Xana U Ta Tekeriwa eTilweni?

VANHU vo tala va tshemba leswaku va ta ya etilweni loko va fa. Kambe van’wana va anakanya leswaku va ta tekeriwa etilweni hi endlelo leri vuriwaka ku vutliwa (rapture). Xana sweswo hi swona leswi u swi languteleke?

Ku vutliwa i “ku nyamalala ka xitshuketa ka timiliyoni ni timiliyoni ta vanhu, swi nga tiviwi leswaku va ye kwihi!” Ku vula muevhangeli un’wana wa Muprotestente. Hi ku ya hi Evangelical Dictionary of Theology, rito leri nge ku “vutliwa” ri vula “ku va kereke yi hlanganisiwa na Kreste loko a vuya ra vumbirhi.”

Van’wana swa va karhata ku anakanya hi ku siya vanghana ni swirho swa ndyangu endzhaku leswaku va ya hlangana na Yesu Kreste. Hambi swi ri tano, vo tala va tshemba leswaku ku vutliwa ku fanele ku endleka. Xana ku ta endleka ke? Loko swi ri tano, ku ta endleka rini?

Mianakanyo Leyi Hambaneke Malunghana Ni Ku Vutliwa

Bibele yi kombisa leswaku ku nga si sungula Mfumo lowu tshembisiweke wa Kreste wa Gidi ra Malembe, ku ta va ni nguva leyi vuriwaka ‘nhlomulo lowukulu.’ Yesu u te: “Nhlomulo wu ta va lowukulu enkarhini wolowo; nhlomulo lowo tano a wu si va kona hi mpfhuka misava yi tumbulukile ku fikela namuntlha, naswona a wu nga ha vi kona ni siku ni rin’we.” (Matewu 24:21; Nhlavutelo 20:6) Van’wana va rhangisa ku vutliwa emahlweni ka nhlomulo lowukulu. Van’wana va langutela leswaku ku ta endleka hi nkarhi wa nhlomulo lowukulu. Van’wana vona va anakanya leswaku ku vutliwa ku ta ta endzhaku ka nhlomulo wolowo lowu nga ringanisiwiki na nchumu.

Mianakanyo ya ku vutliwa endzhaku ka nhlomulo lowukulu a yi pfumeriwa swinene ku fikela eku sunguleni ka lembe xidzana ra vu-19. Endzhaku ka kwalaho, le Nghilandi, ku humelele ntlawa lowu a wu rhangeriwa hi John Nelson Darby, khale ka mufundhisi wa Kereke ya Ireland. Yena kun’we ni Maanglican lawa a ma ri ni mianakanyo yo fana ni ya yena, va sungule ku tiviwa tanihi Mabrethren. Loko a suka ekerekeni ya yena le Plymouth, Darby u fambe a chumayela eSwitzerland ni kun’wana eYuropa. U tiyise mhaka ya leswaku ku vuya ka Kreste a ku ta humelela hi swiyimo swimbirhi. A ku ta sungula hi ku vutliwa ka le xihundleni, laha “vakwetsimi” a va ta tekeriwa ehenhla, nkarhi wa nhlomulo wa malembe ya nkombo wu nga si onha misava. Kutani Kreste a a ta humelela hi xiviri, a ri ni “vakwetsimi” lava, kutani a va ta fuma misava swin’we hi malembe ya gidi.

Darby u kandziyise mhaka yo tihambanisa ni misava, naswona lava va nga ni mianakanyo yo fana ni ya yena eku heteleleni va sungule ku tiviwa tanihi Mabrethren lama Hlawulekeke. B. W. Newton a a ri murhangeri wa ntlawa lowu hambanaka lowu a wu pfumela eka ku vutliwa, kambe hayi loku humelelaka emahlweni ka nhlomulo lowukulu. Alexander Reese, museketeri wa ku vutliwa ka le ndzhaku ka nhlomulo lowukulu u tiyise leswaku “tidyondzo ta ku Vutliwa ka le Xihundleni i nxungeto eka ntshembo wa ku Vuya ka Kreste.”

Vaseketeri va dyondzo ya ku vutliwa ka le mahlweni ka nhlomulo lowukulu va kholwa leswaku ku hambana loku ka mianakanyo i kukulu swinene lerova ku khumba “muxaka wa ntshembo wa [vona] malunghana ni ku ta ka Kreste.” Van’wana va pfumela eka “dyondzo ya ku vutliwa hi ku ya hi xiyimo,” va kholwa leswaku lava va tshembekaka swinene eka Kreste hi vona va nga ta rhanga va vutliwa, kutani lava va voyameleke eku endleni ka swilo swa misava va ta tekiwa endzhakunyana.

Mintlawa yo tala ya vaevhangeli yi twarisa ku vutliwa loku tshineleke ka Vakreste lava tshembekaka. Hambi swi ri tano, hi ku xiya mianakanyo yo hambana-hambana, xibukwana lexi humesiweke hi Kereke ya Pentekosta ya le Elim, eBritain, xi ri: “Hambi loko hi pfumela eka nxaxamelo lowukulu wa swiendlakalo leswi fambelanaka ni ku vuya ka Hosi Yesu . . . , a swi arisiwi ku hlamusela vuprofeta lebyi hi ku ya hi leswi munhu a swi pfumelaka. Vo tala va amukela xiyimo xa ku ka va nga sindzisi ku amukeriwa ka mianakanyo ya vona, va rindzela leswaku swiendlekalo swi hetisisa xiyimiso xa vuprofeta, handle ko hela mbilu.”

Rito ra Xikwembu leri huhuteriweke, ku nga Bibele, i nsinya wa nawu lowu hi faneleke ku pima ntiyiso wa vupfumeri hinkwabyo ha wona. (2 Timotiya 1:13; 3:16, 17) Kutani ke, xana yi ri yini hi ku vutliwa?