Swivutiso Swa Vahlayi
Eka 1 Petro 4:3, hi hlaya leswaku Vakreste van’wana va tshame va hlanganyela eka “ku gandzela swifaniso swa hava loku hambaneke ni nawu.” Xana vugandzeri hinkwabyo bya swifaniso swa hava a byi hambananga ni nawu, byi soriwa ni ku siveriwa hi Xikwembu?
Ina, hi ku ya hi langutelo ra Xikwembu, vugandzeri hinkwabyo bya swifaniso swa hava byi hambane ni nawu. Lava lavaka ku amukeriwa hi xona a va nge gandzeli swifaniso swa hava.—1 Vakorinto 5:11; Nhlavutelo 21:8.
Hambiswiritano, swi vonaka onge muapostola Petro a a kombetela eka vugandzeri bya swifaniso swa hava hi langutelo rin’wana. Xivangelo xin’wana hileswaku exikarhi ka matiko ya khale vugandzeri bya swifaniso swa hava a byi tolovelekile naswona a ku ri hava nawu lowu byi sivelaka. Hi leswaku, nawu wa tiko a wu nga byi siveli vugandzeri byo tano bya swifaniso swa hava. Vugandzeri byin’wana bya swifaniso swa hava a byi ri xiphemu xa nawu wa tiko kumbe wa hulumendhe. Hi mukhuva wolowo, van’wana va hlanganyerile eku ‘gandzeleni ka swifaniso swa hava handle ko siveriwa hi nawu’ loko va nga si va Vakreste. (New World Translation, nkandziyiso wa 1950) Hi xikombiso, swi nga ha xiyiwa leswaku Hosi Nebukadnetsara ya le Babilona u veke xifaniso xa swikwembu swa hava xa nsuku, kambe malandza ya Yehovha ku nga Xadraka, Mixaka na Abedinigo va ale ku xi nkhisamela.—Daniyele 3:1-12.
Hi langutelo rin’wana, mikhuva yo tala ya vugandzeri bya swifaniso swa hava a yi katsa ni swiendlo leswi lwisanaka ni nawu wun’wana ni wun’wana wa ntumbuluko kumbe ku tikhoma lokunene loku vangeriwaka hi ripfalo leri hi tswariweke na rona. (Varhoma 2:14, 15) Muapostola Pawulo u tsarile hi swiendlo leswi “lwisanaka ni ntumbuluko” ni “leswi thyakeke” naswona hakanyingi leswi swi sunguriwe eka mikhuva ya vukhongeri. (Varhoma 1:26, 27) Vavanuna ni vavasati lava hlanganyelaka eku gandzeleni ka swifaniso swa hava ku nga ku gandzela loku hambaneke ni nawu a va nga wu yingisi nawu lowu lwisanaka ni ntumbuluko wa vanhu. Hakunene a swi fanela leswaku lava hundzukaka Vakreste va tshika swiendlo sweswo leswo biha.
Ku engetela kwalaho, vugandzeri byo tano bya swifaniso swa hava lebyi a byi tele exikarhi ka lava nga riki Vayuda a byi soriwa hi Yehovha Xikwembu. Xisweswo a byi nga ri enawini.a—Vakolosa 3:5-7.
[Nhlamuselo ya le hansi]
a Ndzimana ya Xigriki leyi nga eka 1 Petro 4:3 hi ku kongoma yi vula “vugandzeri bya swikwembu swa hava lebyi nga riki enawini.” Xivulwa lexi xi hundzuluxeriwe hi tindlela to hambana-hambana eTibibeleni ta Xinghezi to tanihi leyi nge “vugandzeri bya swikwembu swa hava lebyi nga riki enawini,” “vugandzeri bya swifaniso swa hava lebyi yirisiweke,” ni “vugandzeri bya swikwembu swa hava byo kala nawu.”