Masiku Ya Vuprofeta Bya Daniyele Ni Ripfumelo Ra Hina
“Ku [tsaka] l’a langutelaka, kutani a ya fika e ka masiku ya 1335.”—DANIYELE 12:12.
1. Ha yini vo tala va nga swi koti ku kuma ntsako, naswona ntsako wa xiviri wu fambisana na yini?
UN’WANA ni un’wana u lava ku tsaka. Hambi swi ri tano, namuntlha a hi vangani lava tsakeke. Ha yini? Hi ku komisa i mhaka ya leswi vo tala va lavaka ntsako etindhawini leti hoxeke. Ku laviwa ntsako eka swilo swo fana ni dyondzo, rifuwo, ntirho-vutomi, kumbe ku lava matimba. Hambi swi ri tano, loko a sungula Dyondzo yakwe ya le Ntshaveni, Yesu u hlanganise ntsako ni ku khathalela xilaveko xa wena xa moya, ku va ni tintswalo, mbilu leyi tengeke, ni timfanelo tin’wana to tano. (Matewu 5:3-10) Muxaka wa ntsako lowu Yesu a a vulavula ha wona i wa xiviri naswona a wu heli.
2. Mayelana ni vuprofeta, i yini lexi nga ta tisa ntsako enkarhini wa makumu, naswona ku tlakuka swivutiso swihi mayelana ni leswi?
2 Ntsako eka masalela ya vatotiwa enkarhini wa makumu wu fambisana ni nchumu wun’wana nakambe. Ebukwini ya Daniyele, ha hlaya: “Famba, Daniyele, hikuv̌a timhaka leti ti ta sala ti funengetiwile, ti lemeriwile ku fikela nkarini wa makumu. Ku [tsaka] l’a langutelaka, kutani a ya fika e ka masiku ya 1335.” (Daniyele 12:9, 12) Xana masiku lawa ya 1 335 ya ve hi nkarhi wihi? Ha yini lava a va hanya eka wona a va tsakile? Xana leswi swi khumba ripfumelo ra hina hi ndlela yo karhi namuntlha? Hi pfuniwa ku hlamula swivutiso leswi loko hi tlhelela le ndzhaku enkarhini lowu Daniyele a tsaleke marito lawa ha wona, endzhakunyana ka ku tshunxiwa ka Israyele evukhumbini le Babilona hi lembe ra vunharhu ra Korexe hosi ya Persia.—Daniyele 10:1.
Ku Vuyetela Ku Tisa Ntsako
3. I xiendlo xihi xa Hosi Korexe lexi nga tsakisa Vayuda lavo tshembeka hi 537 B.C.E., kambe i lunghelo rihi leri Korexe a nga ri nyikangiki Vayuda?
3 Eka Vayuda, ku tshunxiwa le Babilona a ku ri xiendlakalo xa ntsako wa xiviri. Endzhaku ka loko Vayuda va tiyisele malembe ya kwalomu ka 70 evukhumbini, Korexe Lonkulu u va byele ku tlhelela le Yerusalema va ya pfuxeta Tempele ya Yehovha nakambe. (Ezra 1:1, 2) Lava va tlheleleke a va langutele swilo leswinene, va fike etiko-xikaya ra ka vona hi 537 B.C.E. Hambi swi ri tano, Korexe a a nga va byelangi leswaku va ya pfuxeta mfumo lowu nge hansi ka vatukulu va Hosi Davhida.
4, 5. (a) Xana vuhosi bya Davhida byi wisiwe rini? Ha yini? (b) I xitiyisekiso xihi lexi Yehovha a xi nyikeleke xa leswaku vuhosi bya Davhida byi ta vuyeteriwa?
4 Wolowo a ku ri nchumu lowu xiyekaka. Kwalomu ka malembe xidzana ya ntlhanu emahlweninyana, Yehovha u tshembise Davhida a ku: “Yindlu ya wena, ni v̌uhosi bya wena byi ta ṭhama hi laha ku nga heriki e mahlweni ka wena: šiluv̌elo ša wena ši ta tiya hi masiku.” (2 Samuwele 7:16) Lexi vavisaka, hi leswaku vo tala va vatukulu va Davhida va le vuhosini va xandzukile, kutani nandzu wa ngati wa tiko wu va wukulu lerova hi 607 B.C.E., Yehovha a tshika vuhosi bya Davhida byi wisiwa. Handle ka ku lawuriwa hi Maccabees swa xinkarhananyana, Yerusalema a wu ri ehansi ka mimfumo yimbe ku sukela enkarhini wolowo ku ya fika eka ndzoviso wa yona wa vumbirhi hi 70 C.E. Xisweswo, hi 537 B.C.E., a yi ri karhi yi ya emahlweni ‘minkarhi leyi vekiweke ya vamatiko,’ leyi a ku nga ri na n’wana wa Davhida loyi a ta fuma tanihi hosi.—Luka 21:24.
5 Ku nga khathariseki sweswo, Yehovha a nga xi rivalanga xitshembiso xa yena eka Davhida. Hi swivono ni milorho leyi landzelanaka, u tirhise muprofeta wa yena Daniyele ku paluxa vuxokoxoko bya swiendlakalo swa nkarhi lowu taka swa misava leswi a swi ta heta malembe xidzana ku suka enkarhini wa mfumo wa misava wa Babilona ku ya enkarhini lowu hosi leyi nga enxaxamelweni wa Davhida a yi ta fuma emfun’weni wa vanhu va Yehovha. Vuprofeta lebyi, lebyi tsariweke eka Daniyele tindzima 2, 7, 8, na 10-12, byi tiyisekise Vayuda vo tshembeka leswaku, eku heteleleni, xiluvelo xa Davhida hakunene xi “ta tiya hi masiku.” Hakunene, ntiyiso wolowo lowu paluxiweke wu tise ntsako eka Vayuda lava tlheleleke etiko-xikaya ra ka vona hi 537 B.C.E.!
6. Hi swi tivisa ku yini leswaku byin’wana bya vuprofeta bya Daniyele a byi ta hetiseka enkarhini wa hina?
6 Vahlamuseri vo tala va Bibele va vula leswaku vunyingi bya vuprofeta bya Daniyele byi hetiseke emahlweni ka ku tswariwa ka Yesu Kreste. Kambe swi le rivaleni leswaku a swi tano. Eka Daniyele 12:4, ntsumi yi byele Daniyele yi ku: “Funengeta timhaka leto, u lemela buku leyi e ku yisa nkarini wa makumu; la’v̌o tala v̌a ta yi šiya, kutani ku tiv̌a ku ta engeteleka.” Leswi buku ya Daniyele a yi fanele ku lemuriwa—ivi nhlamuselo ya yona yi paluxiwa hi vutalo—loko ku fike nkarhi wa makumu, entiyisweni byin’wana bya vuprofeta bya yona byi fanele byi tirha enkarhini wolowo.—Vona Daniyele 2:28; 8:17; 10:14.
7. (a) Xana minkarhi leyi vekiweke ya vamatiko yi hele rini, naswona i xivutiso xihi xa nkoka lexi a xi fanele ku hlamuriwa enkarhini wolowo? (b) I vamani lava a va nga ri “nandza la tshembekaka, wo tlhariha”?
7 Hi 1914 minkarhi leyi vekiweke ya vamatiko yi herile, kutani ku sungula nkarhi wa makumu wa misava leyi. Mfumo wa Davhida wu vuyeteriwile, ku nga ri eYerusalema wa le misaveni, kambe hi ndlela leyi nga vonakiki hi ‘mapapa ya le tilweni.’ (Daniyele 7:13, 14) Enkarhini wolowo, hikwalaho ka leswi “mfava” wa Vukreste byo xisetela a wu ri karhi wu kula kahle, xiyimo xa Vukreste bya ntiyiso a xi nga vonaki kahle—eka mahlo ya vanhu. Ku nga khathariseki sweswo, a ku fanele ku hlamuriwa xivutiso xa nkoka: “Xana nandza la tshembekaka, wo tlhariha, hi wihi xana?” (Matewu 13:24-30; 24:45) I mani emisaveni loyi a a ta yimela Mfumo wa Davhida lowu pfuxetiweke? A ku nga ri vamakwavo va Daniyele va nyama, ku nga Vayuda. Va tshikiwile hikuva a va nga ri na ripfumelo naswona va wele ehenhla ka Mesiya. (Varhoma 9:31-33) Nandza lowo tshembeka a nga kumiwanga eka tinhlengeletano ta Vujagana! Mintirho ya vona leyo homboloka yi kombe leswaku Yesu a a nga va tivi. (Matewu 7:21-23) Kutani ke, a a ri mani?
8. I vamani lava tikombeke va ri “nandza la tshembekaka, wo tlhariha” enkarhini wa makumu? Hi swi tivisa ku yini?
8 Handle ko kanakana, a ku ri ntlawanyana wutsongo wa vamakwavo wa Yesu lava totiweke lava hi 1914 a va tiviwa tanihi Swichudeni swa Bibele kambe ku sukela hi 1931 va vitaniwe tanihi Timbhoni ta Yehovha. (Esaya 43:10) Hi vona ntsena lava twarisaka Mfumo lowu pfuxetiweke enxaxamelweni wa Davhida. (Matewu 24:14) Hi vona ntsena lava nga tshama va hambane ni misava naswona va tlakusa vito ra Yehovha. (Yohane 17:6, 14) Naswona hi vona ntsena lava vuprofeta bya Bibele mayelana ni vanhu va Xikwembu emasikwini ya makumu byi hetisekeke ha vona. Eka vuprofeta lebyi ku katsiwa ni nongonoko wa minkarhi ya vuprofeta leyi nga eka Daniyele ndzima 12 ku nga masiku ya 1 335 lama nga ta tisa ntsako.
Masiku Ya 1 260
9, 10. I swiendlakalo swihi swa “nkari, ni mikari yiṅwana, ni hafu ya nkari” ya Daniyele 7:25, naswona minkarhi leyi fambisanaka na wona yi kombisiwa eka matsalwa wahi man’wana?
9 Eka Daniyele 12:7, hi hlaya hi ta nkarhi wo sungula wa vuprofeta: “Ku sele nkarhi wuṅwe, ni mikari mimbiri e ku yisa šikari ka nkari wuṅwana; kutani leŝo hikwaŝo ŝi ta endlakala loko matimba ya tiko le’ro kwetsima ma ṭhov̌iwile hikwawo.”a Wona nkarhi lowu wu boxiwa eka Nhlavutelo 11:3-6, leyi vulaka leswaku timbhoni ta Xikwembu ti ta chumayela malembe manharhu ni hafu ti ambale tinguvu leto khwaxa ivi ti dlayiwa. Nakambe, eka Daniyele 7:25, hi hlaya leswi: “O ta humesa marito ya ku lwa ni Muungameri-l’a-tlakukeke, o ta šanisa v̌ahlawuriwa v̌a Muungameri-l’a-tlakukeke, kutani a v̌a ni makungu ya ku hunḍula mikari ni nawu, kutani v̌ahlawuriwa v̌a ta nyiketiwa e mav̌okweni ya yena hi nkari, ni mikari yiṅwana, ni hafu ya nkari.”
10 Eka vuprofeta lebyi byo hetelela, ‘u’ loyi ku vuriwaka yena i mfumo wa misava wa vuntlhanu lowu sungulaka eka Babilona. I “rimhonḍwanyana,” leri hi nkarhi wa ku fuma ka N’wana wa munhu ri kumaka “ku fuma, ni ku kwetsima, ni v̌uhosi.” (Daniyele 7:8, 14) Rimhondzo leri ro fanekisela, leri eku sunguleni a ri ri mfumo wa Britain, ri kurile hi nkarhi wa nyimpi yo sungula ya misava ri va mfumo wa misava wa Anglo-America lowu nga mpatswa, lowu sweswi wu fumiwaka hi United States. Mfumo lowu wu ta xanisa vakwetsimi ni ku ringeta ku hundzula minkarhi ni nawu, hi minkarhi minharhu ni hafu, kumbe malembe. Eku heteleleni, vakwetsimi va ta nyiketiwa emavokweni ya wona.—Nakambe vona Nhlavutelo 13:5, 7.
11, 12. I swiendlakalo swihi leswi nga sungula masiku ya vuprofeta ya 1 260?
11 Xana vuprofeta lebyi hinkwabyo lebyi fambelanaka byi hetiseke hi ndlela yihi? Malembe yo tala emahlweni ka Nyimpi yo Sungula ya Misava vamakwavo wa Yesu lava totiweke va tsundzuxe erivaleni leswaku hi 1914 ku ta va ku hela ka minkarhi leyi vekiweke ya matiko. Loko nyimpi yi tlhekeka, a swi ri erivaleni leswaku xitsundzuxo lexi xi tekeriwe ehansi. Sathana u tirhise “xivandzana” xakwe, nhlengeletano ya misava ya tipolitiki leyi hi nkarhi wolowo a yi lawuriwa hi Mfumo wa Britain, a ringeta ku “hunḍula mikari ni nawu,” leswaku a kavanyeta nkarhi wa ku fuma ka Mfumo wa Xikwembu. (Nhlavutelo 13:1, 2) Kambe u tsandzekile. Mfumo wa Xikwembu wu tlhomiwe le matilweni, laha vanhu va nga wu fikeleliki.—Nhlavutelo 12:1-3.
12 Nyimpi eka Swichudeni swa Bibele a yi ri nkarhi wa ku ringiwa. Ku sukela hi January 1914 a va kombisa nkombiso wa Bible wa Photo-Drama of Creation, lowu a wu kokela nyingiso eka vuprofeta bya Daniyele. Hi ximumu xa lembe rolero le Xiphen’wini xa le N’walungwini, nyimpi yi tlhekekile. Hi October, minkarhi leyi vekiweke yi herile. Eku heleni ka lembe, masalela lama totiweke a ma langutele nxaniso, hi laha swi nga voniwaka ha kona emhakeni ya leswaku tsalwa ra lembe leri hlawuleriweke 1915 a ri ri xivutiso xa Yesu eka vadyondzisiwa va yena lexi nge, “Xana ma swi kota ku nwela exinwelweni xa mina?” leyi sekeriweke eka Matewu 20:22, King James Version.
13. Xana Swichudeni swa Bibele swi chumayele njhani swi ambale tinguvu to khwaxa hi masiku ya 1 260, naswona ku humelele yini eku heleni ka nkarhi wolowo?
13 Hikwalaho, ku sukela hi December 1914 ntlawanyana lowu wa timbhoni wu ‘chumayele wu ambale tinguvu leto khwaxa,’ hi ku titsongahata va tiyisela va ri karhi va twarisa ku avanyisa ka Yehovha. Lexi hlamariseke vo tala, a ku ri rifu ra C. T. Russell hi 1916, muungameri wo sungula wa Watch Tower Bible and Tract Society. Loko moya wa nyimpi wu ya wu hangalaka, Timbhoni ti hlangavetane ni nkaneto lowukulu. Van’wana va khomiwile. Van’wana, vo kota Frank Platt le Nghilandhi na Robert Clegg le Canada, va xanisiwile hi valawuri va tihanyi swinene. Eku heteleleni hi June 21, 1918, muungameri lontshwa J. F. Rutherford, swin’we ni vafambisi va Watch Tower Bible and Tract Society, va gweviwe nkarhi wo leha ekhotsweni hi swihehlo swa mavunwa. Xisweswo, eku heleni ka nguva ya vuprofeta, “rimhonḍwanyana” ri dlaye ntirho lowu hleriweke wa ku chumayela erivaleni.—Daniyele 7:8, King James Version.
14. Swilo swi hundzuke hi ndlela yihi eka masalela ya vatotiwa hi 1919 ni le ndzhaku ka kwalaho?
14 Buku ya Nhlavutelo yi profeta leswi nga landzela. Endzhaku ka nkarhinyana wa ku nga tirhi nchumu—lowu vhumbhiweke tanihi masiku manharhu ni xiphemu ya ku etlela va file entsendzeleni—masalela ya vatotiwa ya pfukile ya tlhela ya chivirika nakambe. (Nhlavutelo 11:11-13) Hi March 26, 1919, muungameri ni vafambisi va Watch Tower Bible and Tract Society va tshunxiwile, naswona endzhakunyana va basisiwe hi laha ku heleleke eka swihehlo swa mavunwa leswi a va hehliwe ha swona. Endzhakunyana ka ku ntshunxiwa ka vona, masalela lama totiweke ma sungule ku tlhela ma hlela ntirho lowu engetelekeke. Xisweswo mayelana ni ku hetiseka ka khombo ro sungula ra Nhlavutelo, va hume ekheleni ra ku nga tirhi va fana ni tinjiya ta moya va ta ni musi lowukulu, lowu kombisaka vumundzuku bya munyama wa vukhongeri bya mavunwa. (Nhlavutelo 9:1-11) Emalembeni ma nga ri mangani lama landzeleke, va phameriwile hi tlhelo ra moya naswona va lunghiseleriwa leswi a swa ha va yimerile. Hi 1921 va humese buku leyintshwa, The Harp of God, leyi endleriweke ku pfuna lavantshwa ni vana ku dyondza mintiyiso ya xisekelo ya Bibele. (Nhlavutelo 12:6, 14) Swilo leswi hinkwaswo swi humelele hi nkarhi lowu landzelaka lowu xiyekaka.
Masiku Ya 1 290
15. Hi nga ku hlayerisa ku yini ku sungula ka masiku ya 1 290? Xana nkarhi lowu wu hele rini?
15 Ntsumi yi byele Daniyele: “Kutani ku sungula hi nkari wa ku herisiwa ka ganḍelo ra masiku, lowu ku nga ta tlhomiwa manyala ya muonhi, ku ta hunḍa masiku ya 1290.” (Daniyele 12:11) Ehansi ka Nawu wa Muxe, “ganḍelo ra masiku” a ri hiseriwa ealtarini etempeleni le Yerusalema. Vakreste a va nyikeli magandzelo yo hisiwa, kambe va nyikela gandzelo ra masiku ra moya. Pawulo a vulavula ha rona loko a ku: “A hi humeseni magandzelo masiku hinkwawo ha yena Yesu, hi dzunisa Xikwembu ha wona, hi ri karhi hi vonga vito ra xona hi marito lama humaka emilon’weni ya hina.” (Vaheveru 13:15; ringanisa Hosiya 14:2.) Gandzelo leri ra masiku ri tekiwe hi June 1918. Kutani ke, xana ‘nchumu lowu nyenyetsaka’—xivumbeko xa vumbirhi lexi a xi ta landzela, a wu ta va yini? A wu ri Ntwanano wa Matiko, lowu seketeriweke hi mifumo ya matimba eku heleni ka Nyimpi yo Sungula ya Misava.b A swi nyenyetsa hikuva varhangeri va Vujagana a va wu veka exiyin’weni xa Mfumo wa Xikwembu, va endla Ntwanano wu va wona ntsena ntshembo wa vanhu wa ku rhula. Ntwanano wu simekiwe hi January 1919. Loko hi hlayela masiku ya 1 290 (malembe manharhu na tinh’weti ta nkombo) ku sukela enkarhini wolowo, hi fika eka September 1922.
16. Eku heleni ka masiku ya 1 290, xana a swi tikombe njhani leswaku masalela ya vatotiwa a ya lunghekele ntirho?
16 Ku humelele yini enkarhini wolowo? Entiyisweni, Swichudeni swa Bibele se a swi phyuphyisiwile, swi tshunxiwile eka Babilona Lonkulu, naswona swi lunghekele ku tirha hi matimba. (Nhlavutelo 18:4) Entsombanweni lowu khomiweke hi September 1922 le Cedar Point, Ohio, U.S.A., va sungule handle ko chava va tivisa ku avanyisa ka Xikwembu ehenhla ka Vujagana. (Nhlavutelo 8:7-12) Mindzhombo ya tinjiya a yi sungule ku fehla swinene! Ehenhleni ka sweswo, ku sungule khombo ra vumbirhi ra Nhlavutelo. Masocha yo tala ya Vakreste—lama ngopfu-ngopfu a ku ri masalela ya vatotiwa ivi endzhaku va engeteriwa hi ntshungu lowukulu—wu hangalake emisaveni hinkwayo. (Nhlavutelo 7:9; 9:13-19) Ina, ku hela ka masiku ya 1 290 ku tise ntsako eka vanhu va Xikwembu.c Kambe a ka ha ri ni swin’wana leswi taka.
Masiku Ya 1 335
17. Xana masiku ya 1 335 ya sungule ni ku hela rini?
17 Daniyele 12:12 yi ri: “Ku [tsaka] l’a langutelaka, kutani a ya fika e ka masiku ya 1335.” Masiku lawa ya 1 335, kumbe malembe manharhu, tin’hweti ta nhungu ni hafu, swi le rivaleni leswaku ya sungule eku heleni ka nkarhi lowu hundzeke. Loko u hlayela ku sukela eka September 1922, swi ku yisa eku heleni ka ximun’wana (Xiphemu xa le N’walungwini) xa 1926. Ku humelele yini hi nkarhi wa masiku wolawo ya 1 335?
18. I mintiyiso yihi leyi kombaka leswaku le ndzhaku hi 1922 nhluvuko a wa ha fanele ku endliwa?
18 Ku nga khathariseki xivumbeko xa swiendlakalo leswi xiyekaka swa 1922, swi le rivaleni leswaku van’wana a va ha navela nkarhi lowu hundzeke. Studies in the Scriptures, leyi tsariweke hi C. T. Russell, a ya ha ri buku-nkulu ya dyondzo. Ku tlula kwalaho, xibukwana lexi hangalasiweke swinene xa Millions Now Living Will Never Die xi humese langutelo ra leswaku hi 1925, swikongomelo swa Xikwembu mayelana ni ku vuyeteriwa ka misava yi va Paradeyisi ni ku pfuxiwa ka vanhu va khale lava tshembekeke a swi ta sungula ku hetiseka. Ku tiyisela ka vatotiwa a ku vonaka ku ri kusuhi ni ku hetiseka. Hambi swi ri tano, van’wana lava a va hlanganyela ni Swichudeni swa Bibele a va nga titwi va boheka ku hangalasa mahungu lamanene eka van’wana.
19, 20. (a) Xana swilo swo tala swi hundzuke hi ndlela yihi eka vanhu va Xikwembu hi masiku ya 1 335? (b) I swiendlakalo swihi leswi fungheke ku hela ka nkarhi wa masiku ya 1 335, naswona xana a ya vula yini mayelana ni vanhu va Yehovha?
19 Loko masiku ya 1 335 ya ri karhi ya ya emahlweni, hinkwaswo swi hundzukile. Leswaku ku tiyisiwa vamakwerhu, ku hleriwe mintlawa ya tidyondzo ta Xihondzo xo Rindza. Ku kandziyisiwe ntirho wa nsimu. Ku sukela hi May 1923, hinkwavo va rhamberiwe ntirho wa nsimu hi Ravumbirhi ro sungula ra n’hweti yin’wana ni yin’wana, naswona ku vekiwe nkarhi wa nhlangano wa vandlha exikarhi ka vhiki leswaku va khutaziwa entirhweni lowu. Hi August 1923, enhlengeletanwini ya le Los Angeles, California, U.S.A., ku kombisiwe leswaku xifaniso xa Yesu xa tinyimpfu ni timbuti xi ta hetiseka ku nga si sungula ku Fuma ka Gidi ra Malembe. (Matewu 25:31-40) Hi lembe ra 1924 ku khanguriwe xitichi xa xiya-ni-moya xa WBBR, lexi a xi tirhiseriwa ku haxa mahungu lamanene emoyeni. Xihloko lexi nge “Ku Tswariwa Ka Rixaka” lexi a xi ri eka nkandziyiso wa The Watch Tower wa March 1, 1925, xi lulamise ku twisisiwa ka Nhlavutelo ndzima 12. Eku heteleleni, Vakreste lavo tshembeka va swi kotile ku twisisa swiendlakalo swa mpfilumpfilu swa 1914-19 hi ndlela leyi kongomeke.
20 Lembe ra 1925 na rona ri herile, kambe makumu a ya nga si fika! Ku sukela hi va-1870, Swichudeni swa Bibele a swi tirha swi ri karhi swi anakanya—hi 1914 eku sunguleni, ivi endzhaku ku va 1925. Kutani sweswi va xiye leswaku va fanele ku tirha va langutele ntsena leswi Yehovha a lavaka swona. Nkandziyiso wa January 1, 1926, wa The Watch Tower a wu ri na xihloko xa nkoka lexi nge, “I Vamani Lava Nga Ta Xixima Yehovha?” lexi a xi tlakusa nkoka wa vito ra Xikwembu hi ndlela leyi nga si tshamaka yi endliwa. Kutani eku heteleleni, hi May 1926 le ntsombanweni wa le London, Nghilandhi, ku amukeriwe xiboho lexi nga ni xihloko lexi nge “Vumbhoni Eka Vafumi Va Misava.” Xi wu veke erivaleni ntiyiso hi ta Mfumo wa Xikwembu ni ku ta ka ndzoviso wa misava ya Sathana. Eka wona ntsombano lowu, ku humesiwe buku leyi hisaka, leyi nge Deliverance, a yi ri yo sungula eka nongonoko lowu a wu ta siva Studies in the Scriptures. Sweswi vanhu va Xikwembu a va langute emahlweni, ku nga ri endzhaku. Masiku ya 1 335 ya herile.
21. Xana ku tiyisela a swi katsa yini enkarhini wa masiku ya 1 335 eka vanhu va Xikwembu enkarhini wolowo wa khale, naswona xana ku hetiseka ka vuprofeta lebyi nga mayelana ni nkarhi lowu ku vula yini eka hina?
21 Van’wana a va nga swi lavi ku fambisana ni ku hundzuka loku, kambe lava va tiyiseleke a va tsakile hakunene. Ku tlula kwalaho, loko hi languta le ndzhaku eku hetisekeni ka minkarhi leyi ya vuprofeta, na hina ha tsaka leswi hi tiyisekisiwaka leswaku ntlawa lowutsongo wa Vakreste lava totiweke lava hanyeke eminkarhini liya hakunene hi wona nandza lowo tshembeka wa vutlharhi. Emalembeni lama landzeleke ku sukela kwalaho, nhlengeletano ya Yehovha yi kule hi ndlela leyikulu swinene, kambe nandza lowo tshembeka, wa vutlharhi u hambeta a ri wa nkoka, a yi kongomisa. Kutani ke, vona ndlela leyi swi tsakisaka ha yona ku tiva leswaku vatotiwa ni tinyimpfu tin’wana va ha langutele ntsako lowukulu lowu taka! Leswi hi ta swi vona loko hi kambisisa vuprofeta byin’wana bya Daniyele.
[Tinhlamuselo ta le hansi]
a Leswaku u kuma bulo ra ndlela yo hlayela minkarhi leyi ya vuprofeta, vona Our Incoming World Government—God’s Kingdom, ndzima 8, leyi humesiweke hi Watchtower Bible and Tract Society of New York, Inc.
b Vona nkandziyiso wa Xihondzo xo Rindza, wa October 1, 1985, matluka 8-18.
c Vona nkandziyiso wa Xihondzo xo Rindza wa January 1, 1991, tluka 12, ni 1975 Yearbook of Jehovah’s Witnesses, tluka 132.
Xana U Nga Hlamusela?
◻ Hi swi tivisa ku yini leswaku vuprofeta byin’wana bya Daniyele a byi ta hetiseka enkarhini wa hina?
◻ Ha yini hi tiyiseka leswaku masalela i “nandza la tshembekaka, wo tlhariha”?
◻ Xana minkarhi ya masiku ya 1 260 yi sungule rini ivi yi hela rini?
◻ I ku phyuphyisa ni ku vuyeteriwa kwihi loku masiku ya 1 290 ma ku tiseleke masalela ya vatotiwa?
◻ Ha yini lava va nga tiyisela ku kondza ku hela masiku ya 1 335 a va tsakile?
[Bokisi leri nga eka tluka 11]
MINKARHI YA VUPROFETA YA DANIYELE
Masiku ya 1 260:
December 1914 ku ya ka June 1918
Masiku ya 1 290:
January 1919 ku ya ka September 1922
Masiku ya 1 335:
September 1922 ku ya ka May 1926
[Xifaniso lexi nga eka tluka 8]
Ku sukela hi 1919 swi ve erivaleni leswaku “nandza la tshembekaka, wo tlhariha” i masalela ya vatotiwa
[Xifaniso lexi nga eka tluka 10]
Yindlu-nkulu ya Ntwanano wa Matiko le Geneva, Switzerland
[Xihlovo Xa Kona]
UN photo