Khale Ka Xitichi Xa Gezi Se I Holo Ya Mfumo

HI MUTSARI WA XALAMUKA! LE ITALY

◼ Eku sunguleni ka va-1900, vumaki byi sungule ku andza etintshaveni ta Pistoia le Italy. Ku endliwe xitimela lexi fambaka hi gezi leswaku ku ta rhwariwa swilo swo endla ha swona swilo swo karhi ni swilo leswi se swi endliweke. Loko xi khanguriwa hi June 21, 1926, xiporo lexi xo lala a xi rhendzeleka hi swiganga ni hi tintshava ku ringana mpfhuka wa kwalomu ka tikhilomitara ta 15.

Ku endliwe xitichi xa gezi (ehenhla eximatsini) leswaku xitimela xi ta famba hi gezi ra kona. Kambe hi ku famba ka nkarhi, hi 1965 ku hunguteka ka nhundzu leyi xavisiwaka leyi fambisiwaka hi xitimela ku endle leswaku switimela swi nga ha fambi. Xana se ku endliwe yini hi miako leyi a yi akiwe ematlhelo ka xiporo? Yin’wana yi sale yi ri marhumbi; yin’wana yi hetelele yi cinciwile yi va tibarha ta byala yin’wana yi va switichi swa mabazi.

Muako lowu a wu ri xitichi xa gezi wu pfuxetiwile. Hi 1997 wu xaviwe hi Nhlengeletano ya Timbhoni ta Yehovha ya San Marcello Pistoiese, kutani wu cinciwe wu va yin’wana ya Tiholo ta Mfumo to xonga swinene (ehansi eximatsini). Swirho swa vandlha leswi a a swi hlanganyela endhawini leyi a yi ri xitichi xa gezi swi le ku ‘voningeni kukota mavoningo’ etindhawini ta le ntshaveni hi ku chumayela mahungu lamanene ya Mfumo wa Xikwembu. (Vafilipiya 2:15; Matewu 24:14) Khale ka muako lowu a wu tirhisiwa ku phakela gezi sweswi se wu tirhiseriwa ku voninga hi tlhelo ra moya.—Matewu 5:14-16; 28:19, 20.