Xiviko Xa Vahuweleri Va Mfumo
Xivindzi Xi Na Hakelo Leyi Fuweke
YESU u vhumbhe leswaku valandzeri vakwe va ta xanisiwa, naswona muapostola Pawulo u vule tano na yena, hi laha swi tsariweke ha kona eka 2 Timotiya 3:12: “Hakunene, hinkwavo lava navelaka ku hanya vutomi bya [ku chava Xikwembu, NW] eka Kriste Yesu, va ta xanisiwa.” Kambe xivindzi eku tirheleni Yehovha Xikwembu xi na hakelo leyi fuweke.
◻ Leswi swi ve tano le mutini wa le n’walungu-vuxa bya Malaysia. Hambi leswi a ri Mubudha la hisekaka la dyondziseke vana vakwe nkarhi na nkarhi, tatana loyi a a nga swi koti ku sivela vanhwana vakwe vanharhu ni majaha manharhu ku dyondza Bibele ni Timbhoni ta Yehovha. Hambi a ri nsati wakwe u kombise ku tsakela ntiyiso. Siku rin’wana muakelani wakwe u n’wi sole a ku: “Xana u nga hluleka njhani ku lawula vana va wena u va pfumelela ku va Timbhoni ta Yehovha? Vana va mina hinkwavo va ndzi seketela evukhongerini bya vakokwa wa hina bya Vubudha. Ndzi ku twela mbilu ku vava!”
Tatana loyi u hatlise a ya ekaya a xungeta ku ba makwerhu wa xisati loyi a a fambisa tidyondzo ni vana vakwe. Hambi swi ri tano, vana vakwe va n’wi verhamisile kutani va ye emahlweni ni ku dyondza Bibele ni Timbhoni ta Yehovha naswona va hlanganyela minhlangano hi nseketelo wa mana wa vona.
Hambi swi ri tano, eku heteleleni tatana u rhambe ndyangu hinkwawo leswaku wu ta eka yena. U lerise a ku: “Hlawulani exikarhi ka ku yingisa mina ivi mi tshama laha kaya kumbe ku va Vakreste ivi mi suka laha ndlwini.” N’wana lowa mativula, ku nga jaha leri vulavulaka hi ku rhula, xikan’we-kan’we u sungule ku longa leswaku a ta famba. Tatana loyi u huwelele a ku: “E-e! Leswi hinkwenu mi nga vana lava xandzukaka, swa antswa ku fa mina.” Kutani u hume endlwini hi xihatla, a ri karhi a landziwa hi ndyangu wakwe, lowu a wu n’wi kombela leswaku a nga tidlayi. Hi ku khumbeka hi swikombelo swa vona, u tlhelele ekaya.
Endzhaku ka nkarhi wo leha. Tatana loyi u sungule ku vona ku tirha ka ntiyiso wa Bibele emahanyelweni ya vana vakwe. Siku rin’wana u hlangane ni munghana wakwe loyi a n’wi sola, loyi sweswi a nga munhu la tsaneke, loyi a nga te: “Vana va mina va ndzi khomise tingana swinene. Va ndzi hembela naswona va ndzi yivela.” Kambe tatana loyi vana vakwe a va dyondza Bibele ni Timbhoni ta Yehovha u te: “Va mina vana va hambanile ni va wena! Va ndzi komba musa swinene naswona va ndzi pfune ku hakela ni xikweleti xa movha wa mina nkarhi lowu a ndzi nga tirhi.”
Namuntlha, vanhwanyana lavanharhu ni mana wa vona va khuvuriwile. N’wana un’wana wa mufana i phayona ro hlawuleka. Ku vuriwa yini hi khale ka tatana la tiyeke ni loyi a a sihalala? Sweswi u ni xinghana naswona u ve kona eXitsundzuxweni.
Yehovha u hakele n’wana lowa jaha ni vamakwavo vanharhu va xisati kun’we ni mana wa vona hikwalaho ka xivindzi xa vona eka Yena. Sweswi i vachumayeri va Mfumo lava hisekaka, va tsakisa mbilu ya Yehovha.—Swivuriso 27:11.