Amukela Switshembiso Swa Xikwembu Hi Ku Va Ni Ripfumelo

“Hi nyikiwile switshembiso swa [Yehovha Xikwembu] leswikulu ngopfu, swa risima.”—2 PETRO 1:4.

1. I yini lexi hi pfunaka ku va ni ripfumelo?

YEHOVHA u lava leswaku hi va ni ripfumelo eka switshembiso swakwe. Kambe, “a hi hinkwavo lava nga ni ku pfumela.” (2 Vatesalonika 3:2) Mfanelo leyi i mbhandzu wa moya lowo kwetsima kumbe matimba lama tirhaka ya Xikwembu. (Vagalatiya 5:22, 23) Hikwalaho, lava kongomisiwaka hi moya wa Yehovha hi vona ntsena lava va nga vaka ni ripfumelo.

2. Xana muapostola Pawulo u ri hlamusela njhani ‘ripfumelo’?

² Kasi ripfumelo i yini? Muapostola Pawulo u ri vitana “ku kholwa hi tlhelo ra swilo leswi nga voniwiki.” Ku kholwa ka leswi swi nga voniwiki ku tiyile swinene lerova ripfumelo ri ringanisiwa na kona. Nakambe ripfumelo i “ku tshemba loku tiyeke ehenhla ka swilo leswi languteriwaka” hikuva lava va nga ni mfanelo leyi va ni xitiyisekiso xa leswaku hinkwaswo leswi tshembisiweke hi Yehovha Xikwembu swi tiyile lerova swi fana ni loko se swi endlekile.—Vaheveru 11:1.

Ripfumelo Ni Switshembiso Swa Yehovha

3. Xana Vakreste lava totiweke va ta vona yini loko va va ni ripfumelo?

³ Leswaku hi tsakisa Yehovha, hi fanele hi va ni ripfumelo eka switshembiso swa yena. Muapostola Petro u kombise leswi eka papila rakwe ra vumbirhi leri huhuteriweke, leri tsariweke kwalomu ka 64 C.E. U kombise leswaku loko Vakreste-kulobye lava totiweke va ri ni ripfumelo, a va ta vona ku hetiseka ka “switshembiso . . . leswikulu ngopfu, swa risima” swa Xikwembu. Hikwalaho, a va ta va “lava averiweke vutomi lebyi humaka eka Xikwembu” tanihi vadyandzhaka swin’we na Yesu Kreste eMfun’weni wa le tilweni. Hi ripfumelo ni mpfuno wa Yehovha Xikwembu, va ponile ku va mahlonga ya mahanyelo ni swiendlo leswi thyakeke swa misava leyi. (2 Petro 1:2-4) Swi ehlekete! Lava va nga ni ripfumelo va tiphina hi ntshunxeko lowu fanaka wa risima namuntlha.

4. Hi tihi timfanelo leti hi faneleke hi seketela ripfumelo ra hina ha tona?

⁴ Ku va ni ripfumelo eka switshembiso swa Yehovha ni ku tlangela ntshunxeko wa hina lowu humaka eka Xikwembu swi fanele swi hi susumetela ku tikarhatela ku va Vakreste lava vekaka xikombiso lexinene. Petro u te: “Endlani hi matimba hinkwawo ku seketela ku pfumela ka n’wina hi vunene, vunene byona mi byi seketela hi vutivi, mi seketela vutivi hi ku tikhoma, ni ku tikhoma hi ku tiyisela, ni ku tiyisela hi [ku tinyiketela eka Xikwembu, ni ku tinyiketela eka Xikwembu hi rirhandzu ra vumakwerhu, rirhandzu ra vumakwerhu, NW] hi rirhandzu.” (2 Petro 1:5-7) Xisweswo Petro u hi nyika nxaxamelo lowu swi nga vaka swinene leswaku hi wu nhlokohata. Sweswi, a hi kambisiseni timfanelo leti.

Swiphemu Swa Nkoka Swa Ripfumelo

5, 6. Vunene i yini, naswona hi nga ri seketela njhani ripfumelo ra hina ha byona?

⁵ Petro u vule leswaku hi fanele hi kombisana ni ku seketela ripfumelo ra hina hi vunene, vutivi, ku tikhoma, ku tiyisela, ku tinyiketela eka Xikwembu, rirhandzu ra vumakwerhu ni rirhandzu. Hi fanele hi tikarhatela ku endla timfanelo leti ti va swiphemu swa nkoka swa ripfumelo ra hina. Hi xikombiso, vunene a hi mfanelo leyi hi yi kombisaka handle ka ripfumelo. Mutsari wa xihlamusela-marito W. E. Vine u kombisa leswaku eka 2 Petro 1:5, “vunene byi nghenisiwa tanihi mfanelo ya nkoka eku kombiseni ka ripfumelo.” Yin’wana ni yin’wana ya timfanelo letin’wana leti Petro a ti boxeke yi fanele yi tlhela yi va xiphemu xa ripfumelo ra hina.

⁶ Xo rhanga, hi fanele hi seketela ripfumelo ra hina hi vunene. Ku va lonene swi vula ku endla leswi lulameke emahlweni ka Xikwembu. Eka rito ra Xigriki leri laha ri hundzuluxeriweke va ku “vunene,” vuhundzuluxeri byin’wana byi tirhisa “musa.” (New International Version; The Jerusalem Bible; Today’s English Version) Vunene byi endla leswaku hi papalata swilo swo biha kumbe ku vavisa vanhu van’wana. (Pisalema 97:10) Nakambe byi hi nyika xivindzi xo endla leswinene ku pfuna van’wana emoyeni, emirini ni le mintlhavekweni.

7. Ha yini hi fanele hi seketela ripfumelo ni vunene bya hina hi vutivi?

⁷ Ha yini Petro a hi khongotela ku seketela ripfumelo ni vunene bya hina hi vutivi? Ina, tanihi leswi hi langutanaka ni mintlhontlho leyintshwa eripfumelweni ra hina, hi fanele hi va ni vutivi leswaku hi hlawula leswi lulameke eka leswo biha. (Vaheveru 5:14) Hi dyondzo ya Bibele ni ntokoto eku tirhiseni ka Rito ra Xikwembu ni ku tirhisa vutlharhi evuton’wini bya siku na siku, hi kurisa vutivi bya hina. Nakambe, leswi swi hi pfuna ku hlayisa ripfumelo ra hina ni ku hambeta hi endla leswi nga swinene loko hi ringiwa.—Swivuriso 2:6-8; Yakobo 1:5-8.

8. Ku tikhoma i yini, naswona ku hlanganisa ku yini ni ku tiyisela?

⁸ Leswaku hi kota ku hlangavetana ni miringo hi ripfumelo, hi fanele hi seketela vutivi bya hina hi ku tikhoma. Rito ra Xigriki leri vulaka “ku tikhoma” ri kombisa vuswikoti bya ku tilawula. Mbhandzu lowu wa moya wa Xikwembu wu hi pfuna ku lawula mianakanyo, marito ni mahanyelo ya hina. Hi ku hambeta hi tikhoma, hi engetela ku tiyisela eka ku tikhoma. Rito ra Xigriki leri vulaka “ku tiyisela” ri kandziyisa ku tiya hi xivindzi, hayi ku hela mongo loko hi langutane ni swiphiqo leswikulu leswi nga papalatekiki. Yesu u tiyisele mhandzi ya nxaniso hikwalaho ka ntsako lowu a wu vekiwe emahlweni ka yena. (Vaheveru 12:2) Matimba lama humaka eka Xikwembu swin’we ni ku tiyisela swi tiyisa ripfumelo ra hina naswona swi hi pfuna leswaku hi tsaka enhlomulweni, hi hlula ndzingo ni ku papalata ku landzula ripfumelo ra hina loko hi xanisiwa.—Vafilipiya 4:13.

9. (a) Ku tinyiketela eka Xikwembu i yini? (b) Ha yini hi seketela ku tinyiketela ka hina eka Xikwembu hi rirhandzu ra vumakwerhu? (c) Xana rirhandzu ra hina ra vumakwerhu hi nga ri seketela njhani hi rirhandzu?

⁹ Ku tiyisela ka hina hi fanele hi ku seketela hi ku tinyiketela eka Xikwembu—ku xixima, ku gandzela ni ku tirhela Yehovha. Ripfumelo ra hina ra kula loko hi tinyiketela eka Xikwembu ivi hi vona ndlela leyi Yehovha a khomaka vanhu vakwe ha yona. Kambe, leswaku hi kombisa ku chava Xikwembu, hi fanele hi va ni rirhandzu ra vumakwerhu. Phela, “la nga rhandziki makwavo loyi a n’wi vonaka hi mahlo, a nge koti ku rhandza Xikwembu lexi a nga xi voniki.” (1 Yohane 4:20) Timbilu ta hina ti fanele ti hi susumetela ku kombisa rirhandzu ra ntiyiso eka malandza man’wana ya Yehovha ni ku va ehleketelela nkarhi hinkwawo. (Yakobo 2:14-17) Kambe ha yini hi byeriwa ku seketela rirhandzu ra hina ra vumakwerhu hi rirhandzu? Swi le rivaleni leswaku Petro a a vula leswaku hi fanele hi rhandza vanhu hinkwavo, ku nga ri vamakwerhu ntsena. Rirhandzu leri ri kombisiwa ngopfu-ngopfu hi ku chumayela mahungu lamanene ni ku pfuna vanhu emoyeni.—Matewu 24:14; 28:19, 20.

Mimbuyelo Leyi Nga Faniki

10. (a) Xana hi nga hanyisa ku yini, loko ho seketela ripfumelo ra hina hi vunene, vutivi, ku tikhoma, ku tiyisela, ku tinyiketela eka Xikwembu, rirhandzu ra vumakwerhu ni rirhandzu? (b) Xana ku humelela yini loko loyi a tivulaka Mukreste a pfumala timfanelo leti?

¹⁰ Loko hi seketela ripfumelo ra hina hi vunene, vutivi, ku tikhoma, ku tiyisela, ku tinyiketela eka Xikwembu, rirhandzu ra vumakwerhu ni hi rirhandzu, hi ta ehleketa, hi vulavula ni ku endla swilo hi ku landza tindlela leti amukelekaka eka Xikwembu. Ku hambana ni leswi, loko loyi a tivulaka Mukreste a tsandzeka ku kombisa timfanelo leti, u pfaleka mahlo emoyeni. U ‘pfala mahlo yakwe a nga ku voni ku vonakala’ loku humaka eka Xikwembu a tlhela a rivala leswaku u basisiwile eswidyohweni swo rhanga. (2 Petro 1:8-10; 2:20-22) Hi nga tshuki hi tsandzeka hi ndlela yoleyo ivi hi lahlekeriwa hi ku va ni ripfumelo eka switshembiso swa Xikwembu.

11. I yini lexi hi nga xi langutelaka eka vatotiwa vo tshembeka?

¹¹ Vakreste vo tshembeka lava totiweke va ni ripfumelo eka switshembiso swa Yehovha naswona va tikarhatela leswaku ku rhambiwa ni ku hlawuriwa ka vona ku tiya. Ku nga khathariseki swihinga leswi nga kona endleleni ya vona, hi nga langutela leswaku va kombisa timfanelo ta ku chava Xikwembu. Vatotiwa vo tshembeka ‘va nyikiwa lunghelo lerikulu ro nghena emfun’weni lowu nga heriki wa Yesu Kreste’ hi ku pfuxeriwa ka vona evuton’wini bya moya etilweni.—2 Petro 1:11.

12. Marito lama nga eka 2 Petro 1:12-15 hi fanele hi ma twisisa hi ndlela yihi?

¹² Petro a a swi vona leswaku u ta fa ku nga ri khale, naswona a a langutele ku pfukela evuton’wini bya le tilweni eku heteleleni. Kambe loko a ha hanya ‘etabernakeleni leyi’—miri wakwe wa nyama—u ringete ku pfuxa ripfumelo ra vapfumeri-kulobye ni ku va tiyisa hi ku va tsundzuxa swilo leswi lavekaka leswaku va amukeriwa hi Xikwembu. Loko se a file, vamakwavo va Petro va xinuna ni va xisati va tiyise ripfumelo ra vona hi ku titsundzuxa marito yakwe.—2 Petro 1:12-15.

Ku Va Ni Ripfumelo eRitweni Ra Vuprofeta

13. Xana Xikwembu xi byi nyikele njhani vumbhoni lebyi tiyisaka ripfumelo malungana ni ku ta ka Kreste?

¹³ Xikwembu hi xoxe xi nyike vumbhoni lebyi tiyisaka ripfumelo malunghana ni ntiyiso wa ku ta ka Yesu “hi matimba ni ku kwetsima lokukulu.” (Matewu 24:30; 2 Petro 1:16-18) Hi ku pfumala vumbhoni vaprista va vuhedeni a va garingeta mavunwa hi swikwembu swa vona, Petro, kasi Yakobo na Yohane va tivonele hi mahlo ya vona ku kwetsima ka Kreste loko a hundzuka a va exiyin’weni xo kwetsima. (Matewu 17:1-5) Va n’wi vone a kwetsimisiwa naswona va twe mpfumawulo wa rito ra Xikwembu xi amukela Yesu tanihi N’wana wa xona la rhandzekaka. Ku amukeriwa koloko ni ku vangama loku nyikiweke Kreste a ku ri ku kombisiwa ka matimba ni ku kwetsima ka yena. Hikwalaho ka ku hlavutela loku ka Xikwembu, Petro u thye ndhawu leyi, leyi kumbexana a yi ri exihlungweni xa Hermoni, a ku i “ntshava leyo hlawuleka.”—Ringanisa Eksoda 3:4, 5.

14. Xana ripfumelo ra hina ri fanele ri khumbiwa njhani hi ku hundzuka ka Yesu?

¹⁴ Xana ku hundzuka ka Yesu xiyimo ku fanele ku ri khumba njhani ripfumelo ra hina? Petro u te: “Hikokwalaho, rito ra v[u]profeta, hina hi ri kuma ri tiyile ku tlula ni khale. Mi ta va mi endla swona loko mi hlayisa swinene rito rero, ku fana ni rivoni leri voningaka lomu ku nga ni munyama, ku fikela loko vurhonga byi tshwuka, ni loko nyeleti ya mixo yi humelela etimbilwini ta n’wina.” (2 Petro 1:19) “Rito ra v[u]profeta” entiyisweni a ri nga hlanganisi vuprofeta bya Matsalwa ya Xiheveru ntsena malunghana na Mesiya kambe a ri hlanganisa ni marito ya Yesu ya leswaku u ta ta “hi matimba ni ku kwetsima lokukulu.” Xana rito ri ‘tiyisiwe swinene’ njhani hi ku hundzuka? Xiendlakalo lexi xi tiyise rito ra vuprofeta malunghana ni ku ta ka Kreste loku vangamaka ematimbeni ya Mfumo.

15. I yini lexi katsekaka eku yingiseni ka rito ra vuprofeta?

¹⁵ Leswaku hi tiyisa ripfumelo ra hina, hi fanele hi yingiserisisa rito ra vuprofeta. Leswi swi katsa ku dyondza rito rero, hi bula ha rona eminhlanganweni ya Vukreste ni ku tirhisa ndzayo ya rona. (Yakobo 1:22-27) Hi fanele hi ri endla “rivoni leri voningaka lomu ku nga ni munyama,” ri voningela timbilu ta hina. (Vaefesa 1:18) Loko hi endla sweswo ri ta hi kongomisa ku fikela loko “nyeleti ya mixo,” kumbe “nyeleti leyo vangama ya mixo,” Yesu Kreste, yi vonakala eku kwetsimeni. (Nhlavutelo 22:16) Nhlavutelo yoleyo yi ta vula ku lovisiwa eka lava nga riki na ripfumelo, ni mikateko eka lava nga ni ripfumelo.—2 Vatesalonika 1:6-10.

16. Ha yini hi fanele hi kholwa leswaku switshembiso hinkwaswo swa vuprofeta bya Rito ra Xikwembu swi ta hetiseka?

¹⁶ Vaprofeta va Xikwembu a ku nga ri vavanuna vo tlhariha ntsena lava a va vhumbha hi vutlharhi, hikuva Petro u te: “Ku hava rito ni rin’we ra vaprofeta leri teke hi ku titwa ka munhu, kambe vanhu lava susumetiweke hi Moya lowo Kwetsima, va vurile leswi humaka eka Xikwembu.” (2 Petro 1:20, 21) Hi xikombiso, Davhida u te: “Moya wa Yehova wu v̌ulav̌ula ha mina.” (2 Samuwele 23:1, 2) Naswona Pawulo u tsarile: “Matsalwa lawa hinkwawo ma huhutiwile hi Xikwembu.” (2 Timotiya 3:16) Tanihi leswi vaprofeta va Xikwembu a va huhuteriwa hi moya wa xona, hi nga va ni ripfumelo ra leswaku switshembiso hinkwaswo leswi nge Ritweni ra xona swi ta hetiseka.

A Va Ri Ni Ripfumelo Eka Switshembiso Swa Xikwembu

17. Hi xihi xitshembiso lexi a xi ri xisekelo xa ripfumelo ra Avele?

¹⁷ Switshembiso swa Yehovha a swi ri xisekelo xa ripfumelo ra ‘papa lerikulu’ ra timbhoni takwe ta le mahlweni ka Vukreste. (Vaheveru 11:1–12:1) Hi xikombiso, Avele a ri ni ripfumelo eka xitshembiso xa Xikwembu xa ‘mbewu’ leyi a yi ta faya nhloko ya “nyoka.” Ku ve ni vumbhoni bya ku hetiseka ka xigwevo xa Xikwembu eka vatswari va Avele. Loko va humile aEdeni, Adamu ni ndyangu wakwe va dye xinkwa hi nyuku wa vona hikuva misava leyi rhukaniweke a yi humesa mitwa ni mahlwehlwe. Avele u fanele a swi vonile leswaku Evha a a navela nuna wakwe naswona u swi vonile leswaku Adamu a a n’wi fuma. Handle ko kanakana a a vula leswaku ku tika kakwe ku vavisa ku yini. Naswona nyangwa ya ntanga wa Edeni a yi rindziwile hi tikerubu ni fumu leri vuvumelaka. (Genesa 3:14-19, 24) Hinkwaswo leswi a swi endla ‘xikombiso lexi tiyeke’ lexi tiyisaka Avele leswaku ku kutsuriwa a ku ta ta hi Mbewu leyi tshembisiweke. Hi ripfumelo, Avele u endlele Xikwembu gandzelo leri a ri tlula ra Kayini hi ku hlawuleka.—Vaheveru 11:1, 4.

18, 19. Xana Abrahama na Sara va kombise ripfumelo hi tindlela tihi?

¹⁸ Vapatriarka Abrahama, Isaka na Yakobo na vona a va ri ni ripfumelo eka switshembiso swa Yehovha. Abrahama a a pfumela eka xitshembiso xa Xikwembu xa leswaku mindyangu hinkwayo ya misava yi ta tikatekisa ha yena ni leswaku mbewu yakwe yi ta nyikiwa tiko. (Genesa 12:1-9; 15:18-21) N’wana wakwe Isaka ni ntukulu wakwe Yakobo a va ri “vadyandzhaka va xitshembiso xin’we ni xa yena.” Hi ripfumelo Abrahama ‘u tshame tikweni ra xitshembiso tanihi muluveri’ naswona a a langutele “muti lowu nga ni masungulo lamanene,” Mfumo wa Xikwembu wa le tilweni lowu a a ta pfuxiwa ka wona a kuma vutomi emisaveni. (Vaheveru 11:8-10) Xana wena u ni ripfumelo ro fana ni leri?

¹⁹ Nsati wa Abrahama, Sara, a a ri ni malembe ya kwalomu ka 90 hi vukhale naswona a a wu hundze khale nkarhi wakwe wa ku kuma n’wana, loko a ve ni ripfumelo eka xitshembiso xa Xikwembu, u nyikiwe matimba yo ‘humesa mbewu’ a veleka Isaka. Xisweswo, eka Abrahama wa malembe ya 100 hi vukhale, “loyi a swo fana ni loko a file” emhakeni ya ku veleka, eku heteleleni “ku humile vatukulu lavo tala vo kota tinyeleti ta tilo.”—Vaheveru 11:11, 12; Genesa 17:15-17; 18:11; 21:1-7.

20. Hambi leswi vapatriaka va nga ku vonangiki hinkwako ku hetiseka ka switshembiso swa Xikwembu eka vona, xana va endle yini?

²⁰ Vapatriarka vo tshembeka va fe va nga si ku vona ku hetiseka ka switshembiso swa Xikwembu eka vona. Kambe, “va swi vonile [swilo leswi tshembisiweke] ni ku swi tsakela hi le kule, va ri karhi va tivula valuveri ni vaendzi emisaveni.” Tinxaka ti hundzile Tiko leri Tshembisiweke ri nga si va tiko ra vatulu va Abrahama. Hambi swi ri tano, vapatriarka lava chavaka Xikwembu a va ri ni ripfumelo eka switshembiso swa Yehovha evuton’wini bya vona hinkwabyo. Hikwalaho ka leswi va nga tshikangiki ripfumelo, hi ku hatlisa va ta pfuxeriwa evuton’wini emfun’weni wa la misaveni wa “muti” lowu Xikwembu xi va lunghiseleke wona, Mfumo wa Vumesiya. (Vaheveru 11:13-16) Hi ndlela leyi fanaka, ripfumelo ri nga hi hlayisa hi tshembekile eka Yehovha hambi loko hi nga ku voni xikan’we ku hetiseka ka switshembiso swakwe swo saseka. Ripfumelo ra hina ri ta tlhela ri hi susumetela ku yingisa Xikwembu, ku kotisa Abrahama. Naswona tanihi leswi a nyikeke vatukulu vakwe ndzhaka ya moya, na hina hi nga pfuna vana va hina leswaku va va ni ripfumelo eka switshembiso leswinene swa Yehovha.—Vaheveru 11:17-21.

Ripfumelo I Ra Nkoka Eka Vakreste

21. Leswaku hi amukeleka eka Xikwembu namuntlha, i yini lexi faneleke xi katsiwa eripfumelweni ra hina?

²¹ Entiyisweni, ku na swin’wana eripfumelweni ku tlula ku kholwa leswaku switshembiso swa Yehovha swi ta hetisela. Ematin’wini hinkwawo ya munhu, hi boheke ku va ni ripfumelo eka Xikwembu hi tindlela to hambana-hambana leswaku xi ta hi amukela. Pawulo u kombise leswaku “ehandle ka ku pfumela a swi endleki ku tsakisa [Yehovha] Xikwembu. Un’wana ni un’wana loyi a lavaka ku tshinelela Xikwembu ú fanele ku pfumela leswaku xi kona, ni leswaku xi hakela lava va xi lavaka [hi ku hiseka, NW].” (Vaheveru 11:6) Leswaku munhu a amukeriwa hi Yehovha namuntlha, u fanele a va ni ripfumelo eka Yesu Kreste ni le ka gandzelo ra nkutsulo leri Xikwembu xi ri endleke ha yena. (Varhoma 5:8; Vagalatiya 2:15, 16) Swi hi laha Yesu hi byakwe a vuleke ha kona: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki. Loyi a pfumelaka eka N’wana, ú ni vutomi lebyi nga heriki; loyi a nga yingisiki N’wana; a nga ka a nga kumi vutomi, kambe vukari bya Xikwembu byi tshame henhla ka yena.”—Yohane 3:16, 36.

22. Xana Mfumo wa Vumesiya wu ta hetisisa xitshembiso xihi?

²² Yesu u endla xiphemu xa nkoka eku hetisekeni ka switshembiso swa Xikwembu malunghana ni Mfumo lowu Vakreste va wu khongelelaka. (Esaya 9:6, 7; Daniyele 7:13, 14; Matewu 6:9, 10) Hi laha Petro a kombiseke ha kona, ku hundzuka ku tiyise rito ra vuprofeta hi ku ta ka Yesu ematimbeni ni ku kwetsima ka Mfumo. Mfumo wa Vumesiya wu ta hetisisa xitshembiso xin’wana xa Xikwembu, hikuva Petro u tsarile: “Hi ku ya hi ku tshembisa ka Hosi, hi langutele matilo lamantshwa ni misava leyintshwa, laha ku nga ta va ni ku lulama.” (2 Petro 3:13) Vuprofeta lebyi fanaka byi hetisekile loko mahlonga ya Vayuda le Babilona ma tlheriseriwa ka rikwavo hi 537 B.C.E. ehansi ka hulumendhe leyi a yi fumiwa hi Zerubabele enkarhini wolowo Yoxuwa yena a ri muprista lonkulu. (Esaya 65:17) Kambe Petro u kombetele enkarhini lowu taka laha “matilo lamantshwa”—Mfumo wa Vumesiya wa le tilweni—wu nga ta fuma “misava leyintshwa,” vanhu vo lulama lava nga ta hanya eka xirhendzevutana lexi.—Ringanisa Pisalema 96:1.

23. Xana hi swihi swivutiso leswi hi nga ta bula ha swona malunghana ni vunene?

²³ Tanihi malandza yo tshembeka ya Yehovha ni valandzeri va N’wana wakwe la rhandzekaka, Yesu Kreste, hi navela misava leyintshwa ya Xikwembu leyi tshembisiweke. Ha swi tiva leswaku yi tshinele, naswona hi ni ripfumelo ra leswaku switshembiso hinkwaswo swo saseka swa Yehovha swi ta hetiseka. Leswaku hi amukeleka emahlweni ka Xikwembu xa hina, hi fanele hi tiyisa ripfumelo ra hina hi ku ri seketela hi vunene, vutivi, ku tikhoma, ku tiyisela, ku tinyiketela eka Xikwembu, rirhandzu ra vumakwerhu ni rirhandzu.a Sweswi, ku nga ha vutisiwa leswaku, Xana vunene hi nga byi kombisisa ku yini? Naswona xana vunene bya hina byi ta hi pfunisa ku yini hina ni van’wana, ngopfu-ngopfu vanghana va hina va Vakreste, lava amukeleke switshembiso swa Xikwembu hi ku va ni ripfumelo?

[Nhlamuselo ya le hansi]

Tinhlamulo Ta Wena Hi Tihi?

◻ Xana ‘ripfumelo’ ri nga hlamuseriwa njhani?

◻ Hi ku ya hi 2 Petro 1:5-7, hi tihi timfanelo leti faneleke ti seketela ripfumelo ra hina?

◻ Xana ku hundzuka ka Yesu ku fanele ku ri khumbisa ku yini ripfumelo ra hina?

◻ Hi swihi swikombiso swa ripfumelo leswi vekiweke hi Avele, Abrahama, Sara ni van’wana va khale?

[Xifaniso lexi nga eka tluka 15]

Xana a wu swi tiva leswaku ku hundzuka ka Yesu ku nga ri khumba njhani ripfumelo ra munhu?