Swivutiso Swa Vahlayi

Xana Mukreste a nga endla yini loko a tsandzeka ku kuma munghana wa vukati la faneleke?

Hambi loko hi ri Vakreste lava tinyiketeleke, hi nga khomiwa hi gome loko hi tshembela swinene eka nchumu wun’wana lowu nga ta ka wu nga humeleli. Mintlhaveko ya hina yi hlamuseriwe kahle eka Swivuriso 13:12, leyi nge: “Ku langutela lo’ku hlwelaka ka v̌av̌isa timbilu.” Leyi i ndlela leyi Vakreste van’wana va titweke ha yona loko va navela ku teka kambe va nga n’wi kumi munghana la faneleke. Ngopfu-ngopfu leswi swi tano eka lava muapostola Pawulo a va vuleke ‘lava hisiwaka hi ku navela.’—1 Vakorinto 7:9.

Yehovha u nyike vanhu ku navela ku kuma muhetisisi wa ntiyiso eka munhu wa rimbewu leri hambaneke. Hikokwalaho, a swi hlamarisi loko mintlhaveko yo tano yi twiwa ngopfu hi Vakreste vo tala lava nga si nghenelaka vukati. (Genesa 2:18) Mintlhaveko leyi leyi tolovelekeke yi nga ha tikisiwa ngopfu hi ndhavuko lowu kucetelaka ngopfu ku teka (kumbe ku teka emalembeni yo karhi) kumbe loko Mukreste la nga si nghenalaka vukati a rhendzeriwe hi mimpatswa leyi tsakeke leyi nga tekana evandlheni. Hambi swi ri tano, a swi fanelanga leswaku u pfumelela ku vilela ko tano ku teka nkarhi wo leha. Kutani ke, Mukreste a nga hlangavetana njhani ni xiyimo lexi handle ko vilela?

A swi olovi ku hlangavetana ni xiyimo xo tano naswona van’wana a va fanelanga va teka mhaka leyi tanihi xithathelo kumbe nchumu wo ka wu nga nyawuli. Kambe ku fikela eka mpimo wo karhi, vuswikoti byo langutana ni xiyimo lexi kumbe ku xi tlhantlha byi titshega hi magoza lama nga tekiwaka hi munhu loyi a nga yexe.

Hi kuma xilotlelo eka nsinya lowu wa nawu wa Bibele: “Ku nyika i nkateko lowu tlulaka ku nyikiwa.” (Mintirho 20:35) Sweswo swi vuriwe hi wanuna la nga tekangiki Yesu Kreste, naswona a swi fanerile leswaku a vulavula hi swona. Ku endlela van’wana swilo ku nga ri hi vonelo ra vutianakanyi i endlelo lerinene leri nga ta hi pfuna ku hlula mintlhaveko leyi vangiwaka hi ku langutela leswi hlwelaka. Xana leswi swi vula yini eka Vakreste lava nga si nghenelaka vukati?

Tikarhatele ku endla mintirho ya tintswalo endyangwini wa ka n’wina ni ku endlela van’wana evandlheni kutani u ngetela ntirho wa wena evutirhelini. Xitsundzuxo lexi a ko va ndlela yo vula ntsena leswaku, ‘Tshama u ri bizi, kutani u ta rivala hi mhaka yo lava ku nghenela vukati.’ Doo. Hi ku tshama u khomekile hi swilo leswi leswi vuyerisaka swa Vukreste, u ta kuma leswaku wa ‘tshamiseka embilwini ya wena, u endla leswi u swi lavaka’ naswona u nga ha vuyeriwa hi ndlela leyinene sweswi.—1 Vakorinto 7:37.

Van’wana lava hisekeleke ku nghenela vukati va pfumelele ku navela loku ku va tekela nkarhi wa vona. Va fikelele eka mpimo lowu va nga endla swinavetisi swa vanghana va vukati eka maphepha-hungu. Kambe, vona ndlela leyi swi antswaka ha yona ku kandziyisa ngopfu mimbuyelo ya nkoka leyi nga kumiwaka hi nkarhi lowu u nga wexe.—Vona swihloko leswi nge “A Va Nghenanga eVukatini Kambe Va Helerile eNtirhweni Wa Xikwembu” na “Ku Titshamela-wexe—Ndlela Leyi Vuyerisaka Ya Vutomi” eka Xihondzo xo Rindza xa November 15, 1987, ni lexi nge “Xana Vukati Hi Byona Ntsena Xilotlelo Xa Ntsako?” eka Xihondzo xo Rindza xa May 15, 1992.

Khongela eka Yehovha leswaku a ku pfuna u tshama u ri wexe. (Vafilipiya 4:6, 7, 13) Vakreste vo tala lava nga si nghenelaka vukati va kume leswaku hi ku dyondza hi nkarhi wa vona ni ku anakanyisisa hi Rito ra Xikwembu, ku va kona ni ku hlanganyela eminhlanganweni ya Vukreste, va kuma ‘ku phyuphyisiwa loku engetelekeke ka mimoya-xiviri ya vona,’ hi laha Yesu a tshembiseke lava n’wi landzelaka ha kona. (Matewu 11:28-30) Leswi swi va pfune leswaku va hluvuka hi tlhelo ra moya leswaku va va vavanuna kumbe vavasati lava antswaka loko va kuma munghana wa vukati la faneleke hi ku famba ka nkarhi.

U nga tshuki u rivala leswaku Yehovha wa xi twisisa xiyimo xa vanhu hinkwavo lava nga voxe, lava n’wi tirhelaka. Wa swi tiva leswaku swi nga endleka u nga titwi u tsakela xiyimo xa wena xa sweswi. Tata wa hina wa le tilweni wa swi tiva leswi nga ku pfunaka, hi tlhelo ra moya ni ra nyama. Kutani u ta tiva leswi hakunene: Hi ku rindzela Yehovha hi ku nga heli mbilu ni ku tirhisa minsinya ya milawu ya Rito ra yena evuton’wini bya siku na siku, u nga tiyiseka leswaku ú ta enerisa swilaveko swa wena swa nkoka swinene hi laha ku nga heriki.—Ringanisa Pisalema 145:16.