzweni leswi hi tshamaka eka swona, na hina hi ta boheka ku veka varisi va 7, ina, varhangeli va vanhu va 8, lava nga ta lwa na yena’—hambi lava engetelekeke ku tlula vakulu lava tinyiketeleke lava lavekaka leswaku va rhangela.—Mikiya 5:5.

14. Xana i ku andza kwihi lokukulu, loku nga kona enhlengeletanweni, naswona hi xihi xikhutazo lexi nyikiwaka vamakwerhu va xinuna?

¹⁴ Ku ni xilaveko lexikulu xa Timbhoni ta xinuna hinkwato, leti khuvuriweke, leswaku ti tiendla ti fanelekela malunghelo man’wana. (1 Timotiya 3:1) Xiyimo lexi i xa xihatla. Makumu ya mafambiselo lawa ya swilo ma tshinela hi ku hatlisa. Habakuku 2:3 yi ri: “Hikuv̌a hlav̌utelo leyo ya ha ṭshamele nkari wa kona, kambe yi ta hatlisa e ku heteleleni, yi nga ka yi nga šisi. . . . Hikuv̌a yi ta endlakala ŝinene, yi nga ka yi nga hlweri.” Vamakwerhu va xinuna, xana mi nga swi kota ku endla nhluvuko leswaku mi fanelekela malunghelo man’wana entirhweni lowu wa ku risa—ku nga si fika makumu?—Tito 1:6-9.

Vurisi Bya Le Tilweni

15. Xana vanhu va Yehovha i va le tilweni hi ndlela yihi?

¹⁵ Leswaku va ta hlanganyela hi ku helela eku kurisiweni ka nhlengeletano ya Yehovha, vanhu va yena va fanele va va ni vonelo leri fambisanaka ni swa le tilweni. Xana leswi va nga swi endlisa ku yini? Kasi, ku vuriwa yini hi xiga lexi nge “swa le tilweni”? Webster’s New Twentieth Century Dictionary yi hlamusela “swa le tilweni” tanihi “ku lawula loku fambisiwaka hi Xikwembu.” Hi le ka mongo lowu laha “rixaka leri hlawuriweke” ra vanhu va Yehovha ri nga ra le tilweni. (1 Petro 2:9; Esaya 33:22) Tanihi swirho kumbe vanakulobye va rixaka rero ra le tilweni, Vakreste va ntiyiso va fanele va hanya ni ku tirha hi ku yingisa Rito ra Xikwembu ni misinya ya rona ya milawu.

16. Kahle-kahle, xana hi tikombisa njhani leswaku hi va le tilweni?

¹⁶ Muapostola Pawulo u yi hlamusela kahle ndlela leyi Vakreste va fanelaka ku va va le tilweni ha yona. Xo sungula, u ri va ‘fanele va ambala vumunhu lebyintshwa, lebyi vumbiweke hi ku ya hi ku rhandza ka Xikwembu, hi ku lulama ni ku tshembeka.’ Vumunhu bya Mukreste byi fanele byi vumbiwa hi ku landza misinya yo lulama ya nawu wa Xikwembu, leyi vekiweke eRitweni ra xona. U fanele a tshembeka eka Yehovha ni le milawini ya Yena. Endzhaku ko kombisa ndlela leyi swi nga endliwaka ha yona, Pawulo u khongotela a ku: “Leswi mi nga vana va Xikwembu lava rhandzekaka, ringetani ku fana na xona.” (Vaefesa 4:24–5:1) Hi fanele hi tekelela Xikwembu ku fana ni vana lava yingisaka. Swoleswo i vulawuri bya le tilweni bya ntiyiso, lebyi nga ni swiendlo, lebyi kombaka leswaku hi fumiwa hi Xikwembu hakunene!—Nakambe vona Vakolosa 3:10, 12-14.

17, 18. (a) Xana i mfanelo yihi leyikulu ya Xikwembu, leyi Vakreste va le tilweni va yi tekelelaka? (b) Emaritweni yakwe eka Muxe, xana Yehovha u yi kandziyisise ku yini mfanelo ya Yena leyikulu, kambe i xitsundzuxo xihi lexi a engeteleke ha xona?

¹⁷ Xana hi yihi mfanelo leyikulu ya Xikwembu, leyi hi fanelaka ku yi tekelela? Muapostola Yohane wa hlamula eka 1 Yohane 4:8 loko a ku: “Xikwembu i rirhandzu.” Endzhaku ka tindzimana ta nhungu, eka ndzimana 16, u phindha nsinya lowu wa nkoka wa nawu: “Xikwembu i rirhandzu, kutani loyi a tshamaka erirhandzwini, ú tshame eka Xikwembu, na Xikwembu xi tshame eka yena.” Murisi Lonkulu, Yehovha, i ximunhuhatwa xa rirhandzu. Varisi lava lawuriwaka hi yena va tekelela yena hi ku komba tinyimpfu ta Yehovha rirhandzu leri enteke.—Ringanisa 1 Yohane 3:16, 18; 4:7-11.

¹⁸ Mulawuri Lonkulu wa le Tilweni u tikombise eka Muxe a ri “Yehova, Yehova, Šikwembu ša tintŝalo ni v̌unene, le’ši hlwelaka ku kariha, le’ši teleke tintŝalo ni ku ṭhembeka, le’ši ṭeṭelelaka e tinšaka ta madzana ya khume, le’ši khomelaka munhu e ku homboloka, ni ku dyoha, ni šiv̌i; kambe le’ši nga lanḍuriki nanḍu wa loyi a nga na wona; le’ši baka v̌ana ni v̌atukulu e ku yisa e rišakeni ra v̌unharu, ni ra v̌umune hikwalaho ka ku dyoha ka v̌atata wa v̌ona.” (Eksoda 34:6, 7) Xisweswo Yehovha u kandziyisa matlhelo yo hambana-hambana ya mfanelo yakwe ya vulawuri lebyi hlawulekeke, rirhandzu, loko a ri karhi a tsundzuxa hi matimba leswaku u ta hi bela ku dyoha loko swi fanerile.

19. Ku hambana ni Vafarisi, xana varisi va Vakreste va fanele va endla njhani hi ndlela ya le tilweni?

¹⁹ Eka lava va nga ni swikhundlha swa vutihlamuleri enhlengeletanweni, xana ku lawuriwa hi Xikwembu swi vula yini? Yesu u vule leswi hi vatsari ni Vafarisi va le sikwini ra yena: “Va boha mindzhwalo leyo tika, va yi rhwexa emakatleni ya vanhu, kasi vona a va lavi ni ku yi ninginisa hi ritiho.” (Matewu 23:4) Vona ntshikelelo ni nsele wonghasi! Vulawuri bya le tilweni bya ntiyiso, kumbe ku fuma ka Xikwembu, byi lava ku risa ntlhambi hi ku tirhisa misinya ya rirhandzu ya milawu ya Bibele, hayi hi ku tikisela tinyimpfu hi milawu leyi nga heriki, leyi nga lo endliwa hi munhu. (Ringanisa Matewu 15:1-9.) Hi nkarhi lowu fanaka, varisi va vulawuri bya le henhla va fanele va tekelela Xikwembu hi ku engetela vurhena bya ku hlayisa ku tenga ka vandlha erirhandzwini ra vona.—Ringanisa Varhoma 2:11; 1 Petro 1:17.

20. I malunghiselelo wahi ya nhlengeletano lawa varisi va le tilweni va ma lemukaka?

²⁰ Varisi va ntiyiso va swi lemuka leswaku emasikwini lawa ya makumu, Yesu u veke nandza wo tshembeka, wa vutlharhi, leswaku a langutela swilo swakwe hinkwaswo ni leswaku moya wo kwetsima wu kongomise nandza loyi eku vekeni ka vakulu leswaku va risa tinyimpfu. (Matewu 24:3, 47; Mintirho 20:28) Hikwalaho, ku va lava lawuriwaka hi swa le tilweni swi katsa ku n’wi xixima swinene nandza loyi, malunghiselelo ya nhlengeletano lawa ma simekiweke hi nandza, ni lunghiselelo ra vakulu lava nga evandlheni.—Vaheveru 13:7, 17.

21. Xana hi xihi xikombiso lexinene lexi Yesu a xi vekeleke varisi-ntsongo?

²¹ Yesu hi yexe u veke xikombiso lexinene, nkarhi hinkwawo a lava ku kongomisiwa hi Yehovha ni Rito ra Yena. U te: “Ndzi nga ka ndzi nga tisunguleli ndzi endla xilo hi ndzexe; ndzi avanyisa hilaha ndzi byeriweke hakona; hikokwalaho, ku avanyisa ka mina ku lulamile, hikuva a ndzi lavi ku endla ku rhandza ka mina, kambe ku rhandza ka Loyi a ndzi rhumeke.” (Yohane 5:30) Varisi-ntsongo va Hosi Yesu Kreste va fanele va hlakulela xiyimo xa ku tiveka ehansi, lexi fanaka ni xexo. Loko nkulu a lava leswaku nkarhi hinkwawo Rito ra Xikwembu ri va rona ri n’wi kongomisaka, hi laha Yesu a endleke ha kona, kutani u lawuriwa hi Xikwembu hakunene.—Matewu 4:1-11; Yohane 6:38.

22. (a) Hi yihi ndlela leyi hinkwerhu hi faneleke hi endla ha yona matshalatshala yo va va le tilweni? (b) I xirhambo xihi xa musa lexi Yesu a xi nyikaka tinyimpfu?

²² Vavanuna lava khuvuriweke, endlani nhluvuko leswaku mi fanelekela malunghelo lama nga evandlheni! Hinkwenu n’wina tinyimpfu leti rhandzekaka, tiyimiseleni ku lawuriwa hi Xikwembu, tekelelani Xikwembu na Kreste hi ku kombisa rirhandzu! Onge varisi ni ntlhambi, hinkwavo va nga tiphina hi leswi va anguleke xirhambo xa Yesu lexi nge: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’win[a] yi ta kuma ku wisa; hikuva joko ra mina ra olova, ni ndzhwalo wa mina wa vevuka.”—Matewu 11:28-30.

[Nhlamuselo ya le hansi]

Xana U Nga Hlamusela?

◻ “Ntlhambi” wa Yehovha i yini, naswona wu katsa yini?

◻ Yesu u tirhe njhani tanihi “murisi lonene” hi lembe xidzana ro sungula, ni namuntlha?

◻ Xana i ntirho wihi lowukulu lowu varisi-ntsongo va wu endlaka eku khathaleleni ka ntlhambi?

◻ Hi yihi nhlamuselo-nkulu ya xiga lexi nge “swa le tilweni”?

◻ Xana Mukreste—ngopfu-ngopfu murisi ntsongo—a nga endla njhani leswaku a va la lawuriwaka hi Xikwembu?

[Xifaniso lexi nga eka tluka 20]

Yehovha u khathalela ntlhambi wakwe ku fana ni murisi la tinyiketeleke

[Xifaniso lexi nga eka tluka 23]

Ku tekelela mfanelo ya Yehovha Xikwembu ya rirhandzu i ku kombisa ku va wa le tilweni