Xiviko Xa Vahuweleri Va Mfumo

Muntshwa Wo Rhandza Xitimela A Dyondza Ntiyiso

LOKO mbilu ya munhu yi voyamele eka leswinene, kutani Yehovha Xikwembu, hi ku tirhisa Kreste Yesu ni tintsumi ta yena ta le tilweni, u ta vona leswaku munhu wo tano la fanaka ni nyimpfu u hetelela a hlangane ni mahungu lamanene ya Mfumo. Hi ku famba ka nkarhi munhu yoloye a nga ha ta etlhelweni ra musa, ra xinene ra Yesu. (Matewu 25:31-33) Sweswo swi ve tano hi loyi a ri murhandzi wa xitimela le Austria loyi a nga hlangana ni ntiyiso hi ndlela yin’wana leyi nga tolovelekangiki.

Nchumu lowu tsakisaka swinene hi ntirho wa yena wo tisusa xivundza a ku ri ku famba hi nhloko ya xitimela, a pfumeleriwe hi valawuri va switimela. A a rhekhoda riendzo rin’wana ni rin’wana hi khamera yakwe ya vhidiyo leswaku a ta kota ku tlhela a ri hlalela ekaya kakwe. Eka riendzo leri a nga ri teka ku suka le Vienna ku ya le Salzburg, mufambisi wa xitimela a a ri un’wana wa Timbhoni ta Yehovha. U tirhise nkarhi lowu leswaku a vulavula ni muntshwa loyi hi Mfumo. Eku sunguleni jaha leri a ri hlamarisiwe hi ku twa mufambisi a vulavula hi Xikwembu ni Bibele, kambe hi nkarhi wa riendzo, u kokiwe nyingiso swinene hi leswi a a swi vona ku tlula leswi mufambisi a a ri karhi a n’wi byela swona.

Loko a fika ekaya, murhandzi loyi wa xitimela u langute leswi a swi rhekhodeke hi vhidiyo yakwe, a yi hlalela minkarhi ya khume, hikuva riendzo leri a ri n’wi tsakise swinene. Tanihi leswi a rhekhodeke ni mpfumawulo, hi ku phindha-phindha u twe leswi Mbhoni leyi a yi n’wi byela swona. Minkarhi hinkwayo loko a languta vhidiyo leyi, a ya a tolovelana ni leswi a byeriweke swona. Kutani u sungule ku anakanya ha swona, kutani eku heteleleni u sungule ku hisekela rungula lerinene swonghasi leri a ri huma eBibeleni. A lava ku tiva leswi engetelekeke.

A a tsundzuka vito ra muchayeri naswona a tiva leswaku u tshama kun’wana le Vienna. Kutani a ya ehofisini ya poso ivi a sungula ku ba tinqingho leti nga longoloxiwa ehansi ka xivongo xexo ebukwini ya tinomboro hi ku landzelelana. Eka lava a va hlamula riqingho a vutisa leswi: “Xana u mufambisi wa xitimela?” Loko nhlamulo yi ri e-e, a ba nomboro leyi landzelaka. Eku heteleleni, a n’wi kuma mufambisi. U n’wi byele mhaka hinkwayo ni leswaku a tsakela rungula ra Bibele leri a ri tweke eka vhidiyo.

Mbhoni yi endle malunghiselelo hi hofisi ya rhavi leswaku un’wana loyi a tshamaka kusuhi ni jaha leri a ri endzela. Ku kumeke leswaku evandlheni ra kwalaho a ku ri na Mbhoni yin’wana leyi na yona a yi ri mufambisi wa switimela. Mufambisi loyi wa vumbirhi u endzele murhandzi loyi wa xitimela, ivi ku sunguriwa dyondzo ya Bibele. Hi ximumu xa 1991, jaha leri ri khuvuriwile.

Yehovha, la kambisisaka timbilu hinkwato, u fanele a swi vonile leswaku munhu loyi a a rhandza leswi lulameke hakunene. Hikwalaho, u n’wi kombe ntiyiso wa Bibele—hambi leswi ku nga va hi ndlela leyi nga tolovelekangiki.—1 Tikronika 28:9; Yohane 10:27.

[Laha Xifaniso Xi Humaka Kona eka tluka 9]

Courtesy of the Austrian Railways