Ha Yini Hi Papalata Ku Gandzela Swikwembu Swa Hava?

“V̌ana, tšhav̌ani ŝifaniso ŝa ŝikwembu.”—1 YOHANE 5:21, BX.

1. Ha yini vugandzeri bya Yehovha byi nga pfangananga ni vugandzeri bya swikwembu swa hava?

YEHOVHA a hi xikwembu xa nsimbhi, nsinya, kumbe ribye. A nge rhurheriwi etempeleni ya le misaveni. Leswi a nga Moya wa matimba hinkwawo, ni leswi a nga voniwiki hi vanhu, a swi koteki ku endla xifaniso xa yena. Hikwalaho, vugandzeri lebyi tengeke bya Yehovha byi fanele byi papalata ku gandzela swikwembu swa hava.—Eksoda 33:20; Mintirho 17:24; 2 Vakorinto 3:17.

2. Hi swihi swivutiso leswi lavaka leswaku hi swi kambisisa?

² Loko u ri mugandzeri wa Yehovha, kutani u nga ha vutisa, ‘Xana ku gandzela swikwembu swa hava i yini? Xana malandza ya Yehovha ma swi kotise ku yini ku swi papalata enkarhini lowu hundzeke? Naswona ha yini hi papalata ku gandzela swikwembu swa hava namuntlha?’

Leswi Ku Gandzela Swikwembu Swa Hava Ku Nga Swona

3, 4. Xana ku gandzela swikwembu swa hava ku nga hlamuseriwa njhani?

³ Hakanyingi, ku gandzela swikwembu swa hava ku katsa minkhuvo kumbe mihivahivana. Ku gandzela swikwembu swa hava i ku xixima, ku rhandza, ku phahla, kumbe ku nkhinsamela xikwembu xa hava. Naswona xikwembu xa hava i yini? I xifaniso, nchumu lowu fanekiselaka wun’wana, kumbe mfungho lowu ku tinyiketeriwaka eka wona. Hakanyingi, ku gandzela swikwembu swa hava ku endliwa eka matimba lama tlakukeke ya xiviri kumbe lama ngo kumbeteriwa, lawa ku tshembiwaka leswaku ma hanya (munhu, xiharhi, kumbe nhlangano). Kambe ku gandzela swikwembu swa hava ku nga endliwa hi ku tirhisa swilo leswi nga hanyiki (ntamu kumbe nchumu lowu nga hanyiki wa ntumbuluko).

⁴ EMatsalweni, marito ya Xiheveru lama vulavulaka hi swikwembu, ma tala ku kombisa vuhava, kumbe ma va marito ya ku khovolela. Man’wana ya lawa i marito lama hundzuluxeriweke va ku “xifaniso lexi vatliweke” (kahle-kahle, i nchumu lowu nga lo vatliwa); “xivumbeko, xifaniso kumbe xifaniso xa xikwembu” (lexi vumbiweke kumbe ku chuluriwa); “xikwembu lexi chavisaka”; “xikwembu xa hava” (kahle-kahle, swi vula vuhava); ni “xikwembu lexi nyenyetsaka.” Rito ra Xigriki leri nge eiʹdo·lon ri hundzuluxeriwa ri ku “xikwembu xa hava.”

5. Ha yini ku nga vuriwaka leswaku a hi swifaniso hinkwaswo leswi nga swikwembu swa hava?

⁵ A hi swifaniso hinkwaswo leswi nga swikwembu swa hava. Xikwembu hi xiviri, xi byele Vaisrayele leswaku va endla tikerubimi timbirhi ta nsuku, va ti endlela areka ya ntwanano ni ku rhungelela swifanekiselo swa swivumbiwa swoleswo swa moya exifunengetweni lexa le ndzeni, xa tinguvu ta khume ta tabernakele, ni le ngubyeni leyi hambanisaka Vukwetsimelo ni Vukwetsimisiso. (Eksoda 25:1, 18; 26:1, 31-33) I vaprista lava a va tirha kwalaho ntsena lava a va vona swifanekiselo leswi, leswi a swi tirha ngopfu-ngopfu ku va xifaniso xa tikerubimi ta le tilweni. (Ringanisa Vaheveru 9:24, 25.) Swi le rivaleni leswaku swifanekiselo swa le tabernakeleni swa tikerubimi a swi nga fanelanga ku xiximiwa, tanihi leswi tintsumi leti lulameke a ti nga ta pfumela ku gandzeriwa.—Vakolosa 2:18; Nhlavutelo 19:10; 22:8, 9.

Langutelo Ra Yehovha Hi Ku Gandzela Swikwembu Swa Hava

6. Xana Yehovha u ku languta njhani ku gandzela swikwembu swa hava?

⁶ Malandza ya Yehovha ma papalata ku gandzela swikwembu swa hava hikuva u venga hinkwavo lava swi gandzelaka. Xikwembu xi lerise Vaisrayele leswaku va nga endli swifaniso swi va nchumu wa ku wu xixima ni ku wu gandzela. EMilawini ya Khume ku kumeka marito lama nge: “U nga ṭhuki u tiendlela šifaniso le’ši v̌atliweke, ni loko ši ri šifaniso šihi ni šihi ša ŝilo le’ŝi nge henhla e tilweni, ni loko ši ri ša ŝilo le’ŝi nge hansi e misav̌eni, ni loko ši ri ša ŝilo le’ŝi nge matini, e hansi ka misav̌a; u nga ṭhuki u ŝi nkhinsamela, ni loko ku ri ku ŝi tirela; hikuv̌a hi mina Yehova, Šikwembu ša wena, ša rilav̌eta, le’ši baka v̌ana hikwalaho ka ku homboloka ka v̌atŝari v̌a v̌ona, ku yisa e rišakeni ra v̌unharu ni ra v̌umune ka la’v̌a nḍi v̌engaka; kambe nḍi ṭeṭelela la’v̌a nḍi ranḍaka, la’v̌a hlayisaka milawu ya mina e ku yisa e rišakeni ra khume ra madzana.”—Eksoda 20:4-6.

7. Ha yini Yehovha a ala magandzelelo hinkwawo ya swikwembu swa hava?

⁷ Ha yini Yehovha a ale magandzelelo hinkwawo ya swikwembu swa hava? Ngopfu-ngopfu hi leswi a lavaka ku tinyiketela loku heleleke, hi laha swi kombisiweke ha kona laha henhla enawini wa vumbirhi wa Milawu ya Khume. Tlhandla-kambirhi, u vule leswi hi muprofeta wakwe Esaya: “Hi mina Yehova, hi rona v̌ito ra mina, nḍi nga ka nḍi nga nyiki uṅwana e ku v̌onakala ka mina, ni ŝifaniso e ku v̌ongiwa ka mina.” (Esaya 42:8) Ku gandzela swikwembu swa hava ku tshame ku phasa Vaisrayele lerova va kala va “tlhav̌ela ŝikwembu ŝa mav̌unwa e v̌ana v̌a v̌ona v̌a v̌av̌anuna ni v̌anhwanyana v̌a v̌ona.” (Pisalema 106:36, 37) Vagandzeri va swikwembu swa hava a va kaneti ntsena leswaku Yehovha i Xikwembu xa ntiyiso, kambe va tlhela va endla leswi laviwaka hi Nala lonkulu, Sathana, swin’we ni mademona.

Ku Tshembeka eNdzingweni

8. I ndzingo wihi lowu a wu langutane ni Vaheveru lavanharhu, Xadraka, Mexaka, na Abedi-Nego?

⁸ Ku tshembeka eka Yehovha ku tlhela ku hi endla leswaku hi papalata ku gandzela swikwembu swa hava. Leswi swi kombisiwa hi xiendlakalo lexi tsariweke eka Daniyele ndzima ya vu-3. Leswaku a khangula xifaniso lexikulu xa nsuku, lexi a xi yimisile, Nebukadnetsara, hosi ya Babilona u hlengelete vatirhela-mfumo va yena. Xileriso xakwe a xi katsa Xadraka, Mexaka na Abedi-Nego—valawuri vanharhu va Vaheveru va ndzawulo ya xifundzha xa Babilona. Hinkwavo lava a va ri kona a va fanele va nkhinsama emahlweni ka xifaniso loko ku yimbiwa swichayachayana swo karhi. Lowu a wu ri ndzingo wa xikwembu xa xiviri xa Babilona, Sathana, wo endla Vaheveru lavanharhu leswaku va nkhinsama emahlweni ka xifaniso lexi yimelaka Mfumo wa Babilona. Ehleketa na wena u ri kwalaho.

9, 10. (a) Xana Vaheveru lavanharhu va teke goza rihi, naswona va hakeriwe hi ndlela yihi? (b) I xikhutazo xihi lexi Timbhoni ta Yehovha ti xi kumaka endleleni leyi tekiweke hi Vaheveru lavanharhu?

⁹ Vonani! Vaheveru lavanharhu va lo yima. Va tsundzuka nawu wa Xikwembu lowu va alelaka ku endla ni ku gandzela swikwembu swa hava kumbe swifaniso leswi vatliweke. Nebukadnetsara u va lerise ra makumu—nkhinsamani kumbe mi fa! Kambe hi ku tshembeka eka Yehovha, va te: “Loko ŝi nga endleka leŝaku Šikwembu ša hina leši hi ši tirelaka, ši hi ponisa, ši ta hi ponisa e kheleni ra nḍilo lo’wo lev̌a ni v̌okweni ra wena, hosi. Ni loko ŝi nga ri ŝeŝo, tiv̌a, wena hosi, leŝaku hi nga ka hi nga tireli ŝikwembu ŝa wena, hi nga ka hi nga nkhinsami e mahlweni ka šifaniso ša nsuku leši u ši yimiseke.”—Daniyele 3:16-18.

¹⁰ Malandza lawa yo tshembeka ya Xikwembu ma cukumeteriwa endzilweni lowo leva. Hi ku hetiwa matimba hi ku vona vanhu va mune va famba endzilweni, Nebukadnetsara u vitane Vaheveru lavanharhu, kutani va huma va nga vavisekanga. Xisweswo, hosi yi huwelela yi ku: “A ku ḍunisiwe Šikwembu ša Šadrak, na Mešak, na Abed-nego, le’ši rumeke nṭumi ya šona [munhu wa vumune ekheleni ra ndzilo], ši hlayisile malanḍa ya šona la’ma ši ṭhembeke, la’ma tluleke ku lerisa ka hosi; v̌a ṭhiketile mmiri ya v̌ona leŝaku v̌a nga ṭhuki v̌a tirela ni ku khongela šikwembu šiṅwana, loko ši nga ri Šikwembu ša v̌ona. . . . A ku na Šikwembu šimbe le’ši nga ponisaka hi mukhuv̌a wolowo.” (Daniyele 3:28, 29) Ku hlayisa vutshembeki ka Vaheveru lavanharhu ku khutaza Timbhoni ta Yehovha ta siku ra namuntlha leswaku ti tshembeka eka Xikwembu, ti hlayisa vukala-tlhelo emisaveni, ni ku papalata ku gandzela swikwembu swa hava.—Yohane 17:16.

Ku Tsandzeka Ka Swikwembu Swa Hava eHubyeni

11, 12. (a) Xana i mhaka yihi leyi khumbaka Yehovha ni swifaniso swa swikwembu swa hava leyi tsariweke hi Esaya? (b) Xana swikwembu swa matiko swi endle yini loko swi tlhontlhiwa hi Yehovha?

¹¹ Xivangelo xin’wana xo papalata ku gandzela swikwembu swa hava hi leswaku ku xixima swikwembu swa hava a swi pfuni nchumu. Hambi leswi swikwembu swin’wana swa hava leswi endliweke hi vanhu swi nga ha vonakaka onge swa hanya—leswi hakanyingi swi nga ni nomu, mahlo, ni tindleve—a swi swi koti ku vulavula, ku vona kumbe ku twa, naswona a swi koti ku va endlela nchumu vagandzeri va swona. (Pisalema 135:15-18) Leswi swi kombisiwe hi lembe xidzana ra vunhungu B.C.E., loko muprofeta wa Xikwembu a tsala eka Esaya 43:8-28 leswi kahle-kahle swi nga mitengo ya Yehovha ni swifaniso swa swikwembu swa hava. Eka yona, Israyele, vanhu va Xikwembu, u yime tlhelo rin’we, kutani matiko ya misava ma yima hi tlhelo rin’wana. Yehovha u tlhontlhe swikwembu swa mavunwa swa matiko wolawo leswaku swi vula “le’ŝi bvumbiweke ku sunguleni,” ku nga ku profeta swi nga hoxisi. A xi kona lexi a xi ta profeta tano. Loko a hundzukela evanhwini vakwe, Yehovha u te: “Mi timboni ta mina . . . hi mina Šikwembu.” Matiko lawa a a ma nga ta swi kota ku kombisa leswaku swikwembu swa wona swi ve kona emahlweni ka Yehovha kumbe leswaku swi nga profeta. Kambe Yehovha u vhumbhe ku lovisiwa ka Babilona ni ku ntshunxiwa ka vanhu vakwe lava a va ri evukhumbini.

¹² Ku tlula kwalaho, hi laha swi hlamuseriwaka ha kona eka Esaya 44:1-8, malandza ya Xikwembu lama kutsuriweke a ma ta vula leswaku i ‘ya Yehovha.’ Yena hi xiviri u te: “Hi mina lo’wo ranga ni lo’wa makumu, e handle ka mina a ku na šikwembu.” Ku hava vumbhoni lebyi a byi ta huma eka swikwembu swa hava swa swifaniso. Nakambe Yehovha u vulavule ni vanhu va yena a ku: “A hi ṅwina timboni ta mina šana? Šana ku ni Šikwembu e handle ka mina? A ku na riṅwana ribye le’rikulukumba.”

13. Xana ku gandzela swikwembu swa hava ku kombisa yini mayelana ni loyi a swi gandzelaka?

¹³ Nakambe hi papalata ku gandzela swikwembu swa hava hikuva ku hlanganyela eka swona swi komba ku pfumala vutlharhi. Hi xiphemu xa murhi lexi a xi hlawulaka, mugandzeri wa swikwembu swa hava u endla xikwembu a xi gandzela, hi xiphemu lexin’wana u tshivela ndzilo wo sweka swakudya swa yena. (Esaya 44:9-17) Vona vuphukuphuku byonghasi! Muendli ni muhisekeri wa swifaniso swa swikwembu swa hava u tlhela a khomiwa hi tingana hikwalaho ko tsandzeka ku nyika vumbhoni lebyi khorwisaka, lebyi tiyisaka vukwembu bya swona. Kambe Vukwembu bya Yehovha a byi kanakanisi, hikuva a nga vhumbhanga ku ntshunxiwa ka vanhu va yena eBabilona ntsena kambe u tlhele a endla ku ntshunxiwa koloko leswaku ku humelela. Yerusalema wu tlhele wu akiwa, miti ya Yuda yi akiwile nakambe, naswona “šiwa” xa Babilona—Nambu wa Yufrata—xi phyile xi nga ha vi xisirhelelo. (Esaya 44:18-27) Hi laha Xikwembu xi nga tlhela xi vhumbha ha kona, Korexe wa Muperesi u hlule Babilona.—Esaya 44:28–45:6.

14. Ehubyeni ya le Henhla ya Vuako Hinkwabyo, i yini leswi nga ta kombisiwa hi laha ku nga heriki?

¹⁴ Swikwembu-kati swa hava swi hluriwe eku tengisaneni koloko ka vukwembu. Naswona leswi weleke Babilona i ntiyiso leswaku swi ta wela muyimeri wa yena wa manguva lawa, Babilona Lonkulu, mfumo wa misava wa vukhongeri bya mavunwa. Yena ni swikwembu swakwe hinkwaswo, ni mixakaxaka ya vukhongeri, ni swilo leswi hundzukeke swikwembu swa hava, ku nga ri khale swi ta nyamalalela makumu. (Nhlavutelo 17:12–18:8) EHubyeni ya le Henhla ya Vuako Hinkwabyo, hi nkarhi wolowo ku ta kombisiwa hi laha ku nga heriki leswaku Yehovha a ri swakwe, i Xikwembu lexi hanyaka xa ntiyiso, ni leswaku u hetisisa Rito rakwe leri profetiweke.

Ku Tlhaveriwa Mademona

15. Xana moya wo kwetsima ni huvo leyi fumaka ya lembe xidzana ro sungula yi kombise yini mayelana ni vanhu va Yehovha ni ku gandzela swikwembu swa hava?

¹⁵ Nakambe vanhu va Yehovha va papalata ku gandzela swikwembu swa hava hikuva va kongomisiwa hi moya wa Xikwembu ni nhlengeletano ya xona. Huvo leyi fumaka ya malandza ya Yehovha ya lembe xidzana ro sungula yi byele Vakreste-kulobye yi ku: “Moya lowo Kwetsima swin’we na hina, hi vonile leswaku a hi nga mi rhwexi ndzhwalo wun’wana, loko wu nga ri wa tifanelo leti: Hileswaku mi tshika tinyama leti tlhaveriweke swikwembu swa hava, mi nga dyi ngati ni leswi vanhu va swi dlayeke hi ku swi tlimba minkolo, mi tshika ni vuoswi; loko mi fularhela swilo sweswo, mi ta va mi endlile leswinene. Salani hi ku rhula!”—Mintirho 15:28, 29.

16. Hi marito ya wena n’wini, u nga swi hlamusela njhani leswi Pawulo a swi vuleke mayelana ni swilo leswi tlhaveriweke swikwembu swa hava?

¹⁶ Xivangelo xin’wana xa ku tivonela ku gandzela swikwembu swa hava i ku papalata vudemona. Mayelana ni Xilalelo xa Hosi, muapostola Pawulo u byele Vakreste va le Korinto a ku: “Chavani ku phahla swikwembu swa hava. . . . Xinwelo xa minkateko lexi hi xi nkhensaka, xana a xi vuli leswaku hi ni ku hlangana swin’we ni ngati ya Kriste xana? Ni xinkwa lexi hi xi phemaka, xana a xi vuli leswaku hi ni ku hlangana swin’we ni miri wa Kriste xana? Leswi xinkwa xi nga xin’we, hina lava hi nga lavo tala, hi miri wun’we; hikuva hinkwerhu hi averiwa xinkwa xin’we. Anakanyani maendlele ya Vaisraele. Xana lava dyaka swakudya leswi humeseriweke Xikwembu egandzelweni, a va hlanganisiwi na xona Xikwembu egandzelweni ra kona ke? Xana hi marito lawa, ndzi lava ku vula yini ke? Xana ndzi ri, swakudya leswi humeseriweke swikwembu swa hava, swi ni nchumu wun’wana eka swona ke? Hambi swi ri swikwembu swa kona, xana swi ni nchumu wun’wana eka swona ke? E-e, ku hava! Kambe ndzi ri: Loko vamatiko va gandzela, va gandzela mademona, a va gandzeli Xikwembu. Kutani a ndzi lavi leswaku mi va ni vunakulobye ni mademona. A swi endleki leswaku mi nwela exinwelweni xa Hosi ni le xinwelweni xa mademona. A swi endleki leswaku mi dya etafuleni ra Hosi ni le tafuleni ra mademona. Xana hi lava ku hlundzukisa Hosi ke? Xana ha yi tlula hi matimba ke?”—1 Vakorinto 10:14-22.

17. Hi lembe xidzana ro sungula C.E., xana hi le ka swiyimo swihi laha Mukreste a a ta dya nyama leyi tlhaveriweke swikwembu swa hava, naswona hikwalaho ka yini?

¹⁷ Xiphemu xa xiharhi a xi nyikiwa xikwembu xa hava, xiphemu xin’wana xi ya eka vaprista, kutani xin’wana xi nyikiwa mugandzeri leswaku a endla nkhuvo. Hambi swi ri tano, xiphemu xa nyama yoleyo xi nga ha xavisiwa hi vaxavisi va nyama. A swi nga ri vutlharhi eka Mukreste ku va a ya etempeleni ya swikwembu swa hava leswaku a ya dya nyama hambi loko a nga dyeli ku hlayisa mihivahivana, hikuva leswi a swi ta khunguvanyisa van’wana kumbe ku n’wi kokela evugandzerini bya mavunwa. (1 Vakorinto 8:1-13; Nhlavutelo 2:12, 14, 18, 20) Ku tlhavela xikwembu xa hava xiharhi a swi nga yi cinci nyama, hikwalaho Mukreste a a yi xava yin’wana eka vaxavisi va nyama. Nakambe a a nga fanelanga ku vutisa leswaku nyama leyi va n’wi phameleke yona emutini yi huma kwihi. Kambe loko un’wana a ku yi “tlhav̌eriwe ŝifaniso,” a a nga ta yi dya, leswaku a papalata ku khunguvanyisa un’wana ni un’wana.—1 Vakorinto 10:25-29.

18. Xana lava dyaka leswi tlhaveriweke swikwembu swa hava a va katseka njhani eka mademona?

¹⁸ Hakanyingi a ku ehleketiwa leswaku endzhaku ka ku endla xitlhavelo, xikwembu xi va xi ri enyameni ivi xi nghena emirini wa lava yi dyaka enkhubyeni wa lava xi gandzelaka. Tanihi leswi vanhu lava a va dya swin’we a va boha vuxaka exikarhi ka vona, xisweswo lava a va hlanganyela ku dya nyama ya timhamba a a va ri ni xiphemu ealtarini naswona a va ri ni xinakulobye ni xikwembu xa mademona lexi fanekiseriweke hi xifaniso. Hi ku gandzela xikwembu xexo xa hava, mademona ma hambukise vanhu eku gandzeleni ka Xikwembu xin’we xa ntiyiso. (Yeremiya 10:1-15) A swi hlamarisi leswi vanhu va Yehovha a va fanele ku hambeta va tivonela eka swilo leswi tlhaveriweke swikwembu swa hava! Ku tshembeka eka Xikwembu, ku amukela ku kongomisiwa hi moya wa xona wo kwetsima ni nhlengeletano ya xona, ni ku tiyimisela ku papalata ku tinghenisa eka mademona, na swona swi kombisa ku va ni nsusumeto wa matimba wo papalata ku gandzela swikwembu swa hava namuntlha.

Ha Yini Hi Fanele Hi Tivonela?

19. I muxaka wihi wa ku gandzela swikwembu swa hava lowu a wu ri kona le Efesa?

¹⁹ Vakreste va hisekela ku tivonela ku gandzela swikwembu swa hava hikuva ku ni magandzelelo yo tala, naswona hambi xiendlo xin’we xa magandzelelo ya swikwembu swa hava xi nga landzula ripfumelo ra vona. Muapostola Yohane u byele vapfumeri-kulobye a ku: “Tšhav̌ani ŝifaniso ŝa ŝikwembu.” (1 Yohane 5:21, BX) Xitsundzuxo lexi a xi laveka hikuva a va rhendzeriwe hi magandzelelo yo tala ya swikwembu swa hava. Yohane u tsale a ri Efesa, muti lowu ngheneke wu helela emintirhweni ya masalamusi ne mintsheketweni ya swikwembu-kati swa mavunwa. Efesa wu na xin’wana xa swihlamariso swa nkombo emisaveni—ku nga tempele ya Artemis, vuchavelo bya swigevenga tlhelo ntsindza wo phahlela swilo leswi nyameke. Heracleitus mutivi wa filosofi wa le Efesa u fanise ndlela ya munyama leyi yaka ealtarini ya tempele yoleyo ni munyama wa ku va la hombolokeke, naswona u vone ku tikhoma ka le tempeleni ku bihe ku tlula lokuya ka swivandzana. Xisweswo, Vakreste va le Efesa a va fanele ku yima va tiya leswaku va lwisana ni vudemona, ku tikhoma loko biha, ni ku gandzela swikwembu swa hava.

20. Ha yini a swi fanerile leswaku ku papalatiwa hambi ku gandzelanyana kutsongo ka swikwembu swa hava?

²⁰ Vakreste va fanele va tiyimisela hi matimba leswaku va papalata hambi ku ri ku gandzelanyana katsongo ka swikwembu swa hava, hikuva ku gandzelanyana Diyavulosi kan’we ku ta tiyisa mphikamakaneta yakwe ya leswaku vanhu va nge swi koti ku tshama va tshembekile eka Xikwembu loko va ri endzingweni. (Yobo 1:8-12) Loko a komba Yesu “mimfumo hinkwayo ya misava ni ku dzuneka ka yona,” Sathana u te: “Swilo leswi hinkwaswo ndzi ta ku nyika swona loko u ndzi nkhinsamela, u ndzi gandzela.” Ku ala ka Kreste ku seketele tlhelo ra Yehovha ra mphikamakaneta ya vuhosi bya vuako hinkwabyo ni ku komba leswaku Diyavulosi i muhembi.—Matewu 4:8-11; Swivuriso 27:11.

21. Malunghana ni mufumi wa Rhoma, i yini lexi Vakreste va ntiyiso va aleke ku xi endla?

²¹ Valandzeri va Yesu vo sungula na vona a a va nga ta endla xiendlo xo gandzela, va seketela mphikamakaneta ya Sathana. Hambi leswi a va xixima kahle “tihosi” ta hulumendhe, a va nga ta hisa mirhi ya risuna leswaku va xixima mufumi wa Rhoma, hambi loko swi ta nghenisa vutomi bya vona ekhombyeni. (Varhoma 13:1-7) Emhakeni leyi Daniel P. Mannix u tsale a ku: “Eka Vakreste volavo, vatsongo va tlhentlhile, hambi leswi altari leyi nga ni ndzilo lowu pfurhaka, a yi tala ku vekiwa erivaleni leswaku swi va olovela. Lexi mubohiwa a a fanela ku xi endla, a ku ri ku hisa mirhi ya risuna emalangavini, naswona a a nyikiwa Xitifiketi xa Magandzelo ivi a ntshunxiwa. Nakambe a a hlamuseriwa kahle leswaku a nga gandzeli mufumi; ntsena o amukela mfanelo ya mufumi yoloye leyi humaka etilweni leswaku a va murhangeri wa mfumo wa Rhoma. Hambi swi ri tano, ku hava Vakreste lava tirhiseke nkarhi wolowo leswaku va baleka.” (Those About to Die, tluka 137) Loko wo ringiwa tano, xana a wu ta ti ala hi ku helela tindlela hinkwato ta ku gandzela swikwembu swa hava?

Xana U Ta Ku Papalata Ku Gandzela Swikwembu Swa Hava Ke?

22, 23. Ha yini u fanele ku papalata ku gandzela swikwembu swa hava?

²² Kahle-kahle, Vakreste va fanele va papalata tindlela hinkwato ta ku gandzela swikwembu swa hava. Yehovha u lava ku tinyiketela loku heleleke. Vaheveru lavaya vanharhu va veke ntila lowunene hi ku ala ku nkhinsamela xifaniso lexikulu lexi vekiweke hi Nebukadnetsara hosi ya Babilona. Eku tengiweni ka nandzu wa misava hinkwayo loku vikiweke hi muprofeta Esaya, Yehovha a ri swakwe u kombisiwe a ri Xikwembu xa ntiyiso, lexi hanyaka. Timbhoni takwe ta Vakreste vo sungula a a ti fanele ku hambeta ti tivonela eka swilo leswi tlhaveriweke swikwembu swa hava. Vo tala lava tshembekeke exikarhi ka vona, a va pfumelanga ku hluriwa hi ntshikilelo wo va va gandzela swikwembu swa hava hambi hi ndlela yi ri yin’we leyi a yi ta vanga leswaku va nga tshembeli ka Yehovha.

²³ Kutani ke, xana wena wa ku papalata ku gandzela swikwembu swa hava? Xana u tinyiketela hi ku helela eka Xikwembu? Xana wa byi seketela vulawuri bya Yehovha ni ku n’wi tlakusa tanihi Xikwembu xa ntiyiso, lexi hanyaka? Loko swi ri tano, u fanele u tiyimisela ku ya emahlweni u yima u tiya leswaku u lwisana ni ku gandzela swikwembu swa hava. Kambe hi tihi tinhla tin’wana ta Matsalwa leti nga ku pfunaka ku papalata magandzelelo hinkwawo ya swikwembu swa hava?

Xana Mianakanyo Ya Wena Hi Yini?

◻ Xana ku gandzela swikwembu swa hava i yini?

◻ Ha yini Yehovha a ala magandzelelo hinkwawo ya swikwembu swa hava?

◻ I goza rihi leri Vaheveru lavanharhu va ri tekeke mayelana ni ku gandzela swikwembu swa hava?

◻ Xana lava dyaka swilo leswi tlhaveriweke swikwembu swa hava va hlangana njhani ni mademona?

◻ Ha yini hi fanele ku papalata ku gandzela swikwembu swa hava?

[Xifaniso lexi nga eka tluka 23]

Hambi leswi vutomi bya vona byi xungetiweke, Vaheveru lavanharhu a a va nga ta gandzela swikwembu swa hava