Swivutiso Swa Vahlayi

Loko Vakreste va nga beji hi mali, xana va nga amukela thikithi kumbe va hlanganyela eku hlawuleni ka bokisi, laha va nga winaka masagwadi?

Lexi i xivutiso lexi tlakukaka nkarhi na nkarhi, kutani se xi hlamuseriwile etibukwini ta hina. Eka tindzimi tin’wana, hi endle swikombo swa tibuku ta hina, tanihi Watch Tower Publications Index 1930-1985 (ni leyi fanaka na yona leyi sukelaka eka 1986-1990). Loko Mukreste a ri ni swikombo sweswo hi ririmi rakwe, swi nga pfuna swinene eku kumeni ka tinhlamulo leti enerisaka hi ku hatlisa.

Xivutiso lexi vutisiweke la henhla ko va xikombiso. Loko u languta eka Index ya 1930-1985 ehansi ka xihloko lexi nge “Questions From Readers,” u nga kuma xihlokwana lexi nge, “‘drawings,’ may Christian accept ticket for?” Muhlayi u kombeteriwa eka xiyenge lexi nge “Questions From Readers” eka The Watchtower ya February 15, 1973, tluka 127.a Timbhoni to tala ti ni vholumo (kumbe minkandziyiso ha yin’we-yin’we) ya The Watchtower ya 1973, kumbexana yi nga kumiwa elayiburari ya Tiholo ta Mfumo to tala.

Bulo leri humesiweke hi 1973 ri kombe leswaku Vakreste va papalata mathikithi wahi ni wahi yo gembula kumbe ku hlawula bokisi loku khumbaka ku xava mathikithi (tanihi mathikithi yo wina mali) kumbe ku humesa mali leswaku u kuma sagwadi. Hi ku olova, hina hi papalata ku gembula, loku kahle-kahle ku kombisaka makwanga.—1 Vakorinto 5:11; 6:10; Vaefesa 4:19; 5:3, 5.

Hambi swi ri tano, xitolo kumbe bindzu, xi nga ha tirhisa ku hlawula bokisi tanihi ndlela yo navetisa. Leswi munhu a fanelaka ku swi endla i ku yisa vito rakwe kumbe a rhumela fomo kumbe thikithi, handle ko xava nchumu wo karhi. Ku hlawula bokisi i xiphemu xo navetisa; i ndlela leyi nga yiki hi nghohe ya ku vona leswaku i mani la nga ta nyikiwa sagwadi kumbe masagwadi. Vakreste van’wana va nga ha ehleketa leswaku va nga ha amukela sagwadi ra hlawulani bokisi leri nga katsiki ku gembula, tanihi leswi va nga ha amukelaka xikombiso xa mahala kumbe tinyiko tin’wana leti bindzu kumbe xitolo xi nga ha ti tirhisaka eka nongonoko wa xona wo navetisa.

Hambi swi ri tano, Vakreste van’wana va papalata xin’wana ni xin’wana xa muxaka lowu, hikuva a va swi lavi ku khunguvanyisa kumbe ku vilerisa van’wana ni ku lava ku hambana ni rhengu rihi na rihi ro tshembela eka Nkateko. Hi laha Esaya 65:11 (NW) yi kombaka ha kona, malandza ya Xikwembu a ma tihlanganisi ni “xikwembu xa Nkateko” kumbe “xikwembu xa ku Kunguhateriwa.” Nakambe va nga ha vona leswaku a va swi lavi ku va xiphemu xa ku navetisa kwihi na kwihi loku lava winaka va nga ha komberiwaka ku ku nghenela. Lava titwaka hi ndlela leyi a va fanelanga va khunguvanyisiwa hi Mukreste kumbe Vakreste lava ripfalo ra vona ri va pfumelelaka ku nghenela ku hlawula koloko ka bokisi.—Ringanisa Varhoma 14:1-4.

[Nhlamuselo ya le hansi]