Tshemba Yehovha Ni Rito Rakwe
“La’v̌a tiv̌aka v̌ito ra wena v̌a tiṭhembisa ha wena.”—PISALEMA 9:10.
1. Hikwalaho ka yini hi nga ha vaka ni ntshembo eka Yehovha ni le ka Rito ra yena esikwini ra hina ra manguva lawa?
EMISAVENI leyi ya manguva lawa, xirhambo xo tshembela eka Xikwembu ni Rito ra xona, Bibele, xi nga ha tikomba xi nga tirhi naswona xi nga twisiseki. Kambe, vutlhari bya Xikwembu byi tikombe byi ri bya ntiyiso byi tlhela byi tirha hi nkarhi wo leha. Muvumbi wa wanuna ni wansati i Musunguri wa vukati ni ndyangu, naswona u tiva swilaveko swa hina ku antswa ku tlula munhu. Tanihi leswi swilaveko swa munhu swa xisekelo swi nga hundzukangiki, ni tindlela ta xisekelo to hetisisa swilaveko sweswo a ti hundzukanga. Ndzayo ya Bibele ya vutlhari, hambi leswi yi tsariweke emalembeni ya madzana lama hundzeke, ya ha nyikela nkongomiso lowu antswaka wa ku humelela evuton’wini ni wo tlhantlha swiphiqo. Ku wu yingisa swi tisa ntsako lowukulu—hambi ku ri emisaveni leyi hluvukeke, ya sayense leyi hi hanyaka eka yona!
2. (a) Hi yihi mihandzu leyinene leyi veke kona evuton’wini bya vanhu va Yehovha hikwalaho ko yingisa swileriso swa Xikwembu? (b) Hi swihi swin’wana leswi engetelekeke leswi Yehovha a swi tshembisaka lava yingisaka yena ni Rito rakwe?
2 Ku tshembela eka Yehovha ni ku tirhisa misinya ya milawu ya Bibele swa vuyerisa siku rin’wana ni rin’wana. Xitiyisekiso xa leswi xi kombisiwa hi vutomi bya timiliyoni ta Timbhoni ta Yehovha emisaveni hinkwayo leti veke ni ripfumelo ni xivindzi xo tirhisa ndzayo ya Bibele. Eka vona, ku tshembela eka Muvumbi ni le ka Rito ra yena swi tikombe swi tirha. (Pisalema 9:9, 10) Ku yingisa swileriso swa Xikwembu swi va endle vanhu vo antswa loko swi ta eka ku basa, ku tshembeka, ku chivirika, ku xixima vutomi ni swilo swa van’wana, ni ku ringanisela eku dyeni ni le ku nweni. Swi yise eka rirhandzu leri fanelaka ni ku letela endyangwini—ku va ni malwandla, ku lehisa mbilu, tintswalo ni ku rivalela—ku katsa ni swilo swin’wana swo tala. Va swi kotile ku papalata mihandzu leyo biha ya vukarhi rivengo, ku dlaya, mavondzo, ku chava, vulolo, vutikukumuxi, vuxisi, ku lumbeta, ku nga khathali ni mahanyelo yo biha. (Pisalema 32:10) Kambe Xikwembu xi endla leswi engetelekeke ku tlula ku tshembisa vuyelo lebyinene eka lava hlayisaka milawu ya xona. Yesu u vule leswaku lava landzelaka ndlela ya Vukreste va ta kuma “ka dzana eminkarhini ya sweswi: . . . vamanana, ni vana, masimu, swin’we ni ku xaniseka, kutani eminkarhini leyi taka, [va] ta nyikiwa vutomi lebyi nga heriki.”—Marka 10:29, 30.
Papalata Ku Tshembela eVutlharini Bya Misava
3. Hi ku ya emahlweni va veka ku tshemba ka vona eka Yehovha ni Rito rakwe, hi swihi swiphiqo leswi Vakreste va hlangavetanaka na swona minkarhi yin’wana?
3 Xiphiqo xa vanhu lava nga hetisekangiki hi leswaku va ni mukhuva wo honisa kumbe ku rivala leswi Xikwembu xi swi lavaka. Hi ku olova va sungula ku ehleketa leswaku va tlharihile kumbe va ehleketa leswaku vutlhari bya vanhu lava dyondzekeke va misava leyi byi tlakukile ku tlula bya Xikwembu, ni leswaku byi le nkarhini swinene. Malandza ya Xikwembu na wona ma nga sungula ku va ni langutelo leri, ma hanyisa leswi van’wana va hanyisaka xiswona emisaveni leyi. Xisweswo, loko a yisa xirhambo xa rirhandzu emahlweni xa leswaku ku yingisiwa ndzayo ya yena, Tata wa hina wa le tilweni u tlhela a katsa switsundzuxo leswi faneleke: “Ṅwana nga, u nga riv̌ali nawu wa mina, mbilu ya wena a yi hlayise ku lerisa ka mina; hikuv̌a ŝi ta engetela masiku ya wena, ni malembe ya ku hanya ka wena, ni ku rula ka wena. Ṭhemba Yehova hi mbilu ya wena hikwayo, u nga tiṭhembi ku tlhariha ka wena. U ṅwi nghenisa e makungwini ya wena hikwawo, o ta lulamisa tindlela ta wena. U nga tiv̌oni v̌utlhari, tšhav̌a Yehova, u papalata ŝo biha.”—Swivuriso 3:1, 2, 5-7.
4. Xana “vutlhari bya misava leyi” byi tele hi ndlela yihi, naswona ha yini byi ri “vuhunguki emahlweni ka Xikwembu”?
4 Vutlhari bya misava leyi byi kumeka hi xitalo naswona eka swihlovo swo tala. Ku ni swikolo swo tala swa dyondzo, naswona “a ku na ku hela e ku endleni ka tibuku le’to tala.” (Eklesiasta 12:12) Sweswi leswi vuriwaka rungula leri tlakukeke ra timhaka ta khompyuta swi tshembisa ku nyikela rungula leri nga pimiwangiki eka nhloko-mhaka yihi na yihi. Kambe ku va ni vutivi lebyi hinkwabyo a swi endli misava yi tlhariha swinene kumbe yi kota ku tlhantlha swiphiqo swa yona. Ematshan’weni ya sweswo, xiyimo xa misava xi ya xi nyanya ku biha siku rin’wana ni rin’wana. Hi laha ku twisisekaka, Bibele yi hi byela leswaku “vutlhari bya misava leyi i vuhunguki emahlweni ka Xikwembu.”—1 Vakorinto 3:19, 20.
5. Hi swihi switsundzuxo leswi Bibele yi swi nyikelaka mayelana ni “vutlhari bya misava leyi”?
5 Exiphen’wini lexi xo hetelela xa masiku ya makumu, swi fanele swi languteriwa leswaku muxisi lonkulu, Sathana Diyavulosi, u ta sungula mavunwa lamakulu hi matshalatshala yo lava ku onha ntshembo entiyisweni wa Bibele. Vuxopaxopi lebyikulu byi humese tibuku to tala leti mbambelaka leti tlhontlhaka ntiyiso ni ku tshembeka ka Bibele. Pawulo u tsundzuxe Mukreste-kulobye a ku: “We Timotiya, hlayisa leswi vekiweke emandleni ya wena. Fambela kule ni ku vulavula swa hava leswi nga riki na vukhongeri, ni ku kanetana hi leswi vuriwaka ‘vutivi’, kasi a hi byona. Van’wana hi ku swi landzelela, va lahlekeriwile hi vupfumeri.” (1 Timotiya 6:20, 21) Bibele yi ya emahlweni yi tsundzuxa: “Chavani leswaku munhu a nga mi phasi hi tidyondzo ta vutlhari, hi marito ya vunwa lama nga pfuniki nchumu, lama humaka eka mintolovelo ya vanhu ni ka mimoya leyi fumaka misava leyi, ku nga ri eka Kriste.”—Vakolosa 2:8.
Lwisana Ni Mboyamelo Wo Kanakana
6. Ha yini ku hiteka ku laveka leswaku ku siveriwa ku mila ka ku kanakana embilwini?
6 Endlelo rin’wana ra vukanganyisi ra Diyavulosi i ku byala ku kanakana emianakanyweni. U tshama a xalamukele ku vona ku tsana ko karhi eripfumelweni ivi a ku tirhisa. Un’wana ni un’wana loyi a kanakanaka u fanele a tsundzuka leswaku loyi a tisaka ku kanakana koloko hi loyi a nga byela Evha a ku: “Kunene Šikwembu ši te: Mi nga ṭhuki mi dya muri ni wuṅwe wa ntanga!” Loko Mukanganyisi se a byale ku kanakana emianakanyweni ya yena, goza leri landzeleke ku ve ku n’wi byela mavunwa, lawa a ma pfumeleke. (Genesa 3:1, 4, 5) Leswaku hi papalata ku lovisiwa ka ripfumelo ra hina hi ku kanakana tanihi leswi Evha a a ri xiswona, hi fanele hi xalamuka. Loko ku kanakana kutsongo mayelana na Yehovha, Rito rakwe kumbe nhlengeletano ya yena ku sungule ku va kona embilwini ya wena, teka magoza ya xihatla leswaku u ku susa ku nga si kula ku endla nchumu lowu nga lovisaka ripfumelo ra wena.—Ringanisa 1 Vakorinto 10:12.
7. I yini lexi nga endliwaka ku herisa ku kanakana?
7 I yini lexi nga endliwaka? Nakambe, ntlhantlho wa kona i ku tshembela eka Yehovha ni Rito rakwe. “Loko un’wana wa n’wina a pfumala vutlhari, a a kombele eka Xikwembu, lexi nyikaka vanhu hinkwavo hi tintswalo, ku nga ri na ku vilela, kutani ú ta nyikiwa byona. Ntsena, a a kombele hi ku pfumela, a nga kanakani, hikuva loyi a kanakanaka, ú fana ni gandlati ra lwandle leri biwaka ri yisiwa hala ni hala hi mheho.” (Yakobo 1:5, 6; 2 Petro 3:17, 18) Hikwalaho xikhongelo lexi humaka embilwini lexi yaka eka Yehovha i goza ro sungula. (Pisalema 62:8) Kutani, u nga kanakani ku ya kombela mpfuno eka valanguteri lava nga ni rirhandzu evandlheni. (Mintirho 20:28; Yakobo 5:14, 15; Yuda 22) Va ta ku pfuna ku kuma xihlovo xa ku kanakana ka wena, loku nga ha vaka ku vangiwa hi vutikukumuxi kumbe ku anakanya ko karhi loku hoxeke.
8. Xana mianakanyo ya vugwinehi hakanyingi yi sungurisa ku yini, naswona hi wihi ntlhantlho wa kona?
8 Ku hlaya kumbe ku yingisela mianakanyo ya vagwinehi kumbe filosofi ya misava xana ku tise ku kanakana loku nga ni khombo? Hi vutlhari, Bibele ya laya: “Endla hi matimba ku vonaka u ri la nkhensekaka emahlweni ka Xikwembu, u nga ri na tingana hi ntirho wa wena, u dyondzisa Rito ra ntiyiso hi ndlela leyinene. Chava ku vulavula swa hava leswi nga riki na vukhongeri, hikuva lava endlaka sweswo va tshamela ku sandza Xikwembu, kutani ku vulavula ka vona, ku ta fana ni xilondza lexi pfundzelaka xi borisa miri.” (2 Timotiya 2:15-17) Hi lemuke leswaku vo tala lava veke vahlaseriwa va vugwinehi va sungule ku teka goza leri hoxeke hi ku sungula va vilela hi ndlela leyi a va khomiwa hi yona enhlengeletanweni ya Yehovha. (Yuda 16) Ivi va landzela hi ku kuma swihoxo eka tidyondzo ta kona. Tanihi leswi muhandzuri a tekaka goza ra xihatla ku tsema xilondza lexi pfundzelaka, teka goza ra xihatla ro tsuvula mukhuva wo vilela emianakanyweni, ku nga eneriseki hi ndlela leyi swilo swi endliwaka ha yona evandlheni ra Vukreste. (Vakolosa 3:13, 14) Susa nchumu wihi na wihi lowu seketelaka ku kanakana ko tano.—Marka 9:43.
9. Xana tirhelo lerinene ra moya ri nga hi pfunisa ku yini ku tshama hi hanyile eripfumelweni?
9 Namarhela swinene eka Yehovha ni nhlengeletano ya yena. Hi ku tshembeka tekelela Petro, loyi hi xivindzi a nga te: “Hosi, hi nga ya ka mani xana? U ni marito ya vutomi lebyi nga heriki.” (Yohane 6:52, 60, 66-68) Vana ni xiyimiso lexinene xo dyondza Rito ra Yehovha leswaku u hlayisa ripfumelo ra wena ri tiyile, ku fana ni xitlhangu lexikulu, u ta kota ku “timela ha xona miseve hinkwayo leyi pfurhaka ya nyavuntswaka.” (Vaefesa 6:16) Tshama u ri karhi u hiseka evutirhelini bya Vukreste, u avela van’wana rungula ra Mfumo hi rirhandzu. Siku rin’wana ni rin’wana, anakanyisisa hi ku tlangela hi ndlela leyi Yehovha a ku katekiseke ha yona. Nkhensa hi leswi u nga ni vutivi bya ntiyiso. Ku endla swilo leswi hinkwaswo hi tirhelo lerinene ra Vukreste swi ta ku pfuna leswaku u tsaka, u tiyisela ni ku ka u nga kanakani.—Pisalema 40:4; Vafilipiya 3:15, 16; Vaheveru 6:10-12.
Ku Landzelela Nkongomiso Wa Yehovha eVukatini
10. Hikwalaho ka yini swi ri swa nkoka ngopfu-ngopfu ku languta eka Yehovha ku kuma nkongomiso evukatini bya Vukreste?
10 Loko a lunghiselela leswaku wanuna ni wansati va tshama swin’we va ri mpatswa lowu tekaneke, Yehovha a a nga lulamiselanga ku tata misava hi ndlela leyinene ntsena, kambe ni ku engetela ntsako wa vona. Hambiswiritano, xidyoho ni ku nga hetiseki swi tise swiphiqo leswikulu emhakeni ya vukati. Vakreste a va vekeriwi etlhelo eka leswi, tanihi leswi na vona va nga hetisekangiki naswona va tokotaka mintshikilelo ya vutomi bya manguva lawa. Hambiswiritano, loko va tshemba Yehovha ni Rito rakwe, Vakreste va nga humelela swinene evukatini ni le ku kuriseni ka vana va vona. Evukatini bya Vukreste ku hava ndhawu ya mikhuva ni mahanyelo ya misava. Rito ra Xikwembu ra hi tsundzuxa: “Ku tekana a ku ve loku xiximiwaka hi vanhu hinkwavo, vukati byi nga onhiwi hi ku kanganyisana, hikuva Xikwembu xi ta avanyisa timbhisa ni vaoswi.”—Vaheveru 13:4.
11. Loko ku tlhantlhiwa swiphiqo swa vukati, i yini lexi faneleke xi xiyiwa hi vanghana havambirhi?
11 Vukati lebyi hetisisiwaka hi ku ya hi ndzayo ya Bibele byi ni xiyimo xa rirhandzu, xiboho ni nsirhelelo. Wanuna ni wansati havambirhi va wu twisisa ni ku wu xixima nsinya wa nawu wa vunhloko. Loko ku va ni swiphiqo, hakanyingi swi vangiwa hi ku honisanyana ku tirhisa ndzayo ya Bibele. Loko va tlhantlha xiphiqo lexi tshamaka xi ri kona, i swa nkoka leswaku vanghana havambirhi va languta hi ku tshembeka leswi xiphiqo xi nga swona ivi va tirhana ni leswi swi xi vangaka ematshan’weni ya swikombiso swa xona. Loko ku burisana loku landzeleke ku yise eka ku nga twanani kutsongo kumbe va nga twanananga hi laha ku heleleke, mpatswa wu nga ha kombela mpfuno lowu nga taleliki eka tlhelo rin’we eka mulanguteri la nga ni rirhandzu.
12. (a) Xana Bibele yi nyikela ndzayo eka swiphiqo swihi leswi tolovelekeke swa vukati? (b) Hikwalaho ka yini ku ri ni xilaveko xa leswaku vanghana havambirhi va endla swilo hi ndlela ya Yehovha?
12 Xana xiphiqo xa kona xi katsa mbulavurisano, ku xixima mintlhaveko ya lowun’wana, ku xixima vunhloko kumbe ndlela leyi swiboho swi endliwaka ha yona? Xana xi khumbana ni ku kurisa vana kumbe ku ringanisela malunghana ni swilaveko swa rimbewu? Kumbe xana i ku hlela ka ndyangu mali, vutihungasi, vunakulobye, kumbe leswaku wansati u fanele a tirha kumbe i xa mayelana ni laha mi faneleke mi tshama kona? Ku nga khathariseki xiphiqo xa kona, Bibele yi nyikela xitsundzuxo lexi tirhaka hi ku tirhisa milawu hi ku kongoma kumbe hi ku tirhisa misinya ya milawu. (Matewu 19:4, 5, 9; 1 Vakorinto 7:1-40; Vaefesa 5:21-23, 28-33; 6:1-4; Vakolosa 3:18-21; Tito 2:4, 5; 1 Petro 3:1-7) Loko vanghana havambirhi va tshika ku lava swilo hi vutianakanyi ivi va pfumelela rirhandzu ri tikombisa hi laha ku teleke evukatini bya vona, ku ta va ni ntsako lowukulu. Vanghana va vukati havambirhi va fanele va navela swinene ku endla ku cinca loku faneleke, ku endla swilo hi ndlela ya Yehovha. “L’a anakanyaka e timhakeni o ta v̌ona v̌unene, ni loyi a ṭhembaka Yehova o katekile.”—Swivuriso 16:20.
Vantshwa—Yingisani Rito Ra Xikwembu
13. Hikwalaho ka yini swi nga olovi eka vantshwa va Vakreste ku kula va ri ni ripfumelo leri tiyeke eka Yehovha ni le ka Rito rakwe?
13 A swi olovi eka vantshwa va Vakreste ku kula va tiyile eripfumelweni loko va rhendzeriwe hi misava leyi yo biha. Xivangelo xa kona hi leswi “misava hinkwayo yi [nga] le hansi ka matimba ya Lowo biha,” Sathana Diyavulosi. (1 Yohane 5:19) Vantshwa va le hansi ka nhlaselo wa nala loyi wa tihanyi loyi a nga endlaka leswo biha swi vonaka swi lulamile. Malangutelo yo va wo sungula, ku navela ka vutianakanyi, ku navela lokukulu ka leswo biha ni swa tihanyi ni ku hlongorisa loku hundzeletiweke swinene ka mintsako—hinkwaswo leswi swi katsakanyiwa hi endlelo rin’we lerikulu leri tolovelekeke ra ku anakanya leri hlamuseriweke eBibeleni tanihi “moya lowu tirhaka nasweswi exikarhi ka vanhu lava nga yingisiki Xikwembu.” (Vaefesa 2:1-3) Sathana hi vukanganyisi u hlohlotele “moya” lowu hi tibuku ta xikolo, hi vuyimbeleri byo tala lebyi nga kona, emintlangwini ni le ka tindlela tin’wana ta ku titsakisa. Vatswari va fanele va xalamukela ku sivela minkucetelo yo tano hi ku pfuna vana va vona va kula va tshemba Yehovha ni Rito ra yena.
14. Xana vantshwa va nga “chava ku hluriwa hi ku navela loku telaka lavantshwa” hi ndlela yihi?
14 Pawulo u nyikele ndzayo ya vutatana eka nakulobye wa yena lontsongo Timotiya a ku: “Chava ku hluriwa hi ku navela loku telaka lavantshwa, u kongoma ku lulama, ni ku pfumela, ni rirhandzu ni ku rhula, swin’we ni lava khongelaka Hosi hi timbilu leti tengeke.” (2 Timotiya 2:22) Hambi leswi kun’wana “ku navela loku telaka lavantshwa” ku nga bihangiki, vantshwa va fanele va ku “chava” hi ku ka va nga ku pfumeleli ku va mhaka leyikulu, ku teka ni nkarhi wo endla mintirho ya Xikwembu. Ku aka miri, mintlangu, vuyimbeleri, ku titsakisa, ku tihungasa ni ku famba ngopfu, hambi leswi swi nga hoxangiki swi nga va ntlhamu loko swi va swilo swa nkoka evuton’wini. Ma balekeli hi laha ku heleleke mabulo lama nga pfuniki nchumu, ku heta nkarhi hi swilo leswi nga pfuniki nchumu, ku navela loku tlulaka mpimo ka rimbewu, ku titshamela ntsena u phirheka ni ku vilela hi ku ka u nga twisisiwi hi vatswari va wena.
15. Hi swihi swilo leswi nga humelelaka endhawini leyi tumbeleke ya le kaya leswi nga hoxaka xandla emhakeni ya leswaku vantshwa va hanya vutomi byimbirhi?
15 Hambi ku ri endhawini leyi tumbeleke ya le kaya, khombo ri nga tumbelela vantshwa. Loko ku hlaleriwa minongonoko yo biha ya TV ni ya tivhidiyo leyi vangaka ku lwa, ku navela ko endla swilo leswo biha ku nga ha byaleka. (Yakobo 1:14, 15) Bibele ya laya: “Ṅwina la’mi ranḍaka Yehova, v̌engani le’ŝo biha!” (Pisalema 97:10; 115:11) Yehovha wa swi tiva loko un’wana a ringeta ku hanya vutomi byimbirhi. (Swivuriso 15:3) Vantshwa va Vakreste, rhalarhalani emakamareni ya n’wina. Xana emakhumbini mi veke swifaniso swa vanhu va mahanyelo yo biha lava nga ni ndhuma va mintlangu kumbe va vuyimbeleri, kumbe mi veke swilo leswinene leswi nga switsundzuxo leswinene? (Pisalema 101:3) Ewadirobeni ya wena, xana u ni swiambalo leswi langutekaka, kumbe xana swin’wana swa swiambalo swa wena swi kombisa switayele swo biha swa swiambalo swa misava leyi? Hi tindlela leti nga twisisekiki Diyavulosi a nga ku phasa loko u ti nghenisa endzingweni hi ku lava ku ringeta swilo swo biha. Bibele hi vutlhari ya laya: “Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka.”—1 Petro 5:8.
16. Xana ndzayo ya Bibele yi nga n’wi pfunisa ku yini muntshwa leswaku a endla un’wana ni un’wana la khathalaka a tinyungubyisa hi yena?
16 Bibele yi ku byela leswaku u languta vanghana va wena. (1 Vakorinto 15:33) Vanghana va wena va fanele va va lava chavaka Yehovha. U nga pfumeli ku hluriwa hi ntshikilelo wa tintangha. (Pisalema 56:11; Swivuriso 29:25) Yingisa vatswari va wena lava chavaka Xikwembu. (Swivuriso 6:20-22; Vaefesa 6:1-3) Titshege hi vakulu leswaku u kuma nkongomiso ni xikhutazo. (Esaya 32:1, 2) Hlayisa miehleketo ya wena ni mahlo ya wena swi ri eka mimpimanyeto ni tipakani ta moya. Langutisisa minkarhi yo endla nhluvuko hi tlhelo ra moya ni ku hlanganyela emintirhweni ya vandlha. Dyondza ndlela yo endla swilo hi mavoko ya wena. Tshama u ri ni ripfumelo leri tiyeke, leri hanyaka, kutani u ta vonaka hakunene leswaku u munhu wo hlawuleka—munhu wo hlawuleka la faneriwaka hi vutomi emisaveni leyintshwa ya Yehovha! Tata wa hina wa le tilweni u ta tinyungubyisa ha wena, vatswari va wena va laha misaveni va ta ku tsakela, naswona vamakwenu va wena va xinuna ni va xisati va Vakreste va ta khutazeka hikwalaho ka wena. Leswi hi swona swi nga swa nkoka!—Swivuriso 4:1, 2, 7, 8.
17. I mimpfuno yihi leyi telaka lava tshembaka Yehovha ni Rito rakwe?
17 Hi marito yo tlhokovetsela mupisalema u huhuteriwe ku tsala a ku: “Yehova . . . a nga aleri ntšhumu e ka la’v̌a fambaka e ku lulameni. Oho Yehova wa tinyimpi, ku katekile l’a ku ṭhembaka!” (Pisalema 84:11, 12) Ina, ntsako ni ku humelela, ku nga ri ku hetiwa matimba ni ku tsandzeka, i swilo leswi nga ta tela hinkwavo lava tshembelaka eka Yehovha ni le ka Rito ra yena, Bibele.—2 Timotiya 3:14, 16, 17.
A Wu Ta Hlamurisa Ku Yini?
◻ Ha yini Vakreste va nga fanelanga va veka ku tshemba ka vona eka “vutlhari bya misava leyi”?
◻ I yini lexi faneleke xi endliwa loko munhu a ri ni ku kanakana?
◻ Xana ku endla swilo hi ndlela ya Yehovha swi tisa ku humelela ni ntsako evukatini hi ndlela yihi?
◻ Xana Bibele yi va pfunisa ku yini vantshwa ku “chava ku hluriwa hi ku navela loku telaka lavantshwa”?
[Xifaniso lexi nga eka tluka 23]
Vakreste va hundzulukela eka Yehovha ni le ka Rito ra yena, loko va ri karhi va ala “vutlhari bya misava leyi” tanihi vuhunguki
[Xifaniso lexi nga eka tluka 25]
Mindyangu leyi tshembeka Yehovha ni Rito rakwe ya humelela swinene yi tlhela yi va ni tsako