Ha Yini U Fanele Ku Rhandza Munhu-kuloni?

VUTOMI lebyi nga heriki byi titshege hi ku rhandza ka hina Xikwembu ni munhu-kulorhi. Yinhla yoleyo yi humesiwe ebulweni leri veke kona malembe ya kwalomu ka 2 000 lama hundzeke.

Wanuna wa Muyuda la dyondzekeke hi tlhelo ra Nawu wa Muxe u vutise Yesu Kreste: “Ndzi ta endla yini ku kuma vutomi lebyi nga heriki?” Yesu u hlamurile: “Ku tsariwile yini eNawini? U hlaya yini kona?” Loko wanuna loyi a tshaha Nawu u te: “‘Rhandza Hosi Xikwembu xa wena hi mbilu ya wena hinkwayo, ni moya wa wena hinkwawo, ni matimba ya wena hinkwawo, ni ku anakanya ka wena hinkwako.’ Naswona: ‘Rhandza munhu-kuloni kukota loko u tirhandza’” Yesu u te: “U hlamule swinene, endla sweswo u ta hanya.”—Luka 10:25-28.

Loko a twa sweswo, muvutisi wa Yesu u vutisile: “Munhu-kulorhi i mani xana?” Ematshan’wini ya ku n’wi hlamula hi ku kongoma, Yesu u hlamusele mhaka ya xifaniso xa wanuna un’wana wa Muyuda loyi a nga tekeriwa swa yena, a biwa ivi a siyiwa a ri kusuhi ni ku fa. Ku te Vayuda vambirhi—lowo sungula a ri muprista ivi ku landzela Mulevhi. Havambirhi va xi xiyile xiyimo xa Muyuda wa ka vona kambe va nga endli nchumu ku n’wi pfuna. Ivi ku ta Musamariya. Hi ntwela-vusiwana, u tsondzele timbanga ta Muyuda la vavisekeke, a n’wi yisa endlwini ya vaendzi, ivi a hakelela vutshunguri byakwe.

Yesu u vutise muvutisi wakwe: “Xana i mani, eka lavanharhu lava, la nga va munhu-kulobye wa munhu loyi a weleke emavokweni ya swigevenga xana?” Swi le rivaleni, a ku ri Musamariya wa musa. Xisweswo Yesu u kombise leswaku rirhandzu ra ntiyiso eka munhu-kuloni ri tsemakanya ni mindzilakano ya rixaka.—Luka 10:29-37.

Ku Pfumaleka Ka Rirhandzu Ra Munhu-kuloni

Namuntlha ku ni rivengo leri yaka emahlweni ri kula exikarhi ka vanhu va tinxaka to hambana-hambana. Hi xikombiso, ku nga ri khale lava hanyaka hi milawu ya Vunazi le Jarimani va lahlele wanuna un’wana ehansi ivi va n’wi kandziyela hi mabutsu ya vona layo tika, va tshova timbambu takwe to tala. Endzhaku va n’wi haxe hi swakun’wa leswi nga ni xihoko swinene ivi va n’wi lumeka. Wanuna la siyiweke tano leswaku a fa, u hlaseriwile hi mhaka ya leswi a ku anakanyiwa leswaku i Muyuda. Eka mhaka yin’wana leyi nga yelaniki na leyi, yindlu leyi nga ekusuhi na Hamburg yi hisiwe hi bombo, ku tshwa vanhu vanharhu va le Turkey va fela kwalaho—un’wana wa vona a ku ri nhwanyana wa malembe ya khume.

Le Balkan ni ku ya le vuxeni swinene, tinyimpi ta tinxaka a ti ri karhi ti koxa vutomi bya magidi. Van’wana va fa eka timholovo exikarhi ka vanhu va mindhavuko leyi hambaneke le Bangladesh, India na Pakistan. Naswona le Afrika, mimpfilu-mpfilu ya tinyimba ni tinxaka na yona yi koxa vutomi bya van’wana vo tala.

Vanhu vo tala va nyangatsiwa hi madzolonga yo tano naswona a va nge he endli nchumu ku vavisa vanhu-kulobye. Entiyisweni, minkombiso leyikulu ya ku vilela le Jarimani yi sole madzolonga ya tinxaka lama nga kona kwale. Kambe The New Encyclopædia Britannica yi ri: “Swirho swa mindhavuko yo tala la misaveni swi languta ndlela ya swona ya vutomi yi ri ya le henhla ku tlula hambi ku ri ya vanhu-kulobye lava nga ekusuhi.” Mavonelo yo tano ma sivela rirhandzu ra munhu-kuloni. Xana ku na lexi nga endliwaka hi mhaka leyi, ngopfu-ngopfu tanihi leswi Yesu a nga vula leswaku vutomi byi titshege hi ku rhandza ka hina Xikwembu ni munhu-kulorhi?

[Laha Xifaniso Xi Humaka Kona eka tluka 2]

Cover: Jules Pelcog/Die Heilige Schrift

[Laha Xifaniso Xi Humaka Kona eka tluka 3]

The Good Samaritana/The Doré Bible Illustrations/Dover Publications, Inc.