Huvo Ya Vukhongeri Bya Misava Hinkwayo—Xana yi ta Humelela?

MADZANA ya varhangeri va vukhongeri ma hlengeletane eHubyeni ya vumbirhi ya Vukhongeri bya Misava Hinkwayo leyi khomeriweke le Chicago, eIllinois, U.S.A., hi ximumu xa 1993. Vukhongeri hinkwabyo bya Vubudha, Vujagana, Vuhindu, Vuyuda na Vuislem a byi yimeriwile. Valoyi ni vagandzeri va swikwembu-kati a va ri kona na vona. Va kanerisane hi xiphemu xa vona xo herisa nyimpi. Mutshama-xitulu wa huvo u pfumele leswaku “mbirhi-xa-nharhu xa madzolonga lamakulu emisaveni namuntlha ma vangiwa hi vukhongeri.”

Malembe Ya Dzana Lama Hundzeke

Xana huvo yi humelerile? Xiya leswi humeleleke malembe ya dzana lama hundzeke eHubyeni yo sungula ya Vukhongeri bya Misava Hinkwayo. Na yona a yi khomeriwe le Chicago, hi ximumu xa 1893, naswona ku tlula vukhongeri bya 40 a byi yimeriwile. Nhlangano wa Huvo ya Vukhongeri bya Misava Hinkwayo ya pfumela leswaku lava a va ri kona hi 1893, “va pfumele leswaku nhlangano wolowo a wu ri wo sungula eka nxaxamelo wa minhlangano ya mpfangano wa vupfumeri wa matiko hinkwawo leyi a yi ta hoxa xandla eku vumbeni ka ntwanano, ku rhula na nhluvuko. Kambe a swi vanga tano. Xihlawuhlawu xa vukhongeri ni madzolonga ku ve xiphemu xa tinyimpi ta malembe ya 100 lama hundzeke, naswona ni namuntlha swa ha ri tano.” Ha yini ku ve ni ku tsandzeka lokonghasi? Hikuva mianakanyo hinkwayo ya mpfangano wa vukhongeri a yi amukeriwi hi Xikwembu. Bibele yi ri: “Mi nga rhwaleni mpingu wun’we ni lava nga riki vapfumeri.”—2 Vakorinto 6:14-17.

Hi laha ku faneleke nkandziyiso wa Zion’s Watch Tower wa September 1893 wu kombise ku pfumaleka ka nseketelo wa Matsalwa eka Huvo ya Vukhongeri bya Misava Hinkwayo loko hi ndlela ya vutlhari wu ku: “Va cele maribye ya vumba lama tiyisiweke hi ku rhideriwa emarhumbini ya Babilona ni madoroba man’wana ya khale, kambe man’wana a va si ma kuma. . . . A va si kuma ni rin’we ra Muxe na Yoxuwa leri kombisaka leswaku va hlengelete ‘Huvo ya Vukhongeri,’ ya Vamowabu na Vaamoni, na Vaedomu . . . A va si kuma na rin’we leri vulavulaka hi Samuwele wa khale tanihi la rhumeleke rito le Gadi na Ekroni ku kuma vayimeri va vaprista va Dagoni leswaku va tlhandlukela eXilo ku ya khoma nhlengeletano ni vaprista va Yehovha . . . A va kumanga ni rin’we leri a ri vulavula hi Eliya wa khale la nga boha vamba ra dzovo a ri karhi a kunguhata ‘ku hlangana’ ni vaprista va Bali na Moloko leswaku va heta vhiki va kanerisana hi tidyondzo ta vupfumeri bya vona, hi xikongomelo xo kurisa ku xiximana exikarhi ka vukhongeri bya vona.”

Mfumo Wa Xikwembu—Ntshembo Wu Ri Woxe

Huvo ya Vukhongeri bya Misava Hinkwayo a yi nge humeleli. Maphepha-hungu ni vapfhumba va tirhise marito yo tanihi “nkitsikitsi,” “mpfilumpfilu” ni “hasahasa” malunghana ni huvo ya kona. Hi ku ya hi xiviko xin’wana, hambi ma ri maphorisa ma nghenelerile leswaku ma herisa madzolonga lama tlhekekeke kambirhi, lama vangiweke hi ku avana ka politiki. Eka tsalwa ra 1952, huvo yi xaxamete xin’wana xa swikongomelo swa yona tanihi: “Ku simeka Huvo ya Vukhongeri bya Misava Hinkwayo ya hi laha ku nga heriki leyi nga ta tirhisana ni NHLANGANO WA MATIKO eku kondleteleni ka ku rhula ka misava ni ku twanana exikarhi ka vanhu hinkwavo.” Ku hambana ni sweswo, Yesu u vule leswaku Mfumo wa yena a hi xiphemu xa misava leyi. Bibele yi kombisa Mfumo wa Xikwembu wu ri wona ntsena lowu nga ta ololoxa swiphiqo swa vanhu.—Daniyele 2:44; Yohane 18:36.