Swivono Swa Tiko Leri Tshembisiweke

Tsakani! Swikamelo Swa Khapa Hi Mafurha

MUPROFETA Yuwele u khutaze ‘vana va Siyoni leswaku va khana ni ku tsaka ha Yehovha.’ U tirhise mafurha ya mutlhwari leswaku a hlamusela ntsako ni ku humelela ka vona, a ku: “Swivuya swi ta tala hi mavele, [swikamelo] swi ta khapa hi vhinyo ni mafurha.”—Yuwele 2:23, 24, BML.

Loko a wu hanye le Israyele eminkarhini ya Bibele, a wu ta tsaka hi ku va ni murhi wa mutlhwari, wo tanihi lowu kombisiweke laha henhla ekusuhi ni yindlu ya wena kumbe emasin’wini ya wena.a A wu ta endla leswaku u hanya vutomi byo olova, lebyi tsakisaka swinene. Ha yini murhi wa mutlhwari a wu ta va wa nkoka swonghasi?—Ringanisa Vaavanyisi 9:8, 9.

Xo sungula, languta murhi wa wena hi vukheta. Mirhi ya mitlhwari yi nga hanya malembe xidzana yo tala, yin’wana ku tlula gidi ra malembe, kutani loko u langutisisa swinene kumbexana u ta vona nsinya wa kona wu gwanyile ni ku kwalala. Murhi wa wena wu nga fika eka timitara ta tsevu hi ku leha, kambe wu nga lehi ku fana ni murhi wa mukedari kumbe ku saseka tanihi ncindzu. Matluka ya wona lama tshamaka ya ri rihlaza, lamo vangama, ma endla ndzhuti lembe hinkwaro. Hambi swi ri tano, a wu nga ta rhandza murhi wa wena hikwalaho ka xivumbeko kumbe ndzhuti wa wona ntsena. A swi tano nikatsongo.

Mihandzu hi yona ya nkoka, magidi-gidi lawaya ya mitlhwari ya rihlaza kumbe ya ntima! Hi swona leswi a swi endla murhi wa mutlhwari wu va nchumu wa nkoka evuton’wini ni le mintirhweni ya vanhu le Israyele. Murhi lowu wu funengetiwa hi swiluva swa muhlovo lowu nga dzivangiki hi May, loko wu lava ku tswala mihandzu. (Yobo 15:33) Loko yi vupfa, yi nga ha hundzuka muhlovo wa yona wa rihlaza na xitshopananyana yi va ya buraweni yo dziva kumbe ya ntima.

Ku tshovela mitlhwari hi October/November a a wu ri ntirho wo tika. A wu fanele u tlhuva murhi hi timhandzi leswaku mihandzu leyi vupfeke yi wela emalapini lama andlariweke ehansi. (Deteronoma 24:20) Mihandzu ya mitlhwari a yi rhanga yi hlantswiwa yi nga si tirhisiwa, tanihi ku lovekiwa ematini yo dzunga leswaku ku susiwa ku bava ka yona loku tolovelekeke. Ku landzela yini ke?

Sweswo a swi ta titshega hi ndlela leyi u lavaka ku tiphina kumbe ku vuyeriwa ha yona hi ntshovelo wa wena lowu fuweke. U nga ha dya mihandzu ya mitlhwari leyi nga si vupfaka, kumbe u yi hlayisa leswaku yi nga boli leswaku ndyangu wa wena wu va ni mphakelo lowo nandziha hi tin’hweti to tala. Mihandzu ya mitlhwari a yi ri xiphemu-nkulu xa swakudya, leswi kumbexana swi nga ni nantswo wa mihandzu ya mitlhwari xikan’we ni swinkwa swa maxalana.

Kumbexana, a wu ta tirhisa mihandzu yo tala ya mitlhwari hi tindlela leti lavekaka leswaku u kuma rifuwo leriya ri pfunaka swinene ni ra risima—mafurha ya mutlhwari. U nga kuma tinxaka to hambana-hambana ta mafurha, u ma tirhisa hi tindlela to tala. Xo sungula, u nga ha kandza mihandzu ya mitlhwari leyi vupfeke etshurini kumbe u yi kandziyela hi milenge. (Mikiya 6:15) Sweswo a swi humesa mafurha lamanene ngopfu, lama sweswi ma vuriwaka mafurha yo tenga, lama a ma fanerile ku lumeka timboni ta tabernakele. (Eksoda 25:37; 27:20, 21) Anakanya ndlela leyi a wu ta tinyungubyisa ha yona loko u ri ni mafurha lawa ya hlawulekeke leswaku u ma tirhisa ku sweka hi minkarhi yo hlawuleka!

Mihandzu ya mitlhwari, hambi ku ri leyi nga nyawuriki, a yi nghenisiwa exikamelweni leswaku ku kamiwa mafurha yo tala eka ndhawu leyo olova ya muhandzu, hambi leswi mafurha ya kona a ya nga ri ya nkoka ngopfu. Ndhawu leyo olova ya muhandzu yi ni mafurha lama endlaka tiphesente ta 50. A ku tirhisiwa swikamelo swo hambana-hambana, kambe xin’wana hi lexi xi kombisiweke laha. Mitlhwari leyi kamiweke hi ku helela kumbe leyi kamiwekenyana a yi nghenisiwa exibyeni xa xirhendzevutana. Ribye ro sila, leri rhendzelekisiwaka hi mbhongolo kumbe hi vanhu, a ri yi pyanyetela, kutani mafurha ya huma, ivi ma khuluka, ma kangateriwa hi makhuwana.—Matewu 18:6.

Mafurha ya mutlhwari ya nga fanisiwa ni xihalaki xa nsuku—a a ya ri ya nkoka swinene naswona a ma tirhisiwa hi tindlela to tala swinene. Murhi wun’we a wu humesa mphakelo wa mafurha wa lembe hinkwaro wa ndyangu lowu nga ni swirho swa ntlhanu kumbe tsevu. A ma ri xiphemu lexikulu xa swakudya swa vona, ma gayeka hi ku olova naswona ma nyika matimba. (Ringanisa Yeremiya 41:8; Ezekiyele 16:13.) Mafurha yan’wana a wu ta ma chela mirhi ya risuna kutani u ma tirhisa ku tola kumbe u chela man’wana enhlokweni ya muendzi ku n’wi kombisa mafundza. (2 Samuwele 12:20; Pisalema 45:7; Luka 7:46) A wu ta ma tirhisa tanihi murhi wo horisa timbanga.—Esaya 1:6; Marka 6:13; Luka 10:34.

Leswi a hi swona ntsena leswi a swi endliwa hi mafurha lama fuweke ya mutlhwari. Nakambe a wu ta ma tirhisa tanihi mafurha ya rivoni ekaya ra wena, ma va xiphemu xa gandzelo ra Xikwembu, kumbe u bindzula ha wona hi ku ma xavisa. Ina, eminkarhini ya Bibele murhi wa mutlhwari a wu ri wa nkoka swinene, kutani Yuwele u wu tirhise hi laha ku faneleke tanihi lowu yimelaka ku humelela ni ntsako.—Deteronoma 6:11; Pisalema 52:8; Yeremiya 11:16; Matewu 25:3-8.

[Nhlamuselo ya le hansi]

[Laha Xifaniso Xi Humaka Kona eka tluka 24]

Pictorial Archive (Near Eastern History) Est.