Vantshwa—Xana I Yini Lexi Mi Xi Chivirikelaka?
“Chava ku hluriwa hi ku navela loku telaka lavantshwa, u kongoma ku lulama, ni ku pfumela, ni rirhandzu, ni ku rhula, swin’we ni lava khongelaka Hosi hi timbilu leti tengeke.”—2 TIMOTIYA 2:22.
1. Hi wihi ntshembo wa vantshwa lava nge xikarhi ka hina?
PHEPHA-HUNGU ra Swedish Pentecostal leri nge Dagen (Siku) ri vule leswi: “Timbhoni ta Yehovha i ntlawa lowu kumaka nhlayo leyikulu swinene ya swirho leswintshwa lembe na lembe naswona ti ni ntshungu lowukulu wa vantshwa, ku tlula mintlawa yin’wana.” Kumbexana na wena u xiphemu xa ntshungu lowu wa vantshwa lava tengeke, lava chavaka Xikwembu. U nga ha va u kurisiwe hi ndlela ya Vukreste ku sukela evuhlangini kumbexana u nga ha va u twe rungula ra Mfumo hi wexe ivi u ri amukela. Kambe, ha tsaka ku va na wena exikarhi ka hina. Naswona hi ni ntshembo wa leswaku u ta landzelela ndlela ya ku lulama, hi laha vantshwa vo tshembeka va Vakreste va endleke ha kona eka lembe xidzana ro sungula. Marito ya muapostola Yohane ma nga ha ku hlamusela kahle: “[U] ni matimba, ni rito ra Xikwembu ri akile eka [we]na, naswona [u] hlurile Lowo biha.”—1 Yohane 2:14.
2. Hi swihi swilo leswi swi nga nonon’hwisaka ndlela yo landzelela ku lulama ‘ematimbeni ya vuntshwa’?
2 Vantshwa vo tala va Vakreste namuntlha—ina vunyingi bya vona—va yimelana ni mintshikilelo ya misava. Hambi swi ri tano, u nga ha kuma leswaku ku khomelela endleleni yo tano a swi olovi. Loko u ri ‘ematimbeni ya vuntshwa,’ u nga ha karhatiwa hi mintlhaveko leyintshwa, ya matimba. (1 Vakorinto 7:36) Hi nkarhi lowu fanaka, u nga ha twa u ri ni ndzhwalo lowukulu wa vutihlamuleri exikolweni, ekaya ni le vandlheni. Sathana Diyavulosi na yena wa tshikilela. U tiyimisele ku hambukisa vo tala hi laha a nga kotaka ha kona, u hlasela lava olovaka—hi laha a endleke ha kona entangeni wa Edeni. Enkarhini wolowo, rhengu ra yena ra vuxisi a nga ri tirhisanga eka Adamu lonkulu, la nga ni vutivi, kambe u ri tirhise eka wansati lontsongo, Evha, loyi a nga riki na ntokoto. (Genesa 3:1-5) Endzhaku ka malembe xidzana, Sathana u tirhise marhengu lama fanaka evandlheni leri a ri nga ri na ntokoto ra Vakreste le Korinto. Muapostola Pawulo u te: “Kukota leswi nyoka yi kanganyiseke Evha hi mano ya yona, ndza chava leswaku hi tindlela tin’wana mianakanyo ya n’wina yi nga onhiwa, kutani mi nga ha swi koti ku landzela Kriste hi ku tinyiketa ni ku tenga.”—2 Vakorinto 11:3.
3, 4. Hi swihi swilo swin’wana leswi tirhisiwaka hi Sathana Diyavulosi leswaku a lahlekisa vantshwa, naswona vuyelo byi va byihi?
3 Namuntlha, vatswari va n’wina va Vakreste va nga ha mi anakanyela hi laha ku fanaka. A hi swona leswaku va anakanya leswaku mi voyamele evubihini, kambe hi ntokoto wa vona va swi tiva leswaku vantshwa ngopfu-ngopfu va phasiwa hi ku olova hi “swiendlo swa vukanganyisi” swa Sathana. (Vaefesa 6:11, NW, nhlamuselo ya le hansi) Ematshan’wini yo languteka yi chavisa, mintlhamu ya Sathana yi endleriwe ku languteka yi tsakisa, yi navetisa. Hi vutlharhi thelevhixini yi kombisa swilo leswi vonakaka, rimbewu leri thyakeke, madzolonga ni vungoma tanihi vuhungasi. Mianakanyo ya vana yi nga tatiwa hi swilo leswi nga riki ‘ntiyiso, ni leswi nga riki swa nkoka, leswi nga lulamangiki, leswi nga tengangiki ni leswi nga rhandzekiki.’ (Vafilipiya 4:8) Ntshikilelo wa tintangha i xitirho xin’wana lexikulu xa Sathana. Vantshwa va nga ha ku tshikilela ngopfu leswaku u teka mahanyelo, maambalelo ni ku tilunghisa ka vona. (1 Petro 4:3, 4) Mutsari wa phepha-hungu William Brown u te: “Loko xi ri kona Xikwembu xo karhi, xa tiko lexi nga xa vana va kondlo-a-ndzi-dyi i Xikwembu xa ntwanano. . . . Eka vantshwa, ku hambana ni vantshwa van’wana i nchumu lowu tlulaka rifu.” Nhwanyana un’wana wa Mbhoni le Italy u pfumerile a ku: “A ndzi ri ni tingana ku byela vadyondzi-kulorhi leswaku ndzi Mbhoni. Naswona leswi a ndzi swi tiva leswaku Yehovha a nga tsaki hi mina, a ndzi hlunamile, ndzi tshoveke mbilu.”
4 U nga kanganyisiwi—Sathana u lava ku ku dlayisa. Vantshwa vo tala emisaveni va ta lahlekeriwa hi vutomi bya vona eka nhlomulo lowukulu hikuva va pfumele ku hambukisiwa. (Ezekiyele 9:6) Ndlela yin’we yo pona ha yona i ku landzela leswi lulameke.
Tivonele Eka Vanghana Vo Biha
5, 6. (a) Timotiya lontshwa a langutane ni mintlhontlho yihi loko a tshama le Efesa? (b) Xana hi yihi ndzayo leyi Pawulo a nga yi nyika Timotiya?
5 Wolowo a ku ri mongo wa xitsundzuxo lexi muapostola Pawulo a xi nyikeke muntshwa Timotiya. Ku tlula malembe ya khume, Timotiya u fambe na muapostola Pawulo eka maendzo yakwe ya vurhumiwa. Hi nkarhi lowu Timotiya a tirha edorobeni ra vuhedeni ra Efesa, Pawulo a ri ekhotsweni ra le Rhoma a rindze ku avanyisiwa. Loko nkarhi wa rifu rakwe wu tshinela, Pawulo handle ko kanakana a khumbeka hi ndlela leyi Timotiya a ta hanya ha yona. Efesa a ku ri doroba leri a ri dumile hi rifuwo ra rona, ku tikhoma ko biha ni vuhungasi lebyi thyakeke, naswona Timotiya a a nga ha ta seketeriwa hi mutsundzuxi wakwe wa rirhandzu.
6 Hikwalaho Pawulo u tsalele ‘n’wanakwe la rhandzekaka’ leswi landzelaka: “Endlwini leyikulu, a ku na swibya swa nsuku ni swa silivhere ntsena, kambe ni swo vatliwa hi mintsandza ni swa vumba swi kona, kutani swin’wana swi ni ntirho lowukulu, swin’wana lowutsongo. Hikokwalaho, loko munhu a tibasisa eka swilo leswitsongo, ú ta va xibya xo tirha leswikulu, lexi hlawulekeke ni ku pfuna n’wini wa yindlu, xi yimela ku tirha ntirho wihi na wihi lowunene. Chava ku hluriwa hi ku navela loku telaka lavantshwa, u kongoma ku lulama, ni ku pfumela, ni rirhandzu, ni ku rhula, swin’we ni lava khongelaka Hosi hi timbilu leti tengeke.”—2 Timotiya 1:2; 2:20-22.
7. (a) Hi swihi ‘swibya swa vumba’ leswi Pawulo a tsundzuxeke ha swona? (b) Xana vantshwa namuntlha va nga ma tirhisa njhani marito ya Pawulo?
7 Xisweswo Pawulo u tsundzuxe Timotiya leswaku hambi ku ri exikarhi ka Vakreste-kulobye ‘swibya swa vumba’ swi nga ha endleka swi ri kona—vanhu lava a va nga tikhomi hi mfanelo. Kutani loko vunghana bya Vakreste van’wana lava totiweke a byi ta tshuka byi vavise Timotiya, kutani vunghana bya vanhu va misava byi nga n’wi vavisa ngopfu muntshwa la nga Mukreste namuntlha! (1 Vakorinto 15:33) Leswi a swi vuli ku fularhela vadyondzi-kuloni. Kambe u fanele u tivonela leswaku u nga hlangani ngopfu na vona, hambi loko swi ku endla matshama-wexe nkarhi wun’wana. Leswi swi nga ha tika swinene. Nhwanyana un’wana wa le Brazil u ri: “Swa tika. Nkarhi hinkwawo vadyondzi-kulorhi va ndzi rhamba leswaku hi ya eswinkhubyaneni ni le ka tindhawu leti nga va faneriki vantshwa va Vakreste. Va ri: ‘Yini! A wu yi? Wa tlanga wena!’”
8, 9. (a) Xana ku va munghana wa vanhu va misava lava vonakaka va ri vanene, ku nga ri vanga njhani khombo eka Vakreste? (b) Xana u nga va kuma kwihi vanghana lava tengeke?
8 Vantshwa van’wana va misava va nga vonaka va ri vanene hikwalaho ka leswi va nga dzahiki, va nga tirhisiki nhlambha kumbe ku va na rigangugangu. Kambe, loko va nga landzeli ku lulama, mianakanyo ni mavonelo ya vona ya nyama ma nga ku nghena. Handle ka sweswo, u nga hanyisana njhani ni lava nga riki vapfumeri? (2 Vakorinto 6:14-16) Phela mimpimanyeto ya moya leyi u yi xiximaka, vona va yi languta ku ri “vuhunguki”! (1 Vakorinto 2:14) Xana u nga hlayisa vunghana bya vona handle ko tlula misinya ya wena ya milawu?
9 Kutani papalata vanghana lava thyakeke. Endla vunghana ntsena ni Vakreste lava ehleketaka hi swa moya, lava rhandzaka Yehovha hakunene. Tivonele ni le ka vantshwa evandlheni lava nga tiyimiselangiki kumbe lava xopaxopaka swilo. Loko u ya u kula emoyeni, ku hlawula ka wena vanghana ku ta cinca. Nhwanyana un’wana wa Mbhoni wa malembe ya le hansi u ri: “A ndzi tiendlela vanghana lavantshwa eka mavandlha yo hambana. Swi ndzi endle ndzi lemuka leswaku vanghana va misava a va laveki nikatsongo.”
Ku Chava Ku Navela Loko Biha
10, 11. (a) Xana swi vula yini ‘ku chava ku navela loku telaka lavantshwa’? (b) Xana munhu a nga ‘chava vuoswi’ hi ndlela yihi?
10 Pawulo u tlhele a khongotela Timotiya leswaku a “chava . . . ku navela loku telaka lavantshwa.” Loko u ri muntshwa, ku navela ndhuma, ku titsakisa kumbe ku eneta ku navela ka rimbewu ku nga ha va ni matimba. Loko u nga tivoneli, ku navela ko tano ku nga ha ku yisa exidyohweni. Hikokwalaho Pawulo u vulavule hi ku chava ku navela loku nga ni khombo—u tsutsuma onge hi loko vutomi bya wena byi ri ekhombyeni.a
11 Hi xikombiso, ku navela ka rimbewu ku endle vantshwa vo tala va Vakreste va fa emoyeni. Kutani, hi xivangelo lexi twalaka Bibele yi hi byela yi ku, “chavani vuoswi.” (1 Vakorinto 6:18) Loko vanhu vambirhi va gangisana, va nga tirhisa nsinya lowu wa nawu hi ku papalata swiyimo leswi ringaka—tanihi ku va voxe endlwini kumbe emovheni leyi pakiweke. Ku va ni munhu wa vunharhu a famba na n’wina swi nga vonaka swi ri xikhale, kambe swi nga va xisirhelelo xa ntiyiso. Naswona, hambi loko swikombiso swin’wana swa rirhandzu swi fanerile, mi fanele mi pima leswaku mi papalata mahanyelo lama thyakeke. (1 Vatesalonika 4:7) Ku chava vuoswi ku katsa ni ku papalata tibayiskopo kumbe minkombiso ya TV leyi yi nga ha pfuxaka ku navela. (Yakobo 1:14, 15) Loko u ngheniwa hi mianakanyo leyi thyakeke u nga swi rindzelanga, hundzula miehleketo. Famba, u tiolola milenge; hlayanyana tibuku; endla xintirhwana xa le kaya. Ngopfu-ngopfu xikhongelo xa pfuna emhakeni leyi.—Pisalema 62:8.b
12. Xana swi dyondziwa njhani ku venga leswo biha? Hlamusela.
12 Ku tlula hinkwaswo, u fanele u dyondza ku nyenya, ku venga ni ku phirhiwa hi leswo biha. (Pisalema 97:10) Xana u nga swi venga njhani leswi eku sunguleni swi nga ku tsakisaka kumbe swi ku nyanyula? Hi ku ehleketa hi vuyelo bya swona! “Mi nga tshuki mi tixisa: Xikwembu a xi vungunyiwi; xin’wana ni xin’wana lexi munhu a xi byalaka, ú ta tshovela xona; loyi a byalaka swo tsakisa ntumbuluko wa yena wa nyama, ú ta tshovela leswo bola leswi humaka eka ntumbuluko wa yena wolowo.” (Vagalatiya 6:7, 8) Loko u ringiwa ku pfumelela ku navela, ehleketa hi nchumu lowu nga wukulu—ndlela leyi swi nga ta karhata Yehovha Xikwembu ha yona. (Ringanisa Pisalema 78:41.) Nakambe ehleketa hi ku va kona ka nyimba leyi nga laviwiki kumbe ku ngheniwa hi vuvabyi, byo fana ni AIDS. Anakanya hi ku karhateka ka mintlhaveko ni xindzhuti lexi xi nga ta ku lahlekela. Nakambe ku nga ha va ni vuyelo lebyi tekaka nkarhi wo leha. Wansati un’wana wa Mukreste wa pfumela: “Mina ni nuna wanga hi tshame hi hlangana ni vanhu van’wana hi rimbewu hi nga si kumana. Hambi leswi havambirhi hi nga Vakreste namuntlha, vutomi bya hina bya khale bya rimbewu byi vanga timholovo ni mavondzo evukatini bya hina.” Xin’wana lexi nga fanelangiki ku honisiwa, i ku lahlekeriwa ka wena hi malunghelo ya le tilweni kumbe ku tshuka u hlongoriwa evandlheni ra Vukreste! (1 Vakorinto 5:9-13) Xana ntsako wihi na wihi wa xinkarhana wu ringana ni lunghelo ro tano?
Ku Lwela Ku Va Ni Vuxaka Lebyikulu Na Yehovha
13, 14. (a) Ha yini ku chava leswo biha ku nga ri swona ntsena leswi lavekaka? (b) Xana u nga ‘chivirikela ku tiva Yehovha’ hi ndlela yihi?
13 Hambi swi ri tano, ku chava leswo biha a hi swona ntsena leswi lavekaka. Timotiya nakambe u khongoteriwe leswaku a “kongoma ku lulama, ni ku pfumela, ni rirhandzu, ni ku rhula.” Leswi swi lava xiendlo xa matimba. Muprofeta Hosiya hi laha ku fanaka u kombele tiko ra Israyele leri nga tshembekiki a ku: “Tanani, a hi tlheleleni ka Yehova . . . A hi tšhiv̌erikeni e ku ṅwi tiv̌a!” (Hosiya 6:1-3) Xana wena u swi chivirikerile sweswo? A swi katsi ku va kona eminhlanganweni ni ku heleketa vatswari entirhweni wa nsimu. Wansati un’wana wa Mukreste u te: “Vatswari va mina va ndzi kurise entiyisweni, naswona ndzi khuvuriwe ndza ha ri ntsongo. . . . A ndzi nga tali ku xwa eminhlanganweni naswona n’hweti yin’wana ni yin’wana a ndzi huma nsimu, kambe a ndzi byi endlanga vunghana lebyikulu na Yehovha.”
14 Muntshwa un’wana wa pfumela leswaku na yena u hluleke ku tiva Yehovha tanihi Munghana ni Tatana, a n’wi languta tanihi Moya lowu nga twisisekiki. U tikhome hi ndlela yo biha ivi a va manana la nga tekiwangiki a ri ni malembe ya 18 hi vukhale. U nga endli xihoxo lexi fanaka! ‘Chivirikela ku tiva Yehovha,’ hi laha Hosiya a khongoteleke ha kona. Hi xikhongelo ni ku famba na Yehovha siku na siku, u nga n’wi endla munghana wa wena lonkulu. (Ringanisa Mikiya 6:8; Yeremiya 3:4.) “A [nga] le kule ni un’wana ni un’wana wa hina” loko hi n’wi lava. (Mintirho 17:27) Xisweswo nongonoko wa nkarhi na nkarhi wa dyondzo ya Bibele ya munhu hi xiyexe wa laveka. Xiyimiso xo tano a xi fanelanga xi tika kumbe xi karhata. Xinhwanyatana lexi vitaniwaka Melody xi ri: “Siku rin’wana ni rin’wana ndzi hlaya Bibele, timinete ta 15 ntsena.” Tivekele nkarhi wo hlaya nkandziyiso wun’wana ni wun’wana wa Xihondzo xo Rindza ni Xalamuka! Lunghiselela minhlangano ya vandlha leswaku u “[komba van’wana] rirhandzu ni mintirho leyinene.”—Vaheveru 10:24, 25.
Veka Mbilu Ya Wena Eka Vatswari Va Wena
15. (a) Hikwalaho ka yini swi tika nkarhi wun’wana ku yingisa vatswari? (b) Hikwalaho ka yini ku yingisa hakanyingi ku pfuna muntshwa?
15 Vatswari lava chavaka Xikwembu va nga va xihlovo xa mpfuno ni nseketelo wa ntiyiso. Kambe xiya xiphemu lexi u faneleke u xi endla: “Yingisani vatswari va n’wina, hikuva hi swona leswi lulameke emahlweni ka Hosi. Matsalwa ma ri: ‘U va ni xichavo eka tata wa wena ni mana wa wena’ (hi wona nawu lowo rhanga lowu nga ni xitshembiso), ‘leswaku u kateka, ni leswaku u hanya masiku yo tala emisaveni leyi.’” (Vaefesa 6:1-3) I ntiyiso, u ya u kula naswona swi nga ha endleka leswaku u lava ntshuxeko lowu engetelekeke. Nakambe u nga ha ya u ku vona kahle ku tsana ka vatswari va wena. Muapostola Pawulo u pfumerile a ku: “Vatata wa hina, va endle leswi a va vona swi lulamile.” (Vaheveru 12:10, The Jerusalem Bible) Hambi swi ri tano, loko hi languta kahle, swa ha ku pfuna ku va yingisa. Vatswari va ku rhandza naswona va ku tiva kahle ku tlula munhu wihi na wihi. Hambi loko u nga pfumelelani na vona nkarhi wun’wana, hakanyingi va ku navelela leswinene. Hikwalaho ka yini u ala matshalatshala ya vona ya ku ku kurisa ‘hi ku laya ni ku letela ka Yehovha’? (Vaefesa 6:4) Ina, xihunguki ntsena “ši monya dyonḍo ya tata wa šona.” (Swivuriso 15:5) Muntshwa la tlhariheke u xiya matimba ya vatswari vakwe ni ku kombisa xichavo lexi faneleke.—Swivuriso 1:8.
16. (a) Hikwalaho ka yini ku nga ri vutlharhi leswaku vantshwa va fihlela vatswari va vona swiphiqo? (b) Xana vantshwa va nga endla yini leswaku va antswisa ku vulavurisana ni vatswari va vona?
16 Sweswo swi katsa ku byela vatswari va wena ntiyiso, u va tivisa loko u ri ni swiphiqo, tanihi ku kanakana hi ntiyiso kumbe ku wela eku tikhomeni loko nga riki kunene. (Vaefesa 4:25) Ku fihlela vatswari va wena swiyimo swo tano leswi karhataka swi vanga swiphiqo swin’wana. (Pisalema 26:4) Entiyisweni, vatswari van’wana a va ma endli matshalatshala yo vulavula. Nhwanyana un’wana u vilerile a ku: “Mana wa mina a nga tshami ehansi a vulavula na mina. A ndzi si tshama ndzi susumetelaka ku n’wi byela leswi ndzi ti twisaka xiswona hikuva ndzi chava leswaku u ta ndzi sola.” Loko u ri eka xiyimo lexi fanaka, hlawula nkarhi lowu faneleke hi vutlharhi leswaku u byela vatswari va wena leswaku u ti twisa ku yini. Swivuriso 23:26 yi khongotela yi ku, “ṅ’wana nga, nḍi he mbilu ya wena.” Lwela ku hamba u bula na vona hi timhaka ta wena, ku nga si va ni swiphiqo leswikulu.
Hambeta U Chivirikela Ku Lulama!
17, 18. I yini lexi nga pfunaka muntshwa a hambeta a chivirikela ku lulama?
17 Loko papila rakwe ra vumbirhi ri ya eku heleleni, Pawulo u khongotele Timotiya a ku: “Yana emahlweni na leswi u swi dyondzeke, swi nga leswi u nga pfumela ni ku tiya eka swona.” (2 Timotiya 3:14) U fanele u endla hi laha ku fanaka. U nga tshuki u pfumelela mani na mani kumbe yini na yini xi ku tshikisa ku landzelela ka wena ku lulama. Misava ya Sathana—hi vuxisi bya yona hinkwabyo—yi tele hi vubihi. Ku nga ri khale yona ni lava nga xiphemu xa yona va ta dlayiwa. (Pisalema 92:7) Tiyimisele leswaku u nga lovisiwi ni misava ya Sathana.
18 Hi xikongomelo xexo, u fanele u hambeta u kambisisa tipakani ta wena, ni swilo leswi u swi navelaka ni leswi u swi tsakelaka. Tivutise, ‘Xana ndzi hlayisa mimpimanyeto leyi tlakukeke ya mavulavulelo ni ku tikhoma loko vatswari va mina kumbe swirho swa vandlha swi nga ri kona? Xana ndzi hlawula vanghana va muxaka muni? Xana tintangha ta misava ti ndzi byeletela maambelelo ni ku tilunghisa ka mina? Hi tihi tipakani leti ndzi tivekeleke tona? Xana mbilu ya mina yi lava vutirheli bya nkarhi hinkwawo—kumbe yi lava ntirho-vutomi wa mafambiselo ya swilo ya Sathana lama faka?’
19, 20. (a) Hikwalaho ka yini muntshwa a nga fanelanga a tikiwa hi swilaveko swa Yehovha? (b) Xana vantshwa va nga pfuneka hi malunghiselelo wahi?
19 Kumbexana wa xi vona xilaveko xo lulamisa miehleketo ya wena. (2 Vakorinto 13:11) U nga heli matimba. Tsundzuka, Yehovha a nga languteli swo tala eka wena, ku tlula leswi ringaneke. Muprofeta Mikiya u vutisile: “I yini lexi Yehovha a kombelaka leswaku u n’wi nyika xona handle ka ku endla vululami ni ku rhandza vunene ni ku titsongahata loko u famba ni Xikwembu xa wena?” (Mikiya 6:8, NW) Leswi a swi nge nonon’hwi ngopfu loko u tirhisa malunghiselelo lawa Yehovha a ma endlaka ya ku ku pfuna. Tshinelelana swinene ni vatswari va wena. Hlanganyela ni vandlha ra Vukreste nkarhi hinkwawo. Lexikulu ngopfu, endla matshalatshala yo tivana ni vakulu va vandlha. Va tikarhatela leswaku u hlayiseka naswona va nga ku seketela ni ku ku chavelela. (Esaya 32:2) Ku tlula hinkwaswo, hlakulela vunghana lebyikulu, lebyi kufumelaka na Yehovha Xikwembu. U ta ku nyika ntamu ni ku rhandza ku chivirikela leswi lulameke!
20 Hambi swi ri tano, vantshwa van’wana va onha matshalatshala ya vona yo kula emoyeni hi ku yingisela vuyimbeleri lebyi thyakeke. Xihloko lexi landzelaka xi ta hlamusela mhaka leyi.
[Tinhlamuselo ta le hansi]
a Rito ra Xigriki leri vulaka “ku chava” ri tirhisiwe eka Matewu 2:13, laha Mariya na Yosefa va byeriweke ku ‘chavela aEgipta’ va baleka ku dlayiwa hi Heroda.—Ringanisa Matewu 10:23.
b U nga kuma swiringanyeto swo tala leswi pfunaka swo lawula ku navela ka rimbewu eka ndzima 26 ya buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, leyi humesiweke hi Watchtower Bible and Tract Society of New York, Inc.
Wa Tsundzuka Xana?
◻ Ha yini vantshwa ngopfu-ngopfu va kokiwa hi ku olova hi ‘swiendlo swa vukanganyisi’ swa Sathana?
◻ Ha yini swi ri ni khombo ku va munghana lonkulu wa vantshwa va misava?
◻ Xana u nga byi baleka njhani vunghwavava?
◻ Xana u nga byi landzelela njhani vunghana lebyikulu na Yehovha?
◻ Ha yini swi ri swa nkoka ku vulavurisana ni vatswari va wena?
[Xifaniso lexi nga eka tluka 16]
Vanhu lava gangisanaka va tolovelana kahle eka swiyimo leswi swi nga va hambanisiki ni vanhu van’wana, swo tanihi ku tlanga ehenhla ka ayisi kumbe ku tlanga thenisi