Xana A Wu Swi Tiva?

Ha yini a ku ri ni vacincisi va mali etempeleni ya le Yerusalema?

▪ Emahlweninyana ka rifu rakwe, Yesu u vulavule hi vuhomboloki lebyikulu lebyi a byi humelela etempeleni. Bibele ya vika: “Yesu . . . a hlongola hinkwavo lava xavisaka ni lava xavaka etempeleni, a wisetela matafula ya vacinci va mali ni switshamo swa lava xavisaka matuva. Kutani a ku eka vona: ‘Ku tsariwile, “Yindlu ya mina yi ta vuriwa yindlu ya xikhongelo,’ kambe n’wina mi yi endla bako ra swigevenga.’”—Matewu 21:12, 13.

Vayuda va lembe-xidzana ro sungula ni vanhu lava amukeleke vukhongeri bya Vayuda lava humaka ematikweni ni le mitini yo tala va ye etempeleni ya le Yerusalema, va ri ni mali ya swingwece ya laha va tshamaka kona. Kambe, a va pfumeleriwa ku tirhisa mali leyi amukelekaka leswaku va hakela xibalo xa tempele xa lembe ni lembe, leswaku va xava swiharhi swo nyikela xitlhavelo ni ku endla minyikelo yin’wana ya magandzelo. Xisweswo, vacincisi va mali a va cincisa mali leyi vanhu a va ta na yona va huma etindhawini to hambana-hambana yi va mali leyi amukelekaka, kambe a va teka xiphemu xin’wana xa mali yoleyo yi va ya vukorhokeri. Loko minkhuvo ya Vayuda yi ri karhi yi tshinela, vacincisi va mali a va paka matafula endzeni ka tempele leyi nga eXivaveni xa Vamatiko leswaku va ta cincisela vanhu mali.

Yesu u vule leswaku vacincisi va mali a va hundzula tempele yi va “bako ra swigevenga,” swi tikomba onge a va hakerisa vanhu mali yo tala leswaku va va cincisela yona.

Ha yini mirhi ya mutlhwari a yi ri ya nkoka eminkarhini ya Bibele?

▪ Mirhi ya mutlhwari ni ya vhinya a ku ri yin’wana ya mikateko leyi Xikwembu xi tshembiseke vanhu va xona ku va nyika loko va tshembeka eka xona. (Deteronoma 6:10, 11) Namuntlha, mirhi ya mutlhwari i ya nkoka swinene eka vanhu lava tshamaka laha yi byariwaka kona. Yi nga humesa mihandzu yo tala ku ringana madzana ya malembe yi nga ri eku khathaleriweni. Murhi lowu byariweke wu nga kula hambi ku ri emisaveni leyi nga ni maribye naswona wu nga tiyisela dyandza leri vaka kona nkarhi na nkarhi. Loko nsinya wu tsemiwa kumbe wu wiseriwa ehansi, xikundzu xa wona xi humesa marhavi yo hlayanyana lama nga ta vumba misinya leyintshwa.

Eminkarhini ya Bibele, mahanti ni matluka ya nsinya a ma tekiwa ma ri ya nkoka hikuva a ma tirha tanihi murhi wo hunguta ku hisa ka miri. Glu leyi humaka eka marhavi ya khale a yi tirhisiwa ku endla swinu’hweriso. Hambiswiritano, nsinya a wu tekiwa tanihi xihlovo xa swakudya—mihandzu ya kona ngopfu-ngopfu ni mafurha ya kona. Loko mbhandzu wa mutlhwari wu kamiwile wu endla mafurha lama ringanaka ni hafu ya mbhandzu wun’we wa mutlhwari.

Nsinya wun’we lowunene, wu humesa tilitara ta 57 ta mafurha hi lembe. Nakambe mafurha ya mutlhwari a ma tirhisiwa eka timboni, eka nkhuvo ni le ka swilo swa vukhongeri, swo tanihi mafurha yo tola miri ni misisi naswona a ma tirha tanihi murhi wo horisa swilondza ni ku horisa mafidzula.—Eksoda 27:20; Levhitika 2:1-7; 8:1-12; Rhuti 3:3; Luka 10:33, 34.