Papalata Magandzelelo Hinkwawo Ya Swikwembu Swa Hava
“Tempele ya Xikwembu yi ni vunakulobye byihi ni swikwembu swa hava ke?”—2 VAKORINTO 6:16.
1. I yini leswi fanekiseriweke hi tabernakele ni tempele ya Israyele?
YEHOVHA u ni tempele leyi ku nga tshamiki swikwembu swa hava eka yona. Yi fanekiseriwe hi tabernakele ya Israyele leyi akiweke hi Muxe ni hi titempele leti endzhaku ti akiweke eYerusalema. Miako yoleyo a a yi yimela “ntsong[a] wa xiviri,” tempele leyikulu ya moya ya Yehovha. (Vaheveru 8:1-5) Tempele yoleyo i lunghiselelo ro tshinelela Xikwembu hi xisekelo xa gandzelo ra nkutsulo ra Yesu Kreste.—Vaheveru 9:2-10, 23.
2. I vamani lava veke timhandzi etempeleni leyikulu ya moya ya Xikwembu, naswona i xiyimo xihi lexi kumiwaka hi ntshungu lowukulu?
2 Mukreste un’wana ni un’wana la totiweke u va “mhandze leyikulu eTempeleni ya Xikwembu,” a kuma ndhawu etilweni. “Ntshungu lowukulu” wa vagandzeri van’wana va Yehovha wu “tirhela [Xikwembu]” laha a ku yimeriwa hi xivava xa Vamatiko etempeleni leyi nga tlhela yi akiwa hi Heroda. Hikwalaho ka ripfumelo egandzelweni ra Yesu, wu ni xiyimo xo lulama lexi xi wu endlaka wu hlayiseka “eku xanisekeni lokukulu.”—Nhlavutelo 3:12; 7:9-15.
3, 4. Xana vandlha ra Vakreste lava totiweke ri fananisiwa na yini emisaveni, naswona i thyaka rihi leri ri faneleke ku hambana na rona?
3 Vandlha ra Vakreste lava totiweke leri nge misaveni ri tlhela ri fanisiwa ni tempele yin’wana leyi eka yona ku nga gandzeriwiki swikwembu swa hava. Eka volavo lava ‘funghiweke hi moya wo kwetsima,’ muapostola Pawulo u te: “Mi akiwa ehenhla ka masungulo lama vekiweke hi vaapostola ni vaprofeta, ribye lerikulu ra masungulo a ri yena Kriste Yesu hi xiviri. Ha yena, yindlu hinkwayo yi hlangana yi tiya, yi kula ku endla tempele leyo hlawuleka eHosini; eka yena na n’wina mi akiwa kun’we ni van’wana, ku endla yindlu laha Xikwembu xi tshamaka kona hi Moya wa xona.” (Vaefesa 1:13; 2:20-22) Lava va 144 000 lava funghiweke i “maribye lama hanyaka,” lama ‘akiweke ma endla yindlu ya moya leswaku ma va vaprista vo kwetsima.’—1 Petro 2:5; Nhlavutelo 7:4; 14:1.
4 Leswi vaprista-ntsongo lava va nga ‘yindlu ya Xikwembu,’ a xi pfumeli leswaku tempele leyi yi nyamisiwa. (1 Vakorinto 3:9, 16, 17) Pawulo u tsundzuxile a ku: “Mi nga rhwaleni mpingu wun’we ni lava nga riki vapfumeri; hikuva ku tirhisana ku kwihi exikarhi ka ku lulama ni ku homboloka xana? Kumbe ku vonakala ku ni ku yelana kwihi ni munyama ke? Xana Kriste na Lowo biha, va nga hela hi ku twanana xana? Kumbe mupfumeri a nga fambelana hi mukhuva wihi ni loyi a nga riki mupfumeri xana? Tempele ya Xikwembu yi ni vunakulobye byihi ni swikwembu swa hava ke?” Vakreste lava totiweke, lava nga va “Hosi ya matimba hinkwawo,” va fanele va fularhela ku gandzela swikwembu swa hava. (2 Vakorinto 6:14-18) Lava ntshungu lowukulu na vona va fanele va papalata magandzelelo hinkwawo ya swikwembu swa hava.
5. Hi ku tiva leswaku Yehovha u faneriwa hi ku tinyiketela loku heleleke, xana Vakreste va ntiyiso va endla yini?
5 Ku ni magandzelelo ya swikwembu swa hava lawa ma olovaka ku ma vona ni lama nga oloviki. Kambe, ku gandzela swikwembu swa hava a swi vuli ku gandzela swikwembu kumbe swikwembu-kati swa mavunwa ntsena. I ku gandzeriwa ka xin’wana ni xin’wana kumbe un’wana ni un’wana ku nga ri Yehovha. Tanihi Hosi ya Vuako Hinkwabyo, hi ndlela leyinene u lava vugandzeri lebyi yisiwaka eka yena ntsena naswona bya n’wi fanela. (Deteronoma 4:24) Hi ku tiva leswi, Vakreste va ntiyiso va yingisa switsundzuxo swa Matsalwa leswaku va fularhela magandzelelo hinkwawo ya swikwembu swa hava. (1 Vakorinto 10:7) A hi kambisiseni magandzelelo man’wana ya swikwembu swa hava lawa ma fanelaka ku papalatiwa hi malandza ya Yehovha.
Ku Gandzela Ka Vujagana Swikwembu Swa Hava Loku Vhumbhiweke
6. Hi wahi manyala lawa ma voniweke hi Ezekiyele exivonweni?
6 Loko a ri evukhumbini le Babilona hi 612 B.C.E., muprofeta Ezekiyele u vone xivono xa manyala lawa a ma endliwa hi vagwinehi va Vayuda etempeleni ya Yehovha eYerusalema. Ezekiyele u vone “šifaniso ša rilonḍo.” Vakulu va makume-nkombo va voniwe va ri karhi va nyikela mirhi ya risuna etempeleni. Vavasati va voniwe va ri karhi va rilela xikwembu xa mavunwa. Naswona vavanuna va 25 a va ri karhi va gandzela dyambu. Xana swiendlo leswi swa vugwinehi a swi fanekisela yini?
7, 8. “Šifaniso ša rilonḍo” xi nga ha va xi ve yini, naswona ha yini xi hlohlotele Yehovha leswaku a va ni rilondzo?
7 Ku gandzela ka Vujagana swikwembu swa hava ku fanekiseriwe hi manyala lawa ma voniweke hi Ezekiyele exivonweni. Hi xikombiso, u te: “Languta le ṅwalugwini. Kutani nḍi tlakusa mahlo ya mina hi tlhelo ra ṅwalungu, nḍi v̌ona e šifaniso ša rilonḍo eṅwalungwini wa nyangwa ya altari e v̌unghenweni. [Yehovha Xikwembu] a ku ka mina: Ṅwana wa munhu, šana wa ŝi v̌ona leŝi v̌a ŝi endlaka? e manyala la’makulu lawa yindlu ya Israel yi ma endlaka laha, leŝaku nḍi suka e v̌ukwetsimelweni bya mina.”—Ezekiyele 8:1-6.
8 Xifaniso lexa rilondzo xa ku gandzela swikwembu swa hava, xi nga va xi ve mhandzi yo kwetsima leyi yimelaka xikwembu-kati xa mavunwa lexi Vakanana a va xi teka xi ri nsati wa xikwembu xa vona Bali. Ku nga khathariseki leswaku xifaniso lexi a xi ri njhani, xi hlohlotele Yehovha leswaku a va ni mavondzo hikuva xi hungute ku tinyiketela loku heleleke ka Vaisrayele eka yena hi ku onha milawu ya yena leyi nge: “Hi mina Yehova, Šikwembu ša wena . . . U nga ṭhuki u v̌a ni ŝikwembu ŝiṅwana e mahlweni ka mina. U nga ṭhuki u tiendlela šifaniso le’ši v̌atliweke, ni loko ši ri šifaniso šihi ni šihi ša ŝilo le’ŝi nge henhla e tilweni, ni loko ši ri ša ŝilo le’ŝi nge hansi e misav̌eni, ni loko ši ri ša ŝilo le’ŝi nge matini, e hansi ka misav̌a; u nga ṭhuki u ŝi nkhinsamela, ni loko ku ri ku ŝi tirela; hikuv̌a hi mina Yehova, Šikwembu ša wena, ša rilav̌eta.”—Eksoda 20:2-5.
9. Xana Vujagana byi xi tlhontlhise ku yini Xikwembu leswaku xi va ni rilondzo?
9 Ku gandzela xifaniso xa rilondzo etempeleni ya Xikwembu, a ku ri man’wana ya manyala lamakulu lawa a ma endliwa hi Vaisrayele lava gwineheke. Hi ku fanana, tikereke ta Vujagana ti nyamisiwa hi mimfungho ni swifaniso leswi delelaka Xikwembu, leswi hungutaka ku tinyiketela loku heleleke, loku va vuleke leswaku va ta ku nyika Loyi va nge va n’wi tirhela. Nakambe Xikwembu xi hlohloteriwa ku va ni rilondzo hikuva vafundhisi va ala leswaku Mfumo wa xona hi wona ntsena ntshembo wa munhu naswona va nkhinsamela Nhlangano wa Matiko—“xilo xa manyala . . . [lexi nga] exivandleni lexo hlawuleka,” laha xi nga faneriki ku yima kona.—Matewu 24:15, 16; Marka 13:14.
10. Xana Ezekiyele u vone yini endzeni ka tempele, naswona leswi swi fanisa ku yini ni leswi voniwaka eka Vujagana?
10 Loko a nghena etempeleni, Ezekiyele wa vika a ku: “Nḍi v̌ona ŝifaniso le’ŝo tala ŝa ŝikokov̌i ni ŝa ŝiv̌anḍana le’ŝi yilaka, ni ŝa ŝikwembu hikwaŝo ŝa yindlu ya Israel, ŝi ṭariwile makhumbini e matlhelweni hikwawo. A ku yimile mahlweni ka ŝona v̌av̌anuna v̌a 70 v̌a ri v̌akulukumba v̌a yindlu ya Israel . . . uṅwana ni uṅwana a tamele mbita ya yena ya miri ya risuna, kutani musi wa miri ya risuna wu tlhandluka.” Wa nga ehleketa! Vakulukumba va Vaisrayele etempeleni ya Yehovha, va nyikela mirhi ya risuna eka swikwembu swa mavunwa, leswi fanekiseriweke hi mintsalotsalo yo nyenyetsa leyi nga ekhumbini. (Ezekiyele 8:10-12) Loko hi swi xiyisisa, swinyanyana ni swiharhi swi tirhisiwa ku fanekisela matiko ya Vujagana, lawa vanhu va tinyikelaka eka wona. Tlhandla-kambirhi, vo tala va vafundhisi va ni nandzu wa ku pfuneta ku xisa mintshungu hi ku seketela mianakanyo leyi hoxeke ya leswaku munhu u hundzuke a suka eka swivumbeko leswi nga riki vanhu, swa vutomi bya swiharhi ematshan’wini yo tshemba rungula ra ntiyiso ra Bibele, ra ntumbuluko lowu humaka ka Yehovha Xikwembu.—Mintirho 17:24-28.
11. Ha yini vavasati lava gwineheke va Vaisrayele va rilele Tamuzi?
11 Evunghenweni bya nyangwa ya yindlu ya Yehovha, Ezekiyele u vone vavasati lava gwineheke va Vaisrayele, va ri karhi va rilela Tamuzi. (Ezekiyele 8:13, 14) Vababilona ni Vasiriya a va languta Tamuzi a ri la fanaka ni xikwembu xa swimilana leswi kulaka hi nguva ya timpfula ivi swi fa hi nguva ya xirhami. Rifu ra xona a ri fanekisela lera Tamuzi, lexi lembe ni lembe vagandzeri va xona a va xi rila hi nkarhi wa mumu lowukulu. Loko swimilana swi tlhela swi sungula ku tlhava hi nguva ya timpfula, ku vuriwa leswaku Tamuzi a vuya hi le tikweni ra vafi. A a yimeriwa hi letere ro rhanga ra vito rakwe, tau wa khale lexi a xi ri xivumbeko xa xihambano. Leswi swi nga hi tsundzuxa kahle hi ku nkhinsamela ka Vujagana xihambano.
12. Xana Ezekiyele u vone vavanuna va 25 lava gwineheke va Vaisrayele va endla yini, naswona i swiendlo swihi swo fana ni sweswo leswi humelelaka eka Vujagana?
12 Exivaveni lexa le xikarhi ka tempele, Ezekiyele u tlhele a vona vavanuna va 25 lava gwineheke va Vaisrayele, va gandzela dyambu—ku nga ku tlula nawu wa Yehovha lowu lwaka ni ku gandzela ko tano ka swikwembu swa hava. (Deteronoma 4:15-19) Nakambe vagandzeri volavo va swikwembu swa hava va tshinete rhavi leri nyameke etinhompfini ta Xikwembu, leri kumbexana a ri fanekisela xirho xa munhu wa xinuna. A swi hlamarisi leswi Xikwembu xi nga ta ka xi nga swi hlamuli swikhongelo swa Vujagana, hambi leswi byi nga ta lava mpfuno eka xona hi nkarhi wa ‘nhlomulo lowukulu,’ ivi byi nga pfuniwi. (Matewu 24:21) Ku fana ni vagwinehi va Vaisrayele lava gandzeleke dyambu leri tisaka ku vonakala ivi va fularhela tempele ya Yehovha, Vujagana na byona byi bakanya ku vonakala loku humaka eka Xikwembu, byi dyondzisa tidyondzo ta mavunwa, byi gandzela vutlharhi bya misava, naswona a byi na mhaka ni ku tikhoma loko biha.—Ezekiyele 8:15-18.
13. Xana Timbhoni ta Yehovha ti papalata magandzelelo ya swikwembu swa hava lama voniweke exivonweni xa Ezekiyele hi tindlela tihi?
13 Timbhoni ta Yehovha ti papalata magandzelelo hinkwawo ya swikwembu swa hava lama endliwaka eVujaganini kumbe eYerusalema wo fanekisela, hi laha swi voniweke ha kona hi Ezekiyele ka ha ri emahlweni. A hi swi gandzeli swifaniso leswi delelaka Xikwembu. Hambi leswi hi xiximaka ‘valawuri lava tlakukeke’ va hulumendhe, ku titsongahata ka hina eka vona ku hikiwile. (Varhoma 13:1-7; Marka 12:17; Mintirho 5:29) Hi tinyiketele eka Xikwembu ni Mfumo wa xona hi timbilu ta hina hinkwato. A hi n’wi fularheli Mutumbuluxi ni ntumbuluko wa yena ivi hi amukela mianakanyo ya ndzhundzuluko. (Nhlavutelo 4:11) A hi nkhinsameli xihambano ni kan’we kumbe ku landzela vutlharhi, filosofi, kumbe mixaka yin’wana ya vutlharhi bya misava. (1 Timotiya 6:20, 21) Nakambe hi papalata hinkwawo magandzelelo man’wana ya swikwembu swa hava. Xana hi wahi man’wana ya wona?
Magandzelelo Man’wana Ya Swikwembu Swa Hava
14. I xiyimo xihi lexi malandza ya Yehovha ma xi tekaka malunghana ni “xivandzana” xa Nhlavutelo 13:1?
14 Vakreste a va hlanganyeli ni vanhu eku gandzeleni ka xifaniso xa “xivandzana.” Muapostola Yohane u te: “Kutani ndzi vona xivandzana xi tangunuka hi le lwandle, xi huma xi ri ni khume ra timhondzo ni tinhloko ta 7, ni harhi ya vuhosi erimhondzweni rin’wana ni rin’wana ra xona . . . Kutani vaaki hinkwavo va laha misaveni va ta xi gandzela.” (Nhlavutelo 13:1, 8) Swivandzana swi nga fanekisela “tihosi,” kumbe vafumi va tipolitiki. (Daniyele 7:17; 8:3-8, 20-25) Kutani tinhloko leta nkombo ta xivandzana xo fanekisela ti yimela mimfumo leyikulu ya misava—Egipta, Asiriya, Babilona, Medo-Persia, Greece, Rhoma, na Anglo-America, nkatsano wa Britain na United States of America. Vafundhisi va Vujagana va kombise ku delela ngopfu Xikwembu na Kreste hi ku rhangela vanhu eku gandzeleni ka fambiselo ra tipolitiki ra Sathana, “mufumi wa misava leyi.” (Yohane 12:31) Hambi swi ri tano, tanihi Vakreste lava nga ni vukala-tlhelo ni ku va vaseketeri va Mfumo, malandza ya Yehovha ma ku ala ku gandzela swikwembu swa hava.—Yakobo 1:27.
15. Xana vanhu va Yehovha va ti languta njhani tingwenya ta misava, naswona Mbhoni yin’wana yi vule yini hi leswi?
15 Nakambe vanhu va Xikwembu va fularhela ku gandzela tingwenya ta misava ta vuhungasi ni mintlango. Muyimbeleri un’wana loko se a ri Mbhoni ya Yehovha u te: “Tinsimu ta vuhungasi ni ncino ti nga pfuxa ku navela loku hoxeke . . . Muyimbeleri wa tona u yimbelela mayelana ni ntsako ni rirhandzu, leswi vayingiseri vo tala va nga vonaka onge va swi kayela eka vanghana wa vona va vukati. Muyimbeleri u tala ku sungula ku tiviwa hi leswi a yimbelelaka ha swona. Swilombe swin’wana leswi ndzi swi tivaka swi rhandziwa ngopfu hi vavasati hikwalaho ka sweswo. Loko munhu a mbombomele emisaveni leyi yo hungasa hi milorho, swi nga n’wi vangela ku gandzela muyimbeleri. Swi nga ha sungula onge i matlangwana, hi ku va munhu a kombela nsayino wa muyimbeleri leswaku a ta n’wi tsundzuka ha wona. Kasi van’wana va sungula ku languta muyimbeleri tanihi ntila wa ku wu landzela, naswona hi ku n’wi xixima ka vona, va n’wi hundzula xifaniso. Va nga ha hayeka xifaniso xa ngwenya yoleyo ekhumbini ivi va sungula ku ambala ni ku tilunghisa ku fana na yona. Vakreste va fanele va tsundzuka leswaku lexi faneleke ku rhandziwa hi mbilu hinkwayo i Xikwembu.”
16. I yini leswi kombaka leswaku tintsumi leto lulama ta ku ala ku gandzeriwa ka swikwembu swa hava?
16 Ina, i Xikwembu ntsena lexi fanelaka ku rhandziwa hi mbilu hinkwayo kumbe ku gandzeriwa. Loko Yohane a “wa hi matsolo, ku ta gandzela emilengeni ya ntsumi” leyi n’wi kombeke swilo swo hlamarisa, xivumbiwa xexo xa moya xi arile ku gandzeriwa hi ndlela yihi ni yihi, kambe xi te: “U nga tshuki u endla sweswo! Mina ndzi nandza ntsena, kukota wena ni vamakwenu, va nga vaprofeta ni hinkwavo lava hlayisaka marito ya buku leyi. Gandzela Xikwembu!” (Nhlavutelo 22:8, 9) Ku chava Yehovha ni ku n’wi xixima hi laha ku enteke, swi hi endla leswaku hi gandzela yena ntsena. (Nhlavutelo 14:7) Xisweswo, ku tinyiketela ka ntiyiso ka ku chava Xikwembu ka hi sirhelela leswaku hi nga gandzeli swikwembu swa hava.—1 Timotiya 4:8.
17. Xana hi nga ku papalata njhani ku gandzela swikwembu swa hava hi ku tikhoma loko biha hi tlhelo ra rimbewu?
17 Ku tikhoma loko biha hi tlhelo ra rimbewu i muxaka wun’wana wa ku gandzela swikwembu swa hava lowu ariweke hi malandza ya Yehovha. Ma swi tiva leswaku “ku hava munhu ni un’we la nga ta averiwa ndzhaka eMfun’weni wa Kriste ni wa Xikwembu, loko a ri la oswaka, kumbe la endlaka swa thyaka, kumbe la nga ni makwanga, ku nga ku gandzela swikwembu swa hava.” (Vaefesa 5:5) Ku gandzela swikwembu swa hava ka katseka hikuva ku navela ku titsakisa hi swilo leswo homboloka ku hundzuke nchumu wa ku tinyiketela eka wona. Timfanelo ta Xikwembu ta onhiwa hi ku navela loku nga lavekiki ka rimbewu. Hi ku languta ni ku yingisela swilo leswi pfuxaka ku navela ka rimbewu, munhu u onha vuxaka byin’wana ni byin’wana lebyi a nga ha vaka a ri na byona ni Xikwembu xo kwetsima, Yehovha. (Esaya 6:3) Kutani, leswaku ma tivonela ku gandzela swikwembu swa hava hi ndlela yo tano, malandza ya Xikwembu ma fanele ma papalata tibuku ta vanhu lava nga ambalangiki ni vuyimbeleri lebyi thyakeke. Ma fanele ma namarhela mimpimanyeto leyi tiyeke ya moya leyi sekeriweke eMatsalweni, naswona ma fanele ma hlayisa ‘vumunhu lebyintshwa, lebyi vumbiweke hi ku ya hi ku rhandza ka Xikwembu, hi ku lulama ni ku tshembeka.’—Vaefesa 4:22-24.
Papalata Ku Va Ni Timbilu Ni Makwanga
18, 19. (a) Xana ku va ni timbilu ni makwanga i yini? (b) Xana hi nga ku papalata njhani ku gandzela swikwembu swa hava hi ku va ni timbilu ni makwanga?
18 Nakambe Vakreste va papalata ku va ni timbilu ni makwanga, leswi yelanaka ngopfu ni tindlela ta ku gandzela swikwembu swa hava. Ku va ni timbilu i ku va ni ku navela loku tlulaka xikalo kumbe makolo, kasi makwanga i ku va ni timbilu eka xin’wana ni xin’wana lexi nga xa un’wana. Yesu u tsundzuxe ku papalata makwanga loko a vulavula hi mufuwi la nga ni makwanga, loyi rifuwo ra yena a ri nga ta n’wi pfuna nchumu eku feni naswona a a ri exiyin’weni lexi hlomulaka mbilu xa ku nga “fuweri Xikwembu.” (Luka 12:15-21) Hi laha ku faneleke, Pawulo u laye vapfumeri-kulobye a ku: “Dlayani leswi swi nga swa misava eka n’wina . . . makwanga, ku nga ku gandzela swikwembu swa hava.”—Vakolosa 3:5.
19 Lava va teleke rirhandzu ra mali, makolo ya swakudya kumbe swakunwa, kumbe ku lava ku fuma, va endla ku navela koloko ku va swikwembu swa vona. Hi laha Pawulo a swi vekeke ha kona, munhu wa makwanga i mugandzeri wa swikwembu swa hava naswona a nge dyi ndzhaka ya Mfumo wa Xikwembu. (1 Vakorinto 6:9, 10; Vaefesa 5:5) Hikwalaho, vanhu lava khuvuriweke lava gandzelaka swikwembu swa hava hi ku tiendla vanhu va timbilu, va fanele ku susiwa evandlheni ra Vukreste. Hambi swi ri tano, hi ku tirhisa Matsalwa ni ku khongela swi huma embilwini, hi nga kota ku papalata ku va ni timbilu. Swivuriso 30:7-9 yi ri: “Ŝimbiri nḍi kombela ka wena [Yehovha Xikwembu]: U nga nḍi ṭoni nḍi nga si fa! Ṭhineta kule na mina e ku kanganyisa ni marito ya mav̌unwa. U nga nḍi hi v̌usiwana, hambi ku ri ku fuwa; nḍi wundle hi ŝakudya le’ŝi nḍi ringanaka. Kumbe šana loko nḍi šurile nḍi ku lanḍula, nḍi ku Yehova i mani? Kumbe šana, loko nḍi ri šisiwana, nḍi yiv̌a, nḍi tlanga hi v̌ito ra Šikwembu ša mina.” Moya wo tano wu nga hi pfuna ku papalata ku gandzela swikwembu swa hava hi ku va ni timbilu ni makwanga.
Papalata Ku Tiendla Xikwembu Xa Hava
20, 21. Xana vanhu va Yehovha va ku papalata njhani ku tiendla swikwembu swa hava?
20 Nakambe vanhu va Yehovha va papalata ku tiendla swikwembu swa hava. Emisaveni leyi swi tolovelekile ku tigandzela ni ku gandzela leswi rhandziwaka hi wena n’wini. Ku lava ndhuma ni ku dzunisiwa swi vangela vo tala leswaku va hanya hi tindlela ta vukanganyisi. Va lava ku endliwa ku rhandza ka vona, ku nga ri ka Xikwembu. Kambe a hi nge vi na vuxaka ni Xikwembu loko hi pfumelela ku tiendla swikwembu swa hava hi ku lava hi ndlela ya vukanganyisi leswaku ku endliwa ku rhandza ka hina ni ku ringeta leswaku van’wana va ku endla hi nkani. (Swivuriso 3:32; Matewu 20:20-28; 1 Petro 5:2, 3) Ku fana ni valandzeri va Yesu, hi bakanye swilo swa misava swa vukanganyisi.—2 Vakorinto 4:1, 2.
21 Ku ri ni ku lava ndhuma, vanhu va Xikwembu va fambisana ni ku khongotela ka Pawulo loku nge: “Hambi ma dya, hambi ma nwa, hambi mi endla yini na yini, endlani hinkwaswo ku dzunisa Xikwembu.” (1 Vakorinto 10:31) Leswi hi nga malandza ya Yehovha, a hi lavi ku nkhinsameriwa hi ndlela yo sindzisa leswaku ku endliwa ku rhandza ka hina, kambe hi endla ku rhandza ka Xikwembu hi ku tsaka, hi amukela nkongomiso lowu humaka eka “nandza la tshembekaka, wo tlhariha” ni ku tirhisana hi ku helela ni nhlengeletano ya Yehovha.—Matewu 24:45-47.
Hambeta U Tivonela!
22, 23. Hi nga hambeta hi ma papalata njhani magandzelelo hinkwawo ya swikwembu swa hava?
22 Tanihi vanhu va Yehovha, a hi nkhinsami emahlweni ka swikwembu leswi nga lo endliwa. Nakambe hi papalata magandzelelo ya swikwembu swa hava lawa swi nga oloviki ku ma lemuka. Kahle-kahle, hi fanele hi ya emahlweni hi papalata magandzelelo hinkwawo ya swikwembu swa hava. Xisweswo hi fambisana ni ndzayo ya Yohane leyi nge: “Fularhelani swikwembu swa hava!”—1 Yohane 5:21.
23 Loko u ri un’wana wa malandza ya Yehovha, nkarhi hinkwawo tirhisa ripfalo ra wena leri leteriweke hi Bibele ni matimba ya wena yo kota ku vona lexi hoxeke. (Vaheveru 5:14) Xisweswo a wu nge onhiwi hi moya wa misava wa ku gandzela swikwembu swa hava, kambe u ta fana ni Vaheveru lavaya vanharhu ni Vakreste va khale vo tshembeka. U ta tinyiketela eka Yehovha hi ku helela, naswona ú ta ku pfuna leswaku u hambeta u papalata magandzelelo hinkwawo ya swikwembu swa hava.
Xana Miehleketo Ya Wena Yi Ri Yini?
◻ Xana Timbhoni ta Yehovha ti ma papalatisa ku yini magandzelelo ya swikwembu swa hava lama voniweke exivonweni xa Ezekiyele?
◻ Xana “xivandzana” xa le ka Nhlavutelo 13:1 i yini, naswona i xiyimo xihi lexi malandza ya Yehovha ma xi tekaka malunghana na xona?
◻ Ha yini hi papalata ku gandzela tingwenya ta vuhungasi ni mantlango?
◻ Xana hi nga ku papalata njhani ku tiendla swikwembu swa hava?
◻ Ha yini hi hambeta hi papalata magandzelelo hinkwawo ya swikwembu swa hava?
[Swifaniso leswi nga eka tluka 26]
Xana wa swi tiva leswaku manyala lama voniweke exivonweni xa Ezekiyele a ma ku fanekisela njhani ku gandzela ka Vujagana swikwembu swa hava?
[Xihlovo Xa Kona]
Artwork (ehenhla eximatsini) based on photo by Ralph Crane/Bardo Museum