EVuxeni Ni Le Vupela-dyambu, Yehovha U Tiyisa Vanhu Vakwe
EMATIKWENI lawa ntirho wo chumayela wu yirisiweke kona, etindhawini leti hlaseriweke hi madzolonga, ni le matikweni laha ku yirisiwa ka ha ku herisiwaka—ina, ensin’wini hinkwayo ya misava hinkwayo—Yehovha u ya emahlweni a pfuna Timbhoni takwe hi “matimba lama tlulaka lama tolovelekeke.”—2 Vakorinto 4:7, NW.
Ku Humelela Hambi Hi Yirisiwile
Exihlaleni xa le Vuxa-mpfungwe, ntirho wo chumayela wu ni malembe ya 17 wu yirisiwile ku fikela sweswi. Xana Timbhoni ti hetiwe matimba? Nikatsongo! Hi May la nga hundza va fikelele nhlohlorhi leyintshwa ya vahuweleri va 10 756, lava 1 297 wa vona a va ri vatirheli va nkarhi hinkwawo. Tanihi leswi swiyimo swa misava swi yaka swi onhaka, vanhu va le xihlaleni va swi tsakela swinene ku yingisela ntiyiso. Kutani a va vika tidyondzo ta Bibele ta 15 654 leti fambisiweke emakaya ya vanhu lava tsakelaka. Eku sunguleni, 25 397 va ve kona eminhlanganweni yo tsundzuka rifu ra Yesu leyi fambisiweke hi ku rhula.
Loko Mintsombano ya Muganga ya “Dyondzo Ya Xikwembu” yi khomiwile—leyi a yi khomiwe hi vuxiyaxiya hi ku ya hi swiyimo swa ndhawu yoleyo—vamakwerhu va tsakele ku amukela tikopi ta vona hi ririmi ra vona, leti fanaka, leti endliweke le United States. Vahundzuluxeri, vaxopaxopi va swihoxo, ni van’wana va tinyiketele ku tirha tiawara to tala leswaku va ta kota ku hlela ku humesiwa ka buku leyikulu, leyi nga ni matluka ya madzana, nkarhi wa ha ri kona. Naswona ndhawu ya vugandliselo ya tiko leyi nga ni ntirhisano yi tsakele ku endla ntirho lowo saseka wa ku gandlisa ni ku boha tibuku. Vatsombani va tsakele ku amukela buku leyi endliweke hi mivala hinkwayo ni swifaniso swa yona swo tlula gidi. Vatirhela-mfumo vo tala va xixima Timbhoni ta Yehovha, naswona nkaneto wu tala ku huma eka vafundhisi va Vujagana. Swa tshembisa leswaku ku nga ri khale ku yirisiwa ku ta hela.
Ku Vuriwa Yini Hi Tiamerika?
Timbhoni ta Yehovha ematikweni lawa ya le Vupela-dyambu ti hlangane ni vamakwavo va tona va le Vuxeni eku langutaneni ni swiphiqo swa tona hi xivindzi, naswona moya wo kwetsima wa Yehovha wu va pfuna ku hlula swiyimo leswi nonon’hwaka. Hi xikombiso, xiya xiviko lexi landzelaka lexi humaka etikweni ra Latin-Amerika laha mintlawa leyi xavisaka swidzidzirisi leswi nga riki enawini yi tshamelaka ku famba emakhwatini.
Ntlawa wa Timbhoni wu khandziye bazi wu ya ensin’wini leyi nga yoxe. Loko va chika ebazini, va vone xipatwana lexi nga etlhelo, lexi humaka eximutanini. Kutani ntlhanu wa vamakwerhu va chikile leswaku va ta vona laha xipatwana lexi xa ritshuri xi yaka kona, va avela vamakwerhu va xisati ni vana ku tirha eximutanini lexi. Un’wana wa vamakwerhu wa rungula:
“Endzhaku ka ku famba tiawara timbirhi epatwini hi lo vona tindlu ti nga ri tingani ntsena. Kutani, xikan’we-kan’we vavanuna va nhungu lava hlomeke lava ambaleke swihuku swo siva nghohe, va humelela hi le makhwatini. Van’wana a va ri na swibamu, kasi van’wana a va khome mabanga. Xana a hi onhe yini? Hi sungule ku vutisa leswi a va lava swona, kambe hi byeriwe ku miyela hi ku whii—hi famba hi ya emahlweni ntsena. Hi endle tano! Ku chochovela tiawara timbirhi nakambe emakhwatini yo tlhuma swi hi fikise endhawini ya rivala laha handle ko kanakana a ku tikomba ku ri ekampeni ya nyimpi. Hinkwako a ku ri na varindzi va khome swibamu. Exikarhi a ku ri ni yindlu leyi akiweke kahle leyi hi yisiweke eka yona.
“Endzhaku ko tshamiseka hi vulavule na un’wana loyi handle ko kanakana a ri murhangeri wa kampa. A ambale kahle, a dyondzekile, naswona a xiximeka swinene. U kombetele un’wana wa ntlawa wa vamakwerhu kutani a n’wi byela ku suka a yima. Kutani u n’wi vutise a ku: ‘U anakanya yini hi ntlawa wa [hina]?’ Hi ku xiya kahle laha a hi ri kona, makwerhu u hlamule a ku: ‘Ina, ha wu tiva ntlawa wa n’wina, kambe a hi khumbeki ha wona, kumbe ntlawa wihi na wihi wa politiki. Xivangelo xin’we lexi hi tiseke laha i ku chumayela hi Mfumo wa Yehovha Xikwembu hi Kreste Yesu. Ku nga ri khale wu ta lovisa tihulumendhe ta politiki ta mafambiselo lawa ya swilo ivi wu tisela vanhu va laha misaveni mikateko leyi hlamarisaka ehansi ka swiyimo swa Paradeyisi—leswi ku nga riki na munhu kumbe ntlawa wa vanhu lowu wu nga swi endlaka.’
“Langutelo ra munhu loyi ri cinca. U sungule ku vutisa swivutiso. ‘Mi swi dyondze kwihi swilo leswi hinkwaswo? Mi dyondzisiwe njhani leswaku mi vulavula hi ndlela leyi?’ Ku ringana awara ni hafu, hi kote ku nyikela vumbhoni lebyinene hi swiyimo swa misava naswona hi komba leswaku Bibele yi vulavula hi ntshembo wun’we wa vanhu. Hi tlhele hi hlamusela Varhoma ndzima 13—leswaku hi xixima vulawuri lebyi fumaka, kambe loko ku va ni ku hambana exikarhi ka Rito ra Yehovha na vona, hi xixima Yehovha Xikwembu ku sungula. Eku heteleleni hi n’wi fambisele tibuku leti a hi ri na tona. U teke tinharhu xikan’we ni Bibele, naswona lexi hi hlamariseke, u humese munyikelo wa tona. U vule leswaku u ta ti hlaya.
“Endzhaku, murhangeri u khamete un’wana wa vavanuna leswaku a hi humesela ehandle ka kampa. Sweswi a hi tlhelela endzhaku, hi nkhensa Yehovha hikwalaho ka ku hlula ka hina loko hi nyikela vumbhoni ensin’wini yin’wana.”
Le Afrika Leri Hlaseriweke Hi Nyimpi
Exikarhi ka Vuxa-mpfungwe na Vupela-dyambu-mpfungwe ku kumeka tiko-nkulu ra Afrika. Nyimpi ya swivongo yi hundzule matiko man’wana ya kona ma va boboma ra madzolonga. Le Liberia, nakambe vanhu va Yehovha a va hlaseriwe hi nyimpi ya xin’wana-manana leyi pfukeke hi matimba. Eku sunguleni a yi lwiwa endzeni ni le handle ka doroba ra le ntsindza hi October na November 1992. Kutani, loko nyimpi yi hangalake na tiko, mavandlha hinkwawo ma hangalakile loko vamakwerhu va balekela emakhwatini ni vaaki hinkwavo va tiko. Hambi swi ri tano, ku hiseka ka vona a ku herisiwanga. Loko va baleka, a va chumayela, naswona leswi swi endle leswaku ku nyikeriwa vumbhoni lebyikulu eswiphen’wini swa le kule swa tiko.
Vandlha rin’wana ra vamakwerhu lava hlongoriweke emakaya ya vona ri ake Holo ya Mfumo ya xinkarhana exikarhi ka mirhi yo endla rhaba. Edorobeni leri nga le kusuhi ni ndhawu ya masocha, ni nhlikanhi vaaki a va tsutsumela emirhini yo endla rhaba leyi nga kusuhi hi ku chava tibomo leti waka hi le henhla. Vamakwerhu va kwalaho (ku katsa ni vunyingi bya lava hlongoriweke va huma entsindza wa Monrovia) va hlele ntirho wa nsimu naswona a va voniwa nkarhi na nkarhi va ri karhi va chumayela magidi ya vanhu lava tshamaka ehansi ka mirhi yo endla rhaba! Loko xihaha-mpfuka xi ta vamakwerhu va xinuna ni va xisati a a va jitamela endzeni ka gova leri nga kusuhi naswona loko khombo ri hundzile, va ya emahlweni va nyikela vumbhoni.
Lexi hlamarisaka ku tlula gidi ra vahuweleri va mavandlha lava yisaka swiviko eka Sosayiti va endle xiringaniso xa tiawara ta 18,1 entirhweni wa le nsin’wini naswona va fambisa tidyondzo ta Bibele ta 3 111 n’hweti na n’hweti, ku nga khathariseki swiyimo leswi swa nyimpi ya xin’wana-manana.
Le Afrika emalembeni ya mune lama hundzeke, ku yirisiwa ka ntirho wa Timbhoni ta Yehovha ku herisiwe ematikweni ya 18. Naswona ku ve ni ntsako lowukulu! Hi August 12, ku yirisiwa ka Timbhoni eMalawi loku tivisiweke hi October, 1967, ku herisiwile. Ku chumayela mahungu lamanene hi ku tumbela a ku famba kahle, kambe sweswi Timbhoni ti kota ku ya emahlweni ti ntshunxekile, hambi leswi ti faneleke ku rindzela ku pfuxiwa ka vafi leswaku ti ta amukela vanghana va tona nakambe lava dlayiweke hi vatshikileri.
Le Mozambhiki, ntwanano wa ku rhula wu sungule ku tirha hi October 4, 1992. Tindhawu leti a swi nga koteki ku ti fikelela hikwalaho ka nyimpi leyi onhaka ya malembe ya 16 lama hundzeke ta fikeleriwa. Endhawini ya le Carioco, mbulavurisano wu tlhele wu simekiwa ni vamakwerhu va xinuna ni va xisati va 375 lava a va nga swi koti ku tsalelana ni nhlengeletano hi malembe ya nkombo lama hundzeke. Nhlengeletano yo hlawuleka ya siku rin’we yi khomiwe le Milange, ntsindza wa xifundzha lexi khale a xi tiviwa tanihi tlhelo ra mixaxa ya nxaniso ni ndhawu yo “lerhisa” Timbhoni ta Yehovha leti vunyingi bya tona a ti ri vabaleki vo huma eMalawi. Nhlayo leyi hlamarisaka ya vanhu va 2 915 yi ve kona, ku katsa ni mulawuri wa muti, loyi a amukeleke Timbhoni ta Yehovha. Kutani khale ka “ndhawu yo lerhisa” yi ve ndhawu ya siku ra dyondzo ya Xikwembu.
Murhumiwa wa tsala: “Malunghana ni vamakwerhu lava tikumeke va ri emixaxeni ya vabaleki le Xifundzheni-nkulu xa Tete muyimeri wa UNHCR (United Nations High Commissioner for Refugees) u xiye swin’wana leswi tsakisaka. U vule leswaku Timbhoni ta Yehovha ti hlele tikampa ta tona, ti hambanile ni ta mintlawa leyin’wana. U te: ‘Kampa ya tona a ku ri yona ntsena leyi a yi hleriwe kahle,’ u engeterile a ku ‘Timbhoni ta Yehovha ti basile, ti hlelekile, naswona ti dyondzekile.’ Nakambe u tinyiketele ku ndzi teka hi xihaha-mpfhuka leswaku ndzi ta tivonela hi ndzexe. Loko hi ri karhi hi haha, muhahisi u ndzi kombe tikampa timbirhi. Yin’wana a yi hlakarile naswona yi thyakile, yi ri ni tindlu to phamiwa leti tlhomelaneke, leti nga xaxametiwangiki kahle. Kampa leyin’wana a yi akiwe kahle, yi ri ni tindlu leti hambanisiweke hi mapato. Tindlu a ti languteka kahle, ku kukuriwe ni swivava swa tona. Tin’wana ti chuchutiwe hi pende yo endliwa ekaya. Muhahisi u te: ‘Vhumbha leswaku hi yihi leyi nga ya n’wina?’ A wu ri ntsako lowukulu eka mina ku hlangana ni vamakwerhu ekampeni leyi. Sweswi ku na mavandlha ya nhungu eximutanini lexi xa Timbhoni.”
Eka “Tiko Ra Gama”
Doo, lowu a hi wona mujeko wa U.S.! Exikarhi ka Vuxa na Vupela-dyambu ku na tiko ra le Yuropa, Albania, leri vito ra rona hi ririmi ra ximfumo ku nga Shqipëria leswi vulaka “Tiko Ra Gama.” Sweswinyana, ku yirisiwa ka tihanyi ka Timbhoni ta Yehovha ka malembe ya 50 etikweni leri ku herisiwile, naswona va kota ku hlangana ni vamakwavo lava humaka eVuxeni na lava humaka le Vupela-dyambu va tsakela ntshunxeko wa vona wa vugandzeri. Hakunene va “[londzovota] nkarhi lowu [va] nga na wona.” (Vaefesa 5:16) Nhlengeletano yo sungula ya siku rin’we ematin’wini ya Albania, yi khomeriwe eHolweni ya Tiko, entsindza wa Tiranë, hi Sonto, March 21. Hi Mugqivela ni nhlikanhi ntlawa wa vatirhi vo tirhandzela wa Timbhoni ta 75 wu hundzule ndhawu ya nhlangano leyi a yi ri rhumbi yi va holo ya nhlengeletano leyi baseke ni leyi langutekaka. Mufambisi u hlamale swinene. Naswona ku fanele ku xiyiwa leswaku exikarhi ka vatirhi lava vo tirhandzela va 75, ku khuvuriwe va kwalomu ka 20 ntsena!
Xiyimo xa maxelo a xi nga ri xinene. Loko vapfhumba va le ntsungeni va fika, ku xewetana—loku a ku kombisiwa ngopfu hi ku tlakusa mavoko na ku angarhana—ku endle nhlengeletano yoleyo yo hlawuleka ya siku rin’we, yi va yo hlawuleka swinene. Mavoko ma ri karhi ma tlakuseriwe ehenhla, Makwerhu Nasho Dori u pfule hi xikhongelo. U khuvuriwe hi 1930 naswona sweswi a nga ha voni kahle. Nongonoko wu nyikeriwe hi Xialbania, xiphemu lexikulu a xi nyikeriwa hi maphayona yo hlawuleka ya le matikweni mambe. Vanhu va 585 lava a va ri kona va yimbelele risimu leri nge “Ku Tinyiketela Ka Vukreste”—rin’wana ra tinsimu ta tsevu leti hundzuluxeriweke hi Xialbania hikwalaho ka xiendlakalo lexi—loko vamakwerhu va xinuna ni vaxisati va 41 va kongoma edan’wini leri vamakwerhu va Magriki lava endzeke va ri endleke eHolweni ya Mfumo ya kwalaho hi tintswalo. Vona ku cinca ka kona! Eku sunguleni, ku kumeka u ri ni Bibele a swi vula ku ya etikampeni u ya tirhisiwa hi nsindziso, naswona minhlangano a yi nga tluli vanhu vambirhi kumbe vanharhu.
Siku leri tlhandlameke nhlengeletano, hofisi ya Watch Tower yi amukele riqingho ri huma eka mufambisi wa holo. Hakanyingi a nga ri na mhaka ngopfu na lava va tirhisaka holo. Lowu i ntirho wa xandla xa mufambisi. Kambe u te: “Ndzi ba riqingho hi ku lava ku mi nkhensa. A ndzi si tshama ndzi vona ndhawu leyi yi basise xileswi. Loko ndzi ta yi hlamusela kahle, ndzi nga ku, moya lowu humaka etilweni wu xikele laha holweni ya hina tolo. Nkarhi na nkarhi loko mi lava ku tirhisa holo ya hina, ndzi kombela leswaku mi hi byela, naswona mi ta va vo sungula ku pfuniwa. Ma tiva, hambi mo hamba mi ta endzhaku ka tin’hweti tinharhu hi nga mi lomba yona mahala.”
Timbhoni ti tlhelele emakaya ya tona ti tiyisiwile naswona ti khensa ivi ti sungula ku lunghiselela Xitsundzuxo xa rifu ra Yesu. Endzhaku ka masiku ya 15 ntsena, hi Ravumbirhi, April 6 ku khomiwe Xitsundzuxo xo sungula etindhawini ta nkombo erivaleni.
Emutini wa Berat nhlayo ya lava veke kona eminhlanganweni yi tlakuke yi ya eka 170, naswona muprista wa kwalaho a khunguvanyekile. Exikarhi ka vahuweleri va Mfumo va 33 le Berat, ku khuvuriwe 21 enhlengeletanweni. Berat wu vike 472 wa lava veke kona eXitsundzuxweni. Tinhlayo tin’wana ta lava veke kona eXitsundzuxweni a ti tsakisa, ngopfu-ngopfu hikwalaho ka vurhangeri lebyinene bya maphayona yo hlawuleka.
Edorobeni ra Albania leri teleke hi miti ya Khatoliki, ku nga Shkodër, laha ku nga ni muako wo hlanganyela eka wona, kereke yi sungule ku kandziyisa mapapila ya mahungu n’hweti na n’hweti, naswona nkandziyiso wun’wana ni wun’wana a wu vulavula hi “Ndlela Yo Papalata Timbhoni Ta Yehovha.” Nkandziyiso wo hetelela wu te: “Timbhoni ta Yehovha ti hlasele Shkodër hinkwaro”! Vuthu lerikulu ra Timbhoni timbirhi ri hlengelete vanhu lava nga ni mahanyelo ni lava nga ni miehleketo va 74 eXitsundzuxweni. Endzhaku ka ku yingisela nkulumo ya Xitsundzuxo, mindyangu ya 15 yi kombele tidyondzo ta le kaya ta Bibele. Emutini wun’wana wa Durres, laha ku nga ni ntlawa wa Timbhoni ta mune, nhlayo ya lava veke kona ya 79 a yi ri leyinene.
Hikwalaho ka nkaneto wa vantshwa va Makhatoliki, lava xungeteke hi ku hoxetela Timbhoni hi maribye, nhlangano wa Xitsundzuxo eximutanini xa le ntshaveni xa Kalmeti i Vogel wu rhurhiseriwe ekaya ra makwerhu wa kwalaho, laha vanhu va 22 va hlanganyeleke hi ku rhula. Ku ni vahuweleri va ntlhanu entlaweni lowu, laha vanharhu va vona va khuvuriweke enhlengeletanweni le Tiranë.
Le Vlorë majaha mambirhi ma amukele kopi ya Xihondzo xo Rindza, va yi hlaya, ivi va tsalela Sosayiti va ku: “Sweswi hi tivitana Timbhoni ta Yehovha hikwalaho ka ntiyiso lowu hi wu dyondzeke eka Xihondzo xo Rindza. Hi kombela mi hi rhumelela mpfuno.” Maphayona mambirhi yo hlawuleka ma averiwe kwalaho, naswona un’wana wa majaha lawa mambirhi u fanelekele ku va muhuweleri hi xihatla. A tsakile ku va exikarhi ka vanhu va 64 lava veke kona eXitsundzuxweni le Vlorë.
Hi va-1950 makwerhu wa Mualbania loyi a dyondzeke ntiyiso le United States u tlhelele emutini lowu a kuleleke eka wona wa Gjirokastër, laha a tirheke hi laha a swi koteke ha kona ku kondza a fa. U byale mbewu ya ntiyiso embilwini ya n’wana wakwe. Loko ku yirisiwa ku herile, mufana loyi u kombele mpfuno eka Sosayiti ya Watch Tower. Munhu un’wana la tsakelaka loyi a tshamaka en’walungwini wa ximutana u tsarile a kombela mpfuno na yena, kutani maphayona ya mune yo hlawuleka ma rhumeriwile. Hi Ravunharhu ni mixo endzhaku ka Xitsundzuxo, un’wana wa vona u bele hofisi ya Sosayiti ya le Tiranë riqingho a ku: “A ndzi koti ku tikhoma hi leswi moya wa Yehovha wu swi endleke. Hi tsake ngopfu. Xitsundzuxo xi humelerile.” Nhlayo ya lava veke kona a ku ri 106, ku katsa ni ntlawa wa vahuweleri va Mfumo va nkombo.
A wu fika kwihi ntsengo wa lava veke kona eXitsundzuxweni? Hi 1992, a ku ri na vahuweleri va Mfumo va 30 ntsena, kasi lava veke kona a va ri 325. Hi 1993, vahuweleri va 131 va hlengelete vanhu va 1 318. Hi malembe lawa mambirhi, lava veke kona a va tlula nhlayo ya vahuweleri ka khume. A hi ku tsakisa ka swona ku vona “lo’nṭongo [a] v̌a khume ra madzana” hi nkarhinyana wutsongo!—Esaya 60:22.
“Lehisa Tinguv̌u Ta Tente Ya Wena”
Tanihi leswi ntirho wo chumayela wa Timbhoni ta Yehovha wu ndlandlamukaka ematlhelweni hinkwawo ya misava, xirhambo xi ya emahlweni xi ku: “Anamisa v̌uṭhamo bya nṭonga wa wena, u lehisa tinguv̌u ta tente ya wena: u nga feleli, lehisa tingoti ta wena, tiyisa timhanḍe ta wena. Hikuv̌a u ta hangalaka e tlhelo ra šinene ni tlhelo ra šimaṭi.” (Esaya 54:2, 3) Ku hangalaka loku ‘entsongeni lowukulu’ wa Xikwembu—lowu yimeriwaka hi vandlha ra misava hinkwayo ra vagandzeri va xona—handle ko kanakana ku ve erivaleni le Yuropa-vuxa, ngopfu-ngopfu ematikweni ya khale ka Soviet Union. Endzhaku ka ku tiyisa malandza yakwe hi makume ya malembe ya nsivelo, sweswi Yehovha u pfuna Timbhoni takwe hi matimba lama engetelekeke lama lavekaka eku ndlandlamuxeni ni le ku tiyiseni ka nhlengeletano.
Le Moscow, eRussia, eXitediyamu xa Locomotive, hi July 22-25 nhlohlorhi ya 23 743 yi ve kona entsombanweni wa matiko hinkwawo wo hlawuleka wa nongonoko wa n’wexemu wa “Dyondzo Ya Xikwembu.” I mani loyi a a ehleketa leswaku leswi swi nga endleka, hambi emalembeni mambirhi lama hundzeke? Kambe swi endlekile! Ku tlula 1 000 a va huma eJapani ni le Korea, kwalomu ka 4 000 a va huma le United States ni le Canada, naswona magidi man’wana a ma huma ematikweni yo tlula 30 le Pacific Dzonga, Afrika, Yuropa, ni le tindhawini tin’wana—kunene a ku ri ku hlangana ka Vuxa ni Vupela-dyambu. Mawaku ku khutaziwa hi ku vona vanhu vo tala va hlangana swin’we hi ku rhula ni vamakwerhu va xinuna ni vaxisati vo tlula 15 000 va Marhaxiya! Hinkwavo a va khapa hi ntsako.
Ku khuvuriwe ntsengo lowu hlamarisaka wa Timbhoni letintshwa ta 1 489. Nkhuvulo lowu wu haxiwe swinene hi vateki va mahungu emisaveni hinkwayo, ku katsa ni xifaniso lexinene etlukeni ra le mahlweni ra The New York Times. Hambi leswi ku phokotela mavoko a ku ri ni huwa leyikulu hi nkarhi wa nkhuvulo, ku ve ni huwa leyi tlurisaka sweswo enkulumeni yo hetelela, endzhaku ka loko xivulavuri xi nkhense vatirhi vo tirhandzela va 4 752 ni vatirhela-mfumo lava pfuneke ku endla leswaku ntsombano wu humelela, naswona u te: “Ku tlula hinkwaswo, hi nkhensa Yehovha!” Ina, moya wa Yehovha wu hlule nkaneto lowu humaka eka vukhongeri bya Orthodox naswona wu nyikele matimba lamakulu eku endleni ka leswaku ntsombano wu tsakisa swinene.
Hambi swi ri tano, le dorobeni ra Ukraine le Kiev, hi August 5-8 a ka ha ta ta swo tala. Nakambe, vatirhi va ku tirhandzela va pfuxe xitediyamu hi laha ku heleleke, naswona Holo leyi ya Mfumo leyikulu yi rhurhele 64 714 ku nga nhlohlorhi ya lava veke kona. Nakambe Timbhoni ti tile ti huma eVuxeni na le Vupela-dyambu ni le swiphen’wini hinkwaswo swa misava. Tinkulumo-nkulu a ti tolokiwa hi tindzimi ta 12. Vapfhumba van’wana va 53 000 lava fikeke hi vutleketli byo hambana-hambana, a va fanele va hlanganisiwa eswitichini ni le timbaleni ta swihaha-mpfhuka va tlhela va yisiwa etindhawini ta vona ta byetlelo, etihodela, eswikolweni, emakaya, hambi ku ri eswikepeni. Leswi hinkwaswo swi endliwile hi ku tirhisa mali yitsongo hi nhleleko lowunene ni lowu humelelaka leswi endleke leswaku maphorisa ya kwala dorobeni ma hlamala ni ku bumabumela.
Maninginingi ya nongonoko lowo tsakisa wa ntsombano a ma ri nkhuvulo lowu tekeke tiawara timbirhi ni hafu. Ntsengo wa vamakwerhu va xinuna ni vaxisati lavantshwa va 7 402, va kombise ku tinyiketela ka vona eka Yehovha, loko ngulumelo wa ku phokotela ka mavoko wu hangalaka ni xitediyamu lexi lexikulu. Leyi yi tlula nhlohlorhi leyikulu ya nkhuvulo lowu hundzeke ya 7 136 leyi rhekhodiweke loko 253 922 wa vatsombani va hlengeletane le Dorobeni ra New York hi 1958.
Tanihi leswi nkarhi lowu wa ku avanyisa wu tshinelaka emakun’wini ya wona, vanhu lava kotisaka tinyimpfu lava humaka eVuxeni, eVupela-dyambu, hambi ku ri “emakun’wini ya misava” va karhi va hlengeletiwa va endla vun’we lebyi nga faniki na byin’wana ematin’wini hinkwawo ya vanhu. Hakunene, “ntshungu lowukulu . . . [lowu humaka] ematikweni hinkwawo, ni le tinxakeni hinkwato, [wu ri wa] swivongo hinkwaswo ni [wa] tindzimi hinkwato” wu hlanganyela na Israyele wa moya eku twariseni ka ripfumelo ra vona egandzelweni ra nkutsulo ra nkoka ra Yesu, masungulo ya hinkwaswo leswi hetisisiwaka eku lweriweni ka Mfumo wa Yehovha lowu tlakukeke.—Mintirho 1:8; Nhlavutelo 7:4, 9, 10.
[Swifaniso leswi nga eka tluka 8, 9]
Vuxa byi hlangana ni Vupela-dyambu le Moscow ni le Kiev