Swivutiso Swa Vahlayi

Hi tiphine hi ku dyondza vuprofeta bya Daniyele hi laha byi hlamuseriweke ha kona eka “Xihondzo xo Rindza.” Hambi swi ri tano, ha yini masiku ya minkarhi minharhu na hafu ya Nhlavutelo 11:3 ma hambana ni lama nga ebukwini leyi nge “Ku Chaputa Ka Nhlavutelo”?

Ina, Xihondzo xo Rindza xa November 1, 1993, xi hlamusela ku lulamisiwa kutsongo ka nkarhi wa ku hetiseka ka manguva lawa ka Nhlavutelo 11:3. Ha yini?

Xo sungula a hi languteni eka Nhlavutelo 11:2, laha makumu ya yona ma boxaka “tin’hweti ta 42.” Hi ya emahlweni eka ndzimana 3: “Ndzi ta nyika timbhoni ta mina timbirhi ematimba yo vula Rito hi masiku lawa ya 1 260, ti ambele tinguvu leto khwaxa.” Xana sweswo swi tirha rini?

Kahle-kahle, Timbhoni ta Yehovha i khale ti swi tiva leswaku vuprofeta lebyi byi hetiseke eka Vakreste lava totiweke hi moya loko ku hela “minkarhi leyi vekiweke ya matiko” (Minkarhi ya Vamatiko) hi 1914. (Luka 21:24, NW; 2 Vakorinto 1:21, 22) Loko yi hlamusela leswi, Nhlavutelo—Ku Chaputa Ka Yona Loku Hlamarisaka Ku Tshinele!a (1988) yi ri eka tluka 164: “A ku ri ni mpimo lowu funghiweke wa malembe manharhu ni hafu loko mintokoto leyi vavisaka ya vanhu va Xikwembu leyi fanaka ni swiendlakalo leswi profetiweke laha—ku sukela eku tlhekekeni ka nyimpi yo sungula ya misava exiphen’wini xo hetelela xa 1914 ivi swi ya emahlweni ku ya fika exiphen’wini xo sungula xa 1918.”

Xiya leswaku nkarhi lowu nyikeriweke a ku ri nkarhi wa “ku [tlhekeka] ka nyimpi yo sungula ya misava exiphen’wini xo hetelela xa 1914 [ku ya fika] exiphen’wini xo sungula xa 1918.” Leswi swi fambisana ni nkarhi lowu talaka ku nyikeriwa, wo tanihi lowu nga le ka “Then Is Finished the Mystery of God,” matluka 261-4, (1969).*

Hambi swi ri tano, Xihondzo xo Rindza xi yise nyingiso eka vuprofeta bya Daniyele, buku leyi boxaka ka mbirhi nkarhi lowu fambelanaka ni lowuya wu boxiweke eku heteleleni eka Nhlavutelo—malembe ya 3 1/2 kumbe tinhweti ta 42. Hi ku kongoma, Daniyele 7:25 yi vula leswaku vanhu va Xikwembu lavo kwetsima a va ta xanisiwa “hi nkari, ni mikari yiṅwana, ni hafu ya nkari,” kumbe minkarhi ya 3 1/2. Endzhaku, Daniyele 12:7 yi vhumbha “nkari wuṅwe, ni mikari mimbiri e ku yisa šikari ka nkari wuṅwana,” kumbe minkarhi ya 3 1/2, leyi a yi ta chaputa “loko matimba ya tiko le’ro kwetsima ma ṭhov̌iwile hikwawo.”

Kutani hi ni vuprofeta lebyi vulavulaka hi nkarhi lowu fambelanaka ni wa Daniyele 7:25, Daniyele 12:7, na Nhlavutelo 11:2, 3, kun’we ni wa Nhlavutelo 13:5. Tibuku ta hina ti kombise leswaku leswi hinkwaswo swi hetiseke hi nkarhi wa 1914-18. Kambe loko ti hlamusela byin’wana ni byin’wana bya vuprofeta lebyi etlhelo, masiku ya byona yo sungula ni yo hetelela ma hambananyana kutsongo.

Hambi swi ri tano, Xihondzo xo Rindza xa November 1, 1993, xi vutisile: “Xana vuprofeta lebyi hinkwabyo lebyi fambelanaka byi hetiseke hi ndlela yihi?” Vuprofeta bya minkarhi ya 3 1/2 lebyi boxiweke eka Daniyele 7:25, Daniyele 12:7 na Nhlavutelo 11:3 byi xiyiwe tanihi “vuprofeta lebyi fambelanaka.” Hikwalaho, a byi ta fambisana ku suka eku sunguleni ka byona ku ya fika emakumu.

Malunghana ni makumu ya byona, magazini wu kombise ndlela leyi ku xanisiwa ka vatotiwa va Xikwembu (Daniyele 7:25) ku chaputeke ha yona hi June 1918, loko J. F. Rutherford ni vafambisi van’wana va Watch Tower Bible and Tract Society va “gweviwe nkarhi wo leha ekhotsweni hi swihehlo swa mavunwa.” Entiyisweni xiendlakalo xexo a xi ri ku ‘tshoviwa ka matimba ya vanhu lavo kwetsima,’ hi laha swi hlamuseriweke ha kona eka Daniyele 12:7.

Loko hi hlayela hi ya endzhaku ku sukela hi June 1918 swi hi yisa eka December 1914 eku sunguleni ka minkarhi ya 3 1/2. En’hwetini yoleyo yo hetelela ya 1914, vatotiwa va Xikwembu emisaveni va tive leswaku tsalwa-nkulu ra lembe leri tlhandlamaka a ri ta ku: “‘Xana ma swi kota ku nwela exinweleni xa Mina?’—Matewu 20:20-23.” Xihloko lexi tiviseke mhaka leyi xi tsundzuxile: “Kumbexana ku ta va ni ndzingo wo hlawuleka, xinwelo xa ku xaniseka kumbe ku khomisiwa tingana eka valandzeri lavo tshembeka va Xinyimpfana hi 1915!” Tanihi laha Daniyele 7:25 yi vhumbheke minkarhi leyi ya 3 1/2 ha kona, ‘ku xanisiwa ka vahlawuriwa va Muungameri la Tlakukeke ku tlhekekile ivi ku ya emahlweni.’ Matiko ma katsekile eNyimpini yo Sungula ya Misava, kutani swi ma olovela ku endla nxaniso wa tihanyi. Hi gimeta hi ku vula leswaku: Vuprofeta hinkwabyo lebyinharhu lebyi fambelanaka—Daniyele 7:25, 12:7 na Nhlavutelo 11:3—byi hetiseke hi malembe ya 3 1/2, kumbe tinhweti ta 42, ku sukela hi December 1914 ku ya eka June 1918.

Leswi swi nyikela nhlamuselo leyi lulamisiwekenyana ya ku tiva nkarhi wa ku hetiseka ka Nhlavutelo 11:3. Ndzulamiso lowu hi fanele ku wu tsundzuka loko hi dyondza ni ku tirhisa buku leyi nge Ku Chaputa Ka Nhlavutelo enkarhini lowu taka.

[Nhlamuselo ya le hansi]