Xana Mphikizano I Xilotlelo Xa Ku Humelela?

“AKU na xin’wana xa nkoka ku tlula ku hlula.” Namuntlha vo tala va hanya hi ku ya hi marito lawa ma talaka ku tirhisiwa hi muleteri wa bolo ya le Amerika, Vince Lombardi. Sweswi matiko lawa a ma ri ya Vukhomonisi ma hlanganyerile eku dzuniseni ka nawu wa mphikizano. Ku nghenisa mphikizano emabindzwini ya vona ku vuriwa leswaku i ndlela yo bindzula ha yona. Ematikweni ya le Vuxeni vatswari vo tala va hlanganisa vana va vona ni vana van’wana naswona va va rhumela eswikolweni swo nhlokohata leswi swi va dyondzisaka ndlela ya vutlharhi yo pasa xikambelo. Vatswari lava khumbekaka hi mhaka leyi va khorwiseka leswaku ku nghena eka xikolo lexi lavaka vutlharhi lebyikulu i xilotlelo xa vumundzuku lebyi vangamaka.

Vo tala va tshemba swinene leswaku mphikizano i xilotlelo xo humelela. Hi ku ya hi ku tshembela ka vona, vanhu va endle nhluvuko hi ku phikizana. “Mphikizano wo tlakusiwa i xihlovo lexi tiyisaka tinhlengeletano ta mabindzu ta Majapani,” hi ku vula ka tiphesente ta 65,9 ta vafambisi va mabindzu lamakulu lava Federation of Economic Organizations ya le Japani yi vulavurisaneke na vona. Naswona a swi tikomba onge tikhampani ta Majapani a ti humelela hi nkarhi wo karhi. Hambi swi ri tano, xana mphikizano hakunene i xilotlelo xo humelela?

Xana Wa Vuyerisa Hakunene?

Vanhu lava phikizanaka ni van’wana va kombisa langutelo ra vutianakanyi, ra swa mina ku sungula. Va tsaka loko un’wana swi nga n’wi fambeli kahle, va ehleketa leswaku swi ta antswisa xiyimo xa vona. Hi vutianakanyi bya vona va nga ha tirhisa tindlela leti vavisaka van’wana. Xana swi nga ku yisa kwihi loko u hlongorisana ni ku humelela hi mphikizano wo tano? Yasuo loyi a tipeteke emphikizanweni leswaku a ta va munhu wa xiyimo xa le henhla ekhampaneni ya yena, u tsundzuka ndlela ya yena ya khale a ku: “Hi ku lawuriwa hi moya wo phikizana ni ku lava xikhundlha, a ndzi tiringanisa ni van’wana naswona a ndzi titwa ndzi antswa. Loko vanhu volavo se va vekiwe eka xiyimo xa le henhla ka mina, siku rin’wana ni rin’wana a ndzi sola valawuri va khampani. Ku vula ntiyiso a ndzi ri hava munghana na un’we.”

Moya wo phikizana wu nga ha vanga rifu ra xitshuketa. Njhani? Mainichi Daily News ya le Japani yi vula leswaku karoshi, kumbe ku fa hikwalaho ko tirha ngopfu, swi yelana ni mahanyelo ya muxaka wa A. Muxaka wa A yi hlamusela mukhuva wa mahanyelo wa ku langutana ni ntshikilelo wa mianakanyo hi nkarhi wa ku tirha hi matimba, wa mphikizano ni wa ku lwetana. Mutivi wa mbilu ni matirhelo ya yona wa Amerika, Friedman na Rosenman va hlanganisa mukhuva wa muxaka wa A ni vuvabyi bya misiha ya mbilu. Ee, moya wo phikizana wu nga va ni khombo.

Mphikizano exivandleni xa ntirho wu nga ha onha miri kun’we ni ku hlangana nhloko. Xikombiso xin’wana i Keinosuke, loyi a a ri muxavisi wa le henhla, wa vaxavisi lavakulu va timovha eJapani. U tiendlele rhekhodo hi ku xavisa timovha ta nhlayo ya 1 250. Xifaniso xa yena xi kurisiwile ivi xi vekiwa eka kamara leri tirhisiwaka hi ndzawulo ya vakongomisi ehofisi-nkulu ya khampani leyi. Hambi leswi a a nga swi rhandzi ku tirhisa vatirhi-kulobye tanihi buloho ro kuma xikhundlha xa le henhla, khampani yi n’wi susumetele ku endla mphikizano. Hikwalaho, hi lembe rin’we u vabye hi khwiri ni swilondza swa le ndzeni. Hi lembe rero, 15 wa varhangeri eka khampani ya vona va boheke ku tshunguriwa exibedlhele naswona un’we u tisungile.

Ekaya, ku lava ku fana ni vaakelani ku susumeta vanhu leswaku va kombisa swilo leswi va nga na swona evuton’wini, hi mphikizano lowu nga heriki. (1 Yohane 2:16) Leswi swo vuyerisa van’wamabindzu ntsena, swi veka mali emavokweni ya vaxavisi va laha misaveni.—Ringanisa Nhlavutelo 18:11.

Hambi leswi moya wo phikizana wu nga tswalaka ku humelela entirhweni, a swi hlamarisi leswi Hosi Solomoni a xiyeke: “Nḍi ṭunḍukile ntiro hikwawo ni ntiro wihi ni wihi lo’wu nga ni v̌utlhari, kutani nḍi v̌onile leŝaku munhu uṅwana o ni mona e ka uṅwana. Na ŝona i ŝa hav̌a, ni ku lanḍa mheho.” (Eklesiasta 4:4) Xana hi nga ku kuma njhani ku rhula ka mianakanyo tanihi leswi hi hanyaka exikarhi ka vanhu lava phikizanaka? Ku twisisa mhaka leyi, a hi rhangeni hi languta laha mianakanyo ya mphikizano yi sunguleke kona.