Ku Hlakukela Ku Chava Xikwembu
“Tšhav̌a Yehova, u papalata ŝo biha.”—SWIVURISO 3:7.
1. Swivuriso a yi tsaleriwa yini?
BUKU ya Bibele ya Swivuriso yi ni ndzayo leyi fuweke ya moya. Eku sunguleni, Yehovha u lunghiselele buku-mpfuno leyi leswaku a letela tiko rakwe ra Israyele. Namuntlha, yi nyikela marito ya vutlharhi etikweni rakwe ro kwetsima ra Vukreste, “[leri] nga emasikwini ya ku hetelela ka minkarhi.”—1 Vakorinto 10:11; Swivuriso 1:1-5; 1 Petro 2:9.
2. Ha yini xitsundzuxo xa Swivuriso 3:7 xi ri enkarhini swinene namuntlha?
2 Eka Swivuriso 3:7, ha hlaya: “U nga tiv̌oni v̌utlhari, tšhav̌a Yehova, u papalata ŝo biha.” Ku sukela enkarhini wa vatswari va hina vo sungula, loko Nyoka yi kanganyisa Evha hi xitshembiso xa leswaku a va ta “tiv̌a ŝo saseka ni ŝo biha,” vutlharhi bya vanhu byi hlulekile ku enerisa swilaveko swa vanhu. (Genesa 3:4, 5; 1 Vakorinto 3:19, 20) Ematin’wini hinkwawo, leswi a ku ri ro sungula leswaku swi endleka hi ndlela leyi xiyekaka swinene eka lembe xidzana leri ra vu-20—‘emasikwini lawa ya makumu,’ laha vanhu lava tshovelaka mihandzu ya mianakanyo ya ku ala vukona bya Xikwembu ni ya hundzuluko, va khomisiwaka xo tika hi vutiko, madzolonga ni swilo hinkwaswo leswo biha. (2 Timotiya 3:1-5, 13; 2 Petro 3:3, 4) I ‘mpfilumpfilu wa misava leyintshwa’ lowu hambi ku ri UN kumbe vukhongeri byo hambana-hambana bya misava leyi byi nga swi kotiki ku wu herisa.
3. I swiendlakalo swihi leswi profeteriweke siku ra hina?
3 Rito ra Xikwembu ra vuprofeta ri hi tsundzuxa leswaku mavandla ya mademona ma humile ma ya eka “tihosi ta misava hinkwayo, [ma] ti [rhambela] nyimpi, ku ya lwa ni Xikwembu xa matimba hinkwawo hi siku lerikulu ra kona . . . endhawini leyi va nge i Armagedoni hi ririmi ra Xiheveru.” (Nhlavutelo 16:14, 16) Ku nga ri khale tihosi kumbe valawuri volavo va ta weriwa hi nchavo lowu humaka eka Yehovha. Wu ta fana ni nchavo lowu weleke Vakanana loko Yoxuwa ni Vaisrayele va tile ku ta hetisisa leswi va avanyiseriweke swona. (Yoxuwa 2:9-11) Kambe namuntlha hi loyi a fanekiseriwaka hi Yoxuwa, ku nga Kreste Yesu—“Mufumi wa vafumi ni Hosi ya tihosi”—la nga ta ‘ba matiko ni ku ma fuma hi nhonga ya nsimbhi’ hi ku kombisa “vukari lebyo chavisa bya Xikwembu lexi nga ni matimba hinkwawo.”—Nhlavutelo 19:15, 16.
4, 5. I vamani va nga ta ponisiwa, naswona ha yini?
4 I vamani lava nga ta pona enkarhini wolowo? Lava va nga ta kutsuriwa a hi vona lava khomiweke hi ku chava, kambe ku ta va hinkwavo lava nga ta va va kombise leswaku va chava Yehovha hi ndlela leyinene. Vanhu vo tano va “papalata ŝo biha,” ematshan’wini yo tivona va tlharihile. Hi ku titsongahata va anakanya swinene hi leswo lulama, xisweswo va humesa leswo biha emianakanyweni ya vona. Va ni xichavo lexinene eka Yehovha, Hosi leyi Tlakukeke, “Loyi a av̌anyisaka misav̌a hikwayo,” loyi a nga ta lovisa hinkwavo lava namarhelaka swo biha ku nga ri khale, hi laha a loviseke Vasodoma vo homboloka ha kona. (Genesa 18:25) Kunene, eka vanhu va Xikwembu, “ku tšhav̌a Yehova i šihlov̌o ša v̌utomi, e ku [ponisa] v̌anhu e makheleni ya rifu.”—Swivuriso 14:27.
5 Esikwini leri ra ku avanyisa ka Xikwembu, hinkwavo lava tinyikelaka eka Yehovha hi ku helela hi ku chava ku n’wi hlundzukisa, va ta kuma leswaku marito lama nga eka Swivuriso 3:8, lama vekiweke hi ku fanekisela, ma tiyisile: “[Ku chava Yehovha ku] ta v̌a muri e nkav̌eni wa wena, ni mongo e marambyini ya wena.”
Ku Dzunisa Yehovha
6. I yini lexi faneleke ku hi susumetela ku yingisa Swivuriso 3:9?
6 Ku chava ka hina Yehovha hi ndlela leyinene, kun’we ni ku n’wi rhandza swinene, swi fanele swi hi susumetela ku yingisa Swivuriso 3:9 leyi nge: “Ḍunisa Yehova hi rifuwo ra wena, ni ŝirangana ŝa hikwaŝo le’ŝi ku taleleke.” A hi sindzisiwi leswaku hi dzunisa Yehovha hi rifuwo ra hina. Leswi hi fanele hi swi endla hi ku tirhandzela, hi laha swi kombisiweke ha kona hi minkarhi ya kwalomu ka 12 ku sukela eka Eksoda 35:29 ku ya ka Deteronoma 23:23 malunghana ni magandzelo eIsrayele wa khale. Swirhangana leswi swi nyikiwaka Yehovha swi fanele ku va tinyiko letinene eka hinkwato leti hi nga ti nyikelaka, hi ku tlangela vunene ni tintswalo ta rirhandzu leti a hi kombiseke tona. (Pisalema 23:6) Ti fanele ti kombisa ku tiyimisela ka hina ku ‘hambeta hi lava mfumo ni ku lulama ka yena ku sungula.’ (Matewu 6:33) Kutani byi ta va byihi vuyelo bya ku dzunisa Yehovha hi rifuwo ra hina? “Kutani ŝitlati ŝa wena ŝi ta tala, ŝikhuv̌uto ŝa wena ŝi ta khapa-khapa hi vinyo yo ṭokombela.”—Swivuriso 3:10.
7. I swirhangana swihi leswi hi faneleke ku swi nyikela Yehovha, naswona vuyelo byi ta va byihi?
7 Yehovha ngopfu-ngopfu u hi katekisa hi tlhelo ra moya. (Malakiya 3:10) Hikwalaho, swirhangana leswi hi swi nyikelaka eka yena ngopfu-ngopfu swi fanele swi va swa moya. Hi fanele hi tirhisa nkarhi, matimba ni vuswikoti bya hina hi endla ku rhandza ka yena. Leswi hi ku fanana swi ta hi tiyisa, tanihi leswi ntirho wo tano wu veke “swakudya” leswi tiyisaka eka Yesu. (Yohane 4:34) Switlati swa hina swa moya swi ta tala, naswona ntsako wa hina, lowu fanekiseriwaka hi vhinyo yo tsokombela, wu ta khapa-khapa. Ku tlula kwalaho, tanihi leswi hi khongelelaka ku kuma swakudya swa nyama swa siku na siku hi ku tiyiseka, hi nga nyikela nkarhi na nkarhi hi mbilu hinkwayo, hi ndlela leyi hi nga kotaka ha yona eku seketeleni ka ntirho wo chumayela hi ta Mfumo emisaveni hinkwayo. (Matewu 6:11) Xin’wana ni xin’wana lexi hi nga na xona, ku katsa ni rifuwo ra moya, hi nyikiwe swona hi Tata wa hina wa le tilweni la nga ni rirhandzu. U ta hi chululela mikateko leyi engetelekeke, ntsendze loko hi tirhisa rifuwo leri leswaku hi dzunisa yena.—Swivuriso 11:4; 1 Vakorinto 4:7.
Ku Tshinya Hi Rirhandzu
8, 9. Hi fanele hi swi teka njhani ku tshinyiwa ni ku layiwa?
8 Eka tindzimana 11 na 12, Swivuriso ndzima 3 yi tlhela yi vulavula hi vuxaka lebyi tsakisaka bya tatana ni n’wana lebyi nga kona emindyangwini leyi chavaka Xikwembu, kun’we ni le xikarhi ka Yehovha ni vana vakwe va moya lava rhandzekaka lava nga emisaveni. Ha hlaya: “Ṅwana nga, u nga soli ku laya ka Yehova, u nga heli mbilu loko u biwa hi yena; hikuv̌a loyi Yehova a ṅwi ranḍaka, wa ṅwi tshinya, kukotisa tata wa munhu a layaka ṅwana loyi a ṅwi ṭakelaka.” Vanhu va misava va swi venga ku tshinyiwa. Vanhu va Yehovha va fanele ku swi amukela. Muapostola Pawulo u tshahe marito lawa ya Swivuriso, a ku: “N’wananga, u nga teki ku layiwa hi Hosi u ku endla mhaka leyitsongo, naswona u nga heli mbilu loko u tshinyiwa hi yona. Hikuva Hosi yi laya loyi yi n’wi rhandzaka. . . . Hikuva ku laya hinkwako, ku vonaka ku ri loku vavisaka enkarhinyana wolowo, loku nga tsakisiki, kambe endzhaku, ku veka mihandzu ya ku rhula ya vutomi lebyo lulama, eka lava va dyondzisiweke hi kona.”—Vaheveru 12:5, 6, 11.
9 Ina, ku tshinya ni ndzayo hi swin’wana swa swilo leswi un’wana ni un’wana wa hina a faneleke ku leteriwa ha swona, hambi hi tshinyiwa ni ku layiwa hi vatswari, hi vandlha ra Vukreste, kumbe hi ku anakanyisisa hi Matsalwa loko hi va ni dyondzo ya munhu hi xiyexe. Ku yingisa ndzayo swi vula vutomi ni rifu eka hina, hi laha Swivuriso 4:1, 13 na yona yi vulaka ha kona yi ku: “V̌ana, yingisani dyonḍo ya tatana, mi yi anakanya, mi ta kuma ku twisisa. Kho[m]a dyonḍo, u nga yi ṭhiki, u yi hlayisa, hikuv̌a i v̌utomi bya wena.”
Ntsako Lowukulu Swinene
10, 11. Hi swihi swivumbeko swin’wana swa marito yo tsakisa lama nga eka Swivuriso 3:13-18?
10 Sweswi se ku landzela marito yo xonga swinene, lawa ya nga ‘marito lama tsakisaka ni lama faneleke swinene ya ntiyiso’! (Eklesiasta 12:10) Marito lawa ma huhuteriweke ya Solomoni, ma hlamusela ntsako wa xiviri. I marito lawa hi faneleke ku ma tsala etimbilwini ta hina. Ha hlaya:
11 “Ku katekile munhu loyi a kumaka ku twisisa, ni loyi a kumaka v̌utlhari! Hikuv̌a binḍu ra byona ri tlula silver, ni ku anḍa ka byona ku tlula nsuku; byi tlula tiperla hi risima, hikwaŝo le’ŝi nav̌etaka a ŝi byi ringani. Ku leha ka masiku ku le v̌okweni ra šinene ra byona; ku fuma ni ku twala ŝi le v̌okweni ra šimaṭi. Tindlela ta byona i tindlela le’ti ṭakisaka, mitila hikwayo ya byona yi ni ku rula. I muri w[a] v̌utomi e ka la’v̌a byi fuweke, la’v̌a byi hlayisaka v̌a katekile.”—Swivuriso 3:13-18.
12. Vutlharhi ni ku twisisa swi fanele swi hi pfunisa ku yini?
12 Vutlharhi—rito leri ri phindha-phindhiwa ko tala ebukwini ya Swivuriso, hikuva ri kumeka minkarhi ya 46! “Masungulo ya v̌utlhari i ku tšhav̌a Yehova.” Lebyi i vutlharhi bya Xikwembu, lebyi tirhaka, lebyi munhu a byi kumaka hi ku tiva Rito ra Xikwembu leri pfunaka vanhu va xona ku endla swiboho leswinene loko va langutane ni minhlaselo leyi pfurhaka emisaveni ya Sathana. (Swivuriso 9:10) Ku twisisa, loku Swivuriso yi vulavulaka ha kona minkarhi ya 19, ka fambisana na vutlharhi, naswona ku hi pfuna ku lwisana ni marhengu ya Sathana. Nala lonkulu u ni ntokoto wa magidi ya malembe eku tirhiseni ka marhengu yakwe lama tumbeleke. Kambe hi ni nchumu wa nkoka swinene ku tlula ku dyondzisiwa hi ntokoto—ku twisisa lokunene, ku nga ku kota ku hambanisa leswinene ni leswi hoxeke, ni ku hlawula ndlela leyinene leyi u faneleke ku famba ha yona. Sweswo hi leswi Yehovha a hi dyondzisaka swona hi Rito rakwe.—Swivuriso 2:10-13; Vaefesa 6:11.
13. I yini lexi nga hi sirhelelaka eminkarhini leyo nonon’hwa hi tlhelo ra ikhonomi, naswona hi ndlela yihi?
13 Xiyimo lexi nga tshamisekangiki xa ikhonomi emisaveni ya namuntlha i xikombiso xa ku hetiseka ka vuprofeta bya Ezekiyele 7:19: “V̌a ta tšukumeta silver ya v̌ona e miṭenḍeleni, ni nsuku wa v̌ona wu ta v̌a tšhyaka e ka v̌ona, kasi silver ni nsuku a ŝi nga koti ku v̌a ponisa e sikwini ra v̌ukari bya Yehovha.” Rifuwo hinkwaro ra swilo leswi vonakaka emisaveni a ri ringani nikatsongo na matimba lama ponisaka ya vutlharhi ni ku twisisa. Nkarhi wun’wana Solomoni Hosi ya vutlharhi u vurile a ku: “Munhu o le nḍutini wa v̌utlhari, kukotisa loko a ri nḍutini wa mali; na kona ku tiv̌a ku sasekile hikuv̌a v̌utlhari byi hanyisa la’v̌a nga na byona.” (Eklesiasta 7:12) Kunene va katekile hinkwavo lava namuntlha va fambaka etindleleni ta Yehovha leti tsakisaka ni lava hi ku tlhariha va hlawulaka “ku leha ka masiku,” ku nga vutomi lebyi nga heriki, leyi nga nyiko ya Xikwembu eka un’wana ni un’wana loyi a kombisaka ripfumelo eka gandzelo ra Yesu ra nkutsulo!—Swivuriso 3:16; Yohane 3:16; 17:3.
Ku Hlakulela Vutlharhi Bya Ntiyiso
14. Yehovha u kombise vutlharhi lebyinene hi ndlela yihi?
14 Swi fanerile leswaku hina vanhu, lava vumbiweke hi xifaniso xa Xikwembu, hi tikarhatela ku hlakulela vutlharhi ni ku twisisa, ku nga timfanelo leti Yehovha hi byakwe a ti kombiseke hi ku endla mintirho yakwe leyo hlamarisa ya ntumbuluko. “Yehova o khingele misav̌a hi v̌utlhari, o yimise matilo hi ku anakanya.” (Swivuriso 3:19, 20) U ye emahlweni a endla swivumbiwa leswi hanyaka hi mintirho leyi kongomeke ya ku vumba, xin’wana ni xin’wana hi “tinšaka ta ŝona” naswona hi xikongomelo xa vutlharhi, hayi hi ndlela yo karhi ya xihundla, leyi nga hlamuselekiki ya hundzuluko. (Genesa 1:25) Loko eku heteleleni ku vumbiwa munhu a ri ni vutlharhi ni vuswikoti lebyi tlulaka swinene bya swiharhi, vana va Xikwembu va tintsumi va fanele va be mavoko va vuyelela va ri etilweni. (Ringanisa Yobo 38:1, 4, 7.) Ku twisisa ni vutlharhi lebyikulu bya Yehovha, kun’we ni rirhandzu rakwe swi voniwa kahle eka hinkwaswo leswi a swi endleke emisaveni.—Pisalema 104:24.
15. (a) Ha yini ku hlakulela vutlharhi ntsena swi nga enelanga? (b) Swivuriso 3:25, 26 yi fanele yi endla leswaku hi va ni ku tiyiseka hi yini?
15 A hi fanelanga hi hlakulela timfanelo ta Yehovha ta vutlharhi ni ku twisisa ntsena, kambe hi fanele hi tlhela hi ti namarhela swinene, hi nga tsani eku dyondzeni ka Rito rakwe. Wa hi tsundzuxa: “Ṅwana nga, leŝi ŝi nga ṭhuki ŝi sukela mahlo ya wena; hlayisa v̌utlhari ni ku twisisa. Ŝi ta v̌a v̌utomi e moyeni wa wena, ni ŝobombiso e nhaṅwini ya wena.” (Swivuriso 3:21, 22) Kutani hi nga famba hi ku tiyiseka, hi ri ni ku rhula emianakanyweni, hambi ku ri esikwini leri ri tshinelaka tanihi khamba ra ‘ndzoviso wa xitshuketa’ lowu nga ta wela misava ya Sathana. (1 Vatesalonika 5:2, 3) Hi nkarhi wa nhlomulo lowukulu hi woxe, “u nga ka u nga tšhav̌i ntšhav̌o wa šipuku, ni loko ši ri šidzedze le’ši nga ta lov̌isa la’v̌o biha. Hikuv̌a Yehova o ta v̌a šiṭhembo ša wena, o ta ponisa nenge wa wena e ntlhaṅwini.”—Swivuriso 3:23-26.
Ku Rhandza Ku Endla Leswinene
16. Handle ka ku hiseka evutirhelini, hi rihi goza leri lavekaka eka Vakreste?
16 Lawa i masiku yo kombisa ku chivirika eku chumayeleni ka mahungu lawa manene ya Mfumo leswaku byi va vumbhoni eka matiko hinkwawo. Kambe ntirho lowu wo veka vumbhoni wu fanele ku seketeriwa hi mintirho yin’wana ya Vukreste, hi laha swi hlamuseriweke ha kona eka Swivuriso 3:27, 28 leyi nge: “U nga ali ku endla le’ŝinene e ka loyi u nga ni fanelo ka yena, loko ŝi ri mandleni ya wena. U nga v̌uri ka warikwenu u [ku]: Famba u ta vuya, munḍuku nḍi ta ku nyika! Kasi leši a ši pfumalaka ši kona ka wena.” (Ringanisa Yakobo 2:14-17.) Tanihi leswi matiko yo tala emisaveni ma ngheneriweke hi vusweti ni ndlala, ku ve ni swilaveko swa xihatla swa leswaku hi pfuna vanhu-kulorhi, ngopfu-ngopfu vamakwerhu emoyeni. Xana Timbhoni ta Yehovha ti angurise ku yini?
17-19. (a) Hi xihi xilaveko xa xihatla lexi ku hlangavetaniweke na xona hi 1993, naswona ku ve ni n’wangulo wa njhani? (b) I yini lexi kombisaka leswaku vamakwerhu lava nga emaxangwini va “hlula [va] hlurisisa”?
17 Hi xikombiso: Lembe leri nga hundza, le tikweni ra khale ka Yugoslavia ku ve ni xilaveko xa xihatla xo pfuna. Vamakwerhu va le matikweni ya le kusuhi ni kwalaho va angule hi ndlela yo hlamarisa. Etin’hwetini to titimela ta xixika lexi hundzeke, vaphalali vo hlayanyana va swi kotile ku nghena endhawini leyi a yi ri ni nyimpi, va yisa tibuku leti a ta ha ku humesiwa, swiambalo swo kufumela, swakudya ni mirhi ya vutshunguri eka Timbhoni leti swi lavaka. Siku rin’wana, vamakwerhu va endle xikombelo xo nghenisa mimphakelo yo phalala ya tithani ta 15, kambe va nyikiwe mpfumelelo wo nghenisa mimphakelo ya 30 wa tithani! Timbhoni ta Yehovha ta le Austria ti hatlise ti rhumela tilori tin’wana tinharhu. Tithani hinkwato leti fikeke laha a ti yisiwa kona ti ve 25. Vamakwerhu a va tsakile swonghasi ku kuma swakudya leswi swo tala swa moya ni swa nyama!
18 Xana lava va swi kumeke va titwise ku yini? Eku sunguleni ka lembe leri, nkulu un’wana u tsarile a ku: “Vamakwerhu va le Sarajevo va ha hlayisekile swinene, naswona xa nkoka ngopfu, ha ha tiyile emoyeni lerova hi kota ku tiyisela nyimpi leyi ya vuhunguki. Xiyimo malunghana ni swakudya a xi tika swinene. Onge Yehovha a nga mi katekisa ni ku mi nyika hakelo hikwalaho ka matshalatshala lawa mi hi endleleke wona. Valawuri va ti xixima swinene Timbhoni ta Yehovha hikwalaho ka mahanyelo ya tona lamanene ni hikwalaho ka leswi ti xiximaka valawuri. Nakambe ha swi nkhensa swinene swakudya swa moya leswi mi hi tiseleke swona.”—Ringanisa Pisalema 145:18.
19 Vamakwerhu lava va nga ekhombyeni nakambe va kombise ku tlangela hi ku chivirika ka vona evutirhelini bya nsimu. Vanhu vo tala va ta eka vona va ta kombela tidyondzo ta le kaya ta Bibele. Le dorobeni ra Tuzla, laha ku yisiweke ntlhanu wa tithani ta swakudya swo phalala, vahuweleri va 40 va vike tiawara ta 25 ha un’we hi ku ya hi avhareji ya n’hweti entirhweni wa nsimu, va seketela swinene maphayona ya kaye ya le vandlheni ra ka vona. Va ve ni nhlayo leyi hlamarisaka ya vanhu va 243 eXitsundzuxweni xa rifu ra Yesu. Vamakwerhu lava va rhandzekaka hakunene va “hlula [va] hlurisisa hikwalaho ka yena loyi a hi rhandzeke.”—Varhoma 8:37.
20. I ‘ku pfunana’ ka njhani loku veke kona etikweni ra khale ka Soviet Union?
20 Ku hanana loku kombisiweke hi ku yisiwa ka swakudya swo tala ni swiambalo swo kufumela etikweni ra khale ka Soviet Union na kona ku engetele ku hiseka ka vamakwerhu va kwalaho. Hi xikombiso, le Moscow, nhlayo ya lava veke kona lembe leri eXitsundzuxweni a yi ri 7 549, loko yi ringanisiwa ni ya lembe leri nga hundza ya 3 500. Hi nkarhi lowu fanaka, mavandlha edorobeni rero ma engeteleke ku sukela eka 12 ku ya ka 16. Etikweni hinkwaro leri khale a ri vuriwa Soviet Union (handle ka Matiko ya Baltic), ku ve ni ku engeteleka ka mavandlha hi 14 wa tiphesente, 25 wa tiphesente eka vahuweleri va Mfumo, ni 74 wa tiphesente eka maphayona. Mawaku moya wonghasi wa ku chivirika ni ku tinyikela! Swi hi tsundzuxa hi ta xiendlakalo xa lembe xidzana ro sungula loko ku va ni ‘ku pfunana.’ Vakreste lava a va ri ni timfanelo ta moya ni rifuwo ra swilo leswi vonakaka va nyikele tinyiko hi timbilu ta vona hinkwato, va ti yisa eka lava va nga etindhawini leti nga evuswetini, kasi ku chivirika ka lava va nga evuswetini swi tsakise lava nyikeleke tinyiko, swi tlhela swi va khutaza.—2 Vakorinto 8:14.
Venga Leswo Biha!
21. I ku hambanisiwa kwihi loku kombisiwaka exikarhi ka lavo tlhariha ni swihunguki hi marito yo hetelela ya Swivuriso ndzima 3?
21 Ndzimana ya vunharhu ya Swivuriso yi ya emahlweni yi nyikela nxaxamelo wa timhaka to hambana-hambana, yi gimeta hi xitsundzuxo lexi nge: “U nga ṭhuki u anakanyela warikwenu le’ŝo biha, loko a ṭhamile hi ku rula na wena. U nga tengisani na munhu ntsena loko a nga ri na nanḍu ka wena. U nga ṭakeli munhu wa lunya, mikhuv̌a ya yena, u nga teki ni wuṅwe. Hikuv̌a munhu wo homboloka i manyala e ka Yehova, kambe šihundla ša yena, ši na la’v̌a lulameke. Širuko ša Yehova ši le ndlwini ya v̌adyohi, kambe o katekisa yindlu ya la’v̌a lulameke. E v̌asanḍi, wa v̌a sanḍa ngopfu, kambe o ṭeṭelela la’v̌a tiṭongahataka; la’v̌o tlhariha v̌a ta dya nḍaka ya šitšhav̌o, loko ŝi ri ŝihunguki, ku twala ka ŝona i tingana.”—Swivuriso 3:29-35.
22. (a) Xana hi nga swi papalatisa ku yini ku hlayiwa exikarhi ka swihunguki? (b) Lavo tlhariha va venga yini, naswona va hlakulela yini, kutani ku va ni vuyelo byihi?
22 Hi nga swi papalata njhani ku hlayiwa exikarhi ka swihunguki? Hi fanele hi dyondza ku venga leswo biha, ina, hi nyenya leswi Yehovha a swi nyenyaka—tindlela hinkwato leti kanganyisaka ta misava leyi ya madzolonga, leyi nga ni torha ra ngati. (Nakambe vona Swivuriso 6:16-19.) Ku hambana ni sweswo, hi fanele ku hlakulela leswinene—leswi faneleke, leswo lulama ni ku titsongahata—leswaku hi ta kuma “rifuwo, ni ku kwetsima, ni v̌utomi” hi ku titsongahata ni ku chava Yehovha. (Swivuriso 22:4) Leyi ku ta va hakelo ya hina hinkwerhu lava tirhisaka xitsundzuxo lexi landzelaka hi ku titsongahata: “Ṭhemba Yehova hi mbilu ya wena hikwayo.”
Nhlamuselo Ya Wena Hi Yihi Ke?
◻ Tsalwa-nkulu ra dyondzo leyi ri tirha njhani namuntlha?
◻ Hi nga n’wi dzunisisa ku yini Yehovha?
◻ Ha yini hi nga fanelanga ku tekela ndzayo ehansi?
◻ Ntsako lowukulu wu kumeka kwihi?
◻ Hi nga swi rhandza njhani leswinene ni ku venga leswo biha?
[Swifaniso leswi nga eka tluka 18]
Lava nyikelaka magandzelo lamanene eka Yehovha va ta katekisiwa swinene