‘Ku Tekiwa U Ya Hlangana Ni Hosi’—Njhani?
KU HUNGUTEKA ka nkarhi wa mafambiselo lawa yo biha ya sweswi ya swilo ku hatlisa hi ndlela leyi nga hundzulekiki. Ku hundza ka awara, minete ni sekene yin’wana ni yin’wana, ku hi tshineta eka swiendlakalo leswi hlamarisaka leswi vhumbhiweke khale. Xana ku vutliwa hi xin’wana xa swona? Loko ku ri xin’wana xa swona, ku ta humelela rini naswona njhani?
Rito ku “vutliwa” a ri kona eBibeleni. Kambe lava pfumelaka leswaku ku kona va tshaha marito ya muapostola Pawulo eka 1 Vatesalonika 4:17 ku seketela ripfumelo ra vona. A hi kambisiseni tsalwa leri hi ku ya hi mongo wa rona. Pawulo u tsarile a ku:
“Vamakwerhu, ndzi lava leswaku mi tiva ntiyiso hi tlhelo ra lava va tietleleleke, mi ta ka mi nga vaviseki kukota van’wana lava nga riki na ku langutela. Hikuva leswi hi pfumelaka leswaku Yesu ú file, a tlhela a pfuka eku feni, hi mukhuva wolowo, hi pfumela leswaku lava tietleleleke, Xikwembu xi ta va pfuxa na Yesu eku feni, xi va vuyisa swin’we na yena. Lexi hi mi byelaka xona hi vito ra [Yehovha, NW], hi lexi: Hina hi nga ta va ha ha hanya loko Hosi yi vuya, hi nga ka hi nga rhangeli lava tietleleleke; hikuva Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi ku huwelela ka ndhuna ya tintsumi, ni ku ba ka mhalamhala ya Xikwembu, kutani lava feleke ka Kriste, va ta rhanga va pfuka eku feni; kutani hina lava hi nga ta va ha ha hanya, hi ta tlakuriwa hi ya ehenhla emapapeni swin’we na vona, hi ya hlangana na Hosi empfhukeni. Kutani hi mukhuva wolowo, hi ta va na Hosi hilaha ku nga heriki. Hikokwalaho mi fanele ku tiyisana hi marito wolawo.”—1 Vatesalonika 4:13-18.
Vandlha ra le Tesalonika a ra ha ri rintshwa swinene loko Pawulo a tsalela Vakreste va kwalaho papila ro sungula kwalomu ka 50 C.E. Swirho swa vandlha rero a swi nga tsakanga hikwalaho ka leswi van’wana va vona va ‘etleleke eku feni.’ Hambi swi ri tano, leswi Pawulo a swi tsaleke swi chavelele Vatesalonika hi ntshembo wa ku pfuka ka vafi.
“Vukona” Bya Kreste
Loko a ri karhi a tshembisa leswaku Vakreste vo tshembeka lava a va file hi nkarhi wolowo va ta pfuka, Pawulo u tlhele a ku: “Hina hi nga ta va ha ha hanya loko Hosi yi vuya, hi nga ka hi nga rhangeli lava tietleleleke.” (Ndzimana 15) Leswi xiyekaka swinene laha i marito ya muapostola malunghana ni “vukona” bya Hosi. Laha, ndzimana ya ririmi ro sungula yi tirhisa rito ra Xigriki leri nge pa·rou·siʹan, leri hi ku kongoma ri vulaka “ku va kona.”
Loko Holobye wa tiko rimbe a endzele tiko ro karhi, hi ntolovelo masiku ya vukona byakwe ma tivisiwa. Ni vukona bya Hosi Yesu Kreste byi tivisiwile. Xihondzo xo Rindza xi hambete xi nyikela vumbhoni eka swichudeni leswi nga ni timbilu letinene bya vuprofeta bya Bibele bya leswaku vukona bya Yesu eMfun’weni wa matilo byi sungule hi 1914. Swiendlakalo leswi veke kona ku sukela hi nkarhi wolowo swi tiyisekisa vukona bya Yesu lebyi nga vonakiki. (Matewu 24:3-14) Xisweswo loko a vula leswaku Vakreste van’wana lava hanyaka hi nkarhi wa vukona bya Hosi va ta “tlakuriwa [va] ya ehenhla emapapeni swin’we na vona, [va] ya hlangana na Hosi,” Pawulo a a vula leswaku vaponi volavo va ta hlangana na Kreste, ku nga ri emisaveni, kambe exivandleni xa le tilweni lexi nga vonakiki laha Yesu a tshameke kona evokweni ra xinene ra Xikwembu. (Vaheveru 1:1-3) Kambe, i vamani?
“Israel Wa Šikwembu”
Matsalwa ma vulavula swinene hi Israyele wa nyama na hi “Israel wa Šikwembu” wa moya. Vapfumeri va Vayuda ni Vamatiko hi vona a va ta vumba nhlayo leyi heleleke ya ntlawa lowu wu totiweke hi moya wo kwetsima wa Xikwembu, kumbe matimba lama tirhaka. (Vagalatiya 6:16, BX; Varhoma 11:25, 26; 1 Yohane 2:20, 27) Buku ya Nhlavutelo yi kombisa leswaku ntsengo wa Israyele wa moya i 144 000, laha hinkwavo va voniwaka va ri na Xinyimpfana, Yesu Kreste, eNtshaveni ya le tilweni ya Siyoni. Va ta va tihosi ni vaprista swin’we na Kreste etilweni. (Nhlavutelo 7:1-8; 14:1-4; 20:6) Exikarhi ka vona ku ta va ni vanhu lava a va ri emavandlheni ya le Tesalonika ni kun’wana, ku nga khathariseki leswaku i va rixaka rihi kumbe i va ndhavuko wihi.—Mintirho 10:34, 35.
Xirho xihi na xihi xa Israyele wa moya xi fanele xi hundza kun’wana xi nga si amukela hakelo ya xona ya le tilweni. Tanihi leswi Yesu a rhangeke a fa emhandzini ya nxaniso a nga si pfuxiwa ku ya hanya etilweni, xisweswo, Vakreste lava nga ni ntshembo wa le tilweni va fanele va fa va nga si kuma hakelo ya vona. (1 Vakorinto 15:35, 36) Swirho swa Israyele wa moya leswi hanyeke hi lembe xidzana ro sungula C.E. swi hundze kwalaho, ni vanhu vo tano lava hanyaka namuntlha va ta hundza kwalaho.
Endzhaku ko boxa ‘vukona bya Hosi,’ Pawulo u vulavule hi nkarhi lowu ha wona Vaisrayele va moya vo tshembeka lava feke va nga ta amukela hakelo ya vona ya le tilweni. U tsarile a ku: “Hikuva Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi mhalamhala ya Xikwembu, kutani lava feleke ka Kriste, va ta rhanga va pfuka eku feni.” (Ndzimana 16) Xisweswo, loko vukona bya Yesu tanihi Hosi byi sungula, swa fanela ku langutela leswaku ku pfuka ka lava yaka etilweni ku sungula, ku sungula hi Vaisrayele va moya lava ana se va feke va tshembekile. (1 Vakorinto 15:23) Sweswi va tirha na Yesu etilweni. Kambe ku vuriwa yini hi vatotiwa va Vakreste va nga ri vangani lava ha hanyaka emisaveni? Xana va yimele ku vutleriwa etilweni?
‘Ku Tekeriwa eTilweni’—Njhani?
Endzhaku ko vulavula hi vatotiwa va Vakreste lava feke, Pawulo u engeterile a ku: “Kutani hina lava hi nga ta va ha ha hanya, hi ta tlakuriwa hi ya ehenhla emapapeni swin’we na vona, hi ya hlangana na Hosi empfhukeni. Kutani hi mukhuva wolowo, hi ta va na Hosi hilaha ku nga heriki.” (Ndzimana 17) Lava “nga ta va [va] hanya” hi lava va nga ta va va hanya loko Kreste se a ri kona. Va ta ‘tekeriwa etilweni’ va ya hlangana na Hosi Yesu. Kambe hi laha swi veke ha kona eka Vakreste vo tshembeka vo sungula, swa boha leswaku va fa tanihi vanhu loko va ta hlangana na Kreste etilweni.—Varhoma 8:17, 35-39.
Loko a tsalela Vakreste va le Korinto, Pawulo u te: “Leswi ndzi vulaka swona, vamakwerhu, hi leswi: Nyama ni ngati swi nga ka swi nga dyi ndzhaka ya Mfumo wa Xikwembu, naswona leswi hatlaka ku onhaka swi nga ka swi nga dyi ndzhaka ya leswi nga onhakiki. Yingisani, ndzi mi byela xihundla: A hi nga fi hinkwerhu, kambe hinkwerhu hi ta hundzuriwa, hi nkarhinyana, hi ku copeta ka tihlo, eku beni ka mhalamhala ya makumu; mhalamhala yi ta twala, kutani vafi va ta pfuxiwa va hambaniseriwa makumu ni ku onhaka, kutani hina hi ta hundzuriwa.” (1 Vakorinto 15:50-52) Loko un’wana ni un’wana wa masalela ya Israyele wa moya a fa a tshembekile hi nkarhi wa vukona bya Kreste, u amukela hakelo yakwe ya le tilweni hi ku hatlisa. “Hi ku copeta ka tihlo,” u pfuxiwa tanihi xivumbiwa xa moya ivi ‘a tekeriwa etilweni’ a ya hlangana na Yesu, ivi a tirha tanihi mufumi-kulobye eMfun’weni wa matilo. Kambe ku vuriwa yini hi vagandzeri lavan’wana hinkwavo va Yehovha? Leswi makumu ya mafambiselo lawa yo biha ma tshinelaka, xana na vona va ta tekeriwa etilweni?
Ku Pona—Kambe Ku Nga Ri Hi Ku Vutleriwa eTilweni
Leswi vukona bya Yesu emfun’weni byi sunguleke hi 1914, se hi le ndzeni swinene ka ‘nkarhi wa makumu’ ya misava leyi. (Daniyele 12:4) Pawulo u tsundzuxile: “Loko ti ri ta minkarhi ni ta tinguva ta kona, vamakwerhu, a mi faneli ku tsaleriwa nchumu hi tona. Hikuva n’wina hi xiviri, ma swi tiva swinene leswaku Siku ra Hosi ri ta fika kukota khamba leri taka nivusiku. Siku vanhu va nga ta ku: ‘Ku rhulile, ku hava xo karhata’, hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n’wana; va nga ka va nga poni.” (1 Vatesalonika 5:1-3) Kambe Vakreste lava xalamukeke va ta pona. Njhani?
Ku huweleriwa ka ‘Ku rhula ni nsirhelelo!’ ku rhangela nkarhi lowu Yesu a wu vuleke ‘nhlomulo lowukulu.’ Loko yi hlamusela “ntshungu lowukulu” wa lava tshembekeke, lava nga ni ntshembo wo hanya hi laha ku nga heriki emisaveni ya paradeyisi, buku ya Nhlavutelo yi ri: “Lava, hi lava humaka eku xanisekeni lokukulu; va hlantswile tinguvu ta vona, va ti basisile hi ngati ya Xinyimpfana.” (Nhlavutelo 7:9, 14; Luka 23:43, NW) Lava, a va rindzelanga ku vutleriwa etilweni. Kambe, va ni ntshembo wa ku hanya emisaveni leyi. Leswi va tilunghiselelaka wona, va fanele va tshama va khindlimukile hi tlhelo ra moya. Xana u nga swi endlisa ku yini leswi ivi u pona makumu ya mafambiselo lawa?
U fanele u ‘tlhariha, u ambala xisirhelelo xa xifuva xa ripfumelo ni rirhandzu, ntshembo wa ku pona wu va xihuku xa wena.’ (1 Vatesalonika 5:6-8) Lowu i nkarhi wo yingisa swinene Rito ra Xikwembu ra vuprofeta, ku nga Bibele. Loko nkarhi wu ri karhi wu hundza ku kondza ku fika makumu ya mafambiselo lawa, yingisa xitsundzuxo xa Pawulo: “Mi nga sandzi nyiko yo vula Rito, kambe kambisisani hinkwaswo, mi tiya eka leswinene.” (1 Vatesalonika 5:20, 21) Xisweswo Timbhoni ta Yehovha ta ku rhamba leswaku u ta eTiholweni ta tona ta Mfumo, laha u nga hlanganyelaka na tona eku dyondzeni ka vuprofeta bya Bibele ni swivumbeko swin’wana swa Rito ra Xikwembu leri huhuteriweke.
Loko u ya u kuma vutivi lebyi kongomeke, u ta kota ku vona ku hetiseka ka xikongomelo xa Yehovha Xikwembu xo herisa valala vakwe evuakweni hinkwabyo ni ku endla misava yi va paradeyisi. Na wena, u nga va exikarhi ka lava nga ta pona nhlomulo lowukulu, u va ni lunghelo ro hoyozela timiliyoni leti nga ta pfuxeriwa evuton’wini emisaveni, hi ku va ni ripfumelo. Mawaku ntsako wo hanya ehansi ka Mfumo wa Xikwembu lowu nga emavokweni ya Yesu Kreste ni vafumi-kulobye, lava nga ta ‘tekeriwa etilweni ku ya hlangana ni Hosi’ hi ku pfuxeriwa ku hanya exivandleni xa le tilweni!
Xisweswo ke, hi wihi ntshembo wa xiviri wa Matsalwa wa vanhu lavan’wana hinkwavo lava tshembekaka? A hi ku vutleriwa etilweni. Kambe, i vutomi lebyi nga heriki emisaveni, ehansi ka ku fuma ka Mfumo wa Xikwembu.
[Xifaniso lexi nga eka tluka 7]
Lava ponaka nhlomulo lowukulu va ta hoyozela lava pfuxeriweke ku hanya emisaveni ya paradeyisi ehansi ka ku fuma ka Yesu ni lava ‘tekeriweke’ etilweni